Pakpalawng A Si Lomi Ruahchannak

1. Abraham nih fapa ka ngei lai tiah zeicah aa ruahchan peng khawh?

JEHOVAH nih a hawikom Abraham kha a tefa ruang ah vawleicung mi vialte nih thluachuah an hmu lai tiah bia a kamh. (Gen. 15:5; 22:18) Abraham nih Pathian a zumh caah a biakam zong a tling lai ti kha a zumh. Abraham cu kum 100 a si i a nupi cu kum 90 a si. Asinain mah zumhfekmi nupa hna nih fa an ngei kho rih lo. (Gen. 21:1-7) Asinain Baibal nih hitin a ti: “Ruahchan ding zeihmanh a um lo zong ah khan [Abraham nih] a rak zumh ṭhiamṭhiam, a rak i bochan ṭhiamṭhiam caah miphun tampi hna pa ah khan a cang.” (Rom 4:18) Abraham nih aa ruahchanmi cu a rak tling taktak. Caan saupi chung aa ruahchanmi Isak cu a hun hrin. Abraham nih zumhnak a ngeihnak a hrampi a ruang cu zeidah a si?

2. Abraham nih Jehovah biakam cu a tling lai tiah zeicah a zumh khawh?

² Abraham nih Jehovah kong ṭha tein a hngalh caah “Pathian nih bia a ka kamhmi cu a tuah khawh hrimhrim lai” ti kha a zumh. (Rom 4:21) Abraham cu a zumhnak ruang ah Jehovah mithmai ṭha a hmu i miding in cohlan a si. (Jeim 2:23) Rom 4:18 ning in Abraham zumhnak le ruahchannak cu aa pehtlaimi a si. Lamkaltu Paul nih Rom dal 5 ah ruahchannak kong he aa tlaiin zeidah a chim ti kha i ruah hna u sih.

3. Paul nih ruahchannak kong he aa tlaiin zeidah a fianter?

³ Paul nih kan i ‘ruahchannak pakpalawng men a si lonak’ a ruang kha a fianter. (Rom 5:5) Cun ruahchanhnak fehter khawh ning kong hngalhthiam awk zong ah a kan bawmh. Rom 5:1-5 kan i ruah tikah hmailei ah na zumhnak fehter chin khawh ning kong kha ruat. Atu nakin naa ruahchannak zeitindah na fehter chin khawh ti kha na hngalh lai. A hmasa bik ah Paul chimmi pakpalawng a si lomi ruahchannak kong kha i ruah hna u sih.

A Sunglawimi Kan I Ruahchannak

4. Rom 5:1, 2 ah zei kong dah a chim?

⁴ Rom 5:1, 2 rel. Paul nih mah bia hi Rom Khrihfabu sinah a kuatmi hna a si. Unau pawl nih Jehovah le Jesuh kong kha an theih, an zumh i Khrihfa an hung si. Cucaah ‘cu zumhnak thawng in [annih cu] thiam coter [miding in cohlan, NWT] an si’ i thiang thlarau in chiti thuh an si. Cucaah a ṭha tukmi ruahchannak an hun ngei.

5. Chiti thuhmi hna nih zei ruahchannak dah an ngeih?

⁵ Paul nih Efesa khua i chiti thuhmi Khrihfa hna sinah Pathian nih a pekmi hna ruahchannak kong kha ca a kuat hna. Mah ruahchannak ah “mithiang pawl nih an hmuh dingmi thluachuah” kong aa tel. (Efe. 1:18, NWT) Cun Paul nih an i ruahchannak cu khoika ah dah a si lai ti kha Kolose mi hna sin a cakuat zong ah a langhter. “Vancung i nan ca i chiahmi ruahchannak” tiah a ti. (Kol. 1:4, 5) Cucaah chiti thuhmi Khrihfa hna nih an i ruahchanmi cu Khrih he uktu an ṭuanṭinak ding hmun, vancung ah thawhṭhan in zungzal nun ding kha a si.—1 Thes. 4:13-17; Biat. 20:6.

