Enero

Jesús tsiʼ ñaxan «qʼuele jiñi xʼixic» i cheʼ jiñi «tsaʼ wen ñijcʌyi i pusicʼal» (Luc. 7:13). Pero mach tsaʼic jach i pejca, tsiʼ tejchesʌbe i yalobil i «tsiʼ chaʼ aqʼue» (Luc. 7:​14, 15). ¿Chuqui mi laj cʌn ti jiñi i milagro Jesús? Junchajp jiñʌch chaʼan bajcheʼ mi lac pʌsben pʼuntaya jiñi chʼijyemoʼ bʌ. Cheʼ bajcheʼ Jesús, mucʼʌch i mejlel lac pʌs lac pʼuntaya tiʼ tojlel jiñi am bʌ majqui chʌmen i chaʼan. Yom mi lac ñaxan wen qʼuel, cheʼ jiñi añʌch chuqui yom mi la cʌl yicʼot mi lac mel chaʼan mi laj coltan yicʼot mi lac ñuqʼuesʌben i pusicʼal (Pr. 17:17; 2 Cor. 1:​3, 4; 1 Ped. 3:8). Anquese mach cabʌlic chuqui mi la cʌl i mi lac pʌs la cutslel, cabʌl bajcheʼ mi lac mejlel ti coltaya. w23.04 5, 6 párr. 13-15

Anquese yujil chaʼan Lázaro tsaʼix chʌmi, tsaʼto cʌyle yambʌ chaʼpʼejl qʼuin yaʼ baqui an. Jin chaʼan, cheʼ bʌ tsaʼ cʼoti ti Betania chʌmpʼejlix qʼuin i chʌmel Lázaro. Jesús yom i mel junchajp muʼ bʌ caj i coltan i yamigojob yicʼot mi caj i yʌqʼuen i ñuclel Jehová (Juan 11:​6, 11, 17). ¿Chuqui mi laj cʌn ti ili relato? Cheʼ bʌ Marta yicʼot María tsiʼ chocbeyob majlel tʼan Jesús, maʼañic tiʼ subeyob chaʼan miʼ cʼotel ti Betania. Tsaʼ jach i subeyob chaʼan cʼam jiñi i yamigo (Juan 11:3). Cheʼic yom, Jesús tsaʼ mejli i chaʼ cuxtesan Lázaro anquese ñajt an. Pero tsaʼto majli cʼʌlʌl ti Betania chaʼan miʼ yajñel yicʼot jiñi i yamigajob, María yicʼot Marta. ¿Am ba juntiquil a wamigo yomʌch bʌ i coltañet anquese maʼañic maʼ cʼajtiben? Mi añʌch, a wujil chaʼan mi caj i coltañet cheʼ bʌ an wocol (Pr. 17:17). Mi mucʼʌch lac lajin Jesús, weñʌch bʌ amigojonla. w23.04 10 párr. 10, 11

Cheʼ bʌ woli lac ñusan jumpʼejl wocol, tajol mi lac ñaʼtan chaʼan Jehová maʼañic mi caj i chʼʌm tilel jiñi tsijib pañimil. Pero mach yomic i yʌl chaʼan mach pʼʌtʌlic lac ñopoñel. Laʼ la cʌl jumpʼejl ejemplo. Cheʼ bʌ i yorajlel cabʌl tsʌñal, tajol mi lac ñaʼtan chaʼan mach talic i yorajlel ticwal. Pero mucʼʌch. Cheʼ miʼ yujtel jaʼel cheʼ bʌ wen chʼijyemonla, tajol mi lac ñaʼtan chaʼan mach talic jiñi tsijiʼ bʌ pañimil. Pero mi pʼʌtʌlʌch lac ñopoñel, mi lac ñop chaʼan Jehová mi caj i tsʼʌctesan i tʼan (Sal. 94:​3, 14, 15; Heb. 6:​17-19). Jiñi mi caj i coltañonla chaʼan mi lac bej acʼ ti ñaxan jiñi lac chʼujutesaya ti Jehová. Yomʌch pʼʌtʌl lac ñopoñel chaʼan mi lac chaʼlen subtʼan. Cheʼ bʌ mi lac suben lac piʼʌlob chaʼan bʌ jiñi tsijiʼ bʌ pañimil, miʼ yʌlob chaʼan utsʼatʌch yubil pero maʼañic miʼ ñopob (Mat. 24:14; Ez. 33:32). Pero mach yomic mi lac lajiñob cheʼ bʌ miʼ ñaʼtañob bajcheʼ jiñi. Jin chaʼan, yomʌch mi lac bej pʼʌtʼesan lac ñopoñel. w23.04 27 párr. 6, 7; 28 párr. 14

¿Am ba a cʼajtibe a bʌ mi Jehová mucʼʌch i jacʼ jiñi a woración tac? Mi añʌch, mach a bajñelic jach. Cabʌl hermanojob an i yʌlʌyob chaʼan an i melbeyob i bʌ ili cʼajtiya, ñumento cheʼ wocol woli i ñusañob. Tajol joñonla jaʼel maʼañic mi lac wen taj laj qʼuel bajcheʼ miʼ jacʼbeñonla Jehová jiñi la coración tac, ñumento cheʼ bʌ woli lac ñusan wocol. ¿Chucoch miʼ mejlel lac ñop chaʼan Jehová mucʼʌch i jacʼben i yoración jiñi i wiñicob? Jiñi Biblia miʼ subeñonla chaʼan Jehová mucʼʌch i wen cʼuxbiñonla yicʼot chaʼan miʼ qʼuelonla ti ñuc (Ageo 2:​7, TNM; 1 Juan 4:10). Jin chaʼan, miʼ subeñonla chaʼan mi laj cʼajtiben i coltaya ti oración (1 Ped. 5:​6, 7). Yom chaʼan chʌn lʌcʼʌl mi la cajñel tiʼ tojlel yicʼot chaʼan mi lac lʌtʼ pejtelel jiñi lac wocol tac. Yaʼ ti Biblia mi lac taj cabʌl relato chaʼan bajcheʼ Jehová tsiʼ jacʼbe i yoración jiñi i wiñicob. ¿Muʼ ba i ñumel ti a jol jumpʼejl ejemplo? w23.05 8 párr. 1-4

