Inn Kip Phungchim A Harnak Teinak
“Pathian nih a thawng ṭha kha nannih chimh awkah ralṭhatnak a kan pek i harnak tampi a um nain kan chim.”—1 Thes. 2:2.
1. Jeremiah nih zei harnak dah a rak ton i mah harnak kha zeitindah a rak tei khawh?
Jeremiah cu kanmah bantukin intuarnak a ngeimi a si. Jehovah nih “nangmah cu miphun hna ca i profet ah kan chiah cang,” tiah a rian a chimh tikah “Aa, Bawipa Pathian! Zohhmanh, ngakchiate men ka si i biachim ka thiam lo” tiah a ti. Asinain Jehovah kha aa bochan i mah rian kha a cohlan. (Jer. 1:4-10) Jeremiah cu kum 40 leng zeirel lonak, hlawtnak, nihsawhnak le zaang-ennak tiang a tong. (Jer. 20:1, 2) A caancaan ah a lung a dong hnik tawn. Asinain mi tam nih an duh lomi bia kha teimak tein a thanh peng. Jeremiah nih amah ṭhawnnak in zeitikhmanh ah a tuah khawh lai lomi kha Pathian ṭhawnnak thawngin a rak liim.—Jeremiah 20:7-9 rel.
2, 3. Tuchan Pathian salle cu zeitindah Jeremiah tonmi harnak bantuk an ton?
2 Tuchan Pathian salle tampi cu Jeremiah bantukin an tuar khawh men. Inn kip phungchim ding kong rak ruah lio ah a tam deuh nih ‘hi cu zeitikhmanh ah ka tuah kho bal lai lo’ tiah hlan ahcun kan rak ruah cio ko lai. Asinain thawngṭha thanh cu Jehovah duhnak a si kan hngalh tikah kan thinphannak kha tei in phungchimnak ah kan rian a tam. Cuti a si ko nain kannih a tam deuh caah cun kan nunnak ah phung chim peng ding cu a tlawm bik in a caancaan ah harnak kan tong. Inn kip phungchimnak thawk lai le a dongh tiang phungchim peng ding cu thil har a si cu a hmaan ko.—Matt. 24:13.
3 Nang cu Jehovah Hngaltu hna he Baibal na cawng i Khrihfabu pumhnak naa pumhnak zong a sau cang nain inn kip phungchimnak ah tel ding naa cungcang ah tah zeitin? Asiloah tipil a ing cangmi pakhat na si i inn kip kal in phung chim kho ding in a dammi zong na si ko nain cuti tuah naa harh ah tah? Hnu lei sining a phunphun a ngeimi hna nih inn kip phungchim harnak an tei ti kha zum. Jehovah bawmhnak in nang zong na tuah khawh ve.
Ralṭhat I Zuam
4. Lamkaltu Paul kha zeinihdah ralṭha tein thawng ṭha a chimter?
4 Vawlei pumpi phungchimnak rian tlam a tlinnak cu minung ṭhawnnak asiloah fimnak si loin Pathian thlarau thawngin a si cu na hna a tla ko lai. (Zek. 4:6) Cucu Khrihfa pakhat cio phungchimnak he zong aa pehtlai. (2 Kor. 4:7) Lamkaltu Paul kong hi ruat hmanh. Ralchanhtu pawl nih amah le missionary a ṭuan hawi an rak hrem lio hna caan kong kha hitin a ṭial: ‘Filipi khua ah an kan serhsat i an kan nihsawh nain Pathian thawng in kan ral a ṭha i a thawng ṭha kha nannih chimh awkah fakpi in kan i zuam. (1 Thes. 2:2, Nw; Lam. 16:22-24) Paul bantuk phungchim a ṭang tukmi nih phungchim awkah fak piin aa zuam caan a um ti cu na ruat bal theng lai lo. Asinain kan dihlak bantukin Paul nih ral ṭha tein thawngṭha chim awkah Jehovah kha aa bochan. (Efesa 6:18-20 rel.) Paul nunning hi zeitindah kan i zohchunh khawh?
