‘A Ngaih A Chiami Vialte Kha Hnem Hna’
‘Jehovah nih . . . a ngaih a chiami vialte kha hnemh . . . awkah a ka thlah.’—ISA. 61:1, 2, 3.
1. Jesuh nih a ngaih a chiami kha zeitindah a tuah hna, zeicah?
JESUH KHRIH nih “ka rawl cu a ka thlahtu duhnak zulh le a ka fialmi rian liim kha a si” tiah a ti. (Johan 4:34) Jesuh nih Pathian pekmi rian a ṭuan tikah a Pa ziaza kha a langhter. Mah ah dawtnak aa tel. (1 Johan 4:7-10) Lamkaltu Paul nih Jehovah cu “zeizong vialte ah a kan bawmtu Pathian” a si a timi bia ah Jehovah nih dawtnak a langhter ning phunkhat kan hmuh. (2 Kor. 1:3) Jesuh nih Isaiah chimchungbia ning in a nunnak thawng in Pathian dawtnak a langhter. (Isaiah 61:1, 2, 3 rel.) Nazareth khua pumhnak inn ah Isaiah chimchungbia kha a rel i mah hi ka cung ah a tling tiah a ti. (Luka 4:16-21) Phung a chim lio zong ah a ngaih a chiami kha a hnemh hna, thazaang a pek hna i an hna a ngamter.
2, 3. Jesuh zultu pawl nih mi kha zeicah hnemh awk a si?
2 Jesuh zultu paoh nih a ngaih a chiami hna hnemhnak thawng in Jesuh i zohchunh awk a si. (1 Kor. 11:1) Paul nih “atu i nan tuah lengmang bantuk hin pakhat le pakhat thazaang i pe u law i bawm u” tiah a ti. (1 Thes. 5:11) “Harnak caan” ah kan nun caah mi cu hnemh an herh khun. (2 Tim. 3:1) Bia le tuahsernak in mi ngaih a chiattermi le mi lung a fahtermi hna nih miṭha pawl kha harnak an pek chin lengmang hna.
3 Baibal nih a chimchung bangin ni hmanung bik caan ah mi tampi cu ‘anmah zawn lawng aa ruatmi, a hak a kaumi, aa porhlawmi, lung a puammi, nulepa a zomhtaihmi, nawl a ngai lomi, lawmh a hngal lomi, biaknak zeihmanh i a rel lomi, zaangfahnak a ngei lomi, mi zawnruahnak a ngei lomi, mi thangchiat a duhmi, ruru-hranghrang in khua a sami, ṭih a nungmi, ṭhatnak a huami, hawi rawi a hmangmi, duhpaoh in khua a sami, porhlawtnak in a khatmi le Pathian nakin nuamhnak a duh deuhmi’ an si. Miṭhalo pawl tuahsernak le khuaruah ning cu “a ṭha lo chin lengmang.”—2 Tim. 3:2-4, 13.
4. Tuchan ah vawlei cu zeitindah a um?
4 Baibal nih “vawlei hi a pumpi in mi ṭhalopa kuttangah a um” a ti caah miṭhalo pawl an um hi khuaruahhar a si lo. (1 Johan 5:19) ‘Vawlei pumpi’ timi ah ramrian, biaknak, thawngthanhnak le chawlehnak rian aa tel. Satan cu “vawlei uktupa” le “hi vawlei khuazing ṭhalo” a si cu a fiang ko. (Johan 14:30; 2 Kor. 4:4) Satan cu caan tawite lawng ka ngei ti a hngalh caah a thin a linh in a lin, cucaah vawlei thil sining cu a chia chin lengmang. (Biat. 12:12) Pathian nih Satan le Satan uknak ṭhalo sau a zuah ti lai lo ti le cungnung bik a sinak a fianter cang lai ti hngalh cu hnemtu taktak a si.—Gen., a ngan 3; Job, a ngan 2.
