Mars

Nouvo lemonn pa ankor arive. Me reflesir lo serten keksoz ki deza la parey bann zetwal, bann pye dibwa, bann zannimo ek bann imen. Menm si i annan en letan ki sa bann keksoz pa ti egziste, nou tou nou konnen ki zot egziste. Zot la parski Zeova ki’n kree zot. (Zen. 1:1, 26, 27) Nou Bondye in osi promet ki i pou kree en nouvo lemonn. I pou akonpli sa promes. Dan nouvo lemonn, dimoun pou viv pour touzour e zot pou annan en lasante parfe. Nou kapab asire ki sa nouvo lemonn pou vin dan sa letan ki Bondye in deside. (Iza. 65:17; Rev. 21:3, 4) Me antretan, servi tou loportinite ki ou annan pour ranforsi ou lafwa. Toultan rekonesan pour sa ranson. Medit lo lefet ki Zeova i pwisan. Fer bann keksoz ki pou fer ou vin pli pros avek Zeova. Ler ou fer sa, ou pou parmi bann ki “akoz zot lafwa ek pasyans” pou vwar lakonplisman bann promes.—Ebr. 6:11, 12. w23.04 31 ¶18-19

Apre sa Zezi i get ver lesyel e i fer en lapriyer aotvwa. I anvi donn Zeova tou loner pour sa ki pe al arive. Apre sa, Zezi i kriye: “Lazar, sorti!” (Zan 11:43) Lazar i sorti dan sa kavern! Zezi ti’n fer sa ki serten dimoun ti krwar ki i enposib pour fer. Sa resi i fer nou annan plis konfyans dan sa promes konsernan rezireksyon. Ki mannyer sa? Mazin sa promes ki Zezi ti fer avek Mart. I ti dir: “Ou frer pou resisite.” (Zan 11:23) Zis parey son Papa, Zezi i anvi resisit bann dimoun ki’n mor e i annan sa pouvwar pour fer li. Ler Zezi ti plere, sa ti montre ki Zezi i vreman anvi resisit bann dimoun ki’n mor e retir sa sagrinasyon ki lanmor i anmennen. Ler Lazar ti sorti dan latonm, Zezi ti montre ki i annan sa pouvwar pour resisit bann dimoun ki’n mor. Osi, mazin sa ki Zezi ti dir Mart ki dan teks pour ozordi. Nou annan bon rezon pour krwar ki Zeova pou gard son promes pour resisit bann dimoun ki’n mor. w23.04 11-12 ¶15-16

Ler nou konpran lavolonte Zeova pli byen, i kapab ki nou bezwen sanz sa ki nou demann Zeova dan lapriyer. Nou bezwen rapel ki Zeova i annan en plan e ki i pou akonpli sa plan dan sa letan ki i’n deside. I dan plan Zeova pour tir tou problenm ki fer nou soufer ozordi. Sa bann problenm pou ganny tire pour touzour. Sa i enkli bann problenm parey dezas natirel, maladi ek lanmor. Zeova pou akonpli son plan atraver son Rwayonm. (Dan. 2:44; Rev. 21:3, 4) Me ziska ki sa letan i arive, Zeova pe les Satan diriz sa lemonn. (Zan 12:31; Rev. 12:9) Alor, si Zeova ti rezourd tou problenm ki imen i annan la konmela, i ti pou paret konmsi Satan pe byen diriz sa lemonn. Menm si nou bezwen esper Zeova akonpli serten son bann promes, sa pa vedir ki i pa ed nou. Zeova pou ed nou. w23.05 8 ¶4; 9-10 ¶7-8

Ki mannyer nou kapab ed lezot pour ganny bann byenfe avek Memoryal? Premyerman, envit zot pour vin Memoryal. Nou kapab zwenn zot dan predikasyon e nou osi kapab fer en lalis bann dimoun ki nou konnen pour nou envite. Sa i kapab enkli nou fanmir, nou koleg travay, kanmarad lekol ek lezot ankor. Menm si nou napa ase kopi lenvitasyon ki’n enprimen, nou kapab anvoy zot en link sa lenvitasyon. Nou kapab sirprann avek lakantite dimoun ki deside pour asiste Memoryal. (Ekle. 11:6) Gard antet ki sa bann dimoun ki nou envite pour asiste Memoryal i kapab demann bann kestyon konsernan Memoryal, sirtou si zot pa’n zanmen asiste enn nou bann renyon. I ti pou byen ki nou mazin davans bann kestyon ki zot pou kapab demande e prepar nou larepons. I kapab ki apre Memoryal, bann dimoun ki enterese pour konn Parol Bondye i annan lezot kestyon. Avan, pandan e apre Memoryal, nou anvi fer sa ki nou kapab pour ed bann ki annan “sa bon kondisyon leker” pour ganny bann byenfe avek Memoryal.—Akt 13:48. w24.01 12 ¶13, 15; 13 ¶16

