Wãrĩnuta ibiade jarada

1. ¿Kʼãrẽta oibara Jeowa ode bʼaira?

DAYIRÃBA mebẽã ũduaduata ũdubʉrʉde, nãã widipanʉ sõbe añobata Daizeze ode edabʉta, iya dayirã panʉseabʉ dããrabata Daizeze odebʉta mawũã ẽ bʉrʉ ʉ̃rabʉrʉ Daizeze odebʉta. Dai Jeowa ʉ̃rʉ Kʼawuabipanʉraitara Daizeze ode bʼaira arigʉ yibia, maʉ̃ oita dayirãbara wãrĩnuta ewariza jaradiaibara wuabemara akʉza daya nekʼãrẽ obʉdeba ũdubibara wãrĩnuarebʉta (Sal. 15:​1-3).

2. (1) ¿Sãwũã ũdukaudebasi Jesúsʼra? (2) Jesúsba wãrĩnu jarabʉdeba, ¿kʼãrẽta berabaribasi?

² Jesúsbara ewari jõmaʉ̃nẽ wãrĩnuta jarabasi wuabemaraʼa, iyi nejʉrarabida kʼawuapanasi Jesúsbara mawũã jarabʉra (Mat. 22:16). Bari jaraita, ʉ̃kʉrʉra ãyi mebẽrãne bedʼeakapanasi Jesúsba wãrĩnuta jarabʉ kʼarea, Jesúsbara kãga ẽ basimina bedʼeakapanamarẽã kʼawuabasi mawũã berabaribasita (Mat. 10:35; Mat. 23:37). Maʉ̃ba ũdubibʉ Daizeze Bedʼeadebemaba wãrĩnu jarabʉra ʉ̃kʉrʉ ẽbẽrarãba ũrĩnaibasita akʉza ʉ̃kʉrʉ ẽbẽrarãba ũrĩna ẽ baibasita(2 Tes. 2:​9-11).

3. ¿Kʼãrẽta kʼawuadai naʉ̃ artikulodera?

³ Jesúsba obada kĩrãkʼa dayirãbida wãrĩnuta jarakĩrãpanʉ ẽbẽraraba ũrĩbʉbʉrʉ akʉza ũrĩkĩrã ẽ bʉrʉ, ¿maʉ̃ba jarakĩrãkuka dayirãba wãrĩnuta jaraibarata daya jarakĩrãkude wuabemara sãwũã krĩchai mawũã ẽ bʉrʉ sãwũã senti krĩcha ẽã? Mawũã ẽ, maʉ̃ kʼarea naʉ̃ artikuloba dayirãta kʼarebayi sama ũduseapanʉta wãrĩnuta, kʼãrẽa jaraibarata wãrĩnuta, sãwũã jaraibarata akʉza sõbede jaraibarata wãrĩnuta. Naʉ̃ jõmaʉ̃ba kʼarebayi dayirãba sãwũã bedʼeabʉdeba ibiade bedʼeaita wuabemara.

¿SAMA ŨDUSEAPANɄ WÃRĨNUTA?

4. ¿Kʼãrẽa jaraseapanʉ wãrĩnura Daizezedeba zebʉta?

⁴ Wãrĩnura Jeowadeba zebʉ. Bari jaraita, Jeowaba jarabʉ kʼãrẽta yibiata akʉza kʼãrẽta zeri ẽãta, jõma iya jarabʉra maʉ̃ ʉ̃rʉra wãrĩnu (Sal. 19:9; 119:​142, 151). Adewara iya oya adata jarabʉra aripe obʉ. Jeowabara sewanebʉrara jipade oka. Daizeze Bedʼeaba jarabʉ iyi ʉ̃rʉ: «Bʉra Jeowa Daizeze wãrĩnuara» (Sal. 31:5; Is. 55:​10, 11; Núm. 23:19; Heb. 6:18).

5. ¿Kʼãrẽa zare ẽ Daizeze ũdukʼawuaira? (Hechos 17:27).

