Avril

Bann serviter Zeova dan letan Labib ti fer fas avek bann problenm ki zot pa ti pe ekspekte. Annou vwar legzanp Zakob. Son papa ti donn li lord pour marye avek enn bann fiy Labann, ki ti zot fanmir e ki ti ador Bondye. Papa Zakob ti asir Zakob ki Zeova ti pou beni li en kantite. (Zen. 28:1-4) Alor Zakob ti ekout son papa. Zakob ti kit son lakour Kanaan e i ti al kot Labann. Labann ti annan de fiy, enn ti apel Lea e lot ti apel Rasel. Zakob ti tonm anmoure avek Rasel, ki ti pli zenn ant sa de fiy. I ti pare pour travay pour Labann pour set an pour li kapab marye avek Rasel. (Zen. 29:18) Me keksoz pa ti mars parey Zakob ti krwar. Labann ti anbet li e fer li marye avek Lea. Labann ti dakor pour Zakob marye avek Rasel en semenn pli tar me Zakob ti pou bezwen travay pour Labann pour ankor set an. (Zen. 29:26, 27) Osi, Labann pa ti onnet ler i ti fer biznes avek Zakob. Pour 20 an, Labann ti tret Zakob dan en fason enzis.—Zen. 31:41, 42. w23.04 15 ¶5

Ki nou kapab fer ler nou bezwen rekonfor ek gidans? Nou konn larepons sa kestyon. Nou kapab koz avek Zeova dan lapriyer. Zeova i envit nou pour fer sa. Anfet, i anvi ki nou “toultan priye.” (1 Tesa. 5:17) Nou kapab koz avek Zeova dan lapriyer e demann li pour gid nou dan tou sa ki nou fer. (Prov. 3:5, 6) Zeova i zenere alor i dir ki nou kapab koz avek li dan lapriyer nenport kantite fwa ki nou anvi. Zezi ti konpran ki nou lapriyer i vreman enportan pour Zeova. Bokou letan avan Zezi ti vin lo later, i ti vwar lafason ki son Papa ti reponn lapriyer bann zonm ek madanm fidel. Par egzanp, Zezi ti avek son Papa ler son Papa ti reponn lapriyer Ana, David, Eliya ek lezot serviter fidel. (1 Sam. 1:10, 11, 20; 1 Rwa. 19:4-6; Ps. 32:5) I pour sa rezon ki Zezi ti ansenny son bann disip pour fer lapriyer souvan e pour annan konfyans ki Zeova pe ekout zot.—Mat. 7:7-11. w23.05 2 ¶1, 3

Granpret Zeoada ti annan en gran respe pour Zeova. Sa ti evidan ler Atalya, fiy Zezabel ti pran tronn pardfors e konmans dirize konman larenn Zida. I ti kriyel e i ti sitan anvi vin larenn, ki i ti menm esey touy tou son bann pti zanfan. (2 Kron. 22:10, 11) Zis Zeoas, enn sa bann zanfan ki ti sirviv parski Zeosabeat, madanm Zeoada ti sov li. Zeosabeat ek Zeoada ti kasyet sa garson e pran swen avek li. Dan sa fason, Zeoada ek Zeosabeat ti fer sir ki en dimoun dan fanmir David ti sirviv pour vin lerwa. Zeoada ti fidel avek Zeova e i pa ti les son lafreyer pour Atalya anpes li fer sa ki byen. Ler Zeoas ti annan set an, ankor enn fwa Zeoada ti montre ki i fidel avek Zeova. I ti fer en plan. Si son plan ti marse, Zeoas ti pou vin lerwa parski i ti en zeritye David. Me si son plan pa ti reisi, nou kapab asire ki Zeoada ti pou ganny touye. Sa plan ti marse avek led Zeova. w23.06 17 ¶12-13