María i yamigajʌch Jehová. Jiñi i ñopoñel mach yaʼic cʌyʌl tiʼ chaʼan bʌ José. Wen i cʌñʌ jiñi Tsʼijbujel tac i miʼ locʼsʌben i yorajlel chaʼan miʼ wen ñaʼtan muʼ bʌ i yʌl (Luc. 2:​19, 51). María juntiquilʌch wem bʌ ijñamʌl come miʼ wen cʼuxbin Dios. Ili ora cabʌl hermanajob cheʼob bajcheʼ María. Laʼ laj qʼuel tiʼ tojlel Émiko, miʼ yʌl: «Cheʼ bʌ maxto añic c ñoxiʼal, joñon mic bajñel chaʼlen wersa chaʼan mic lʌcʼtesan c bʌ ti Dios. Pero cheʼ bʌ tsaʼ ñujpuñiyon jiñix c ñoxiʼal miʼ mel oración yicʼot miʼ coltan jiñi lon c familia chaʼan miʼ lʌcʼtesan i bʌ ti Dios. Tsaʼ j qʼuele chaʼan jiñi c ñopoñel yaʼ jach cʌyʌl tiʼ chaʼan bʌ c ñoxiʼal. Cujil chaʼan añʌch chuqui yom mic mel chaʼan mic lʌcʼtesan c bʌ ti Jehová. Jin chaʼan, wʌle mic bajñel locʼsʌben i yorajlel chaʼan mic chaʼlen oración, mic pejcan jiñi Biblia yicʼot mic wen ñaʼtan muʼ bʌ i yʌl» (Gál. 6:5). Ijñametbʌla, mi mucʼʌch laʼ chaʼlen wersa laʼ ñumen lʌcʼtesan laʼ bʌ ti Jehová, jiñi laʼ ñoxiʼal mi caj i ñumen cʼuxbiñetla yicʼot mi caj i qʼueletla ti ñuc (Pr. 31:30). w23.05 22 párr. 6

Cheʼ bʌ mi la quilan pañimil mach toj la cujilix i bʌcʼñʌntel Dios, yomto mi laj cʌn lac mel. Junchajp muʼ bʌ i coltañonla jin cheʼ mi lac wen qʼuel yicʼot mi lac ñaʼtan jiñi melbil tac bʌ i chaʼan Jehová, come yaʼʌch baqui mi laj qʼuelben i ñaʼtʌbal, i pʼʌtʌlel yicʼot i cʼuxbiya. Cheʼ bʌ mi lac wen ñaʼtan iliyi mi lac ñumen qʼuel ti ñuc yicʼot mi lac ñumen cʼuxbin Jehová (Rom. 1:20). Yambʌ muʼ bʌ caj i coltañonla lac bʌcʼñan Jehová jiñʌch cheʼ mi lac chʌn chaʼlen oración. Cheʼ bʌ mi lac mel ñumen lʌcʼʌl mi la cubin lac bʌ tiʼ tojlel come jajayajl mi laj cʼajtiben lac pʼʌtʌlel chaʼan mi laj cuch jumpʼejl wocol, mi laj cʼajtesan chaʼan cabʌlʌch i pʼʌtʌlel. Cheʼ bʌ mi la cʌqʼuen wocolix i yʌlʌ chaʼan tsiʼ choco tilel i Yalobil, mi laj cʼajtesan bajcheʼ cʼamel miʼ cʼuxbiñonla. I cheʼ bʌ mi laj cʼajtiben i coltaya ti jumpʼejl wocol, mi laj cʼajtesan chaʼan cabʌlʌch i ñaʼtʌbal. Pejtelel iliyi miʼ coltañonla lac ñumen qʼuel ti ñuc yicʼot mi laj cʌntan lac bʌ chaʼan maʼañic mi lac mel muʼ bʌ i ñajtʼesañonla tiʼ tojlel. w23.06 15 párr. 6, 7

Jehová jiñʌch jiñi ñuc bʌ juez, jin chaʼan jamʌ tsiquil miʼ yʌqʼuen mandar jiñi i wiñicob. Jiñi junmojt muʼ bʌ i pʌsob bij ti ñaxam bʌ siglo tsiʼ yʌlʌ uxchajp baqui yom miʼ pʌsob i xucʼtʌlel jiñi xñoptʼañob: Chaʼan mach yomic mi lac chʼujutesan mach bʌ i sujmic dios, chaʼan yom chʼujul mi laj qʼuel jiñi chʼichʼ i chaʼan mach yomic mi lac yajlel ti tsʼiʼlel (Hech. 15:​28, 29). ¿Chuqui yom mi lac mel? Maʼañic mi lac chʼujutesan mach bʌ i sujmic dios, cojach Jehová. Jiñʌch tsaʼ bʌ subentiyob jiñi israelitajob ti wajali (Dt. 5:​6-10). Cheʼ bʌ Satanás tiʼ sube Jesús chaʼan miʼ chʼujutesan, tsiʼ jacʼbe: «Chʼujutesan jiñi a Dios Jehová i jin jach yom maʼ melben i yeʼtel» (Mat. 4:​8-10). Jin chaʼan, maʼañic mi lac chʼujutesan imagen tac mi muqʼuicto laj qʼuelob bajcheʼ dios jiñi lac piʼʌlob wen cʌmbiloʼ bʌ, bajcheʼ jiñi añoʼ bʌ i yeʼtel ti ñopbalʌl, políticojob, xʼalasob, xcʼayob o yambʌlob. Cojach mi lac chʼujutesan Jehová, tsaʼ bʌ i mele pejtelel chuqui an (Apoc. 4:11). w23.07 14, 15 párr. 3, 4

Jiñi i pañimil Satanás miʼ wen mulan jiñi pornografía yicʼot jiñi chaʼan tac bʌ tsʼiʼlel (Efes. 4:19). Jin chaʼan, ñuc i cʼʌjñibal mi lac bʌcʼñan Jehová i maʼañic mi lac mel mach bʌ weñic. Ti capítulo 9 chaʼan Proverbios miʼ yʌjlel chaʼtiquil xʼixicob am bʌ i ñaʼtʌbal yicʼot maʼañic bʌ i ñaʼtʌbal. Jiñi chaʼtiquil xʼixicob miʼ pʌyob ti cʼux waj jiñi mach bʌ añobic i ñaʼtʌbal (Pr. 9:​1, 4-6). Pero mach lajalic chuqui miʼ yujtel tiʼ tojlelob jiñi muʼ bʌ i jacʼbeñob i tʼan jiñi xʼixic am bʌ i ñaʼtʌbal yicʼot jiñi muʼ bʌ i jacʼbeñob i tʼan jiñi tonto bʌ xʼixic. Jiñi tonto bʌ xʼixic cʼam miʼ chaʼlen tʼan i miʼ yʌl: «Jini maxto bʌ julemic i pusicʼal [o maxto bʌ añic i ñaʼtʌbal] laʼ ochic baʼ añon» (Pr. 9:​13-18). ¿Chuqui mi caj i yujtel tiʼ tojlel jiñi muʼ bʌ i jacʼbeñob i tʼan? Mi caj i pʌjyelob majlel baʼan chʌmeñoʼ bʌ. Jiñi libro chaʼan Proverbios miʼ yʌl jaʼel chaʼan «jini muʼ bʌ i jijlel tiʼ yotot miʼ sajtel», yom i yʌl, miʼ chʌmel (Pr. 2:​11-19). Ti capítulo 5 versículo 3 cʼʌlʌ ti 10 miʼ subeñonla jaʼel chaʼan yom mi laj cʌntan lac bʌ tiʼ tojlel yambʌ «xʼixic am bʌ i maña» «come woliʼ majlel ti chʌmel». w23.06 21, 22 párr. 6, 7

