Bann Zenn ki pe briye konman Lalimyer
1. Konman Labib i montre ki bann Kretyen pou ganny rekonnet, e ki mannyer sa parol i aplik pour bann zenn Kretyen ozordi?
1 Zezi ti dir avek son bann disip: “Se zot lalimyer lemonn.” (Mat. 5:14, 16) Parey en lavil ki sitye lo en pti montanny ki pe klate dan lalimyer soley, son bann disip pou ganny rekonnet. Ozordi, bokou zenn Kretyen pe “briye konman lalimyer dan lemonn” par zot bon kondwit ek zot devouman dan predikasyon.—Fili. 2:15; Mal. 3:18.
2. Nonm serten fason ou kapab donn temwannyaz bann ansennyan ek kanmarad laklas.
2 Kot Lekol: Ki mannyer ou kapab donn en temwannyaz kot lekol? Serten zenn in sezi loportinite pandan bann diskisyon dan laklas lo bann size parey drog, evolisyon, ek persekisyon bann Zwif pandan Dezyenm Lager Mondyal, ek lezot size ankor. En ser ti servi en konpozisyon lo terorism pour donn en temwannyaz lo Rwayonm Bondye konman sa sel lespwar pour limanite. Son ansennyan ti enpresyonnen par sa bon rapor, e sa ti ouver semen pour donn plis temwannyaz.
3. Ki mannyer ou kapab fer ou lalimyer briye kot lekol atraver ou kondwit?
3 En lot fason ki ou kapab briye konman lalimyer i par ou kondwit e osi ou fason sanze ek laparans fizik. (1 Kor. 4:9; 1 Tim. 2:9) Ler bann etidyan ek ansennyan i vwar ki ou konportman i diferan, serten i kapab ganny atire ver laverite akoz ou bon kondwit. Sa i kapab donn ou en loportinite pour fer konnen laverite dan Labib. (1 Pyer 2:12; 3:1, 2) I kapab pa fasil pour demontre bon kondwit, me Zeova pou beni ou en kantite. (1 Pyer 3:16, 17; 4:14) Pour kapab fer lezot enterese dan sa bon nouvel, ou kapab lir bann piblikasyon pandan brek oubyen met zot kot lezot i kapab trouve.
4. Nonm serten byenfe ki nou gannyen ler nou donn temwannyaz kot lekol.
4 Ler ou les ou lalimyer briye kot lekol, sa pou fortifye ou lafwa e i pou ed ou devlop lafyerte pour servi Zeova. (Zer. 9:24) I osi parey en proteksyon. En ser ti dir, “Byenfe ki mon gannyen ler mon koz lo mon krwayans i ki lezot etidyan pa met presyon lo mwan pour fer bann keksoz ki pa an armoni avek sa ki Labib i dir.”
5. (a) Ki mannyer serten zenn i fer plis dan predikasyon? (b) Ki ou bann lobzektif spirityel?
5 Fer plis: En lot fason ki bann zenn i briye konman lalimyer i ler zot fer plis dan predikasyon. Apre ki en frer ti’n kit lekol, i ti al dan en landrwa kot ti annan en gran bezwen pour plis proklanmater. I ti form parti en pti kongregasyon ki ti annan zis en ansyen. I ti ekrir enn son zanmi e dir: “Mon pe byen pase. Predikasyon i vreman gou! Nou koz apepre 20 minit avek sak dimoun akoz zot oule tann tou sa ki ou kapab dir zot.” I ti azoute: “Mon swete ki tou zenn ti a fer menm keksoz e santi parey mwan. Napa keksoz pli meyer ki servi Zeova avek tou sa ki nou annan.”
6. Ki ou apresye avek bann zenn dan ou kongregasyon?
6 Nou fyer ler nou get zot bann zenn ki pe briye konman lalimyer dan sa lemonn! (1 Tesa. 2:20) Anmezir ki ou servi Zeova avek tou ou leker, nanm, lespri, ek lafors, ou pou ganny “konmela san fwa plis . . . e dan lemonn fitir [ou] a ganny lavi eternel.”—Mark 10:29, 30; 12:30.