Septanm

Bondye in donn Zezi pouvwar pour rezourd tou problenm ki bann imen i annan. Ler Zezi ti fer bann mirak, i ti montre ki i kapab rezourd bann problenm ki nou pa pou zanmen kapab rezourd lo nou menm. Par egzanp, Zezi i annan sa pouvwar pour liber nou avek sours tou nou bann problenm, setadir pese ki nou’n erite avek Adan e tou sa ki arive akoz pese enkli maladi ek lanmor. (Mat. 9:1-6; Rom. 5:12, 18, 19) Bann mirak ki Zezi ti fer i montre ki Zezi i kapab geri “tou sort kalite” maladi e menm resisit bann dimoun mor. (Mat. 4:23; Zan 11:43, 44) Zezi i osi annan sa pouvwar pour kontrol bann gro tanpet e pour liber bann dimoun annan lenfliyans bann demon. (Mark 4:37-39; Lik 8:2) I vreman rekonfortan pour konnen ki Zeova in donn son Garson sa kalite pouvwar. Nou kapab asire ki bann bon keksoz ki Rwayonm Bondye pou anmennen pou vin vre. Bann mirak ki Zezi ti fer ler i ti lo later, i montre nou ki Zezi pou fer pour later antye konman Lerwa dan Rwayonm Bondye. w23.04 3 ¶5-7

Si ou dan en gran kongregasyon e ou santi ki souvandfwa ou pa ganny sans reponn, petet ou anvi aret fer zefor pour reponn. Me pa aret fer zefor pour reponn. Prepar plizyer larepons pour ou reponn pandan renyon. Koumsa si ou pa ganny sans reponn o konmansman sa letid, ou pou annan lezot loportinite pour reponn anmezir renyon i kontinyen. Ler ou pe prepare pour Letid Latour Veyer, reflesir lo ki mannyer sak paragraf i relye avek tenm sa lartik. Si ou fer sa, i tre probab ki ou pou kapab donn bann bon larepons tou dilon sa letid. Osi, ou kapab prepare pour donn en larepons pour bann paragraf ki koz lo bann laverite ki pli o profon, ki pli difisil pour eksplike. Akoz i byen pour ou fer sa? Parski i kapab ki i napa bokou dimoun ki lev zot lanmen pour reponn pour bann paragraf koumsa. Me ki ou pou fer si ou pa ganny loportinite pour reponn apre plizyer renyon? Avan renyon, dir sa frer ki pou kondwir sa letid ki kestyon ki ou ti pou kontan reponn. w23.04 21-22 ¶9-10

Zozef ti pare pour aplik bann lenstriksyon Zeova e sa ti fer li en pli bon msye. Dan omwen trwa fwa, i ti ganny bann lenstriksyon sorti kot Bondye konsernan son fanmir. Sak fwa i ti ganny lenstriksyon, i ti obei vitman menm ler i ti bezwen fer bann gran sanzman. (Mat. 1:20; 2:13-15, 19-21) Ler Zozef ti swiv lenstriksyon Bondye, Zozef ti protez Mari e pran swen avek Mari. Imazinen ki mannyer sa ki Zozef ti fer, ti fer Mari kontan li e annan plis respe pour li. Bann msye marye, ou kapab swiv legzanp Zozef par rod konsey dan Labib lo ki mannyer pour pran swen avek ou fanmir. Ler ou aplik sa konsey menm si sa i vedir ou bezwen fer bann sanzman, ou montre ki ou kontan ou madanm e ou fer ou maryaz vin pli for. En ser ki reste Vanuatu, ki’n marye pour plis ki 20 an, i dir: “Ler mon msye i rod gidans Zeova e i aplik li, sa i fer mwan annan plis respe pour li. Mon santi mwan an sekirite e mon annan konfyans ki i pou fer bann bon desizyon.” w23.05 21 ¶5

Bann Zwif ki ti pe kit Babilonn pour retourn Izrael ti pou vin “en pep sen” pour zot Bondye. (Det. 7:6) Me sa pa ti vedir ki zot pa ti pou bezwen fer bann sanzman pour fer plezir Zeova. Laplipar Zwif ki ti’n ne an Babilonn ti’n abitye avek fason panse ek standar bann Babilonnyen. Plizyer lannen apre ki sa premye group Zwif ti’n retourn Izrael, Gouverner Neemya ti sirprann pour aprann ki bann zanfan ki ti’n ne Izrael pa ti konn koz langaz bann Zwif. (Det. 6:6, 7; Nee. 13:23, 24) Ki mannyer sa bann zanfan ti pou kapab kontan Zeova e ador li si zot pa konpran Ebre, ki ti sa langaz prensipal ki Parol Bondye ti’n ganny ekrir ladan? (Ezra 10:3, 44) Alor sa bann Zwif ti pou bezwen fer bann gran sanzman. Me i ti pou pli fasil pour zot fer sa bann sanzman Izrael kot vre ladorasyon ti pe ptitapti ganny reetablir.—Nee. 8:8, 9. w23.05 15 ¶6-7