6. Chiti thuhmi unaupa pakhat nih ruahchannak kong he aa tlaiin zeidah a chim?

⁶ Chiti thuhmi hna nih mah ruahchannak kha an sunsak tuk. Chiti thuhmi Unaupa Frederick Franz nih mah ruahchannak kong he aa tlaiin hitin a ti: “Kan i ruahchanmi cu a tling hrimhrim lai i 144,000 a simi kan dihlak nih Pathian nih bia a kan kamhmi kha kan co lai. Mah thluachuah cu kan ngeihmi zei dang thil vialte nakin a ṭha deuh lai.” Kum tampi chung zumhfek tein Pathian rian a ṭuan hnu 1991 ah Unaupa Franz nih hitin a ti: “[Kan] i ruahchanmi kha kan sunsak peng. . . . Kan hngah deuhdeuh tikah kan sunsak deuhdeuh ve. Kum nuai khat chung hngah a hauh hmanh ah hngah man a phu ko. Kan i ruahchanmi cu hlan nakhmanh in kan sunsak deuh.”

7-8. Zei ruahchannak dah kan ngeih? (Rom 8:20, 21)

⁷ Tuchan Jehovah a biami lak ah tam deuh cu midang he aa lo lomi ruahchannak kan ngei. Mah cu Abraham nih aa ruahchanmi Pathian Pennak tang ah a ummi vawleicung ah zungzal nun ding timi a si. (Heb. 11:8-10, 13) Paul nih mah a ṭha tukmi ruahchannak kong kha a langhter. (Rom 8:20, 21 rel.) Hmailei Baibal biakam kong na theih hmasa bik lioah zeinihdah na lung aan suk bik? Mi sual si ti loin a tlingmi si lai maw? Asiloah na dawtmi a thimi hna vawleicung paradis ah an thawh ṭhan laimi dah? Pathian nih a kan pekmi mah “ruahchannak” ruang ah thil ṭha tampi naa ruahchan khawh.

⁸ Vancung ruahchannak a ngeimi kan si ah, vawlei ruahchannak a ngeimi kan si ah a sunglawi tukmi mah ruahchannak nih lawmhnak a kan pek. Lunglawmh awk ngai a simi mah kan i ruahchannak cu a fek chinchin kho. Zeitindah a si khawh ti kha Paul nih a fianter. Kan i ruahchannak kong he aa tlaiin Paul chimmi kong kha i ruah hna u sih. Mah nih kan i ruahchanmi cu a tling hrimhrim lai ti kha zumh chinchin awkah a kan bawmh.

Ruahchannak Fehter Khawh Ning

9-10. Paul nunning nih a langhter bantuk in Khrihfa pawl nih zeidah kan i ruahchan khawh? (Rom 5:3) (Hmanthlak zong zoh.)

⁹ Rom 5:3 rel. Paul nih harnak kan ton tikah kan i ruahchannak cu a hung fiang chinchin tiah a ti. Mah nih kan khuaruah a kan harter men lai. Asinain Khrih zultu dihlak nih harnak kan tong lai tiah kan i ruahchan khawh. Paul kong kha ruathmanh. Thessalon khuami hna sinah hitin a ti: “Nan sin i kan um lioah khan a hlankanpi in hremnak kan ing te lai tiah kan rak in chimhchung hna i nan hngalh bantuk in cu bantuk te cun nan cung ah a hung tlung taktak.” (1 Thes. 3:4) Cun Korin khuami hna sinah hitin a ti: “Kan cung i an kan khinhmi thil kha rak rit tuk, rak ngan tuk kaw, nun lai hmanh kan i ruah lo.”—2 Kor. 1:8; 11:23-27.

¹⁰ Tuchan Khrihfa hna zong nih harnak cheukhat kan tong lai tiah an i ruahchan khawh. (2 Tim. 3:12) Nangtah zeitin? Jesuh na zumh i a hnu na zulh caah harnak na tong maw? Na hawile le na rualchan pawl nih an in nihsawh men lai. Puarhrangpi hmanh in an in pehtlaih men lai. Zei thil paoh ah ding fel tein na um caah na rianṭuannak ah harnak na tong maw? (Heb. 13:18) Midang sinah naa ruahchannak kong na chim caah cozahlei in ralchanhnak na tong maw? Asinain Paul nih zei bantuk harnak kan ton hmanh ah kan i lawmh peng awk a si tiah a ti. Zeicah?

