Nangmah Bawmhnak A Herh
1 “Kan zapi ṭhathnemnak ca i nan tuahmi vialte ruangah kan i lawm. Kan caah a ṭhahnem ngaingai.” Hi bia cu khrihfa upa pawl le bu rianṭuantu cung i lawmhnak kan chimmi a si. Pathian bupi a ṭhancho i a kauh chin lengmang lioah vawlei cung pumpi khrihfabu 100,000 hrawng i rian ṭuan dingah patling a simi pa pawl a herh chap. Nang tipil a ing cangmi unaupa na si ahcun nangmah na bawmhnak a herh.
2 “Phanh Khawh i Zuam”: Rian chapmi tinvo ṭha hna ah zeitin in dah na phanh khawh lai? (1 Tim. 3:1, Nw) A hrampi in cun na nuncan kip ah zohchunh awk tlak langhternak in a si. (1 Tim. 4:12; Titas 2:6-8; 1 Pit. 5:3) Phungchimnak rian ah tling khitkhet in i tel law cu bantukin ṭuan awkah midang kha bawm hna. (2 Tim. 4:5) Zumtu hawi pawl ṭhatnak kha lungtak tein hngalh duhnak ngei. (Rom. 12:13) Pathian Bia kha teima tein a hlathlaimi le “cawnpiak thiamnak” ah a ṭhangcho mi si. (Titas 1:9, Nw; 1 Tim. 4:13) Khrihfa upa nih an in pekmi rian pawl kha teima tein ṭuan. (1 Tim. 3:10) Innchungkhar hruaitu lu na si ahcun na “innchungkhar ṭhate in a zohkhen khomi” si.—1 Tim. 3:4, 5, 12.
3 Rian thiahmi pakhat ṭuannak ah zuam le ṭan in mah zawnruahnak ngeih lo kha a herh. (1 Tim. 5:17) Cucaah, phan khawh awk i naa zuam tikah midang ṭhatnak kha toidor tein ṭuan awkah ṭhate in zoh. (Matt. 20:25-28; Johan 13:3-5, 12-17) Timote lungputning kha fakpi in ruat law i zohchunh awkah i zuam. (Fili. 2:20-22) Cubantuk in, a ṭhami na ziaza nih in dirpi seh. (Lam. 16:1, 2) Tinvo hmuh chapmi rian hna ṭuan awkah a herhmi thlarau lei sining hna kha ṭhanter law ṭhanchonak caah na hmuhmi zeibantuk ruahnak cheuhnak paoh na hman tikah “na ṭhannak kha mi vialte nih an hmuh” lai.—1 Tim. 4:15.
4 Nulepa hna, Mino Pawl nih Mi An Bawmhthiam Nakhnga Cawnpiak hna U: Ngakchia pawl nih an hmet lio tein mi bawmhthiamnak kha an cawn khawh. Pumhnak hna kha ṭhate in ngaih awk, phungchim thiam awk, Kingdom Hall le sianginn ah ziaza lei zohchunh awk tlak an si nakhnga cawnpiak hna u. Kingdom Hall thianhhlimhnak ah bawmhnak, tar pawl bawmhnak ti bantuk zei thil paoh i midang ca ṭhatnak tuahpiaknak ah telter hna u. Pek lei ah hmuhmi lunglawmhnak kha hmuhter ve hna u. (Lam. 20:35) Cubantuk cawnpiaknak nih hmailei ah hmaikal le bu rianṭuantu le khrihfa upa si awkah a bawmh khawh hna.