Oktob

Eski parfwa ou vwar li difisil pour obei? Lerwa David ti santi koumsa, alor i ti priy Bondye: “Fer mwan annan sa dezir pour obei ou.” (Ps. 51:12) David ti kontan Zeova. Me parfwa i ti vwar li difisil pour obei e nou osi parfwa nou santi parey. Akoz? Premyerman, nou’n erit sa tandans pour dezobei. Dezyenmman, Satan pe kontinyelman esey fer nou rebel kont Zeova parey li i ti fer. (2 Kor. 11:3) Trwazyenmman, nou viv dan en lemonn kot dimoun i annan en latitid rebel, setadir “sa leta lespri ki pe azir dan bann zanfan dezobeisans.” (Efe. 2:2) Nou bezwen fer bokou zefor pour lager avek sa tandans pour fer pese. Nou bezwen osi reziste sa presyon ki Dyab ek sa lemonn i met lo nou pour dezobei. Alor nou bezwen fer bokou zefor pour obei Zeova ek bann ki i’n donn lotorite. w23.10 6 ¶1

Ki nou kapab aprann avek sa resi konsernan ler Zezi ti fer delo vin diven? Nou aprann en leson lo konman pour demontre limilite. Zezi pa ti fer vantar konsernan sa mirak ki i ti fer. Anfet i pa ti zanmen fer vantar konsernan bann keksoz ki i ti fer. O kontrer i ti demontre limilite e i ti kontinyen donn laglwar son Papa. (Zan 5:19, 30; 8:28) Si nou swiv legzanp Zezi e nou annan en bon pwennvi lo nou lekor, nou pa pou fer vantar konsernan bann keksoz ki nou fer. Annou pa fer vantar konsernan bann keksoz ki nou pe fer, me fer vantar konsernan sa Bondye merveye ki nou pe servi. (Zer. 9:23, 24) Nou devret donn li sa loner ki i merite. Apre tou, nou pa ti pou zanmen kapab fer okenn bon keksoz san led Zeova. (1 Kor. 1:26-31) Ler nou annan limilite, nou pa pou fer vantar konsernan bann bon keksoz ki nou’n fer pour lezot. Nou kontan parski nou konnen ki Zeova i vwar e i apresye sa ki nou fer. (Konpar Matye 6:2-4; Ebr. 13:16) Ler nou swiv legzanp Zezi e demontre limilite, nou asire ki nou fer plezir Zeova.—1 Pyer 5:6. w23.04 4 ¶9; 5 ¶11-12

Zeova ti enspir zapot Pol pour ankouraz bann Kretyen pour rod lentere lezot. Ki mannyer nou kapab aplik sa konsey pandan renyon? Nou kapab gard antet ki lezot osi i anvi partisipe pandan renyon. Reflesir lo sa: Ler ou pe koz avek ou bann zanmi, eski ou koz en kantite ki ou bann zanmi pa ganny loportinite pour koze? Non, ou pa pou fer sa parski ou anvi ki zot osi zot koze. Pareyman, nou anvi ki otan dimoun posib i reponn pandan renyon. Anfet, enn bann pli bon fason ki nou kapab ankouraz nou bann frer ek ser i par les zot eksprim zot lafwa. (1 Kor. 10:24) Alor gard nou larepons kourt pour ki lezot i kapab partisipe. Menm ler ou pe donn en larepons ki kourt, evite koz lo plizyer pwen. Si ou koz lo tou sa ki dan paragraf, lezot pou napa nanryen pour koz lo la. w23.04 22-23 ¶11-13

Nou bezwen gard antet ki degre i enportan pour nou kontinyen ed lezot sirtou atraver sa travay predikasyon. Dan nou travay predikasyon, nou bezwen pare pour adapte. Dan predikasyon, nou zwenn dimoun ki annan diferan krwayans e ki sorti dan diferan pei ek kiltir. Zapot Pol ti pare pour adapte e nou kapab aprann avek son legzanp. Zezi ti swazir Pol konman en “zapot pour bann nasyon.” (Rom. 11:13) Alor Pol ti kapab anons sa bon nouvel avek bann Zwif, Grek, bann dimoun ki annan ledikasyon, bann ki reste dan vilaz, bann zofisye gouvernman ek bann lerwa. Pour Pol kapab tous leker tou sa bann diferan kalite dimoun, i ti “vin tou, pour tou sort kalite dimoun.” (1 Kor. 9:19-22) Pol ti reflesir lo kote sa bann dimoun i sorti, zot kiltir ek zot krwayans. Apre i ti adapte lafason ki i ti koz avek zot. Nou osi nou kapab amelyor lafason ki nou fer predikasyon si nou adapte e nou esey reflesir lo sa pli bon fason pour ed sak dimoun. w23.07 23 ¶11-12

