‘Khrih Ah Aa Thupmi’ Rothial Kawlnak

“Khrih cu Pathian fimnak le hngalhnak aa thupmi hunnak tawh a si.”—KOL. 2:3.

1, 2. (a) 1922 ah minung sermi zei hlan thil dah an hmuh i atu khoika ah dah a phanh? (b) Pathian Bia nih mikip kha zei tuah awk dah a sawm hna?

THUHMI rothil hmuh cu a biapi tukmi thawngpang in hmuh a si tawn. Tahchunhnak ah, 1922 ah Britin miphun thil hlun a kawlmi Howard Carter nih kum tampi chung harnak ing in teima tein rian a ṭuan hnu ah lunghmui ngai a simi thil a hmuh. A muisam a rawk lomi hlan thil 5,000 tluk aa telmi Faraoh Siangpahrang Tutankhamen thlan kha a hmuh.

² Carter hmuhmi cu a sung lawi ngai nain atu ah a tam deuh cu thil hlun chiahnak inn asiloah pumpak thil khonnak ah a phan. Cu thil hna cu tuanbia ṭial awk asiloah thildawh mansung an si men lai nain nifate kan nunnak ah man a ngei lo. Asinain kan ca man a ngei taktakmi rothil kawl awkah Pathian Bia nih a kan sawm. Mikip sawm kan si i hmuh ding laksawng cu zei thilri nakhmanh in man a ngei deuh.—Phungthlukbia 2:1-6 rel.

3. Jehovah nih amah a biami kawl a fialmi hna rothil cu zei lam in dah man a ngeih?

³ Jehovah nih amah a biami kawl a forhmi hna rothil a man kha tuak hmanh. Cu rothil hna lak ah ‘Jehovah ṭih’ aa tel, cu nih hi ṭihnungmi chan ah a kan huhphenh khawh i a kan ven khawh. (Salm 19:9) “Pathian hngalhnak” kawlnak nih minung ngeihmi vialte lak ah upatnak a pe bikmi—Lianngan Bik he pehtlaihnak ṭha a kan ngeihter khawh. Pathian pekmi fimnak, hngalhnak le thleidanthiamnak rothil in nifa kan nunnak ah kan tonmi harnak hna kha ṭha tein kan tonghtham khawh lai. (Ptb. 9:10, 11) Zeitindah mah rothil cu hmuh khawh a si?

Thlaraulei Rothil Kawlnak

4. Pathian kamhmi rothil cu zeitindah kawl khawh a si?

⁴ Thil hlun a kawltu hna le rothil khuaza kip ah a kawlmi hna he i lo loin thlaraulei rothil hmuh khawhnak hmun zawn te kha kan hngalh. Rothil umnak hmun hmanthlak bantukin Pathian Bia nih Pathian kamhmi rothil hmuh khawhnak hmun set te kha a kan sawhpiak. Khrih kha sawh in lamkaltu Paul nih hitin a ṭial: “Khrih cu Pathian fimnak le hngalhnak aa thupmi hunnak tawh a si.” (Kol. 2:3) Mah bia kan rel tikah hitin i hal awk a si: ‘Mah rothil cu zeicah kawl awk a si? Khrih sinah zeitindah aa ‘thuh’? Mah cu zeitindah kan hmuh lai?’ A phi hmuh awkah lamkaltu chimmi bia kha ṭha tein zoh u sih.

5. Paul nih thlaraulei rothil kong zeicah a ṭial?

⁵ Mah bia kha Paul nih Kolose Khrihfa unau hna sinah a ṭial. “Dawtnak in pakhat le pakhat an i komh i . . . hnangamnak tampi kha an ngeih nakhnga” aa zuam kha a chimh hna. (Kolose 2:1, 2 rel.) Zeicah a lungre a theih tuk? Cuka um unaupa hna cu an lak i Greek fimnak pakhatkhat a cohlangmi asiloah Moses Nawlbia zulh ṭhan tha a pemi hna cheukhat huham tang ah an um khawh kha Paul nih ṭha tein a hngalh. Unau pawl kha fakpi in hitin ralrin a pek hna: “Khrih chungin si lo in, van le vawlei uktu thlarau hna sinin le minung nih pakhat le pakhat an i cawnpiak chin lengmang mi chungin a chuakmi minung fimnak, santlaihnak zeihmanh a ngei lomi fimnak, hlennak menmen a simi cu hmangin, ahohmanh nih sal ah in ser hna hlah seh.”—Kol. 2:8.

