“Hngak Peng Ko U”—Biaceih Caan A Phan Cang!
2004/5 kum ah vawlei cung pumpuluk i tuahmi district civui ah chuahmi Hngak Peng Ko U! Brochure hrambunh in hi cawn awk capar hi ṭial a si.
“Nan Bawipa a rat lai ni nan hngalh lo caah hngak peng ko u.” —MATTHAI 24:42, NW.
1, 2. Jesuh nih a ratnak kha zei he dah tlak ngaiin a tahchunh?
MIFIR nih nan sang i inn kha baoh awkah a ngiat ti na hngalh ahcun zeidah na tuah lai? Na dawtmi hna le na thil man sung pawl kha kilven awkah ralring tein na um lai. Cutin na um cu mifir nih zei tikah a rat lai kha cakuat ṭial in an chimh lo caah a si. Anih cu a thli tein ruahlopi in a ra lai.
2 Jesuh nih tahchunhnak a chim tikah mifir thil tining kha voikhatnak tam a rak hman. (Luka 10:30; Johan 10:10) Donghnak caan chung le biaceih dingah a rat hlan caan chung thil a um dingmi kong he aa tlaiin Jesuh nih hitin ralrin peknak bia a chim: “Nan Bawipa a rat lai ni nan hngalh lo caah hngak peng ko u. Hihi philh hlah u: Inn ngeitu nih mifir a rat lai caan kha hngal sehlaw cu hngilh lote in a rak um hnga i mifir kha a inn chungah a luhter hnga lo.” (Matthai 24:42, NW, 43) Jesuh nih a rat lainak kha mifir pakhat ruah lopi in a ratnak he a tahchunh.
3, 4. (a) A rat lainak kong Jesuh ralrinpeknak ngaihnak ah zeidah aa tel? (b) Zei biahalnak hna dah a chuak?
3 Jesuh a rat lai ni taktak kha theih a si lo caah cu tahchunhnak cu aa tlak ngai. Tuan deuh ah Jesuh nih kha bantuk chimchungbia kha hitin a rak chim: “Cu ni le cu can cu zeitik ah dah a si lai, ti kha ahohmanh nih an hngal lo; vancung mi zong nih an hngal lo, Fapa zong nih a hngal hlei lo, Pa lawnglawng nih a hngalh.” (Matthai 24:36) Cucaah a bia a ngaimi hna kha ‘timhciate in um u’ tiah Jesuh nih a rak forh hna. (Matthai 24:44) Jesuh cu Jehovah Biaceihtu in zeitik caan i a rat hmanhah, Jesuh ralrin peknak bia a ngaimi hna cu timhciate in le aa tlak tein an um lai.
4 A biapimi hi biahalnak cheukhat hi a chuak: “Jesuh ralrin peknak kha vawlei mi hna ca lawng ah maw a si, asiloah Khrihfa taktak hna tah ‘hngah peng’ a hau maw? Zeiruangah ‘hngah peng’ cu a biapit, zeitindah hngah peng khawh a si?
Ahote Ca Ralrinpeknak Dah A Si?
5. “Hngak peng ko u” timi ralrinpeknak bia hi Khrihfa taktak hna he aa pehtlai ti kha zeitindah kan hngalh?
5 A ra laimi harnak kong ralrinpeknak bia a hna aa phih kanhmi hna caah Bawipa ratnak cu mifir ratnak bantuk taktak a si lai. (2 Piter 3:3-7) Khrihfa taktak a simi hna caah tah a si ve lai maw? Lamkaltu Paul nih zumtu hawi sinah hitin ca a rak ṭial: “Zan ah mifir an rat bantuk khin Bawipa Ni cu a ra lai ti kha nanmah hrimhrim nih nan hngalh ko.” (1 Thesalon 5:2) “Bawipa ni cu a ra lai” ti cu a fiang. Asinain hngak peng ko u timi kha biapi chia loin kan um awk a si maw? Jesuh nih a zultu pawl sin i a chimmi hi bia hi zohhmanh: “Mi Fapa cu nan i rin lo caanpi ah a ra ko lai.” (Matthai 24:44) Jesuh nih Pennak kha pakhatnak ah chia u tiin a zultu pawl a rak forh hna lioah, hitin ralrin a rak pek hna: “I ralring ve u, zeicahtiah a ra lai tiah nan zumh lo caan ah khin Mi Fapa cu a ra ko lai.” (Luka 12:31, 40) Cucaah Jesuh nih “hngak peng ko u” tiin ralrinpeknak bia a chim lioah a lung chungah a zultu pawl an um ti cu a fiang lo maw?
