Jehovah I Ruahchan Law RalṬha In Um

“BAWIPA i bochan [“ruahchan,” NW] u! Zumhnak ngei u, nan lung dong hlah u! BAWIPA cu i bochan ko u!​​—⁠SALM 27:⁠14.

1. Ruahchannak cu zeitluk biapi dah a si i Cathiang nih mah biafang kha zeitindah a hman?

A HMAANMI ruahchannak cu ceunak bantuk a si. Mah nih atu tonmi harnak pin tiang a hmuhter i hmailei caan kha ralṭha le lunglawm in ton khawh awkah a kan bawmh. Jehovah lawng hi a hmaanmi ruahchannak hram a si i thaw a chuah hnawhmi a Bia in mah kha a kan pek. (2 Timote 3:16) A taktak ah, “ruahchannak,” “ruahchan” le “i ruahchan” timi biafang hna cu Baibal ah voi 160 leng aa tel i thil ṭha pakhatkhat kha lungtho ngai in a si hrimhrim lai ti i ruahchannak le i ruahchanmi thil kha a langhter.a Cu ruahchannak cu zei hrihhram hmanh a ngei lomi asiloah a si kho hnga lomi duhnak sawhsawh men a si lo.

2. Ruahchannak nih Jesuh nunnak kha zeitindah ṭhatnak a pek?

² Jesuh nih a ton liomi hneksaknak le harnak pinlei kha a cuanh i Jehovah kha aa ruahchan. “Hmailei lunglawmhnak aa ruahchanmi ruangah khan vailam cung i thih ningzahnak cu zeihmanh ah a rel lo i atu cu Pathian ​bawiṭhutdan orhlei kam ah khan a hung ṭhu cang.” (Hebru 12:⁠2) Jesuh nih Jehovah ​nawlngeitu ngan bik a si fianternak le A min thianternak ah a lungthin dihlak a chiah caah zei a ton hmanh ah Pathian nawl ngaihnak lam in a pial bal lo.

3. Ruahchannak nih Pathian salle nunnak kha zeitindah ṭhatnak a pek?

³ Siangpahrang David nih ruahchannak le ralṭhatnak an i pehtlaihnak kha hitin a langhter: “BAWIPA cu i bochan [“ruahchan,” NW]! Zumhnak ngei u, nan lung dong hlah u! BAWIPA cu i bochan ko u!” (Salm 27:14) Lung ṭhawn kan duh a si ahcun kan i ruahchannak kha zeitikhmanh ah a fiang setsai lomi kan siter lai lo. Kan lungthin chungah fiang tein kan umter lai i kan sunsak lai. Cuticun Jesuh nih a zultu pawl a pekmi hna rian ah kan i tel tikah amah bantukin ralṭhatnak le zuamnak kan langhter khawh lai. (Matthai 24:14; 28:​19, 20) Ruahchannak cu zumhnak le dawtnak bantukin a biapi i inkhawhnak a ngeihtermi sining a si caah Pathian salle hna nunnak ah a lang ngaimi ziaza a si.​​—⁠1 Korin 13:⁠13.

Naa ‘Ruahchannak Cu A Ṭhang Maw?’

4. Chiti thuhmi hna le an hawile “tuu dang” hna nih zeidah ngangngan ngai in an hngah?

⁴ Pathian miphun hna nih a ṭha tukmi hmailei caan an ngei. Chiti thuhmi Khrihfa hna nih van ah Khrih he rianṭuan ṭi ding kha ngangngan ngai in an hngah. “Tuu dang” hna tu cu, “thutnak sal sinak khan luatter an si lai i Pathian fale [vawlei lei] hna luatnak sunglawimi” kha an i ruahchan. (Johan 10:16; Rom 8:​19-​21; Filipi 3:​20) Mah “luatnak sunglawi” ah sualnak le cu nih a chuahtermi ṭihnung in luatnak aa tel. “Laksawng ṭha le laksawng tlamtling” petu Jehovah nih a cungah zumhawktlak in a ummi hna kha a ṭha bikmi laksawng a pek hna lai ti cu a fiang.​​—⁠Jeim 1:​17; Isaiah 25:⁠8.