Dan Labib, i annan wit resi ki koz lo bann dimoun ki ti ganny resisite lo later. Petet ou kapab etidye sa bann resi. Anmezir ki ou fer sa, rod bann leson ki ou kapab aprann. Reflesir lo ki mannyer sak sa bann leson i montre ki Bondye i anvi resisit bann dimoun ki’n mor e ki i annan sa pouvwar pour fer li. Me fer sir ki ou reflesir lo sa rezireksyon ki pli enportan setadir rezireksyon Zezi. Rapel ki plizyer santenn dimoun ti vwar Zezi apre ki i ti’n resisite. Sa i fer nou annan plis konfyans ki a lavenir bann dimoun ki’n mor pou ganny resisite. (1 Kor. 15:3-6, 20-22) Nou vreman rekonesan pour sa promes ki Zeova in fer konsernan rezireksyon. Nou kapab asire ki sa promes pou vin vre parski Zeova i anvi resisit bann dimoun ki’n mor e i annan sa pouvwar pour fer li. Annou determinen pour kontinyen annan plis konfyans dan sa promes. Ler nou fer sa, nou pou vin pli pros avek nou Bondye ki’n promet sakenn parmi nou ki bann dimoun ki nou kontan pou resisite.—Zan 11:23. w23.04 8 ¶2; 12 ¶17; 13 ¶20

Si nou konn nou limit, nou pa pou annan en tro gran lopinyon lo nou menm e nou konpran ki i annan serten keksoz ki nou pa kapab fer. Si nou annan limilite, nou annan respe pour lezot e nou konsider zot konman pli enportan ki nou. (Fili. 2:3) Normalman en dimoun ki konn son limit, i osi annan limilite. Gideonn ti en zonm ki ti annan limilite e i ti konn son limit. Ler en lanz Zeova ti dir Gideonn ki i’n ganny swazir pour sov Izrael dan lanmen bann Madyanit, sa zonm ki ti annan limilite, ti reponn: “Mon fanmir i sa fanmir ki mwen enportan dan tribi Manase e mwan, mon sa enn ki pli pa enportan dan lakaz mon papa.” (Ziz 6:15) I pa ti santi li alaoter pour pran sa responsabilite. Me Zeova ti konnen ki i kapab fer li. Avek led Zeova, Gideonn ti desarz son responsabilite byen. Bann ansyen i fer zot mye pour rekonnet ki zot annan limit e zot demontre limilite dan tou sa ki zot fer. (Akt 20:18, 19) Zot pa fer vantar konsernan sa ki zot kapab fer oubyen sa ki zot in fer e zot pa santi ki zot pa vo nanryen parski zot in deza fer fot. w23.06 3 ¶4-5

Latet Satan pou ganny kraze, sa pou arive dan plis ki 1,000 an dan lavenir. (Rev. 20:7-10) Me avan ki sa i arive, Labib in predir bann levennman ekstraordiner. Premyerman, bann nasyon pou dir konmkwa i annan “lape ek sekirite!” (1 Tesa. 5:2, 3) “En sel kou,” gran ladetres pou konmanse ler bann nasyon i atak fo larelizyon. (Rev. 17:16) Apre sa, Zezi pou ziz bann imen e i pou separ bann mouton avek bann kabri. (Mat. 25:31-33, 46) Pandan sa letan, Satan pou pe kontinyen lager kont Zeova. Sa laenn ki i annan pou fer li motiv en group nasyon ki’n ralye ansanm pour atak pep Bondye. Labib i apel sa group nasyon ki’n ralye ansanm, Gog sorti dan pei Magog. (Ezek. 38:2, 10, 11) A en serten moman, bann Kretyen swazir ki ankor lo later pou ganny anmennen dan lesyel pour zot zwenn ansanm avek Kris ek son larme pwisan, kot zot pou partisip dan lager Armagedon. Sa i dernyen parti sa gran ladetres. (Mat. 24:31; Rev. 16:14, 16) Apre sa, Kris pou diriz later pour mil an.—Rev. 20:6. w23.10 20-21 ¶9-10

