Phungchim Rian ah Ṭhanchonak
1 Lamkaltu Paul nih Khrihfa hna kha Pathian duhnak lam zulh awkah le “tam chinchin in” ṭhancho awkah a rak forh hna. (1 Thes. 4:1) Mah cu kan caah zei sullam dah a ngeih? Pakhat cu thlarau lei rian ah tam deuh in i tel awk, phun dang in cun “thawngṭha karhter” khawhnak lam kha fakpi in kan kawl awk a si.—2 Tim. 4:5.
2 Tinhmi: A kan Sertu rian kha tling tein ṭuan kan duh caah phungchim rian ah tam deuh in kan i tel. Jehovah he pehtlainak ṭha ngeih kan duh caah phung-chim rian a karhter hngami lam kha kawl kan duh. Ṭha tein caan suaimi le tinhnak hmaan ngeihnak nih Theocratic hmuitinh kha phanh awkah a kan bawmh lai.—Salm 1:1, 2; Fil. 4:6; Heb. 10:24, 25.
3 Phungchim rian karhter khawh awkah mah zawn ruah lonak lungthin ngeih a herh. Jesuh zohchunh awk ṭha kha thlacam bu in ṭha tein ruahnak thawng in mah lungthin kha kan ṭhanchoter khawh. (Matt. 20:28) Jesuh cu Pathian rian a ṭuan chungah midang ca ṭhatnak a tuahpiakmi hna in lunglawmhnak nganpi a rak hmu. (Lam. 20:35) Mi ca ṭhatnak ding kha a hlei in siaherh-nak kan ngeihmi le phungchim rian karhternak ah caan ṭha kan hmuhmi paoh hmannak thawng in Jesuh kha kan i cawn khawh.—Isa. 6:8.
4 Nu le Pa Rian: Fale kha an ngakchiat lio tein midang ca ṭhatnak tuah duhnak le phungchim rian ah tam deuh in i tel duhnak an ngeih nakhnga cawnpiak khawh a si. Ngakchia nih chungkhar mi hna teimaknak le phungchim rian karhternak ah lungtho tein an i telnak kha an hmuh ko lai. Unaupa pakhat cu a ngakchiat lio tein a pu he Khrihfabu rian ah a rak i tel. A pu teimaknak le lunglawmhnak a hmuhmi nih ṭhancho awk le unau hna caah a si khawh chung in ṭuan awkah a rak forh. Atu cu bu rianṭuantu a si cang.
5 Unau hna Tuah awk: ‘Ṭhancho a duh ahcun rian ṭha ngai a duh a si.’ (1 Tim. 3:1, NW) Mah bia nih Jehovah bupi ah tinvo hmuh chapnak caah sining tlinh ding in ṭhancho awkah unau pa pawl tha a pek hna. Cu rian ṭuan awkah thiamnak le thil ti khawhnak a hlei in ngeih a herh lo. A ṭhangchomi unaupa pakhat cu Pennak kha hmasa ah a chiami le phungchim rian ah teimami a si lai. (Matt. 6:33; 2 Tim. 4:5) Midang ca zohchunh awk ṭha si awkah aa zuam lai.
6 Vawlei Pumpi: Jehovah nih pumhkhawmhnak rian kha khulrang in a ṭuan. (Isa. 60:22) Jesuh zohchunh awk ṭha a zulmi vialte nih phungchim rian ah tling tein i tel ding a biapi tuk. 2006 rianṭuannak kum ah vawlei pumpi report nih 248,327 tipil an in kha a langhter. Mah nih buaktlak in mithar 680 leng hi nifate tipil an ing ti a langhter. Cucaah kan dihlak in phung-chim rian ah tling deuh in i tel khawhnak lam kawl hna u sih.