5. Zeitindah kan i “ruahchannak cu a ṭhan” lai?

⁵ Khrihfa ruahchannak cu kan nunnak ah zeitluk biapi dah a si awk a si? Rom 15:13 ah hitihin kan rel: “Thiang thlarau ṭhawnnak thawngin nan i ruahchannak cu a ṭhan lengmang nakhnga, ruahchannak hram Pathian nih cun amah nan zumhnak thawngin lunglawmhnak le daihnak he in khahter ko hna seh.” A si ko, ruahchannak cu mui lak i phazawngdaing tluk ceo khi si loin zinglei i nika ceunak bantukin mi pakhat a nunnak kha daihnak, lawmhnak, tinhnak le ralṭhatnak in a khahter. Pathian Bia kha kan zumh i a thiang thlarau kan hmuh tikah kan i ‘ruahchannak cu a ṭhang lengmang’ ti kha i cinken. Rom 15:4 nih hitin a ti: “Ca Thiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Ca Thiang chung i aa ṭialmi vialte cu kanmah cawnpiaknak caah a si.” Cucaah hitihin i hal: ‘Kaa ruahchannak a ceu nakhnga nifa tein Baibal ka rel maw? Pathian thlarau hmuh awkah thla ka cam lengmang maw?’​​—⁠Luka 11:⁠13.

6. Kan i ruahchannak a ceu khawh peng nakhnga zeidah ralring tein kan hrial lai?

⁶ Zohchunhawk ṭha Jesuh cu Pathian Bia in thazang a rak hmu. Amah kong ṭha tein kan ruahnak thawngin ‘lungdonghnak’ kha kan hrial khawh lai. (Hebru 12:⁠3) Kan lungthin chungah Pathian pekmi ruahchannak a hun fian setsai lo ahcun asiloah vawlei thilri le tinhnak lei ah kan pial a si ahcun a rauh hlan ah thlarau lei ah kan der lai i a thiangmi ziaza nunphung ningin nun awkah ralṭhatnak kan ngei ti lai lo. A donghnak ah kan “zumhnak” a rawk kho. (1 Timote 1:​19) A hmaanmi ruahchannak nih cun kan zumhnak kha a ṭhawnter.

Ruahchannak​​—⁠Zumhnak caah A Biapi

7. Zeiti lam in dah ruahchannak cu zumhnak caah a biapit?

⁷ “Zumhnak ngeih kan ti hi, kan i ruahchanmi kan hmuh ṭheu lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh hi a si” tiah Baibal nih a ti. (Hebru 11:⁠1) Cucaah, ruahchannak cu zumhnak in a ṭe chinmi men si loin zumhnak he ṭhen khawh lomi a biapi tukmi cheubang a si. Abraham kong hi ruat hmanh. Minung hmuhnak in zoh ahcun, fapa pakhat nan hrin lai tiah Jehovah nih bia a kamh hna ah khan amah le a nupi Sarah cu fa ngeih an luan cang. (Genesis 17:​15-17) ​Abraham nih zeitindah a leh? “Ruahchan ding zeihmanh a um lo zongah khan a rak zumh ṭhiamṭhiam, a rak i bochan [“ruahchan,” NW] ṭhiamṭhiam caah ‘miphun tampi hna pa,’ ah khan a cang.” (Rom 4:​18) Pathian pekmi ruahchannak nih fapa ka hrin lai tiah Abraham kha fekte in a rak zumhter. A zumhnak nih aa ruahchannak kha a ceuter i a ṭhawnter chin. Abraham le Sarah nih an inn le an rualchan kaltak in miphun dang ram ah thlam chung i khuasak tiang ralṭhatnak an rak ngei!

8. Zumhawktlak in inkhawhnak langhternak nih ruahchannak kha zeitindah a ṭhawnter?

⁸ Abraham nih Pathian nawlngaih awk a har lio caan hmanh ah a lungthin dih lakin Jehovah nawl a ngaihnak in aa ruahchannak kha a rak ceuter. (Genesis 22:​2, 12) Cu bantukin, Jehovah rianṭuannak ah nawlngaihnak le inkhawhnak thawngin thluachuah kan hmu lai tiah fekte in kan zumh khawh. “Inkhawhnak nih cun hneksaknak kan in khawh a langhter i cu a langhternak cu ruahchannak hrampi kha a si. . . . ruahchannak cu pakpalawng men a si lo” tiah Paul nih a rak ṭial. (Rom 5:​4, 5) ​Cucaah hiti zong hin a rak ṭial: “Nan i ruahchanmi cu a tlin nakhnga, bawmh duhnak lungthin nan ngeih tawnmi kha a dongh tiangin ngei cio ko u, ti kan in duh hna.” (Hebru 6:11) ​Jehovah he a ṭhami pehtlaihnak cungah aa hngatmi mah bantuk a ṭhatnak lei in hmuhnak nih zei bantuk harnak hmanh kha ralṭha tein le lunglawmhnak he hmanh a kan tonter khawh.

