Jehovah Rian ah Thanuam in Kan i Hmang!
1 Lamkaltu Paul cu Khrihfa rian caah a ‘ngeihmi vialte le a pum zong hi hman dih’ a rak duh. (2 Kor. 12:15) Cu bantuk in tuchan Khrihfa hna zong hmaikal ṭuan in cu rian ah teima tein an i tel. A cheu cu chungkhar ah rian tampi an ngeih bu in Pathian rian ah zarh fate tel khawh awkah a caan an suai. A cheu cu an dam lo nain Pennak rian ṭhanchonak caah an si khawh tawk in an i tel. Jehovah miphun cu kum zeizat an si hmanh le zei thil sining tang hmanh ah Jehovah rian ah an i hman kan hmuh hna hi zeitluk thazang petu dah a va si!
2 Innpa Dawtnak: Pathian le innpa kan dawt hna caah Jehovah rian a si khawh chung kan ṭuanmi nih chiaṭha thleidannak lungthin thiang a kan ngeihter. Paul cu thawngṭha bia chimnak ah a nunnak aa pek caah hitin a chim khawh: “Nannih lakah hin pakhatkhat nan tlau ahcun keimah cu mawhchiat awk ka si hnga lo.” (Lam. 20:24, 26; 1 Thes. 2:8) Phungchimnak ah kan sining nih a pek chung paoh a si khawh chung i telnak nih mawhchiatnak in a kan luatter lai.—Ezek. 3:18-21.
3 Midang va bawmhnak ah kan i hmannak nih a kan lawmhter. (Lam. 20:35) Unaupa pakhat nih hitin a chim: “Chun ni tlak Jehovah rian ka ṭuan i zanlei inn ka phanh ah cun ka ba ngai te. Asinain kaa nuam, ahohmanh nih chuh khawh lomi lunglawmhnak ka hmuh caah Jehovah cungah kaa lawm.”
4 Pathian kha Daw: Jehovah rian ah kan i hmannak a biapi bik a ruang cu mah nih vancung kan Pa lung a lawmhter caah a si. Pathian kan dawtnak nih phung-chimnak le zultu siternak rian tel in a nawlbia zulh awk a kan forh. (1 Johan 5:3) Mi nih an duh lo, an ralchan ko nain Jehovah caah lunglawm tein kan ṭuan zungzal.
5 Atu hi i dindorh ding caan a si lo. Rawl ṭuan caan ah kan nung. (Matt. 9:37) Lothlopa nih rawl ṭuan caan ah din lo in a ṭuan tawn. Zeicahtiah theipar an rawh hlan ah ṭuan ding a caan ri a um caah a si. Cu bantuk in thlarau lei rawl ṭuannak zong a caan ri a um ve. Cucaah zei caan ah dah kan nun ti kha i cinken in Pathian rian kha teima in ṭuan peng hna u sih.—Luka 13:24; 1 Kor. 7:29-31.