Ozordi, en kantite serviter Zeova i reste dan bann landrwa kot sa travay predikasyon in ganny enterdi. Zot demontre respe anver bann gouvernman. Parey Obadya, zot donn Zeova en devosyon ki zis pour li tousel. (Mat. 22:21) Zot montre ki zot annan en gran respe pour Bondye par obei li plito ki zonm. (Akt 5:29) Zot fer sa par kontinyen anons sa bon nouvel e asiste renyon an sekre. (Mat. 10:16, 28) Zot esey fer sir ki zot bann frer ek ser i annan sa ki zot bezwen pour reste pros avek Zeova. Annou vwar legzanp Henri, ki reste dan en pei Lafrik kot nou travay ti ganny enterdi pour en pe letan. Pandan ki nou travay ti anba restriksyon, Henri ti pare pour anmenn bann piblikasyon ki baze lo Labib kot bann frer ek ser. I ekri: “Mon en dimoun ki timid. . . . Zeova ki’n donn mwan sa kouraz ki mon ti bezwen.” Eski ou ti pou annan kouraz parey Henri? Ou osi ou kapab annan kouraz si ou devlop en gran respe pour Bondye. w23.06 16 ¶9, 11

Ler Adan ek Ev ti rebel kont Bondye, i ti kapab paret ki Satan ti’n kas plan ki Bondye ti annan pour bann imen parfe e obeisan ranpli later. I kapab ki Satan ti krwar ki i ti napa bokou keksoz ki Zeova ti kapab fer. Petet Satan ti krwar ki Bondye ti pou touy Adan ek Ev e kree en lot koup parfe pour akonpli son plan pour bann imen. Me si Bondye ti’n fer sa, Dyab ti pou’n akiz li konmkwa i en manter. Akoz? Parski dan Zenez 1:28, Zeova ti’n dir Adan ek Ev ki zot desandans ki ti pou ranpli later. Oubyen petet Satan ti krwar ki Zeova ti pou les Adan ek Ev fer zanfan me ki sa bann zanfan pa ti pou zanmen vin parfe. (Ekle. 7:20; Rom. 3:23) Si sa bann zanfan pa ti pou zanmen kapab vin parfe, Dyab ti pou kapab dir ki Zeova pa’n reisi akonpli son plan, setadir pour ranpli later avek bann desandans Adan ek Ev, ki parfe e obeisan. w23.11 6 ¶15-16

Atraver son Parol ek son lorganizasyon, Zeova i donn nou bann lenstriksyon kler. Nou napa rezon pour azout lezot lenstriksyon avek sa ki I’n deza donn nou. (Prov. 3:5-7) Alor, nou pa al pli lwen ki sa ki’n ganny ekrir dan Labib oubyen fer bann lareg pour nou bann frer ek ser konsernan bann keksoz personnel. Satan i servi bann “fo rezonnman” ek “bann keksoz sa lemonn” pour anbet e diviz dimoun. (Kol. 2:8) Dan premye syek, sa ti enkli bann filozofi ki baze lo bann rezonnman imen, bann lansennyman Zwif ki pa baze lo Labib e sa lansennyman ki bann Kretyen i bezwen obei Lalwa Moiz. Sa ti bann fo rezonnman parski zot ti anpes dimoun konsantre lo Zeova ki Sours lasazes. Ozordi, Satan i servi medya ek rezo sosyal pour fann bann rimer ek bann nouvel ki pa vre ki sorti kot bann dirizan politik. w23.07 16 ¶11-12

Menm si Satan ansanm avek Adan ek Ev ti’n rebele kont Zeova, Zeova ti trouv sa pli bon solisyon pour akonpli son plan. I tre probab ki Satan pa ti ekspekte sa ki Zeova ti fer. Zeova ti montre ki i pa en manter e ki i koz laverite par les Adan ek Ev fer zanfan. Zeova ti montre ki si i dir i pou fer en keksoz, nanryen pa pou kapab anpes li fer sa ki i’n dir. I ti fer sir ki son plan i ganny akonplir par donn en “desandans” ki ti pou sov bann desandans Adan ek Ev ki obeisan. (Zen. 3:15; 22:18) Satan ti’n bezwen sirprann ler Zeova ti fer laranzman pour sa desandans donn son lavi konman en ranson. Akoz? Parski sa laranzman i baze lo lanmour, setadir en lanmour ki met lentere lezot avan. (Mat. 20:28; Zan 3:16) Satan pa koumsa. I egois. Alor, ki pou arive akoz sa laranzman? A lafen Renny Mil an Kris, bann desandans Adan ek Ev ki parfe e obeisan pou reste lo later ki pou’n vin en paradi zis parey Zeova ti anvi o konmansman. w23.11 6 ¶17

