Out

Remark de pwen enportan dan sa psonm ki nou teks pour lazournen: (1) Bann dimoun ki fer sa ki byen i fer fas avek problenm. (2) Zeova i delivre nou dan nou bann problenm. Ki mannyer Zeova i delivre nou? En fason ki Zeova i delivre nou i par ed nou konpran ki kalite lavi nou ekspekte annan dan sa lemonn. Menm si Zeova i promet ki nou pou ere ler nou servi li, i pa dir ki nou pou napa problenm. (Iza. 66:14) I ankouraz nou pour mazin lo nou lavenir, setadir sa letan kot nou pou annan sa kalite lavi ki i anvi nou annan e kot nou pou viv pour touzour. (2 Kor. 4:16-18) Me antretan, i ed nou pour kontinyen servi li sak zour. (Lam. 3:22-24) Ki nou kapab aprann avek legzanp bann serviter fidel Zeova dan letan Labib e dan nou letan? I kapab arive ki nou fer fas avek bann problenm ki nou pa ti pe ekspekte. Me ler nou depan lo Zeova, Zeova pou toultan ed nou.—Ps. 55:22. w23.04 14-15 ¶3-4

Nou kapab aprann avek legzanp Zozef ek Mari ki ti pare pour obei bann lotorite menm ler i ti difisil pour zot fer li. (Lik 2:1-6) Ler Mari ti apepre nef mwan dan son lansentman, li ek Zozef ti fer fas avek en sityasyon vreman difisil. Ogis, ki ti diriz Lanpir Romen, ti donn en lord pour tou dimoun al anrezistre. Zozef ek Mari ti bezwen fer en vwayaz apepre 150 kilomet, dan bann landrwa kot i ti annan en kantite montanny, pour zot al Betleenm. Sa vwayaz ti pou enn ki ti pou enkonfortab sirtou pour Mari. I kapab ki Mari ek Zozef ti enkyet konsernan lasante Mari e konsernan lasante sa pti baba. Petet zot ti enkyet konsernan sa ki ti pou arive si Mari ti donn nesans dan semen, sirtou parski sa zanfan ti pou vin sa Mesi ki ti’n ganny promet. Eski sa ti en leskiz pour zot pa obei gouvernman? Menm si Zozef ek Mari ti annan rezon pour enkyet, zot ti obei lalwa. Sa ti fer ki Zeova ti beni zot. Mari ti ariv Betleenm sen e sof. I ti donn nesans en pti baba an bonn sante e i ti menm ede pour akonpli profesi Labib.—Mik. 5:2. w23.10 8 ¶9; 9 ¶11-12

Ki ou kapab fer si ou santi ki ou tro per pour reponn? Petet i ti pou byen ki ou prepar byen. (Prov. 21:5) Pli ou konpran sa lenformasyon ki pe ganny diskite, pli ou pou santi ou pli alez pour lev ou lanmen pour reponn pandan renyon. Osi, donn bann larepons ki kourt. (Prov. 15:23; 17:27) I tre probab ki ou pa pou tro per si ou donn en larepons ki kourt. Ler ou donn en larepons ki kourt e dan ou prop mo, sa pou montre ki ou’n byen prepare e ki ou konpran byen sa lenformasyon ki pe ganny diskite. Ki ou pou fer si apre ki ou’n aplik sa bann sizesyon, ou ankor per pour donn larepons plis ki en fwa? Ou kapab asire ki Zeova i apresye sa zefor ki ou pe fer. (Lik 21:1-4) Zeova pa demann nou pour fer plis ki sa ki nou kapab. (Fili. 4:5) Alor rode ki ou kapab fer, met en lobzektif pour fer sa ki ou’n deside e demann Zeova pour ed ou reste kalm. Petet o konmansman ou kapab met sa lobzektif pour donn en pti larepons kourt. w23.04 21 ¶6-8

Zapot Pol ti dir ki nou parey bann solda ki alert e ki annan tou nou lekipman pour lager. Dimoun i ekspekte ki en solda i toultan pare pour lager nenport ler ki i annan en lager. I menm parey pour nou osi. Nou bezwen toultan pare pour gran zour Zeova par met lafwa ek lanmour konman en proteksyon pour nou pwatrin e lespwar konman en kask lo nou latet. En proteksyon pour pwatrin i protez leker en solda. Lafwa ek lanmour i protez nou leker senbolik, setadir sa dimoun ki nou ete anndan. Sa de kalite pou ed nou pour kontinyen servi Bondye e pou kontinyen swiv Zezi. Lafwa i fer nou asire ki Zeova pou rekonpans nou parski nou pe vreman rod li avek tou nou leker. (Ebr. 11:6) Lafwa pou motiv nou pour reste fidel avek Zezi, ki nou Sef, menm si nou fer fas avek bann difikilte. Nou kapab fer nou lafwa vin pli for par aprann avek legzanp bann serviter Zeova dan nou letan, ki’n reste fidel menm ler zot in ganny persekite oubyen ler zot in fer fas avek problenm ekonomik. Nou osi kapab evite tonm dan sa latrap pour kontan larzan ek bann keksoz materyel, par swiv legzanp bann serviter Bondye ki senplifye zot lavi e met Rwayonm premye. w23.06 10 ¶8-9