5. Ralṭha tein phung chim khawhnak lam pakhat cu zeidah a si?
5 Phungchim awkah ralṭhat i zuamnak lam pakhat cu thlacamnak a si. Hmaikal pakhat nih hitin a ti: “Mah le mah zumhnak ngei in phung chim khawh awkah thla ka cam, mi lungthin lut lak in chim khawh awkah thla ka cam, phungchimnak ah i nuamh khawh awkah thla ka cam. A taktak ah hi rian cu Jehovah rian a si, keimah rian a si lo, cucaah amah bawmhnak tel loin kan tuah kho lai lo.” (1 Thes. 5:17) Kan zapi ralṭha tein phung chim awkah Pathian thiang thlarau bawmhnak hmuh awk thlacam zungzal a herh.—Luka 11:9-13.
6, 7. (a) Zei langhnak dah Ezekiel nih a hmuh i zei sullam dah a ngeih? (b) Tuchan Pathian salle kha Ezekiel langhnak nih zei fimnak dah a pek hna?
6 Ezekiel cauk nih ralṭha tein phungchim awk a kan bawm khomi thil pakhat kong a chim. Langhnak pakhat ah Jehovah nih Ezekiel kha kap hnih in “mithi ngaihnak hla le ṭahnak hla le ngaihchiatnak bia in aa ṭial,” mi cazual a pek i hitin ei a fial: “Mipa, kan pekmi ca zual hi dolh law khim tein um tuah.” Hi langhnak nih zeidah a chim duhmi a si? Ezekiel nih a thanh dingmi bia kha tling tein a cohlan. Mah cu a pum cheubang bantuk a hung si i a chung bik intuarnak kha a hnorsuan. Profet nih “ka ei i khuaihliti bantukin a thlum” tiah a ti. Pathian bia mi sin thanh kha Ezekiel caah khuaihliti bantukin a thaw i duhnung a si. Mah cu a cohlang lomi caah mi tam theih duh lomi bia a si nain Ezekiel nih Jehovah aiawhnak nawl, Pathian pekmi rian limnak nawl, tinvo sung in a ruah.—Ezekiel 2:8–3:4, 7-9 rel.
7 Mah langhnak ah tuchan Pathian salle caah man a ngeimi zohchunh awk a um. Kan i zuamnak a upat kho peng lai lomi hna sin thanh awkah kannih zong [mi tam theih duh lomi bia kan ngei. Khrihfa phungchimnak kha Pathian pekmi tinvo sung in kan hmuh peng caah Pathian Bia kha ngol loin rel ding a si. Lenglang men asiloah a caan hmaan loin tuahmi hlathlainak cu Pathian Bia tling tein laknak caah a za lo. Pumpak Baibal relning le hlathlai ning na ṭhanchoter kho lai maw asiloah hmaan tein na tuah kho lai maw? Na relmi kha ṭha deuh in na ruat kho lai maw?—Salm 1:2, 3.
Baibal I Ruahnak Thawknak
8. Inn kip phungchimnak ah Baibal kong ruahceihnak thawk awkah thawngthanhtu cheukhat kha zei fuhpanh ning nih dah a bawmh hna.
8 Thawngthanhtu tampi caah inn kip phungchim a har biknak cu inn ngeitu he bia i ruah a si. A si ko, hmun cheukhat ah biaruahnak thawk cu thil har a si. Cheukhat thawngthanhtu hna cu kepmi rinli kulh ah langhter a si bantukin innka hram ah innngeitu he bia an i ruah tikah mah tein thimmi bia tlawmpal in thawk i chim le weisa pakhat pek kha an duh deuh. Weisa biatlangpi asiloah a zawng in cuantermi hmanthlak nih inn ngeitu lungthin kha a lak khawh i kan len hnawhchannak kha a tawinak in chim awk le biahalnak pakhat tuah awk caan ṭha a hmuhter. Fuhpanh ning pakhat cu inn ngeitu kha weisa phun thum li piah in hngalh a duhmi kong pakhat thimter a si. Hmuitinh cu weisa pek, innka hram ah kha ti tuah men si lo in Baibal cawnnak lei a kalpimi Baibal i ruahceihnak thawk awk a si.