Nou obei bann standar Zeova konsernan lavi ek disan ki sakre. Akoz? Parski Zeova i dir ki disan i reprezant lavi ki en kado presye sorti kot li. (Lev. 17:14) Premye fwa ki Zeova ti permet imen pour manz zannimo, i ti donn zot lord pour pa manz disan. (Zen. 9:4) Ler i ti donn bann Izraelit Lalwa Moiz, i ti repet sa menm lord. (Lev. 17:10) Zeova ti ed konsey direkter dan premye syek pour konpran ki tou Kretyen pa devret servi disan. (Akt 15:28, 29) Nou obei sa lord ler nou pe deside ki tretman medikal ki nou pou aksepte. Nou osi obei sa lord dan Labib pour reste lwen avek imoralite seksyel. Zapot Pol ti donn nou sa konsey pour “met amor” bann move dezir, setadir pour fer tou sa ki nou kapab pour rezet okenn move dezir. Nou evite get oubyen fer okenn keksoz ki kapab fer nou komet imoralite seksyel.—Kol. 3:5; Zob 31:1. w23.07 15 ¶5-6

Eski Sanmson ti sitan kontan Dalila en kantite, ki i pa ti realize ki Dalila ti anvi fer? Dalila ti kontinyen demann Sanmson kote son lafors ti sorti e finalman Sanmson ti dir li. Malerezman sa ti en move desizyon ki ti fer li perdi son lafors e pour en serten letan, i ti perdi laprouvasyon Zeova. (Ziz 16:16-20) Sanmson ti’n met son konfyans dan Dalila olye Zeova e akoz sa, i ti eksperyans bann move konsekans. Bann Filisten ti tyonbo li e tir son lizye. Zot ti met li dan prizon Gaza. Zot ti fer li vin en lesklav e i ti kraz lagrenn dan moulen. Apre sa, zot ti imilye Sanmson ler zot ti anmenn li dan enn zot bann lafet. Zot ti ofer en gran sakrifis pour zot fo bondye Dagonn parski zot ti krwar ki Dagonn, ki ti’n ed zot atrap Sanmson. Zot ti al sers Sanmson dan prizon e anmenn li dan zot lafet pour zot “riy li.”—Ziz 16:21-25. w23.09 5-6 ¶13-14

Petet en koleg travay oubyen kanmarad lekol in kestyonn ou konsernan akoz nou obei bann standar Labib. Nou pou fer nou mye pour defann nou krwayans e an menm tan montre ki nou respekte lopinyon sa dimoun. (1 Pyer 3:15) Olye vwar sa kestyon konman en latak, reflesir lo lafason ki son kestyon i kapab ed ou konnen kwa ki enportan pour li. Nenport rezon akoz en dimoun i demann en kestyon, i ti pou byen ki nou reponn li dan en fason ki zantiy. I kapab ki nou larepons i fer li reflesir lo son pwennvi. Meton en koleg travay i demann ou akoz nou pa selebre lanniverser nesans. Avan ler ou reponn, reflesir lo sa: Eski i krwar ki Temwen Zeova pa anmize? Petet premyerman nou kapab felisit nou koleg travay parski i enterese avek byennet lezot. Sa i kapab donn ou sa loportinite pour annan en bon konversasyon kot ou kapab eksplik li dan en fason zantiy sa ki Labib i dir konsernan lanniverser nesans. w23.09 17 ¶10-11

Pa i vreman en gran privilez pour byen servi nou letan pour anons sa bon nouvel avek dimoun dan tou nasyon! Zapot Pyer i demann nou pour “toultan gard antet zour Zeova.” (2 Pyer 3:11, 12) Ki mannyer nou kapab fer sa? Nou pou bezwen medite, si posib toulezour, lo bann benediksyon ki nou pou gannyen dan sa nouvo lemonn. Esey imazin ou ler ou pou respir sa bon ler, manz bann bon manze, akeyir bann dimoun ki ou kontan ki pou ganny resisite e ler ou pou ansenny dimoun ki ti viv lontan lo ki mannyer bann profesi Labib in ganny akonplir. Ler ou medit lo la, sa pou ed ou pour kontinyen espere e pour asire ki lafen i pros pour arive. “Lefet ki [nou] konn sa davans,” nou “pa [pou] ganny antrennen” avek bann fo ansenyan. w23.09 27 ¶5-6

Bann zenn i antoure avek lezot zenn ki “dezobeisan anver zot paran.” (2 Tim. 3:1, 2) Akoz laplipar zenn i dezobei zot paran? Serten paran i fer lekontrer avek sa ki zot dir zot zanfan fer e zot zanfan i santi ki sa i enzis. Lezot zenn i santi ki bann konsey ki zot paran i donn zot nepli itil oubyen i tro strik. Si ou en zenn, eski parfwa ou santi koumsa? I kapab difisil pour obei sa lord ki Zeova i donn nou ki dan nou teks pour ozordi. Kwa ki kapab ed ou pour obei sa lord? Ou kapab aprann pour obei avek legzanp Zezi, ki ti sa pli bon legzanp. (1 Pyer 2:21-24) I ti en imen parfe ki ti annan bann paran enparfe. Me Zezi ti onor son paran menm ler zot ti fer fot e parfwa zot pa ti konpran li.—Egz. 20:12. w23.10 7 ¶4-5