Malerezman, menm si nou anvi atenn nou lobzektif e nou fer tou sa ki nou kapab pour atenn sa lobzektif, parfwa i annan keksoz ki kapab arive ki fer li difisil pour atenn sa lobzektif. Par egzanp, bann “levennman san ekspekte” i kapab arive e sa i fer nou napa letan pour atenn nou lobzektif. (Ekle. 9:11) Nou kapab fer fas avek en problenm ki fer nou dekouraze e fer nou santi ki nou napa lafors. (Prov. 24:10) Vi ki nou enparfe, nou kapab fer bann fot ki fer li pli difisil pour nou atenn nou lobzektif. (Rom. 7:23) Ouswa i kapab ki nou zis fatige. (Mat. 26:43) Ki nou kapab fer ler en keksoz i arive ki fer li difisil pour nou atenn nou lobzektif? Rapel ki si en keksoz i arive ki anpes ou atenn ou lobzektif, sa pa vedir ki ou devret aret fer zefor pour atenn ou lobzektif. Labib i dir ki nou kapab pas dan problenm plizyer fwa. Me Labib i osi dir ki nou kapab kontinyen fer zefor pour atenn nou lobzektif. Ler ou kontinyen fer zefor pour atenn ou lobzektif, ou montre Zeova ki ou anvi fer li plezir. Zeova i kontan ler i vwar ou pe kontinyen fer zefor pour atenn ou lobzektif. w23.05 30 ¶14-15

En zenn frer ki fer pionye i aprann ki mannyer pour travay avek dimoun ki annan diferan personnalite. I osi ed li pour aprann ki mannyer pour servi byen son larzan e pour pa depans plis ki sa ki i annan. (Fili. 4:11-13) En bon fason pour konmans servis a plen tan i pour fer pionye asistan. Sa i ed zot pour prepare pour fer pionye ordiner. Ler zot fer pionye, sa i donn zot loportinite pour fer lezot form servis a plen tan, par egzanp pour servi lo en proze konstriksyon ki pour lorganizasyon Temwen Zeova oubyen servi konman en Betelit. Tou frer i devret annan sa lobzektif pour kalifye pour vin ansyen pour zot kapab ede dan kongregasyon. Labib i dir ki bann frer ki pe fer zefor pour kalifye pour vin ansyen, i “anvi fer en bon travay.” (1 Tim. 3:1) Premyerman, en frer i bezwen kalifye pour servi konman serviter kongregasyon. Bann serviter kongregasyon i ed bann ansyen dan diferan fason. Avek limilite, bann ansyen ek serviter kongregasyon i servi bann frer ek ser e zot anons sa bon nouvel avek devouman. w23.12 28 ¶14-16

Lerwa Zosya ti en adolesan ler i ti konmans rod Zeova. I ti anvi aprann konsernan Zeova e fer Son lavolonte. Me lavi pa ti fasil pour sa zenn lerwa. Sa letan laplipar dimoun ti pe ador bann fo bondye. Alor Zosya ti bezwen annan kouraz pour li kapab anpes zot fer sa e Zosya ti demontre kouraz. Avan menm ki Zosya ti annan 20 an, i ti’n konmans tir bann keksoz ki annan pour fer avek fo ladorasyon parmi pep Bondye. (2 Kron. 34:1-2) Menm si ou ankor byen zenn, ou kapab deside pour swiv legzanp Zosya par fer zefor pour aprann plis konsernan Zeova e lo Son bann zoli kalite. Sa pou fer ou anvi dedye ou lavi avek li. Ler ou dedye ou lavi avek Zeova, ki lefe sa pou annan lo ou? En frer ki apel Luke, ki ti batize ler i ti annan 14 an, i dir: “Depi sa moman, mon ti deside ki mon pou met Zeova premye dan mon lavi e mon pou esey fer li zwaye.” (Mark 12:30) Ou pou ganny bann benediksyon si ou osi ou anvi fer parey Luke! w23.09 11 ¶12-13

