Zilyet

Zezi ti reflekte fason panse ek santiman son Papa dan en fason parfe dan tou sa ki i ti dir e fer e sa i enkli ler i ti fer bann mirak. (Zan 14:9) Ki nou kapab aprann avek bann mirak ki Zezi ti fer? Zezi ek son Papa i vreman kontan nou. Ler Zezi ti lo later, i ti montre ki kantite i kontan dimoun par servi son pouvwar pour ed bann ki ti pe soufer. En fwa, de zonm aveg ti sipliy li pour ed zot. (Mat. 20:30-34) Remarke ki “leker Zezi ti fermal” e apre i ti geri zot. Dapre sa konteks, sa mo Ebre ki’n ganny tradwir “leker Zezi ti fermal” i refer avek konpasyon ki en santiman vreman for. En fason ki Zezi ti demontre lanmour i par demontre konpasyon. Sa kalite konpasyon ti osi motiv Zezi pour donn manze bann ki lafen e geri en dimoun ki ti annan lalep. (Mat. 15:32; Mark 1:41) Nou kapab asire ki Zeova, sa Bondye ki demontre “tandres ek konpasyon” ek son Garson i kontan nou e zot leker i fermal ler nou soufer. (Lik 1:78; 1 Pyer 5:7) Zot vreman anvi tir tou bann problenm ki fer imen soufer. w23.04 3 ¶4-5

Nou kapab fer nou mye pour evite lir e ekout bann nide ki popiler dan lemonn Satan e ki move. O kontrer, nou kapab lir e etidye Labib parski sa pou ed nou mazin bann bon keksoz. Ler nou asiste renyon e fer predikasyon, sa pou osi protez nou fason panse. An retour, Zeova i promet ki i pa pou les nou ganny tante plis ki nou kapab siporte. (1 Kor. 10:12, 13) Pandan sa bann dernyen zour, nou tou nou bezwen priy Zeova plis ankor pour nou kapab reste fidel. Zeova i anvi ki nou ‘devid nou leker avek li.’ (Ps. 62:8) Loue Zeova e remersye li pour tou sa ki i fer. Demann li pour ed ou annan kouraz dan predikasyon. Sipliy li pour ed ou pour andire ler ou annan problenm e pour ed ou reziste tantasyon. Pa les nanryen e pa les personn anpes ou koz avek Zeova dan lapriyer toulezour. w23.05 7 ¶17-18

Akoz nou asiste renyon? Sa rezon prensipal i pour nou loue Zeova. (Ps. 26:12; 111:1) Nou osi asiste renyon pour nou kapab ankouraz kanmarad pandan sa bann moman difisil. (1 Tesa. 5:11) Ler nou donn en larepons pandan renyon, nou pe loue Zeova e nou pe ankouraz kanmarad. Me i annan de keksoz ki kapab fer li difisil pour nou reponn pandan renyon. I kapab ki nou per pour reponn. Oubyen i kapab ki nou anvi donn plis larepons me parfwa sa frer ki pe kondwir sa parti renyon pa donn nou ankor loportinite pour reponn. Kwa ki kapab ed nou? Zapot Pol ti dir ki nou devret “ankouraz kanmarad.” Ler nou gard antet ki menm en pti larepons ki nou donnen pour demontre nou lafwa, i kapab ankouraz lezot, sa pou fer nou pa santi nou tro per pour lev nou lanmen pour reponn. Menm si nou pa ganny sa loportinite pour reponn souvan, nou kontan ki lezot dan kongregasyon i annan sa loportinite pour reponn.—1 Pyer 3:8. w23.04 20 ¶1-3

Lerwa ti’n fer en lanons! Bann Zwif ki ti an egzil Babilonn pour apepre 70 an, ti lib pour retourn dan zot pei Izrael. (Ezra 1:2-4) Zis Zeova ki ti’n kapab fer en keksoz koumsa! Parski normalman Babilonn pa ti larg son prizonnyen. (Iza. 14:4, 17) Me i ti annan en pei ki ti’n ranport laviktwar lo Babilonn e sa nouvo lerwa ti dir bann Zwif ki zot ti kapab kit sa pei. Tou Zwif, sirtou bann sef fanmir, ti bezwen deside si zot ti pou kit Babilonn oubyen si zot ti pou reste Babilonn. I kapab ki sa pa ti en desizyon fasil pour fer. I kapab ki serten ti tro vye pour fer sa gran vwayaz pour retourn Izrael. Vi ki laplipar bann Zwif ti’n ne Babilonn, zot pa ti’n zanmen reste okenn landrwa apard Babilonn. Pour zot, Izrael ti pei zot bann zanset. I paret ki serten Zwif ti’n vin ris ler zot ti Babilonn. Alor i kapab ki zot ti vwar li difisil pour kit zot lakour ki ti konfortab oubyen zot biznes, pour al reste dan en landrwa ki zot pa ti konnen. w23.05 14 ¶1-2