En dimoun ki annan kontrol lo son lekor, i kapab kontrol son santiman ek son aksyon. Ou bezwen annan kontrol lo ou lekor pour ou kapab fer zefor pour atenn ou lobzektif, sirtou si ou pe esey atenn en lobzektif ki difisil oubyen ou pa anvi fer sa keksoz. Gard antet ki kontrol lo nou lekor i form parti fri lespri sen. Alor, demann Zeova son lespri sen pour ed ou devlop sa kalite ki enportan. (Lik 11:13; Gal. 5:22, 23) Pa bezwen espere ziska ki tou keksoz i mars byen. Dan sa lemonn, pa toultan ki keksoz pou mars byen. Si nou espere, i kapab ki nou pa pou zanmen atenn nou lobzektif. I kapab ki nou pa anvi atenn nou lobzektif parski nou lobzektif i paret tro difisil pour atenn. Si sa i leka, petet ou kapab fer bann pli pti lobzektif pour ed ou atenn sa lobzektif. Par egzanp, si ou anvi devlop en kalite, petet o konmansman ou kapab demontre sa kalite dan bann pti fason. Si ou lobzektif i pour lir Labib an antye, petet ou kapab konmans par lir Labib pour en pti gin letan. w23.05 29 ¶11-13

Pandan bann dernyen zour, Zeova in servi son lorganizasyon pour kontinyen donn nou bann lenstriksyon sorti dan son Parol pour ed nou tou pour kontinyen mars lo sa “Semen Sen.” (Iza. 35:8; 48:17; 60:17) Ler en dimoun i aksepte pour etidye Labib, nou kapab dir ki sa dimoun i annan en loportinite pour mars lo sa “Semen Sen.” Serten pa ariv tro lwen e apre zot kit sa semen. Lezot i determinen pour kontinyen mars lo sa semen ziska ler zot ariv kot zot destinasyon. Ki sa destinasyon? Pour bann ki annan sa lespwar pour viv dan lesyel, sa “Semen Sen” i anmenn zot ver “paradi Bondye” ki dan lesyel. (Rev. 2:7) Pour bann ki annan sa lespwar pour viv pour touzour lo later, sa gran semen pou anmenn zot ver lafen Renny Mil an Kris, sa letan ler tou dimoun pou vin parfe. Si ou deza pe mars lo sa gran semen, pa konsantre lo bann keksoz ki ou’n kit deryer. Pa bezwen kit sa semen ziska ki ou ariv kot ou destinasyon, setadir dan nouvo lemonn. w23.05 17 ¶15; 19 ¶16-18

Ler ou mazin tou bann keksoz ki Zeova in fer pour ou, ou pou rekonesan anver li e ou pou anvi dedye ou lavi avek li. (Ps. 116:12-14) Labib i annan rezon pour dir ki Zeova i sa Enn ki donn “tou don ki bon e tou kado parfe.” (Zak 1:17) Sa pli gro kado ki Zeova in donn nou i son Garson Zezi konman sakrifis. Zis mazin sa! Sa ranson in fer li posib pour ou annan en lanmitye pros avek Zeova. Zeova in osi donn ou sa loportinite pour viv pour touzour. (1 Zan 4:9, 10) Ler ou dedye ou lavi avek Zeova, sa i enn bann pli bon fason ki ou kapab montre Zeova ki ou rekonesan pour sa gran lanmour ki in demontre ler i ti donn son Garson konman sakrifis e osi pour bann lezot benediksyon ki in donn ou.—Det. 16:17; 2 Kor. 5:15. w24.03 5 ¶8