Lerwa ti’n kapab krwar ki Danyel ti pe rebel kont li e i ti’n kapab fer touy Danyel. Me Danyel ti demontre kouraz e i ti eksplik lerwa sa rev. Petet kwa ki ti ed Danyel pour demontre kouraz tou dilon son lavi? Nou kapab asire ki manman ek papa Danyel ti bann bon legzanp pour Danyel ler i ti ankor zenn. (Det. 6:6-9) Danyel ti konn sa dis komannman me i ti osi konn bann keksoz pli o profon dan Lalwa. Par egzanp, i ti konn sa ki en Izraelit i kapab manze e sa ki i pa kapab manze. (Lev. 11:4-8; Dan. 1:8, 11-13) Danyel ti osi konn listwar pep Bondye e i ti konnen ki ti arive avek zot ler zot pa ti obei Zeova. (Dan. 9:10, 11) Sa ki Danyel ti pas atraver tou dilon son lavi ti fer li asire ki nenport kwa ki arive, Zeova ek Son bann lanz pwisan pou ed li.—Dan. 2:19-24; 10:12, 18, 19. w23.08 3 ¶5-6

Rebeka ti en madanm saz ki ti demontre kouraz. Tou dilon son lavi, i ti fer bann bon desizyon e i ti konnen kan e konman pour azir. (Zen. 24:58; 27:5-17) Me kantmenm sa, i ti en madanm ki ti demontre respe pour lezot e ki ti pare pour soumet. (Zen. 24:17, 18, 65) Si ou demontre limilite e pare pour soumet avek bann laranzman Zeova parey Rebeka, ou pou vin en bon legzanp pour ou fanmir ek ou kongregasyon. En Kretyen i bezwen modes pour li kapab vin en Kretyen matir. Ester ti en madanm ki modes e ki ti fidel avek Bondye. Sa ti fer ki i pa ti vin arogan ler i ti vin larenn. O kontrer i ti ekout konsey son kouzen Mordekay ki ti pli vye ki li. (Ester 2:10, 20, 22) Ou osi ou kapab vin en dimoun modes par rod konsey avek lezot e aplik li. (Tit 2:3-5) Ester ti montre ki i modes dan en lot fason. Menm si Ester “ti vreman zoli,” i pa ti rod latansyon lezot pour fer zot remark li.—Ester 2:7, 15. w23.12 19-20 ¶6-8

Zeova pa anvi ki nou toultan santi nou koupab. Si nou’n konfes nou pese, nou’n repantir e nou pe fer tou sa ki nou kapab pour pa repet menm fot, nou kapab asire ki Zeova in pardonn nou. (Akt 3:19) Apre ki nou’n fer sa bann keksoz, Zeova pa anvi ki nou kontinyen santi nou koupab. I konnen ki si nou kontinyen santi nou koupab, sa i kapab fer nou ditor. (Ps. 31:10) Si nou vin sitan tris, sa i kapab fer nou abandonn nou lakours pour ganny lavi eternel. (2 Kor. 2:7). Si nou kontinyen santi nou koupab, nou kapab konsantre lo lefet ki Bondye i “vreman pardonnen.” (Ps. 130:4) Ler Zeova i pardonn bann ki’n repantir senserman, i promet: “Mon pou nepli rapel zot pese.” (Zer. 31:34) Sa i vedir ki Zeova pa pou zanmen mazin ankor bann fot ki ou’n fer ki i’n pardonn ou. Pa dekouraze si ou’n perdi serten responsabilite dan kongregasyon akoz fot ki ou’n fer dan lepase. Zeova pa kontinyen mazin lo ou bann fot e ou osi ou devret fer parey. w23.08 30-31 ¶14-15

Pandan pandemi COVID-19, bann Temwen Zeova ki ti ekout lenstriksyon sorti kot lorganizasyon Zeova pa ti sitan enkyet parey bann dimoun ki ti ekout sa bann fo lenformasyon. (Mat. 24:45) Nou bezwen reste konsantre lo “sa ki pli enportan.” (Fili. 1:9, 10) Ler nou ganny distrer, nou gat en kantite letan ek lenerzi. Bann keksoz ki normal parey manze, bwar, detann ek travay, i kapab distrer nou si nou les zot vin sa ki pli enportan dan nou lavi. (Lik 21:34, 35) Osi, toulezour nou tann e lir konsernan bann protestasyon ek bann deba politik. Nou bezwen fer sir ki nou pa ganny distrer avek sa bann deba. Si nou pa fer sa, i kapab ki dan nou lespri e dan nou leker, nou konmans pran kote dan bann zafer sa lemonn. Satan i servi diferan metod pour fer li difisil pour nou kontinyen fer sa ki byen. w23.07 16-17 ¶12-13