Parol Bondye i ankouraz nou pour kontinyen devlop landirans, konpasyon ek lanmour. Lik 21:19 i dir: “Si zot andire, zot pou sov zot lavi.” Kolosyen 3:12 i dir: “Demontre . . . konpasyon.” 1 Tesalonisyen 4:9, 10 i dir: “Bondye in ansenny zot pour kontan kanmarad. . . . Me nou sipliy zot mon bann frer, pour kontinyen fer li plis ankor.” Tou sa bann verse ti ganny ekrir pour bann disip ki ti pe deza demontre landirans, konpasyon ek lanmour. Kantmenm sa, zot ti bezwen kontinyen demontre sa bann kalite. Nou osi nou devret fer parey. Pour ed ou fer sa, vwar ki mannyer bann Kretyen dan premye syek ti demontre sa bann kalite. Apre sa, ou pou vwar ki mannyer ou kapab swiv legzanp sa bann disip e montre ki ou pare pour gran ladetres. Koumsa ler gran ladetres i konmanse, ou pou’n aprann ki mannyer pour andire e ou pou determinen pour kontinyen andire. w23.07 3 ¶4, 8

Ki swa nou en Kretyen swazir oubyen nou form parti “lezot mouton,” nou tou nou bezwen reste lo sa “Semen Sen.” (Zan 10:16) Sa pou ed nou pour kontinyen servi Zeova la konmela e dan lavenir ler Rwayonm Bondye pou anmenn bann benediksyon pour later. Depi 1919, plizyer milyon msye, madanm ek zanfan in kit Gran Babilonn, setadir tou fo larelizyon e zot in konmans mars lo sa gran semen senbolik. Ler bann Zwif ti kit Babilonn, Zeova ti fer sir ki tou lobstak i ganny tire dan zot semen. (Iza. 57:14) Me eski i annan en “Semen Sen” dan nou letan? Pour plizyer santenn lannen avan 1919, Zeova ti servi bann zonm ki ti annan en gran respe pour li pour prepar semen pour ki bann dimoun i kapab sorti dan Gran Babilonn. (Konpar Izai 40:3.) Zot ti prepare pour ki pli tar bann dimoun senser i kapab kit fo larelizyon e ador Zeova ansanm avek Son pep. w23.05 15-16 ¶8-9

Zeova i anvi nou servi li avek lazwa e akoz nou anvi. (2 Kor. 9:7) Alor, eski nou devret kontinyen fer zefor pour atenn en lobzektif spirityel menm si nou pa anvi? Annou vwar legzanp zapot Pol. I ti dir: “Mon tret mon lekor dir e mon kontrol li parey en lesklav.” (1 Kor. 9:25-27) Zapot Pol ti fors son lekor pour fer sa ki byen menm ler i pa ti anvi. Eski Zeova ti kontan sa ki zapot Pol ti fer pour li? Wi. Zeova ti rekonpans li pour son bann zefor. (2 Tim. 4:7, 8) Zeova i kontan ler i vwar nou pe fer zefor pour atenn en lobzektif menm ler nou pa anvi. I kontan parski i konnen ki menm si nou pa kontan sa keksoz ki nou pe fer, nou pe fer sa keksoz parski nou kontan li. Zis parey Zeova ti rekonpans Pol, i pou rekonpans nou pour nou zefor. (Ps. 126:5) Anmezir ki nou vwar lafason ki Zeova pe rekonpans nou, sa i kapab fer nou konmans anvi atenn nou lobzektif. w23.05 29 ¶9-10

Zapot Pol ti dir ki bann ki pa pou sirviv zour Zeova i parey bann dimoun ki pe dormi. Zot pa konnen ki pe arive otour zot oubyen zot pa konnen ki letan pe pase. Alor, zot pa konnen ler en keksoz enportan pe arive otour zot e zot pa kapab reazir. Ozordi laplipar dimoun i parey bann dimoun ki pe dormi. (Rom. 11:8) Zot pa krwar dan bann levidans ki montre ki nou pe viv dan “bann dernyen zour” e ki byento gran ladetres pou konmanse. (2 Pyer 3:3, 4) Me nou, nou rekonnet ki avek sak zour ki pase, i enportan pour nou reste eveye. (1 Tesa. 5:6) Alor nou bezwen reste kalm e pa panik. Akoz? Pour ki nou pa mel dan bann problenm sosyal ek politik. Anmezir ki zour Zeova i aprose, i pou annan plis presyon pour nou pran kote dan bann problenm sa lemonn. Kantmenm sa, nou pa bezwen trakase konsernan ki mannyer nou pou reazir. Lespri sen Bondye i kapab ed nou pour reste kalm e pa panik e pour fer bann desizyon ki saz.—Lik 12:11, 12. w23.06 10 ¶6-7