En dimoun ki annan ladouser i en dimoun ki for. Ladouser pa en febles. Ou bezwen annan lafors pour ou kapab reste kalm ler ou pe fer fas avek en sityasyon difisil. Ladouser i en laspe “fri lespri sen.” (Gal. 5:22, 23) Sa mo Grek pour “ladouser” i parfwa ganny servi pour dekri en seval ki’n ganny donte. Imazin en seval ki’n ganny donte. Menm si aprezan i kalm, i ankor for. Konman bann imen, ki mannyer nou kapab devlop ladouser e an menm tan nou en dimoun for? Nou pa kapab fer li lo nou menm. Nou bezwen demann Zeova son lespri sen dan lapriyer e demann li pour ed nou devlop sa zoli kalite. I annan en kantite dimoun ki’n reisi devlop ladouser. Par egzanp, en kantite frer ek ser in demontre ladouser ler dimoun in esey argimant avek zot. Sa in ed lezot pour annan en pli bon pwennvi lo Temwen Zeova.—2 Tim. 2:24, 25. w23.09 14 ¶3

Dan en vizyon ekstraordiner, zapot Zan ti vwar 24 ansyen dan lesyel pe ador Zeova. Sa bann ansyen ti pe loue Bondye e zot ti dir ki i merite ganny “laglwar, loner ek pwisans.” (Rev. 4:10, 11) Bann lanz fidel osi i annan en kantite rezon pour loue Zeova. Zot dan lesyel avek Zeova e zot konn li byen. Zot vwar son bann kalite dan sa ki i fer. Ler zot vwar lafason ki Zeova i azir, sa i motiv zot pour loue li. (Zob 38:4-7) Nou osi nou devret loue Zeova dan nou lapriyer. Nou kapab fer sa par eksprim nou lanmour ek lapresyasyon pour li dan nou lapriyer. Ler ou lir e etidye Labib, esey vwar bann kalite ki Zeova i annan ki ou vreman kontan. (Zob 37:23; Rom. 11:33) Apre dir Zeova ki mannyer ou santi konsernan sa bann kalite ki i annan. Nou kapab osi loue Zeova parski i ed nou e i ed nou bann frer ek ser osi.—1 Sam. 2:1, 2. w23.05 3-4 ¶6-7

An 1919, pep Bondye ti sorti anba kontrol Gran Babilonn. Sa menm lannen, en “lesklav fidel e pridan” ti konmans travay pour ki bann dimoun senser i kapab konmans mars lo sa “Semen Sen.” (Mat. 24:45-47; Iza. 35:8) Sa travay ki bann dimoun dan lepase ti fer pour prepar sa semen, in ed bann dimoun ki’n konmans mars lo sa gran semen pour aprann konsernan Zeova ek Son plan pour bann imen. (Prov. 4:18) Zot ti kapab viv dan sa fason ki Zeova i anvi. Zeova pa ekspekte ki son pep i fer bann sanzman neseser en sel kou. O kontrer, in rafin son pep ptitapti. Nou tou nou pou vreman kontan ler nou pou kapab fer Zeova plezir dan tou sa ki nou fer. Tou semen i bezwen ganny mentenir regilyerman pour ki i kapab reste dan en bon kondisyon. Depi 1919, travay in kontinyen ganny fer lo sa “Semen Sen” pour ki plis dimoun i kapab kit Gran Babilonn. w23.05 17 ¶15; 19 ¶16

Konsey Direkter in personnelman donn formasyon bann frer ki zot asistan pour diferan komite lo Konsey Direkter. Sa bann asistan pe fidelman desarz en kantite responsabilite dan lorganizasyon Zeova. Zot in ganny bann bon formasyon e zot pare pour kontinyen sa travay pour pran swen avek mouton Kris. Annou vwar bann pwen enportan dan nou letid. Ler bann Kretyen swazir ki ankor lo later i ganny anmennen dan lesyel ver lafen gran ladetres, ladorasyon pir pou kontinyen isi lo later. Anba direksyon Zezi Kri, bann serviter Zeova pou kontinyen ador Zeova fidelman. Nou konnen ki sa letan, en group nasyon ki’n ralye ansanm ki Labib i apel Gog sorti dan pei Magog pou atak pep Bondye. (Ezek. 38:18-20) Me sa latak pa pou dire pour bokou letan e i pa pou anpes pep Bondye ador Bondye. Zeova pou sov zot! Dan en vizyon, Zan ti vwar en “gran lafoul” lezot mouton. Zan ti ganny dir ki sa “gran lafoul” i “pas atraver sa gran ladetres.” (Rev. 7:9, 14) Alor, nou asire ki Zeova pou sov zot! w24.02 5-6 ¶13-14