Ler nou vwar standar moral bann dimoun ozordi, sa i fer nou santi parey Lot. Lot ti konnen ki son Papa ki dan lesyel i ay bann move kondwit, alor “son lespri ti fatige en kantite akoz move kondwit bann dimoun dezobeisan.” (2 Pyer 2:7, 8) Vi ki Lot ti annan en gran respe pour Bondye e i ti kontan Bondye, i ti ay bann keksoz imoral ki bann dimoun otour li ti pe fer. Nou osi nou pe viv parmi bann dimoun ki napa bokou oubyen ki napa ditou respe pour bann standar moral Zeova. Kantmenm sa, nou kapab kontinyen swiv bann standar moral Zeova, si nou kontinyen annan lanmour pour Zeova e nou aprann pour annan en gran respe pour li. Pour ed nou fer sa, Zeova i donn nou lankourazman atraver liv Proverb. Tou Kretyen ki swa zonm, madanm, zenn oubyen bann aze i kapab ganny bann byenfe atraver bann konsey saz ki trouve dan liv Proverb. Ler nou annan en gran respe pour Zeova, nou pou fer sir ki nou pa toler bann move konportman. w23.06 20 ¶1-2; 21 ¶5

Petet ou fanmir in opoz ou oubyen ou’n senplifye ou lavi pour ou kapab met Rwayonm Bondye premye dan ou lavi e aprezan ou annan mwens larzan ek keksoz materyel. (Mat. 6:33) Si ou’n fer sa, ou kapab asire ki Zeova i konn tou sa ki ou’n fer pour li. (Ebr. 6:10) I tre probab ki ou’n vwar ki sa ki Zezi in dir, i vre. I ti dir: “Napa personn ki’n kit son lakaz, frer, ser, manman, papa, zanfan ouswa plantasyon akoz mwan e akoz sa bon nouvel ki la konmela pa pou ganny 100 fwa plis, lakaz, frer, ser, manman, zanfan ek plantasyon avek persekisyon e dan sa lemonn ki pe vini, lavi eternel.” (Mark 10:29, 30) Bann benediksyon ki ou’n gannyen i bokou plis ki bann sakrifis ki ou’n fer.—Ps. 37:4. w24.03 9 ¶5

Ler i ti annan en gran lafamin Zide, bann frer ek ser dan kongregasyon Antyos Siri “ti deside, sakenn dapre sa ki zot ti kapab donnen, pour anvoy led pour zot bann frer ki ti pe reste Zide.” (Akt 11:27-30) Menm si sa bann frer ek ser ti reste lwen, bann Kretyen Antyos ti vreman anvi ed zot. (1 Zan 3:17, 18) Nou osi nou kapab demontre konpasyon pour nou bann frer ek ser ler nou tande ki nou bann frer ek ser pe soufer akoz bann dezas natirel oubyen lezot problenm. Nou kontan pour ede, petet par demann bann ansyen si nou kapab ede lo en proze, fer donasyon pour sa travay mondyal oubyen par priy pour bann ki’n ganny afekte avek sa dezas. Osi, i kapab ki nou bann frer ek ser pou bezwen led pour zot ganny bann keksoz de baz. Ler nou Lerwa Zezi Kri i vin ziz dimoun, nou anvi ki i vwar ki nou pe demontre konpasyon e i envit nou pour viv anba dominasyon “sa Rwayonm.”—Mat. 25:34-40. w23.07 4 ¶9-10, 12

Zezi i swiv legzanp Zeova e li osi i rezonnab. I ti ganny anvoye lo later pour anons sa bon nouvel avek “bann mouton perdi pep Izrael.” Kantmenm sa, i ti rezonnab ler i ti anons sa bon nouvel avek bann dimoun. En fwa, en madanm ki pa ti en Izraelit ti sipliy Zezi pour geri son fiy ki ti “pe soufer en kantite akoz i posede par en demon.” Zezi ti demontre konpasyon e i ti geri fiy sa madanm. (Mat. 15:21-28) Annou vwar en lot legzanp. Ler Zezi ti konmans son minister i ti dir: “En dimoun ki dir piblikman ki i pa mon disip, mwan osi mon pou dir . . . . ki i pa mon disip.” (Mat. 10:33) Me kantmenm sa ler Pyer ti dir trwa fwa ki i pa konn Zezi, Zezi pa ti dir ki Pyer pa son disip. Zezi ti konnen ki Pyer ti regrete pour sa ki in fer e ki i ti en zonm fidel. Apre ki Zezi ti’n resisite, i ti aparet avek Pyer e i tre probab ki i ti asir li ki in pardonn li e ki i ti ankor kontan li. (Lik 24:33, 34) Zeova ek Zezi Kri i rezonnab. Zeova i ekspekte ki nou osi nou rezonnab. w23.07 21 ¶6-7