Zapot Pol ti eksplike ki bann sakrifis ki ti ganny fer anba Lalwa Moiz pa ti kapab tir pese konpletman. I pour sa rezon ki Lalwa Moiz ti ganny “met dekote.” Apre sa, Pol ti ansenny zot serten sa bann laverite profon. I ti fer son bann frer ek ser rapel ki sakrifis Zezi ti fer li posib pour zot annan en “lespwar ki pli meyer” e ki sa i kapab fer zot “vin pli pros avek Bondye.” (Ebr. 7:19) Pol ti eksplik son bann frer ek ser akoz lafason ki zot ti pe ador Zeova konman en Kretyen, ti pli siperyer ki lafason ki zot ti pe ador Zeova dan lepase. Lafason ki bann Zwif ti ador Zeova ti zis “en lonbraz bann keksoz ki pou vini, me larealite i Kris.” (Kol. 2:17, not.) Lonbraz en keksoz i zis laform oubyen reprezantasyon sa keksoz me i pa sa keksoz. Pareyman, lafason ki bann Zwif ti ador Bondye ti zis en lonbraz oubyen en reprezantasyon bann keksoz ki ti pou vini. Alor pour nou kapab ador Zeova dan en fason akseptab, nou bezwen konpran sa laranzman ki i’n met an plas pour nou pese kapab ganny pardonnen. w23.10 25 ¶4-5

Danyel sapit 11 i koz konsernan de lerwa oubyen de gouvernman ki opoz kanmarad. Ler nou konpar sa profesi avek lezot profesi ki dan Labib, nou konpran ki “lerwa nor” i reprezant Larisi ek son bann alye e “lerwa sid” i reprezant Pouvwar Mondyal Angle ek Ameriken. Bann serviter Bondye ki reste dan bann landrwa kot “lerwa nor” i dirize, pe ganny persekite. Serten Temwen Zeova in ganny bate e ganny met dan prizon akoz zot krwayans. Me sa pa fer bann frer ek ser per. O kontrer sa ki “lerwa nor” i fer, i fer zot annan plis lafwa dan Zeova ek son Parol. Akoz sa? Parski bann frer ek ser i konnen ki sa persekisyon ki zot pe gannyen, pe akonpli bann profesi dan liv Danyel. (Dan. 11:41) Ler nou konpran ki bann persekisyon pe akonpli bann profesi, sa pou osi ed nou pour kontinyen gard nou lespwar antet e pour reste fidel avek Zeova. w23.08 11 ¶15-16

Zeova i kontan nou, alor i konpran nou santiman e i vreman anvi ed nou. I sagren ler nou soufer. Alor, nou kapab asire ki i pou reponn ler nou priye e dir: “Protez mwan parey ou kannet lizye.” (Ps. 17:8) Lizye i en parti lekor ki vreman sansib e ki presye. Alor, ler Zeova i konpar nou avek son kannet lizye, i konmsi i pe dir, ‘Nenport ki, ki fer mon pep ditor, i fer ditor en keksoz ki presye pour mwan.’ Zeova i anvi ki nou konvenki ki i kontan nou. Me i konnen ki bann keksoz ki nou’n pas ladan, i kapab fer nou annan dout konsernan si i kontan nou. Oubyen i kapab ki nou pe pas dan en sityasyon ki fer nou doute ki Zeova i kontan nou. Pour ed nou pli asire ki Zeova i kontan nou, annou vwar lafason ki Zeova i montre son lanmour anver Zezi, bann Kretyen swazir e anver nou tou. w24.01 27 ¶6-7

Ezra ti’n vwar lafason ki Zeova ti ed Son pep dan bann moman difisil. Detrwa lannen pli boner an 484 avan Kris, i tre probab ki Ezra ti Babilonn ler Lerwa Asweris ti donn lord pour touy tou bann Zwif dan Lanpir Pers. (Ester 3:7, 13-15) Lavi Ezra ek tou bann Zwif ti an danze. Ler zot ti tann sa lord, bann Zwif “dan tou bann provens” ti zennen e zot ti dan dey. San dout, zot ti priy Zeova pour ganny son led. (Ester 4:3) Imazin lafason ki Ezra ek bann Zwif ti santi ler bann dimoun ki ti’n fer plan pour touy zot, ti ganny touye. (Ester 9:1, 2) I kapab ki sa ki ti arive sa letan ti prepar Ezra pour fer fas avek bann problenm ki i ti pou rankontre dan lavenir e i ti donn li plis konfyans ki Zeova i kapab protez Son pep. w23.11 17 ¶12-13