Hmunkip ah Thawngṭha a Phan
5. Phungchimnak kong chimchungbia cu tuchan ah zeitindah a tlin?
5 Jesuh nih hitin a chimchung: “Miphun vialte hna ca i tehte si awkah vancung pennak kong thawngṭha hi khuazakip ah chim a si lai, cun cu hnu lawngah cun donghnak cu a si lai.” (Matt. 24:14) Jesuh nih a chim bantukin, vawlei pumpi i a ummi Jehovah miphun nih Pathian Pennak thawngṭha kha an chim. Khrihfabu 107,000 leng ah a ummi Jehovah Tehte 7,500,000 leng nih mah rian cu an ṭuan. (Matt. 4:17) A ngaih a chiami tampi cu mah in hnemhnak an hmu. A luancia kum hnih chung ah tipil a ingmi 570,601 an si.
6. Phungchimnak cu zeiruang ah dah a ṭhancho?
6 Jehovah Tehte pawl nih atu ah Baibal hrambunh in chuahmi cauk kha holh phun 500 leng in an leh i mi an pek hna. Hi bantuk in rian a ṭuan khomi bu an um lo. Satan ukmi vawlei ah an um ko nain Jehovah miphun rianṭuannak cu a ṭhangcho chin lengmang. Pathian thiang thlarau bawmhnak le lamhruainak a um lo ahcun a ṭhangcho kho lai lo. Thawngṭha cu vawleicung pumpi ah chim a si caah thawngṭha a cohlangmi hna cu Jehovah miphun bantuk in hnemhnak an hmu ve.
Zumtu Khat kha Hnem hna
7. (a) Atu ah Jehovah nih ngaihchiatnak a kan tonter lai lo tiah zeicah i ruahchan awk a si lo? (b) Hremnak le temhnak in khawh a si ko ti kha zeitindah kan hngalh?
7 Ṭhatlonak in a khatmi vawlei i kan nun caah ngaihchiatnak pakhatkhat kan tong lai ti cu a fiang. Pathian nih hi chan ṭhalo a hrawh hlan ah zei ngaihchiatnak hmanh a kan tonter lai lo tiah i ruahchan awk a si lo. Mah caan chung ah, hneksaknak kan tonmi nih Jehovah cungnung bik a sinak kan ṭanh le ṭanh lo a langhter lai. (2 Tim. 3:12) Asinain vancung kan Pa bawmhnak le hnemhnak thawng in hlanlio Thesalonica khua chiti thuhmi Khrihfa hna bantuk in hremnak le temhnak lakah inkhawhnak le zumhnak ngeih khawh a si ko.—2 Thesalon 1:3-5 rel.
8. Jehovah nih a salle a hnemh hna kha Baibal nih zeitindah a chim?
8 Jehovah nih a salle kha an herhmi hnemhnak a pek hrimhrim ko hna. Tahchunhnak ah, profet Elijah cu Siangpahrangnu ṭhalo Jezebel nih thah a timh tikah a ṭih i a zaam. Thih ka duh ti hmanh a rak ti. Cu tikah Jehovah nih sualphawt lo in a rak hnemh i a rian a ṭuan khawh nakhnga thazaang a rak pek. (1 Si. 19:1-21) Jehovah nih a salle a hnemh hna kha kumzabu pakhatnak Khrihfabu zong ah kan hmuh. Baibal nih hitin a ti: “Judea ram le Galili ram le Samaria ram i a ummi Khrihfabu vialte nih khan daihnak caan an hmu. Bawipa kha ṭihzah ngai in an um i thiang thlarau bawmhnak thawngin an ṭhang i an karh.” (Lam. 9:31) Kannih zong “thiang thlarau bawmhnak” kan hmuh cu lunglawmh awk taktak a si.
9. Jesuh kong cawnnak nih zeitindah a kan hnemh khawh?
9 Jesuh Khrih kong cawnnak le a keneh zulhnak zong in hnemhnak kan hmu. Jesuh nih hitin a ti: “Re a theimi le thil a ritmi vialte hna, ka sinah ra tuah u, dinhnak kha kan pek hna lai. Ka seihnam kha i bei u, kei cu nunnem le toidornak lungthin a ngeimi ka si caah ka nawl hi i cawn ve u; cun dinhnak kha nan hmuh ko lai. Ka seihnam cu a bei a nuam i ka thil cu a zaang.” (Matt. 11:28-30) Jesuh nih zaangfahnak le dawtnak in mi a pehtlaih hnanak kong kan cawn le a nawl kan i cawn ahcun kan lungretheihnak a zaang deuh lai.
