In cosa crèdenu i Testimoni di Ghjehova ?

I Testimoni di Ghjehova fanu di u so megliu per seguità u cristianismu insegnatu da Ghjesù è messu in pràtica da i so apòstuli. St’artìculu face u riassuntu di e nostre credenze fundamentale.

1. Diu. Aduremu u solu veru è onniputente Diu, u Creatore, chì u so nome hè Ghjehova (Salmu 83:19 ; Apocàlisi 4:11). Ghjè u Diu d’Abràhamu, di Mosè è di Ghjesù (Esòdiu 3:6 ; 32:11 ; Ghjuvanni 20:17).

2. A Bìbbia. Per noi a Bìbbia hè u messaghju inspiratu da Diu indirizzatu à l’umani (Ghjuvanni 17:17 ; 2 Timuteu 3:16). E nostre credenze s’appòghjanu nant’à l’inseme di i so 66 libri, ch’elli sìanu di l’« Anzianu Testamentu » o di u « Testamentu Novu ». Ssu fattu hè statu bè spiegatu da Jason BeDuhn, prufessore di stùdii religiosi, quand’ellu hà scrittu chì i Testimoni di Ghjehova appòghjanu « e so credenze è e so pràtiche [nant’à] a matèria prima di a Bìbbia, senza idee precuncette di ciò ch’elli ci avìanu da truvàa ».

   Ancu sè accettemu a Bìbbia sana, ùn simu micca fundamentalisti. Ricunnuscimu chì certe parte di a Bìbbia sò state scritte d’una manera figurata o simbòlica è chì ùn ci vole micca à piglialle à u sensu strettu di a parolla (Apocàlisi 1:1).

3. Ghjesù. Seguitemu l’insignamenti è l’esèmpiu di Ghjesù Cristu è l’unuremu da Salvatore è Figliolu di Diu (Matteu 20:28 ; Atti 5:31). Vole dì chè no simu cristiani (Atti 11:26). Eppuru, da u nostru stùdiu di a Bìbbia avemu amparatu chì Ghjesù Cristu ùn hè micca u Diu Onniputente è chì a duttrina di a Trinità ùn hà micca fundamentu bìblicu (Ghjuvanni 14:28).

4. U reame di Diu. Ghjè un guvernu celincu reale è micca a cundizione di core di i cristiani. Hà da rimpiazzà i guverni umani è compie u prughjettu di Diu pè a terra (Daniellu 2:44 ; Matteu 6:9, 10). Hà da falla da quì à pocu perchè e prufezìe bìbliche mòstranu chì campemu « l’ùltimi ghjorni » (2 Timuteu 3:1-5 ; Matteu 24:3-14).

   Ghjesù hè u Rè di u reame di Diu in celu. Hà cuminciatu u so regnu in 1914 (Apocàlisi 11:15).

5. U salvamentu. Pudemu esse liberati di u peccatu è di a morte per mezu di u sacrifìziu di Ghjesù, chì ghjova di riscattu (Matteu 20:28 ; Atti 4:12). Per chì ne vole prufittà, fà mostra di fede in Ghjesù ùn basta micca, li ci vole ancu à scambià a so manera di campà è fassi battizà (Matteu 28:19, 20 ; Ghjuvanni 3:16 ; Atti 3:19, 20). Ciò ch’omu face dà a prova chì a so fede hè viva (Ghjàcumu 2:24, 26). Ma u salvamentu ùn si pò guadagnà ; ùn hè chè gràzia à « l’immeritata buntà di Diu » ch’ellu si pò avè (Galatesi 2:16, 21).

6. I celi. Ghjehova Diu, Ghjesù Cristu è l’ànghjuli fidi càmpanu in i lochi spiritualib (Salmi 103:19-21 ; Atti 7:55). Solu una manata d’umani, 144 000, seranu risuscitati pè a vita celinca à u scopu di guvernà cù Ghjesù in u Reame (Daniellu 7:27 ; 2 Timuteu 2:12,13 ; Apocàlisi 5:9, 10 ; 14:1, 3).

7. 

   A terra. Diu hà creatu a terra perch’ella sìa a casa eterna di l’omi (Salmu 104:5 ; 115:16 ; Ecclesiasta 1:4). Diu hà da rigalà à l’umani ubbidienti una salute perfetta è a vita eterna nant’à una terra diventata un paradisu (Salmu 37:11, 34).

8. U male è e suffrenze. Tuttu què hà cuminciatu quand’un ànghjulu di Diu s’hè rivultatu (Ghjuvanni 8:44). St’ànghjulu, chì dopu à so ribellione hè statu chjamatu « Satanassu » è « Diàvule », hà cunvintu u primu còppiu umanu di raghjunghjelu. Ghjè statu un scumpientu pè i discendenti di ssu primu còppiu (Gènesi 3:1-6 ; Rumani 5:12). Per schjarì e dumande murale sullevate da Satanassu, Diu permette u male è e suffrenze, ma solu per un tempu.