Zapot Pol ti pe refer avek “lalwa” setadir Lalwa Moiz ki ti ganny donnen lo Montanny Sinai. (Rom. 3:21, 28) I paret ki dan letan Pol, serten Kretyen ki ti Zwif ti vwar li difisil pour aksepte ki zot nepli anba Lalwa Moiz e ki zot nepli bezwen fer bann keksoz ki Lalwa ti demann zot pour fer. Alor, Pol ti servi legzanp Abraam pour montre ki en dimoun pa ganny konsidere konman drwat zis akoz i swiv “lalwa.” O kontrer Pol ti eksplike ki sa dimoun i bezwen annan lafwa. Ler nou konn sa, sa i ankouraz nou parski i fer nou annan konfyans ki nou kapab fer plezir Bondye. I osi vedir ki si nou devlop lafwa dan Bondye e Kris, nou kapab ganny laprouvasyon Bondye. De lot kote, bann “aksyon” ki ganny mansyonnen dan Zak sapit 2, i pa bann keksoz ki Lalwa Moiz ti demann bann Zwif pour fer. Zak ti pe refer avek bann aksyon oubyen aktivite ki bann Kretyen i fer dan zot lavi toulezour. (Zak 2:24) Sa bann aksyon i montre si en Kretyen i vreman annan lafwa dan Bondye oubyen non. w23.12 3 ¶8; 4-5 ¶10-11

Bann ser ki deside pour marye i bezwen swazir byen sa frer ki i pou marye avek. Gard antet ki sa frer ki ou swazir, pou vin ou sef fanmir. (Rom. 7:2; Efe. 5:33) Alor demann ou lekor: ‘Eski i en Kretyen matir? Eski bann keksoz spirityel i sa keksoz pli enportan dan son lavi? Eski i pe fer bann desizyon saz? Eski i admet ler in fer en fot? Eski i annan respe pour bann madanm? Eski i pou kapab ed mwan pour kontinyen annan en bon lanmitye avek Zeova? Eski i pou kapab pran swen avek mwan materyelman e eski i pou en bon zanmi pour mwan?’ Byensir, si ou anvi trouv en bon msye, ou osi ou bezwen vin en bon madanm. En bon madanm i “en konpanny” pour son msye e i “ed” son msye. (Zen. 2:18) Vi ki sa madanm i kontan Zeova, i fer sa ki i kapab pour ed lezot vwar bann bon kalite ki son msye i annan. (Prov. 31:11, 12; 1 Tim. 3:11) Ou kapab prepare depi la konmela pour vin en bon madanm par ranforsi ou lanmour pour Zeova e vin en led pour lezot dan kongregasyon. w23.12 22-23 ¶18-19

Zeova i promet pour donn nou sa lasazes ki nou bezwen pour fer bann bon desizyon. Nou sirtou bezwen son lasazes ler nou pe fer bann desizyon ki pou sanz nou lavi. Zeova i osi donn nou lafors pour andire. Zeova pou donn nou sa lafors ki nou bezwen pour andire ler nou annan problenm, zis parey i ti fer pour zapot Pol. (Fili. 4:13) En fason ki Zeova i fer sa i par servi nou bann frer ek ser pour ed nou. Sa zour swar avan Zezi ti mor, i ti fer en lapriyer siplikasyon. I ti sipliy Zeova pour pa les li ganny kondannen konman en dimoun ki napa respe pour Bondye e pour non Bondye. Olye anpes Zezi ganny kondannen, Zeova ti ed Zezi par anvoy en lanz pour ankouraz li. (Lik 22:42, 43) Pareyman, Zeova i kapab ed nou par servi nou bann frer ek ser. Enn nou bann frer ouswa ser i kapab telefonn ouswa vizit nou pour ankouraz nou. Nou tou nou kapab rod loportinite pour dir en frer oubyen en ser “en bon parol.”—Prov. 12:25. w23.05 10-11 ¶9-11

Bann inaktif ki asiste Memoryal i kapab per ki zot pa ti pou ganny akeyir byen. Alor pa demann zot bann kestyon ki kapab anbaras zot oubyen dir en keksoz ki kapab bles zot santiman. Gard antet ki zot nou bann frer ek ser. Nou kontan pour ador Bondye ansanm avek zot ankor! (Ps. 119:176; Akt 20:35) Nou rekonesan ki Zezi ti dir nou rapel son lanmor sak lannen e nou konpran akoz sa i enportan. Ler nou asiste Memoryal, sa i anmenn bann byenfe pour nou e pour lezot dan plizyer fason. (Iza. 48:17, 18) Nou kontan Zeova ek Zezi plis. Nou montre ki kantite nou apresye sa ki zot in fer pour nou. Nou vin pli pros avek nou bann frer ek ser. Osi nou kapab ed lezot pour aprann ki mannyer zot osi zot kapab benefisye avek bann byenfe ki ranson i anmennen. Annou fer tou sa ki nou kapab pour met nou pare pour Memoryal ki pou ganny fer sa lannen, ki pou sa zour pli enportan dan lannen! w24.01 14 ¶18-19

