¿Jesústa dayirãbari beida kʼarea kʼãrẽta odaibara?

1, 2. Jesús beida kʼarea, ¿kʼãrẽta oũdubidaibara akʉza kʼãrẽa? (2 Corintios 5:​14, 1 akʉza akʉra potota).

ẼBẼRA aba de kora wãbʉrʉde edre wãbʉrʉbara kʼawuabʉ nesidabʉta kʼarebata, maʉ̃ne zeyi ẽbẽra aba iyi kʼarebaita maʉ̃neba ẽdrʉbiyi. Kʼãrẽaba sobiabʉta sentiyi yi kʼarebada kʼarea, maʉ̃ kʼarea iya nekʼãrẽ okĩrãñi maʉ̃ta kʼãrẽ ẽ kĩrãkʼa akʉ ẽ baita.

² Abarikabʉ Jesústa dayirã kʼarea beidadeba ẽdrʉbisi nekayiruadeba akʉza beideba. Apostol Pabloba bʉsi naʉ̃ ʉ̃rʉ «Jesús kãgaba dayirã obibʉ» (akʉra 2 Corintios 5:​14, 15). Naʉ̃ba jarakĩrãbʉ Jesúsba beidadeba nekʼãrẽ osi dayirã kʼarea maʉ̃ba dayirãbida abarika nekʼãrẽ oũdubidaibara iyi kʼarea akʉza iya odata kʼãrẽ ẽ kĩrãka akʉ ẽ baita. ¿Kʼãrẽa nekʼãrẽ odaibara iyitara? Nekʼãrẽ ũbea kʼarea. (1) Jeowaba dayirã nemitiara kĩrãduaseabʉ baera. (2) Dayirãra ẽjʉ̃ã kĩrãwãreãnẽ zrogapanai baera. (3) Dayirãra Jeowa neũdukʼawua baseabʉ jẽda. Naʉ̃ jõmaʉ̃ba ũdubibʉ Jesúsbara ẽbẽrarãra mejãcha kãgabʉta akʉza naʉ̃ drʉa eda zei nawedabida (Prov. 8:​30, 31).

3. ¿Kʼãrẽa jõmaʉ̃ba abarika oũdubida ẽ Jesús beida kʼarea biga diabʉrʉde?

³ ¿Bʉara kʼãrẽta oi Jesústa bʉ kʼarea beisi baera? Bʉyikʉzaʉba maʉ̃ ʉ̃rʉ krĩchaseabʉ, mamina jõmaʉ̃ba abarika krĩcha ẽ baera, bʉa Jesús kʼarea oira awuara baseabʉ. Bari jaraita bʉta Daizeze Bedʼeata ʉ̃rabʉrʉ kʼawuanʉmʉbʉrʉ, buru kʼoemabʉrʉ mawũã ẽ bʉrʉ Jeowa odeba ãĩ wãsibʉrʉ krĩchara kʼãrẽta oseabʉta Jesúsʼita. Naʉ̃ artikulode maʉ̃ ʉ̃rʉ kʼawuadayi.

DAIZEZE BEDʼEA KʼAWUABɄRÃRA

4. ¿Kʼãrẽta akʉbʉ Jeowabara yi ʉ̃rabʉrʉ Daizeze Bedʼea kʼawua takirudera?

⁴ Bʉta Daizeze Bedʼeata kʼawuanʉmʉbʉrʉ maʉ̃ra arigʉ yibia, maʉ̃ba kʼawuabibʉ Jeowaba kʼarebanʉmʉta iyi neũdukʼawua bamarẽã (Juan 6:44; Hech. 13:48). Daizeze Bedʼeaba jarabʉ «Jeowabʉrʉ biʼia akʉbʉ sora». Jeowabara kʼawuabʉ bʉara kʼãrẽaba zarea obʉta bʉa nekʼãrẽ aña obadata idubʉita mawũã iya jarabʉde bʼaita (Prov. 17:3; 27:11). Kĩrãduakara Jesús beidaba kʼarebanʉmʉta bʉra Jeowa neũdukʼawua bʼaita (Rom. 5:​10, 11). Maʉ̃ba bʉa ũdubiseabʉ Jesús beidara kʼãrẽ ẽ kĩrãkʼa akʉ ẽ baita.

