¿Chuqui miʼ yujtel ti lac bʌcʼtal cheʼ mucʼonla ti cʼojol?
Cheʼ bʌ mi lac ñusan tsʌts bʌ wocol i mucʼonla ti wen pensal, jiñi lac sicojc miʼ choc majlel hormona tac tiʼ pejtelel lac bʌcʼtal, cheʼ bajcheʼ ili, jiñi lac pusicʼal orajix miʼ cajel ti tijpʼejl, miʼ cʼʌjquel lac presión, orajix mi lac jap icʼ i miʼ tsʌtsʼan jiñi lac chijil tac. Cheʼ maxto la cujilic chuqui woli (choncol) lac chaʼlen, jiñi lac bʌcʼtal chajpʌbilix chaʼan chuqui mi caj i mel. Cheʼ bʌ maʼañix chuqui woli (yʌquel) lac wen pensalin, jiñi lac bʌcʼtal miʼ cʌy i yubin chaʼan «an ti wocol» i miʼ chaʼ tojʼesan i bʌ.
¿AM BA I WENLEL CHEʼ MUCʼONLA TI CʼOJOL?
Jiñi cʼojol jiñʌch junchajp ñʌmʌl bʌ i mel jiñi lac bʌcʼtal chaʼan miʼ coltañonla lac lʌtʼ jumpʼejl wocol o chuqui jach miʼ ujtel ti lac tojlel. Yaʼʌch miʼ tejchel ti lac sicojc. Cheʼ bʌ an chuqui mi lac pensalin miʼ coltañonla chaʼan ora mi lac ñaʼtan chuqui yom bʌ mi lac mel. Cheʼ mucʼonla ti tsʼitaʼ cʼojol miʼ mejlel i coltañonla chaʼan mi lac taj chuqui la com bʌ o chaʼan maʼañic mi lac lujbʼan ti ora. Jumpʼejl ejemplo, cheʼ mi lac mel jiñi examen, cheʼ mi laj cʼajtin la queʼtel o cheʼ mi lac chaʼlen alas.
Pero cheʼ cʌlʌxix jiñi laj cʼojol o maʼañix miʼ lajmel, miʼ mejlel i ticʼlañonla. Cheʼ bʌ chʌn «an ti wocol» miʼ yubin jiñi lac bʌcʼtal, miʼ mejlel i ticʼlañonla ti laj cuxtʌlel, miʼ mejlel i techbeñonla lac michʼajel, miʼ ñajʌyel lac chaʼan chuqui jach, mach tojix chuqui mi lac ñaʼtan, i cheʼto jaʼel miʼ yochel lac bʌqʼuen. Miʼ mejlel ti qʼuextʌyel jiñi lac melbal (chaʼlibal) yicʼot bajcheʼ yilal mi laj qʼuel yambʌlob. Jiñi lac piʼʌlob ñumeñix bʌ ti pʼis chuqui miʼ pensaliñob miʼ tech i cʌlʌx japob lembal, miʼ cʼʌñob droga, tsʼac tac, oñix miʼ cʼuxob i bʌl i ñʌcʼ, miʼ ñucʼob cʼujts yicʼot miʼ pʌsob mach bʌ weñic melbalʌl. Cheʼto jaʼel, miʼ cʼotel i yubiñob i chʼijiyemlel, wen lujbix miʼ yubiñob i bʌ o miʼ ñaʼtan i tsʌnsañob i bʌ.
Anquese jiñi cʼojol mach junlajalic bajcheʼ miʼ tajonla, miʼ mejlel i techbeñonla yan tac bʌ cʼamʌjel i miʼ ticʼlan lʌcʼʌ tiʼ pejtelel lac bʌcʼtal.