Jiñi ancianojob yom miʼ pʌsob wem bʌ ejemplo yicʼot yom pʼisbilob jach, maʼañic miʼ tsʌtsʼesañob i bʌ tiʼ tʼan (1 Tim. 3:​2, 3). Juntiquil anciano maʼañic mi caj i ñaʼtan chaʼan tiʼ pejtelel ora cheʼ yom miʼ mejlel bajcheʼ miʼ yʌl, chaʼan jach ñumen añix i jabilel bajcheʼ yambʌlob. Yujil chaʼan jiñi chʼujul bʌ espíritu majqui jach miʼ mejlel i cʼʌn ti jiñi ancianojob chaʼan miʼ ñaʼtʌntel chuqui yom bʌ miʼ mejlel. I mi maʼañic miʼ ñusan ti pʼis jumpʼejl principio am bʌ ti Biblia, jiñi yambʌ ancianojob mi caj i melob bajcheʼ tsaʼ ajli anquese mach lajalic bajcheʼ miʼ ñaʼtañob. Mi mach tsʌtsoñicla mi lac taj cabʌl bendición. Jumpʼejl ejemplo, wen mi caj la cajñel la quicʼot jiñi hermanojob yicʼot an ñʌchʼtʌlel ti congregación. I anquese mach junlajalic bajcheʼ yilalonla, tijicñayonla, i jiñʌch ñumen ñuc bʌ i cʼʌjñibal come woli lac lajin Jehová, juntiquil Dios mach bʌ tsʌtsic. w23.07 25 párr. 16, 17

Daniel tsiʼ wen tsaji jiñi profecía tac come yom i ñaʼtan i sujmlel. Cheʼ jaʼel, tsiʼ pʌsʌ i pecʼlel. Yujil chaʼan Jehová miʼ coltañob i chʼʌmben i sujm jiñi yom bʌ i cʌmbeñob i mandar yicʼot i jacʼbeñob i tʼan (Dn. 2:​27, 28). Jin chaʼan, Daniel tsiʼ pʌsʌ i pecʼlel i tsiʼ cʼajti i coltʌntel ti Jehová (Dn. 2:18). Cheʼ jaʼel, Daniel tsiʼ wen tsaji jiñi Tsʼijbujel tac am bʌ i chaʼan ti jimbʌ ora (Jer. 25:​11, 12; Dn. 9:2). ¿Bajcheʼ miʼ mejlel lac lajin Daniel? Qʼuele chucoch a wom a cʌn. ¿Chaʼan ba a womʌch a cʌn i sujmlel? Mi cheʼʌchi, Jehová mi caj i coltañet (Juan 4:​23, 24; 14:​16, 17). Pero an lac piʼʌlob muʼ bʌ i pejcañob jiñi Biblia chaʼan jach yomob i pʌs chaʼan machʌch tilemic ti Dios, i cheʼ bajcheʼ jiñi miʼ ñaʼtañob chaʼan miʼ mejlel i melob chuqui jach yomob. Jin chaʼan, la com lac ñaʼtan chucoch la com lac ñumen cʌn jiñi profecía tac. w23.08 9, 10 párr. 7, 8

Cheʼ ñumeñix ti pʼis chuqui mi lac pijtan ti lac tojlel mi caj lac lajeʼ lac bʌ yicʼot yambʌlob (Gál. 6:4). Mi cheʼ mi lac mel bajcheʼ jiñi, miʼ mejlel ti tejchel i tsʌytsʌyñiyel lac pusicʼal, i tajol cheʼ mi caj i melob jaʼel jiñi yambʌlob (Gál. 5:26). Cheʼ la com lac mel cheʼ bajcheʼ cʼamel miʼ mel jiñi yambʌlob, tajol ñumeñix ti pʼis bajcheʼ mi caj lac ñop lac mel. Ñaʼtancu: Mi chʼijyem mi la cubin lac bʌ cheʼ jal miʼ majlel ti tsʼʌctiyel chuqui woli bʌ lac pijtan, ñumento mi caj la cubin lac chʼijyemlel cheʼ an chuqui mi lac pijtan maʼañic bʌ baʼ ora miʼ caj ti tsʼʌctiyel. Iliyi miʼ mejlel i cʼuñʼesañonla (Pr. 13:12). Mi Jehová mach ñumeñic ti pʼis chuqui miʼ pijtan ti a tojlel, mach cheʼic yom maʼ mel jaʼel (2 Cor. 8:12). Miʼ mejlel a ñop chaʼan Jehová maʼañic miʼ lajet yicʼot yambʌlob (Mat. 25:​20-23). Miʼ wen qʼuel ti ñuc muʼ bʌ a mel: Cheʼ ti jumpʼejl a pusicʼal maʼ melben i yeʼtel, maʼ pʌs a xucʼtʌlel yicʼot maʼ cuch wocol. w23.08 29 párr. 10, 11

Jehová tsiʼ mele milagro chaʼan miʼ loqʼuel jaʼ yaʼ ti lum. Sansón tsiʼ japʌ i «tsiʼ chaʼ taja i pʼʌtʌlel» (Jue. 15:19). Jiñi jaʼ maʼañic tsaʼ tiqui, yaʼto bej an cheʼ bʌ Jehová tsiʼ yʌcʼʌ ti tsʼijbuntel jiñi libro chaʼan Jueces tiʼ yorajlel Samuel. Tajol cheʼ bʌ jiñi israelitajob miʼ qʼuelob jiñi jaʼ miʼ cʼajtesañob chaʼan Jehová mi caj i coltañob cheʼ bʌ miʼ ñusañob wocol. Cheʼ bajcheʼ Sansón, ti lac pejtelel yom mi lac sʌclan i coltaya Jehová. Mach yʌlʌyic chuqui la cujil melol o añix bʌ lac mele tiʼ yeʼtel Jehová, yom an lac pecʼlel i mi lac ñaʼtan chaʼan cojach wen mi caj i loqʼuel tiʼ coltaya Jehová. Sansón tsiʼ chaʼ taja i pʼʌtʌlel cheʼ bʌ tsiʼ japʌ jiñi jaʼ tsaʼ bʌ i yʌqʼue Jehová. Joñonla jaʼel pʼʌtʌl mi caj la cajñel mi mucʼʌch lac chʼʌm pejtelel laj coltʌntel muʼ bʌ i yʌqʼueñonla Jehová (Mat. 11:28). w23.09 4 párr. 8-10