5. Daizeze ode ʉ̃rabʉrʉ nekʼawuapanʉraba Filipenses 3:16ba jarabʉta, ¿sãwũã oũdubiseapanʉ?

⁵ Bʉita yibiabʉrʉ Jesúsba odata bʉ kʼarea kĩrãduakara apostol Pabloba filipenseraʼa ũrãgʼa diadaba bʉsida kʼarebaseabʉta, naʉ̃ta jarasi «dayirãba ewariza audre bia o wãta oũdubi zebʉrʉmina, idubʉraidua maʉ̃ nebia obʉta» (Filip. 3:16). Maʉ̃ba dayirã jaradiakʉbʉ dayirãba nebia obʉra Jeowaitara audre owãibara akʉza iduaribi ẽ baita nekʼãrẽ baduba Jeowa odeba jĩga wãbita (Mat. 7:14; Luc 9:62).

6. (1) Yi Daizeze ode ʉ̃rabʉ nekʼawuapanʉrabara, ¿kʼãrẽ bedʼea zromata ũduseapanʉ? (2) ¿Akʉza kʼãrẽta oseapanʉ? (Deuteronomio 30:​11-14 akʉza akʉra potota).

⁶ Edaʉde krĩchaseapanʉ dayirãitara jipa zareata Daizezeba jaradiabʉra, mamina ¿kʼãrẽta oseapanʉ? Audre maʉ̃ ʉ̃rʉ kʼawuaseapanʉ, nekʼãrẽ awuara kʼawuaseabʉ akʉza yiwidʼidaibara Jeowaʼa iya dayirãta kʼarebamarẽã (Sal. 86:11). Edaʉde daya nekʼãrẽ mitia obʉta idubʉita jipa zarebaseabʉ, mamina maʉ̃ kʼarea Daizeze Bedʼea kʼawuanʉmʉta idubʉkara. Jeowabara dayirã widi ẽ bayi daya obe ẽãta, iya kʼawuachu baera daya sainʉ oseabʉta (akʉra Deuteronomio 30:​11-14). Jeowaba jarabʉ dayirãra kʼarebaita, maʉ̃ kʼarea dayirãba krĩchainʉmai kʼaude daya nemitia idubʉ ẽãta audre krĩchaibara dayirãra Jeowa kʼarebadeba sãwũã wiña wiñane awuara ba wãta. Bʉara audre Jeowata kãga wãne kʼawuayi bʉitara Jeowabara jarabʉra zare ẽãta awuarabʉrʉ yibiata (Is. 41:​10, 13; 1 Cor. 10:13; 1 Juan 5:3).a

7. Bʉ yibarirata Daizeze odebʉmina, ¿kʼãrẽta oseabʉ bʉara?

⁷ Warrara marasida Daizeze Bedʼea ʉ̃rʉ kʼawuanʉmʉ, mara yibarirãra mejãchade zarea opanʉ jaradiaita Jeowaba jarabʉta. Kĩrãduakara mara yibarirãra Jeowa neũdukʼawuabʉbʉrʉ, maʉ̃ba jara kĩrãkʉ ẽãta marasida Jeowa neũdukʼawua badogota, awuarabʉrʉ aba abakaʉba jʉrʉibara sãwũã Jeowa neũdukʼawua bʼaita. Daizeze Bedʼeaba jarabʉ «Daizeze kʼaita bʼaidua, mawũãra iyira mara kʼaita baya» (Sant. 4:8; 1 Crón. 28:9). ¿Kʼãrẽta obari Jeowaba bʉra iyi neũdukʼawua bamarẽã? Jeowaba diasi iyi warra Jesústa bʉbari, maʉ̃ kʼarea maʉ̃ra kʼãrẽ ẽ kĩrãkʼa akʉ ẽ baibara (Rom. 5:​1, 2). Jesús beida jẽda kĩrãbei wãi nãã krĩchara iyi beidaba sãwũã bʉra kʼarebabʉta, maʉ̃ ʉ̃rʉ krĩchaiba kʼarebayi audre nekʼãrẽ okĩrãita Jeowaita, mawũãra bʉara ũdubiyi kʼãrẽaba biga diabʉta Jeowaba akʉza Jesúsʼʉ̃meba bʉ kʼãrẽa osida baera.b