Ler zapot Pol ti ekri sa let pour bann Kretyen Tesalonik, i ti fer mwens ki enn an depi ki sa kongregasyon ti’n ganny formen. I tre probab ki bann zonm ki ti annan responsabilite dan sa kongregasyon ti napa leksperyans e i kapab ki zot ti fer fot. Kantmenm sa, zot ti merit respe. Anmezir ki gran ladetres i aprose, petet nou pou bezwen depan plis lo bann ansyen dan nou kongregasyon pour donn nou lenstriksyon. I kapab ki nou perdi kontak avek biro prensipal Temwen Zeova e sa biro brans ki responsab pour nou teritwar. Alor, i enportan pour nou aprann kontan e annan respe pour nou bann ansyen la konmela. Nenport kwa ki arive, annou kontinyen rezonn byen e pa konsantre lo defo ki bann ansyen i annan. Me konsantre lo lefet ki Zeova pe servi Zezi pour gid sa bann zonm fidel. Zis parey en kask i protez latet en solda, nou lespwar i protez nou fason panse. Nou konpran ki sa ki sa lemonn i ofer pa vo nanryen. (Fili. 3:8) Nou lespwar i ed nou pour reste kalm e pa panik. w23.06 11-12 ¶11-12

Bann ki tann lenvitasyon sa “madanm bet” i bezwen deside si zot pou aksepte sa lenvitasyon oubyen non. I annan bann bon rezon akoz nou devret evite fer bann aksyon ki annan pour fer avek imoralite seksyel. Sa “madanm bet” i dir: “Delo ki’n ganny vole i dou.” (Prov. 9:17) Ki i vedir “delo ki’n ganny vole”? Labib i konpar sèks ant en msye ek son madanm marye avek delo ki rafresir. (Prov. 5:15-18) En msye avek son madanm marye i ganny drwa fer sèks avek kanmarad. Me sa i diferan avek “delo ki’n ganny vole.” Sa i kapab pe refer avek relasyon seksyel ki pa apropriye. Souvandfwa sa i ariv an sekre, zis parey en voler i esey vol en keksoz an sekre. Sa “delo ki’n ganny vole” i kapab paret dou si sa bann ki enplike i krwar ki personn pa pou konnen ki zot in fer. Malerezman zot pe anbet zot lekor! Zeova i vwar tou. Napa nanryen ki pli anmer ki ler nou perdi laprouvasyon Zeova. Sa i pa en keksoz ki “dou.”—1 Kor. 6:9, 10. w23.06 22 ¶7-9

Ki ou pou fer si ou lapriyer in vin zis parey en routin ouswa ou nepli kontan predikasyon parey avan? Pa bezwen krwar ki ou’n perdi lespri sen Zeova. Ou en imen enparfe e ou santiman i kapab sanze tanzantan. Si ou nepli annan sa motivasyon pour fer bann keksoz spirityel parey avan, ou kapab medit lo legzanp zapot Pol. Menm si Pol ti esey swiv legzanp Zezi, i ti konnen ki parfwa i pa ti pou anvi fer sa ki i ti bezwen fer. Pol ti determinen pour akonpli son minister malgre sa ki i ti pe santi dan sa moman. Parey Pol, pa bezwen fer ou bann desizyon zis dapre sa ki ou pe santi. Ou bezwen determinen pour fer sa ki byen menm si ou pa anvi fer li. Si ou kontinyen fer sa ki byen menm si ou pa anvi, avek letan, ou santiman i kapab sanze.—1 Kor. 9:16. w24.03 11-12 ¶12-13

Nou kapab demontre lanmour anver bann frer ek ser par vin zanmi avek zot e pas letan avek zot. (2 Kor. 6:11-13) En kantite parmi nou i dan bann kongregasyon kot i annan bann frer ek ser ki diferan avek nou e ki annan diferan personnalite. Nou kapab devlop plis lanmour pour zot par konsantre lo zot bann bon kalite. Ler nou aprann pour vwar lezot parey Zeova i vwar zot, nou montre ki nou kontan zot. Pandan gran ladetres, i pou enportan ki nou annan lanmour pour nou bann frer ek ser. Ler gran ladetres i konmanse, ki mannyer Zeova pou protez nou? Annou vwar sa ki Zeova ti dir son pep pour fer ler lavil Babilonn ti ganny atake. I ti dir: “Ale, mon pep, antre dan ou bann lasanm anndan e ferm laport deryer ou. Kasyet ou pour en pti moman ziska ki mon lakoler in pase.” (Iza. 26:20) I paret ki nou osi, nou pou bezwen aplik sa bann lenstriksyon pandan gran ladetres. w23.07 6-7 ¶14-16

