‘Briye konman bann Lalimyer’
1 Dan sa lemonn ki dan fernwanr spirityel e moral, apepre sis milyon adorater sa vre Bondye, Zeova, pe ‘briye konman bann lalimyer’ dan 234 pei atraver lemonn. (Fili. 2:15) Sa i fer nou fasilman ganny rekonnet. Ki mannyer nou reflekte lalimyer presye laverite ki sorti kot Zeova?—2 Kor. 3:18.
2 Nou Aksyon: Dimoun i fasilman remark nou kondwit. (1 Pyer 2:12) En madanm ti vwar ki en koleg travay, ki en Temwen, ti zantiy, kontan ede e i pa ti servi langaz obsenn oubyen riy bann dyok sal. Ler lezot ti esey provok sa Temwen par servi bann parol sal devan li, i ti reste kalm anmenmtan reste ferm pour sa ki byen. Ki lefe sa ti fer lo sa madanm? I rakonte: “Mon ti telman enpresyonnen avek son kondwit ki mon ti konmans demann bann kestyon lo Labib. Mon ti konmans etidye Parol Bondye e plitar mon ti batize.” I azoute: “Se son kondwit ki ti konvenk mwan pour egzamin krwayans bann Temwen Zeova.”
3 Nou latitid anver lotorite, nou pwennvi lo bann pratik lemonn, e nou bon fason koze i fer Temwen Zeova ganny rekonnet konman bann dimoun ki viv dapre bann standar Labib onivo. Bann tel bon aksyon i kapab anmenn laglwar pour Zeova e atir lezot pour ador li.
4 Nou Parol: Byensir, bann ki vwar nou bon kondwit i kapab pa konnen akoz nou diferan, amwen ki nou koz avek zot lo nou krwayans. Eski bann ki ou travay avek oubyen lekol avek i konnen ki ou en Temwen Zeova? Dan koze toulezour avek lezot, eski ou rod loportinite pour rann en temwannyaz? Eski ou determinen pour ‘les ou lalimyer klere devan tou dimoun’ dan tou lokazyon apropriye?—Mat. 5:14-16.
5 Pour nou kapab briye konman bann lalimyer nou bezwen annan en leta lespri sakrifis. Si nou pare pour donn tou sa ki nou annan, sa pou pous nou pour evit bann keksoz mwen enportan pour nou kapab fer otan ki nou kapab dan predikasyon ek travay pour fer disip.—2 Kor. 12:15.
6 Par nou aksyon ek nou parol, annou kontinyen briye konman bann lalimyer. Si nou fer sa, lezot i kapab zwenn ansanm avek nou pour glorifye Zeova.