YI BURU KʼOEBɄRÃRA

8. Idibasidu yi buru kʼoepanʉrabara, ¿sãwũã oũdubiseabʉda biga diakĩrãbʉta Jesúsba odadeba?

⁸ Bʉ buru kʼoedadeba bʉa ũdubisi kʼãrẽaba kãgabʉta Jeowata akʉza soiduba ĩjãbʉta Jesústa bʉbari beidata (Heb. 12:​2, 3). Bari jaraita, wiña wiñane iyi ʉ̃rʉ kʼawuasi iya jarabʉta oũdubi wãsi, ne jaradia wãsi awuruta, kʼarebasi Daizeze ode wãbita akʉza pẽwãsida baibara bʉra mawũãsidu Daizeze ode takiru (2 Tim. 3:12).

9. ¿Kʼãrẽta berabariseabʉ yi buru kʼoebʉrãra?

⁹ Dayirã dããrababʉrʉde buru kʼoebʉta , edaʉde naʉ̃ta berabariseabʉ, wĩka wĩkade adua wãseabʉ daya Jeowa kãgabʉta akʉza Jesúsba nekʼãrẽ odata dayirã kʼarea kʼãrẽ ẽ kĩrãkʼa akʉ wãseapanʉ. Mawũã berabarisi Efesodebemarata, maʉ̃ kʼarea Jesúsba jarasi: «Bʉa nãã kãgabada kĩrãkʼara kãgabʉ ẽ» (Apoc. 2:​3, 4). Dayirãra ãba yi jʉrebarima wãseapanʉ, nejaradiaseapanʉ, Jeowaʼa yiwidʼiseapanʉ mamina maʉ̃ra oda ẽ baseabʉ soiduba, awuarabʉrʉ krĩchaseapanʉ oibara baera oita. Dayirãne maʉ̃ta berabarinʉmʉbʉrʉ ¿kʼãrẽba kʼarebai?

10. 1 Timoteo 4:​13, 15de ũrãgʼa diabʉbara, ¿dayirãbara sãwũã ũdubiseapanʉ?

¹⁰ Pabloba Timoteoʼa ũrãgʼata diasi jʉ̃zaba kʼawuamarẽã iya Daizezeita nekʼãrẽ obʉra sãwũã obʉ kʼawuaita (akʉra 1 Timoteo 4:​13, 15). Maʉ̃ ũrãgʼa Pabloba diadata dayirãbara, ¿sãwũã oũdubiseapanʉ? Krĩchaibara dayirãbida sãwũã Daizezedebemara soiduba akʉza zokea okĩrãne oita (Rom. 12:11). Bari jaraita, ãba yi jʉrebaride jʉ̃zaba ũrĩbara akʉza wãi naweda deda akʉibara kʼãrẽ ʉ̃rʉ bedʼeaita reunione. Adewara dayikʉzaʉba Daizeze Bedʼea kʼawuabʉrʉde jʉ̃zaba kʼawuaibara, maʉ̃ oita audre yibia abapai bʼaita nekʼãrẽ baduba aña krĩchabi ẽ baita akʉza audre ẽza ũrĩta daya kʼawuanʉmʉta. Adewara Jesús beida jẽda kĩrãbeima wãi nãã biʼia krĩchadaibara dayirãra kʼãrẽne kʼarebabʉta Jeowa ode baiba. Mawũã odara dayirãbara Jesús beidara kʼãrẽ ẽ kĩrãkʼa akʉ ẽ bayi akʉza Jeowa neũdukʼawua bia bayi.