Kwa ki vin dan ou lespri ler ou tann sa non Sanmson? I tre probab ki ou mazin en zonm ki vreman for. I vre ki Sanmson ti for me i ti fer en move desizyon ki ti fer li soufer en kantite. Kantmenm sa, Zeova ti konsantre lo tou sa ki Sanmson ti’n fer pour servi li e Zeova in fer ki legzanp Sanmson in ganny ekrir dan Labib pour nou byenfe. Zeova ti servi Sanmson pour fer bann gran keksoz pour ed bann Izraelit, ki ti Son pep. Plizyer santenn lannen apre ki Sanmson ti’n mor, Zeova ti fer zapot Pol ekri non Sanmson dan lalis bann zonm fidel. (Ebr. 11:32-34) Legzanp Sanmson i kapab ankouraz nou. I ti depan lo Zeova menm pandan bann moman difisil. Atraver legzanp Sanmson nou kapab aprann bann leson enportan e son legzanp i osi kapab ankouraz nou. w23.09 2 ¶1-2

Nou kapab devlop plis landirans par koz avek Zeova dan lapriyer e dir li konsernan tou sa ki pe fatig nou. (1 Tesa. 5:17) Petet an se moman ou pa pe fer fas avek en problenm grav. Kantmenm sa, eski ou rod gidans Zeova ler ou ankoler, ou konfize oubyen ou pa konnen ki ou pou fer? Si depi la konmela, ou demann Zeova led pour fer fas avek bann pti problenm, ou pa pou ezite pour demann li led ler ou fer fas avek bann pli gro problenm dan lavenir. Ou pa pou ezite parski ou pou asire ki Zeova i konn egzakteman kan ki i pou ed ou e ki mannyer i pou fer li. (Ps. 27:1, 3) Si depi ozordi nou reste fidel avek Zeova ler nou annan problenm, i tre probab ki pandan gran ladetres nou pou reste fidel avek Zeova. (Rom. 5:3) Akoz nou dir sa? En kantite frer ek ser in vwar ki sak fwa zot in reisi fer fas avek en problenm, sa in ed zot pour fer fas avek en lot problenm ki swiv. Avek led Zeova, zot in andire e sa in fer zot annan plis lafwa ki Zeova i anvi ed zot. Sa lafwa ki zot annan dan Zeova i ed zot pour andir sa lot problenm ki vini.—Zak 1:2-4. w23.07 3 ¶7-8

Zeova i annan limilite ek konpasyon e sa i fer li rezonnab. Par egzanp, nou kapab vwar ki Zeova ti annan limilite dan sa resi konsernan ler i ti pe al detri bann move dimoun Sodonm. Atraver son bann lanz, Zeova ti dir Lot, ki ti en zonm drwat, sov dan montanny. Lot ti per pour al laba alor i ti sipliy Zeova pour les li ek son fanmir al dan en lavil ki ti apel Zoar. Zoar ti en pti lavil ki Zeova ti’n deside pour detri. Zeova ti’n kapab ensiste ki Lot i fer egzakteman sa ki i’n demann li pour fer. Me i ti les Lot al Zoar e i pa ti detri sa lavil. (Zen. 19:18-22) Plizyer syek pli tar, Zeova ti demontre konpasyon anver bann zabitan Niniv. I ti anvoy profet Zonas pour dir bann move dimoun Niniv ki zot ti pou ganny detrir ansanm avek zot lavil. Me ler bann dimoun Niniv ti repantir, Zeova ti pran lapenn pour zot e i pa ti detri lavil Niniv.—Zon. 3:1, 10; 4:10, 11. w23.07 21 ¶5

Ki nou kapab aprann avek sa ki ti arive avek Zeoas? Zeoas ti parey en pye dibwa ki son rasin pa’n al dan fon e ki bezwen ganny apiye avek en dibwa. Zeoada ti parey sa dibwa ki ti pe siport Zeoas. Ler Zeoada ti mor, Zeoas ti konmans ekout bann aposta e i pa ti reste fidel avek Zeova. Sa legzanp i montre ki nou pa devret obei Zeova zis akoz nou fanmir ek lezot dan kongregasyon pe fer li e zot pe kit en bon legzanp pour nou. Pour nou reste pros avek Zeova, nou bezwen devlop plis lanmour ek respe pour li par etidye son Parol regilyerman, medite e fer lapriyer. (Zer. 17:7, 8; Kol. 2:6, 7) Zeova pa demann nou pour fer en kantite keksoz pour nou kapab fer li plezir. Sa ki Zeova i demann nou pour fer i ganny dekrir dan Eklezyast 12:13 ki dir: “Annan en gran respe pour sa vre Bondye e obei son bann komannman, sanmenm tou ki en dimoun i devret fer.” Ler nou annan en gran respe pour Zeova, nou pou kapab fer fas avek okenn difikilte ki nou rankontre dan lavenir e nou pou reste fidel avek Zeova. Nanryen pa pou kapab gat nou lanmitye avek Zeova. w23.06 19 ¶17-19