Ki nou kapab dir lezot pour ki zot osi zot asire ki later pou vin en Paradi? Premyerman, Zeova li menm in fer sa promes. Liv Revelasyon i dir: “Sa Enn ki ti pe asiz lo tronn ti dir: ‘Gete! Mon pe fer tou keksoz nef.’” Zeova i anvi akonpli son promes e i annan sa lasazes ek pouvwar pour fer li. Dezyenmman, nou asire ki sa promes pou vin vre parski pour Zeova i konmsi in fini arive. I pour sa rezon ki i dir: “Sa bann parol i fidel e vre. . . . Tou in akonpli!” Trwazyenmman, i napa nanryen ki kapab anpes Zeova fini en keksoz ki i’n konmanse. I pour sa rezon ki i dir: “Mwan menm Alfa ek Omega.” (Rev. 21:6) Zeova pou montre ki Satan i en manter e ki Satan pa kapab anpes li akonpli son plan. Alor ler en dimoun i dir, “Sa bann keksoz i paret bon me mon pa tro krwar i pou vin vre,” ou kapab lir e eksplik li Revelasyon 21:5, 6. Montre ki dan sa bann verse, i konmsi Zeova in met son prop sinyatir pour asir nou ki son promes pou vin vre.—Iza. 65:16. w23.11 7 ¶18-19

Zeova ti fer sa promes avek Abraam ler i ti annan 75 an e i ti napa zanfan. Eski Abraam ti vwar sa promes ganny akonplir? Pa vreman. Abraam ti bezwen travers Larivyer Efrat e esper 25 an avan ki son garson, Izaak ti ne e i ti bezwen esper ankor 60 an avan ki son bann pti zanfan, Ezai ek Zakob, ti ne. (Ebr. 6:15) Me Abraam pa ti vwar kot son desandans ti vin en gran nasyon e kot zot ti ganny donnen Later Promiz. Me sa zonm fidel ti annan en lanmitye pros avek son Kreater. (Zak 2:23) Ler Abraam i resisite, i pou kontan pour aprann ki akoz son lafwa ek pasyans, tou nasyon lo later in ganny beni. (Zen. 22:18) Ki leson nou kapab aprann? Petet nou pa pou vwar tou bann promes Zeova ganny akonplir me si nou annan pasyans parey Abraam, nou kapab asire ki Zeova pou rekonpans nou la konmela e dan sa nouvo lemonn ki i’n promet.—Mark 10:29, 30. w23.08 24 ¶14

Ler Lerwa Ouzya ti ankor zenn, i ti annan limilite. I ti aprann “pour annan en gran respe pour sa vre Bondye.” I ti viv pour 68 an e Zeova ti beni li pour laplipar son lavi. (2 Kron. 26:1-4) Ouzya ti ranport laviktwar lo en kantite lennmi e i ti fer sir ki Zerizalenm ti ganny byen proteze. (2 Kron. 26:6-15) Nou kapab asire ki Ouzya ti apresye tou sa ki Bondye ti’n ed li pour fer. (Ekle. 3:12, 13) Lerwa Ouzya ti annan labitid dir lezot ki pour fer. Petet sa ti fer li santi ki i kapab fer tou sa ki i anvi. En zour Ouzya ti deside pour antre dan tanp Zeova e esey bril lansan lo lotel. Sa ti en keksoz ki bann lerwa ti napa drwa pour fer. (2 Kron. 26:16-18) Granpret Azarya ti esey anpes li me Ouzya ti vreman ankoler. Malerezman Ouzya pa ti reste fidel avek Zeova e Zeova ti donn li lalep. (2 Kron. 26:19-21) Si Ouzya ti kontinyen annan limilite, son lavi ti pou’n diferan. w23.09 10 ¶9-10

Menm apre ki zapot Pyer ti’n vin en Kretyen swazir, i ti bezwen lager avek son bann febles. Par egzanp, lannen 36, Bondye ti anvoy Pyer kot Korney, ki pa ti en Zwif e laba, Bondye ti swazir Korney avek lespri sen. Sa ti montre ki “Bondye pa fer lapreferans” e ki bann dimoun ki pa ti Zwif i kapab form parti kongregasyon Kretyen. (Akt 10:34, 44, 45) Apre sa, Pyer ti konmans manz avek bann dimoun ki pa ti Zwif. Sa ti en keksoz ki oparavan Pyer pa ti pou’n zanmen fer. Me i ti annan serten Kretyen Zwif ki ti santi ki bann Zwif ek bann dimoun ki pa ti Zwif, pa devret manz ansanm. Ler serten sa bann Kretyen Zwif ki ti annan sa pwennvi ti vin Antyos, Pyer ti aret manz avek bann dimoun ki pa ti Zwif. I tre probab ki i ti fer sa parski i ti per pour ofans bann Kretyen Zwif. Zapot Pol ti vwar sa ki Pyer ti pe fer e i ti koz severman avek li devan lezot. (Gal. 2:13, 14) Malgre sa fot ki Pyer ti fer, i ti persevere e kontinyen servi Zeova. w23.09 22 ¶8