6. Paul cawnpiaknak kha zeicah hngalh kan duh awk a si?

⁶ Tuchan ah Satan le a chan ṭhalo sinin mah bantuk huham kan ton ve. Minung phuahmi zumhnak le thlennawnnak theory tel in vawlei fimnak nih minung ruahnak le ziaza le nunning kha a thlen. A hmaan lomi biaknak hna cu a larmi puai tampi tuahnak ah a bik in aa tel. TV i a langmi, baisikup le music le a dang nuamhsaihnak tampi cu a ṭha lomi thisa duhnak tlinternak caah an tuahmi a si i internet i a kong tampi cu upa mino caah ṭihnung a si taktak. Mah an piah lengmangmi le a dang chanthar thil hna nih Jehovah lamhruainak cung i kan lungput le kan ruahnak kha fawi tein a hnorsuan khawh i a hmaanmi nunnak fek tein kan i tlaihmi kha a dorhter. (1 Timote 6:17-19 rel.) Satan rap ah foih kan duh lo ahcun Paul cawnpiaknak hngalhthiam le i lak a herh.

7. Kolose khuami a bawm hngami zei thil pahnih dah Paul nih a chim?

⁷ Paul nih Kolose khuami hna sin a ṭialmi zoh ṭhan tikah an ca a thinphannak a chim hnu ah hnangamnak le dawtnak ah lung a rualtermi thil pahnih a chimh hna kha kan hmuh. Pakhatnak ah, ‘hngalthiam in lungthin dihlak in zumhnak,’ [NW] kha a langhter. Baibal bia an hngalhthiammi a hmaan kha an lungthin dihlak in zumh a herh. Cu lawngah an zumhnak cu a fekmi ah hram a sih kho lai. (Heb. 11:1) Cun ‘Pathian biathli hmaan tein hngalhnak’ kong a chim. Biatak a hrampi lawng si loin Pathian thil thuk zong fiang tein hngalh a herh. (Heb. 5:13, 14) Kolose khuami hna le tuchan kannih caah cawnpiaknak ṭha a va si dah! Zumh tlak le a hmaanmi mah hngalhnak cu zeitindah kan ngeih khawh lai? Paul nih Jesuh Khrih kong thuk ngaiin a langhtermi ah tawhfung kha hitin a chim: “Khrih cu Pathian fimnak le hngalhnak aa thupmi hunnak tawh a si.”

Khrih Ah “Aa Thupmi” Rothil Vialte

8. Khrih sinah “aa thup” timi biafang sullam kha fianter.

⁸ Fimnak le hngalhnak rothil vialte Khrih sinah “aa thup” ti tikah ahohmanh nih lak khawh a si lo tinak a si lo. Mah canah rothil hmuh awkah fak piin kan i zuam chih lai, dairek in Jesuh Khrih ah kan lungthin kan pek lai kha a chimduhmi tu a si. Mah cu Jesuh nih amah kong hitin a chimmi he aa tlak: “Lam le biatak le nunnak cu keimah hi ka si; keimah sinin ti dah lo cun ahohmanh Pa sin an phan kho lo.” (Johan 14:6) A si ko, Pathian hngalhnak hmuh awkah Jesuh bawmhnak le lamhruainak kan herh.

9. Jesuh cu zei rian dah pek a si?

⁹ Jesuh nih “lam” lengah “biatak le nunnak” ka si tiah a ti. Mah nih Jesuh rian cu Pa sin naihnak lawng a si lo a langhter. Baibal biatak hngalhnak le zungzal nunnak hmuhnak ah Jesuh cu a biapimi rian zong a ngei. Ralring tein Baibal a hlathlaimi siangngakchia pawl kha Jesuh ah aa thupmi man khiah khawh lomi thlaraulei rothil nih a hngah hna. Kan hmailei ruahchannak le Pathian he kan i pehtlaihnak dairek in a ṭhathnem khomi rothil cheukhat kong i ruah u sih.

10. Kolose 1:19 le 2:9 in Jesuh kong zeidah kan hngalh khawh?

¹⁰ “Pathian sining cu tling khitkhet tein Khrih a minung sinak ah khan a um.” (Kol. 1:19; 2:9) Jesuh cu vancung a Pa he rel cawk lo kum tampi chung an um ṭi caah mi zei nakhmanh in a Pa sining hna le a duhnak kha a hngalh deuh. Vawlei cung phung a chim chung vialte ah Jesuh nih a Pa cawnpiakmi kha mi a chimh hna i a Pa cawnpiakmi sining hna kha a tuahsernak in a langhter. Cucaah Jesuh nih hitin a chim khawh: “Keimah a ka hmutu paoh nih cun ka Pa kha an hmuh ve ko.” (Johan 14:9) Pathian fimnak le hngalhnak vialte cu Khrih ah aa thup asiloah a langh caah Jehovah kong cawn tikah Jesuh kong a si khawh chung cawn nakin a ṭha deuhmi lam a um ti lo.