O konmansman verse 5 nou lir: “Sa Enn ki ti pe asiz lo tronn ti dir.” (Rev. 21:5a) Sa bann parol i spesyal parski i enn parmi sa trwa fwa ki Zeova li menm i koze dan liv Revelasyon. Alor i pa ni en lanz, ni menm Zezi ki’n donn sa garanti me i Zeova li menm. Sa i fer ki nou kapab annan konfyans dan sa ki Zeova i dir apre. Akoz? Parski Zeova “pa kapab koz manti.” (Tit 1:2) Sa i fer nou annan konfyans dan sa ki Revelasyon 21:5, 6 i dir. Sa term Grek ki’n ganny tradwir “gete” i ganny servi plizyer fwa dan liv Revelasyon. Ki Bondye i dir apre? I dir: “Mon pe fer tou keksoz nef.” Zeova pe koz lo bann sanzman ki i pou fer dan lavenir. Me vi ki i asire ki i pou gard son promes, i koz lo sa bann sanzman konmsi i pe fer li.—Iza. 46:10. w23.11 3-4 ¶7-8

Zapot Pyer ti pe lager avek son bann febles. Annou vwar serten legzanp. Ler Zezi ti eksplik lafason ki i ti pou soufer e mor zis parey Lekritir ti’n predir, Pyer ti dir Zezi ki sa pa ti pou arive. (Mark 8:31-33) Plizyer fwa, Pyer ek lezot zapot ti argimante konsernan lekel ki pli gran parmi zot. (Mark 9:33, 34) Sa zour swar avan Zezi ti mor, Pyer ti atak en zonm e koup son zorey. (Zan 18:10) Sa menm zour swar, Pyer ti vin sitan per ki trwa fwa, i ti dir ki i pa konn Zezi, ki ti son zanmi. (Mark 14:66-72) Apre sa, Pyer ti plere asodlarm. Zezi pa ti abandonn son zapot, ki ti’n vreman dekouraze. Apre ki Zezi ti’n resisite, i ti donn Pyer sa loportinite pour montre ki i ti ankor kontan li. Zezi ti demann Pyer pour servi konman en berze pour son bann mouton. (Zan 21:15-17) Pyer ti pare pour fer sa ki Zezi ti’n dir li. Alor, zour Lapannkot, Pyer ti Zerizalenm e i ti parmi sa bann premye dimoun ki ti ganny swazir par lespri sen. w23.09 22 ¶6-7

Zapot Pyer ti demann lezot ansyen pour “pran swen avek troupo Bondye.” (1 Pyer 5:1-4) Si ou en ansyen, nou konnen ki ou kontan ou bann frer ek ser e ki ou anvi pran swen avek zot. Toudmenm, i kapab arive ki ou santi ou fatige oubyen tro okipe pour desarz sa responsabilite. Ki ou kapab fer? Dir Zeova ki mannyer ou santi. Pyer ti ekri: “Si en dimoun i servi lezot, i devret depan lo lafors ki Bondye i donnen.” (1 Pyer 4:11) Ou bann frer ek ser i kapab fer fas avek bann problenm ki pa pou kapab ganny sirmonte dan sa lemonn. Me pa oubliye ki Zezi Kri ki “sef berze” i kapab ed zot plis ki nou nou kapab. I kapab fer sa la konmela e osi dan sa nouvo lemonn. Bondye i zis demann bann ansyen pour kontan zot bann frer ek ser, pour pran swen avek zot e pour “vin en legzanp pour troupo.” w23.09 29-30 ¶13-14

Nou devret evite depan lo bann rezonnman imen. Si nou mazin parey bann dimoun ki inyor bann lalwa Zeova, i kapab ki nou osi nou konmans inyor Zeova ek son bann lalwa ek standar. (1 Kor. 3:19) Souvandfwa “lasazes sa lemonn” i enfliyans dimoun pour satisfer zot dezir egois. Detrwa Kretyen ki ti dan kongregasyon Perganm ek Tyatir ti ganny enfliyanse avek bann dimoun ki ti imoral e ki ti ador zidol. Zezi ti donn sa de kongregasyon bann konsey serye parski zot ti pe toler bann ki ti pe komet imoralite seksyel. (Rev. 2:14, 20) Ozordi dimoun otour nou i kapab esey enfliyans nou pour aksepte bann move rezonnman. I kapab ki nou fanmir ek dimoun ki konn nou i esey konvenk nou ki Zeova pe priv nou e ki nou devret kas son bann lalwa. Par egzanp, zot kapab dir ki nou pa bezwen reste prop moralman e ki bann standar moral ki dan Labib pa aplik pour nou letan. Parfwa nou kapab mazinen ki bann lenstriksyon ki Zeova i donn nou pa ase kler. Petet nou kapab menm anvi “al pli lwen ki sa ki’n ganny ekrir.”—1 Kor. 4:6. w23.07 16 ¶10-11

