¿Kʼãrẽa nesidapanasi Jesústa dayirãbari beimarẽã?

1, 2. ¿Kʼãrẽã nesidapanʉ kʼarebadamarẽã? (Romanos 7:​22-24, akʉra potota).

KRĨCHARA naʉ̃ta, deta kora wañi ẽbẽra abaʉ ʉ̃rʉ, deba iyi ʉ̃rʉ katʉbʉ baera iyi dobara ẽdrʉbe ẽ, maʉ̃ kʼarea iyara jʉrʉbʉ kʼaiba kʼarebadamarẽã.

² Dayirãsida maʉ̃ ẽbẽra de edre wãsi kĩrãkʼa bʉ nesidapanʉ kʼaiba kʼarebamarẽã, ¿kʼãrẽa? Adán Evaʉ̃meba Jeowaba jarabʉta ũrĩna ẽ basi baera nemitia omiabasida, dayirãsida maʉ̃neba ʉ̃rʉ baera abarika nemitia opanʉ, maʉ̃ nemitiadebara dayikʉzaʉbara ẽdrʉbeda ẽ nesidapanʉ kʼaiba kʼãrẽbadamarẽã. Pabloba karta Romanoraʼa bʉside iya jara ũrĩbisi sãwũã sentipanʉta ẽbẽrarã nemitia omia baera (akʉra Romanos 7:​22-24). Pabloba kʼawuabasi iyira nemitia omia baera zeibasita ewarita beita, maʉ̃ kʼarea iyikʉzaʉba widisi kʼaiba maʉ̃neba ẽdrʉbiseabʉta (Rom. 6:23). Idi ewade dayirãbida nesidapanʉ kʼaiba ẽdrʉbimarẽã nemitadeba akʉza beideba.

3. ¿Kʼãrẽ nebiata ũduseapanʉ Jesús beidadeba?

³ Pabloba widisi kʼaiba ẽdrʉbiseabʉta nemitiadeba akʉza beideba, maʉ̃ra iyikʉzaʉba panʉsi: «Jeowaba kʼarebaseabʉta Jesús beidadeba» (Rom. 7:25). Jeowaba diasi baera Jesústa dayirãbari beimarẽã nebiata ũbea ũduseapanʉa: Nããbemara, Jeowaba kĩrãdʉabʉ dayi nemitiata. Ũme, zrogapanañi. Ũbea, Jeowa neũdukʼawua baseabʉ. Naʉ̃ ʉ̃rʉ audre kʼawuabʉrʉba kʼarebayi Jeowata mejãcha kãgaita akʉza Jesústa dayirã kʼarea beisi baera mejãcha biga diaita (Rom. 15:​13, Col. 1:​13,14).

JESÚSTA DAYIRÃBARI BEISI BAERA JEOWABARA DAYIRÃ NEMITIARA KĨRÃDUABɄ

4, 5. ¿Kʼãrẽa dayirãbara nesidapanasi Jesústa dayirãbari beimarẽã? (Eclesiastés 7:20)

⁴ Jesústa dayirãbari beisi baera Jeowaba dayirã nemitiara kĩrãduabʉ. Dayirã jõmaʉ̃ta nemitia opanʉ dayi sãwũã bedʼeabʉdeba akʉza kʼãrẽ obʉdeba (akʉra Eclesiastés 7:20). Nemitiara awuara awuarakabʉ mamina ʉ̃kʉrʉra jipa kayirua Jeowaitara. Bari jaraita, ley Jeowaba diadaba jarasi, ẽbẽra aba yi kimaneba ãĩ wãbʉbʉrʉ akʉza mia beabʉbʉrʉ maʉ̃ ẽbẽrarã beadaibasita. (Lev. 20:10; Núm. 35:​30, 31). Mamina ʉ̃kʉrʉ nemitiara dayirãitara kʼãrẽ ẽ kĩrãkʼa bʉmina Jeowaitara maʉ̃ra nemitia. Davidʼba jarasi: «Mʉ̃ra jʉra kʼawuabayi mʉ̃ kĩrãmeneba nemitia oẽ baita» (Sal. 39:1). Kʼawuatabeda kĩrãkʼa dayirãbara nemitiara oseapanʉ daya bedʼeabʉdebida(Sant. 3:2).

