Pathian Nih A Kan Hnemhning

Lamkaltu Paul nih Jehovaha cu ‘zeizong vialte ah a kan hnemtu Pathian, harnak kan innak kip ah a kan hnemtu’ a si tiah a ti. (2 Korin 1:3, 4, NW) Cucaah Pathian bawmhnak a hmu kho lomi an um lo i vancung kan Pa nih hnemh khawh lo tiangin a nganmi buaibainak a um lo ti kha Baibal bia hna in kan zumh khawh.

Pathian sinin hnemhnak hmuh kan duh ahcun thil pakhat kan tuah a hau. Siibawi sinah voikhat hmanh kan kal lo ahcun zeitindah a kan bawmh khawh lai? Cucaah Baibal nih hitin a kan forh: “Pathian cu naih u law aan naih ve hna lai.”—Jeim 4:8.

Pathian nih a kan naih lai tiah zeicah kan zumh khawh? Pakhatnak ah, Pathian nih bawmh kaan duh hna tiah atu le atu a chim caah a si. (Rinli kulh kha zoh.) Pahnihnak ah, hlanlio ah siseh, tuchan ah siseh Pathian hnemhnak a hmumi hna sinin zumhawktlak langhtertu thil hna kan ngeih caah a si.

Tuchan mi hna bantukin Siangpahrang David zong ngaihchiatnak a ton tikah Pathian bawmhnak kha a kawl ve. Voikhat cu Jehovah kha hitin a nawl: “Nangmah bawmh hal awkah ka au . . . tikah ka aunak kha ka theihpiak tuah.” Pathian nih a thlacamnak cu a theihpiak maw? A theihpiak. Cucaah David nih “a ka bawmh i kaa lawm” tiah a ti.—Salm 28:2, 7.

A Ngaih a Chiami vialte kha Jesuh nih a Hnemh hna

Pathian nih mi pawl hnemhnak ah Jesuh kha a bik in hman dingin tinhnak a ngei. Pathian nih a pekmi rian ah “lung a kuaimi hna damter” le “a ngaih a chiami vialte kha hnemh” ding zong aa tel. (Isaiah 61:1, 2) Chimchung a si bantukin Jesuh nih “re a theimi le thil a ritmi vialte” kha a hleiin a rak bawmh hna.—Matthai 11:28-30.

Jesuh nih mi pawl kha a ṭhami ruahnak cheuhnak a pek hnanak thawngin, nem tein a pehtlaih hnanak thawngin le an zawtnak a damter hnanak thawngin a hnemh hna. Nikhat cu thinghmui zawtnak a ngeimi pa nih Jesuh kha “na duh ahcun na ka thianter khawh ko” tiah a nawl. Mah tikah Jesuh nih a zaang a fak i “nangmah thianter kha ka duh, va thiang cang” tiah a ti. (Marka 1:40, 41) Thinghmui zawtnak a ngeimi pa cu a dam.

Tuchan ah Pathian Fapa Jesuh cu vawleicung i a um ti lo caah amah theng nih a kan hnem kho ti lo. Asinain a Pa, ‘zeizong vialte ah a kan hnemtu Pathian’ Jehovah nih a herhmi pawl kha a hnemh rih ko hna. (2 Korin 1:3, NW) Pathian nih mi pawl hnemhnak caah a bik in a hmanmi lam pali kha zohhmanh u sih.

• Baibal. “Cathiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si.”—Rom 15:4.

• Pathian Thiang Thlarau. Jesuh a thih hnu tlawmpal ah Khrihfabu cu hnemhnak a hleiin a rak herh. Mah tikah Jehovah Pathian nih thiang thlarau hmangin a rak hnemh hna tiah Baibal nih a ti. (Lamkaltu 9:31) Thiang thlarau cu Pathian nih a hmanmi ṭhawnnak a si i a ṭhawng tukmi a si. Pathian nih thiang thlarau hmangin ahopaoh kha zeitik caan paohah a hnemh khawh hna.

• Thlacamnak. “Zeithil kong hmanhah lungrethei in um hlah u” tiah Baibal nih ruahnak a kan cheuh. “Thla nan camnak ah Bawipa cu nan herhmi kha hal u. . . . Cun Pathian daihnak, minung hngalhnak a lonhtu nih cun Khrih Jesuh chungah nan lungthin le nan ruahnak cu him tein a chiah lai.”—Filipi 4:6, 7.

• Khrihfa Unau. Harnak ton caan ah an sinin hnemhnak hmuh awkah kan i ruahchan khawhmi hawikom ṭha pawl cu Khrihfa unau hi an si. Lamkaltu Paul nih a hawile cu “harnak le temhnak” caan chungah “bawmtu ṭhahnem ngaingai an si” tiah a ti.—Kolose 4:11; 1 Thesalon 3:7.

Asinain harnak ton taktak tikah mah thil hna cu hnemtu an si kho ngai hnga maw tiah na ruah men ko lai. Capar a thawknak ah langhtermi harnak a tongmi hna kong kha ṭha tein ruathmanh u sih. “Nu nih a fa a hnemh bantukin . . . kaan hnemh hna lai” tiah Pathian nih bia aa kam. Mah a biakam ningin Pathian nih aan hnemhmi kha anmah bantukin na hun hngalh ko lai.—Isaiah 66:13.