Mari, manman Zezi, ti bezwen annan lafors pour li kapab fer sa ki Zeova ti’n demann li pour fer. I ti pou tonm ansent menm si i pa ti ankor marye. I pa ti’n zanmen fer grandi en zanfan e aprezan i ti pou bezwen pran swen avek sa garson ki ti pou vin Mesi. Vi ki Mari pa ti’n zanmen annan relasyon seksyel, ki mannyer i ti pou eksplik Zozef, ki ti son fiyanse, ki i’n tonm ansent? (Lik 1:26-33) Ki mannyer Mari ti ganny lafors? Mari ti rod led avek lezot. Par egzanp, i ti demann lanz Gabriyel plis lenformasyon konsernan sa responsabilite. (Lik 1:34) Pa bokou letan apre, Mari ti vwayaz “dan bann montanny” Zida pour al vizit son fanmir Elizabet. Elizabet ti felisit Mari e Zeova ti enspir Elizabet pour koz lo en profesi ankourazan konsernan sa pti baba ki ti dan vant Mari. (Lik 1:39-45) Mari ti dir ki Zeova ti’n “azir avek pwisans.” (Lik 1:46-51) Zeova ti servi Gabriyel ek Elizabet pour ed Mari pour annan lafors. w23.10 14-15 ¶10-12

En pti group parmi bann disip Kris in ganny swazir par lespri sen e zot annan en lanmitye spesyal avek Zeova. I annan 144,000 zot e zot pou servi konman pret dan lesyel avek Zezi. (Rev. 14:1) Sa Landrwa Sen dan tabernak i reprezant lefet ki zot in ganny adopte konman bann garson Bondye pandan ki zot ankor lo later. (Rom. 8:15-17) Sa landrwa Tre Sen dan tabernak i reprezant kot Zeova i ete dan lesyel. Sa “rido” ki ti separ sa Landrwa Sen ek Tre Sen, i reprezant lekor imen Zezi. Tan ki Zezi ti ankor annan en lekor imen, i pa ti kapab antre dan lesyel konman Granpret dan tanp spirityel Zeova. Ler Zezi ti sakrifye son lekor imen, i ti fer li posib pour bann Kretyen swazir kapab al dan lesyel. Sa bann Kretyen swazir osi i bezwen kit zot lekor imen pour zot kapab ganny zot rekonpans dan lesyel.—Ebr. 10:19, 20; 1 Kor. 15:50. w23.10 28 ¶13

Gideonn ti reste kalm ler bann zonm Efraim ti kritik li. (Ziz 8:1-3) I pa ti koz avek zot avek lakoler. Gideonn ti montre ki i ti annan limilite par ekout zot ler zot ti pe konplent e par koz avek zot dan en bon fason. Bann ansyen ki saz i swiv legzanp Gideonn par ekout byen ler lezot i kritik zot e par reponn avek ladouser. (Zak 3:13) Dan sa fason, zot ede pour gard lape dan kongregasyon. Ler bann dimoun ti onor Gideonn parski i ti’n ranport laviktwar lo bann Madyanit, Gideonn ti donn loner Zeova. (Ziz 8:22, 23) Ki mannyer bann frer ki annan responsabilite dan kongregasyon i kapab swiv legzanp Gideonn? Zot kapab donn loner Zeova pour bann keksoz ki zot akonpli. (1 Kor. 4:6, 7) Par egzanp, si en ansyen i ganny felisite parski i en bon ansenyan, i kapab dir ki sa lenstriksyon i sorti dan Parol Bondye e ki nou tou nou ganny formasyon sorti kot lorganizasyon Zeova. Bann ansyen i kapab reflesir lo si zot fason ansennyen pe donn loner Zeova oubyen si zot pe esey enpresyonn lezot. w23.06 4 ¶7-8

