Mino Pawl—Jehovah Rianṭuan Duhnak Ah Nan Lungtho U

‘Nan no lioah hin nanmah an sertu kha philh hlah u.’ —PCT. 12:1.

1. Israel ngakchia kha zei ah dah sawm an si?

HLAN 3,500 lioah Jehovah profet Moses nih tlangbawi le Israel upa hna kha hitin nawl a pek hna: “Pa, nu, ngakchia . . .  hna cu annih nih an theih i [Jehovah] nan Pathian ṭih kha an thiam i hi phungbia chung bia vialte kha ṭha tein an tuah nakhnga [pum hna u.]” (Deut. 31:12) Pathian biak awk hmunkhat ah aa pummi ah pa, nu, ngakchia an i tel kha hngal. A si, Jehovah lamhruainak ngaih le cawn le zulhnak ah ngakchia hmanh an i tel.

2. Hmasa Khrihfabu ah Jehovah nih mino a sia-​herh hna zeitindah a langhter?

² Kum zabu pakhatnak ah Jehovah nih a miphun chung mino pawl a siaherh hna kha a langhter rih. Tahchunhnak ah, lamkaltu Paul kha Khrihfabu kip ah kuatmi a cakuat cheukhat ah mino caah cuset timi lamhruainak ṭial awkah a thlarau in a forh. (Efesa 6:1; Kolose 3:20 rel.) Mah cawnpiaknak a zulmi Khrihfa mino cu dawtnak a ngeimi vancung Pa cungah an i lawm tuk i a thluachuah an hmu.

3. Tuchan mino nih Pathian rianṭuan dunnak an ngeih zeitindah an langhter?

³ Jehovah biak ding pumh awkah tuchan mino tah sawm an si maw? An si. “Pakhat le pakhat kan i dawt khawh nakhnga le thil ṭha kan i tuahpiak khawh nakhnga, i bawm tliahmah u sih. Pakhat le pakhat hmun khat i i pumh lengmang kha ngol hlah u sih; a cheu nih cun ngol hmanh hna sehlaw, kannih cu i forh chin u sih, zeicahtiah Bawipa ni cu a nai deuh chin lengmang ti kha kan hngalh caah i forh chin lengmang ko u sih” timi Paul ruahnak cheuhmi kha vawlei pumpi Pathian miphun mino tampi nih an zulh kan hmuh cu Pathian miphun vialte caah lunglawmhnak hrampi a si. (Heb. 10:24, 25) Cun ngakchia tampi cu Pathian Pennak thawngṭha bia chimnak ah nulepa he an i tel. (Matt. 24:14) Jehovah lungtak in an dawt langhternak ah mino thong tampi nih kum fate pumpeknak tuah in tipil an in caah Khrih zultu sinak in hmuhmi thluachuah an hmu.—Matt. 16:24; Mar. 10:29, 30.

Sawmnak kha Atu ah Cohlang

4. Pathian nih a rianṭuan awk mino a sawm hna kha zeitik in dah cohlan khawh a si?

⁴ Phungchimtu 12:1 nih ‘Nan no lioah hin nanmah an sertu kha philh hlah u’ tiah a ti. Jehovah biak le a rianṭuan awk sawmnak kha mino nih zeitik in dah co-​hlan awk a si? Baibal nih kum cuzat tiah a chim lo. Cucaah Jehovah biangaih le a rianṭuan awkah ka no tuk rih tiah ruat in i cungcang hlah. Kum zeizat na si hmanh ah sawmnak kha cohlan awkah kan in forh.

5. Nulepa nih fale thlarau lei ṭhancho awkah zeitindah an bawmh khawh hna?

⁵ Mino tampi cu thlarau lei ṭhancho awkah nule maw, pale maw, asiloah nulepa sin in bawmhnak an hmu. Cuticun Baibal chan Timote he nan i lo. Bawhte a si lio in a nu Zunis le a pi Lois nih Cathiang an cawnpiak. (2 Tim. 3:14, 15) Cu bantukin na nu le na pa nih nangmah he Baibal hlathlai, thlacam, Khrifabu pumnak le Pathian mi hna civui ah i pumh le phungchim vahnak thawng in an in cawnpiak. Pathian bia an in cawnpiak cu Jehovah sin in an hmuhmi a biapimi rian a si. An in dawtnak le an in siaherhnak cungah naa lawm maw?—Ptb. 23:22.

6. (a) Salm 110:3 ah zei bantuk biaknak nih dah Jehovah lung a lawmhter? (b) Atu zei kong dah kan i ruah lai?