Ñaʼtancu chaʼan an majqui miʼ yʌl mach bʌ weñic tiʼ tojlel Jehová o miʼ wajleñonla. ¿Chuqui mi caj lac mel? Yom mi laj cʼajtiben i yespíritu Jehová chaʼan mi lac ñaʼtan bajcheʼ yom mi lac jacʼ. ¿Ixcu mi tsaʼix lac jacʼʌ pero mach weñic bajcheʼ tsaʼ lac mele? Laʼ lac chaʼ pejcan Jehová i laʼ lac ñaʼtan bajcheʼ yom mi lac jacʼ mi tsaʼ cha’ ujtiyonla bajcheʼ jiñi. Cheʼ bajcheʼ jiñi, Jehová mi caj i coltañonla yicʼot i yespíritu chaʼan miʼ mejlel lac ticʼ lac bʌ i mi lac pʌs la cutslel. Yaʼ ti Biblia an cabʌl texto muʼ bʌ i mejlel i coltañonla chaʼan wen jach bajcheʼ mi lac jacʼ cheʼ bʌ an jumpʼejl wocol, i jiñi chʼujul bʌ espíritu miʼ coltañonla chaʼan mi laj cʼajtesan jiñi texto tac (Juan 14:26). Jumpʼejl ejemplo, yaʼ ti libro chaʼan Proverbios an cabʌl principio muʼ bʌ i coltañonla lac pʌs la cutslel (Pr. 15:18). Cheʼ jaʼel, miʼ coltañonla laj qʼuelben i wenlel cheʼ bʌ mach orajic mi lac michʼan i wen jach mi lac jacʼ (Pr. 10:19; 17:27; 21:23; 25:15). w23.09 15 párr. 6, 7

Jiñi apóstol Pedro xucʼul tsiʼ melbe i yeʼtel Jehová cabʌl jab, tsaʼ ajñi yicʼot Jesús tiʼ subtʼan, tiʼ sube wen tʼan jiñi mach bʌ judíojobic, i cheʼ jaʼel, tsaʼ ajñi ti jiñi junmojt muʼ bʌ i pʌsob bij. Cheʼ ti jabil 62 cʼʌlʌl 64, cheʼ bʌ tsʼitaʼ jachix yom chaʼan miʼ chʌmel, Jehová tsiʼ yʌcʼʌ chaʼan miʼ tsʼijbun chaʼpʼejl carta, jiñʌch Primera yicʼot Segunda de Pedro. (2 Ped. 1:​13-15). Pedro tiʼ tsʼijbu ili carta tac cheʼ bʌ jiñi hermanojob woli i ñusañob cabʌl wocol (1 Ped. 1:6). An jontol bʌ wiñicob woli bʌ i pucob mach bʌ i sujmic cʌntesa tac i yomob chaʼan jiñi hermanojob miʼ yajlelob ti mulil, cheʼ bajcheʼ jiñi tsʼiʼlel (2 Ped. 2:​1, 2, 14). Cheʼ jaʼel, tsʼitaʼ jachix yom chaʼan jiñi hermanojob chumuloʼ bʌ ti Jerusalén miʼ qʼuelob bajcheʼ jiñi soldadojob romanojoʼ bʌ mi caj i jisañob jiñi tejclum yicʼot jiñi templo (1 Ped. 4:7). Jin chaʼan, miʼ mejlel la cʌl chaʼan jiñi i carta tac Pedro tsaʼʌch i wen colta jiñi hermanojob chaʼan miʼ lʌtʼob jiñi wocol tac i chaʼan miʼ chajpañob i bʌ chaʼan jiñi muʼto bʌ caj i tilel. w23.09 26 párr. 1, 2

Cheʼ bajcheʼ tsiʼ mele Jesús, joñonla jaʼel cheʼ mi lac ñusan jumpʼejl wocol, mi laj cʌn chaʼan yomʌch mi lac jacʼ tʼan. Laʼcu lac ñaʼtan cheʼ bʌ tsaʼ tejchi jiñi pandemia chaʼan COVID-19. Tsaʼ subentiyonla chaʼan maʼañic mi lac loqʼuel ti subtʼan yicʼot chaʼan maʼañic mi lac tempan lac bʌ. ¿Bajcheʼ yilal tsaʼ qʼuele jiñi tsaʼ bʌ ajli? ¿Wocol ba tsaʼ wubi? Anquese cheʼʌchi, jiñi tsiʼ cʌntayonla, chʌn temel tsaʼ ajñiyonla i tsiʼ tijicñesa Jehová. Wʌle ñumen chajpʌbilonla chaʼan jiñi ñuc bʌ wocol muʼ bʌ caj i tilel, mi mucʼʌch lac jacʼ tʼan tajol cuxulʌch mi caj laj cʌytʌl (Job 36:11). Cheʼ mi lac jacʼben i tʼan Jehová, chaʼañʌch mi laj cʼuxbin i la com la cʌqʼuen i tijicñʌyel (1 Juan 5:3). Maʼañic bajcheʼ miʼ mejlel lac tojben Jehová chuqui am bʌ i mele ti lac tojlel (Sal. 116:12). Pero añʌch chuqui miʼ mejlel lac mel, mi lac jacʼben i tʼan Jehová yicʼot jiñi añoʼ bʌ i yeʼtel. Cheʼ bajcheʼ jiñi, mi lac pʌs chaʼan an lac ñaʼtʌbal i jiñi miʼ yʌqʼuen i tijicñʌyel Jehová (Pr. 27:11). w23.10 11 párr. 18, 19