Annan en repitasyon konman en dimoun ki rezonnab. Ou kapab demann ou lekor: ‘Eski dimoun i konn mwan konman en dimoun ki rezonnab, ki pare pour sede e ki konpran lezot? Oubyen eski zot vwar mwan konman en dimoun ki strik, brit oubyen ki pa pare pour sede? Eski mon ekout lezot e fer sa ki zot ti ava kontan ler i posib?’ Pli nou rezonnab, pli nou pe swiv legzanp Zeova ek Zezi. Nou bezwen rezonnab ler nou sirkonstans i sanze. Sa bann sanzman i kapab anmenn bann problenm ki nou pa ti pe ekspekte. Par egzanp, i kapab ki en sel kou nou ganny en maladi grav oubyen i kapab ki dan sa pei kot nou reste i annan sanzman dan lekonomi ouswa dan gouvernman e sa i kapab fer nou lavi vreman difisil. (Ekle. 9:11) I kapab difisil pour nou si lorganizasyon Zeova i demann nou pour servi Zeova dan en lot fason oubyen dan en lot landrwa. Nou kapab adapte avek nou nouvo sirkonstans si nou fer sa kat keksoz ki swiv: (1) aksepte ki ou sityasyon in sanze, (2) olye mazin lo sa ki ou’n deza fer, mazin lo sa ki ou pou fer aprezan, (3) konsantre lo bann bon keksoz e (4) fer keksoz pour lezot. w23.07 21-22 ¶7-8

Profet Danyel ti ankor zenn ler bann Babilonnyen ti anmenn li konman en prizonnyen lwen avek Zerizalenm. Menm si Danyel ti ankor zenn, i ti enpresyonn bann zofisye Babilonnyen. Zot ti vwar ki Danyel ti en zoli garson e ki i ti sorti dan en fanmir enportan. (1 Sam. 16:7) Alor bann Babilonnyen ti donn Danyel formasyon pour li kapab servi dan pale Lerwa. (Dan. 1:3, 4, 6) Zeova ti kontan Danyel akoz sa kalite dimoun ki Danyel ti ete. Annefe, ler Zeova ti dir ki Danyel i parey Noe ek Zob, i kapab ki Danyel ti annan apepre 20 an. Alor, menm si Danyel ti ankor zenn, pour Zeova i ti en dimoun drwat parey Noe ek Zob, ki ti’n servi li fidelman pour bokou lannen. (Zen. 5:32; 6:9, 10; Zob 42:16, 17; Ezek. 14:14) Danyel ti viv lontan e Zeova ti kontinyen kontan li tou dilon son lavi.—Dan. 10:11, 19. w23.08 2 ¶1-2

Ler ou pe deside si ou pou aste en lakaz, ou ti pou anvi egzamin pour ou menm tou detay konsernan sa lakaz. Nou kapab fer en keksoz en pe parey ler nou lir e etidye Labib. Si ou lir Labib vitman, petet ou pou zis aprann bann keksoz de baz setadir “bann keksoz elemanter dan parol sakre Bondye.” (Ebr. 5:12) Me parey sa lakaz, ou bezwen etidye Labib pour vwar bann detay enportan. En bon fason pour etidye Labib i pour vwar lafason ki bann diferan porsyon dan Labib i relye avek kanmarad. Fer zefor pour konpran sa bann laverite ki ou krwar ladan e pour konpran akoz ou krwar dan sa bann laverite. Pour nou konpran Parol Bondye, nou bezwen etidye o profon bann laverite ki dan Labib. Zapot Pol ti ankouraz bann frer ek ser pour etidye Parol Bondye o profon pour zot kapab “konpran konpletman larzer, longer, oter ek profonder” laverite. Sa ti pou fer ki zot ti pou “anrasinen e byen etabli” dan laverite. (Efe. 3:14-19) Nou osi nou bezwen fer parey. w23.10 18 ¶1-3