11. Jesuh le Baibal chimchungbia kar ah zei pehtlaihnak dah a um?

¹¹ “Profet hna kha lungthawhnak a petu cu Jesuh nih a phuanmi biatak kha a si.” (Biat. 19:10) Mah bia nih Jesuh cu Baibal chimchungbia tampi tlinnak ah a biapi bikmi a si kha a langhter. Genesis 3:15 ah ṭialmi Jehovah chimmi hmasa bik chimchungbia in Biathlam cauk i langhnak tiang Baibal chimchungbia hna cu Messiah Pennak he aa pehtlaimi Jesuh rian ruah chih lawngah hmaan tein hngalhthiam khawh a si. Mah nih Jesuh kha Messiah in a cohlang lomi hna nih Hebru Cathiang chimchungbia tampi zeicah an hngalhthiam lo kha a langhter. Messiah chimchungbia tampi aa telmi Hebru Cathiang zei ah a rel lomi hna nih Jesuh kha a liannganmi pa men in an hmuhnak a ruang zong a fianter. Jesuh hngalhnak nih a tling rih lomi Baibal chimchungbia a sullam hngalhthiam awkah Pathian miphun kha a bawmh hna.—2 Kor. 1:20.

12, 13. (a) Jesuh cu zeitindah “vawlei ceunak” a si? (b) Biaknak muihnak in luatnak nih Khrihfa hna kha zei rian dah a hmuhter hna?

¹² “Kei cu vawlei ceunak ka si.” (Johan 8:12; 9:5 rel.) Jesuh vawlei ah hrin a si hlan piin profet Isaiah nih hitin a chimchung: “Mui lak i a rak i chawkmi hna nih khan ceunak nganpi an hmuh cang! Thihnak thladem tangah an rak um, sihmanhsehlaw atu cu ceunak nih a ceuh cang hna.” (Isa. 9:2) “Vancung Pennak a nai cang caah, nan sualnak kha mertak cang hna u” tiah Jesuh nih phungchim a thawk tikah mah chimchungbia kha a tlinter tiah lamkaltu Matthai nih a fianter. (Matt. 4:16, 17) Jesuh phungchimmi nih mi kha thlaraulei ceunak a pek hna i a hmaan lomi biaknak cawnpiaknak sal sinak in a luatter hna. “Hi vawlei cungah ceunak bantukin ka ratnak cu a ka zummi paoh kha khuamui chungah an um peng nakhnga lo caah a si” tiah Jesuh nih a ti.—Johan 1:3-5; 12:46.

¹³ Kum tampi a liam hnu ah lamkaltu Paul nih Khrihfa khat kha hitin a ti hna: “Muihnak chungah khua nan rak sa, sihmanhsehlaw Bawipa mi nan si cang caah ceunak chungah nan um. Cucaah ceunak mi a simi bantuk in nan um awk a si.” (Efe. 5:8) Biaknak muihnak sal sinak in a luatmi Khrihfa hna cu ceunak mi bantukin um ding rian an ngei. Mah cu Tlang cung Cawnpiaknak ah Jesuh nih a zultu sin hitin a chimmi he aa tlak: “Nan ceunak zong cu mi hmaiah a ceu awk a si, cuticun thil ṭha nan tuahmi kha an hmuh lai i vancung khua i a ummi nan Pa kha an thangṭhat lai.” (Matt. 5:16) Na biachim le Khrihfa ziaza ṭha in midang sin chim tiang in Jesuh ah hmuhmi thlaraulei rothil kha na sunsak tuk maw?

14, 15. (a) Baibal chan ah tuu le saram dang cu a hmaanmi biaknak ah zeitindah an i tel? (b) Jesuh cu “Pathian Tuufa” in a rian ah zeicah man sung tukmi rothil a si?

¹⁴ Jesuh cu “Pathian Tuufa” a si. (Johan 1:29, 36) Baibal chung vialte ah tuu cu sual ngaihthiamnak le Pathian naihnak ah a biapimi hmun in aa tel. Tahchunhnak ah, Abraham nih a fapa Isak pekchanh a duh a langhter hnu ah Isak harnak pek lo dingin thlauh a si i a airawltu ah tuufa asiloah tuukawng pakhat a rak hmuh. (Gen. 22:12, 13) Israel mi hna cu Izipt ram in an luat tikah tuu cu a biapimi hmun in aa tel, tu tan cu ‘Jehovah ca i lanhtak puai’ cheubang in aa tel. (Ex. 12:1-13) Cun Moses nawlbia ah tuu le meheh tel in saram a phunphun raithawi dingin hal an si.—Ex. 29:38-42; Lev. 5:6, 7.