Si ler nou fer lapriyer nou pa ganny sa ki nou pe demande, nou kapab demann nou lekor, ‘Eski sa ki mon pe demande dan lapriyer i sa ki mon bezwen?’ Souvandfwa nou krwar ki nou konnen kwa ki pli bon pour nou. Me parfwa sa ki nou demande, i pa sa ki pli bon pour nou. Si nou pe priy konsernan en problenm, i kapab ki i annan en pli bon solisyon pour sa problenm ki sa solisyon ki nou pe demann Zeova. Osi i kapab ki serten keksoz ki nou pe demande i pa an armoni avek lavolonte Zeova. (1 Zan 5:14) Reflesir lo legzanp bann koup ki’n demann Zeova pour gard zot zanfan dan laverite. Sa i paret en keksoz normal pour demande. Me Zeova pa fors personn pour servi li. I anvi ki nou tou nou swazir pour ador li, sa i enkli nou bann zanfan. (Det. 10:12, 13; 30:19, 20) Alor sa paran ti kapab demann Zeova pour ed zot tous leker zot zanfan pour ki i kapab kontan Zeova e vin Son zanmi.—Prov. 22:6; Efe. 6:4. w23.11 21 ¶5; 23 ¶12

En fason enportan ki nou kapab demontre nou lanmour pour lezot i par rekonfort zot. Akoz? En liv referans i dir ki sa mo ki Pol ti servi pour “rekonfort” i vedir debout o bor en dimoun pour ankouraz li ler i pe pas dan en sityasyon difisil. Alor ler nou rekonfort en frer oubyen ser ki pe soufer, nou ed li pour li reste fidel avek Zeova. Sak fwa nou rekonfort en frer oubyen en ser, nou montre li ki nou kontan li. (2 Kor. 7:6, 7, 13) Konpasyon ek rekonfor i relye avek kanmarad. Dan ki fason? En dimoun ki annan konpasyon i anvi rekonfort lezot e esey soulaz zot soufrans. Premyerman, nou annan konpasyon pour sa dimoun e apre nou rekonfort li. Remarke ki mannyer Pol ti montre ki sa konpasyon ki Zeova i annan pour bann imen i pous li pour rekonfort zot. Pol i dir ki Zeova i “en Papa ki pran lapenn e ki donn rekonfor dan tou sityasyon.”—2 Kor. 1:3. w23.11 9-10 ¶8-10

Tou disip Kris pou pas dan leprev. Mazin legzanp zapot Pol. I ti dir bann Kretyen Tesalonik: “Ler nou ti avek zot, nou ti’n fini dir zot davans ki nou ti pou pas dan bann leprev e parey zot konnen, sanmenm sa ki’n arive.” (1 Tesa. 3:4) Pol ti osi dir bann Kretyen Korent: “Nou oule ki zot konn leprev ki nou’n pas ladan . . . nou pa ti ni menm konnen si nou ti pou sirviv.” (2 Kor. 1:8; 11:23-27) Ozordi bann Kretyen i ekspekte ki zot osi zot pou fer fas avek bann difikilte. (2 Tim. 3:12) Ler ou annan lafwa dan Zezi e ou vin enn son disip, i kapab ki ou bann fanmir ek zanmi i tret ou dan en move fason. Eski ou anplwayer oubyen bann koleg travay pa’n tret ou byen akoz ou en dimoun ki onnet? (Ebr. 13:18) Eski ou’n ganny opoze avek bann lotorite akoz ou anons sa bon nouvel avek lezot? Nenport ki kalite difikilte ki nou fer fas avek, Pol i dir ki nou devret zwaye. w23.12 10-11 ¶9-10

Zakob ti fer fas avek en kantite problenm. Simeon ek Levi, ki ti de parmi bann garson Zakob, ti anmenn laont lo zot fanmir e sali non Zeova. An plis ki sa, Rasel ki ti madanm Zakob e ki Zakob ti pli kontan, ti mor ler i ti pe donn nesans zot dezyenm zanfan. Osi ler Zakob ti’n vin pli aze, i ti bezwen al reste Lezip akoz i ti annan en gran lafamin dan son pei. (Zen. 35:16-19; 37:28; 45:9-11, 28) Menm si Zakob ti fer fas avek tou sa bann problenm, i pa ti zanmen perdi konfyans dan Zeova ek Son bann promes. Zeova ti montre Zakob ki i ti annan son laprouvasyon. Par egzanp, Zeova ti donn Zakob en kantite keksoz materyel. Osi, nou kapab asire ki Zakob ti rekonesan ler i ti revwar son garson Zozef, ki i ti krwar ti’n mor depi lontan. Zakob ti kapab fer fas avek son bann problenm e reste fidel avek Zeova parski i ti annan en bon lanmitye avek Zeova. (Zen. 30:43; 32:9, 10; 46:28-30) Ler nou annan en bon lanmitye avek Zeova, nou osi nou pou kapab fer fas avek bann problenm ki nou gannyen san ekspekte. w23.04 15 ¶6-7