⁵ Daizeze Bedʼeaba jarabʉ: «Dayirãba ‹nekʼayiruata neẽã apanʉbʉrʉ›, dayikʉza yi sewabʉ akʉza wãrĩnu bedʼeaira neẽbayi dayirãne» (1 Juan 1:8). Dayirã jõmaʉ̃ba aña bedʼeabari akʉza ne aña obari, maʉ̃ tẽã krĩchabaribaibara, sãwũãita jarasi mʉ̃a maʉ̃ra.

6, 7. ¿Kʼãrẽneba Jeowabara kĩrãduabʉ dayirã nemitiara? (Akʉra potota).

⁶ Dayirã nemitiata Jeowaba kĩrãduaita iya zokʼabʉesi Jesústa dayirãbari beimarẽã. Jeowaba Jesús beidadeba dayirã nemitia kĩrãduabʉmina maʉ̃ba jarakĩrãkʉ ẽ dayirãba nemitia obʉra Jeowabara kʼãrẽ ẽ kĩrãkʼa badua kĩrãduanʉmaita (Efes. 1:7; Is. 59:2). Jeowaba jõma aripe obʉ baera nesidabasi dayirãra kʼãrẽneba ẽdrʉbita.

⁷ Ley Jeowaba diadaba jarabasi Daizezeba kĩrãduamarẽã israelitarãba nemitia obadata beaibarabasita nedʉwʉrʉta Jeowaita (Lev. 4:​27-31; 17:11). Nedʉwʉrʉ aba beapanʉbara ẽbẽra jõmaʉ̃ta kʼarebabe ẽ basi, awuarabʉrʉ nesidapanasi maʉ̃ audre yibiata jõmaʉ̃rata kʼarebaita. Maʉ̃ra Jesús beidadebasi, maʉ̃neba ʉ̃ta Jesús beidadebʉrʉ Jeowabara kĩrãduabʉ dayirã nemitiara. Pabloba karta Corintiodebema bʉ diabʉeside jarasi ãya naweda kʼãrẽ nemitia odata, mamina maʉ̃ tẽã jarasi kʼãrẽ nebiata ũduseapanʉta Jesús beidadeba maʉ̃ kʼãrẽa jarasi: «Marara sʉgʉsida neneẽã babisida akʉza Jesús trʉ̃neba adewara Daizeze jaure zareadeba jarasida, marara kʼẽrẽpapanʉta»(1 Cor. 6:​9-11).

8. ¿Naʉ̃ añone Jesús beida jẽda kĩrãbei ewari wãi nãã kʼãrẽta krĩchadaibara?

⁸ Jesús beida jẽda kĩrãbei ewari wãi nãã dayikʉzaʉba krĩchadaibara Jeowaba dayirã nemitia kĩrãduabʉdeba kʼãrẽ nebiata ũduseapanʉta. Bari jaraita, Jesústa beisi baera dayirã kʼarea badua krĩcha onʉma ẽ baibara nãã nemitia oda kʼarea, Jeowaba dayirã nemitia kĩrãduasi baera. Mamina dayitara zareabʉbʉrʉ ĩjãita Jeowaba kĩrãduasita mawũã ẽ bʉrʉ krĩchabʉbʉrʉ Jeowaba kĩrãduabʉmina mʉ̃yikʉza kĩrãdua be ẽãta, kʼawuadaibara Jeowabʉrʉ kʼawuachuta kʼai nemitiata kĩrãduaita. Adewara iya zareata diasi iyi warra Jesúsʼa dayirãta kʼawua omarẽã, dayirãta jʉrʉ ẽ basi jaramarẽã kʼai nemitiata kĩrãduaita mawũã ẽ bʉrʉ kĩrãdua ẽ baita. Daizeze Bedʼeabara jarabʉ: «Dayirãta iyi ʉ̃nanepanʉbʉrʉ [ . . . ] akʉza yi warra Jesús waba dayirã kayirua jõma sʉgʉbʉa» (1 Juan 1:​6, 7). Ĩjãnaibara Jeowaba dayirã nemitiara wãrĩnu kĩrãduaita Jesús beidadebʉrʉ, Jeowabara dayirãra so zʉbʉria akʉbʉta akʉza Jeowabara dayirã nemitiara kĩrãduayawabʉta (Sal. 86:5).