Ki nou kapab fer pour nou ganny lespri sen? Nou kapab priy Zeova e demann li son lespri sen. Nou kapab osi, etidye Parol Bondye e form parti son lorganizasyon. Sa pou ed nou devlop “fri lespri sen.” (Gal. 5:22, 23) Bondye i donn son lespri sen avek zis bann ki annan en fason panse ek kondwit ki prop. I pa pou kontinyen donn nou son lespri sen si nou kontinyen mazin bann keksoz ki enpir e nou fer sa bann keksoz. (1 Tesa. 4:7, 8) Pour kontinyen ganny lespri sen, nou osi bezwen “pa konsider bann profesi konman pa enportan.” (1 Tesa. 5:20) Dan sa verse, “profesi” i vedir bann mesaz ki Zeova in donn nou atraver son lespri sen, sa i enkli bann profesi konsernan zour Zeova e bann profesi ki montre ki nou pe viv dan bann dernyen zour. Nou pa devret krwar ki zour Zeova oubyen Armagedon pa pou ariv dan nou letan. O kontrer, nou gard sa zour antet par fer “bann aksyon ki demontre ki [nou] annan en devosyon pour Bondye” e par annan en bon kondwit.—2 Pyer 3:11, 12. w23.06 12 ¶13-14

Konman bann Kretyen, ki nou devret fer si en sel kou nou vwar en portre ki annan pour fer avek pornografi? Nou devret deswit aret get sa portre. Si nou rapel ki nou lanmitye avek Zeova i sa keksoz ki pli presye pour nou, sa pou fer li pli fasil pour nou aret get sa portre. Anfet, menm bann portre ki pa paret annan pour fer avek pornografi i kapab fer nou annan bann panse ek dezir imoral. Akoz nou devret evit sa bann kalite portre? Parski nou pa ni menm anvi mazin okenn keksoz ki kapab fer nou komet imoralite seksyel. (Mat. 5:28, 29) En ansyen ki apel David e ki reste Taylenn i dir: “Mon demann mon lekor, ‘Menm si sa bann portre pa paret annan pour fer avek pornografi, si mon kontinyen get zot, eski sa pou fer Zeova plezir?’ Ler mon mazin koumsa, sa i ed mwan pour fer bann desizyon ki saz.” Ler nou annan en gran respe pour Zeova e nou per pour fer keksoz ki pa fer li plezir, sa pou ed nou fer bann desizyon ki saz. Ler nou annan en “gran respe pour Zeova [sa] i premye pa ver lasazes.” w23.06 23 ¶12-13

I kapab ki bann “lasanm anndan” pe refer avek bann kongregasyon. Pandan gran ladetres, Zeova i promet ki i pou protez nou si nou reste ini avek nou bann frer ek ser. Alor, depi la konmela, nou bezwen fer zefor pour pa zis toler nou bann frer ek ser me pour vreman kontan zot parski i kapab ki pandan gran ladetres, sanmenm sa ki pou sov nou. “Gran zour Zeova” pou en moman difisil pour bann imen. (Zef. 1:14, 15) Pep Zeova osi pou soufer. Me si nou prepar nou la konmela, nou pou kapab reste kalm e ed lezot. Nou pou kapab andire e fer fas avek okenn problenm ki kapab arive. Ler nou bann frer ek ser i soufer, nou pou fer nou mye pour ed zot par demontre konpasyon e donn zot sa ki zot bezwen. Osi, si nou aprann pour kontan nou bann frer ek ser depi la konmela, nou pou demontre lanmour pour zot dan lavenir. Zeova pou rekonpans nou e nou pou kapab viv pour touzour dan en lemonn kot nou pou nepli mazin bann dezas ek problenm ki ti annan oparavan.—Iza. 65:17. w23.07 7 ¶16-17

Labib i souvan dekri bann zonm fidel konman bann zonm for. Me i pa toultan ki zot ti santi zot for. Par egzanp, parfwa Lerwa David ti santi ki i ti “for parey en montanny” me i annan lezot fwa kot i ti “vreman per.” (Ps. 30:7) Lespri sen Bondye ti fer Sanmson vin vreman for e Sanmson ti rekonnet ki san sa pouvwar ki sorti kot Bondye, i ti pou ‘vin fay e vin parey tou lezot zonm.’ (Ziz 14:5, 6; 16:17) Sa bann zonm fidel ti for zis akoz Zeova ti donn zot lafors. Zapot Pol ti rekonnet ki li osi i ti bezwen lafors sorti kot Zeova. (2 Kor. 12:9, 10) Pol ti annan bann problenm lasante. (Gal. 4:13, 14) Parfwa i ti vwar li difisil pour fer sa ki byen. (Rom. 7:18, 19) I annan letan kot i ti enkyet e i ti per. (2 Kor. 1:8, 9) Me ler Pol ti feb, i ti vin for. Ki mannyer sa? Zeova ti donn Pol sa lafors ki i ti bezwen. I ti fer Pol for. w23.10 12 ¶1-2