11. Zei bantuk hneksaknak poah inkhawh awkah zeicah bia kan khiah a herh?

¹¹ Harnak kan ton hmanh ah mah nih a biapimi sining ngeih awkah a kan bawmh khawh ti kan hngalh caah kan i lawm kho. Rom 5:3 ah hitin a ti: “Harnak nih cun inkhawhnak kha a kan ngeihter.” Khrihfa dihlak nih harnak kan ton lai caah inkhawhnak kan ngeih a hau. Kan tonmi hneksaknak paoh inkhawh awkah biakhiahnak kan tuah a hau. Cutin kan tuah lawng ah kan i ruahchannak a tlinmi kha kan hmuh khawh lai. Jesuh bianabia chung i lung tamnak hmun ah a tlami thlaici bantuk si kha kan duh lo. A hmasa ahcun biatak kha an cohlan ko nain “harnak le hremnak an hun ton tikah” an tlu ril ṭhan. (Matt. 13:5, 6, 20, 21) Ralchanhnak le hneksaknak ton cu a fawimi a si lo ti cu a hmaan ko. Asinain inkhawhnak nih ṭhathnemhnak a kan hmuhter. Zeiti lam in dah?

12. Hneksaknak kan inkhawh tikah zeitindah ṭhathnemhnak kan hmuh?

¹² Zultu Jeim nih hneksaknak inkhawhnak in hmuhmi ṭhathnemhnak kong kha a langhter. Hitin a ti: “Bau loin a tlingmi nan si nakhnga a karlak ah ing kho loin um sual loin a dongh tiang in ing ko u.” (Jeim 1:2-4) Jeim nih inkhawhnak kha a dongh tiang ṭuan a haumi rian phun in a langhter. Inkhawhnak nih zeidah a liim? Inkhawhnak nih lungsau deuh awk, zumhnak ngeih deuh awk le Pathian i bochan deuh awkah a kan bawmh khawh. Inkhawhnak in a dang ṭhathnemhnak zong kan hmu rih.

13-14. Inkhawhnak nih zeidah a chuahter, mah cu ruahchannak he zeitindah aa pehtlaih? (Rom 5:4)

¹³ Rom 5:4, NWT rel.b Paul nih inkhawhnak nih “mithmai ṭha” a kan hmuhter tiah a ti. Cucaah inkhawhnak na ngeih tikah Jehovah mithmai ṭha na hmu. Mah cu hneksaknak asiloah harnak kan ton tikah Jehovah cu aa lawm tinak a si lo. Mah canah zumhfek tein inkhawhnak na ngeih caah Pathian cu na cung ah aa lawm. Inkhawhnak kan ngeihmi nih Jehovah a lawmhter ti hngalh cu zeitluk in dah thazaang petu a si.—Salm 5:12.

¹⁴ Abraham nih hneksaknak a ton lioah zumhfek tein a inkhawh caah Jehovah mithmai ṭha a hmu. Jehovah nih a hawi pakhat in le miding pakhat in a hmuh. (Gen. 15:6; Rom 4:13, 22) Kannih zong cutin kan si kho ve. Jehovah mithmai ṭha kan hmuhmi cu amah rian zeitluk in dah kan ṭuan asiloah khoika hmun ah dah kan ṭuan timi cung ah aa hngat lo. Zumhfek tein kan inkhawhmi cung tu ah aa hngat. Kum zeizat asiloah zei bantuk sining kan ngeih hmanh ah inkhawhnak kan ngei kho. Atu ah hneksaknak na tong maw, Jehovah cung ah tah zumhfek tein na um maw? Cutin a si ahcun Pathian mithmai ṭha na hmu tinak a si caah i lawm. Pathian mithmai ṭha kan hmu tiah kan ruah tikah a kan kamhmi ruahchannak cu a hun fek chinchin.