Dan Labib, i annan legzanp bann dimoun ki ti demontre pasyans. Petet ou kapab etidye sa bann legzanp. Par egzanp, menm si David ti ganny swazir pour vin lerwa Izrael ler i ti ankor zenn, i ti bezwen esper plizyer lannen avan i vin lerwa. Simeon ek Ann ti kontinyen servi Zeova fidelman anmezir ki zot ti esper sa Mesi ki ti’n ganny promet. (Lik 2:25, 36-38) Anmezir ki ou etidye bann resi koumsa, rod larepons pour sa bann kestyon swivan: Kwa ki ti ed sa dimoun pour demontre pasyans? Ki byenfe i ti gannyen ler i ti demontre pasyans? Ki mannyer mon kapab swiv son legzanp? Ou kapab osi ganny bann byenfe par etidye bann resi konsernan bann ki pa ti demontre pasyans. (1 Sam. 13:8-14) Ou kapab demann ou lekor: ‘Kwa ki’n fer zot pa demontre pasyans? Ki ti arive ler zot pa ti demontre pasyans?’ w23.08 25 ¶15

Zapot Pyer ti fidel setadir ki i pa ti les nanryen fer li aret swiv Zezi. I ti montre ki i fidel en fwa ler Zezi ti dir en keksoz ki bann disip pa ti konpran. (Zan 6:68) En kantite disip ti aret swiv Zezi san esper leksplikasyon. Me Pyer pa ti fer parey. I ti fidel avek Zezi e i ti dir ki zis Zezi ki “annan parol lavi eternel.” Zezi ti konnen ki Pyer ek lezot zapot ti pou abandonn li. Kantmenm sa, Zezi ti dir Pyer ki i asire ki Pyer ti pou retournen e reste fidel. (Lik 22:31, 32) Zezi ti konnen ki “lespri i anvi fer sa ki byen, me lekor enparfe i feb.” (Mark 14:38) Alor, menm si Pyer ti dir ki i pa ti konn Zezi, Zezi pa ti abandonn son zapot. Apre ki Zezi ti’n resisite, i ti aparet avek Pyer ler Pyer ti li tousel. (Mark 16:7; Lik 24:34; 1 Kor. 15:5) Mazin lo ki kantite sa ti ankouraz Pyer ki ti sagren akoz sa ki i ti’n fer! w23.09 22 ¶9-10

Bondye i pardonn oubyen kouver pese bann ki met lafwa dan li. I pardonn zot konpletman e i pa pran kont zot pese. (Ps. 32:1, 2) Bondye i konsider sa bann dimoun san defo e drwat parski zot annan lafwa dan li. Menm si Abraam, David ek lezot serviter fidel Bondye ti ganny konsidere konman bann dimoun drwat, zot ti bann dimoun ki ti fer pese. Me Bondye ti konsider zot konman san defo parski zot ti annan lafwa dan li, sa i lekontrer avek bann ki ti napa lafwa dan li. (Efe. 2:12) Dan let ki zapot Pol ti ekri pour bann Romen, i ti eksplike ki nou bezwen annan lafwa pour nou kapab vin zanmi Bondye. Abraam ek David ti zanmi Bondye parski zot ti annan lafwa dan li. Nou osi nou kapab vin zanmi Bondye si nou annan lafwa dan Bondye. w23.12 3 ¶6-7

Ozordi, tou Kretyen i annan sa privilez pour ofer bann sakrifis pour Zeova. Zot fer sa par servi zot letan, lenerzi ek zot bann keksoz materyel pour servi Bondye. Nou kapab montre ki nou apresye sa privilez ki nou annan pour ador Zeova par donn li nou meyer dan nou servis. Zapot Pol ti koz konsernan bann keksoz ki nou devret toultan fer dan nou ladorasyon pour Zeova. (Ebr. 10:22-25) Sa i enkli koz avek Zeova dan lapriyer, anons sa bon nouvel avek lezot, rasanble ansanm konman en kongregasyon e ankouraz kanmarad “plis ankor la ki [nou] vwar zour [Zeova] pe aprose.” Ver lafen liv Revelasyon, lanz Zeova ti dir: “Ador Bondye!” (Rev. 19:10; 22:9) I ti dir sa de fwa pour montre ki i vreman enportan pour fer sa. Annou pa zanmen oubliy sa laverite profon ki nou’n aprann konsernan gran tanp spirityel Zeova e konsernan sa privilez ki nou annan pour ador nou Bondye! w23.10 29 ¶17-18