⁵ Ʉ̃kʉrʉ ẽbẽrarãba jarapanʉ Daizezera jipa ũdukʼawuabe ẽãta mamina maʉ̃ra wãrĩnu ẽ, dayirãbara iya parãnaneba ũdukʼawuaseabʉ Jeowa sãwũã chura (Rom. 1:20). Apostol Pabloba nejaradiabaside Atenasdebemaraʼa jarasi Daizebara kãgabʉta iyira ũdukʼawuadamarẽã, adewara jarasi «iyira jĩgarabʉ ẽ dayirã aba abakaʉdebara» (akʉra Hechos 17:27). Mamina maʉ̃ awa ẽ Jeowabara jʉrʉbʉ ẽbẽrarã iyi ũdukʼawuakĩrãbʉrata akʉza iyi o eda azebʉ(Juan 6:44).

6. (1). ¿Saʉ̃rape wãrĩnu Daizeze Bedʼeaba jaradiabʉra? (2) ¿Kʼãrẽa sobiabʉ bʉa ũdukʼawuasi baera maʉ̃ra?

⁶ Adewara dayirãba ũdukʼawua kĩrãpanʉbʉrʉ wãrĩnuta Jeowa ʉ̃rʉ, ũduseapanʉ Daizeze Bedʼeade ¿kʼãrẽa? Jeowaba yumakẽrãra bʉbisi baera iyi jaure zareadeba (2 Ped. 1:​20, 21). Maʉ̃ kʼarea Daizeze Bedʼeade ũdudayi wãrĩnuta daya ũdukʼawuaseabʉta. Bari jaraita, naʉ̃ drʉara sãwũã parãsita, kʼairabasita nããbema yumakẽrã akʉza yuwẽrãta, kʼãrẽa beipanʉta, zʉbʉriapanʉta akʉza nemitia opanʉta (Gén. 1:​1, 26; Rom. 5:12; 6:23). Adewara Satanásba nekʼãrẽ aña odara tẽãne Jesúsba ara oyi (Juan 8:44; Rom. 16:20). Adewara Jesúsbara ẽbẽra kayiruarãra jõma makenaita mawũã iyi nokʼo babʉrʉde akʉza jẽda piradrʉbiyi ẽbẽrarãra, wua kaya ẽ bayi, naʉ̃ drʉa ẽjʉ̃ã kĩrãwãreã babiyi akʉza dayirãra daucha nemitia omia ẽ kĩrãkʼa babiyi (Juan 11:​25, 26; 1 Juan 3:8). Jeowaba dayirã jaradiabʉ wãrĩnu ʉ̃rʉ, mamina kãgabʉ dayirãbida wuabemara jaradiamarẽã(Mat. 28:​19, 20).

¿KʼÃRẼA JARAIBARA WÃRĨNUTA?

7, 8. ¿Kʼãrẽ kʼãrẽa wãrĩnuta jaradaibara? Yizata jara ũrĩbira (Marcos 3:​11, 12, akʉra potota).

⁷ Wãrĩnuta jaraira arigʉ yibia mamina maʉ̃ awa ẽ audrebʉ. Jeowaba akʉza Jesúsʼʉ̃meba akʉpanʉ dayirãba kʼãrẽa wãrĩnuta jarabʉta, akʉbʉ wãrĩnu dayi sodeba jarabʉ kʼawuaita mawũã ẽ bʉrʉ bari ideba jarabʉ kʼawuaita. Bari jaraita, Jesúsʼra nejaradiabaside Gálilea kʼawa bioʉba orrasida iyira. Maʉ̃ne edabasi ʉ̃kʉrʉ jai demonio baribʉrata, sãkokode ba kʼãrãpe Jesúsʼa jarasida bʉra Daizeze warra (akʉra Marcos 3:​11, 12). Naʉ̃raba iyi ʉ̃rʉ jaradara wãrĩnubasi mamina ¿ãyara kʼãrẽa maʉ̃ta jarasida? Mawũã jara ẽ basi ãyira ẽbẽra bia basi baera awuarabʉrʉ jarasida baibara ẽbẽrarãbara ãyi ʉ̃rʉ ĩjãnamarẽã. Jesúsba kʼawuaedasi ãyi sodeba mawũã krĩchabarabʉra, maʉ̃ kʼarea jarasi iyi ʉ̃rʉ maʉ̃ta jarabarawa ẽ marẽã.

⁸ Naʉ̃ba kʼawuabibʉ Jeowabara dayirã sode akʉbʉta kʼãrẽa wãrĩnuta jarapanʉta. Maʉ̃ kʼarea wãrĩnuta jarakĩrãpanʉ, Jeowata kãgapanʉ baera akʉza iyi ʉ̃rʉbʉrʉ ibia bedʼeamarẽã kãgapanʉ baera, dayirã ʉ̃rʉ ibia bedʼeai kaude(Mat. 5:16; naʉ̃ testoʉ̃me akʉra Hechos 14:​12-15).