10, 11. Khrihfabu ah ahonihdah mi an hnemh khawh hna?
10 Zumtu khat sin zong in hnemhnak kan hmu kho. Khrihfa upa nih thlaraulei a dermi pawl zeitindah an bawmh hna kha ruathmanh. Zultu Jeim nih hitin a ṭial: “[Thlaraulei] a zawmi nan um ahcun, Khrihfa upa kha au hna u law thla in campiak hna seh.” Zei ṭhatnak dah a chuak lai? “Zumhnak in thla an camnak nih khan a zawmi kha a damter lai; Bawipa nih damnak kha a pek ṭhan lai i sualnak a tuahmi kha ngaihthiam a si lai.” (Jeim 5:14, 15) Khrihfa upa lawng si lo in unau dang zong nih hnemh khawh a si.
11 Kan tonmi harnak kong kha nu le nu i chimh a fawi deuh. A hleiin upa le hmuhtonnak tam a ngeimi unaunu pawl nih nu no deuh pawl kha ruahnak ṭha an cheuh khawh hna. Nu no deuh pawl tonmi harnak cu upa pawl nih an rak ton balmi a si men lai. Upa pawl nih nu no deuh pawl kha ṭha tein an bia ngaihpiak le zawnruahnak in an bawmh khawh hna. (Titas 2:3-5 rel.) Khrihfa upa le midang zong nih kan lak i a ummi “a ral a chiami kha ralṭhatnak” pek khawh a si. (1 Thes. 5:14, 15) Pathian nih “harnak kan innak kip ah a kan bawmh caah kannih zong nih harnak a phunphun in a ingmi kha kan bawmh” ve hna awk a si kha philhhlah.—2 Kor. 1:4.
12. Pumh cu zeicah a biapit?
12 Pumhnak zong hi hnemhnak hmuh khawhnak a ṭha tukmi lam a si i kan theihmi Baibal bia in thazaang kan hmu. Judas le Silas nih “unau pawl cu saupi bia an chimh hna i ralṭhatnak le thazaang an pek hna” tiah Baibal ah kan hmuh. (Lam. 15:32) Pumh hlan le pumh dih ah unau pawl he thazaang a pemi biaruahnak caan kan hmu. Cucaah kan lungre a theih tik hmanh ah pumh lo in um ding a si lo. Kan i pumh lo ahcun thil sining a chia chin lai. (Ptb. 18:1) Lamkaltu Paul nih a chimmi bia hi zulh awk a si: “Pakhat le pakhat kan i dawt khawh nakhnga le thil ṭha kan i tuahpiak khawh nakhnga, i bawm tliahmah u sih. Pakhat le pakhat hmun khat i i pumh lengmang kha ngol hlah u sih; a cheu nih cun ngol hmanh hna sehlaw, kannih cu i forh chin u sih, zeicahtiah Bawipa ni cu a nai deuh chin lengmang ti kha kan hngalh caah i forh chin lengmang ko u sih.”—Heb. 10:24, 25.
Baibal nih a Kan Hnemh
13, 14. Baibal nih zeitindah a kan hnemh khawh?
13 Tipil a ing cangmi zong, Pathian le aa tinhmi kong a cawng liomi zong Baibal in hnemhnak hmuh khawh a si. Paul nih hitin a ṭial: “Cathiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si.” (Rom 15:4) Baibal nih a kan hnemh khawh i ‘zeizong zeizong ah tlamtlingmi si awk le thil ṭha phun zakip tuah khawh awkah thilthuam tling tein a ngeimi si awk’ a kan bawmh khawh. (2 Tim. 3:16, 17) Cucaah Baibal le Baibal hrambunh in chuahmi cauk kan rel ahcun Pathian nih aa tinhmi kan hngalh khawh lai i hmailei ruahchannak kan ngei lai. Mah nih hnangamnak le ṭhatnak tampi a kan hmuhter lai.