9. Zeicah ṭha tein timhlamh cu a biapit?
9 Zei fuhpanh ning na hman hmanh ah ṭha tein timhlamhnak nih inn kip phungchimnak ah timhcia si awk le lungthomi si awk an bawmh lai. Hmaikal pakhat nih hitin a chim: “Ṭha tein kaa timh tikah kaa nuam deuh. Kaa timhmi a ka chimter.” A dang hmaikal pakhat nih hitin a chim ve: “Mi ka pek hnikmi hna cauk chung ummi kong ṭha tein ka hngalh tikah mah kha hman awkah ka tha a nuam.” Chim dingmi dai tein ruah ṭhannak nih ṭhatnak cheukhat a chuahpi nain, chim ning aw chuah in cawn cu bawmtu a si chinchin kha mi tampi nih an hmuh. Cuti tuah cu Jehovah sin a ṭha bik pek awk bawmtu a si.—Kol. 3:23; 2 Tim. 2:15.
10. Lohmun rian ca i tonnak kha hmantlak a si i man a ngeih nakhnga zeidah tuah khawh a si?
10 Hmantlakmi lohmun rian ca i tonnak nih inn kip phungchimnak ah hmual a kan ngeihter i a kan lawmhter. Ni cang Baibal cu phungchimnak kong he dairek in aa pehtlaih ahcun mah kha rel in a tawinak in ruah khawh a si. Asinain lohmun tonnak a tlaitu nih sang he aa tlakmi chimning sawhsawh te i ruah awk asiloah hmuhsaknak tuah awk asiloah cu ni phungchimnak ah hman khawhmi a dang hman tlakmi ruahceih awkah a caan a za in hman a herh. Cucu a phan cangmi hna caah hmual ngei tein chim awk bawmtu a si ve. I tonnak a tlaitu Khrihfa upa le midang nih ṭha tein timhlamhnak thawngin mah kha tlam an tlinh khawh lai i rikhiahmi caan chungah i tonnak kha an donghter khawh lai.—Rom 12:8.
Bia Ngaihpiak A Hmual
11, 12. Thawng ṭha mi lung luhter awkah zawnruahnak in bia ngaihpiaknak nih zeitindah a kan bawmh khawh? Tahchunhnak kha chim.
11 Ṭha tein timhlamhnak lawng si loin pumpak siaherhnak zong nih phungchimnak ah midang he Baibal i ruahnak thawk awk le an lung lut lak in chim awk a kan bawmh. Mah siaherhnak langhter ning lam khat cu bia ngaihpiak a si. Khualtlawng rianṭuantu pakhat nih hitin a chim: ‘Lungsau te le lungtho tein an bia ngaihpiaknak nih mi kha thawngṭha ngaih duhnak a ngeiter hna lengah pumpak siaherhnak ṭha tein langhter zong a si.’ Zawnruahnak he an bia ngaihpiaknak thawngin innngeitu lungthin hun khawh a si kha a tanglei hmuhtonnak nih a langhter.
12 France ram, Saint-Étienne khua chuahmi Le Progrès tadinca phaw onmi ca pakhat ah nu pakhat nih kum thum a simi ka fanu nih a ka thih tak, ka ngaih a chia tuk, a rauh hlan ah kan innka kha mi pahnih nih an rak kingh tiah a ti. Hitin ca a ṭial: “Jehovah Hngaltu an si kha ka hngalh colh hna. Nem tein ka ṭinter hnik hna nain pek an ka timhmi brochure kha ka vun hmuh. Zeicah Pathian nih sifah harnak hi umnak nawl a pek timi kong a si. Cucaah an chimmi a hmaan lo langhter duh ah inn chung luh ka sawm hna. . . . Hngaltu pawl cu suimilam pakhat fai an ṭhu. Zawnruahnak ngei ngaiin ka bia an ngaih i an chuah lai ah voi dang rak len ṭhan ding hnatla tiang in ka hna a ngam.” (Rom 12:15) Caan a cut tikah Baibal cawnnak kha a cohlan. Hmasa bik an rak len lioah aa cinkenmi cu unau pahnih an chimmi si loin a bia an ngaih ning a si kha a lang.