Si parfwa nou santi ki nou pa vo nanryen, rapel ki Zeova li menm, in atir nou ver li. (Zan 6:44) Zeova i vwar bann bon kalite ki nou annan, ki petet nou, nou pa vwar e i konnen ki kalite dimoun nou vreman ete. (2 Kron. 6:30) Alor ler i dir ki nou presye, nou kapab annan konfyans dan li. (1 Zan 3:19, 20) Avan ki nou ti konn laverite, serten parmi nou ti fer bann keksoz ki petet i ankor fer nou santi nou koupab. (1 Pyer 4:3) Menm bann Kretyen ki’n servi Zeova fidelman i kapab ki zot pe lalit avek bann febles. Me ou, eski parfwa ou santi ki Zeova pa kapab pardonn ou? Si wi, ou kapab ganny rekonforte ler ou konnen ki i annan lezot serviter fidel Zeova ki’n santi parey ou. Par egzanp, zapot Pol ti santi li dekouraze ler i ti mazin lo bann fot ki i ti’n fer. (Rom. 7:24) Byensir, Pol ti’n repantir pour son bann pese e i ti’n batize me i ti konsider son lekor konman “pli pti parmi tou bann zapot” e “pli pir” ki bann ki annan en move lavi.—1 Kor. 15:9; 1 Tim. 1:15. w24.03 27 ¶5-6

Move desizyon ki Lerwa Zeoas ti fer i montre nou ki nou bezwen swazir bann zanmi ki kontan Zeova e ki anvi fer li zwaye. Sa bann zanmi pou ed nou fer bann bon keksoz. Nou pa devret vin zanmi avek zis bann dimoun ki menm laz avek nou. Nou kapab vin zanmi avek bann ki pli vye ki nou oubyen ki pli zenn ki nou. Rapel ki Zeoas ti bokou pli zenn ki son zanmi Zeoada. Ou kapab demann ou lekor: ‘Eski mon bann zanmi i ed mwan pour annan plis lafwa dan Zeova? Eski zot ankouraz mwan pour viv dapre bann standar Bondye? Eski zot koz lo Zeova ek bann laverite presye ki Zeova in donn nou? Eski zot menm zot viv dapre bann standar Bondye? Eski zot dir mwan sa ki mon anvi tande oubyen zot annan kouraz pour donn mwan konsey ler mon vreman bezwen?’ (Prov. 27:5, 6, 17) Si ou bann zanmi pa kontan Zeova, ou pa bezwen zot konman ou zanmi. Me si ou bann zanmi i kontan Zeova, kontinyen reste zanmi avek zot parski zot pou toultan ed ou.—Prov. 13:20. w23.09 9-10 ¶6-7

Alfa i sa premye let dan alfabet Grek e Omega i sa dernyen let. Ler Zeova i dir ki i “Alfa ek Omega,” Zeova pe ed nou konpran ki ler i konmans en keksoz, i pou fini sa keksoz. Apre ki Zeova ti’n kree Adan ek Ev, i ti dir zot: “Fer zanfan e vin bokou, ranpli later e pran swen avek li.” (Zen. 1:28) Ler Zeova ti dir sa, i ti konmsi i pe dir “Alfa” oubyen konmansman. Ler son plan pou’n fini ganny akonplir, setadir ler desandans Adan ek Ev ki obeisan e parfe pou’n ranpli later e zot pou’n fer later vin en paradi, sa pou sa letan kot i pou konmsi Zeova i dir “Omega.” Apre ki Zeova ti’n fini kree “lesyel, later ek tou sa ki lo later e dan lesyel,” i ti dir en keksoz pour montre ki son plan pou ganny akonplir. Sa i montre ki plan Zeova pour bann imen e pour later pou’n ganny akonplir a lafen sa setyenm zour.​—Zen. 2:1-3. w23.11 5 ¶13-14