6. Zeiruangah ‘hngah peng’ a hauh?
6 Zeiruangah ‘hngah peng’ le ‘timhciate in um peng’ a hauh? “Cu caan ahcun mi pahnih lo ah rian an ṭuan lai; pakhat cu kalpi a si lai i pakhat cu nganhta a si lai. Nu pahnih cu sum an su lai, pakhat cu kalpi a si lai i pakhat cu nganhta a si lai” tiah Jesuh nih a ti. (Matthai 24:40, 41) Timhciate in a ummi hna cu Pathian zei i a rel lomi hi vawlei hrawh a si tikah “kalpi” asiloah khamh an si lai. A dang tu cu anmah ca ṭhatnak lawng an kawl caah hrawh awkah “nganhta” an si lai. Cu hna ahcun biatak hngalh hnuah Pathian ni a hngak peng lomi hna an i tel kho.
7. Zeitik ah donghnak caan a phanh lai kan hngalh lo caah zeitindah kan um khawh?
7 Chan hlun donghnak ni taktak kan hngalh lomi nih Pathian kha lungthin thiang tein kan biak ti langhternak caanṭha a kan pek. Zeicah cutin kan chim khawh? Donghnak caan hi naih dawh a lo men lai lo. Khrihfa cheukhat nih cutin an ruah caah Jehovah rian ah an lungthawhnak a zor cu ngaihchiat awk ngai a si. A taktak ti ahcun, Jehovah sin pumpeknak kan tuah lioah a rian ṭuan awkah kan lungthin dihlak in kan rak i pe cang. Donghnak a phak lai te lawngah kan ṭan a si ahcun cu nih cun Jehovah lung a lawmhter lai lo. Zeicahtiah Jehovah cu lungthin kha a zoh.—1 Samuel 16:7.
8. Jehovah kan dawtnak nih hngah peng awkah zeitindah a kan forh?
8 Jehovah kha kan dawt taktak ruangah, a duhnak tuahnak ah lunglawmhnak nganpi kan ngei. (Salm 40:8; Matthai 26:39) Jehovah rian kha a zungzal in ṭuan kan duh. Kan ruahnak leng in sau deuh hngah a hauh ruangah cu kan duhnak cu a ṭum hlei lo. Jehovah ni nih aa tinhmi a tlinter lainak kha lungtho tein kan i ruahchan caah kan hngah peng. Lungtho tein Pathian lungton kan duhnak nih a Bia in a kan cawnpiakmi kha zul in kan nunnak ah Pennak hmasa bik chiah awkah a kan forh. (Matthai 6:33, NW; 1 Johan 5:3) Hngah pengnak nih ni fate kan biakhiahnak le kan nunning cungah zeitindah hmual a ngeih ti kha zoh u sih.
Na Nunnak Cu Khoika Lei Dah A Panh?
9. Zeicah hi vawlei mi hna nih kan caan a biapitnak kha a rannak in hngalh an herh?
9 Nihin mi tampi nih harnak ngan hna le lau awk thil hna ni fate a um ti an hngalh lawng si loin, an nuncan kha an lung a si men lai lo. Sihmanhsehlaw, hi vawlei thil umtuning i a sullam taktak hi an hngal maw? “Chan donghnak” ah kan nung ti hi tah an hngal maw? (Matthai 24:3) Hmun kip ah a ummi mah zawn lawng ruahnak, zangennak le Pathian zei i a rel lomi hna lungput nih “ni hmanung bik” caan a si ti a langhtermi hi tah an hngal maw? (2 Timote 3:1-5) Cu thil vialte hna a biapitnak kha hngal in an nunnak hi khoika lei dah a panh ti kha a rannak in an ruah a hau.
