Me

Bann Kretyen dan premye syek ti ganny afekte ler i ti annan en gran lafamin “lo later antye.” San dout, bann sef fanmir ti enkyet konsernan ki mannyer zot pou ganny manze pour zot fanmir. Ki mannyer bann zenn ki ti pe plàn pour fer plis dan predikasyon ti ganny afekte? Petet zot ti mazinen si zot devret espere ziska ki lafamin i fini. Nenport sirkonstans ki sa bann Kretyen dan premye syek ti annan, zot ti adapte avek zot sirkonstans. Zot ti kontinyen anons sa bon nouvel dan nenport ki fason ki zot ti kapab e zot ti kontan pour partaz sa ki zot ti annan avek bann frer ek ser ki ti reste Zide. (Akt 11:29, 30) Bann frer ek ser ki ti ganny led atraver sa travay led sekour ti vwar ki Zeova ti pe ed zot. (Mat. 6:31-33) I tre probab ki sa ti fer zot santi zot pli pros avek bann frer ek ser ki ti’n ed zot. Osi, bann ki ti fer donasyon oubyen ki ti siport sa travay led sekour dan lezot fason, ti ganny lazwa parski zot ti pare pour donnen.—Akt 20:35. w23.04 16 ¶12-13

Parfwa Zeova i reponn lapriyer son pep par motiv bann dimoun ki pa servi li pour ed zot. Par egzanp, i ti motiv Lerwa Artazerzes pour les Neemya retourn Zerizalenm pour li kapab ede pour rekonstri lavil Zerizalenm. (Nee. 2:3-6) Pareyman, ozordi Zeova i kapab motiv bann ki pa ador li pour ed nou ler nou bezwen led. Zeova pa toultan reponn nou lapriyer dan bann fason ekstraordiner. Me larepons ki nou gannyen i sa ki nou bezwen pour reste fidel avek nou Papa ki dan lesyel. Alor port latansyon pour ou kapab vwar ki mannyer Zeova i reponn ou lapriyer. Tanzantan pran letan pour reflesir lo ki mannyer Zeova pe reponn ou lapriyer. (Ps. 66:19, 20) Nou montre ki nou annan lafwa dan Zeova pa zis par koz avek li dan lapriyer me osi par aksepte nenport larepons ki i donn nou.—Ebr. 11:6. w23.05 11 ¶13; 12 ¶15-16

Ler nou ti dedye nou lavi avek Zeova, nou ti promet pour ador li e pour fer son lavolonte. Nou bezwen gard sa promes. Pour nou fer sa, i pa en fardo. Apre tou, Zeova in kree nou pour fer son lavolonte. (Rev. 4:11) Zeova in kree nou avek sa dezir pour aprann konn li e pour ador li. I’n osi kree nou dan son resanblans. Sa i fer ki nou kapab vin pros avek li e pran plezir pour fer son lavolonte. Osi, ler nou fer lavolonte Bondye e nou swiv legzanp son Garson, nou “reganny lafors.” (Mat. 11:28-30) Alor, kontinyen devlop plis lanmour pour Zeova par reflesir lo bann bon keksoz ki i’n fer pour ou e lo sa ki i pou fer pour ou a lavenir. Pli ou kontan Bondye, pli i pou fasil pour ou obei li. (1 Zan 5:3) Zezi ti fer lavolonte Bondye parski i ti demann Zeova son led e i ti konsantre lo sa rekonpans ki i ti pou gannyen. (Ebr. 5:7; 12:2) Parey Zezi, demann Zeova pour donn ou lafors e gard antet sa lespwar ki ou annan pour viv pour touzour. w23.08 27-28 ¶4-5

Nou tou nou apresye bann dimoun ki demontre pasyans. Akoz sa? Parski nou annan respe pour bann dimoun ki kapab espere pour en keksoz san ki zot fristre. Nou apresye ki lezot i demontre pasyans anver nou ler nou fer fot. Nou osi rekonesan ki sa dimoun ki ti etidye Labib avek nou, ti demontre pasyans ler nou ti pe fer zefor pour aprann, aksepte oubyen aplik en lansennyman dan Labib. Pli enportan ankor, nou rekonesan ki Zeova i demontre pasyans anver nou. Menm si nou apresye ler lezot i demontre pasyans, i pa toultan fasil pour nou demontre pasyans. Par egzanp, i kapab ki nou vwar li difisil pour reste kalm ler nou’n pri dan trafik, sirtou si nou an retar. I kapab ki nou perdi pasyans ler lezot i fer nou ankoler. Osi, parfwa nou kapab vwar li difisil pour espere pour Zeova akonpli son bann promes konsernan nouvo lemonn. Me dan tou sa bann ka nou bezwen demontre plis pasyans. w23.08 20 ¶1-2