Cheʼ muqʼuic i pejcañet juntiquil ángel, ¿muʼ ba caj a ñʌchʼtan? Ti ili ora juntiquil ángel woli i suben jiñi ñuqui tejclum, pʼolbalʌl tac, tʼan tac yicʼot alʌ tejclum tac: «Bʌcʼñanla Dios yicʼot aqʼuenla i ñuclel [ . . . ]. Chʼujutesanla jiñi tsaʼ bʌ i mele panchan, lum, mar yicʼot i pasibal jaʼ» (Apoc. 14:​6, 7). Jehová jiñʌch jiñi i sujm bʌ Dios, jin chaʼan yomʌch mi lac chʼujutesan. Mi lac wen ubin lac tijicñʌyel cheʼ miʼ mejlel lac chʼujutesan yaʼ tiʼ templo. ¿Chuqui woli i tajtʌl ti tʼan cheʼ bʌ miʼ yʌjlel jiñi chʼujul bʌ i templo Jehová? Mach jumpʼejlic templo melbil bʌ tiʼ cʼʌb wiñicob. Jiñʌch pejtelel tsaʼ bʌ i chajpa Jehová chaʼan miʼ mejlel lac chʼujutesan, chucul bʌ tiʼ cuxtʌlel Jesús. ¿I chuqui miʼ yʌl jiñi Biblia chaʼan iliyi? Jiñi apóstol Pablo cabʌl chuqui tiʼ tsictesa chaʼan ili templo yaʼ ti carta chaʼan Hebreos. w23.10 24 párr. 1, 2

Cheʼ ti jabil 522, jiñi i contrajob judíojob tsiʼ waʼchocoyob i melol jiñi templo, pero Zacarías tsiʼ yʌlʌ chaʼan Jehová mi caj i cʼʌn i pʼʌtʌlel chaʼan miʼ coltañob. I cheʼ ti 520, jiñi rey Darío tsiʼ yʌcʼʌ i tʼan chaʼan miʼ chaʼ mejlel jiñi templo, pero mach cojachi, tsaʼto i yʌcʼʌ taqʼuin chaʼan miʼ mejlel jiñi eʼtel. I tsiʼ yʌlʌ chaʼan jiñi yambʌ yumʌlob yom miʼ yʌcʼob i coltaya jaʼel (Esd. 6:​1, 6-10). Jehová tiʼ sube i tejclum chaʼan mi caj i yajñel yicʼotob mi mucʼʌch i chaʼ melob jiñi templo (Hag. 1:​8, 13, 14; Zac. 1:​3, 16). Jiñi xʼaltʼañob tsiʼ ñijcʌbeyob i pusicʼal jiñi tejclum chaʼan miʼ chaʼ techob i mel jiñi templo cheʼ ti 520, i mach i taja joʼpʼejl jab tsaʼ ujti i melob. Anquese añʌch wocol, ñaxan tsiʼ yʌcʼʌyob i bʌ chaʼan miʼ melob chuqui yom Jehová. Jin chaʼan, Jehová tsiʼ coltayob. I cheʼ bajcheʼ jiñi, jiñi judíojob tijicña tsaʼ mejli i chʼujutesañob Dios (Esd. 6:​14-16, 22). w23.11 15 párr. 6, 7

Cabʌl lac piʼʌlob an i yubiyob tiʼ tojlel Abrahán, pero mach cabʌlic chuqui yujilob tiʼ tojlel. Joñonla wen laj cʌñʌyʌch, la cujil chaʼan «tsaʼ sujti tiʼ tat pejtelel jiñi añoʼ bʌ i ñopoñel» (Rom. 4:11). Jin chaʼan tajol mi laj cʼajtiben lac bʌ: «¿Muʼ ba c mejlel c lajin jiñi Abrahán yicʼot chaʼan cheʼ yilal c ñopoñel bajcheʼ i chaʼan?». Mucʼʌch lac mejlel. Cheʼ mi lac wen qʼuel tsaʼ bʌ i mele Abrahán mi caj i coltañonla chaʼan pʼʌtʌl lac ñopoñel bajcheʼ i chaʼan. Tiʼ pejtelel ora tsiʼ jacʼbe i tʼan Dios, tsaʼ loqʼui tiʼ lumal, tsaʼ chumle ti pisil bʌ otot, i colel i yʌcʼ i yalobil bajcheʼ tsʌnsʌbil bʌ majtañʌl. Ili tsiʼ pʌsʌ chaʼan wen pʼʌtʌlʌch i ñopoñel, jin chaʼan Jehová tsiʼ qʼuele ti toj yicʼot tsaʼ sujti tiʼ yamigo (Sant. 2:​22, 23). I jiñʌch muʼ bʌ i pijtan jaʼel chaʼan miʼ yujtel ti lac tojlel, chaʼan joñon yicʼot jatet mi lac sujtel tiʼ yamigo i utsʼat mi la cajñel tiʼ tojlel. Jin chaʼan, tsiʼ yʌcʼʌ chaʼan Pablo yicʼot Santiago miʼ tsʼijbuñob tiʼ tojlel Abrahán. w23.12 2 párr. 1, 2

Mi juntiquilet hermana maxto bʌ wen añic cabʌl a jabilel, cʌñʌ tʼan ti wen a wicʼot yambʌlob. Ili jiñʌch junchajp wen ñuc bʌ i cʼʌjñibal chaʼan jiñi xñoptʼañonbʌla. Santiago tsiʼ yʌcʼʌ jumpʼejl wem bʌ ticʼojel muʼ bʌ i coltañonla lac mel iliyi. Mi an majqui woli i pejcañonla i wen jach mi lac ñʌchʼtan woli lac pʌs chaʼan mucʼʌch laj qʼuel ti ñuc (1 Ped. 3:8). Mi maʼañic maʼ wen chʼʌmben i sujm maʼ wubin chuqui woli bʌ i subeñet o bajcheʼ miʼ yubin i bʌ, miʼ mejlel a melben cʼajtiya. Cheʼ jaʼel, ñaxan wen ñaʼtan chuqui mi caj a suben (Pr. 15:28). Cʼajtiben a bʌ: «¿I sujmʌch ba jiñi muʼ bʌ caj cʌl? ¿Weñʌch ba? ¿Muʼ ba caj i coltan?». Ñaʼtan tiʼ tojlel hermanajob cheʼ bʌ miʼ melob bajcheʼ iliyi i cʌñʌ tiʼ tojlelob (Pr. 31:26). Wen ñʌchʼtan chuqui miʼ yʌlob i bajcheʼ miʼ yʌlob. Chaʼlen wersa a mel jaʼel, xucʼu xucʼul mi caj a ñumen mel ti wen, i ti wiʼil ñumen utsʼat mi caj a wajñel a wicʼot yambʌlob. w23.12 21 párr. 12