10. Kan hngah peng ko ti kha a fian nakhnga zeidah kan tuah lai?
10 Kannih tah zeitindah? Kan rian, kan ngandamnak, kan innchungkhar le biaknak kongah ni fatin te biachahnak tuah kan hau. Baibal nih zeidah a chim ti kha kan hngalh i khakha tuah kan i zuam. Cucaah, hitin bia kan i hal awk a si: ‘Khuasaknak ca lungretheihnak nih thlaraulei in lam a ka pialter maw? Ka duhmi kaa thim tikah hi vawlei hmuhning le ruahning ka ngei maw?’ (Luka 21:34-36; Kolose 2:8) Jehovah kha kan lung chung dihlak in kan i bochan i kanmah fimnak kan i rinh lo ti kha langhter i zuam peng a herh. (Phungthlukbia 3:5) Cuti cun Pathian vawlei thar ah “nunnak taktak a simi” zungzal nunnak kha kan hmuh lai.—1 Timote 6:12, 19.
11-13. (a) Noah chan (b) Lot chan i a cangmi thil umtuning in zeidah kan i cawn khawh?
11 A hngak pengmi si awk a kan bawm khomi zohchunh awk ralrinpeknak tampi Baibal chungah a um. Noah chanah zeidah a rak cang ti kha ruat hmanh. Pathian nih ralrinnak pek loin a rak um hna lo. Sihmanhsehlaw Noah le a innchungkhar dah ti lo nih cun zei ah an rak rel lo. (2 Piter 2:5) Cu kong he aa tlaiin Jesuh nih hitin a rak chim: “Mi fapa a rat cu Noah chan i thil umtuning bantuk kha a si lai. Tilian a tlun hlanah khan cun, Noah lawng chung i a luh ni tiang khan, an ei an ding an i ṭhi an i um i tilian a hung tlun taktak i a fenh dih hna hlan tiang kha cu zeihmanh an hngal lo. Mi Fapa a rat tikah cun cu bantuk cun a si lai.” (Matthai 24:37-39) Mah khan zeidah kan cawn khawh? Pathian nih hmasa bik ah chia u tiah a kan forhmi thlarau lei rian ṭuan loin ṭuan tawn lengmangmi vawlei rian ah kan rian a tam a si ahcun, kan umtuning kha fak piin tuaktan a hau.—Rom 14:17.
12 Lot chan kong kha ruat rih hmanh. Lot le a chungkhar umnak Sodom khua cu thilri ngeihchiah lei cun a rum ngai nain, ziaza lei tu cun a si a fak ngai. Jehovah nih cu khua hrawh awkah a vancungmi kha a rak thlah hna. Lot le a chungkhar kha Sodom khua in zaam u hnulei zoh hlah u tiah cu vanmi nih cun an rak ti hna. Vanmi nih an forh hna bantukin khua cu an chuah tak. Asinain, Lot nupi cu Sodom khua i an innlo kha a sia a herh i nawlngai loin, a hnulei aa mer caah a nunnak a rak sung. (Genesis 19:15-26) Kan hmailei kong he aa tlaiin Jesuh nih hitin ralrin a kan pek: “Lot nupi kha va philh hlah u.” Mah ralrinpeknak cu kan ngai maw?—Luka 17:32.
13 Pathian ralrinpeknak a ngaimi hna cu luatnak an hmu. Noah le a innchungkhar, Lot le a fanule cungah cutin a rak si. (2 Piter 2:9) Mah i zohchunh awk i ralrinpeknak kha ṭha tein kan ruah tikah dinnak a duhmi hna ca i khamhnak thawngpang zong in thazang kan hmu. Mah nih khan “dinnak a umnak hmun vanthar le vawlei thar” Pathian kamhmi tlin lainak kha fek tein ruahchannak a kan ngeihter.—2 Piter 3:13.
‘Biaceih Caan A Phan Cang’!
14, 15. (a) Biaceih “caan” ah zeidah aa tel? (b) ‘Pathian ṭihnak le a lianhngannak thangṭhatnak’ ah zeidah aa tel?