Sa vwayaz sorti Babilonn pour al Izrael ti difisil e i kapab ki i ti pou pran apepre kat mwan. Me Zeova ti promet ki i ti pou tir okenn lobstak ki ti pou anpes zot retourn Izrael. Bann Zwif fidel ti konnen ki zot ti pou ganny bokou byenfe si zot retourn Izrael. Sa bann byenfe ti pou bokou plis ki okenn sakrifis ki zot ti pou fer. Sa pli gran byenfe ti annan pour fer avek zot ladorasyon. I ti napa en tanp pour Zeova dan lavil Babilonn. I ti napa en lotel pour bann Izraelit ofer bann sakrifis ki Lalwa Moiz ti demann zot pour fer e i ti napa bann pret pour ofer sa bann sakrifis. Osi, dan sa lavil, i ti annan bokou plis dimoun ki ti ador bann fo Bondye ki bann ki ti annan respe pour Zeova e pour Son bann standar. Alor, sa plizyer milye Zwif ki ti kontan Zeova ti vreman anvi retourn dan zot pei pour reetabli vre ladorasyon. w23.05 14-15 ¶3-4

Pour nou kapab kontinyen viv “konman bann zanfan lalimyer,” nou bezwen led lespri sen Bondye. Akoz? Parski i vreman difisil pour reste prop dan sa lemonn ki ranpli avek bann keksoz imoral. (1 Tesa. 4:3-5, 7, 8) Lespri sen Bondye i kapab ed nou pour pa aksepte pwennvi sa lemonn, enkli bann filozofi ek pwennvi bann dimoun ki pa vwar keksoz parey Zeova i vwar. Lespri sen i osi kapab ed nou pour prodwir “tou sort keksoz ki byen, [e] drwat.” (Efe. 5:9) En fason ki nou kapab ganny lespri sen i par priy Zeova e demann li son lespri sen. Zezi ti dir ki Zeova pou “donn lespri sen bann ki pe demann li!” (Lik 11:13) Nou osi ganny lespri sen ler nou loue Zeova ansanm avek nou bann frer ek ser dan renyon. (Efe. 5:19, 20) Lespri sen Bondye i annan en bon lefe lo nou e sa pou ed nou pour viv dan en fason ki fer Bondye plezir. w24.03 23-24 ¶13-15

Eski ou bezwen plis pasyans? Si wi, priy Zeova e demann li pour ed ou annan plis pasyans. Pasyans i enn bann kalite ki lespri sen i ed nou devlope. (Gal. 5:22, 23) Alor, nou kapab demann Zeova son lespri sen e pour ed nou devlop pasyans. Si nou pe fer fas avek en sityasyon ki fer li difisil pour nou annan pasyans, nou bezwen ‘kontinyen demann’ Zeova son lespri sen pour ed nou annan pasyans. (Lik 11: 13) Nou osi kapab demann Zeova pour ed nou vwar keksoz parey li i vwar. Apre ki nou’n priye, nou bezwen fer nou mye pour annan pasyans sak zour. Si nou kontinyen demann Zeova pour ed nou annan pasyans e nou kontinyen fer zefor pour demontre pasyans, Zeova pou ed nou pour demontre plis pasyans menm si nou pa ti en dimoun ki ti annan pasyans. I bon osi pour medit lo bann legzanp ki dan Labib. Dan Labib, i annan legzanp bann dimoun ki ti annan pasyans. Ler nou medit lo sa bann legzanp, nou kapab vwar bann fason ki nou kapab demontre pasyans. w23.08 22 ¶10-11

Zezi ti reasir zapot Pyer ki Zeova ti pou pran swen avek li. Apre ki Zezi ti resisite, i ti fer en mirak par fer Pyer ek lezot zapot atrap ankor en kantite pwason. (Zan 21:4-6) Sa mirak ti san dout reasir Pyer ki Zeova i kapab fasilman donn li bann keksoz materyel ki i ti bezwen. Petet sa zapot ti rapel ki Zezi ti dir ki Zeova pou pran swen avek bann ki “kontinyen rod Rwayonm . . . premye.” (Mat. 6:33) Tousala ti ed Pyer pour met sa travay predikasyon premye dan son lavi e non pa son biznes lapes. Zour Lapannkot lannen 33, Pyer ti anons sa bon nouvel avek kouraz e sa ti ed plizyer milye dimoun pour aksepte sa bon nouvel. (Akt 2:14, 37-41) Apre sa, i ti ed bann Samariten ek bann dimoun lezot nasyon pour aprann konsernan Zezi e vin son disip. (Akt 8:14-17; 10:44-48) Sirman Zeova ti servi Pyer dan en fason ekstraordiner pour anmenn tou sort kalite dimoun dan kongregasyon. w23.09 20 ¶1; 23 ¶11