Pour pep Zeova, Memoryal lanmor Kris i sa zour pli enportan dan lannen. I sa sel levennman ki Zezi ti donn son bann disip lord pour selebre. (Lik 22:19, 20) I fer nou rapel bann fason ki nou kapab montre ki nou rekonesan pour sakrifis Zezi. (2 Kor. 5:14, 15) I osi donn nou en loportinite pour “ankouraz kanmarad.” (Rom. 1:12) Osi en kantite dimoun in konmans etidye Labib parski zot in enpresyonnen avek sa ki zot in vwar e tande. Nou osi vreman kontan pour asiste Memoryal parski nou konnen ki sa zour nou ini avek nou bann frer ek ser partou dan lemonn. Tou sa bann keksoz i fer Memoryal vreman spesyal pour nou! w24.01 8 ¶1-3

Pli nou medit lo sa pri ki Zeova ek Zezi in peye, pli nou pou konpran ki kantite zot kontan sakenn parmi nou. (Gal. 2:20) Sa ranson ti ganny donnen konman en kado. Zeova in montre ki i kontan nou par sakrifye sa ki pli presye pour li e sa i Zezi. Zeova ti les son Garson soufer e mor pour nou. Parey nou’n vwar, Zeova pa kasyet son santiman avek nou. O kontrer i fer nou konnen ki kantite i kontan nou. (Zer. 31:3) Zeova in atir nou ver li parski i kontan nou. (Konpar Deterononm 7:7, 8.) I napa nanryen e i napa personn ki kapab anpes Zeova kontan nou. (Rom. 8:38, 39) Ki mannyer lanmour ki Zeova i annan pour ou i fer ou santi? w24.01 28 ¶10-11

Bann Kretyen swazir i apresye zot lespwar pour viv dan lesyel. En frer ki apel Frederick Franz ki en Kretyen swazir, i dir ki mannyer zot santi konsernan sa lespwar. I ti dir: “Nou asire ki sa ki nou pe espere pou vin vre. Nou tou ki form parti sa 144,000 pou ganny sa ki Bondye in promet nou. Nou rekonpans pou pli gran ki sa ki nou pe imazinen.” An 1991, Frer Franz ti dir: “[Nou] ankor apresye nou lespwar en kantite . . . Pli nou espere, pli nou vin pli rekonesan. I en keksoz ki vo lapenn espere. . . . Mon apresye sa lespwar ki nou annan plis ki zanmen oparavan.” Ki swa nou pou viv pour touzour dan lesyel oubyen lo later, nou annan en lespwar merveye ki donn nou rezon pour zwaye. Sa lespwar ki nou annan i kapab vin pli reel. w23.12 9 ¶6; 10 ¶8

An deor larantre tabernak, i ti annan en lotel an kwiv kot bann zannimo ti ganny ofer konman sakrifis pour Zeova. (Egz. 27:1, 2; 40:29) Me sa bann sakrifis pa ti kapab pardonn pese bann dimoun konpletman. (Ebr. 10:1-3) Bann sakrifis zannimo ki ti pe kontinyen ganny ofer kot tabernak, ti montre ki a lavenir, i ti pou annan en sakrifis ki ti pou fer li posib pour pese bann imen ganny pardonnen konpletman. Zezi ti konnen ki Zeova ti’n anvoy li lo later pour donn son lavi konman en ranson pour bann imen. (Mat. 20:28) Alor, ler Zezi ti batize, i ti prezant son lekor pour fer sa ki Zeova i anvi. (Zan 6:38; Gal. 1:4) Zezi ti ofer son lavi konman en sakrifis “enn fwa pour tou” pour pey oubyen kouver pese tou dimoun ki demontre lafwa dan Kris.—Ebr. 10:5-7, 10. w23.10 26-27 ¶10-11