JESÚSʼRA DAYIRÃBARI BEISI BAERA ZROGAPANAÑI

9. ¿Kʼãrẽta jarakĩrãbʉ bedʼea «pecadobara»? (Salmo 51:5).

⁹ Daizeze Bedʼeade kapuria bedʼeade bedʼea «pecado» abʉbara jarakĩrãbʉ nekʼãrẽ ũme: Abara daya nemitia obʉta. Ũmera Adán akʉza Evadeba zebʉbaera dayirãsida todadeba nemitia omiara, maʉ̃ra kapuria Bedʼeadera «imperfección» apanʉ (akʉra Salmo 51:5). Maʉ̃ kʼarea wũãwũãra yiwidi to wãsida kayaseapanʉ akʉza beiseapanʉ, ãya nekʼãrẽ mitia oẽ basimina. Maʉ̃ba jara ũrĩbibʉ kʼãrẽa ẽbẽra biara akʉza ẽbẽra mitira abarika beipanʉta. Adán akʉza Evadeba dayirãta zebʉ baera jõmaʉ̃ta kayapanʉ, zõnãbapanʉ, beipanʉ, nemitia oita krĩchapanʉ akʉza nemitia opanʉ.

10. ¿Sãwũã sentisida Adánta akʉza Evaʉ̃mera nemitia oda tẽã?

¹⁰ Adán akʉza Evaʉ̃meba nemitia osidade Jeowa bedʼea ũrĩ ẽ baside ãyira bia ẽ sentisida (Rom. 2:15). Kʼawuaedasida ãyi sode akʉza krĩchade awuara totosita maʉ̃ kʼãrẽa ãyi kakuara anakĩrãpanasi akʉza mĩrʉkĩrãpanasi Daizezedeba ẽbẽra kayirua kĩrãkʼa (Gén. 3:​7, 8). Ãya sentikabadata sentisida. Bari jaraita, krĩcha osi, nemitia obʉrʉ kĩrãkʼa sentisida adewara perasida, ãyira mawũã bʼaibasi beiyeda(Gén. 3:​16-19).

11. ¿Adánʼneba akʉza Evadeba zebʉ baera sãwũã sentipanʉ?

¹¹ Dayirãsida Adán akʉza Evadeba zebʉ baera abarika sentipanʉ, krĩncha opanʉ, nemitia obʉ kĩrãkʼa sentipanʉ, perapanʉ akʉza kayabibʉ. Dayirãba mejãcha zarea opanʉmina bia bʼaita, mamina jõmaʉ̃nẽ bia babe ẽ bayi. Daizeze Bedʼeaba jarabʉ, «nekʼãrẽ jõma parãnara bianʉme ẽ basi» (Rom. 8:20). Bari jaraita, ẽbẽrarãbara jõbikĩrãpanʉ yõta, jarrabata adewara naʉ̃ drʉa aripanʉta mamina maʉ̃ jõmaʉ̃ra oauda ẽ, awuarabʉrʉ Jesústa dayirãbari beidadebʉrʉ maʉ̃ra jõma ara oyi.

12. ¿Jesústa beisi baera kʼãrẽ nebiata ũdudai?