“Nan I Ruahchanmi Thawng Khan Nan Tha Nuam Ko U”

9. Zei tuah lengmangnak nih dah ‘ruah-​channak ah aa nuammi’ si awk a kan bawmh khawh?

⁹ Pathian pekmi ruahchannak cu vawlei pekmi zei nak hmanh in a let tampi in a ṭha deuh. Salm 37:34 nih hitin a chim: “BAWIPA cu i bochan u law a nawl kha zul tuah u; ram kha co awkah thazang an pek hna lai i miṭhalo cu pawnchuah an si kha nan hmuh lai.” Zei thil kong paoh ah ‘kan i ruahchanmi thawng khan kan tha a nuamh’ awk a si taktak ko. (Rom 12:​12) Asinain, cuti i nuamh khawhnak dingah kan i ruahchanmi kong kha atu le atu kan ruat lai. Pathian pekmi ruahchannak kong kha na ruat lengmang maw? A tlingmi ngandamnak he lungretheihnak zeihmanh um loin na dawtmi hna he lung a sitermi rian a umnak Paradis ah ka um tiin na mitthlam ah na cuanter kho maw? Kan cauk pawl ah cuantermi Paradis i hmunhma hna kha na ruat maw? Cu bantukin ruahnak cu aa dawh ngaimi khuaram hmuh khawh awkah thlalangawng hnawh he khin aa lo. Thlalangawng thlalang hna kha hnawh loin chiah ahcun hnawm tete an i benh lai i khuaram a fiang ti lai lo. Cu tikah, thil dang ah kan lungthin a um kho. Zeitik-hmanh ah cuticun siter hlah u sih!

10. Laksawng i ruahchannak nih Jehovah he kan i pehtlaihnak kha zeicah ṭha tein a langhter?

¹⁰ Jehovah kan biaknak a biapi bik a ruang cu kan dawt caah a si. (Marka 12:30) Asinain, kan hmuh hngami laksawng kha ngangngan ngai in kan hngah awk a si. Jehovah thengte nih cuticun tuah hna seh ti a kan duh! Hebru 11:6 nih hitihin a chim: “Ahohmanh nih zumhnak loin Pathian lungton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh.” Jehovah nih Laksawng Petu in hmuh kha zeicah a duh? Zeicahtiah mah nih khan vancung kan Pa fiangte in kan hngalh kha a langhter caah a si. Pathian cu a siang i a fale kha a dawt hna. “Hmailei le ruahchannak” ngei hlah u sih law zeitluk in dah kan lungdongh a fawi lai i ngaihchia in kan um lai ti kha ruat hmanh.​​—⁠Jeremaih 29:​11, NW.

11. Pathian pekmi ruahchannak nih fim ngai in biakhiah awkah Moses kha zeitindah a bawmh?

¹¹ Pathian pekmi ruahchannak ah lungthin a chiami hna lak i zohchunhawk ṭha pakhat cu Moses a si. Moses cu “Faraoh fanu fapa” in nawl a ngei, upat hmaizahmi a si i Izipt ram chawhlawn vialte kha a duh paoh in a hman khawh. Hi hna hi maw aa thim lai asiloah Jehovah biak dah? Moses nih Jehovah biak kha ralṭha ngai in aa thim. Zeiruangah? “Hmailei hmuh laimi laksawng kha a rak i ruah chih caah a si.” (Hebru 11:​24-​26) A si ko, Moses nih Jehovah pekmi ruahchannak lawng a rak i ruah chih ti cu a fiang.

12. Khrihfa ruahchannak cu luchin he zeicah aa lawh?

¹² Lamkaltu Paul nih ruahchannak kha luchin he a rak tahchunh. Langhternak kan luchin nih khan kan lungthin kha a kilven, fim ngai in bia a kan khiahter khawh, a hmasa chiah ding kha hmasa a kan chiahter i kan zumhfehnak kha a hmunhter. (1 Thesalon 5:⁠8) Mah langhternak luchin cu naa chinh peng maw? Cuti naa chinh peng a si ahcun Moses le Paul bantukin ‘bochan awk a tlak lomi rumnak kha i bochan loin zeizong vialte siang ngai in a kan petu Pathian kha naa bochan’ ve lai. Chan ti luan ningin kal loin pumpak siṭhatnak kha hlawt awkah ralṭhatnak ngeih a herh ti cu a hmaan ko! A taktak ah, Jehovah a daw i amah aa ruahchanmi hna hmuh hngami “nunnak taktak” tluk in a sung lomi thil kha zeiruangah kan duh lai?​​—⁠1 Timote 6:​17, 19.