9. A morte. A ghjente chì more cissa d’esiste (Salmu 146:4 ; Ecclesiasta 9:5, 10). Ùn soffre micca nentr’un infernu di focu.

   Diu hà da fà rivene miliardi d’umani à a vita per mezu di a resurrezzione (Atti 24:15). Eppuru, tutti quelli chì ricuseranu d’amparà e vie di Diu dopu à esse stati risuscitati seranu distrutti per sempre, senza speranza d’esse risuscitati torna (Apocàlisi 20:14, 15).

10. 

    A famìglia. Simu d’accunsentu cù a norma nant’à u matrimòniu data à l’inìziu da Diu : l’unione d’un solu omu cù una sola donna, è una sola ragiò accettata per divurzià, l’immuralità sessuale (Matteu 19:4-9). Simu cunvinti chì i princìpii bìblichi pieni di saviezza aiùtanu e famìglie à esse felice (Efesini 5:22–6:1).

11. U nostru cultu. Ùn aduremu nè a croce nè nisun’altra stàtula o màghjina pietosa (Deuterònumu 4:15-19 ; 1 Ghjuvanni 5:21). Eccu une poche di pràtiche impurtante di u nostru cultu :

    • Pregà à Diu (Filippesi 4:6).

    • Leghje è studià a Bìbbia (Salmu 1:1-3).

    • Medità nant’à ciò ch’amparemu ind’a Bìbbia (Salmu 77:13).

    • Aduniscesi per pregà, studià a Bìbbia, cantà, sprime a nostra fede è incuragì quelli chì anu a listessa fede chè noi è l’altri (Culussesi 3:16 ; Ebrei 10:23-25).

    • Predicà a « bona nova di u Reame » (Matteu 24:14).

    • Aiutà l’abbisugnati (Ghjàcumu 2:14-17).

    • Custruisce è trattene i nostri lochi di cultu (chjamati sale di u Reame) è altre stallazione aduprate pè a nostra òpera mundiale d’insegnamentu bìblicu (Salmu 127:1).

    • Andà à u succorsu di e vìttime di catastròfe (Atti 11:27-30).

    

12. A nostra organizazione. Simu urganizati in accultine di credenti, ognuna hè sopravista da un gruppu di ministri di u cultu. Sti ministri ùn sò micca un cleru è ùn sò micca pagati (Matteu 10:8 ; 23:8). Ùn dumandemu micca a dècima è ùn ci hè mai quèstula à i nostri uffìzii (2 Curintini 9:7). A nostra òpera hè sustenuta da doni anònimi.

    Da u nostru capilocu mundiale, a Cuncultina centrale, una manata di cristiani cù sperienza, dà una direzzione à tutti i Testimoni di Ghjehova di u mondu sanu (Matteu 24:45).

13. A nostra unità. Ind’u mondu sanu simu uniti perchè avemu e listesse credenze (1 Curintini 1:10). Femu di u nostru megliu per micca fà sferenze ètniche, razziale o suciale (Atti 10:34, 35 ; Ghjàcumu 2:4). Ma ss’unità ùn impedisce micca e scelte di ognunu. Ogni Testimone piglia e so decisione cù a so propria cuscenza addestrata da a Bìbbia (Rumani 14:1-4 ; Ebrei 5:14).

14. U nostru cumpurtamentu. Femu di u nostru megliu per mustrà un amore disinteressatu indè tuttu ciò chè no femu (Ghjuvanni 13:34, 35). Righjittemu tutt’e pràtiche chì dispiàcenu à Diu, cum’è fà usu di u sangue d’una gattiva manera cù e trasfusione di sangue (Atti 15:28, 29 ; Galatesi 5:19-21). Pacìfichi, ùn participemu micca à e guerre (Matteu 5:9 ; Esàia 2:4). Rispittemu l’autorità di u paese induve campemu è ubbidimu à e legge, fintantu ch’elle ùn vanu micca contru à quelle di Diu (Matteu 22:21 ; Atti 5:29).

15. E nostre relazione cù l’altri. Ghjesù hà dattu ssu cummandamentu : « Devi amà u to pròssimu cum’è tè stessu. » Hà dettu dinù chì i cristiani « ùn fàcenu micca parte di u mondu » (Matteu 22:39 ; Ghjuvanni 17:16). Pruvemu dunque di « f[à] u bè à tutti », in listessu tempu stemu in tuttu neùtri in pulìtica è ricusemu di fà manc’un ligame cù d’altre religione (Galatesi 6:10 ; 2 Curintini 6:14). Ma rispittemu e scelte di l’altri nant’à què (Rumani 14:12).

Sè vo avete d’altre dumande nant’à ciò chì crèdenu i Testimoni di Ghjehova, pudete avè di più infurmazione nant’à u nostru situ. Pudete dinù cuntattà unu di i nostri capilochi naziunali, andà à un uffìziu indè unu di i nostri lochi di cultu vicinu à voi o discutà cù un Testimone di u vostru circondu.