¹⁵ A tak ti ahcun minung pekmi zei raithawinak hmanh nih sualnak le thihnak in zungzal luatnak a kan pe kho lo. (Heb. 10:1-4) Asinain, Jesuh cu “Pathian Tuufa, vawlei sualnak a kalpitu” a si. Mah ruang theng ah Jesuh cu hmuh balmi zei rothil nakhmanh in a sung deuh tukmi rothil a si. Cucaah raithawinak kong ṭha tein cawn dingah caan la in mah khuaruahhar timhpiaknak kan zumh langhter awk a si. Cuti tuahnak in a sungmi thluachuah le laksawng ruahchannak kan hmu, mah cu “tuurun hmete” caah van ah Khrih he sunparnak le upatnak an hmu lai i “tuudang” caah vawlei cung Paradis zungzal nunnak a si.—Luka 12:32; Johan 6:40, 47; 10:16.

16, 17. ‘Kan zumhnak a Tlintertu, Aiawhtu Ngan Bik’ in Jesuh a rian hngalh cu zeicah a biapit?.

¹⁶ Jesuh cu ‘kan zumhnak a Tlintertu, Aiawhtu Ngan Bik’ a si. (Hebru 12:1, 2, NW rel.) Hebru a ngan 11 ah zumhnak he aa tlaiin Paul nih ṭha tein a fiantermi kha kan hmuh, cu ah zumhnak a sullam tawi pakhat le Noah, Abraham, Sarah le Rahab ti bantuk zumhnak a ngeimi pa, le nu zohchunh awk kha a ṭial hna. A zapi i cinken in ‘kan zumhnak a Tlintertu, Aiawhtu Ngan Bik Jesuh kha fek tein i zohchih’ awkah Paul nih a Khrihfa hawi pawl kha a forh hna. Zeiruangah?

¹⁷ Hebru 11 ah ṭialmi zumhawktlak pa, le nu hna nih Pathian kamhmi kha fek tein an zumh ko nain, Pathian nih Messiah le Pennak in a biakam zeitin a tlinter lai kha a dikthliar in an hngal dih lo. Cuti phun in, an zumnak cu a tling lo. Jehovah nih Messiah kong chimchungbia tampi ṭial a fialmi hna hmanh nih an ṭialmi a biapitnak kha tling tein an hngalthiam lo. (1 Pit. 1:10-12) Jesuh thawng lawngin zumhnak cu a tling asiloah a tling kho. ‘Kan zumhnak a Tlintertu, Aiawhtu Ngan Bik’ in Jesuh rian fiang tein hngalhthiam le cohlan cu kan caah a biapi tuk.

Kawl Peng

18, 19. (a) Khrih ah aa thupmi thlaraulei thil man sung dang kha chim. (b)  Zeicah Thlaraulei rothil kha Jesuh ah kawl peng ding a si?

¹⁸ Minung khamhnak ca Pathian timhmi ah a sungmi Jesuh rian tlawmte kong lawng kan i ruah rih. Khrih ah aa thupmi thlaraulei rothil dangdang a um rih. Mah rothil hna hmuhnak in lawmhnak le ṭhathnemnak kan hmu lai. Tahchunhnak ah, lamkaltu Piter nih Jesuh kha “nunnak lam ah mi a hruaitu” le “deirel arfi” ceu tiah a auh. (Lam. 3:15; 5:31; 2 Pit. 1:19) Mahlengah Baibal nih Jesuh kha “Amen” tiah a hman. (Biat. 3:14) Mah rian hna a sullam le a biapitnak na hngal maw? Jesuh nih a chim bantukin ‘kawl peng u law nan hmuh lai.’—Matt. 7:7, NW.

¹⁹ Tuanbia chung vialte ah Jesuh bantuk in sullam a tlingmi nunnak le zungzal kan nunnak he aa pehtlaimi nunnak a ngeimi ahohmanh an um lo. Lungtak in a kawlmi paoh fawi tein hmuh khawhmi thlaraulei rothil a sinah a um. ‘A sinah aa thupmi’ rothil kawlnak in lawmhnak le thluachuah hmu hram ko.

Naa Cinken Maw?

• Khrihfa cu zei rothil kawl awkah dah forh kan si?

• Paul cawnpiaknak cu Kolose khuami hna le tuchan kannih caah zeicah aa tlak?

• Khrih ah “aa thupmi” thlaraulei rothil cheukhat kha chim law fianter.

[Cahmai 5nak i hmanthlak]

Rothil umnak hmun hmanthlak bantukin Baibal nih Khrih ah “aa thupmi” rothil vialte a kan hmuhsak