9. ¿Kʼãrẽta oda ẽ baibara akʉza kʼãrẽa?

⁹ Edaʉde berabariseabʉ dayirãra wuabemaraba ibia akʉdamarẽã kãgaita. Krĩchara naʉ̃ta, zõrãrã kongregasionebema abaʉba jaraseabʉ dayirã bedʼeata mio jara ẽ baibarata mamina maʉ̃ tẽã daya awuruʼa jarakʼayi. Ãya kʼawuabʉrʉde bʉa jaradara wãrĩnubasita, ãya krĩchaseapanʉ bʉara jaraseabʉta nekʼãrẽ awuruba kʼawua ẽ baibarata, maʉ̃ kʼarea ãya dayirãra bia akʉseapanʉ, mamina kʼawuadaibara naʉ̃ta, Jeowabara bia akʉ ẽ bayi (Prov. 11:13). ¿Kʼãrẽa? Dayirãba wãrĩnura jaraseapanʉmina Jeowabara kʼawuabʉ dayirã sodebara kʼãrẽa mawũã jarakĩrãkʉasita, dayi ʉ̃rʉ ibia bedʼeadamarẽã.

¿SÃWŨÃ WÃRĨNUTA JARAITA?

10. Colosenses 4:6de bedʼea ibia bedʼeaibara, ¿kʼãrẽta jarakĩrãkʉasi?

¹⁰ (Akʉra Colosenses 4:6). Pabloba mebẽrã Colosasdebema jarasi wuabemara bedʼeabʉrʉdera ibiade bedʼeaibarata, dayirã bedʼeabʉba wuabemarata kʼarebaibarata adewara kãgade bedʼeaibarata akʉza wuabemaraba ũrĩkĩrãne.

11, 12. Wãrĩnuta jarabʉrʉdera, ¿kʼãrẽa yibia kʼawuaita sãwũã bedʼeabʉta? (Akʉra potorata).

¹¹ Pabloba ũrãgʼa diadara, ¿dayirãbara sãwũã ũdubiseapanʉ? Ibiade bedʼeaita wuabemara nejaradiabʉrʉde. Hebreos 4:12ba jara ũrĩbibʉ Daizeze Bedʼeabara kʼawuabiseabʉta ẽbẽrarã sode akʉza krĩchade sãwũã sentibʉta, maʉ̃ kʼarea dayirãbara Daizeze Bedʼeara biʼia zokʼa kʼawuadaibara, bia zokʼada ẽ bʉrʉ wuabemarata kĩrʉbiseabʉ, sopʉabiseabʉ mawũã ẽ bʉrʉ bedʼeakabiseapanʉ.

¹² Bari jaraita, dayirãta nejaradia wãne ũduseapanʉ ẽbẽrarã santoʼa yiwidʼipanʉta, nabida selebrapanʉta, semana santa selebrapanʉta maʉ̃ kʼarea dayirãbara jarakĩrã totoseabʉ iya onʉmʉra zeri ẽãta, ũdubikĩrã totoseabʉ Daizeze Bedʼeade maʉ̃ra Satanásdeba zebʉta (Is. 44:​14-20; 2 Cor. 6:​14-17). Dayirãba krĩchaseapanʉ mawũã oira yibiata, mamina wãrĩnu bʼaira biʼia zokʼanʉma ẽ bayi Daizeze Bedʼeata ibiade jarai kʼaude.

13. ¿Kʼãrẽne abarikabʉ dayi sãwũã bedʼeabʉta tãʼʉ̃mera?

