¿Chucoch mi lac wen chaʼlen cʼojol?

Jumpʼejl wen cʌmbil bʌ clínica am bʌ ti Estados Unidos miʼ yʌl chaʼan jiñi lac piʼʌlob añobix bʌ i jabilel «an cabʌl chuqui miʼ pensaliñob. Come cabʌl jax chuqui miʼ mejlel i qʼuextan laj cuxtʌlel». Laʼ laj qʼuel chuqui tac miʼ yʌcʼonla ti cabʌl pensal:

Tiʼ caj jumpʼejl divorcio
Cheʼ bʌ an majqui miʼ chʌmel ti lac familia
Cheʼ bʌ an tsʌts bʌ cʼamʌjel
Cheʼ bʌ miʼ yujtel jumpʼejl accidente
Tiʼ caj jiñi tsʌnsa, xujchʼ yicʼot yan tac bʌ
Tiʼ caj maʼañix cʼaj o
Cheʼ miʼ ñumel tsʌts bʌ icʼ jaʼal yicʼot wocol tac muʼ bʌ i tech lac piʼʌlob
Wocol tac ti escuela o ti eʼtel
Tiʼ caj maʼañic eʼtel yicʼot taqʼuin

JIÑI XBIʼTALOB AÑOBɅCH I CʼOJOL JAʼEL

Jiñi xbiʼtalob añʌch chuqui miʼ cʼojoʼtañob jaʼel. An muʼ bʌ i ticʼlʌntelob ti escuela, an maʼañix bʌ miʼ qʼuejlelob ti ñuc tiʼ yotot. Miʼ jajtsʼelob, miʼ wajlentelob, miʼ jopʼbentelob i mul o miʼ ticʼlʌntelob ti piʼleya. An muʼ bʌ i wen chaʼleñob pensar tiʼ caj jiñi examen o chaʼañob i calificación. An yambʌ muʼ bʌ i qʼuelob bajcheʼ woliʼ jejmel majlel i familia tiʼ caj jiñi divorcio. Jiñi xbiʼtalob mucʼoʼ bʌ ti wen pensal miʼ chaʼleñob leco bʌ ñajal, wocol miʼ cʌñob jun, miʼ tajob cabʌl chʼijiyemlel o maʼañic miʼ mulan i ñochtan yambʌlob. An maʼañic bʌ miʼ mejlel i ticʼob i bʌ, i ora miʼ michʼañob. Jiñi xbiʼtalob añoʼ bʌ i chaʼan ili wocol yom miʼ coltʌntelob ti ora.