Apepre de-z-an apre ki bann Babilonnyen ti’n detri Zerizalenm. Neboukadnezar, ki ti lerwa Babilonn ti ganny en rev konsernan en gran stati ki ti fer li per. I ti donn lord son bann zonm saz, enkli Danyel, pour dir li sa rev ki i ti’n reve e ki sa rev ti vedir. Si zot pa ti kapab fer sa, i ti pou touy zot tou. (Dan. 2:3-5) Danyel ti pou bezwen azir vitman si non en kantite dimoun ti pou mor. I ti “al vwar lerwa pour demann li en pe letan pour li kapab dir li lenterpretasyon sa rev.” (Dan. 2:16) Danyel ti bezwen annan kouraz ek lafwa pour fer sa. I ti demann son bann zanmi, “pour priy sa Bondye ki dan lesyel pour ki i pran pitye pour zot e revel sa sekre.” (Dan. 2:18) Zeova ti reponn zot lapriyer. Avek led Bondye, Danyel ti enterpret rev Neboukadnezar. Danyel ek son bann zanmi pa ti ganny touye. w23.08 3 ¶4

Mazin bann byenfe ki ou gannyen ler ou demontre pasyans. Ler nou annan pasyans, nou pli zwaye e nou pli kalm. Alor ler nou annan pasyans, sa i kapab fer nou annan en pli bon lasante mantal e fer nou pli an bonn sante. Ler nou annan pasyans avek lezot, nou kapab annan bann pli bon lanmitye avek zot. Sa i fer ki nou kongregasyon i vin pli ini. Si en dimoun i esey fer nou ankoler, nou pa pou ankoler vitman e sa pou anpese ki sa sityasyon i vin pli grav. (Ps. 37:8; Prov. 14:29) Me pli enportan ankor, nou swiv legzanp nou Papa ki dan lesyel e nou vin pli pros avek li. Pasyans i en zoli kalite ki anmenn byenfe pour nou tou. Menm si i pa toultan fasil pour nou demontre pasyans, avek led Zeova, nou kapab kontinyen devlop sa kalite. Anmezir ki nou esper nouvo lemonn, nou kapab asire ki “lizye Zeova i vey lo tou bann ki annan en gran respe pour li, lo bann ki annan lespwar dan son lanmour fidel.” (Ps. 33:18) Alor nou tou annou determinen pour kontinyen demontre pasyans. w23.08 22 ¶7; 25 ¶16-17

Zak ti dir ki en dimoun i kapab dir ki i annan lafwa me son aksyon i montre ki i napa lafwa. (Zak 2:1-5, 9) Zak i osi koz lo en dimoun ki vwar ‘en frer oubyen en ser ki napa lenz ek manze’ me i pa ed zot. Menm si sa dimoun i dir ki i annan lafwa, son aksyon i montre ki i napa lafwa. (Zak 2:14-16) Zak ti koz lo Raab pour montre legzanp en dimoun ki ti montre par son aksyon ki i annan lafwa. (Zak 2:25, 26) Raab ti’n tann koz lo Zeova e i ti rekonnet ki Zeova ti pe ed bann Izraelit. (Zoz. 2:9-11) Son aksyon ti montre ki i annan lafwa parski i ti protez de espyon Izraelit ler zot lavi ti an danze. Sa ti fer ki sa madanm enparfe e ki pa ti en Izraelit ti ganny konsidere konman drwat zis parey Abraam. Son legzanp i montre ki i enportan pour demontre nou lafwa par nou aksyon. w23.12 5-6 ¶12-13

Konman bann Kretyen, nou pa anvi konpran zis bann lansennyman de baz ki dan Labib. Avek led lespri sen Bondye, nou vreman anvi aprann “menm bann keksoz profon konsernan Bondye.” (1 Kor. 2:9, 10) Petet ou kapab etidye Parol Bondye pli o profon pour ou kapab vin pli pros avek Zeova. Par egzanp, ou kapab etidye lafason ki i ti demontre lanmour anver son bann serviter dan lepase e ki mannyer sa i montre ki i kontan ou osi. Ou kapab osi etidye lo ki mannyer Zeova ti anvi bann Izraelit i ador li e konpar sa avek lafason ki Zeova i anvi nou ador li ozordi. Petet ou kapab osi etidye o profon bann profesi ki Zezi ti akonpli ler i ti lo later. Ou kapab trouv lazwa par etidye bann topik en pe parey. Pour fer sa, ou kapab servi Watch Tower Publications Index oubyen Liv resers pour Temwen Zeova. Ler ou etidye Labib o profon, sa i kapab fer ou lafwa vin pli for e ed ou pour “konn Bondye.”—Prov. 2:4, 5. w23.10 18-19 ¶3-5