Ki mannyer Zeova i gid nou? Premyerman atraver son Parol Labib. Me i osi servi bann imen pour gid nou. Par egzanp i servi “sa lesklav fidel e pridan” pour donn nou manze spirityel ki ed nou fer bann desizyon ki saz. (Mat. 24:45) Zeova i osi servi lezot zonm kalifye pour gid nou. Par egzanp bann sirveyan rezyonal ek bann ansyen dan kongregasyon i donn nou lankourazman ek bann lenstriksyon ki kapab ed nou fer fas avek bann moman difisil. Nou vreman rekonesan ki Zeova pe donn nou sa bon gidans dan sa bann dernyen zour. Sa gidans ki Zeova i donn nou i ed nou pour nou kontinyen ganny son laprouvasyon pour ki nou kapab viv ere depi la konmela e pour touzour. Parfwa i kapab difisil pour swiv gidans Zeova sirtou ler i ganny donnen par bann zonm enparfe. Dan bann moman koumsa nou bezwen annan konfyans ki Zeova i sa enn ki pe diriz son pep e ler nou swiv son gidans, sa pou toultan bon pour nou. w24.02 20 ¶2-3

Nou kapab devlop plis lanmour pour Bondye par etidye son Parol o profon. Anmezir ki ou lir Labib, esey vwar ki sak resi i montre lo Zeova. Demann ou lekor: ‘Ki mannyer sa resi i montre ki Zeova i kontan mwan? Ki mannyer sa resi i ed mwan pour kontan Zeova?’ En lot fason ki nou kapab devlop plis lanmour pour Zeova i par koz avek li dan lapriyer toulezour. (Ps. 25:4, 5) An retour, Zeova pou reponn nou lapriyer. (1 Zan 3:21, 22) Nou osi kapab devlop plis lanmour pour lezot. Detrwa lannen apre ki zapot Pol ti’n vin en Kretyen, i ti zwenn en zenn garson ki apel Timote. Timote ti kontan Zeova e i ti kontan lezot. Pol ti dir bann Filipyen: “Mon napa personn ankor ki annan en bon latitid parey Timote ki vreman enterese avek zot byennet.” (Fili. 2:20) Pol ti vwar ki Timote ti kontan son bann frer ek ser en kantite. San dout, bann kongregasyon ki Timote ti vizite ti vreman kontan ler i ti vin vizit zot.—1 Kor. 4:17. w23.07 9 ¶7-10

Moiz ti mor avan ki bann Izraelit ti antre dan Later Promiz. Eski Zeova ti aret ed son pep apre ki sa zonm fidel ti’n mor? Non. Tan ki zot ti reste fidel, Zeova ti pran swen avek zot. Avan ki Moiz ti mor, Zeova ti dir li apwent Zozye pour diriz pep Izrael. Alor, pour plizyer lannen Moiz ti donn Zozye formasyon. (Egz. 33:11; Det. 34:9) I ti osi annan en kantite zonm konpetan ki ti pe diriz pep Izrael. Zot ti bann sef mil dimoun, sef san dimoun, sef senkant dimoun e menm sef dis dimoun. (Det. 1:15) Sa bann zonm ti pran byen swen avek pep Bondye. Sa ki ti arive avek Eliya i en pe parey avek sa ki ti arive avek Moiz. Pour plizyer lannen, Eliya ti travay dir pour ed bann Izraelit pour ador Zeova. Me pli tar Zeova ti anvoy li pour al servi Zida. (2 Rwa. 2:1; 2 Kron. 21:12) Eski Zeova ti abandonn bann dimoun ki ti dan sa dis tribi Izrael? Non. Pour plizyer lannen, Eliya ti’n donn formasyon Elisa. Zeova ti kontinyen akonpli son plan e i ti pran swen avek son bann serviter fidel. w24.02 5 ¶12