Nou tou nou anvi “kontinyen kontan kanmarad.” Me i enportan ki nou gard antet ki Zezi ti dir ki “lanmour lamazorite dimoun pou diminyen.” (Mat. 24:12) Zezi pa ti pe dir ki laplipar son bann disip ti pou arete kontan kanmarad. Vi ki laplipar dimoun dan sa lemonn pa demontre lanmour, nou bezwen fer atansyon ki sa latitid pa annan en lefe lo lafason ki nou tret kanmarad. Avek sa nide antet, aprezan annou vwar en kestyon enportan: Kwa ki pou ed nou konnen si nou lanmour pour nou bann frer ek ser i ankor for? En fason pour nou konnen si nou lanmour pour nou bann frer ek ser i ankor for, i par egzamin lafason ki nou azir dan serten sityasyon. (2 Kor. 8:8) Zapot Pyer ti mansyonn en sityasyon. I ti dir: “Avan tou, zot devret kontan kanmarad en kantite, parski lanmour i kouver en kantite pese.” (1 Pyer 4:8) Alor sa ki nou fer ler nou frer oubyen ser i fer en fot oubyen fer en keksoz ki bles nou santiman, pou ed nou konnen si nou lanmour pour zot i ankor for. w23.11 10-11 ¶12-13

Nou pa kapab obei komannman Zezi konsernan lanmour si nou kontan zis serten dan kongregasyon me pa tou dimoun. I vre ki parfwa, nou kapab santi nou pli pros avek serten parey i ti osi leka avek Zezi. (Zan 13:23; 20:2) Me zapot Pyer i rapel nou ki nou devret fer zefor pour kontan kanmarad parey bann frer ek ser, andotmo parey en fanmir. (1 Pyer 2:17) Pyer i demann nou pour “kontan kanmarad en kantite avek tou [nou] leker.” (1 Pyer 1:22) Dan sa konteks, kontan “en kantite” i vedir ki nou agrandi sa lanmour ki nou ti pou normalman annan. Par egzanp, ki nou pou fer si en frer oubyen en ser in ofans oubyen bles nou? Petet nou ti pou anvi rann mal pour mal dan plas demontre lanmour. Pyer ti aprann avek Zezi ki ler nou rann mal pour mal, sa pa fer plezir Bondye. (Zan 18:10, 11) Pyer ti ekri: “Pa rann mal pour mal, lensilt pour lensilt, me plito, fer dibyen pour zot.” (1 Pyer 3:9) Si nou kontan kanmarad en kantite, sa pou fer nou demontre labonte ek konpasyon. w23.09 28-29 ¶9-11

Nou kontan pour vwar lafason ki en zanfan i grandi pour vin en adilt. I kapab paret ki sa zanfan i grandi san ki i bezwen fer okenn zefor. De lot kote, nou bezwen fer zefor si nou anvi vin en Kretyen matir. (1 Kor. 13:11; Ebr. 6:1) Pour nou kapab fer sa, nou bezwen annan en bon lanmitye avek Zeova. Nou osi bezwen led lespri sen Bondye pour nou kapab devlop bann kalite ki fer Bondye plezir, pour devlop bann abilite e pour prepar nou pour bann responsabilite ki nou kapab annan dan lavenir. (Prov. 1:5) Ler Zeova ti kree bann imen, i ti kree zonm ek fanm. (Zen. 1:27) I kler ki fizikman, bann zonm ek fanm i diferan avek kanmarad me i annan lezot fason ki zot diferan. Par egzanp, Zeova ti kree zonm ek fanm pour zot annan diferan responsabilite. Sa i fer ki zot bezwen bann kalite ek abilite ki pou ed zot desarz sa bann responsabilite.—Zen. 2:18. w23.12 18 ¶1-2

Eski Zezi ti anvi ki lezot i servi non son Papa? I kapab ki serten sef relizye sa letan ti krwar ki i en mank respe pour mansyonn non Bondye. Me Zezi pa ti les sa bann tradisyon ki pa baze lo Labib anpes li onor non son Papa. Annou vwar sa resi konsernan ler Zezi ti tir demon dan en zonm dan rezyon Zerazenyen. Sa ti fer bann dimoun per e zot ti sipliy Zezi pour li ale. Alor Zezi ti kit sa rezyon. (Mark 5:16, 17) Kantmenm sa, Zezi ti anvi ki dimoun dan sa rezyon i konn non Zeova. Alor Zezi ti dir sa zonm ki in geri al dir dimoun sa ki Zeova in fer pour li e non pa sa ki li Zezi in fer. (Mark 5:19) Zezi i anvi ki nou fer tou dimoun dan lemonn antye konn non son Papa. (Mat. 24:14; 28:20) Ler nou fer sa, nou fer nou Lerwa Zezi plezir. w24.02 10 ¶10