Sa mo ki zapot Pyer ti servi pour “en kantite” i vedir “redi pour vin pli gran.” Dezyenm parti sa verse i montre ki nou pou fer ler nou kontan kanmarad en kantite. Sa lanmour pou ed nou kouver pese nou bann frer ek ser. Annou vwar en legzanp ki pou ed nou konpran sa. Imazin en latab ki annan en kantite reye lo la. Ou kapab pran en tapi e tal li lo sa latab ziska i kouver laplipar sa bann mark reye. Pareyman si nou kontan nou bann frer ek ser en kantite, nou kapab kouver oubyen pardonn, pa zis enn oubyen de, me “en kantite pese.” Nou lanmour pour nou bann frer ek ser i devret sitan for ki nou kapab pardonn zot menm ler i vreman difisil. (Kol. 3:13) Ler nou pardonn lezot, nou montre ki nou vreman kontan zot e ki nou anvi fer plezir Zeova. w23.11 11-12 ¶13-15

Ler Lerwa Zosya ti vin en adilt, i ti konmans fer bann renovasyon lo tanp. Pandan ki sa travay ti pe ganny fer, zot ti vwar “liv Lalwa Zeova ki ti ganny donnen avek Moiz.” Ler lerwa ti tann sa ki ti ganny dir dan lalwa, deswit i ti fer bann sanzman pour li kapab obei sa ki ti’n ganny dir. (2 Kron. 34:14, 19-21) Eski ou ti pou kontan lir Labib regilyerman? Petet ou deza pe fer zefor pour lir li toulezour. Eski ou kontan sa ki ou pe lir? Eski ou not bann verse ki kapab ed ou? Ler Zosya ti annan apepre 39 an, i ti fer en fot ki ti kout li son lavi. Dan plas rod gidans Zeova, i ti annan konfyans dan son lekor. (2 Kron. 35:20-25) I annan en leson ki nou kapab aprann. Nenport ki laz nou annan oubyen nenport ki kantite letan ki nou pe etidye Labib, nou bezwen kontinyen rod Zeova. Sa i vedir ki nou bezwen priy Zeova regilyerman pour rod son gidans, etidye son Parol e ekout konsey bann Kretyen matir. Sa pou fer ki nou pou evite fer bann fot grav e nou pou pli ere.—Zak 1:25. w23.09 12 ¶15-16

Labib i koz lo plizyer madanm ki ti kontan Zeova e ki ti servi li. Sa bann madanm ti “fidel e annan kontrol dan tou keksoz.” (1 Tim. 3:11) Bann zenn ser i kapab osi swiv legzanp bann madanm Kretyen ki matir dan zot kongregasyon. Zenn ser, akoz ou pa reflesir lo bann ser dan ou kongregasyon e idantifye serten ki ou kapab swiv zot legzanp? Obzerv zot bann zoli kalite e apre reflesir lo ki mannyer ou kapab demontre sa bann menm kalite. Limilite i en kalite enportan ki pou ed en Kretyen vin matir. Si en madanm i annan limilite, i pou annan en bon lanmitye avek Zeova e avek lezot. Par egzanp, en madanm ki kontan Zeova i demontre limite par siport sa prensip konsernan lotorite ki son Papa ki dan lesyel in met an plas. (1 Kor. 11:3) Sa prensip i aplikab dan kongregasyon e dan fanmir. w23.12 18-19 ¶3-5

Zeova i anvi ki en msye i kontan son madanm e i pran swen avek li materyelman, i vin en bon zanmi pour son madanm e i ed son madanm pour kontinyen reste pros avek Zeova. Ler ou devlop abilite pour reflesi, annan respe pour bann madanm e vin en dimoun ki diny konfyans, sa pou ed ou vin en bon konzwen. Apre ki ou’n marye, i kapab ki ou vin en papa. Ki ou kapab aprann avek Zeova konsernan vin en bon papa? (Efe. 6:4) Zeova ti dir son Garson, Zezi, ki i kontan li e ki Zezi i fer li plezir. (Mat. 3:17) Si ou vin en papa, fer sir ki regilyerman ou dir ou zanfan ki ou kontan zot. Felisit zot souvan pour bann bon keksoz ki zot fer. Bann papa ki swiv legzanp Zeova i ed zot zanfan pour vin bann Kretyen matir. Depi la konmela, ou kapab prepar ou pour sa rol konman papa par demontre lanmour e pran swen avek ou fanmir e avek bann frer ek ser dan kongregasyon. Ou osi kapab dir zot ki ou kontan zot e ki ou apresye zot.—Zan 15:9. w23.12 28-29 ¶17-18