13. Kan tonmi hna sinah thawng ṭha kha zeitindah a herh ning in kan chim khawh?
13 Zawnruahnak he mi bia ngaihpiak cu a ngaite in Pathian Pennak zeicah an herh an kan chimh nakhnga mi kha caan ṭha kan pek hna a si. Mah nih thawngṭha chim awk sining ṭha a chuahter. Hmual ngei tein thawngṭha chimtu hna cu ṭha tein mi bia a ngaimi an si kha na hmuh ko lai. (Ptb. 20:5) Phungchimnak ah an tonmi hna cungah lungtak in siaherhnak an langhter. Inn ngeitu pawl min le address i cinken si loin innngeitu hngalh duhmi le herhmi zong an i cinken. Mi pakhat nih cu set te timi lungretheihnak an langhter tikah mah kong kha an hlathlai i an hmuhmi chimh awkah a rauh hlan ah an va len ṭhan hna. Lamkaltu Paul bantukin an tonmi hna kha Pathian Pennak thawngṭha a herh ning in an chimh hna. (1 Korin 9:19-23 rel.) Cu bantuk lungtak in siaherhnak langhternak nih thawng ṭha kha hngalh a duhter hna lengah ‘Pathian zaangfahnak’ ṭha tein langhter zong a si.—Luka 1:78.
A Ṭhatnak Lei In Hmuhnak Ngei Peng
14. Phung kan chim tikah Jehovah sining kha zeitindah kan langhter khawh?
14 Duh thimnak nawl a kan peknak thawngin Jehovah nih hmaizahnak a langhter. Cungnung Bik Pathian a si ko nain, amah biak awkah ahohmanh a hnek hna lo, asinain khuaruahhar in a kan timhpiakmi a sunsakmi hna kha thluachuah a pek hna i dawtnak tu in mi kha an lungthin a lak hna. (Rom 2:4) A mi, phungchimtu hna in phung kan chim fate Pathian zaangfahnak he aa tlak in thawng ṭha chim awkah timhcia kan si awk a si. (2 Kor 5:20, 21; 6:3-6) Cu ruangah kan sang ummi hna cungah a ṭhatnak leiin hmuhnak ngeih peng a herh. Mah harnak tei awkah zeinihdah a kan bawmh khawh?
15. (a) Mi nih thawng ṭha an cohlan lo ahcun zei tuah u tiin dah Jesuh nih lamkaltu kha a cawnpiak hna? (b) Aa tlakmi kawlnak ah lungthin pek awk zeinihdah a kan bawmh khawh?
15 Mi cheukhat nih thawng ṭha an cohlan lo tikah aa tlakmi hna kawlnak ah lungpial tiang in mah kong i lungretheih lo awkah Jesuh nih a hnu zul pawl kha a cawnpiak hna. (Matthai 10:11-15 rel.) Phanh khawhmi hmuitinh hmete ngeihnak nih a kan bawmh khawh. Unaupa pakhat nih amah le amah kha lei chung chuak thilri a kawlmi pakhat he aa tahchunh i a tlaihtleng cu “sui hmuh awkah heh tiah ka kawl lai” ti a si. A dang unau pa pakhat cu “zarhfate hngalh a duhmi pakhat ton awk, hngalh a duhnak tha thawhter dingah zarh tlawmpal hnu ah va len ṭhan awk” hmuitinh a ngei. Thawngthanhtu cheukhat cu a si khawh ahcun inn ngeitu kip kha a tlawm bik Baibal cang pakhat relpiak awk hmuitinh an ngei. Nangmah pumpak caah hmantlakmi zei tinhmi dah na ngeih khawh?
