Dimans le 27 Zilyet
I kapab ankouraz lezot . . . e osi reprimann [zot].—Tit 1:9.
Pour ou kapab vin en frer matir, ou bezwen devlop bann abilite ki itil. Sa bann abilite pou ed ou desarz bann responsabilite dan kongregasyon, ganny en travay pour pran swen avek ou lekor oubyen en fanmir e pour ou kapab annan bann bon lanmitye avek lezot. Par egzanp, aprann pour lir e ekri byen. Labib i dir ki en msye ki pran letan pour lir Parol Bondye toulezour e medit lo la, i ere e i reisi. (Ps. 1:1-3) Ler i lir Labib toulezour, i pou konn fason panse Zeova e sa pou ed li reflesir e rezonn pli byen. (Prov. 1:3, 4) Nou bann frer ek ser i bezwen led bann frer ki kapab ansenny zot e donn zot bann konsey ki sorti dan Labib. Alor si ou kapab lir e ekri byen, ou pou kapab prepar bann diskour ek larepons ki pou ankouraz lezot e ed zot ranforsi zot lafwa. Osi, ou pou kapab pran bann not ki pou ed ou fer ou lafwa vin pli for e pour ankouraz lezot. w23.12 26-27 ¶9-11
Lendi le 28 Zilyet
Sa enn ki ini avek zot i pli gran ki sa enn ki ini avek sa lemonn.—1 Zan 4:4.
Ler ou per, medit lo sa ki Zeova pou fer dan lavenir ler Satan i nepli la. Dan lasanble rezyonal 2014, i ti annan en demonstrasyon ki ti montre en papa ki ti koz avek son fanmir lo ki mannyer 2 Timote 3:1-5 ti’n kapab ganny ekrir si sa verse ti pe koz lo ki mannyer lavi pou ete dan Paradi. I ti dir: “Dan nouvo lemonn pou en letan vreman gou. Dimoun pou kontan kanmarad, kontan bann keksoz spirityel, modes, annan limilite, loue Bondye, obeisan anver zot paran, rekonesan, fidel, annan gran lafeksyon pour zot fanmir, tonm dakor avek kanmarad, toultan koz an byen lo zot prosen, annan kontrol lo zot lekor, annan ladouser, kontan dibyen, diny konfyans, pare pour sede, abes zot lekor, kontan Bondye plito ki plezir, zot pou montre en devosyon senser pour Bondye. Reste pros avek sa bann dimoun.” Eski ou koz avek ou fanmir oubyen bann frer ek ser lo ki mannyer lavi pou ete dan nouvo lemonn? w24.01 6 ¶13-14
Mardi le 29 Zilyet
Ou menm . . . ki mon’n aprouve.—Lik 3:22.
I vreman rekonfortan pour konnen ki konman pep Zeova nou annan son laprouvasyon. Labib i dir: “Zeova i pran plezir dan son pep.” (Ps. 149:4) Me parfwa serten i kapab telman dekouraze ki zot demande, ‘Eski mwan mon annan laprouvasyon Zeova?’ En kantite serviter fidel Zeova dan letan Labib ti santi koumsa parfwa. (1 Sam. 1:6-10; Zob 29:2, 4; Ps. 51:11) Labib i montre ki bann imen enparfe i kapab ganny laprouvasyon Zeova. Ki mannyer nou kapab fer sa? Nou bezwen demontre lafwa dan Zezi Kri e batize. (Zan 3:16) Dan sa fason, nou montre lezot ki nou’n repantir pour nou bann pese e nou’n fer en promes avek Bondye pour fer son lavolonte. (Akt 2:38; 3:19) Zeova i kontan ler nou fer sa bann keksoz pour nou kapab annan en bon lanmitye avek li. Tan ki nou kontinyen fer nou mye pour gard sa promes ki nou’n fer avek Zeova pour servi li fidelman, nou ganny laprouvasyon Zeova e Zeova i vwar nou konman enn son zanmi.—Ps. 25:14. w24.03 26 ¶1-2