“Kan Kaltak Bal Hna Lai Lo”

13. Jehovah nih zumhawktlak a salle kha zeidah bia a kamh hna?

¹³ Hi vawlei nih ‘nganfahnak’ a tuar chin lengmang caah atu i thil umtuning aa ruahchanmi hna nih an tonmi harnak hna kha biatak tein an ruah awk a si. (Matthai 24:⁠8) Sihmanhsehlaw Jehovah aa ruahchanmi hna nih cun an ṭih lo. Annih cu “himte in an um lai i vanchiatnak zeihmanh ṭih loin zalongte in an um lai.” (Phungthlukbia 1:33) Zeicahtiah annih nih atu thil umtuning kha i ruahchan loin Paul i hi ruahnak cheuhmi kha lunglawm in an zulh caah a si: “Tangka hi duh tuk hlah u, nan ngeihmi ah khan nan lung awi ko u. Zeicahtiah Pathian nih, ‘Kan kaltak bal hna lai lo i kan hlaw bal fawn hna lai lo,’ a ti.”​​—⁠Hebru 13:⁠5.

14. Khrihfa hna nih thilri lei an herhbaunak kongah lungrethei tuk in zeiruangah an um awk a si lo?

¹⁴ Mah biakamnak thawngin Pathian nih a kan zohkhenh lai ti kha zumh lo awk a um lo. Pathian i dawtnak in zohkhenhnak kha Jesuh nih hitin aamah a rak khan: “Cucaah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek ṭhiamṭhiam ko hna lai. Cucaah thaizing kongah lungrethei in um hlah u; thaizing nih cun lungretheihnak cu a zaa in aa ngeih ve ko lai.” (Matthai 6:​33, 34) Pennak caah teimak kan chuah lio caan ah pumsa lei kan herhbaunak ca i rianṭuan a fawi lo kha Jehovah nih a hngalh. Cucaah Pathian nih kan herhbaunak kha zohkhenh khawhnak le duhnak a ngei ti kha thinlung dihlak in zum u sih.​​—⁠Matthai 6:​25-​32; 11:​28-30.

15. Khrihfa hna nih zeitindah an ‘mit fim’ tein an chiah?

¹⁵ Kan mit fim tein kan chiahnak in Jehovah kan i bochan kha kan langhter. (Matthai 6:​22,23) Mit a fimmi cu titernak zeihmanh a ngei lo, tinhnak hmaan a ngei i hakkauhnak le mah pumpak ṭhatnak ca timhnak a ngei lo. Mit fimmi ngeih ti cu sifak ngai in nun asiloah paw cawmnak rian ṭuan duh lo kha a chim duhmi a si lo. Mah can ah, Jehovah rian kha hmasa bik ah chiah in “mah le mah i uk khawhnak” lungthin langhter kha a chim duhmi a si.​​—⁠2 Timote 1:⁠7.

16. Zeicaah mit fim tein chiahnak ah zumhnak ngeih le ralṭhat a herh?

¹⁶ Kan mit fim tein chiah awkah zumhnak ngeih le ralṭhat a herh. Tahchunhnak ah, na rian bawi nih Khrihfa pumhnak hna a um caan ah hmaan tein rian ah luh an fial ahcun ralṭha ngai in thlarua lei kha biapi deuh ah na chia lai maw? A salle zohkhenh dingin ​Jehovah biakammi cungah mi pakhat cu a lung a hrin a si ahcun Satan nih a cungah hneknak tlawmpal a tlunter deuh tikah aa pum ti lai lo. A si, zumhnak kan ngeih lo a si ahcun Satan nih a kan uk lai i kan nunnak i biapi chiah ding kha Jehovah si loin amah nih a chiah lai. Ngaihchia a va si hringhran dah!​​—⁠2 Korin 13:​5.

‘BAWIPA kha I Ruahchan’

17. Zeitindah Jehovah aa bochanmi hna nih atu ah thluachuahnak an hmuh?

¹⁷ Cathiang nih Jehovah aa bochanmi le aa ruahchanmi hna cu zeitikhmanh ah an sung lai lo tiah atu le atu a langhter. (Phungthlukbia 3:​5, 6; Jeremiah 17:⁠7) A hmaan ko, a zeimaw caan ahcun vawlei thilri tlawmpal te he lungsi in an um awk a si ko nain hmailei an hmuh hngami thluachuahnak he tahchunh ahcun sunghnak hmete men ah an rel. Annih nih ‘BAWIPA an i ruahchannak’ le Pathian cungah zumhawktlak in a ummi vialte hna an lungthli tum a tling lai ti an zumhnak kha an langhter. (Salm 37:​4, 34) Cucaah, annih cu atu caan hmanh ah hin an i lawm. “Miding mi hna ruahchannak cu lunglawmhnak a phan, sihmanhsehlaw ​miṭhalo cu ram chungah hin khua an sa kho lai lo.”​​—⁠Phungthlukbia 10:⁠28.