⁶ Asinain Timote bantukin nan ṭhan deuh tikah ‘a ṭhami thil le Pathian nih a lawmhmi thil le a tlingmi thil hngal’ hna seh tiah Jehovah nih an duh hna. (Rom 12:2) Cutik ah nulepa forhnak si loin Pa-​thian duhnak tuah na duh caah Khrihfabu rian ah tel na duh lai. A rian lungtak in ṭuan na duh ahcun Jehovah aa lawm lai. (Salm 110:3) Jehovah bia ngaih le a lamhruainak zulh na duh na lungthawh-​nak kha zeitindah na langhter khawh? Tuah khawhnak lam a biapimi pathum kan i ruah lai. Mah cu Baibal hlathlai, thlacam le ziaza an si. Pakhat cio in zoh u sih.

Jehovah kha Pumpak In Hngal

7. Baibal hlathlainak ah Jesuh nih zei zohchunh awk dah a chiah, zeinihdah a bawmh?

⁷ Jehovah rianṭuan na duh na langhter khawhnak hmasa bik lam pakhat cu nifate Baibal relnak a si. Pathian Bia hmaante relnak nih thlaraulei na chambaunak a tlinter khawh i a sungmi Baibal hngalhnak na ngei kho. (Matt. 5:3) Jesuh nih zohchunh-​awk ṭha a chiah. Kum 12 a si lioah a nu le a pa nih biakinn chungah “cawnpiaktu Judah mi hna sinah khan a rak ṭhu i an bia kha a rak ngai i bia a rak hal len ve ko hna” kha an hmuh. (Luka 2:44-46) Jesuh cu a ngakchiat lio in Baibal hngalh le hngalh-​thiam duhnak a rak ngei. Zeiruang ah a si? A nu Mari le a cawmtu a pa Josef cu a biapimi rian ah an i tel cu a fiang ko. Jesuh bawhte a si lio in Pathian kong a cawnpiakmi Pathian salle an si.—Matt. 1:18-20; Luka 2:41, 51.

8. (a) Nulepa nih fale kha Pathian Bia duh awkah zeitik in dah an thawk khawh? (b) Fale bawhte an si lio in cawnpiaknak man a ngeih hmuhtonnak pa-​khat chim.

⁸ Cu bantukin tuchan ah Pathian a ṭihmi nulepa nih an fale bawhte an si lio in Baibal biatak an lungchung lut lakin cawnpiak a ṭhat kha an hngalh. (Deut. 6:6-9) Unau nu Rubi timi nih a fapa upa bik Joseph a hrin tlawmpal ah cuticun a tuah. Nifate Ka Baibal Tuanbia Cauk kha a relpiak lengmang. A hung ṭhan deuh tikah Baibal cang i baihaat awkah a bawmh. Joseph cu mah cawnpiakmi in ṭhathnemnak a hmu maw? Holh a thiam tlawmpal ah Baibal tuanbia tampi kha amah bia in a chim khawh. Kum nga a si ah Theocratic Rianṭuannak Sianginn ah hmasa bik phung a chim kho.

9. Baibal rel le na relmi ruah ṭhan cu zeicah a biapit?

⁹ Mino pawl, thlarau lei ṭhancho deuh awkah na no lio in upa na si tiang Baibal relnak kha nifate na zia ah canter awk a si. (Salm 71:17) Baibal relnak nih ṭhancho awk zeicah an bawmh lai? Jesuh nih a Pa sin thla a cammi bia hi zoh hmanh: “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.” (Johan 17:3) Jehovah hngalhnak kong thuk deuh na cawn ahcun a um taktakmi in fiang tein na hmuh lai i na dawtnak a tam deuh lai. (Heb. 11:27) Cucaah nifate Baibal relnak kha Jehovah kong tam deuh cawnnak caan ṭha ah hmang. Hitin i hal: ‘Hi ṭialmi nih Jehovah kha a um taktakmi in a kong zeidah a ka cawnpiak? Hi Baibal cang nih ka cung-​ah Pathian dawtnak le siaherhnak zeitindah a langhter?’ Mah biahalnak kha a caan la in ruah tikah Jehovah ruahnak le lung ummi le a kan halmi kan hngalh deuh lai. (Phungthlukbia 2:1-5 rel.) Mino Timote bantukin Baibal na cawnmi ah ‘dir in fek tein zumh’ awk le Jehovah duhnak tuah awk an forh lai.—2 Tim. 3:14.