Ili ora, Jehová miʼ cʼʌn jiñi lac familia, la camigojob yicʼot jiñi ancianojob chaʼan miʼ coltañoñobla. I sujmʌch chaʼan cheʼ chʼijyem mi la cubin lac bʌ lac bajñel la com ajñel. Pero ¿chuqui yom mi lac mel chaʼan Jehová miʼ coltañonla? Laʼ lac chaʼlen wersa chaʼan maʼañic mi lac ñajtʼesan lac bʌ tiʼ tojlel yambʌyob. Mi cheʼ mi lac mel, mi caj lac wen ubin lac chʼijyemlel, mi caj lac bajñel ñaʼtan lac bʌ yicʼot jiñi lac wocol tac, i jiñi miʼ mejlel i yʌqʼueñonla lac mel mach bʌ weñic. An i tajol la com bajñel ajñel, ñumento cheʼ bʌ woli lac ñusan wocol. Pero mach yomic mi lac ñajtʼesan lac bʌ tiʼ tojlel yambʌyob, come lajal bajcheʼ mach la comic lac jacʼben i coltaya Jehová. Jin chaʼan, laʼ lac jacʼ cheʼ jiñi lac familia, la camigojob yicʼot jiñi ancianojob miʼ coltañoñobla. Laʼ lac ñaʼtan chaʼan jiñʌch muʼ bʌ i cʼʌn Jehová chaʼan miʼ coltañonla (Pr. 17:17; Is. 32:​1, 2). w24.01 24 párr. 12, 13

Jiñi nazareojob maʼañic miʼ setʼob i jol, cheʼ bajcheʼ jiñi miʼ pʌsob chaʼan miʼ qʼuelob ti ñuc Jehová. Pero an israelitajob mach bʌ añic tsiʼ qʼueleyob ti ñuc. An i tajol, yomʌch miʼ pʌsob i chʼejlel come mach lajalobic bajcheʼ jiñi yañoʼ bʌ (Am. 2:12). Jiñi lac piʼʌlob mi caj i qʼuelob chaʼan mach lajaloñicla yicʼotob come mi lac jacʼben i tʼan Jehová. Pero yomʌch mi lac pʌs lac chʼejlel chaʼan mi lac sub yaʼ ti la queʼtel o ti escuela chaʼan i testigojonla Jehová. Cheʼ jaʼel, come jiñi lac piʼʌlob mach weñic i melbalob, wocol mi caj la cubin chaʼan mi lac jacʼ jiñi principio tac yicʼot chaʼan mi lac sub jiñi wen tʼan (2 Tim. 1:8; 3:13). Pero yom mi laj cʼajtesan iliyi: Mi lac tijicñesan Jehová cheʼ mi lac pʌs lac chʼejlel, chaʼan mach lajaloñicla bajcheʼ yambʌ lac piʼʌlob (Pr. 27:11; Mal. 3:18). w24.02 16 párr. 7; 17 párr. 9

Laʼ lac ñaʼtan jiñi añoʼ bʌ ti congregación ti Roma, mach junlajalic baqui tilemob. An judíojoʼ bʌ i cʌñʌyoʼ bʌ jiñi mandar, an chuculoʼ bʌ ti juntiquil i yum ti eʼtel, an librejoʼ bʌ, i cheʼ jaʼel an añoʼ bʌ xyaj eʼtelob i chaʼan. ¿Chuqui tsiʼ coltayob chaʼan iliyi maʼañic miʼ mʌctañob chaʼan miʼ ñumen cʼuxbiñob i bʌ? Jiñi apóstol Pablo tsiʼ yʌqʼueyob ili ticʼojel: «Yom utsʼat mi laʼ chʼʌm laʼ bʌ». ¿Chuqui yom i yʌl cheʼ utsʼat mi lac chʼʌm lac bʌ? Chaʼan cheʼ an majqui miʼ cʼotel ti la cotot, yom mi lac pʌsben la cutslel, mi la cotsan ti la cotot i mi lac ñop lac sujtesan ti la camigo. Jumpʼejl ejemplo, Pablo tiʼ sube Filemón bajcheʼ yom miʼ chʼʌm Onésimo cheʼ miʼ chaʼ cʼotel tiʼ yotot, come ti ñaxan tsaʼ putsʼi. Tiʼ sube: «Chʼʌmʌ ti wen» (Filem. 17). Priscila yicʼot Áquila ñumen yujilob bajcheʼ Apolos, pero ili maʼañic tsiʼ mʌctayob chaʼan miʼ pʌyob majlel jiñi Apolos (Hech. 18:26). Pejtelel ili xñoptʼañob mach junlajalobic, pero iliyi maʼañic tsiʼ mʌctayob chaʼan miʼ cʼuxbiñob i bʌ yicʼot miʼ chʼʌmob i bʌ ti wen. w23.07 6 párr. 13

Jiñi cʼuxbiya jiñʌch muʼ bʌ caj i coltañet chaʼan maʼ wʌcʼ a bʌ ti Jehová. Ili cʼuxbiya mach cheʼ jach miʼ waʼ tilel, miʼ colel cheʼ bʌ maʼ cʌn majlel Jehová, maʼ «cʌn ti tsʼʌcʌl chuqui yom» yicʼot maʼ «chʼʌmben i sujm jiñi i chaʼan tac bʌ Dios» (Col. 1:9). Cheʼ bʌ tsaʼ pejca jiñi Biblia tsaʼ cʼoti a ñop chaʼan 1) añʌch Dios, 2) chaʼan jin tsiʼ yʌcʼʌ ti tsʼijbuntel jiñi Biblia, yicʼot 3) chaʼan an jumpʼejl organización muʼ bʌ i cʼʌn chaʼan miʼ mel chuqui yom. Mi woli a ñaʼtan a wʌcʼ a bʌ ti Jehová, yom i yʌl chaʼan muqʼuix a chʼʌmben i sujm muʼ bʌ i pʌs jiñi Biblia, chaʼan woli a jacʼ yicʼot chaʼan wolix a suben yambʌyob jiñi woli bʌ a cʌn (Mat. 28:​19, 20). Cheʼ jaʼel, maʼ wen cʼuxbin Jehová i ti jumpʼejl a pusicʼal a wom a chʼujutesan. ¿Cheʼʌch ba maʼ wubin a bʌ? w24.03 4, 5 párr. 6-8