A Fekmi Ruahchannak

15. Paul nih zei a biapimi kong dah a langhter, mi cheukhat cu zeicah an khuaruah a har khawh men?

¹⁵ A cung ah zumhfek tein kan um tik le harnak kan inkhawh tikah Jehovah cu aa lawm tiah Paul nih a ti. Mah hnuah Paul nih hitin a peh: “Pathian mithmai ṭha hmuhnak nih ruahchannak a ngeihter . . . cu ruahchannak cu pakpalawng men a si lo.” (Rom 5:4, NWT, 5) Mi cheukhat cu an khuaruah a har men lai. Zeicah? A hmasa ah Rom 5:2 ah Paul nih Rom Khrihfa hna cu “Pathian sunparnak” a langhtermi ruahchannak an ngei tiah a langhter cang. Cucaah ‘mah Khrihfa pawl cu ruahchannak an ngeih cang ahcun Paul nih zeicah ruahchannak kong cu a chim ṭhan?’

16. Ruahchannak cu zeitindah a hun feh chinchin khawh? (Hmanthlak zong zoh.)

¹⁶ Ruahchannak cu a ṭhangcho khomi a si timi kong kan ruah tikah Paul nih a chim duhmi kong kha kan hngalhthiam khawh. Mah tahchunhnak hi ruathmanh: Baibal ah aa telmi khuaruahhar a simi ruahchannak kong na theih hmasa bik lio caan kha naa cinken ti maw? Vawlei paradis ah zungzal nun ding timi cu ruahchannak menmen a si tiah na rak ruah men lai. Asinain Jehovah le Baibal biakam kong tam deuh na hun hngalh tikah mah biakam cu a tling taktak lai ti kha na hun zumh.

17. Naa pumpek hnu le tipil na in hnuah naa ruahchannak cu zeitindah a feh peng khawh?

¹⁷ Tipil na in hnu zong ah Jehovah kong kha tam deuh in na hun hngalh i na dawt chinchin. Cun naa ruahchannak zong a hung fek chinchin. (Heb. 5:13–6:1) Rom 5:2-4 ah a langhtermi kha nangmah theng nih na hun hmuh. Harnak a phunphun na tong ko nain na inkhawh i Pathian mithmai ṭha na hmu. Pathian mithmai ṭha ka hmu ti na zumh caah Pathian pekmi biakam kha na hun zumh chinchin. Hlan nakin naa ruahchannak zong a hung fek chin. Na caah a si taktak dingmi a hung si. Na nunnak kip zong ah huham a hun ngei deuh. Cucaah na chungkhar pawl na pehtlaih hna ning, caan na hman ning le na biakhiahnak hmanh kha na hun thlen.

18. Jehovah nih zeidah aamah a khaan?

¹⁸ Lamkaltu Paul nih Pathian mithmai ṭha kan hmuh hnuah kan ngeihmi ruahchannak kong he aa tlaiin a biapimi kong kha a langhter chap. Naa ruahchanmi a tling lai ti kha aan zumhter. Mah kha zeicah na zumh khawh? Paul nih Pathian sinin a hmuhmi mah aamah khaannak bia he aa tlaiin Khrihfa hna sinah hitin a ti: “Pathian nih kan lungthin chung ah a dawtnak cu a thiang thlarau in a toih in a kan toih caah cu ruahchannak cu pakpalawng men a si lo.” (Rom 5:5) Mah cu naa ruahchannak a tling hrimhrim lai ti zumh khawhnak a ruang hna an si.

19. Naa ruahchannak kong he aa tlaiin zeidah na zumh khawh?

¹⁹ Jehovah nih Abraham bia a kamhmi, a mithmai ṭha a hmuh ning le a hawi in a hmuh ning kong kha ruat. Abraham nih aa ruahchanmi ning in a rak tling taktak. Baibal ah hitin a ti: “Abraham cu a lung a sau i cucaah Pathian nih bia a kamhmi kha a hmuh khawh.” (Heb. 6:15; 11:9, 18; Rom 4:20-22) Abraham cu a lung a dong lo. Nang zong zumhfek tein na um peng ahcun naa ruahchanmi ning in a tling lai ti kha na zumh khawh. Naa ruahchanmi cu a taktak a si i mah nih lungdonghnak si loin nuamhnak aan hmuhter khawh. (Rom 12:12) Paul nih hitin a ti: “Thiang thlarau ṭhawnnak thawng in nan i ruahchannak cu a ṭhan lengmang nakhnga ruahchannak hram Pathian nih cun amah nan zumhnak thawng in lunglawmhnak le daihnak he in khahter ko hna seh.”—Rom 15:13.