14 Kan hngah peng lioah zei thil a hung um lai tiin dah kan i ruahchan khawh? Pathian tinhmi aa changchang in zeitindah a tlin lai ti kha Biathlam cauk nih a langhter. Timhciate in kan um khawh nakhnga a chimmi ningin nun cu a biapi ngaingai. Khrih kha vancung ah bawi ṭhutdan i ṭhutter a si kum 1914 in aa thawkmi “Bawipa ni” chungah a cang dingmi thil kha fiang tein chimchung a si. (Biathlam 1:10, NW) Cun Biathlam cauk nih ‘zungzal Thawng Ṭha thanh awk’ i rianpek a simi vanmi pakhat cungah lungthin a kan pekter fawn. Mah vanmi nih khan aw thang piin hitin a rak thanh: “Pathian kha ṭih u law a lianhngannak kha thangṭhat u. Zeicahtiah amah nih minung vialte bia a ceih hna lai caan kha a phan cang.” (Biathlam 14:6, 7) Cu biaceih “caan” cu caan tawite lawng a si; cu ah cun chimchungbia nih a chim bangin ralrin peknak le biaceihnak aa tel. Kannih cu cu caan ah kan nung.
15 Biaceih caan a dongh hlan atu ah, “Pathian kha ṭih u law a lianhngannak kha thangṭhat u” tiah forh kan si. Mah kha zeitindah kan tuah khawh lai? Pathian ṭihnak nih ṭhatlonak khan a kan merter awk a si. (Phungthlukbia 8:13) Pathian kha kan upat a si ahcun, upatnak nganpi he a bia kan ngaih lai. A Bia Baibal hmaan tein rel kho lo tiangin kan rian kan i tamter lai lo. Cun Khrihfa pumhnak in a kan cawnpiakmi kha thil te nau ah kan ruat lai lo. (Hebru 10:24, 25) Pathian i a Messiah Pennak kong thawng ṭha thanhnak tinvo kha kan upat lai i lungtho tein kan ṭuan lai. Jehovah kha kan lungthin dihlak in a zungzal kan i bochan lai. (Salm 62:8) Jehovah cu Universe ah Cungnung Bik a si ti kan hngalh caah amah kha kan upat i kan nunnak ah a phunglam kha tangdor tein kan zulh. Pathian kha ṭih taktak in a lianhngannak kha kha bantuk lam phunphun in na upat maw?
16. Biathlam 14:8 i langhtermi Babilon Khualipi biaceihnak cu a tling diam cang tiah zeicah kan chim khawh?
16 Biathlam angan 14 nih biaceih caan i a um ding thil kha a langhter. Babilon Khualipi a simi a hmaan lomi biaknak vawlei empire kong kha hmasa bik ah langhter a si i vancungmi pahnihnak nih “Minu cu a ril cang! Babilon khuapi cu a ril cang!” tiah a ti. (Biathlam 14:8) A si, Pathian hmuhnak ahcun Babilon Khualipi cu a ril cang. Chiti thuhmi Jehovah salle hna cu kum tampi chung minung a ukmi Babilon cawnpiaknak le tuahsernak hna i sal sinak in 1919 kum khan an luat cang. (Biathlam 17:1, 15) Cu caan thawk cun a hmaanmi biaknak ṭhanchoter awkah i pumpe in an ṭuan. Cuticun vawlei pumpi ah Pathian Pennak thawng ṭha chimnak rian cu ṭuan a si cang.—Matthai 24:14.
17. Babilon Khualipi chungin chuah awkah zeidah kan tuah lai?
17 Babilon Khualipi biaceihnak cu cu lawng cu a si lo. A donghnak hrawh a si lainak kha a phan cang lai. (Biathlam 18:21) Cu ruangah “amah [Babilon Khualipi] chung khan chuak tuah u! Sualnak a tuahmi ah khan i tel hlah u” tiah khuazakip mi hna kha forh an si. (Biathlam 18:4, 5) Babilon Khualipi chung khan zeitindah chuah khawh a si? A hmaan lomi biaknak he i pehtlaih lo men in a za lo. A min a thangmi puai hna le phunglam hna, hi vawlei nih a onhmi nupa sualnak ziaza ṭhatlonak, khuachia thiamnak le thil dangdang aa telmi nuamhngaihnak ahhin Babilon huham aa tel. Pathian ni kha kan hngah peng a si ahcun, kan tuahsernak in siseh kan lung duhnak in siseh, a zeilei lei paoh in Babilon Khualipi he kan i ṭhen taktak kha langhter a biapi.