18, 19. (a) Jehovah nih dawtnak in zeidah a kan kamh? (b) Zeitindah Jehovah cu kan orhlei ah kan umter khawh?

¹⁸ Ngakchia pakhat cu a pa kut i tlaih in a kal tikah himnak a hmu i a hna a ngam. Vancung kan Pa he kan kal tikah cuticun kan ruah ve. “Na thinphang hlah ​—⁠ na sinah ka um ko. . . . kan bawmh lai. . . . Keimah cu BAWIPA nan Pathian ka si i ṭhawnnak kan pek hna [“na orhlei kut in kan tlaih lai,” NW]; ‘Nan thinphang hlah u, kan bawmh hna lai,’ tiah keimah nih ka ti,” tiah Jehovah nih Israel mi kha a ti hna.​​—⁠Isaiah 41:​10, 13.

¹⁹ Jehovah nih kan kut in a kan tlaih​—⁠zeitluk lunglawmh awk dah a si! “BAWIPA ka sinah a um cu ka hngalh zungzal, amah cu keimah he naih tein [“ka orhlei ah,” NW] a um i zeihmanh nih an ka hnin kho lo” tiah David nih a rak ṭial. (Salm 16:⁠8) Jehovah kha kan “orhlei ah” zeitindah kan umter khawh? Lam pahnih in a si. A pakhatnak cu kan nunnak zeizong kongah Baibal lamhruainak zulhnak in a si. Pahnihnak cu Jehovah nih kan hmai ah a chiahmi a sunglawimi laksawng ah kan lung chiahnak in a si. Salm caṭialtu Asaph nih hitin hla a rak phuah: “Nangmah sin ṭhiamṭhiam ah khan ka um i ka kut in na ka hruai. Ka kalnak dingah khan lungthin na ka cheuh i a donghnak ah cun upatnak he na ka cohlan lai.” (Salm 73:​23, 24) Cu bantuk phun zumhnak in hmailei kha zumhnak ngei in kan ton khawh.

“Nan Luatnak Cu A Nai Cang”

20, 21. Jehovah aa ruahchanmi hna kha zei bantuk hmailei nih dah a hngah hna?

²⁰ Ni nikhat a liam paoh ah Jehovah kan orhlei ah umter a biapi deuhdeuh. A rauh hlan i a hmaan lomi biaknak hrawh a si tikah Satan vawlei nih hlan ah a rak um bal lomi harnak nganpi a ton lai. (Matthai 24:21) Zumhnak a ngei lomi mi hna cu ṭihphang in an um lai. Asinain, cuti aa tuai lio caan ah Jehovah i ​ralṭhami salle hna cu an i ruahchanmi ah khan an i lawm lai! “Mah hi vialte hi um hram aa thawk tikah dir u law cunglei kha zoh tuah u, zeicahtiah nan luatnak cu a nai cang,” tiah Jesuh nih a rak ti.​​—⁠Luka 21:⁠28.

²¹ Cucaah Pathian pekmi ruahchannak ah khan i lawm u sih law Satan zernak i hlenter hlah u sih. Caan khatte ah, zumhnak, dawtnak le Pathian ṭihnak kha ṭhanter u sih. Cuti kan tuahnak thawngin zei bantuk thil sining tang hmanh ah Pathan nawl ngaih awk le Khuachia kha doh awkah ralṭhatnak kan ngei lai. (Jeim 4:​7, 8) A si ko, “BAWIPA cungah a ruahchannak a chiami vialte hna, lungṭhawng le thazang ṭhawng in um ko u!”​​—⁠Salm 31:⁠24.

[A Tanglei Fianternak]

Na Let Kho Lai Maw?

Zumhnak le ruahchannak cu zeitindah an i pehtlaih?

• Nunnak ah a biapimi thil hmasa chiahnak ah Khrihfa pakhat kha zumhnak nih zeitindah a bawmh khawh?

• ‘BAWIPA aa ruahchanmi’ hna nih zeiruangah hmailei kha zumnak in an hngah khawh?