¹² Daizeze Bedʼeabara jarabʉ: «Nekʼãrẽ jõma paranara ẽdrʉita nekʼayiruadeba akʉza beideba» (Rom. 8:21). Maʉ̃ta berabariyi Jesústa dayirãbari beisi baera, naʉ̃ba jarakĩrãbʉ dayirãta ẽjũã kĩrãwãreãnẽ babʉrʉde kayada ẽ baita, sopʉada ẽ baita, pera ẽ baita akʉza krĩcha oẽ baita nemitia obʉ kĩrãkʼa senti ẽ baita. Jesúsra dayirãbari beisi baera zokʼayi naʉ̃ drʉata maʉ̃ kʼarea kʼarebayi ẽbẽrarãba bedʼea zromata erbʉra ara oita akʉza aduʼa panaita(Is. 9:​6, 7).

13. ¿Jesús beida jẽda kĩrãbei ewaride wãi nãã kʼãrẽta krĩchadaibara?

¹³ Krĩchadadrʉ dayirãra sãwũã panaita ẽjũã kĩrãwãreãnẽra, dayirã nemitia oka babʉrʉde ewariza urumabʉrʉde bia sentipanañi akʉza krĩcha onʉma ẽ bayi dayirã mebẽrã kayai kʼarea, jarrabata berabari kʼarea akʉza kʼaita bei kʼarea. Idi ewadebida aduʼa sentipanañi krĩchapanʉbʉrʉ ẽjũã kĩrãwãreãnẽ sãwũã panaita (Heb. 6:​18, 19). Ẽjũã kĩrãwãreãnẽ sãwũã bʼaita badua krĩchabʉrʉba kʼarebayi dayi ĩjãbʉta teitea babita, adewara kʼarebayi awuantaita dayirãba bedʼea zroma ũdupanʉta, maʉ̃ kʼarea soiduba ĩjãnaibara Jeowaba jarabʉta: «Iyi jʉrʉbʉara nebiata diabʉ» (Heb. 11:6). Jeowabara idi ewade so zareata diabʉ akʉza ẽjũã kĩrãwãreãnẽ babiyi, maʉ̃ra jõma berabariyi Jesústa dayirãbari beisi baera.

JESÚSTA DAYIRÃBARI BEISI BAERA DAIZEZE NEŨDUKʼAWUA BASEABɄ

14. ¿Adán akʉza Evaʉ̃meba nemitia odadeba kʼãrẽta berabarisi ẽbẽrarã?

¹⁴ Daizeze Bedʼeaba jara ũrĩbibʉ Adán akʉza Evaʉ̃meba nemitia odadeba ẽbẽrarã jõmaʉ̃ta Daizezedeba ãĩbʉ kĩrãkʼabʉ (Col. 1:21; Rom. 8:​7, 8). ¿Kʼãrẽa? Jeowabara jõma aripe obʉ baera nekʼayirua obʉra bia akʉ ẽ. Adewara Daizeze Bedʼeabara jarabʉ Jeowabara nemitia oka baera kãga ẽ nemitiata odamarẽã akʉza akʉkĩrã ẽ yi nemitia obʉrara (Hab. 1:13). Bari jaraita, edaʉde kĩrãre berabarita nesidapanʉ puenteta, maʉ̃ kĩrãkʼa dayirãba nesidapanasi Daizezeʉ̃me neũdukʼawua bʼaita Jesúsʼra dayirãbari beʉmarẽã, mawũã jẽda Daizeze neũdukʼawua bʼaita.

15. ¿Jesús beidadeba sãwũã kʼarebasi ẽbẽrarã akʉza jẽda Jeowa neũdukʼawua bʼaita?

¹⁵ Daizeze Bedʼeaba jarabʉ Jesúsʼra «beisi dayirã kayirua kĩrãduamarẽã» (1 Juan 2:2). ¿Kʼãrẽta jarakĩrãbʉ maʉ̃bara? Maʉ̃bara jarakĩrãbʉ Jesús beidadeba ẽbẽrarã akʉza jẽda Jeowa neũdukʼawua baseabasi, ¿sãwũã mawũã? Jesús beidadebʉrʉ mawũãtrʉ ẽbẽra kʼẽrẽpa panʉrara Jeowaba bia akʉbasi (Rom. 3:​23-26). Jesús beidaba kʼarebasi ẽbẽrarã nããbemarasida (Gén. 15:​1, 6). ¿Kʼãrẽã Jeowabara bia akʉbasi ẽbẽrarã waidi Jesúsʼra bei ẽ basibʉrʉ? Jeowabara wãrĩnu ĩjãbasi baera iyi warra Jesúsʼra zeibasita naʉ̃ drʉa eda beita ẽbẽrarã jõmaʉ̃bari akʉza ẽbẽrarã Jeowa neũdukʼawua badamarẽã (Is. 46:10).