Zeova ti’n dir Gideonn pour fer laplipar son bann solda retourn kot zot. I kapab ki Gideonn ti mazinen: ‘Eski i neseser pour fer sa sanzman? Eski sa ti pou marse?’ Kantmenm sa, Gideonn ti obei. Ozordi, bann ansyen i swiv legzanp Gideonn par obei ler lorganizasyon Zeova i donn lenstriksyon konsernan bann sanzman ki zot devret fer. (Ebre 13:17) Gideonn ti obei Zeova menm ler i ti per e son lavi ti an danze. (Ziz 9:17) Apre ki Zeova ti’n reasir Gideonn, Gideonn ti konvenki ki Zeova ti pou ed li protez Son pep. Bann ansyen ki reste dan bann landrwa kot sa travay predikasyon i ganny enterdi, i swiv legzanp Gideonn. Sa bann ansyen i demontre kouraz e zot organiz bann renyon ek predikasyon menm si zot kapab ganny met dan kaso, ganny kestyonnen, perdi zot travay oubyen ganny atake. Pandan gran ladetres, bann ansyen pou bezwen kouraz pour obei nenport lenstriksyon ki zot gannyen menm si sa pou met zot lavi an danze. w23.06 5-6 ¶12-13

Zeova in fer sir ki sa ki Granpret Zeoada in fer, in ganny mete dan Labib pour ki nou kapab aprann avek legzanp Zeoada. (Rom. 15:4) Ler Zeoada ti mor, i ti ganny sa loner pour ganny antere “dan Lavil David ansanm avek bann lerwa akoz i ti’n fer bann bon keksoz pour pep Izrael, pour sa vre Bondye e pour Son lakaz.” (Kron. 24:15, 16) Sa resi konsernan Zeoada i kapab ed nou pour annan en gran respe pour Zeova. Bann ansyen i kapab swiv legzanp Zeoada par toultan rod fason pour protez kongregasyon. (Akt 20:28) Bann frer ek ser aze i kapab aprann avek legzanp Zeoada. Zot kapab aprann ki ler zot annan en gran respe pour Zeova e zot reste fidel avek li, i kapab servi zot pour akonpli son plan. Bann zenn i kapab aprann avek lafason ki Zeova ti tret Zeoada. Zot kapab swiv legzanp Zeova par onor bann frer ek ser aze sirtou bann ki’n servi Zeova pour en kantite lannen. (Prov. 16:31) Annou siport “bann ki pe diriz” nou par obei zot.—Ebr. 13:17. w23.06 17 ¶14-15

Servi bon zizman ler ou pe deside ki kantite fwa ou pou lev ou lanmen pour reponn pandan renyon. Si nou lev lanmen tro souvan, sa i kapab met sa frer ki pe kondwir letid anba presyon e fer li santi ki i bezwen donn ou pour reponn, menm si lezot ki’n lev lanmen pa ankor ganny loportinite pour reponn. Sa i kapab dekouraz lezot e fer zot pa anvi lev lanmen. (Ekle. 3:7) Ler en kantite proklanmater i lev lanmen pour reponn pandan renyon, petet nou pa pou ganny loportinite pour reponn lakantite fwa ki nou ti ava kontan. Parfwa sa frer ki pe kondwir letid pa pou kapab donn nou loportinite pour reponn. Sa i kapab fer nou dezapwente me nou pa devret ofanse ler sa i arive. (Ekle. 7:9) Si ou pa ganny sa loportinite pour reponn sa kantite fwa ki ou ti ava kontan, akoz ou pa ekout byen larepons lezot ki pe partisipe e apre renyon, felisit zot pour zot larepons? Bann parol koumsa pou ankouraz ou bann frer ek ser zis parey ou larepons dan renyon ti pou ankouraz zot. w23.04 23-24 ¶14-16

Etidye e medit lo Parol Bondye. Zis parey en pye dibwa ki son rasin i al dan fon i debout for, nou pou kapab reste ferm si nou annan en lafwa for dan Zeova. Anmezir ki en pye dibwa i grandi, son rasin i al pli dan fon e pli lwen. Ler nou etidye e medite, nou lafwa i vin pli for e nou pli asire ki fason fer Zeova i sa enn ki pli meyer. (Kol. 2:6, 7) Medit lo lafason ki Zeova ti ed son bann serviter dan lepase. I ti donn zot lenstriksyon, konsey e i ti protez zot. Par egzanp, dan en vizyon Ezekyel ti vwar en tanp e i ti vwar en lanz pe pran letan pour mezir sa tanp byen. Sa vizyon ti ankouraz Ezekyel e i ansenny nou ki mannyer nou kapab obei bann standar Zeova konsernan ladorasyon pir. (Ezek. 40:1-4; 43:10-12) Ler nou pran letan pour etidye e medit lo bann keksoz profon dan Parol Bondye, nou osi ganny bann byenfe. Nou kapab annan en leker ki fidel e annan konfyans dan Zeova.—Ps. 112:7. w23.07 18 ¶15-16