11, 12. ¿Kʼãrẽta kĩrãbedaibara dayirãba Jeowaita edaʉde zokea nekʼãrẽ okĩrãpanʉ ẽ bʉrʉ? (Akʉra potota).

¹¹ Edaʉde dayirãra mapaeseapanʉ mawũã ẽ bʉrʉ oamane nekʼãrẽ oseapanʉ, maʉ̃ berabarinʉmʉba krĩchakara Jeowara dayiʉ̃me kĩrʉbʉta akʉza iya jaure zareata dayi diamabʉta. Apostol Pablosida abarikʼa mawũã berabarisi iya jarasi «Oamane obʉ bʉsida maʉ̃ra mʉ̃aʼa omarẽã zokʼadapeda baera oibara» (1 Cor. 9:17). ¿Kʼãrẽta jarakĩrãbasi Pablobara maʉ̃bara?

¹² Pablora ẽbẽra baera mapaebasi edaʉde akʉza edaʉde nejaradiaita wãkĩrãmabasi, mawũãsidu mejãcha zarea osi nejaradia wã takeraita. Dayirãbida abarika odaibara Pablode kĩrãkʼa, zarea odaibara nejaradia wã takeraita. Daizezeba jarabʉ dayirã diaita «zareata nekʼãrẽ okĩrãmarẽã akʉza maʉ̃ta omarẽã» (Filip. 2:13). Dayirãba zarea obʉbʉrʉ maʉ̃ oita Jeowaba kʼarebayi akʉza jẽda sobia panañi, adewara okĩrãne nekʼãrẽ opanañi.

13. ¿Kʼãrẽta dayikʉza widiseapanʉ Jeowaba kãgabʉde opanʉ kʼawuaita?

¹³ Daizeze Bedʼeaba jarabʉ 2 Corintios 13:5de: «Mayikʉza akʉidua maraba ĩjãbʉra ariya erbʉ kʼawuaita, ũdubidua mara jʉ̃zababʉta». Naʉ̃ ũrãgʼa diabʉra ¿dayirãbara sãwũã ũdubiseapanʉ? Maʉ̃itara dayikʉzaʉba krĩchaseapanʉ naʉ̃ ʉ̃rʉ, ¿mʉ̃itara audre yibiaka Jeowadebemata nããra oita? ¿Mʉ̃a jemenebʉdeba akʉza akʉbʉdeba Jeowa nããra nebiata obʉka? ¿Mebẽrãwabara ãba sobia edabʉka akʉza ibiade panʉka? (Sal. 97:10; Mat. 6:33; Efes. 4:​2, 3). Jesús beida jẽda kĩrãbei ewaridera maʉ̃ ʉ̃rʉ krĩchaita mejãchade bigabʉ ¿kʼãrẽã? Maʉ̃ba kʼarebai baera dayirãta audre Jeowa kʼawa bʼaita, maʉ̃ba ũdubiyi dayi ʉ̃rʉbʉrʉ audre krĩchabʉ ẽãta awuarabʉrʉ Jesúsba nekʼãrẽ oda kʼarea dayirãbaribida.c

YI KONGREGASIONEBA ÃĨ WÃBɄRATA

14. ¿Kʼãrẽ kʼãrẽa ʉ̃kʉrʉ mebẽrãrarã Jeowa odeba ãĩ wãbari?

¹⁴ Bʉta Jeowa odeba dããrabʉta, ʉ̃rabʉrʉ edabʉta, Daizeze odeba ãĩ wãsibʉrʉ, mejãcha bedʼea zromata erbʉ kʼarea, awuru mebẽrã ne aña oda kʼarea mawũã ẽ bʉrʉ jarada kʼarea aña wãsibʉrʉ akʉza bʉa osibʉrʉ nekayiruata maʉ̃ kʼarea ãĩ wãsibʉrʉ kongregasioneba, ¿kʼãrẽta oibara? (Luc. 21:34; Sant. 3:2).

15. ¿Jeowaba sãwũã akʉbʉ iyi odeba ãĩ wãnara? (Ezequiel 34:​11, 12, 16).