Petet ou pou vwar ki ou annan serten febles me pa bezwen dekouraze. “Senyer i bon” e i kapab ed ou amelyore. (1 Pyer 2:3) Zapot Pyer i asir nou: “Bondye . . . pou fini zot formasyon li menm. I pou fer zot ferm.” Parfwa, Pyer ti santi ki i pa ti alaoter pour servi o bor Zezi. (Lik 5:8) Me avek led ek lanmour Zeova ek Zezi, i ti kontinyen swiv Zezi fidelman. Alor Pyer ti ganny aprouve pour “antre dan Rwayonm eternel nou Senyer ek Sover Zezi Kri.” (2 Pyer 1:11) Pa sa i en zoli rekonpans! Si ou persevere parey Pyer e ou les Zeova form ou, ou osi ou pou kapab ganny lavi eternel. Ou pou “ganny [ou] delivrans e [ou] lafwa pou’n atenn son bi.”—1 Pyer 1:9. w23.09 31 ¶16-17

Tabernak ti annan en lakour. Sa ti en gran landrwa ki ti’n bare e kot bann pret ti fer zot travay. Dan sa lakour, i ti annan en gro lotel an kwiv kot bann pret ti ofer lofrann brile e i ti osi annan en basen delo an kwiv ki bann pret ti servi pour netway zot avan fer zot servis sakre. (Egz. 30:17-20; 40:6-8) Ozordi, bann frer swazir Kris ki ankor lo later i servi dan lakour anndan dan tanp spirityel. Sa gran basen delo ki ti dan tabernak ek tanp, i fer sa bann Kretyen e nou osi rapel, ki i enportan pour reste prop moralman e spirityelman. Alor kote “gran lafoul” i ador Zeova? Zapot Zan ti vwar sa gran lafoul “pe debout devan tronn,” ki reprezant lakour an deor ki lo later e “lizour konman aswar, zot pe servi [Bondye] dan son tanp.” (Rev. 7:9, 13-15) Nou vreman apresye sa plas ki nou annan dan laranzman Zeova pour ladorasyon pir. w23.10 28 ¶15-16

En fason ki Zeova i donn nou lafors i atraver bann ansyen. (Iza. 32:1, 2) Alor ler ou santi ou enkyet, koz avek bann ansyen lo sa ki pe fer ou enkyet. Pa ezite pour aksepte led bann ansyen. Zeova i kapab servi bann ansyen pour fer ou for. Bann promes ki dan Labib ki donn nou sa zoli lespwar pour viv pour touzour, ki swa dan paradi lo later oubyen dan Rwayonm Bondye dan lesyel, i kapab osi donn lafors. (Rom. 4:3, 18, 19) Nou lespwar i donn nou lafors pour andire ler nou annan problenm, pour anons sa bon nouvel e pour desarz bann responsabilite ki nou annan dan kongregasyon. (1 Tesa. 1:3) I sanmenm sa lespwar ki ti donn zapot Pol lafors. I ti dir ki i ti “anba tou sort kalite presyon,” i ti “konfize,” i ti pe “ganny persekite” e i ti’n “ganny zet ater.” Son lavi ti menm an danze. (2 Kor. 4:8-10) Pol ti ganny lafors pour andire ler i ti konsantre lo son lespwar. (2 Kor. 4:16-18) I ti konsantre lo sa lespwar ki i ti annan pour al viv dan lesyel. Lefet ki Pol ti medit lo sa lespwar ki i ti annan, sa ti fer ki i ti ganny “renouvle zour apre zour.” w23.10 15-16 ¶14-17

Ler ou priy Zeova, mazinen si la i sa letan pour Zeova donn ou sa ki ou pe demande? Petet nou santi ki nou bezwen ganny sa ki nou pe demande deswit. Me Zeova ki konnen ki sa pli bon letan pour ed nou. (Ebr. 4:16) Ler nou pa ganny sa ki nou pe demande deswit, petet nou mazinen ki larepons Zeova i ‘Non.’ Me anfet i kapab ki Zeova pe dir nou ‘I pa ankor ler.’ Par egzanp, en zenn frer ti demann Zeova pour geri li. Me son lasante pa ti amelyore. Si Zeova ti’n fer mirak e geri sa frer, Satan ti’n kapab dir ki sa frer pe kontinyen servi Zeova zis akoz Zeova in geri li. (Zob 1:9-11; 2:4) Osi, Zeova in fini deside kan ki i pou geri tou maladi. (Iza. 33:24; Rev. 21:3, 4) Me ziska ki sa i arive, nou pa kapab ekspekte ki Zeova i fer mirak pour geri nou ler nou malad. Alor sa frer i kapab demann Zeova pour donn li sa lafors ek lape lespri pour li kapab andire e kontinyen servi Bondye fidelman. w23.11 24 ¶13