16. Phungchim peng awkah zei a ruang ṭha dah a um?
16 Inn kip phungchim hlawhtlinnak cu sang i a ummi hna lehnak cung lawngah aa hngat lo. Phungchimnak cu miding miṭha khamhnak caah a biapi bikmi lam a si ko nain a dang a biapi mi tinhmi he zong aa pehtlai. Khrihfa phungchimnak cu Jehovah kan dawtnak langhter awk caan ṭha pakhat a si. (1 Johan 5:3) Thisen mawhnak in a kan luatter. (Lam. 20:26, 27) Pathian a upat lomi hna kha Pathian ‘biaceih caan a phan cang’ ti ralrin pek zong a si. (Biat. 14:6, 7) Mah lengah thawngṭha chimnak thawngin vawlei cung pumpuluk ah Jehovah min kha thangṭhatnak a chuahter. (Salm 113:3) Cucaah mi nih an ngaih ah siseh, an ngaih lo ah siseh Pathian Pennak kong kha ngol loin kan chim lai. A si, thawngṭha thanh awk kan i zuamnak vialte cu Jehovah hmuhnak ah aa dawh ngaingai lai.—Rom 10:13-15.
17. Mi nih zeidah an hngalh hrimhrim lai?
17 Tuchan ah mi tampi nih kan phungchimnak kha zei ah an rel lo nain a rauh hlan ah phun dang in an hmuh lai. (Matt. 24:37-39) Ezekiel thanhmi biaceihnak thawngpang a tlin taktak tikah ralchanhtu Israel mi hna nih “an lakah profet pakhat an ngeih kha an hngalh lai” tiah Jehovah nih Ezekiel kha a zumhter. (Ezek. 2:5) Cu bantukin Pathian nih tuchan vawlei bia a ceih tikah mi tamnak hmun le inn kip ah Jehovah hngaltu hna chimmi bia cu a ngaite in a hmaanmi Pathian Jehovah sinin a rat le Hngaltu hna cu Pathian aiawhtu taktak an si kha an hngalh hrimhrim lai. Mah a biapimi caan ah Pathian min putnak nawl le a bia thanhnak nawl hmuh cu tinvo sung a si! Amah bawmhnak in inn kip phung kan chimnak harnak kha tei kho zungzal u sih.
Zeitindah Na Leh Lai?
• Phungchim awkah ralṭhatnak zeitindah ngeih khawh a si?
• Innkip phungchimnak ah zeinihdah Baibal i ruahnak thawk awk a kan bawmh khawh?
• Midang cungah lungtak in siaherhnak zeitindah langhter khawh a si?
• Sangah a ummi hna cungah a ṭhatnak lei in hmuhnak ngeih peng awkah zeinihdah a kan bawmh khawh?
[Cahmai 9nak i hmanthlak]
Baibal Cawnnak Thawknak Lam Pakhat
Thawk Awk:
◼ Inn ngeitu na biakchawnh dih hnu ah weisa pakhat in pe law hitin chim, “Hi a biapimi kong in thazang a pemi pakhat pek kan duh caah tu ni hika ka ratnak a si.”
◼ Asiloah, weisa pakhat in pe law hitin chim, “Hi kong he aa tlaiin nang zeitindah na ruah kha hngalh ka duh caah chikkhat ka rak ra ta.”
Weisa a cohlan ahcun:
◼ Sau pi i din loin, weisa a biatlangpi kha hrambunh in hmuhning biahalnak a fawimi pakhat in hal.
◼Innngeitu hmuhning hngalhthiam awkah ṭha tein a bia ngai. A chimmi cungah upat hmaizahnak langhter.
Biaruahnak Peh Awk:
◼ Innngeitu theih duhmi le herhmi he aa tlakin na chimning kha thleng law Baibal cang pakhat asiloah cu nak tam in rel law ruah.
◼ Hngalh duhnak an langhter ahcun, cauk kha pe law a si khawh ahcun Baibal cawnnak kha hmuhsak. Len ṭhan ding i tim.