KONMANS EN KONVERSASYON
LESON 2
Koz dan en fason natirel
Prensip: “Pa i vreman en bon keksoz ler en dimoun i dir en bon parol dan sa moman apropriye!”—Prov. 15:23.
Sa ki Filip ti fer
1. Get sa VIDEO oubyen lir Akt 8:30, 31. Apre reponn sa bann kestyon swivan:
Ki mannyer Filip ti konmans sa konversasyon?
Akoz sa ti en fason natirel pour konmans en konversasyon? Ki mannyer sa ti fer li posib pour sa zonm aprann en nouvo keksoz?
Ki nou aprann avek Filip?
2. Si nou koz dan en fason natirel, i pou pli fasil pour sa dimoun santi li alez e i pou anvi ekout nou mesaz.
Fer parey Filip
3. Obzerv byen. Ou kapab aprann en kantite lo en dimoun ler ou get fason ki i debout, fason ki i asize, bann zes ki i fer ek bann lekspresyon lo son figir. Eski i paret ki sa dimoun i anvi koz avek ou? Ou kapab konmans koz avek li lo en keksoz sorti dan Labib e demann li “Eski ou ti konnen ki . . . ?” Me si sa dimoun pa anvi koze, pa fors li.
4. Annan pasyans. Pa krwar ki ou bezwen deswit konmans koz lo Labib. Esper sa bon moman pour koz lo Labib dan en fason natirel. Parfwa, sa i vedir ki ou bezwen espere ziska ki ou ganny en lot konversasyon avek sa dimoun.
5. Pare pour adapte. Sa dimoun i kapab konmans koz lo en keksoz ki ou pa ti pe ekspekte. Alor, pare pour koz lo en keksoz ki fer sans pour sa dimoun, menm si sa i vedir koz lo en lot laverite dan Labib ki ou pa ti pe mazin koz lo la.