Nou menm nou pa ti pou kapab fer nanryen pour sov nou prop lekor dan pese ek lanmor. (Ps. 49:7, 8) Alor Zeova ti fer laranzman pour Son garson donn son lavi pour sov nou menm si sa ti pou vreman difisil pour zot. Pli nou medit lo sa ki Zeova ek Zezi in sakrifye pour nou, pli nou pou apresye sa ranson. Ler Adan ti fer pese, i ti perdi sa loportinite pour li viv pour touzour e pour tou son bann zanfan osi viv pour touzour. Pour reaste sa ki Adan ti’n perdi, Zezi ti ofer son lavi parfe konman en sakrifis. Ler Zezi ti lo later, i “pa ti fer okenn pese, ni koz manti.” (1 Pyer 2:22) Ler Zezi ti mor, i ti parfe zis parey Adan ti ete avan i fer pese. Alor ler Zezi ti sakrifye son lavi, i ti kapab pey sa pri pour sa ki Adan ti’n perdi.—1 Kor. 15:45; 1 Tim. 2:6. w24.01 10 ¶5-6

Apre ki Zezi ti’n resisite, i ti antre dan Tre Sen dan tanp spirityel. Sa laranzman ki Zeova in fer konsernan ladorasyon pir baze lo sakrifis Zezi e lo Zezi konman Granpret, i bokou pli siperyer ki lafason ki bann Zwif ti ador Bondye. Granpret Izrael ti antre dan Tre Sen dan tabernak avek disan zannimo me Zezi ti antre “dan lesyel menm,” sa landrwa pli sen, pour li prezant li devan Zeova. Ler i ti ariv dan lesyel, i ti prezant valer son lavi parfe avek Zeova pour nou, “pour elimin pese atraver sakrifis son prop lekor.” (Ebr. 9:24-26) Ki swa nou annan lespwar pour viv pour touzour dan lesyel oubyen lo later, nou tou nou kapab ador Zeova dan son tanp spirityel. w23.10 28 ¶13-14

Reflesir lo sa ki Zezi pe fer pour nou dan lesyel konman nou Lerwa ek Granpret ki konpran nou. Atraver Zezi, nou kapab vin kot “tronn labonte ekstraordiner” Bondye dan lapriyer e demann li pour pran pitye pour nou e ed nou “ler nou bezwen” led. (Ebr. 4:14, 15) Toulezour, nou bezwen reflesir lo sa ki Zeova ek Zezi in fer pour nou e sa ki zot pe fer pour nou la konmela. Sa lanmour ki zot annan pour nou i devret tous nou leker e motiv nou pour devoue dan nou servis. (2 Kor. 5:14, 15) Enn bann pli bon fason ki nou montre ki nou rekonesan i ler nou fer zefor pour ed lezot pour vin Temwen Zeova e pour vin bann disip Zezi. (Mat. 28:19, 20) Sanmenm sa ki zapot Pol ti fer. I ti konnen ki i lavolonte Zeova ki “tou sort kalite dimoun i ganny sove e ganny konnesans egzakt lo laverite.”—1 Tim. 2:3, 4. w23.10 22-23 ¶13-14

En kantite parmi nou i servi sa bann verse ler nou pe koz avek dimoun konsernan ki mannyer lavi pou ete dan Paradi. Alor ki mannyer nou kapab ed lezot pour annan konfyans ki sa bann benediksyon ki dan Revelasyon 21:3, 4 pou vin vre? Osi, ki mannyer nou kapab annan plis konfyans dan Zeova e dan son bann promes? Zeova pa’n zis fer sa zoli promes me i’n osi donn nou bann rezon akoz nou kapab annan konfyans ki i pou gard sa promes. Dan bann verse ki swiv, nou trouv bann rezon akoz nou kapab annan konfyans dan promes Zeova konsernan Paradi. Dan sa bann verse, i dir: “Sa Enn ki ti pe asiz lo tronn ti dir: ‘Gete! Mon pe fer tou keksoz nef.’ I ti osi dir: ‘Ekri, parski sa bann parol i fidel e vre.’ I ti dir mwan: ‘Tou in akonpli! Mwan menm Alfa ek Omega, konmansman ek finisyon.’”—Rev. 21:5, 6a. w23.11 3 ¶3-5

