Mino Unaupa Pawl, Hmuh Nan i Zuam Maw?
1. Mino unaupa pakhat nih 1 Timote 3:1 lamhruainak kha zeitik in dah zulh aa zuam awk a si?
1 ‘Mi pakhatkhat nih . . . . hmuh aa zuam cu rian ṭha ngai a duh a si.’ (1 Tim. 3:1, NW) Mah Baibal cang nih unaupa hna kha Khrihfabu ah ṭuanvo hmuh i zuam awkah a forh hna. Cutin tuah awkah upa na si a hau maw? A tak ti ahcun, na no liote in cutin tuah i zuam cu a ṭha bikmi a si. Cuticun cawnpiak lamhruainak na hmuh khawh lai i na upat tikah bu rianṭuantu si awkah aa tlakmi na si kha na langhter khawh lai. (1 Tim. 3:10) Nang cu tipil a ing cangmi mino unaupa na si ahcun mah kha zeitindah hmuh naa zuam khawh lai?
2. Mah ca ṭhatnak hlawt duhnak kha zeitindah ngeih khawh le langhter khawh a si?
2 Mah Ca Ṭhatnak Hlawtnak: Hmuh naa zuammi cu upatnak min si loin rian ṭha a si ti kha philh hlah. Cucaah unau pawl bawmh duhnak lungthin ngeih i zuam. Cutin tuah khawhnak lamkhat cu Jesuh nunning i cawn kha a si. (Matt. 20:28; Johan 4:6, 7; 13:4, 5) Mi cungah siaherhnak ngeih khawh awkah Jehovah kha ka bawm tiah nawl. (1 Kor. 10:24) Nan Khrihfabu ah a ummi tar le a dam lomi kha na bawm kho hna lai maw? Biakinn pawngkam phiah, zuninn ti rawn, a herhmi thil remh ti bantuk kha na bawmh kho hna lai maw? Unau pakhat nih phungchim Ning Cawnnak ah rian an pekmi a tuah khawh lo tikah na tuahpiak kho lai maw? Midang ca naa pek tikah naa nuamh kha na hmuh lai.—Lam. 20:35.
3. Thlaraulei ah i zuam cu zeitluk in dah a biapit, mah kha zeitindah tuah khawh a si?
3 Thlaraulei Ah I Zuamnak: Khrihfabu rianṭuantu caah thil a ti khomi si le thiamnak ngeih nakin thlarau leiah i zuam a biapi deuh. A thlarau mi nih cun Jehovah le Jesuh bantukin thil hmuh aa zuam. (1 Kor. 2:15, 16) Cun “thlarau nih a chuahtermi” ziaza zong a langhter. (Gal. 5:22, 23) Anih cu Pennak pakhatnak ah a chiami le lungtho tein phung a chimmi a si. (Matt. 6:33) Nang zong ṭha tein Baibal na hlathlai lengmang ahcun thlaraulei ziaza kha na ngei kho ve lai. Mah ah, nifate Baibal rel, Vennak Innsang le I Hlau! rel le Khrihfabu pumhnak caah i timhtuah hna aa tel. (Salm 1:1, 2; Heb. 10:24, 25) Paul nih Timote kha thlaraulei ṭhancho awk a forh hnuah “na cawnpiaknak zong kha i ralring” tiah a ti. (1 Tim. 4:15, 16) Cucaah Phungchim Ning Cawnnak ah rian an in pek tikah ṭha tein i tim. Lohmun phungchimnak ca zong ah i tim law hmaan tein i tel. Hmaikal, Bethel rian asiloah Nupi a Ngei lomi Unaupa pawl caah Baibal Tinṭan kai ti bantuk thlaraulei hmuitinh kha ngei law hmuh khawh i zuam. Thlaraulei ah naa zuamnak nih “tlanval lio pumsa duhnak kha zamtak” khawh awkah aan bawmh lai.—2 Tim. 2:22.
4. Bochan awk a tlakmi le zumhawk a tlakmi si man cu zeidah a si?
4 Bochan Tlakmi le Zumhawk Tlakmi Sinak: Kumzabu pakhatnak ah a si a fakmi unau pawl rawl phawtu ding ah unaupa pawl kha rian an pek hna. Annih cu bochan awk a tlakmi le zumhawk a tlakmi an si caah an rian an ṭuan khawh lai le ṭuan khawh lai lo kong ah lamkaltu pawl cu an lungre a thei lo. Mah ruangah a biapimi a dang rian ah an lungthin an pek khawh. (Lam. 6:1-4) Cucaah, Khrihfabu ah rian an in pek tikah na si khawh chung in ṭha tein tuah. Lawng sak fial a si tikah lamhruainak ṭha tein a zulmi Noah kha i zohchunh. (Gen. 6:22) Zumhawktlakmi sinak cu Jehovah caah a sungmi a si i thlaraulei nutling patling sinak a langhtermi zong a si.—1 Kor. 4:2; “Cawnpiaknak a Ṭhathnemnak” timi rinlikulh kha zoh.
5. Mino unaupa pawl nih zeicah hmuh an i zuam awk a si?
5 Chimchungbia bantukin Jehovah nih mi kha fakpi in a pumhkhawmh hna. (Isa. 60:22) Buaktlak in, kum fate sing hnih le cheu tipil an ing. Biatak chung ah mithar tampi an rak rat caah, Khrihfabu zohkhenhtu dingah sining a tlinhmi le a thlaraumi pa pawl a herh. Atu ah hlan nakin Jehovah rian ṭuan awk a tam khun. (1 Kor. 15:58) Mino unaupa hna, mah kha hmuh awkah nan i zuam maw? Nan i zuam ahcun rian ṭha taktak hmuh nan duh a si!
[Cahmai 2 i a tawinak in langhternak]
Biatak chung ah mithar tampi an rak rat caah, Khrihfabu zohkhenhtu dingah sining a tlinhmi le a thlaraumi pa pawl a herh
[Cahmai 3 i rinli kulh]
Cawnpiak a Ṭhathnemnak
Sining a tlinhmi mino unaupa pawl cu Khrihfa upa nih rian an pek hna le an cawnpiak hna tikah ṭhatnak an hmu. Khualtlawng rianṭuantu pakhat cu pumh a dih hnuah thawngthanhtu pakhat kha thazaang pek awkah pulpit cungah a ṭhu. A pawng ah mino unaupate a dir ko kha a hmuh tikah keimah chawnh awkah ma na ka hngah tiah a ti. Mah tikah unaupate nih pumh a dih fate pulpit thianh hi ka rian a si tiah a leh. A nu le a pa cu innṭin awkah timhcia an si cang nain anih cu a rian a dih hlan ah inn ṭin a duh lo. Khualtlawng rianṭuantu cu tha nuam tein aa ṭhial. Hitin a chim: “Khrihfa upa pawl nih sining a tlinhmi mino unaupa pawl kha Khrihfabu rian an pek hnanak thawngin rian an chimh lengmang hna. Cucaah an Khrihfabu ka tlawn tikah bu rianṭuantu a simi mah unau pate an thangṭhatmi cu khuaruahhar a si lo.”