18. Biathlam 14:9 ah zeidah langhter a si i, hliphlau tein a ummi Khrihfa hna nih zeidah ralring tein an hrial?
18 Biathlam 14:9, 10 nih ‘biaceihnak caan’ he aa tlaimi a dang zong a chim rih. Vancungmi a dang pakhat nih hitin a ti: “Sahrang le milem a bia i a hmelchunhnak kha a cal ah siseh a kut ah siseh a ngeimi paoh nih cun, Pathian zu, a thinhunnak zu, a thinhunnak hrai chung i ti cawh hrimhrim loin thlet mi kha an din lai.” Zeiruangah a si? “Sahrang le milem” nih a langhtermi uktu minung pawl nih Jehovah nawlngeihnak an cohlan lo caah a si. Hliphlau tein a ummi Khrihfa hna cu an lungput in siseh, an tuahsernak in siseh, a hmaanmi Pathian Jehovah i cungnung Bik nawlngeihnak a cohlang lomi hna kha an cung huham ngeihter lo awk an i ralring. Pathian Pennak cu vancung ah dirh a si cang, minung uknak vialte kha a donghter dih hna lai i cu Pennak cu zungzal in a hmun lai ti kha Khrihfa pawl nih an hngalh.—Daniel 2:44.
A Biapi in Ruahnak Lungput Thlau Hlah
19, 20. (a) Donghnak caan kan naih chin lengmang bangin, Satan nih zeidah a tuah hrimhrim lai kan ti khawh? (b) Zei tuah dingah dah biakhiah awk a si?
19 Donghnak caan a naih chin lengmang bangin, hneknak le tukforhnak hna cu an zual chin. Chan hlun i kan nun chung paoh cu kanmah tlinlonak ruangah le damlonak, tarnak, dawtmi thihnak, lungfahnak, Pathian Bia chim kan i zuam lioah ngaih a huam lomi he i ton i lungdonghnak le thil dangdang ruangah harnak kan tong. Thawngṭha kan chimmi ngolter awkah asilole Pathian phunglam in pialter awkah Satan nih kan tonmi hneknak hna kha caanṭha la in hman a duh tuk ti kha zeitik hmanhah philh hlah. (Efasa 6:11-13) Atu hi, kan chan he aa tlaiin a biapi in ruahnak lungput thlau caan a si lo!
20 Lung dongh awkah hneknak tampi kan ton lai kha Jesuh nih a theih caah, hitin ruahnak a kan cheuh: “Nan Bawipa a rat lai ni nan hngalh lo caah hngak peng ko u.” (Matthai 24:42, NW) Cucaah zei caan ah dah kan nun tiin hliphlau tein um peng u sih. Kan tha derter in lam a kan pialter khomi Satan thil tining kha i ralring fawn u sih. Pathian Pennak thawng ṭha kha voidang nakin lungtho tein chim awkah biakhiak hna u sih. Cu vialte lengah “Hngak peng ko u” timi Jesuh ralrinpeknak kha zul u sih law a biapi in ruahnak lungput ngei peng u sih. Cutin kan tuahnak thawngin, Jehovah thang kan ṭhatter lai i zungzal in thluachuah kan hmu lai.
Zeitindah Na Leh Lai?
• “Hngak peng ko u” timi Jesuh ralrinpeknak hi Khrihfa taktak hna he aa pehtlai ti kha zeitindah kan hngalh?
• ‘Hngah peng’ awkah Baibal chung i zei ralrin peknak zohchunh awk hna nih dah a kan bawmh khawh?
• Biaceih caan cu zeidah a si i, cu caan a dongh hlanah zei tuah awkah dah forh kan si?