‘Zenere, Touzour Pare pour Partaze’
1 Lapot Pol ti enstri Timote pour ankouraz bann konpanyon Kretyen pour “fer sa ki byen, e ki zot larises i konsist an bonn aksyon. Zot devre montre zot zenere e touzour pare pour partaz avek lezot.” (1 Tim. 6:18) Pol ti osi rapel bann Kretyen Ebre pour pa oubliye “fer dibyen e ed kanmarad.” (Ebre 13:16) Akoz i ti ekrir sa bann lenstriksyon? Akoz i ti konnen ki i pou annan “laglwar loner ek lape pour tou dimoun ki pratik sa ki byen.”—Rom. 2:10.
2 Parski i Kreater, Zeova Bondye i Propriyeter tou keksoz. (Rev. 4:11) Nou sertennman apresye sa ki i pe fer avek son bann posesyon, dan nou faver. Menm si bokou imen i montre en latitid engra, Bondye Tre O i kontinyen permet nou tou pour benefisye avek son bann provizyon zenere, pour mentenir lavi. (Mat. 5:45) I ti menm donn son Garson prefere konman en sakrifis afen ki nou a kapab ganny lavi eternel. Eski sa lanmour ki nou ganny montre pa devret obliz nou pour prouv nou rekonesan, an etan zenere avek bann konpanyon imen?—2 Kor. 5:14, 15.
3 Ki Nou Kapab Partaze? I zis apropriye ki nou servi nenport byen ki nou posede dan en fason ki agreab dan lizye Bondye. Sirman nou anvi soutenir sa travay global pour Rwayonm an term materyel e spirityel. Byensir, sa bon nouvel i trezor pli presye ki okenn dimoun i kapab posede, parski i “pisans Bondye pour sov tou sa ki krwar.” (Rom. 1:16) Kan nou servi nou letan ek resours dan en fason zenere sak mwan, pour prese e ansennyen, nou kapab partaz sa trezor spirityel avek lezot, en trezor ki anmenn zot ver lavi eternel.
4 Zeova i tre zwaye kan nou asiste lezot ki annan pti gin mwayen. I promet nou bann benediksyon e i osi rapel nou: “Bann keksoz valer pa pou servi dan nanryen zour lakoler, me ladrwatir pou delivre dan lanmor.” (Prov. 11:4; 19:17) Soutenir travay Rwayonm materyelman e annan en partisipasyon konplet dan predikasyon sa bon nouvel, i bann fason merveye pour montre ki nou vreman zenere, pare pour partaze.