Thlacamnak nih Jehovah Na Dawtnak A Fehter Ning

10, 11. Pathian rian ṭuan na duhnak kha thlacamnak nih zeitindah an bawmh khawh?

¹⁰ Jehovah rian lungthin dihlak in ṭuan na duh na langhter khawhnak lam pahnihnak cu thlacam a si. Salm 65:1 ah hitin kan rel: “Maw Pathian, nang cu kan thlacamnak a kan lettu na si.” Israel mi cu Pathian he biakamnak a tuahmi miphun an si lio hmanh ah biakinn ah a rami miphun dang nih Jehovah kha thlacam in naih khawh a si. (1 Si. 8:41, 42) Pathian cu duhdanh a ngei lo. A nawlbia a zulmi an thlacamnak a ngaih lai kha aamah a khan. (Ptb. 15:8) “Kan” timi ah nannih mino zong nan i tel.

¹¹ Hawikomhnak ah a biapi bik cu peh-​tlaihnak ṭha ngeih a si na hngalh ko lai. Na hawikom tak kha na ruahnak, na lungre-​theihnak le na inmi kong chimh na duh ko lai. Cu bantuk cun lungtak in thlacamnak in Lianngan bik Settu he nan i pehtlai ko. (Fil. 4:6, 7) Na dawtmi na nu le na pa asiloah na hawikom ṭha sin na lung- chung ummi na phuan bantukin Jehovah sinah phuang ve. Na thlacam ning le Jehovah cung na intuarmi cu aa peh-​tlai tuk. Jehovah he nan i pehtlaihnak a feh deuhdeuh ah na thlacamnak sullam a ngeih deuhdeuh na hngalh lai.

12. (a) Thlacammi sullam ngeih awkah biafang lawng zeicah a zat lo? (b) Jehovah na pawng ah a um hngalh awkah zeinihdah an bawmh lai?

¹² Asinain sullam ngeimi thlacamnak ah biafang lawng a za lo. Na lung chung muru ah a ummi aa tel. Na thlacammi ah Jehovah na dawtnak, na upat tuk le naa bochan tuk a lang. Na thlacamnak Jehovah nih an leh ning na hngalh tikah ‘Jehovah cu a autu vialte hna pawng ah khin a um’ kha hlan nakin na hun hngalh deuh lai. (Salm 145:18) Satan doh awkah le a hmaanmi lam thim awkah Jehovah nih thazang pe in an naih lai.—Jeim 4:7, 8 rel.

13. (a) Pathian he pehtlaihnak nih unau nu pakhat cu zeitindah a bawmh? (b) Pathian he pehtlaihnak nih hawile hneknak tei awkah zeitindah an bawmh?

¹³ Cherie timi nu cu Jehovah he pehtlaihnak a ngeih tikah zeitindah thazang a hmuh zoh u sih. Tang hra sianginn a kai lioah ca le lentecelh a thiam caah laksawng tampi a hmu. Tang hra a awn in siang-​inn kai peh awkah tangka bawmhnak a hmu. “Mah bawmhnak cu duh awk ngai a si. Sayate le ka hawile nih la ko tiah an ka hnek chih” tiah Cherie nih a chim. Asinain sianginn kai a peh ahcun ca tampi rel le lentecelhnak caah caan tampi pek a hau lai i Jehovah rianṭuannak caah caan a tlawm lai kha a hngalh. Cherie nih zeidah a tuah? Hitin a chim: “Jehovah sinah thla ka cam hnuah tangka bawmhnak kha ka al i caanhmaan hmaikal ṭuan ka thawk.” Atu cu hmaikal a ṭuannak kum nga a si cang. Hitin a chim: “Kaa ngaichih lo. Ka biakhiahnak nih Jehovah lung a lawmhter ka hngalh caah kaa lawm. Pathian Pennak hmasa bik kan chiah ahcun kan herhmi vialte a kan pek taktak ko lai.”—Matt. 6:33.

Na Ziaza Ṭha nih ‘Lungthin Thiang’ Na Ngeih A Langhter

14. Na ziaza ṭha cu Jehovah mit ah zeicah a biapit?

¹⁴ Jehovah rian ṭuan na duh na langhter khawhnak lam pathumnak cu na ziaza a si. A ziaza a thiangmi mino pawl kha Jehovah nih thluachuah a pek hna. (Salm 24:3-5 rel.) Mino Samuel nih Tlangbawi Ngan Eli fapa hna ziaza ṭhalo kha aa cawn lo. Samuel a ziaza ṭha cu a hung lang chin. Baibal ah hitin aa ṭial: “Ngakchiapate Samuel cu pum in siseh, [Jehovah] le minung duh ningin siseh a ṭhang lengmang.”—1 Sam. 2:26.