I en gran benediksyon pour form parti lorganizasyon Zeova pandan sa bann dernyen zour ki vreman difisil. Lavi dan sa lemonn pe vin deplizanpli difisil me Zeova i donn nou en fanmir spirityel ki ini pour ed nou. (Ps. 133:1) Zeova i osi ed nou pour annan en lavi fanmir ki ere. (Efe. 5:33–6:1) Osi, Zeova i donn nou lasazes ki nou bezwen pour nou kapab fer fas avek lenkyetid e pour nou zwaye. Nou bezwen fer bokou zefor pour kontinyen servi Zeova fidelman. Akoz? Parski parfwa nou kapab ankoler akoz sa ki lezot in dir oubyen fer. Nou kapab osi santi nou dekouraze ler nou fer fot sirtou ler nou kontinyen repet menm fot. Nou bezwen kontinyen servi Zeova (1) ler en frer oubyen en ser i ofans nou, (2) ler nou konzwen i dezapwent nou e (3) ler nou dekouraze akoz bann fot ki nou fer. w24.03 14 ¶1-2

Tanzantan ou pou tann leksperyans bann frer ek ser ki’n deside pour fer plis dan zot servis pour Zeova. Petet zot in asiste Lekol pour bann predikater Rwayonm oubyen zot in al servi dan en landrwa kot i annan bezwen pour plis proklanmater. Si ou sirkonstans i permet ou pour fer en keksoz parey, sa i en bon lobzektif pour ou annan. Bann serviter Zeova i vreman anvi fer plis pour Zeova. (Akt 16:9) Me ki ou pou fer si ou sirkonstans pa permet ou pour fer plis? Pa bezwen krwar ki ou pli enferyer ki bann ki kapab fer plis pour Zeova. Sa ki pli enportan i ki ou kontinyen andire. (Mat. 10:22) Pa oubliye ki ou fer Zeova vreman kontan ler ou servi li dapre ou abilite ek sirkonstans. Sa i en fason enportan ki ou kapab kontinyen swiv Zezi apre ki ou’n batize.—Ps. 26:1. w24.03 10 ¶11

Nou Papa ki dan lesyel i promet pour pardonn nou si nou repantir pour nou bann pese. (Ps. 86:5) Alor si nou vreman regrete pour bann fot ki nou’n fer, nou kapab annan konfyans ki sa ki Zeova in dir, i vre e ki i’n pardonn nou. Rapel ki Zeova i rezonnab. I pa zanmen demann nou pour fer plis ki sa ki nou kapab. I apresye tou sa ki nou pe fer pour li, tan ki nou donn nou meyer. Osi, nou kapab reflesir lo legzanp bann dimoun dan Labib ki ti servi Zeova avek tou zot leker. Par egzanp, reflesir lo legzanp zapot Pol. Pour plizyer lannen, i ti travay vreman dir e i ti vwayaz plizyer kilomet e i ti etabli plizyer kongregasyon. Me ler keksoz ti sanze dan son lavi e i pa ti kapab fer otan dan predikasyon parey i ti fer oparavan, eski sa i vedir ki i ti nepli annan laprouvasyon Bondye? Non. I ti kontinyen fer sa ki i ti kapab e Zeova ti beni li. (Akt 28:30, 31) Pareyman, sa ki nou kapab donn Zeova i kapab sanze parfwa. Me sa ki enportan pour Zeova, i nou motivasyon. w24.03 27 ¶7, 9

Zezi in kit en legzanp pour son bann disip atraver lapriyer ki i ti fer. Ler Zezi ti lo later, i ti souvan priye. I ti bezwen fer letan pour priye parski souvandfwa i ti annan en kantite keksoz pour fer e i ti annan en kantite dimoun avek li. (Mark 6:31, 45, 46) I ti lev granmaten pour li kapab li tousel pour li priye. En fwa, i ti priye tou lannwit avan ki i ti fer en desizyon enportan. (Lik 6:12, 13) Zezi ti priye plizyer fwa sa zour swar avan i ti mor, zis avan ki i ti konplet sa parti pli difisil dan son minister. (Mat. 26:39, 42, 44) Legzanp Zezi i montre nou ki menm si nou bizi, nou bezwen fer letan pour priye. Parey Zezi, i kapab ki nou pou bezwen plàn kan ki nou pou fer lapriyer. Petet nou pou bezwen lev boner oubyen dormi en pti pe pli tar aswar pour nou kapab fer lapriyer. Ler nou fer sa, nou montre Zeova ki nou apresye sa zoli kado. w23.05 3 ¶4-5