Dan Labib, i annan en kantite bon legzanp ki bann zenn frer i kapab swiv. Sa bann zonm dan letan Labib ti kontan Bondye e zot ti pran swen avek son pep dan plizyer fason. Ou osi kapab trouv legzanp bann frer matir dan ou fanmir e dan ou kongregasyon. (Ebr. 13:7) Osi, ou kapab swiv legzanp parfe ki Zezi Kri in kite. (1 Pyer 2:21) Anmezir ki ou etidye sa bann legzanp, reflesir lo zot bann bon kalite. (Ebr. 12:1, 2) Apre sa, deside ki mannyer ou pou swiv legzanp sa bann zonm. En zonm ki’n devlop abilite pour reflesi, i pa azir deswit me i pran letan pour reflesir avan i fer en desizyon. Alor fer zefor pour devlop sa abilite e pour gard sa abilite. Premyerman, aprann bann prensip ki dan Labib e reflesir lo rezon akoz sa bann prensip i bon pour ou. Apre servi sa bann prensip pour ed ou fer bann desizyon ki pou fer Zeova plezir. (Ps. 119:9) Sa pou ed ou vin en frer matir.—Prov. 2:11, 12; Ebr. 5:14. w23.12 24-25 ¶4-5

Paran i kapab ansenny zot zanfan ki mannyer pour reponn avek ladouser ler dimoun i kestyonn zot konsernan zot krwayans. (Zak 3:13) Pandan ladorasyon fanmir, serten paran i fer zot zanfan practice ki mannyer pour reponn. Zot swazir bann topik ki dimoun i kontan koz lo la kot lekol, zot diskit lo la e montre ki mannyer pour reponn e apre zot ansenny zot zanfan ki mannyer pour koz avek ladouser. Ler bann zenn i practice, sa i kapab ed zot pour konvenk zot lekor e pour pli byen kapab eksplik lezot konsernan zot krwayans. Dan sa seri lartik “Young People Ask” ki lo jw.org, i annan bann worksheets pour bann adolesan. Sa bann worksheets in ganny fer pour ed bann zenn pour vin pli konvenki ki sa ki zot krwar ladan i vre e pour ed zot prepar bann larepons dan zot prop mo. Ler en fanmir i etidye sa seri lartik ansanm, sa pou ed tou dimoun dan lafanmir pour aprann ki mannyer pour defann zot lafwa avek ladouser. w23.09 17 ¶10; 18 ¶15-16

Eski ou’n deza met en lobzektif spirityel e ou vwar li difisil pour atenn sa lobzektif? Si wi, ou pa tousel parski bokou dimoun i santi koumsa. Par egzanp, Philip ti anvi priy pli souvan e amelyor son lapriyer. Me i ti vwar li difisil pour trouv letan pour priye. Erika ti annan sa lobzektif pour ariv aler pour renyon predikasyon. Me kantmenm sa, i ti kontinyen ariv tar pour preski tou renyon predikasyon. Si i annan en lobzektif ki ziska aprezan ou pa ankor atenn, pa dekouraze. I demann zefor ek letan pour atenn en senp pti lobzektif. Lefet ki ou ankor anvi atenn ou lobzektif i montre ki ou lanmitye avek Zeova i presye pour ou e ou anvi donn Zeova ou meyer. Zeova i apresye ou bann zefor. Me i pa ekspekte ki ou fer plis ki sa ki ou kapab. (Ps. 103:14; Mik. 6:8) Alor, ler ou met en lobzektif fer sir ki ou kapab atenn sa lobzektif. w23.05 26 ¶1-2