En zenn frer i kapab montre ki in devlop abilite pour reflesi par fer bann bon desizyon konsernan son laparans. Laplipar dimoun ki fer e promot bann nouvo stil sanze, i bann dimoun ki napa respe pour Zeova e ki viv en lavi imoral. Sa i fer ki lenz bann msye i kole oubyen i fer en msye paret konman en madanm. Alor ler en zenn frer ki pe fer zefor pour vin en Kretyen matir pe swazir ki lenz i pou mete, i pou les li ganny gide par bann prensip ki dan Labib e i pou swiv bon legzanp bann frer ki dan kongregasyon. I kapab demann son lekor: ‘Eski bann swa ki mon fer i montre ki mon rezonnab e ki mon pran an konsiderasyon santiman lezot? Eski mon fason sanze i fer li fasil pour lezot idantifye mwan konman en serviter Bondye?’ (1 Kor. 10:31-33) Ler en zenn frer in devlop abilite pour reflesi, sa pou fer ki bann frer ek ser e son Papa ki dan lesyel pou apresye li. w23.12 26 ¶7

Dan lepase “lerwa sid” ti persekit pep Zeova. (Dan. 11:40) Par egzanp, sa ti arive pandan Premye Lager Mondyal ek Dezyenm Lager Mondyal, ler bann frer ti ganny met dan prizon parski zot ti refize al lager e serten zanfan ti ganny pouse dan lekol parski zot pa ti salye paviyon. Me dan bann lannen ki’n pase, pep Zeova ki reste dan bann landrwa ki ganny dirize par “lerwa sid” in fer fas avek lezot problenm ki’n teste zot fidelite. Par egzanp, pandan bann kanpanny eleksyon, en Kretyen i kapab ganny tante pour siport en parti politik ouswa en kandida. Menm si i pa vote, i kapab santi ki en parti politik i pli meyer ki en lot. Alor, i enportan ki nou pa pran kote, pa zis par nou aksyon me osi dan nou lespri ek leker.—Zan 15:18, 19. w23.08 12 ¶17

Anmezir ki nou tay dan sa lakours pour ganny lavi eternel, nou bezwen “tay dan en fason ki [nou] pou ranport sa pri.” (1 Kor. 9:24) Zezi ti dir ki nou kapab “vin lour akoz manze e bwar tro bokou [e] akoz traka.” (Lik 21:34) Bann verse koumsa ek lezot ankor, i kapab ed ou pour vwar kote ki ou bezwen fer sanzman anmezir ki ou tay dan sa lakours pour ganny lavi eternel. Nou kapab asire ki nou pou kapab fini sa lakours pour ganny lavi eternel parski Zeova pou donn nou sa lafors ki nou bezwen. (Iza. 40:29-31) Alor pa ralanti. Swiv legzanp zapot Pol ki ti fer bokou zefor pour fini sa lakours e ranport sa pri. (Fili. 3:13, 14) Personn pa kapab tay dan sa lakours pour ou. Me avek led Zeova, ou kapab reisi. Zeova i kapab ed ou pour desarz ou bann responsabilite e debaras ou avek bann fardo ki pa neseser. Avek led Zeova, ou pou kapab tay dan sa lakours avek landirans e ranport sa pri. w23.08 31 ¶16-17

Ler Zezi ti annan 12 an, i ti al avek son paran Zerizalenm. Me ler zot ti pe retourn kot lakour, zot pa ti remarke ki Zezi pa ti avek zot. (Lik 2:46-52) I ti responsabilite Zozef ek Mari pour fer sir ki tou zot zanfan ti avek zot apre lafet. Ler zot ti finalman trouv Zezi, zot ti blanm li akoz i ti’n reste Zerizalenm. Zezi ti’n kapab dir zot ki sa ti enzis. O kontrer i ti reponn son paran dan en fason senp e avek respe. Me Zozef ek Mari “pa ti konpran ki i ti pe dir zot.” Kantmenm sa, Zezi ti “kontinyen soumet avek zot.” Zenn, eski parfwa ou vwar li difisil pour obei ou paran ler zot fer fot oubyen ler zot pa konpran ou? Kwa ki kapab ed ou? Reflesir lo lafason ki Zeova i santi. Labib i dir ki ler ou obei ou paran, “sa i fer plezir Senyer.” (Kol. 3:20) Zeova i konnen ki parfwa ou paran pa konpran ou oubyen ki parfwa zot fer bann lareg ki paret enzis. Me kantmenm sa, ler ou swazir pour obei zot, ou fer Zeova kontan. w23.10 7 ¶5-6