Sanmson ti fer en gro fot me i ti kontinyen servi Zeova. I ti rod loportinite pour fer sa ki Zeova ti anvi i fer e sa ti pour lager kont bann Filisten. (Ziz 16:28-30) Sanmson ti sipliy Zeova: “Les mwan revanze lo bann Filisten.” Sa vre Bondye ti reponn lapriyer Sanmson e i ti donn li sa lafors ekstraordiner ki i ti annan avan. Sa ti fer ki sa zour Sanmson ti touy plis Filisten ki i ti’n deza touye oparavan. Menm si Sanmson ti eksperyans bann move konsekans pour sa fot ki i ti’n fer, i pa ti aret fer lavolonte Zeova. Menm si nou fer en fot e nou bezwen ganny disiplinen oubyen perdi en privilez, nou pa devret aret servi Zeova. Gard antet ki Zeova i pare pour pardonn nou. (Ps. 103:8, 9) Menm si nou’n fer fot, Zeova i kapab donn nou lafors pour fer son lavolonte zis parey i ti fer avek Sanmson. w23.09 6 ¶15-16

Ler ou andire, sa i fer Zeova plezir. Sa pa vedir ki Zeova i kontan ler i vwar ou pe pas dan difikilte. O kontrer i kontan parski ou pe andire e ou pe reste fidel avek li. I vreman ankourazan pour konnen ki ler nou andire nou fer Zeova plezir. (Ps. 5:12) Rapel ki Abraam ti fer fas avek diferan problenm e ler i ti andire e reste fidel avek Zeova, sa ti fer Zeova kontan. Zeova ti vin zanmi Abraam e Zeova ti konsider li konman en dimoun drwat. (Zen. 15:6; Rom. 4:13, 22) Nou osi nou kapab vin parey Abraam. Zeova i pran plezir dan nou pa akoz lakantite travay oubyen responsabilite ki nou annan dan son servis me i pran plezir dan nou ler nou reste fidel avek li menm dan bann sityasyon difisil. Nenport ki laz, sirkonstans oubyen abilite ki nou annan, nou tou nou kapab andire. Eski ou pe fer fas avek en problenm e ou pe reste fidel avek Zeova? Si wi, rapel ki ou pe fer Zeova plezir. Ler nou realize ki nou pe fer Bondye plezir, nou lespwar pou vin pli reel. w23.12 11 ¶13-14

En frer i bezwen aprann pour kominik byen. En frer ki kominik byen, i pare pour ekout lopinyon lezot e i konpran zot santiman. (Prov. 20:5) I kapab aprann pour konpran ton lavwa en dimoun, lekspresyon lo son figir ek son konportman. Ou pa pou kapab aprann fer sa bann keksoz si ou pa pas letan avek lezot dimoun. Si ou toultan pe servi lekipman elektronik pour kominike, par egzanp pour anvoy email e anvoy mesaz, sa i kapab fer li pli difisil pour ou kominik avek dimoun fas a fas. Alor, esey rod loportinite pour koz avek lezot an personn. (2 Zan 12) En frer matir i osi bezwen kapab finansyerman siport son lekor ek son fanmir. (1 Tim. 5:8) I byen pour ou aprann en abilite ki pou ed ou ganny en travay. (Akt 18:2, 3; 20:34; Efe. 4:28) Annan repitasyon konman en dimoun ki travay dir e fer sir ki ou konplet okenn travay ki ou ganny donnen. Si ou fer sa, i tre probab ki ou pou kapab ganny en travay e gard sa travay. w23.12 27 ¶12-13

Ler Labib i koz lo “zour Zeova,” i refer avek sa letan ler Zeova i ziz son bann lennmi e sov son pep. Dan lepase, Zeova ti pini serten nasyon. (Iza. 13:1, 6; Ezek. 13:5; Zef. 1:8) Dan nou letan, “zour Zeova” i konmans ler bann dirizan politik i detri Gran Babilonn e i pou fini avek lager Armagedon. Pour nou kapab sirviv “zour Zeova,” nou bezwen prepar nou la konmela. Zezi ti ansennyen ki nou devret “met” pare pour gran ladetres. Sa i montre ki i en keksoz ki nou devret kontinyen fer. (Mat. 24:21; Lik 12:40) Dan sa premye let ki zapot Pol ti ekri pour bann Kretyen Tesalonik, i ti servi en kantite legzanp pour ed sa bann Kretyen pour toultan pare pour zour zizman Zeova. Ler Pol ti ekri sa let, i ti konnen ki zour Zeova pa ti pou vin deswit. (2 Tesa. 2:1-3) Kantmenm sa, Pol ti ankouraz son bann frer ek ser pour prepare pour sa bann zour konmsi sa zour ti pe vin son lannmen. Nou osi nou kapab aplik son konsey. w23.06 8 ¶1-2