Dan Psonm 23, David i montre ki i asire ki Zeova i kontan li e ki Zeova pou pran swen avek li. David i dekri sa lanmitye pros ki i annan ant li ek Zeova, ki son Berze. David ti santi li an sekirite ler i ti les Zeova gid li e i ti depan lo Zeova konpletman. I ti konnen ki Zeova ti pou demontre lanmour pour li tou dilon son lavi. Kwa ki ti fer David sitan asire? David ti santi ki Zeova ti pe pran swen avek li parski Zeova ti’n toultan donn li sa ki i bezwen. I ti konnen ki Zeova i son zanmi e ki i ti annan Son laprouvasyon. Sa ti fer ki i ti asire ki nenport keksoz ki kapab arive dan lavenir, Zeova ti pou kontinyen donn li tou sa ki i bezwen. Vi ki David ti asire ki Zeova i kontan li e ki i ti pou toultan pran swen avek li, sa ti fer ki David pa ti enkyet me i ti zwaye.—Ps. 16:11. w24.01 29 ¶12-13

Depi Dezyenm Lager Mondyal, pep Zeova dan plizyer pei i lib pour anons sa bon nouvel dan lape. Anfet depi sa letan, en kantite dimoun in aprann konn Zeova e son bann serviter pe anons sa bon nouvel partou lo later. Ozordi, bann manm Konsey Direkter pe kontinyen rod gidans Kris. Zot anvi ki bann lenstriksyon ki zot donn bann frer ek ser i reflekte pwennvi Zeova. Zot osi servi bann sirveyan rezyonal ek ansyen pour diriz bann kongregasyon. Bann ansyen ki form parti bann Kretyen swazir e dan en serten sans tou ansyen dan kongregasyon, i ‘dan lanmen drwat’ Kris. (Rev. 2:1) Byensir bann ansyen i enparfe e zot fer fot. Moiz ek Zozye ti fer fot parfwa. (Nom. 20:12; Zoz. 9:14, 15; Rom. 3:23) Kantmenm sa, Zezi pe kontinyen gid sa lesklav fidel e pridan ek bann ansyen e i pou kontinyen fer sa. Alor nou annan tou rezon pour annan konfyans dan gidans ki Zezi pe donn nou atraver bann ki’n ganny swazir pour dirize. w24.02 23-24 ¶13-14

Ozordi, nou kapab fer Zeova plezir par koz lo li dan en fason ki montre ki kantite nou rekonesan anver li e ki kantite nou kontan li. Ler nou dan predikasyon, nou gard antet ki nou lobzektif prensipal i pour ed dimoun vin pli pros avek Zeova e pour ed zot vwar nou Papa ki kontan nou parey nou vwar li. (Zak 4:8) Nou kontan pour montre dimoun lafason ki Labib i dekri Zeova. Labib i koz konsernan son lanmour, lazistis, lasazes, pwisans ek son bann lezot zoli kalite. Nou osi loue Zeova e fer li plezir ler nou fer nou mye pour swiv son legzanp. Ler nou fer sa, lezot dimoun i kapab remarke ki nou diferan avek dimoun dan sa move lemonn e zot kapab demande akoz nou diferan. (Mat. 5:14-16) Anmezir nou enterakte avek sa bann dimoun, petet nou kapab eksplik zot kwa ki fer nou diferan. Sa i fer ki bann dimoun ki annan leker senser i anvi vin pli pros avek nou Bondye. Ler nou loue Zeova dan sa bann fason, sa i fer li kontan.—1 Tim. 2:3, 4. w24.02 10 ¶7

Pour ou kapab vin en frer matir, ou bezwen devlop bann abilite ki itil. Sa bann abilite pou ed ou desarz bann responsabilite dan kongregasyon, ganny en travay pour pran swen avek ou lekor oubyen en fanmir e pour ou kapab annan bann bon lanmitye avek lezot. Par egzanp, aprann pour lir e ekri byen. Labib i dir ki en msye ki pran letan pour lir Parol Bondye toulezour e medit lo la, i ere e i reisi. (Ps. 1:1-3) Ler i lir Labib toulezour, i pou konn fason panse Zeova e sa pou ed li reflesir e rezonn pli byen. (Prov. 1:3, 4) Nou bann frer ek ser i bezwen led bann frer ki kapab ansenny zot e donn zot bann konsey ki sorti dan Labib. Alor si ou kapab lir e ekri byen, ou pou kapab prepar bann diskour ek larepons ki pou ankouraz lezot e ed zot ranforsi zot lafwa. Osi, ou pou kapab pran bann not ki pou ed ou fer ou lafwa vin pli for e pour ankouraz lezot. w23.12 26-27 ¶9-11