Remark sa mo “ranpli” dan nou teks pour ozordi. En liv referans i konpar lanmour Bondye avek en larivyer. Pa sa i montre ki kantite Zeova i kontan bann Kretyen swazir! Sa bann Kretyen i konnen ki ‘Bondye i kontan’ zot. (Zid 1) Zapot Zan ti montre ki mannyer sa i fer zot santi ler i ti dir: “Gete ki kantite nou Papa in kontan nou! Sanmenm i’n swazir nou konman son zanfan.” (1 Zan 3:1) Me eski Zeova i kontan zis bann Kretyen swazir? Non, Zeova in montre ki i kontan nou tou. Ki sa pli gran fason ki Zeova in montre ki i kontan nou? Sa i atraver sa ranson. Par sa, Zeova in demontre plis lanmour ki okenn dimoun in deza demontre.—Zan 3:16; Rom. 5:8. w24.01 28 ¶9-10

Dan nou verse pour lazournen nou vwar en keksoz ki ti ed David sirmont son lafreyer. Menm si son lavi ti an danze, i ti medit lo sa ki Zeova pou fer pour li dan lavenir. David ti konnen ki Zeova ti pou sov li dan sa bon moman. Apre tou, Zeova ti’n dir ki David ti pou vin prosen lerwa Izrael. (1 Sam. 16:1, 13) David ti konnen ki nenport keksoz ki Zeova i promet pou vin vre. Ki Zeova in promet pour fer pour ou? Nou pa ekspekte ki Zeova i protez nou kont tou problenm. Me nenport problenm ki ou fer fas avek dan sa lemonn, Zeova pou tir sa bann problenm dan nouvo lemonn. (Iza. 25:7-9) Nou asire ki nou Kreater i for e i pou kapab resisit bann dimoun ki’n mor, geri nou e detri tou bann ki opoz nou.—1 Zan 4:4. w24.01 6 ¶12-13

Reflesir lo akoz ou ti dedye ou lavi avek Zeova e batize. Ou ti fer sa bann keksoz parski ou ti anvi pran kote avek Zeova. Esey rapel kwa ki ti fer ou asire ki ou’n trouv laverite. Ler ou ti aprann konn Zeova, sa ti fer ou konmans annan respe ek lanmour pour li e ou ti vwar li konman ou Papa ki dan lesyel. Ou ti devlop lafwa e ou ti anvi repantir. Ou ti aret fer bann keksoz ki Zeova pa kontan e ou ti konmans fer bann keksoz ki fer li plezir. Ou ti santi ou pli mye ler ou ti realize ki Bondye in pardonn ou. (Ps. 32:2) Ou ti asiste bann renyon e ou ti konmans partaz avek lezot bann zoli keksoz ki ou ti’n aprann. Konman en Kretyen ki’n dedye son lavi avek Zeova e batize, aprezan ou pe mars lo sa semen ki anmenn ver lavi e ou pou fer ou mye pour kontinyen mars lo sa semen. (Mat. 7:13, 14) Ou bezwen reste ferm, toultan kontinyen kontan Zeova e obei son bann lalwa. w23.07 17 ¶14; 19 ¶19

Ler ou reflesir lo ou lapriyer pour dedye ou lavi avek Zeova, sa pou donn ou lafors pour reziste tantasyon. Par egzanp, eski ou pou konmans flirt avek konzwen en lot dimoun? Non! Parski ou’n fini promet Zeova ki ou pa pou zanmen fer en keksoz koumsa. Si ou pa les bann santiman ki pa apropriye devlope dan ou, sa pou fer ki ou pa pou trouv ou dan en sityasyon kot ou pe lager pour debaras ou avek sa bann santiman. Ou pa pou vwar ou lo “santye bann move dimoun.” (Prov. 4:14, 15) Ler ou reflesir lo lafason ki Zezi ti fer plezir son Papa, deswit ou pou rezet okenn keksoz ki ou konnen pa pou fer plezir sa Bondye ki ou’n dedye ou lavi avek. (Mat. 4:10; Zan 8:29) Bann problenm ek tantasyon ki ou fer fas avek i donn ou sa loportinite pour montre ki ou anvi kontinyen swiv Zezi. Ou kapab asire ki Zeova pou ed ou pour kontinyen fer sa. w24.03 9-10 ¶8-10