En bon larelizyon i ankouraz pour annan lanmour pour kanmarad
LABIB i dir: “Sa ki pa kontan son prosen, pa konn Bondye, parski Bondye i lanmour.” (1 Zan 4:8) En bon larelizyon alor, i devret ankouraz son bann manm pour annan lanmour pour kanmarad.
Plizyer larelizyon i ganny felisite pour sa bon travay ki zot fer pour pran swen avek bann malad, bann aze ek bann ki pov. Zot ankouraz zot bann manm pour met an pratik sa konsey ki zapot Zan ti ekrir: “Me si en dimoun i posed bann byen later, e i trouv son frer dan bezwen e i ferm son leker, e i pa ed li, ki mannyer lanmour Bondye i kapab reste dan son leker. Mon bann pti zanfan fodre pa ki nou montre lanmour zis par bann zoli parol, e zoli diskour, me vreman par nou laksyon.”—1 Zan 3:17, 18.
Ki arive alor, ler bann nasyon i al lager? Eski Bondye i demann nou pour “kontan ou prosen parey ou kontan ou prop lekor” zis ler tou i anpe e pour oubliy sa prensip kan en dirizan politik oubyen en lerwa i deside pour al lager avek en pei vwazen?—Matye 22:39.
Zezi ti dir: “Dimoun pou war ki zot mon bann disip si zot kontan kanmarad.” (Zan 13:35) Anmezir ki ou reponn sa bann kestyon swivan, demann ou lekor: ‘Eski bann manm sa larelizyon i demontre lanmour anver tou dimoun a tou moman, pa zis an parol me osi an aksyon?’
TOPIK: Lager.
KI LABIB I DIR: Zezi ti donn son bann disip en komannman: “Mon dir zot: kontan zot lennmi e priy pour bann ki persekit zot.”—Matye 5:44.
Kan bann solda ti vin aret Zezi, zapot Pyer ti tir son zarm pour defann li. Parkont, Zezi ti dir: “Met ou lepe dan son plas. Tou sa ki servi lepe pou mor par lepe.”—Matye 26:52.
Zapot Zan ti ekrir: “Nou kapab disteng zanfan Bondye ek zanfan dyab: tou dimoun ki pa pratik sa ki zis, oubyen ki pa kontan son frer i pa en zanfan Bondye. Lala mesaz ki zot in tande depi okonmansman: Ki nou devre kontan kanmarad. Nou pa devre fer konman Kaen. I ti apartenir a dyab e i ti touy son frer.”—1 Zan 3:10-12.
KESTYON: Eski sa larelizyon i ankouraz son bann manm pour pran par dan lager?
TOPIK: Politik.
KI LABIB I DIR: Apre ki zot ti vwar abilite Zezi pour fer bann mirak, serten ti anvi enplik li dan politik. Ki mannyer i ti reazir? “Zezi ti realize ki zot ti a pe vin pran li pardfors pour fer li lerwa. Alor i ti al ankor dan montanny li tousel.”—Zan 6:15.
Kan Zezi ti ganny arete e akize konmkwa i ti pe enfliyans bann dimoun pour proteste kont gouvernman, i ti reponn: “Mon Rwayonm pa sorti lo sa later. Si mon Rwayonm ti sorti lo sa later, mon bann serviter ti a lager pour defann mwan kont lotorite Zwif. Non mon Rwayonm pa sorti lo sa later.”—Zan 18:36.
Kan Zezi ti pe priy pour son bann disip, i ti dir: “Mon’n donn zot ou mesaz, e lemonn in ay zot, parski zot pa fer parti lemonn parey mwan mon pa fer parti lemonn.”—Zan 17:14.
KESTYON: Eski sa larelizyon i swiv legzanp Zezi e evite enterfer dan politik, menm si sa i vedir ki serten dirizan politik pou ay son bann manm?
TOPIK: Lapliferans.
KI LABIB I DIR: Kan sa premye dimoun ki pa ti sirkonsi e pa ti en Zwif ti vin Kretyen, zapot Pyer ti dir: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”—Akt 10:34, 35.
Kan i ti pe ekrir bann Kretyen dan premye syek, Zak ti dir: “Mon bann frer, konman krwaryan ki posed lafwa dan nou Senyer Zezi-Kri, Senyer ki posed laglwar, pa fer preferans pour personn. Si en zonm ris avek bag an-or e byen abiye i antre dan ou lasanble an-menm-tan avek en zonm pov dan lenz sal e desire, si ou montre plis latansyon pour sa enn ki byen abiye e ou dir li, ‘Pran sa plas isi,’ tandis ki sa zonm pov ou dir li, ‘debout laba’ ou ‘asiz la ater kot mon lipye,’ ou pe fer preferans parmi zot e ou pe fer en zizman baze lo move rezonnman.”—Zak 2:1-4.
KESTYON: Eski sa larelizyon i ansennyen ki tou dimoun i egal devan Bondye e ki son bann manm pa devret fer lapliferans pour personn ki swa zot ras oubyen zot sityasyon ekonomik?
[Portre lo paz 7]
Ki larelizyon ki ansenny son bann manm pour sirmont bann baryer ki kree divizyon parey politik, diskriminasyon rasyal e sityasyon ekonomik?