Jiñi i ñoxiʼal Abigaíl jiñʌch Nabal, juntiquil wiñic wen jontol bʌ yicʼot tsʌts bʌ i pusicʼal (1 S. 25:3). Miʼ mejlel lac ñaʼtan chaʼan Abigaíl wocolʌch tsiʼ ñusa. ¿Tsaʼ baʼ mejli i cʌy jiñi i ñoxiʼal cheʼ cheʼic yom? Tsaʼʌch. Jumpʼejl bʌ qʼuin, Nabal tsiʼ pʼaja David yicʼot i wiñicob, jin chaʼan David tsiʼ yʌlʌ chaʼan mi caj i majlel i tsʌnsan. Pero Abigaíl tsaʼ majli i pejcan David chaʼan miʼ ñusʌbeñob i mul i maʼañic chuqui miʼ tumben Nabal (1 S. 25:​9-13). Cheʼic yom Abigaíl, tsaʼ mejli ti putsʼel i miʼ cʌy chaʼan Nabal miʼ tsʌnsʌntel (1 S. 25:​23-27). ¿Chucoch maʼañic tsiʼ mele bajcheʼ jiñi? Abigaíl miʼ wen cʼuxbin Jehová, jin chaʼan miʼ qʼuel ti ñuc chuqui miʼ ñaʼtan chaʼan jiñi ñujpuñel. Yujil chaʼan tiʼ tojlel Jehová, jiñi ñujpuñel chʼujulʌch. I come yom i tijicñesan Jehová, tsiʼ colta i ñoxiʼal chaʼan maʼañic chuqui miʼ tumbentel, i cheʼ jaʼel pejtelel añoʼ bʌ tiʼ yotot. Jin chaʼan, ti ora tsaʼ majli i pejcan David chaʼan maʼañic miʼ tsʌnsan Nabal. w24.03 16 párr. 9, 10

¿Am ba juntiquil yaʼ ti a congregación woli bʌ i chaʼlen wersa chaʼan miʼ ñumen melben i yeʼtel Jehová? ¿A cʌñʌ ba juntiquil xcolel woli bʌ i pʌs i chʼejlel yaʼ ti escuela anquese wocolʌch miʼ yubin? ¿Muʼ ba i tilel ti a jol juntiquil woli bʌ i tsʼaʼlentel tiʼ familia chaʼan xucʼul ti Jehová? Mi cheʼʌchi, laʼ lac chaʼlen wersa chaʼan mi lac subeñob chaʼan mi lac wen qʼuel ti ñuc jiñi chʼejlel woli bʌ i pʌsob yicʼot pejtelel muʼ bʌ i melob tiʼ tojlel Jehová (Filem. 4, 5, 7). Jehová yujil chaʼan la com lac melben i yeʼtel yicʼot chaʼan ti jumpʼejl lac pusicʼal la com lac tsʼʌctesan jiñi lac tʼan. Cheʼ jaʼel, miʼ yʌcʼ chaʼan mi lac pʌsben bajcheʼ cʼamel mi laj cʼuxbin (Pr. 23:​15, 16). Jin chaʼan, laʼ lac bej melben i yeʼtel Jehová ti jumpʼejl lac pusicʼal. w24.02 18 párr. 14; 19 párr. 16

Laʼ lac ñaʼtan chuqui tsaʼ ujti tiʼ yujtibal majlel jiñi jabil 29. Jesús tsaʼ jaxto i teche i subtʼan. Tsaʼ majli yicʼot i mamá ti jumpʼejl ñujpuñel ti Caná. María tajol woliʼ qʼuel jiñi invitadojob. Pero an chuqui miʼ yujtel: Miʼ jilel jiñi vino. María tsaʼ majli ti ora baqui an Jesús i tiʼ sube: «Maʼañobix i vino» (Juan 2:​1-3). ¿Chuqui tsiʼ mele Jesús? Tiʼ sujtesa jiñi jaʼ ti «wem bʌ vino» (Juan 2:​9, 10). Jesús tsaʼto i ñumen mele milagro tac. Tsiʼ cʼʌñʌ i pʼʌtʌlel chaʼan miʼ coltan yonlel lac piʼʌlob. Jumpʼejl ejemplo, ti jumpʼejl bʌ qʼuin tsiʼ weʼsa 5 mil wiñicob i ti yambʌ 4 mil. Cheʼ muqʼuic lac tsic jiñi xʼixicob yicʼot xbiʼtalob, tajol ñumen ti 27 mil lac piʼʌlob tsiʼ weʼsa ti jiñi chaʼpʼejl milagro (Mat. 14:​15-21; 15:​32-38). Ti jiñi bʌ ora, Jesús tsiʼ cʼoqʼuesa jaʼel jiñi cʼamoʼ bʌ (Mat. 14:14; 15:​30, 31). w23.04 2 párr. 1, 2

Cheʼ bʌ woli lac ñusan tsʌts bʌ wocol an qʼuiñil mi la cubin lac chʼijyemlel yicʼot maʼañix lac pʼʌtʌlel. Cheʼ bajcheʼ Elías, tajol mach la comic tejchel i bej wʌyel jach la com (1 R. 19:​5-7). Tajol yom mi laj coltʌntel chaʼan mi lac bej melben i yeʼtel Jehová. Pero Jehová miʼ subeñonla jiñi tʼan tac muʼ bʌ lac taj ti jiñi texto chaʼan ili qʼuin. Cheʼ tsaʼ ujti tiʼ tojlel jiñi rey David, cheʼ bʌ woliʼ ñusan wocol yicʼot woliʼ contrajintel, tsiʼ qʼuele chaʼan Jehová yaʼʌch an yicʼot, jin chaʼan tsiʼ yʌlʌ: «Maʼ chucon ti a cʼʌb chaʼan maʼanic mic yajlel» (Sal. 18:35). Jehová miʼ chuconla ti laj cʼʌb cheʼ bʌ miʼ cʼʌn yambʌ lac piʼʌlob chaʼan miʼ coltañonla. Ti jumpʼejl bʌ qʼuin, David wen chʼijyem tsiʼ yubi i bʌ, pero Jonatán tsaʼ majli i julaʼtan chaʼan miʼ ñuqʼuesʌben i pusicʼal (1 S. 23:​16, 17). I cheʼ jaʼel, Jehová tsiʼ cʼʌñʌ Eliseo chaʼan miʼ coltan Elías (1 R. 19:​16, 21; 2 R. 2:2). w24.01 23, 24 párr. 10-12

Jehová wen an i yutslel i cabʌl chuqui wem bʌ miʼ yʌqʼueñonla. Ili wen tsiquil miʼ pʌstʌl yaʼ ti capítulo 9 chaʼan Proverbios baqui miʼ yʌjlel chaʼan jiñi i sujm bʌ ñaʼtʌbal, muʼ bʌ i lajintel bajcheʼ juntiquil xʼixic, luʼ chajpʌbilix i chaʼan. Tsaʼix i tasi jiñi i mesa, tiʼ tsʌnsa i wacax i tsiʼ xʌbʌ jiñi vino (Pr. 9:2). Jin chaʼan, yaʼ ti versículo 4 yicʼot 5 miʼ yʌl chaʼan jiñi xʼixic am bʌ i ñaʼtʌbal miʼ suben jiñi mach bʌ añobic i ñaʼtʌbal: «Laʼ cʼuxu c waj. Japʌ jini vino tsaʼ bʌ c chajpa». ¿Chucoch yomʌch mi lac jacʼ? Come Jehová yom i cʌntañonla yicʼot yom i yʌqʼueñonla lac ñaʼtʌbal. Mach yomic chaʼan an chuqui mi lac chaʼlen tiʼ caj chuqui mi lac mel, i ti wiʼil mi caj lac chaʼ ñaʼtan lac bʌ. Jin chaʼan, ti Proverbios 2:7 miʼ yʌl chaʼan Jehová «miʼ chajpʌbeñob i wenlel jini tojoʼ bʌ», yom bʌ i yʌl, chaʼan miʼ yʌqʼueñob i ñaʼtʌbal. Mi mucʼʌch lac bʌcʼñan Jehová mi caj lac mulan lac jacʼben i ticʼojel tac, i jiñi mi caj i yʌqʼueñonla lac tijicñʌyel (Sant. 1:25). w23.06 23 párr. 14, 15