En kanmarad lekol i kapab dir ki Temwen Zeova i devret sanz zot pwennvi lo omoseksyalite. I kapab ki nou pou bezwen asir li ki nou rekonnet ki sak dimoun i annan drwa pour fer son prop desizyon. (1 Pyer 2:17) Petet apre sa nou pou kapab koz avek li lo sa ki Labib i dir e lo ki mannyer ler nou aplik sa ki Labib i dir, nou pou pli ere. Ler nou zwenn en dimoun ki vreman pa dakor avek nou krwayans, nou pa devret deswit krwar ki nou konnen ki i krwar ladan. Par egzanp, ki ou pou fer si ou kanmarad lekol i dir ki i bet pour krwar dan Bondye? Eski ou devret krwar ki i krwar dan evolisyon e ki i konn en kantite lo sa size? Anfet i kapab ki i pe zis repet bann keksoz ki i’n tande. Petet ou kapab montre li bann lartik konsernan kreasyon ki lo jw.org. Petet pli tar i pou anvi koz lo en lartik oubyen video ki i’n vwar lo jw.org. Ler nou demontre respe dan sa fason, sa i kapab motiv li pour anvi aprann plis konsernan sa ki Labib i dir. w23.09 17 ¶12-13

Menm si nou fer fot, nou kapab asire ki Zeova pou servi nou e beni nou tan ki nou fer tou sa ki nou kapab pour aret fer sa move keksoz e kontinyen depan lo Zeova. Sanmson ti enparfe me i pa ti aret servi Zeova menm apre sa ki ti’n arive avek Dalila. Zeova pa ti abandonn li. Me Bondye ti servi li ankor dan en fason ekstraordiner. Zeova ti ankor konsider Sanmson konman en zonm ki ti annan en gran lafwa. I pour sa rezon ki i ti fer ekri non Sanmson dan lalis bann serviter fidel ki trouve dan Ebre sapit 11. Nou vreman kontan pour konnen ki nou pe servi en Papa ki kontan nou, ki anvi donn nou lafors sirtou ler nou annan problenm e nou bezwen son led. Alor parey Sanmson, annou sipliy Zeova: “Mazin mwan. O Bondye, silvouple, donn mwan lafors.”—Ziz 16:28. w23.09 7 ¶18-19

Ler nou kontinyen esper zour Zeova, nou ganny pouse pour anons sa bon nouvel avek lezot. Toudmenm, parfwa nou kapab ezite pour koz lo nou lafwa. Akoz? Par ler nou kapab per sa ki lezot i panse. Sanmenm ki ti arive avek Pyer. Sa zour swar ki Zezi ti pe ganny zize, Pyer ti per pour dir ki i ti enn parmi bann disip Zezi e plizyer fwa i ti dir ki i pa konn li. (Mat. 26:69-75) Toudmenm, Pyer li menm ti kapab dir avek lardyes: “Pa bezwen enkyet ni per sa ki fer lezot dimoun per.” (1 Pyer 3:14) Sa ki Pyer ti dir i montre ki nou kapab aret per sa ki lezot i panse. Kwa ki kapab ed nou pour pa per sa ki lezot i panse? Pyer i dir: “Dan zot leker, aksepte Kris konman Senyer e konman sa enn ki sen.” (1 Pyer 3:15) Nou kapab toultan rapel ki Zezi i nou Lerwa e ki i annan bokou pouvwar. w23.09 27-28 ¶6-8

Nou bezwen kontinyen fer atansyon pour pa fer bann keksoz “ki annan pour fer avek fernwanr.” (Efe. 5:11) Bann leksperyans in montre ki ler en dimoun i get, ekout oubyen koz lo bann keksoz enpir ouswa imoral, sa i fer li pli fasil pour li fer bann keksoz mal. (Zen. 3:6; Zak 1:14, 15) Lemonn Satan i esey anbet nou pour fer nou krwar ki bann keksoz ki Zeova i dir i imoral e enpir, i pa mal. (2 Pyer 2:19) Dyab in toultan esey konfiz dimoun pour ki zot pa kapab fer diferans ant sa ki byen ek sa ki mal. (Iza. 5:20; 2 Kor. 4:4) Nou pa sirprann ki en kantite film, progranm televizyon ek bann sit Enternet, i promot bann nide ki al kont bann standar Zeova. Satan pe esey fer nou krwar ki i pa mal pour nou viv en lavi imoral e fer bann move keksoz. I anvi fer nou krwar ki sa bann keksoz i gou e ki i napa move konsekans.—Efe. 5:6. w24.03 22 ¶8-10