Bann dimoun ki annan kouraz i kapab santi zot per parfwa me zot pa les lafreyer anpes zot fer sa ki byen. Danyel ti en garson ki ti annan bokou kouraz. I ti etidye sa ki bann profet Bondye ti’n ekri enkli sa ki profet Zeremi ti’n ekri. Sa i fer ki pli tar Danyel ti kapab konpran ki lakantite lannen ki bann Zwif ti pou fer an egzil Babilonn, ti pros pour fini. (Dan. 9:2) Ler Danyel ti vwar ki sa ki Zeova ti dir i vin vre, sa ti fer li annan plis konfyans dan Zeova e bann dimoun ki annan konfyans dan Bondye, i annan bokou kouraz. (Konpar Romen 8:32, 37-39.) Sa ki pli enportan ankor, Danyel ti koz avek son Papa ki dan lesyel souvan. (Dan. 6:10) I ti konfes son pese avek Zeova e i ti koz avek Zeova lo son bann santiman. I ti osi demann Zeova pour ed li. (Dan. 9:4, 5, 19) Danyel ti en imen parey nou. Alor, i pa ti’n ne avek kouraz. O kontrer i ti devlop sa kalite parski i ti etidye, priye e met konfyans dan Zeova. w23.08 3 ¶4; 4 ¶7

Ler nou obei lotorite, sa i anmenn byenfe pour nou e pour lezot. Ki mannyer sa? Premyerman, nou pa pou ganny sa move konsekans ki bann ki dezobei lalwa i gannyen. (Rom. 13:1, 4) Ler nou obei bann lotorite, sa i kapab annan en lefe lo lafason ki dimoun i vwar Temwen Zeova. Par egzanp, plizyer lannen pase an Nizerya, bann solda ti antre dan en Lasal Rwayonm pandan en renyon parski zot ti pe rod bann dimoun ki ti pe fer protestasyon akoz zot pa ti oule pey taks. Me sa zofisye ansarz ti demann bann solda pour kit Lasal Rwayonm e i ti dir: “Temwen Zeova i toultan pey zot taks.” Sak fwa ou obei lalwa, ou ede pour gard sa bon repitasyon ki Temwen Zeova i annan e petet en zour sa bon repitasyon i kapab protez ou bann frer ek ser. w23.10 9 ¶13

Serten serviter Zeova ki’n servi Zeova pour en kantite letan, i ankor pe esper lafen sa move lemonn arive. Serten dimoun i krwar ki Bondye pe tarde pour akonpli son promes. Me Zeova i konnen ki mannyer son bann serviter i santi. Anfet i ti dir avek profet Abakouk: “Sa vizyon pou ganny akonplir dan son letan fikse. I pe al vitman ver son lakonplisman e i pa pou koz manti. Menm si i tarde, kontinyen esper li! Parski sirman i pou arive. I pa pou an retar!” (Aba. 2:3) Eski sa parol ti aplik zis pour Abakouk? Ouswa eski i osi aplik pour nou? Zeova ti fer zapot Pol dir sa bann menm parol avek bann Kretyen, ki ti pe esper sa nouvo lemonn arive. (Ebr. 10:37) Alor nou kapab asire ki menm si i paret ki sa promes ki Zeova in fer pour sov nou pe tarde, “sirman i pou arive. I pa pou an retar!” w23.04 30 ¶16

Bann Izraelit pa ti aksepte ki Zeova ti’n swazir Moiz konman Son reprezantan. (Nom. 14:10, 11) Plizyer fwa zot ti refize pour aksepte ki Zeova ti pe servi Moiz pour gid zot. Sa ti fer ki Zeova pa ti permet sa zenerasyon Izraelit pour antre dan Later Promiz. (Nom. 14:30) I ti annan serten Izraelit ki ti swiv gidans Zeova. Par egzanp, Zeova ti dir: “Kaleb . . . i’n toultan obei mwan avek tou son leker.” (Nom. 14:24) Bondye ti rekonpans Kaleb e i ti menm permet li pour swazir kote ki i anvi reste dan Later Promiz. (Zoz. 14:12-14) Bann Izraelit ki ti ganny drwa antre dan Later Promiz ti osi swiv gidans Zeova. Ler Zozye ti ganny apwente konman sa enn ki pou diriz bann Izraelit apre Moiz, zot ti “annan bokou respe pour Zozye.” (Zoz. 4:14) Sa ti fer ki Zeova ti beni zot e donn zot sa pei ki i ti’n promet zot.—Zoz. 21:43, 44. w24.02 21 ¶6-7

Zis parey en dokter i kapab ganny serten lenformasyon konsernan nou leker ler i tyek nou pou, nou kapab konnen ki kantite nou kontan Bondye par tyeke ki kantite nou kontan lezot. Si nou remarke ki nou lanmour pour nou bann frer ek ser i nepli parey avan, sa i kapab pe montre nou ki nou lanmour pour Bondye osi in afebli. Me ler nou demontre lanmour pour nou bann frer ek ser regilyerman, sa i montre nou ki nou lanmour pour Bondye i for. Si nou lanmour pour nou bann frer ek ser in afebli, sa i en keksoz serye. Akoz? Parski sa pou vedir ki nou lanmitye avek Zeova nepli for parey avan. Zapot Zan i fer nou konpran sa ler i ti dir: “Sa enn ki pa kontan son frer ki i kapab vwar, pa kapab kontan Bondye ki i pa kapab vwar.” (1 Zan 4:20) Ki leson nou aprann? Ler nou “kontan kanmarad,” sa i fer Zeova plezir.—1 Zan 4:7-9, 11. w23.11 8 ¶3; 9 ¶5-6