Anquese maʼañic miʼ mejlel lac melben i yeʼtel Jehová bajcheʼ cʼamel mi lac mulan, miʼ mejlel lac ñop chaʼan Dios miʼ qʼuel ti ñuc jiñi muʼ bʌ lac mel tiʼ tojlel. ¿Bajcheʼ la cujil? Jehová tiʼ sube jiñi xʼaltʼan Zacarías chaʼan miʼ cʼʌn jiñi oro yicʼot plata tsaʼ bʌ i yʌcʼʌyob jiñi judíojob añoʼ bʌ ti Babilonia chaʼan miʼ mel jumpʼejl corona (Zac. 6:11). Ili corona mi caj i yʌqʼueñob i ñaʼtan jiñi i yutslel tsaʼ bʌ i pʌsʌyob jiñi yaʼ bʌ tsaʼ cʌyleyob ti Babilonia (Zac. 6:14). Ili miʼ pʌsbeñonla chaʼan Jehová maʼañic miʼ wis ñajʌyel i chaʼan cheʼ mi lac chaʼlen wersa lac melben i yeʼtel anquese an wocol tac. La cujil chaʼan ti ili cojix tac bʌ qʼuin wocol mi caj lac ñusan, i muʼto caj i ñumen tsʌtsʼan (2 Tim. 3:​1, 13). Pero mach yomic mi lac chaʼlen pensar, laʼ laj cʼajtesan tsaʼ bʌ i sube Jehová jiñi i wiñicob tiʼ yorajlel Ageo: «Añon quicʼotetla [ . . . ] mach laʼ chaʼlen bʌqʼuen» (Hag. 2:​4, 5). Miʼ mejlel lac ñop jaʼel chaʼan mi mucʼʌch lac chaʼlen wersa lac mel chuqui yom Jehová, mi caj i coltañonla. w23.11 19 párr. 20, 21

Cheʼic yom Dios maʼañic tsiʼ yʌcʼʌ ti tsʼijbuntel ti Biblia jiñi mach tac bʌ weñic tsiʼ mele jiñi apóstol Pedro, pero tsaʼʌch i yʌcʼʌ ti tsʼijbuntel chaʼan miʼ cʌntesañonla (2 Tim. 3:​16, 17). Cheʼ bʌ mi lac pejcan tiʼ tojlel Pedro, mi laj qʼuel chaʼan añʌch i cʼunlel i cheʼ miʼ yubin i bʌ bajcheʼ joñonla, jiñi miʼ pʌsbeñonla chaʼan Jehová maʼañic miʼ pijtan chaʼan junyaj tojonla. Yom bʌ jiñʌch cheʼ mi lac chaʼlen wersa anquese an laj cʼunlel. ¿Chucoch yomʌch mi lac chʌn chaʼlen wersa? Anquese mi lac ñaʼtan chaʼan tsaʼix lac mʌlbe jiñi laj cʼunlel, mucʼʌch i mejlel lac chaʼ mel. Pero mi lac chaʼlen wersa lac mʌlben. Ti lac pejtelel mi la cʌl o mi lac mel muʼ bʌ i yʌqʼueñonla lac chaʼ ñaʼtan lac bʌ. Pero mi mucʼʌch lac chʌn chaʼlen wersa, Jehová mi caj i coltañonla chaʼan mi lac ñumen weñʼan (1 Ped. 5:10). Jiñi pʼuntaya tsaʼ bʌ i pʌsʌ Jesús tiʼ tojlel Pedro miʼ coltañonla chaʼan mi lac bej melben i yeʼtel Jehová. w23.09 20, 21 párr. 2, 3

Jesús cheʼ yomiqui tsaʼ mejli i lajmesan Lázaro, cheʼ bajcheʼ tsiʼ yʌlʌ Marta ti jiñi texto chaʼan bʌ ili qʼuin. Pero an chuqui ñumen ñuc bʌ yom i mel. Jesús tiʼ sube Marta: «Jiñi a weran mi caj i chaʼ cuxtʌyel». Cheʼ jaʼel, tiʼ sube: «Joñoñʌch jiñi chaʼ chʼojyel yicʼot jiñi cuxtʌlel» (Juan 11:​23, 25). Cheʼʌchi, Jehová tsiʼ yʌqʼue i pʼʌtʌlel Jesús chaʼan miʼ chaʼ cuxtesan chʌmeñoʼ bʌ. Ti jimbʌ ora, Jesús tsaʼix i chaʼ cuxtesa juntiquil xchʼoc yicʼot juntiquil chʼiton, tajol ti jin jach bʌ qʼuin cheʼ bʌ tsaʼ chʌmiyob (Luc. 7:​11-15; 8:​49-55). Pero ¿muʼ ba caj i mejlel i chaʼ cuxtesan juntiquil chʌmpʼejlix bʌ qʼuin i chʌmel yicʼot wolix bʌ i cajel ti ocʼmʌn? María, jiñi yambʌ i yeran Lázaro, miʼ lʌcʼtesan i bʌ baʼan Jesús i jin jach miʼ yʌl jaʼel jiñi tsaʼ bʌ i yʌlʌ Marta: «C Yum, cheʼ wʌʼic añet, maʼañic tsaʼ chʌmi jiñi queran» (Juan 11:32). Jesús tsiʼ yubi i chʼijyemlel jaʼel cheʼ bʌ tsiʼ qʼueleyob ti uqʼuel. Tsaʼto caji ti uqʼuel cheʼ bʌ tsiʼ qʼuelbe i wocol i yamigojob. Yujil chaʼan wen cʼuxʌch mi la cubin cheʼ bʌ an majqui miʼ chʌmel lac chaʼan i yomob i jisan lac chʼijyemlel. w23.04 10, 11 párr. 12, 13