An 1978, en gran batiman ti ganny konstrir Tokyo, Zapon. Dimoun ti pe mazinen ki mannyer i ti pou reste debout, vi ki dan sa lavil i ti souvan annan bann tranblemandter. Ki bann enzenyer in fer pour ki sa batiman i reste debout ler i annan tranblemandter? Zot in fer sa batiman solid e an menm tan dan en fason ki i pou kapab tenir sekous tranblemandter. Bann Kretyen i parey sa batiman. Dan ki fason? En Kretyen i bezwen reste ferm e pare pour adapte. I bezwen reste ferm e determinen pour toultan obei bann lalwa ek standar Zeova. I “pare pour obei” e reste fidel avek Zeova. De lot kote, i bezwen “rezonnab” oubyen pare pour adapte dapre sirkonstans ouswa ler i neseser. (Zak 3:17) En Kretyen ki fer sa, pa pou vin tro strik oubyen annan en latitid lesefer. w23.07 14 ¶1-2

Zezi ti bezwen reziste Satan ki ti esey tant li pour fer pese, enkli esey fer li aret fidel avek Bondye. (Mat. 4:1-11) Satan ti anvi fer Zezi fer pese pour ki Zezi pa kapab pey sa ranson. Ler Zezi ti lo later, i ti fer fas avek lezot problenm. Son bann lennmi ti persekit li e esey touy li. (Lik 4:28, 29; 13:31) I ti bezwen fer fas avek defo son bann disip. (Mark 9:33, 34) Ler Zezi ti pe ganny zize, i ti ganny tortire e sikannen. Apre, i ti ganny touye parey en kriminel e i ti soufer en kantite. (Ebr. 12:1-3) I ti bezwen andir sa dernyen parti son lavi li tousel, san proteksyon Zeova. (Mat. 27:46) I kler ki Zezi ti soufer en kantite pour li kapab pey sa ranson. Ler nou medit lo tou sa ki Zezi ti pare pour sakrifye pour nou, sa i fer nou kontan li en kantite. w24.01 10-11 ¶7-9

Nou bezwen annan pasyans pour nou kapab annan bann bon lanmitye avek lezot. Pasyans i ed nou pour ekout atantivman ler lezot i koze. (Zak 1:19) I osi ed nou fer lape avek lezot. Si nou annan pasyans, nou pa pou reakte tro vit ler nou strese e dir en keksoz ki pou bles lezot. Nou osi pa pou ankoler vitman ler lezot i bles nou santiman. Olye rann mal pour mal, nou pou “kontinyen siport kanmarad e pardonn kanmarad volonterman.” (Kol. 3:12, 13) Ler nou annan pasyans, sa i kapab ed nou fer bann pli bon desizyon. Olye fer bann desizyon vit oubyen san reflesir, nou pou pran letan pour fer resers pour vwar bann opsyon ki nou annan e apre nou pou deside kwa ki pli bon. Par egzanp, si nou pe rod en travay, petet nou kapab anvi aksepte sa premye travay ki nou trouve. Me si nou annan pasyans, nou pou pran letan pour reflesir lo ki lefe sa travay pou annan lo nou fanmir e lo nou lanmitye avek Zeova. Ler nou annan pasyans, nou pou evite fer bann move desizyon. w23.08 22 ¶8-9

Si ou santi ou dekouraze parski ou bezwen lager avek bann move dezir, ler ou mazin sa promes ki ou ti fer avek Zeova zour ou ti dedye ou lavi avek li, sa pou donn ou lafors pour lager kont tantasyon. Ki mannyer? Ler ou dedye ou lavi avek Zeova, ou aret viv zis pour ou menm. Sa i vedir ki ou swazir pour pa met bann lobzektif e pour pa fer bann keksoz ki ou anvi, ki pa fer Zeova plezir. (Mat. 16:24) Alor ler ou ganny tante oubyen ler ou pe pas dan en sityasyon difisil, ou pa pou bezwen pran bokou letan pour reflesir ki pour fer. Ou pou’n fini deside ki ou pou fer e sa i pour reste fidel avek Zeova. Ou determinen pour fer Zeova plezir. Dan en sans, ou pou parey Zob. Menm si Zob ti pas dan bann gro difikilte, i ti dir: “Mon pou reste fidel!”—Zob 27:5. w24.03 9 ¶6-7