Ler Lerwa Zeoas ti ankor zenn, i ti fer en desizyon saz. Vi ki son papa ti’n mor, i ti swiv gidans Granpret Zeoada, ki ti en zonm fidel. Sa pret ti ansenny Zeoas konsernan Zeova zis parey en papa ti pou fer avek son garson. Zeoas ti deside pour servi Zeova e pour ed lezot osi pour servi Zeova. Zeoas ti menm fer laranzman pour tanp Zeova ganny repare. (2 Kron. 24:1, 2, 4, 13, 14) Si ou paran oubyen en lot dimoun pe ansenny ou pour kontan Zeova e pour viv dapre son bann standar, zot pe donn ou en kado presye. (Prov. 2:1, 10-12) Ou paran i kapab form ou dan diferan fason. Ler ou ekout konsey ki sorti dan Labib ki ou paran i donn ou, sa pou fer ou paran kontan. Pli enportan ankor, ou pou fer Bondye kontan e ou pou annan en pli bon lanmitye avek li. (Prov. 22:6; 23:15, 24, 25) Pa sa i bann bon rezon pour ou fer parey Zeoas ti fer ler i ti ankor zenn? w23.09 8-9 ¶3-5

Zeova i promet ki i pou ekout nou lapriyer. Nou Bondye i kontan son bann serviter fidel alor i pa pou zanmen inyor zot lapriyer. (Ps. 10:17; 37:28) Me sa pa vedir ki i pou donn nou tou sa ki nou demande. Petet nou bezwen esper ziska ki nou dan nouvo lemonn pour ganny serten keksoz ki nou demande. Zeova i gete si sa ki nou pe demande i relye avek son plan. (Iza. 55:8, 9) I dan plan Zeova ki later i ranpli avek zonm ek madanm ki ini e ki kontan pour obei li konman zot Dirizan. Me Satan i dir ki imen ti pou pli zwaye si zot ti diriz zot prop lekor. (Zen. 3:1-5) Pour montre ki sa ki Dyab i dir pa vre, Zeova in les bann imen diriz zot lekor. Me fason dirize bann imen in anmenn en kantite problenm pour nou ozordi. (Ekle. 8:9) Nou konnen ki Zeova pa pou tir tou sa bann problenm la konmela. w23.11 21 ¶4-5

Zeova ti promet ki atraver Abraam en kantite nasyon ti pou ganny beni. Me ler Abraam ti annan 100 an e Sara ti annan 90 an, sa garson ki Zeova ti’n promet zot pa ti ankor ne. Petet i ti paret enposib pour Abraam ek Sara annan en garson. Sa sityasyon ti vreman difisil pour Abraam. Me “Abraam ti annan lespwar ek lafwa ki i ti pou vin papa en kantite nasyon.” (Rom. 4:18, 19) Avek letan, sa ki Abraam ti pe espere ti vreman arive. Abraam ti vin papa Izaak, sa garson ki i ti pe espere. (Rom. 4:20-22) Parey Abraam, nou kapab fer plezir Bondye, ganny konsidere konman en dimoun drwat e vin son zanmi. I sanmenm ki Pol ti refer avek ler i ti dir: “Sa parol ‘Bondye ti konsider li konman en dimoun drwat’ pa ti ganny ekrir zis pour [Abraam], me osi pour nou ki pou ganny konsidere konman drwat, parski nou krwar dan sa Enn ki ti resisit Zezi.” (Rom. 4:23, 24) Parey Abraam, nou bezwen annan lafwa dan Zeova, fer bann bon aksyon e annan konfyans ki sa ki Zeova in promet pou vin vre. w23.12 7 ¶16-17