16. Jesús beida jẽda kĩrãbei ewari wãi nãã, ¿kʼãrẽta krĩchadaibara? (Akura potota).

¹⁶ Krĩchadadrʉ Jesús beida jẽda kĩrãbei ewaride wãi naweda, kʼãrẽ nebiata ũdupanʉta Jesústa beida kʼãrẽa dayirãra nekʼayirua obʉmina (Col. 1:​19, 20). Bari jaraita, dayirãbara Jeowara zeze aseapanʉ akʉza dayi neũdukʼawuata jaraseapanʉ (Mat. 6:9). Mamina, ¿maʉ̃ta mawũã jarapanʉka dayi nebiata obʉ baera mawũã ẽ bʉrʉ daya nekʼãrẽ bio obʉ baera? Mawũã ẽ, Jeowabara diasi baera iyi warra Jesústa dayirãbari beimarẽã, maʉ̃ awadebʉrʉ Jeowa neũdukʼawua baseapanʉ. Maʉ̃ kʼãrẽa dayirãbara wawiata ũdubibara akʉza edabʉta krĩchapanaibara.

JESÚS BEIDADEBA JEOWABA KÃGA ŨDUBIBɄ DAYIRÃ

17. ¿Kʼãrẽã jaraseapanʉ Jesús beidadeba Jeowabara dayirãra mejãcha kãgabʉta? (Efesios 2:​4, 5).

¹⁷ «Jeowaba diasi baera iyi warra Jesústa dayirã ũdubibʉ mejãcha kãgabʉta» (akʉra Efesios 2:​4, 5). Deta ẽbẽra abaʉ ʉ̃rʉ kora wãpe katʉnʉmʉnera, iyara kʼawuabʉ nesidabʉta kʼaiba kʼarebamarẽã, abarika dayirãbida kʼawuapanʉ nesidapanʉta kʼaiba kʼarebamarẽã akʉza ẽdrʉbimarẽã beideba akʉza nemitiadeba (Hech 13:48). Maʉ̃ kʼãrẽa Jeowaba jaradiabʉ iya zokʼai ewaride ʉ̃rʉ, iyi ʉ̃rʉ akʉza iyi warra ʉ̃rʉ (Juan 17:3). Naʉ̃ba kʼawuabibʉ Jeowaba jarabʉra jõma aripe obʉta akʉza Satanásʼra sewa nebʉrʉ omiata.

18. ¿Kʼãrẽ ʉ̃rʉ krĩchadaibara?

¹⁸ Naʉ̃ artikulodeba dayirãbara kʼawuasida Jesús beidadeba daya aba abakaʉba nebiata ũduseapanʉta, mamina maʉ̃ awa krĩchada ẽ baibara bʉ nekʼãrẽ audre yibiata, Jeowa trʉ̃ra neneẽã babita. Satanásʼba jardin Edénʼne Jeowa trʉ̃ta imitia jarasi baera (Gén. 3:​1-5, 15). Mõbera, Jesús beidadeba Jeowa trʉ̃ra neneẽã babibʉ, adewara dayirãta ẽdrʉbiseabʉ beideba akʉza nekʼayirua oideba, maʉ̃ awuara dayirãbara Jeowaʼare ibia bedʼeaseapanʉ, mawũã ũdubita Satanásʼra sewa nebʉrʉ omiata (Prov. 27:11). Wuarebema artikulode kʼawuadayi Jesústa dayirã kʼarea beisi baera, dayirãbara kʼãrẽta oũdubiseapanʉta.