¹⁵ Daizeze Bedʼeaba jarabʉ Jeowaitara dayirãra iyi obejara kĩrãkʼabʉta ¿kʼãrẽa? Iya bia akʉbʉ baera akʉza nekʼãrẽ jõma diabʉ baera. Mamina dayirãta iyi odeba ãĩ wãsibʉrʉ maʉ̃bara jarakĩrãkʉ ẽ Jeowaba dayirãra kĩrãduasita, Jeowabara idibasidu kãga bʉra (akʉra Ezequiel 34:​11, 12, 16). Maʉ̃ kʼarea bʉa nama jarabʉta akʉbʉ baera akʉza ãba yi jʉrebari eda zesi baera ũrĩta, maʉ̃ba jarakĩrãbʉ bʉara wabida Jeowata ari kãgabʉta. Krĩchara naʉ̃ta, Jeowaba bʉra kʼarebasi nããrara iyi ode zebita, maʉ̃ kĩrãkʼa idibida kʼarebakĩrãbʉ bʉra akʉza jẽda iyi o eda zemarẽa iya ũdusi baera bʉara nebiata obʉta.

16. ¿Jeowa odeba ãĩ wãnata kʼãrẽba kʼarebai jẽda zeita? (Akʉra potota).

¹⁶ Jehová desea que vuelva kartaba jarabʉ Jeowabara bʉra iyi o eda jẽda azekĩrãbʉta mamina maʉ̃itara bʉara iduaribibara kĩrʉbʉta, aña krĩchabʉta akʉza sopʉabʉta, maʉ̃ta jõma ãĩbʉera bʉra akʉza kongregasionʼena jẽda zeyi. Bʉara kʼarebata erbʉ zõrãrã kongregasionebemata ãyiraba kʼarebayawapanʉ bʉra (Is. 32:2). ¿Kʼãrẽta oseabʉ bʉara jẽda Jeowa neũdukʼawua bʼaita akʉza iyi ode zeita? (Is. 1:18; 1 Ped. 2:25). Naʉ̃ta oseabʉ: ãba yi jʉrebariedama semanaza wã takeraita, zõrãrãbawara bedʼeaibara bʉra jẽda Jeowa o eda zekĩrãbʉta akʉza widiseabʉ bʉra kʼaiba jaradiadamarẽã Daizeze Bedʼeata. Maʉ̃ jõma obʉbʉrʉ bʉara oũdubiyi Jesús beidabara bʉra ne mejacha kʼarebabʉta. Kĩrãduakara naʉ̃ta: Jeowabara iyi juwade bʉra jẽda wekĩrãbʉ.

¿KʼÃRẼTA OI BɄARA?

17, 18. Jesús beida jẽda kĩrãbeima wãi nãã, ¿kʼãrẽta oseapanʉ?

¹⁷ Jesúsba jarasi «Daizezebara diasi yi warra ababʉta iyi ĩjãbʉra beida ẽ bamarẽã awarabʉrʉ ewari jõmaʉ̃nẽ ba marẽã» (Juan 3:16). Jesús beidadeba Jeowabara dayirãra ẽdrʉbibʉ nekayiruadeba akʉza beideba, maʉ̃ kʼarea kʼãrẽ ẽ kĩrãkʼa akʉ ẽ baibara maʉ̃ra (Rom. 3:​23, 24; 2 Cor. 6:1). Jesús beida ewaride dayirãbara krĩchaibara Jeowaba akʉza Jesúsʼʉ̃meba kʼãrẽaba nebiata ozebʉdata dayirã kʼarea maʉ̃ kʼarea dayirãbida nekʼãrẽ okĩrãpanaibara ãyitara.

¹⁸ ¿Kʼãrẽta okĩrãbʉ bʉara? Aba abakaʉba awuara krĩchabʉ baera awuara ũdubiseabʉ biga diaita ãya oda kʼarea. Bʉara bʉya kãgabʉtrʉ obʉ ẽ baera awuarabʉrʉ Jeowaba kãgabʉta otakiru baera Jeowabara nebiata mejãcha diayi (2 Cor. 5:15).