Ler ou pe pas dan en problenm ki fer ou per, rapel ki Zeova i vwar sa ki ou pe pas ladan e i konnen ki mannyer sa pe fer ou santi. Par egzanp, ler bann Izraelit ti Lezip, Zeova pa ti zis vwar ki zot ti pe ganny trete dan en move fason me i ti osi remark zot “soufrans.” (Egz. 3:7) Si ou pe fer fas avek en problenm ki fer ou per, petet ou pe demann ou lekor ki mannyer Zeova pe ed ou. Alor demann Zeova pour ed ou vwar ki mannyer i pe ed ou. (2 Rwa. 6:15-17) Apre reflesir lo sa bann kestyon: Eski i annan en diskour oubyen komanter dan renyon ki’n ankouraz ou? Eski i annan en piblikasyon baze lo Labib, en video oubyen en original song ki’n ankouraz ou? Eski en dimoun in dir ou en parol ankourazan oubyen in servi en verse pour ankouraz ou? Nou kapab fasilman oubliye ki mannyer sa lanmour ki nou bann frer ek ser i demontre anver nou e sa lankourazman ki nou’n gannyen dan Parol Bondye i ed nou. Tousala i bann kado ekstraordiner ki Zeova i donn nou. (Iza. 65:13; Mark 10:29, 30) Sa bann keksoz i montre ki Zeova i kontan ou. (Iza. 49:14-16) Zot osi montre ki Zeova i merit ou konfyans. w24.01 4-5 ¶9-10

Zis avan Zezi ti retourn dan lesyel, i ti fer son bann disip rapel konsernan zot responsabilite pour donn en temwannyaz konsernan li dan “Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:8; Lik 24:46-48) En pe letan pli tar, bann sef larelizyon Zwif ti tyonbo zapot Pyer ek Zan e anmenn zot devan Sannedren. Zot ti donn lord sa bann zonm fidel pour aret anons sa bon nouvel e zot ti menm menas zot. (Akt 4:18, 21) Pyer ek Zan ti dir: “Si zot krwar ki i byen devan Bondye pour ekout zot plito ki Bondye, zize zot menm. Me nou, nou pa kapab aret koz lo keksoz ki nou’n vwar e tande.” (Akt 4:19, 20) Ler Pyer ek Zan ti ganny large, bann disip ti fer lapriyer e zot ti demann Zeova pour ed zot fer son lavolonte. Zeova ti reponn zot lapriyer.—Akt 4:31. w23.05 5 ¶11-12

Zeova ek son Garson in ansanm plis letan ki okenn dimoun ki’n deza egziste. Pandan sa plizyer bilyon lannen ki zot in pase ansanm dan lesyel, zot in devlop en gran lanmour pour kanmarad e zot in vin vreman pros. Parey nou lir dan nou teks pour ozordi, Zeova i eksprim son lanmour pour Zezi. Zeova ti’n kapab zis dir, ‘Sa i sa enn ki mon’n aprouve.’ Me i ti anvi ki nou konnen ki kantite i kontan Zezi. I pour sa rezon ki i ti dir sa lo Zezi: “Mon Garson ki mon kontan.” Zeova ti fyer konsernan Zezi e konsernan sa ki Zezi ti pe al fer. (Efe. 1:7) Zezi ti asire ki son Papa i kontan li. Plizyer fwa i ti dir ki i asire ki son Papa i kontan li.—Zan 3:35; 10:17; 17:24. w24.01 28 ¶8

Imazin sa: En dimoun ki ou kontan i dir en move keksoz lo ou. Ou konnen ki sa ki in dir lo ou i pa vre me serten dimoun i krwar sa ki i’n dir. Pli pir ankor, zot konmans repet sa ki sa dimoun in dir e lezot i krwar. Ki mannyer ou ti pou santi? I tre probab ki sa mansonz pou bles ou santiman. Sa legzanp i kapab ed nou konpran ki mannyer Zeova ti santi ler son repitasyon ti ganny sali. Enn son bann lanz ti dir en mansonz lo li avek sa premye madanm, Ev e Ev ti krwar sa mansonz. Sa mansonz ti fer Adan ek Ev rebel kont Zeova. Sa in fer ki bann imen i fer pese e zot mor. (Zen. 3:1-6; Rom. 5:12) Tou bann problenm ki egziste dan lemonn ozordi, parey lanmor, lager ek soufrans, i egziste akoz bann mansonz ki Satan in dir. Eski Zeova i sagren akoz sa mansonz ek tou bann problenm ki sa mansonz in anmennen? Zeova i sagren me i pa ankoler. Anfet, Zeova pou toultan “sa Bondye ere.”—1 Tim. 1:11. w24.02 8 ¶1-2