Sa landrwa kot bann Izraelit ti zwenn pour ador Bondye e pour ofer bann sakrifis ti ganny apele tabernak. (Egz. 29:43-46) Bann Izraelit ti anmenn sa latant avek zot partou kot zot ti ale pandan ki zot ti dan dezer. Zot ti servi sa latant pour apepre 500 an ziska ki zot ti kapab konstri en tanp Zerizalenm. (Egz. 25:8, 9; Nom. 9:22) Me tabernak i osi reprezant en keksoz pli meyer. Sa tabernak ti “en reprezantasyon bann keksoz ki dan lesyel” e i ti reprezant gran tanp spirityel Zeova. Zapot Pol ti dir ki “sa latant [oubyen tabernak] i en senbol bann keksoz ki pe arive dan nou letan.” (Ebr. 9:9) Alor, ler Pol ti ekri sa let pour bann Kretyen Ebre, sa tanp spirityel ti’n fini egziste. I ti konmans egziste lannen 29, ler Zezi ti batize e konmans servi konman Granpret dan tanp spirityel Zeova.—Ebr. 4:14; Akt 10:37, 38. w23.10 25-26 ¶6-7

Bann Kretyen i bezwen fleksib pour zot kapab kontinyen servi Zeova avek lazwa ler keksoz i vin difisil. Ki mannyer sa? Nou bezwen rezonnab. Nou fer sa par adapte ler nou sirkonstans i sanze e par respekte pwennvi ek desizyon lezot. Konman bann serviter Zeova, nou anvi vin bann dimoun rezonnab. Nou osi anvi vin bann dimoun ki annan limilite ek konpasyon. Labib i dir ki Zeova i en “Ros” parski i ferm e solid. (Det. 32:4) Me Zeova i osi rezonnab. Anmezir keksoz i sanze dan lemonn, Zeova i kontinyen adapte pour fer sir ki son plan i ganny akonplir. Zeova in kree bann imen dan son resanblans avek sa abilite pour adapte ler zot sirkonstans i sanze. Dan Labib, Zeova in donn nou bann prensip ki ed nou fer bann desizyon saz malgre nenport problenm nou fer fas avek. Atraver son legzanp e atraver bann prensip ki in donn nou, Zeova i montre nou ki menm si i en “Ros,” i rezonnab. w23.07 20 ¶1-3

Dan Labib, Zeova i dir ki i parey en manman ki kontan son zanfan. (Iza. 66:12, 13) Imazin en manman ki kontan son zanfan e ki fer sir ki son zanfan i annan sa ki i bezwen. Pareyman, ler nou pe soufer, nou kapab asire ki Zeova i kontan nou. I pa aret kontan nou ler nou fer en keksoz mal. (Ps. 103:8) Nasyon Izrael ti dezapwent Zeova plizyer fwa. Me ler zot ti repantir, Zeova ti asir zot ki i ankor kontan zot. I ti dir zot: “Ou presye pour mwan, ou’n ganny onore, mon kontan ou.” (Iza. 43:4, 5) Zeova i annan sa menm kalite lanmour pour nou ozordi. Menm si nou’n fer bann fot grav, ler nou repantir e retourn kot Zeova, nou pou vwar ki i ankor kontan nou. I promet ki i pou “pardonn [nou] avek zenerozite.” (Iza. 55:7) Labib i dir ki ler Zeova i pardonn en dimoun, “Zeova li menm i . . . donn zot soulazman.”—Akt 3:19. w24.01 27 ¶4-5