¹³ Pabloba jarasi dayirã bedʼeabʉra tãta wiña edabʉi kĩrãkʼa bedʼeaibarata ¿kʼãrẽa maʉ̃ta jarasi? Dayirãba Daizeze Bedʼeata wuabemara jaradiabʉrʉde jõmaʉ̃bara iyabaʉ ũrĩpanʉ ẽ baera (Job 12:11). Bari jaraita, jõmaʉ̃ba abarika neo ẽ, ʉ̃kʉrʉbara tãta yikode eda bʉebʉrʉdera audre bʉepanʉ, mamina ʉ̃kʉrʉbara wika bʉepanʉ, maʉ̃ kĩrãkʼa dayirãbara abarika bedea ẽ, maʉ̃ kʼarea kʼawuaibara akʉza jʉrʉibara dayirãba sãwũã bedʼeaibarata wuabemara wãrĩnu ʉ̃rʉ ¿kʼãrẽa? Ʉ̃kʉrʉ kulturadera audre yibiabʉ daʉcha jaraita akʉza zõrãrãbawara bedʼeabʉdebida, maʉ̃ta bigachu. Mamina ʉ̃kʉrʉ kulturadera daʉcha jaraita ʉ̃kʉrʉitara yibia ẽ adewara bia sentida ẽ bayi, maʉ̃ kʼarea dayirãbara bedʼea ẽ baibara daya bedʼeakĩrãkʉde, awuarabʉrʉ krĩchadaibara wuabemaraba sãwũã ũrĩnaita. Mamina naʉ̃ba jarakĩrãkʉ ẽ dayirãba peraba wãrĩnuta jara ẽ baibarata.

¿SÕBEDE WÃRĨNUTA JARAITA?

14. ¿Jesús naʉ̃ drʉade basidera jõma jaradiasika iyi kʼaidubemara iya kʼawuabʉta?

¹⁴ Jesúsba iyi kʼaidubemara jaradiasi ibiade akʉza kãgade (Mar. 6:34). Jesúsbara kʼawuabasi ãyara kʼawuadaibarabasita wãrĩnuta mamina Jesúsbara kʼawuabasi ãyara sainupai kʼawuaseabʉra. Jesúsba jõma jaradiasibʉrʉ wãrĩnuta, iyi kʼaidubemarabara jõmara ũrĩna ẽ bakasi (Juan 16:12). ¿Kʼãrẽta kʼawuapanʉ maʉ̃neba?

15. ¿Waña jaradiaibaraka estudianterãra dayirãba jõma kʼawuabʉra? (Proverbios 25:​11, akʉra potota).

¹⁵ Jesús yizadeba dayirãbara kʼawuaseapanʉ dayirãba wãrĩnu bio kʼawuabʉmina maʉ̃ba jarakĩrãkʉ ẽ dayirãba jõma jaradiaibarata ñabasea. Jesúsde kĩrãkʼa kʼawuapanaibara sainu jaradiaseapanʉta. Krĩchadadrʉ yumakẽrã nabida selebrabʉ ʉ̃rʉ adewara semana santa selebrabʉ ʉ̃rʉ, dayirãbara Daizeze Bedʼeata kʼawuabi jʉ̃drʉyi iyaʼa. Dayirãba kʼawuapanʉ maʉ̃ra Jeowaba bia akʉ ẽãta akʉza kãga ẽãta, mamina dayirãba waña jaradara nabidara selebrabʉra zeri ẽãta akʉza semana santa selebrabʉra jipa zeri ẽãta ũdubiyi bedʼea biara ibiade jaradiapanʉ ẽãta, ¿kʼãrẽa? Ʉ̃kʉrʉ estudiapanʉrabara ãyi sãwũã krĩchabʉra audre ẽãne iduaribida ẽ awuarabʉrʉ wiña jʉ̃ãibara bia krĩchayeda, maʉ̃ kʼarea dayirãba kʼarebakirãpanʉbʉrʉ ẽbẽrata krĩchaibara ãya ne aña onʉmʉra sõbede audre bigabʉta maʉ̃ ʉ̃rʉ jaradiaita(akʉra Proverbios 25:11).

16. ¿Sãwũã kʼarebaseapanʉ dayirã estudianterãra wãrĩnuare takeraita?

¹⁶ Daizeze Bedʼeade wãrĩnuta jarabʉta wuabemara jaradiaira kʼãrẽaba yibia akʉza dayirãra soiduba wãrĩnuare panaibara daya jarabʉdeba akʉza obʉdeba (3 Juan 3, 4). Kʼawuasida dayirãba estudianterã oũdubibarata Jeowaʼarebʉta ¿maʉ̃ta sãwũã opanʉ? Ibiade jaradiaibara, kʼawuadaibara sõbede wãrĩnuta jaraibarata akʉza dayi ʉ̃rʉ ibia bedʼeara kĩrãdua ẽ baibara jaraita Jeowa ʉ̃rʉbʉrʉ ibia bedʼeadamarẽã.