Ki mannyer ou kapab swiv legzanp Zozef e reste fidel avek Zeova ler ou ganny tante? Ou kapab deside depi la konmela ki ou pou fer ler ou ganny tante. Aprann pour rezet deswit bann keksoz ki Zeova pa kontan e swazir pour pa kontinyen mazin lo sa bann keksoz. (Ps. 97:10; 119:165) Koumsa, ler ou ganny tante ou pa pou fer pese. Dan ou ka, petet ou konnen ki ou’n trouv laverite e ki ou anvi servi Zeova avek tou ou leker me kantmenm sa ou ezite pour dedye ou lavi avek Zeova e batize. Ou kapab fer parey Lerwa David ti fer e sipliy Zeova: “O mon Bondye, egzamin mwan byen pour konn sa ki dan mon leker. Egzamin mwan pour ki ou konn sa ki pe fatig mwan. Gete si i annan okenn move keksoz dan mwan e gid mwan lo semen leternite.” (Ps. 139:23, 24) Zeova i beni bann ki pe “vreman rod li.” Ler ou fer zefor pour atenn ou lobzektif pour dedye ou lavi avek Zeova e batize, ou pe montre Zeova ki ou pe vreman rod li.—Ebr. 11:6. w24.03 6 ¶13-15

Granpret ti reprezant nasyon Izrael devan Bondye. Zeova ti apwent Aaron konman sa premye granpret ler tabernak ti ganny inogire. Me parey zapot Pol ti dir, “i ti annan en kantite pret parski zot ti bezwen ranplas kanmarad akoz zot ti mor e sa ti anpes zot kontinyen servi konman pret.” (Ebr. 7:23-26) Sa bann granpret ti bann zonm enparfe, alor zot ti bezwen ofer sakrifis pour zot prop pese. Sanmenm sa ki fer bann granpret Izrael diferan avek Zezi Kri, sa Granpret ki siperyer. Konman nou Granpret, Zezi Kri i “en serviter . . . dan sa vre latant, ki’n ganny etablir par Zeova e pa par zonm.” (Ebr. 8:1, 2) Pol ti dir ki vi ki “Zezi i viv pour touzour, i napa personn ki pou ranplas li konman pret.” Pol ti osi dir ki Zezi i “pir, separe avek bann ki fer pese” e “i pa bezwen ofer sakrifis tou le zour” pour son prop pese parey bann granpret Izrael ti fer. w23.10 26 ¶8-9

“Sa lesyel avan” pe refer avek bann gouvernman ki anba lenfliyans Satan ek son bann demon. (Mat. 4:8, 9; 1 Zan 5:19) Ler sa mo “later” i ganny servi dan Labib, sa pe refer avek bann dimoun. (Zen. 11:1; Ps. 96:1) Alor, “sa later avan” pe refer avek bann move dimoun. Zeova pa pou zis repar oubyen amelyor sa “lesyel” ek “later” ki egziste ozordi. Me i pou detri zot konpletman. I pou ranplas sa lesyel ek later ki egziste ozordi avek “en nouvo lesyel ek en nouvo later,” setadir en nouvo gouvernman ki pou diriz lo bann dimoun drwat. Zeova pou fer later antye vin en zoli landrwa en pe parey zarden Edenn. I pou osi fer nou vin nef setadir i pou geri sakenn parmi nou konpletman. Bann ki bwete, bann ki aveg e bann ki sourd pou ganny geri e menm bann mor pou reganny lavi.—Iza. 25:8; 35:1-7. w23.11 4 ¶9-10

“Gran ladetres” pou konmans en sel kou. (Mat. 24:21) Me gran ladetres pou diferan avek serten dezas parski nou konnen ki i pe vini. Apepre 2,000 an pase, Zezi ti dir son bann disip ki zot bezwen met pare pour sa zour. Si nou’n met pare, i pou pli fasil pour nou andire pandan sa moman difisil e pour ed lezot fer parey. (Lik 21:36) Nou pou bezwen annan landirans pour nou kapab obei Zeova e annan konfyans ki i pou protez nou. Ki nou pou fer si nou bann frer ek ser i perdi serten oubyen tou zot bann keksoz materyel? (Aba. 3:17, 18) Nou pou bezwen annan konpasyon parski sa pou motiv nou pour ed zot. Ki mannyer nou pou reazir si apre ki nou’n ganny atake avek en group nasyon ki’n ralye ansanm, nou bezwen viv ansanm avek nou bann frer ek ser pour en pe letan? (Ezek. 38:10-12) Nou pou bezwen annan en gran lanmour pour nou bann frer ek ser parski sa pou ed nou pour nou andire pandan sa letan difisil. w23.07 2 ¶2-3