Bann Kretyen dan lavil Efez ti pe viv dapre Parol Bondye ki ti parey en lalimyer ki pe gid zot. (Ps. 119:105) Sa bann Kretyen ti’n abandonn zot bann fo pratik relizye e zot ti nepli viv en lavi imoral. Zot ti pe ‘swiv legzanp Bondye’ e zot ti pe fer zot mye pour ador li e fer li plezir. (Efe. 5:1) Avan ki nou ti konn laverite, nou osi nou ti en pe parey bann Kretyen dan lavil Efez. Nou ti form parti fo larelizyon e fer bann keksoz imoral. Serten parmi nou ti selebre bann lafet fo larelizyon e i annan lezot ki ti viv en lavi imoral. Me apre ki nou’n aprann bann standar Zeova konsernan sa ki byen ek sa ki mal, nou’n fer bann sanzman. Nou ti konmans viv dan sa fason ki Zeova i anvi nou viv. Sa in fer nou ganny en kantite byenfe. (Iza. 48:17) Me i pa toultan fasil pour reste lwen avek sa fernwanr ki nou’n kit deryer e “kontinyen viv konman bann zanfan lalimyer.” w24.03 21 ¶6-7

Petet ou santi ki ou pa ankor pare pour dedye ou lavi avek Zeova e batize. Petet ou ankor bezwen fer bann sanzman pour ou kapab viv an armoni avek bann standar Zeova ouswa ou bezwen plis letan pour ranforsi ou lafwa. (Kol. 2:6, 7) Pa tou etidyan Labib ki fer progre parey. I annan ki fer progre pli vitman e i annan ki fer progre pli dousman e pa tou zenn ki pare pour dedye zot lavi avek Zeova e batize ler zot ariv en serten laz. Esey vwar kote ou bezwen amelyore e apre fer sa ki ou kapab dapre ou abilite me pa konpar ou avek en lot dimoun. (Gal. 6:4, 5) Menm si ou realize ki ou pa ankor pare pour dedye ou lavi avek Zeova, kontinyen gard sa konman en lobzektif. Demann Zeova pour ed ou fer bann sanzman ki ou bezwen fer. (Fili. 2:13) Ou kapab asire ki i pou ekout ou lapriyer e i pou ed ou.—1 Zan 5:14. w24.03 5 ¶9-10

Abraam ti tret Sara avek respe. I ti ekout Sara e i ti pran kont santiman Sara. En fwa, Sara ti ankoler e i ti koz avek Abraam lo son santiman. I ti menm blanm Abraam pour sa sityasyon. Abraam ti konnen ki Sara ti en madanm ki ti soumet e ki ti toultan siport li dan son bann desizyon. I ti ekout Sara e i ti esey rezourd sa problenm. (Zen. 16:5, 6) Ki nou kapab aprann? Bann msye marye, ou annan sa lotorite pour fer bann desizyon pour ou fanmir. (1 Kor. 11:3) Kantmenm sa, ou kapab demontre lanmour anver ou madanm par ekout li atantivman e pran kont son lopinyon avan ou pran en desizyon, sirtou si sa desizyon pou annan en lefe lo ou madanm. (1 Kor. 13:4, 5) En lot fwa, Abraam ti deside pour demontre lospitalite anver bann viziter ki ti’n arive san ekspekte. I ti demann Sara pour aret fer tou sa ki i ti pe fer e prepar en kantite dipen. (Zen. 18:6) Sara ti azir vitman e i ti fer sa ki Abraam ti’n demann li pour fer. Bann madanm marye, ou kapab swiv legzanp Sara par siport bann desizyon ki ou msye i fer. Ler ou fer sa, ou fer ou maryaz vin pli for.—1 Pyer 3:5, 6. w23.05 24-25 ¶16-17

Apre ki Gideonn ti’n ganny apwente konman ziz, i ti bezwen kontinyen obei Zeova e demontre kouraz. Zeova ti demann li pour detri lotel ki son papa ti servi pour ador Baal e sa ti en keksoz danzere pour fer. (Ziz 6:25, 26) Pli tar, ler Gideonn ti’n rasanble en larme, de fwa Zeova ti dir li ki i devret fer son larme pli pti. (Ziz 7:2-7) Apre, Zeova ti dir li atak kan lennmi dan milye lannwit. (Ziz 7:9-11) Bann ansyen i devret “pare pour obei.” En ansyen ki obeisan i pare pour aplik sa ki Labib i dir e pour soumet avek lorganizasyon Bondye. Sa i fer li vin en bon legzanp pour lezot. Me kantmenm sa, i kapab difisil pour li obei. Par egzanp, i kapab vwar li difisil pour li obei ler i annan en kantite lenstriksyon oubyen ler sa bann lenstriksyon i sanz vitman. Dan serten ka, i kapab mazinen si serten lenstriksyon i fer sans oubyen saz. Oubyen i kapab ki i ganny demande pour pran en responsabilite ki kapab fer li ganny met dan kaso. Ki mannyer bann ansyen i kapab swiv legzanp Gideonn e obei dan bann sityasyon koumsa? Ekout byen lenstriksyon e obei. w23.06 4-5 ¶9-11