Ler ou per, medit lo sa ki Zeova pou fer dan lavenir ler Satan i nepli la. Dan lasanble rezyonal 2014, i ti annan en demonstrasyon ki ti montre en papa ki ti koz avek son fanmir lo ki mannyer 2 Timote 3:1-5 ti’n kapab ganny ekrir si sa verse ti pe koz lo ki mannyer lavi pou ete dan Paradi. I ti dir: “Dan nouvo lemonn pou en letan vreman gou. Dimoun pou kontan kanmarad, kontan bann keksoz spirityel, modes, annan limilite, loue Bondye, obeisan anver zot paran, rekonesan, fidel, annan gran lafeksyon pour zot fanmir, tonm dakor avek kanmarad, toultan koz an byen lo zot prosen, annan kontrol lo zot lekor, annan ladouser, kontan dibyen, diny konfyans, pare pour sede, abes zot lekor, kontan Bondye plito ki plezir, zot pou montre en devosyon senser pour Bondye. Reste pros avek sa bann dimoun.” Eski ou koz avek ou fanmir oubyen bann frer ek ser lo ki mannyer lavi pou ete dan nouvo lemonn? w24.01 6 ¶13-14

I vreman rekonfortan pour konnen ki konman pep Zeova nou annan son laprouvasyon. Labib i dir: “Zeova i pran plezir dan son pep.” (Ps. 149:4) Me parfwa serten i kapab telman dekouraze ki zot demande, ‘Eski mwan mon annan laprouvasyon Zeova?’ En kantite serviter fidel Zeova dan letan Labib ti santi koumsa parfwa. (1 Sam. 1:6-10; Zob 29:2, 4; Ps. 51:11) Labib i montre ki bann imen enparfe i kapab ganny laprouvasyon Zeova. Ki mannyer nou kapab fer sa? Nou bezwen demontre lafwa dan Zezi Kri e batize. (Zan 3:16) Dan sa fason, nou montre lezot ki nou’n repantir pour nou bann pese e nou’n fer en promes avek Bondye pour fer son lavolonte. (Akt 2:38; 3:19) Zeova i kontan ler nou fer sa bann keksoz pour nou kapab annan en bon lanmitye avek li. Tan ki nou kontinyen fer nou mye pour gard sa promes ki nou’n fer avek Zeova pour servi li fidelman, nou ganny laprouvasyon Zeova e Zeova i vwar nou konman enn son zanmi.—Ps. 25:14. w24.03 26 ¶1-2

Si gouvernman i donn nou lord pour aret fer sa travay predikasyon, nou kapab swiv legzanp bann disip par kontinyen fer sa travay. Nou kapab asire ki Zeova pou ed nou fer sa travay predikasyon. Alor demann Zeova pour donn ou kouraz ek lasazes. Demann li pour ed ou andire menm si ou annan problenm. En kantite nou pe soufer akoz en problenm lasante, bann problenm emosyonnel, en dimoun ki nou kontan in mor, en problenm fanmir, persekisyon ouswa akoz en lot kalite problenm. Osi, bann problenm parey pandemi ek lager in fer sa bann problenm vin pli difisil pour nou andire. Dir Zeova egzakteman ki mannyer ou pe santi. Koz avek li lo ou sityasyon zis parey ou ti pou koz avek en bon zanmi. Ou kapab asire ki Zeova pou ed ou. (Ps. 37:3, 5) Ler nou persevere dan lapriyer, sa pou ed nou andire ler nou “rankontre leprev.” (Rom. 12:12) Zeova i konnen ki problenm son bann serviter pe pas ladan e i “tande ler zot kriy osekour.”—Ps. 145:18, 19. w23.05 5-6 ¶12-15

Ler nou annan bann desizyon enportan pour fer, nou bezwen konpran “lavolonte Zeova” e azir an armoni avek son lavolonte. (Efe. 5:17) Ler nou rod bann prensip Labib ki aplikab dan nou sityasyon, nou pe rod pwennvi Bondye lo sa sityasyon. Apre, ler nou aplik son bann prensip, nou pou kapab fer bann pli bon desizyon. Nou lennmi Satan, ki “sa enn move,” i anvi ki nou sitan bizi avek bann keksoz dan sa lemonn ki nou napa letan pour fer bann keksoz ki Zeova i demann nou pour fer. (1 Zan 5:19) I ti pou fasil pour en Kretyen konmans konsantre lo bann keksoz materyel, lo ledikasyon oubyen lo travay olye lo bann diferan loportinite kot zot kapab servi Zeova. Si en Kretyen i fer sa, i pou pe montre ki i pe konmans mazin parey bann dimoun ki pa servi Zeova. Byensir, sa bann keksoz i pa bann move keksoz. Me nou pa devret zanmen met zot premye dan nou lavi. w24.03 24 ¶16-17