Menm si nou bann serviter fidel Zeova, nou fer fas avek bann difikilte ek maladi parey tou lezot dimoun. Me an plis ki sa, nou bezwen fer fas avek lopozisyon oubyen persekisyon avek bann dimoun ki ay pep Bondye. Menm si Zeova pa anpes nou ganny sa bann problenm, i promet ki i pou ed nou. (Iza. 41:10) Avek led Zeova, nou kapab gard nou lazwa, fer bann bon desizyon e reste fidel avek Zeova ler nou pas dan bann sityasyon vreman difisil. Zeova i promet pour donn nou sa ki Labib i apel “lape Bondye.” (Fili. 4:6, 7) Sa lape i refer avek sa trankilite ki nou santi ler nou annan en bon lanmitye avek Zeova. Sa lape ki “depas tou sa ki nou kapab konpran,” i pli merveye ki sa ki nou kapab imazinen. Par egzanp, eski ou’n deza sipliy Zeova dan lapriyer e apre sa ou ti sirprann parski ou ti santi ou kalm? Ou’n santi koumsa parski Zeova in donn ou “lape Bondye.” w24.01 20 ¶2; 21 ¶4

Bann ki kontan Zeova i anvi loue son non avek tou zot leker. Lerwa David ti konpran ki ler nou pe loue non Zeova, nou pe loue Zeova li menm. Non Zeova i enkli son repitasyon. Sa i fer nou mazin son bann zoli kalite ek bann keksoz merveye ki in fer. David ti servi non son Papa dan en fason pour montre ki sa non i sen e i ti loue non son Papa. I ti anvi fer sa ‘avek tou son leker.’ Pareyman, bann Levit ti annan sa responsabilite pour ankouraz nasyon Izrael pour loue Zeova. Avek limilite, zot ti admet ki zot bann parol pa ti pou zanmen kapab loue non Zeova parey i merite. (Nee. 9:5) Nou kapab asire ki ler zot ti annan limilite e zot ti loue Zeova avek tou zot leker, sa ti fer Zeova plezir. w24.02 9 ¶6

Zeova pa pou krwar ki ou pa’n reisi si ou pa’n atenn en lobzektif ki pa ti rezonnab pour ou. (2 Kor. 8:12) Aprann avek bann moman kot en keksoz i arive ki anpes ou atenn ou lobzektif. Pa oubliy sa ki ou’n deza akonpli. Labib i dir ki “Bondye pa enzis pour oubliy sa ki zot in fer.” (Ebr. 6:10) Ou osi ou pa devret oubliy bann keksoz ki ou’n fer. Reflesir lo bann lobzektif ki ou’n fini atenn. Par egzanp, ou’n reisi devlop en lanmitye avek Zeova, ou’n koz avek lezot lo li ouswa ou’n batize. Dan lepase ou’n fer progre e ou’n reisi atenn ou lobzektif spirityel. Alor, ou kapab kontinyen fer progre e atenn bann lobzektif ki ou annan la konmela. Avek led Zeova ou kapab atenn ou bann lobzektif. Toultan esey vwar ki mannyer Zeova pe ed ou parski sa pou ed ou reste zwaye anmezir ki ou fer zefor pour atenn ou lobzektif spirityel. (2 Kor. 4:7) Si ou kontinyen fer zefor, ou pou ganny plis benediksyon.—Gal. 6:9. w23.05 31 ¶16-18

Zeova i kontan pour montre son pep ki i kontan zot e ki zot annan son laprouvasyon. Labib i mansyonn de fwa kot Zeova ti dir Zezi ki i son Garson ki i kontan e ki i’n aprouve. (Mat. 3:17; 17:5) Eski ou ti pou kontan tann Zeova dir ou ki ou annan son laprouvasyon? Zeova pa koz avek nou direkteman me i koz avek nou atraver Labib. Ler nou lir konsernan sa ki Zezi ti dir avek son bann disip dan bann Levanzil, i konmsi nou pe tann Zeova pe dir nou sa bann parol. Zezi ti imit personnalite son Papa dan en fason parfe. Alor ler nou lir ki Zezi ti dir son bann disip enparfe ki zot ti annan son laprouvasyon, nou kapab imazin Zeova pe dir sa bann parol avek nou. (Zan 15:9, 15) Si nou pas dan problenm, sa pa vedir ki nou nepli annan laprouvasyon Zeova. O kontrer, sa i en loportinite pour montre Zeova ki kantite nou kontan li e nou annan konfyans dan li.—Zak 1:12. w24.03 28 ¶10-11