Zeova, sa “Bondye lanmour” i avek nou. (2 Kor. 13:11) I enterese avek sakenn parmi nou. Nou asire ki nou “antoure avek Son lanmour fidel.” (Ps. 32:10) Pli nou medit lo lafason ki I’n demontre lanmour anver nou, pli nou pou vwar ki kantite i kontan nou e sa pou fer nou vin pli pros avek li. Nou pou kapab koz avek li san okenn lafreyer e dir li ki kantite nou kontan li. Nou pou kapab koz avek li konsernan sa ki fer nou enkyet parski nou asire ki i konpran nou e i vreman anvi ed nou. (Ps. 145:19) Zis parey nou kontan asiz kot i annan lasaler ler i fer fre, sa lanmour ki Zeova i annan i fer nou kontan pour reste pros avek li. Sa lanmour ki Zeova i annan i vreman pwisan me i osi ranpli avek tandres. Alor ou kapab zwaye parski Zeova i kontan ou e nou tou nou kapab dir: “Mon kontan Zeova.”—Ps. 116:1. w24.01 31 ¶19-20

Zezi pa ti zis dir dimoun ki non Bondye i Zeova. Bann Zwif ki Zezi ti ansennyen ti deza konn non Bondye. Me Zezi i “sa enn ki’n fer nou konn [Zeova].” (Zan 1:17, 18) Par egzanp, Lekritir Ebre i montre ki Zeova i annan pitye ek konpasyon. (Egz. 34:5-7) Zezi ti fer nou konpran sa laverite pli byen ler i ti donn sa legzanp konsernan garson perdi ek son papa. Ler nou lir konsernan sa papa ki ler i vwar son garson ki’n repantir pe vini “ankor en bon pti zistans dan semen,” i tay kot li, may li, anbras li e pardonn li, sa i fer nou konpran pli byen lafason ki Zeova i pran pitye e demontre konpasyon. (Lik 15:11-32) Zezi ti fer lezot konn sa ki son Papa i vreman ete. w24.02 10 ¶8-9

Zeova i donn lafors ek rekonfor bann ki pe soufer. Nou osi nou kapab swiv legzanp Zeova par annan konpasyon e rekonfort lezot. Ki mannyer sa? En fason ki nou kapab fer sa, i par devlop bann kalite ki pou ed nou rekonfort lezot. Ki serten sa bann kalite? Kwa ki pou ed nou pour kontinyen kontan kanmarad e “kontinyen rekonfort kanmarad” toulezour? (1 Tesa. 4:18) Nou bezwen esey konpran e annan menm santiman avek kanmarad e osi demontre labonte. (Kol. 3:12; 1 Pyer 3:8) Ki mannyer sa pou ed nou? Ler nou annan konpasyon pour nou bann frer ek ser e nou vreman enterese avek zot, nou pou vreman anvi rekonfort zot ler zot pe soufer. Zezi ti dir: “Labous i koz sa ki deborde dan leker. En bon dimoun i dir bann bon keksoz, akoz son leker i ranpli avek bann bon keksoz.” (Mat. 12:34, 35) Ler nou rekonfort nou bann frer ek ser ki dan bezwen, sa i en fason enportan ki nou montre ki nou kontan zot. w23.11 10 ¶10-11

Pour nou konpran bann profesi ki dan Labib, nou bezwen demann led. Annou vwar en legzanp ki pou ed nou konpran akoz i enportan pour demann led. Meton ou pe vizit en landrwa ki ou pa konnen me en zanmi ki avek ou i konn sa landrwa byen. I konn egzakteman kote zot ete e kote sak semen i ale. San dout, ou kontan ki ou zanmi in dakor pour vin avek ou. Zeova i parey sa zanmi. I konnen ki letan ki nou pe viv ladan e ki pou arive dan lavenir. Alor, pour nou konpran bann profesi ki dan Labib, nou bezwen demontre limilite e demann Zeova son led. (Dan. 2:28; 2 Pyer 1:19, 20) Parey tou bon paran, Zeova i anvi ki son bann zanfan i annan en bon lavenir. (Zer. 29:11) Me Zeova i diferan avek bann paran imen parski i kapab dir nou ki pou arive dan lavenir e sa ki i dir i toultan ariv egzakteman parey i’n dir. I’n fer bann profesi ganny ekrir dan son Parol pour ki nou kapab konn konsernan bann levennman enportan avan ki zot arive.—Iza. 46:10. w23.08 8 ¶3-4