Bann koup marye i kapab aprann avek legzanp Akila ek Prisil, en koup marye ki bokou Kretyen dan premye syek ti apresye. (Rom. 16:3, 4) Zot ti travay ansanm, anons sa bon nouvel ansanm e ed lezot ansanm. (Akt 18:2, 3, 24-26) Anfet, sak fwa Labib i koz lo Akila ek Prisil i toultan mansyonn zot de ansanm. Ki mannyer en koup marye i kapab swiv zot legzanp? Mazin lo sa kantite keksoz ki ou ek ou konzwen zot bezwen fer. Eski zot kapab fer serten sa bann keksoz ansanm olye fer sakenn pour li? Par egzanp, Akila ek Prisil ti fer sa travay predikasyon ansanm. Eski zot osi zot fer parey? Akila ek Prisil ti osi travay ansanm. Petet ou ek ou konzwen pa travay dan menm landrwa me eski zot kapab fer bann louvraz kot lakour ansanm? (Ekle. 4:9) Ler zot ed kanmarad pour fer en louvraz, sa i kapab fer zot santi ki zot en lekip e zot annan loportinite pour koz avek kanmarad. w23.05 22-23 ¶10-12

Parfwa nou tou nou per. Par egzanp, ler Lerwa Sail ti pe tay avek David pour touy li, David ti sov dan lavil Gat, ki ti en lavil Filisten. I pa ti pran bokou letan pour Akis, lerwa Gat, konnen ki David ti sa gerye pwisan ki ti’n touy “plizyer dizenn milye” Filisten e ki bann dimoun ti’n konpoz en sanson lo li. Sa sityasyon ti fer David “konmans per.” (1 Sam. 21:10-12) I ti per sa ki Akis ti pou fer li. Ki mannyer David ti sirmont son lafreyer? Dan Psonm 56, David i koz lo lafason ki i ti santi ler i ti dan lavil Gat. Dan sa psonm, David i eksplike akoz i ti per me i osi eksplike kwa ki ti ed li sirmont son lafreyer. Ler David ti per, i ti met konfyans dan Zeova. (Ps. 56:1-3, 11) I ti annan bann bon rezon pour annan konfyans dan Zeova. Avek led Zeova, David ti deside pour fer en keksoz vreman drol. I ti fer krwar i fou e son plan ti marse. Akis pa ti anvi touy David me i ti anvi ki David i ale e sa ti fer ki David ti kapab sove.—1 Sam. 21:13–22:1. w24.01 2 ¶1-3

Lekel sa bann ki ganny mansyonnen dan teks pour ozordi? Sa i bann Kretyen swazir ki’n ganny resisite dan lesyel. Alor, ler bann Kretyen swazir ki ankor lo later pou ganny anmennen dan lesyel ver lafen gran ladetres, enn bann premye travay ki zot pou fer i pour lager. Apre ki zot in ganny anmennen dan lesyel, zot pou lager akote Kris ek son bann lanz dan sa lager final kont bann lennmi Bondye. Reflesir lo sa. Lo later, serten Kretyen swazir i aze e menm fay fizikman. Me ler zot pou ganny anmennen dan lesyel, zot pou vin bann kreatir spirityel for e imortel e zot pou lager ansanm avek Zezi, ki zot Lerwa. Apre ki zot pou’n partisip dan lager Armagedon, zot pou travay ansanm avek Zezi pour ed bann imen vin parfe. San dout, ler zot pou dan lesyel, zot pou kapab pli byen ed zot bann frer ek ser ki lo later, plis ki zot ti kapab fer ler zot ti bann imen enparfe. w24.02 6-7 ¶15-16

Serten dimoun i pare pour dedye zot lavi avek Zeova e batize me zot ezite pour fer li. I kapab ki zot per ki apre ki zot in batize, zot pou fer en pese grav e zot pou ganny ekskli dan kongregasyon. Si ou santi koumsa, ou kapab asire ki Zeova pou donn ou tou sa ki ou bezwen pour ou kapab “viv dan en fason ki onor [li] e ki fer li vreman plezir.” (Kol. 1:10) I pou osi donn ou lafors pour fer sa ki byen. Zeova in montre ki i kapab fer sa parski in ed en kantite dimoun pour fer sa ki byen. (1 Kor. 10:13) I pour sa rezon ki pa tro bokou dimoun ki ganny ekskli dan kongregasyon. Zeova i ed son pep pour reste fidel. Tou imen i enparfe e zot ganny tante pour fer sa ki mal. (Zak 1:14) Me ou ki bezwen swazir ki ou pou fer ler ou ganny tante. Anfet, ou ki swazir ki mannyer ou pou viv ou lavi. Menm si serten dimoun i dir ki nou pa kapab kontrol nou santiman ek sa ki nou fer, sa pa vre. Nou kapab aprann pour kontrol nou bann move dezir. w24.03 5 ¶11-12