14 Jesuh nih midang cawnpiaknak le hnemhnak ah Baibal a hmannak thawng in zohchunhawk ṭha a chiah. Thihnak in a thawh hnu ah a zultu pahnih sinah a lang i ‘Cathiang sullam a chimh’ hna tikah a zultu cu an lung a suk tuk hna. (Luka 24:32) Lamkaltu Paul zong nih Jesuh nawl aa cawn i mi kha “Cathiang chung bia” a chimh hna. Berea khuami hna nih Paul chimmi kha “lungtho ngaiin an ngaih i . . . a si taktak maw si taktak lo ti hngalhnak caah nifate in Cathiang chung kha an kawl.” (Lam. 17:2, 10, 11) Cucaah nifate Baibal rel le bupi cauk rel cu a biapi tuk. Mah nih harnak in a khatmi tuchan ah hnangamnak le ruahchannak a kan pek.
Midang Hnemh Khawhning
15, 16. Unau pawl kha zeitindah bawmh khawh le hnemh khawh a si?
15 Zumtu khat pawl kha lam phunphun in hnemh khawh le bawmh khawh a si. Tahchunhnak ah, tar le a zawmi hna nih an herhmi thil cawk an i harh caah va cawkpiak khawh a si. Unau dang pawl an inn rian zong bawmh khawh a si. Cuticun siaherhnak kan langhter khawh. (Fil. 2:4) Unau pawl nih an ngeihmi dawtnak, ralṭhatnak le zumhnak ti bantuk an ṭhatnak tete zong thangṭhat khawh a si.
16 Tar pawl kha va len in an hmuhtonnak le Jehovah rian ṭuannak in an hmuhmi thluachuah an chimmi ṭha te’n ngaihpiaknak in hnemh khawh an si. Cutikah kanmah theng zong hnemhnak le thazaang kan hmu lai. Kan va len hna tikah Baibal asiloah bupi cauk relpiak khawh a si. Cawn dingmi Vennak Innsang capar asiloah Khrihfabu Baibal Cawnnak i cawn hngami zong i ruahceihṭi khawh a si. Bupi chuahmi DVD zong zohṭi khawh a si. Bupi cauk chung i thazaang a pemi hmuhtonnak cheukhat relpiak asiloah chimh khawh a si.
17, 18. Jehovah nih zumhfekmi a salle a bawmh hna lai i a hnemh hna lai kha zeicah kan zumh khawh?
17 Unau pakhatkhat hnemh a herh ti kan hngalh ahcun thla kan cam tikah a kong cam chih ding a si. (Rom 15:30; Kol. 4:12) Kanmah theng harnak kan ton tik le harnak a tongmi hnemh kan i zuam tikah David bantuk zumhnak kan ngei kho ve. Hitin a ṭial: “Na thilrit cu BAWIPA sinah ṭhum ta law amah nih an bawmh lai; miṭha cu zeitikhmanh ah a sunghter bal lai lo.” (Salm 55:22) Jehovah cu zumhfekmi a salle hnemh awk le bawmh awkah timhcia in a um zungzal.
18 Pathian nih hlanlio a salle kha “nanmah thazaang an petu hna cu keimah ka si” tiah a ti hna. (Isa. 51:12) Kannih zong thazaang a kan pek ve lai i kan bia le tuahsernak in ngaihchiami kan hnemh hnanak ah thluachuah a kan pek lai. Kan i ruahchanmi cu van a si ah, vawlei a si ah kan zapi in Paul nih chiti thuhmi Khrihfa hna sin a chimmi hi bia in hnemhnak kan hmu kho: “Kannih a kan daw i vel a kan ngeih caah hnangamnak le ruahchannak a ṭhami a kan pe zungzal tu Bawipa Jesuh Khrih le Pathian kan Pa nih cun a ṭhami kha nan tuah ngam nakhnga le nan chim ngam nakhnga ralṭhatnak in pe ko hna seh.”—2 Thes. 2:16, 17.
Naa Cinken Maw?
• Phungchimnak cu zeitluk in dah a kauh?
• Midang kha zeitindah hnemh khawh a si?
• Jehovah nih a salle a hnemh hna ti kha Baibal nih zeitindah a langhter?
[Cahmai 28nak i hmanthlak]
A ngaih a chiami kha na hnem hna maw?
[Cahmai 30nak i hmanthlak]
Mino zong, upa zong nih midang thazaang pek khawh a si