Ler nou pe fer fas avek en sityasyon difisil, Zeova i kapab ed nou. Par egzanp, nou kapab vwar lafason ki Zeova i ed nou ler nou demann nou anplwayer konze pour nou asiste lasanble oubyen ler nou demande pour aziste nou progranm travay pour nou kapab asiste tou nou renyon. Keksoz i kapab mars pli byen ki nou ti pe ekspekte e sa pou fer nou annan plis konfyans dan Zeova. Ezra ti priy Zeova pour demann li led. Sak fwa ki Ezra ti enkyet konsernan son bann responsabilite, i ti demontre limilite e i ti koz avek Zeova dan lapriyer. (Ezra 8:21-23; 9:3-5) Vi ki Ezra ti depan lo Zeova, sa ti motiv lezot pour siport li e pour swiv son legzanp. (Ezra 10:1-4) Ler nou enkyet konsernan nou bann bezwen materyel oubyen konsernan sekirite nou fanmir, nou bezwen annan konfyans e koz avek Zeova dan lapriyer. w23.11 18 ¶15-17

Zeova pa dir ki nou bezwen fer bann menm keksoz ki Abraam ti fer pour li konsider nou konman drwat. Anfet i annan diferan fason ki nou kapab demontre nou lafwa par nou aksyon. Nou kapab akeyir bann ki nouvo dan kongregasyon, ed bann frer ek ser ki bezwen led e fer bann bon keksoz pour nou fanmir. Tou sa bann keksoz i fer Bondye plezir e Bondye pou beni nou. (Rom. 15:7; 1 Tim. 5:4, 8; 1 Zan 3:18) Enn bann fason pli enportan ki nou kapab montre ki nou annan lafwa i par anons sa bon nouvel avek devouman. (1 Tim. 4:16) Nou tou nou kapab montre par nou aksyon ki nou annan lafwa ki bann promes Zeova pou vin vre e ki fason fer Zeova i pli meyer. Si nou fer sa, nou asire ki Bondye pou konsider nou konman drwat e nou pou vin son zanmi. w23.12 2 ¶3; 6 ¶15

Ler Lerwa David ti pros pour mor, i ti dir Salomon sa bann parol. (1 Rwa. 2:1, 3) Sa konsey i enportan pour tou bann frer dan kongregasyon. Pour zot reisi, zot bezwen aprann pour obei bann lalwa Bondye e aplik bann prensip Labib dan tou sa ki zot fer. (Lik 2:52) Akoz i vreman enportan pour bann zenn frer vin bann Kretyen matir? En frer i annan en kantite responsabilite enportan dan son fanmir e dan kongregasyon. Zenn frer, san dout ou’n mazin lo bann responsabilite ki ou kapab annan dan lavenir. Petet ou annan sa lobzektif pour vin en serviter a plen tan, en serviter kongregasyon e pli tar en ansyen dan kongregasyon. I kapab ki ou osi anvi marye e annan zanfan. (Efe. 6:4; 1 Tim. 3:1) Pour ou kapab atenn sa bann lobzektif e reisi, ou bezwen vin en Kretyen matir. w23.12 24 ¶1-2

Bann ansyen dan kongregasyon in ganny konfye sa responsabilite pour pran swen avek bann mouton presye Zeova. Zot rekonesan ki Zeova in donn zot sa privilez pour servi zot bann frer ek ser e zot travay dir pour vin ‘bann berze ki vreman pran swen’ avek troupo Bondye. (Zer. 23:4; 1 Pyer 5:2) Nou rekonesan pour annan bann zonm koumsa dan nou kongregasyon! Bann ansyen i kapab aprann avek legzanp Ziz Gideonn. (Ebr. 6:12) I ti protez e gid pep Bondye. (Ziz 2:16; 1 Kron. 17:6) Parey Gideonn, bann ansyen in ganny apwente pour pran swen avek pep Bondye pandan en letan vreman difisil. (Akt 20:28; 2 Tim. 3:1) Nou kapab aprann avek legzanp Gideonn. Gideonn ti konn son limit, i ti annan limilite e i ti obei Zeova. I ti bezwen andire ler i ti pe desarz son responsabilite. Ki swa nou en ansyen oubyen non, nou kapab demontre plis lapresyasyon pour nou bann ansyen. Nou kapab ed sa bann frer ki pe travay dir pour pran swen avek nou dan kongregasyon.—Ebr. 13:17. w23.06 2 ¶1; 3 ¶3