15. Ziaza ṭha in nun peng naa zuamnak a ruang cheukhat cu zeidah an si?

¹⁵ Paul nih cazin ah a khumhmi cheukhat mah zawn lawng aa ruatmi, lung a puammi, nulepa a zomhtaihmi, lawmh a hngal lomi, zaangfahnak a ngei lomi, ruru-hranghrang in khua a sami, porhlawtnak in a khatmi, Pathian nakin nomhnak a duh deuhmi chan ah kan nung. (2 Tim. 3:1-5) Cucaah hi bantuk ṭhatlonak in a khatmi pawngkam ah ziaza ṭha in nun peng cu na caah a har ko lai. Asinain thil ṭha na tuah i Pathian duh lomi na hrial fatinte Jehovah a nawlngeihnak lei ah na ṭan na langhter a si. (Job 2:3, 4) “Ka fapa, fim law ka lung ka lawmhter tuah, cuticun a ka soitu kha ka leh khawh hna lai” timi Jehovah nawlnak na tuah na hngalhmi in lungsinak na hmu lai. (Ptb. 27:11) Cun Jehovah mithmai ṭha ka hmu ti na hngalhnak nih a rian ṭuan na duhnak lungthawh awk an bawmh lai.

16. Unau nu pakhat nih zeitindah Jehovah lung a lawmhter?

¹⁶ Carol timi mino unau nu cu sianginn a kai lioah Baibal phunglam ning in a nun caah ziaza ṭha in a nungmi a si tiah min ṭha a hmu. Zei thil dah a cang? Baibal in cawnpiakmi a chiaṭha thleidannak ruang ah puai tuahnak le ram caah tuahmi puai ah kal a duh lo i a khaan hawile nih an nihsawh. Mah bantuk caan ah a zumhnak kong chimnak caan ṭha a hmu tawn. Kum tampi a dih hnu ah a hlan a khaan hawi pakhat sin in hitin ṭialmi ca a hmuh: “Nangmah he pehtlaihnak tuah le lawmhnak biachim lai kha kaa ngaih. Puai tuahnak kong ah ralṭha in na um le Khrihfa mino pakhat in na ziaza ṭha le zohchunh-​awk ṭha na si kha kaa chingchiah. Jehovah Tehte pawl ka hmuh hmasa bikmi na si.” Carol zohchunhawk ṭha nih a khaan hawi lung a hmuihter, a hnu ah Baibal a cawng. Carol sin a cakuat ah tipil a ing cangmi zumtu kum 40 leng a si cang kha aa ṭial. Carol bantukin Baibal phunglam ralṭha tein aa tlaihmi tuchan mino pawl cu lungthin ṭha a ngeimi hna caah Jehovah hngalh duhnak a ngeihtertu an si lai.

Jehovah A Thangṭhatmi Mino Pawl

17, 18. (a) Nan Khrihfabu mino kong ah zeitindah na um? (b) Pathian a ṭihmi mino pawl cu zeinihdah a hngah hna?

¹⁷ Vawleicung pumpi Jehovah bu ah a hmaanmi biaknak ah teima in aa telmi mino thong tampi kan hmuh hna caah kan i lawm tuk hringhran. Mah mino nih nifate Baibal an rel, thla an cam le Pathian duhmi ziaza in an nunnak thawng in Jehovah biak an duhnak lung an thawhter. Hi zohchunhawk ṭha mino pawl cu nulepa le Jehovah miphun caah hrimhnak hrampi an si.—Ptb. 23:24, 25.

¹⁸ Zumhawk a tlakmi mino cu hmailei Pathian kamhmi vawlei thar chung a lut hngami ah an i tel lai. (Biat. 7:9, 14) Cu chung ah Jehovah cung an i lawmhnak a tam tluk in thluachuah an hmu lai i zungzal in an thangṭhat lai.—Salm 148:12, 13.

Na Fianter Kho Maw?

• Tuchan ah a hmaanmi biaknak ah mino pawl zeitindah an i tel khawh?

• Baibal relnak in ṭhathnemnak hmuh awkah ṭha tein ruah cu zeicah a herh tuk?

• Jehovah naih awkah thlacamnak nih zeitindah an bawmh khawh?

• Khrihfa ziaza ṭha nih zeidah a tuah khawh?

[Cahmai 5 Hmanthlak]

Nifate Baibal rel na zia ah a cang maw?