Abril

Ti wajali an i wiñicob Jehová tsaʼ bʌ i ñusayob wocol mach bʌ pijtʌbilic i chaʼañob. Laʼcu lac ñaʼtan tiʼ tojlel Jacob. Jiñi i papá tiʼ sube chaʼan miʼ ñujpuñel yicʼot juntiquil i yixicʼal Labán, juntiquil i familia muʼ bʌ i chʼujutesan Jehová. I tiʼ sube chaʼan Jehová mi caj i yʌqʼuen cabʌl bendición (Gn. 28:​1-4). Jin chaʼan, Jacob tsaʼʌch i jacʼʌ: Tsaʼ loqʼui ti Canaán i tsaʼ majli baqui chumul Labán, am bʌ chaʼtiquil i yixicʼal, Lea yicʼot Raquel. Jacob tsiʼ mulaj Raquel, jiñi ijtsʼiñʌl bʌ. Chaʼan miʼ mejlel i pʌy, 7 jab tsiʼ melbe i yeʼtel Labán (Gn. 29:18). Pero Labán tsiʼ loti come mach jiñic Raquel tsiʼ yʌqʼue i pʌy, jiñʌch Lea, jiñi chichʌl bʌ. Tiʼ jumpʼejlel semana tsaʼ mejli i pʌy Raquel, pero tsiʼ chaʼle eʼtel yambʌ 7 jab (Gn. 29:​26, 27). Pero mach jin jach tsiʼ ñusa jiñi. Labán tsiʼ ticʼla Jacob jaʼel tiʼ yeʼtel. ¡20 jab tsiʼ ticʼla! (Gn. 31:​41, 42). w23.04 15 párr. 5

¿Majqui miʼ mejlel laj cʼajtiben i ñuqʼuesʌntel lac pusicʼal yicʼot laj coltʌntel? Jiñʌch Jehová i mi lac mel cheʼ bʌ mi lac pejcan ti oración. La cujil chaʼan yom chaʼan mi lac pejcan ti bele ora come miʼ subeñonla: «Chʌn chaʼlenla oración» (1 Tes. 5:17). Maʼañic mi lac bʌcʼñan lac pejcan ti oración yicʼot laj cʼajtiben i coltaya ti laj cuxtʌlel (Pr. 3:​5, 6). I come wen uts, miʼ mejlel lac pejcan Jehová jiñʌch jaysujtel la com. Jesús yujil chaʼan Jehová ñuc i cʼʌjñibal i chaʼan jiñi oración tac. Cheʼ bʌ maxto tilemic ila ti Lum, tsiʼ qʼuele bajcheʼ jiñi i Tat tsiʼ jacʼbe i yoración jiñi i wiñicob. Jumpʼejl ejemplo, yaʼan yicʼot cheʼ bʌ tsiʼ jacʼbe i yoración Ana, David, Elías yicʼot yañoʼ bʌ cheʼ tiʼ pejtelel i pusicʼal tsiʼ pejcayob Jehová (1 S. 1:​10, 11, 20; 1 R. 19:​4-6; Sal. 32:5). Jin chaʼan, Jesús tiʼ sube jiñi xcʌntʼañob i chaʼan chaʼan yom miʼ chaʼleñob oración ti bele ora yicʼot chaʼan mach yomic miʼ bʌcʼñan i melob (Mat. 7:​7-11). w23.05 2 párr. 1, 3

Cheʼ bʌ Atalía tsaʼ ochi bajcheʼ reina anquese mach jiñic yom bʌ miʼ yochel, jiñi ñuc bʌ sacerdote Jehoiadá tsiʼ pʌsʌ chaʼan miʼ bʌcʼñan Dios. Maʼañic tsiʼ bʌcʼña Atalía anquese wen jontol i tsaʼto i ñopo i tsʌnsan pejtelel i butsob, i yalobiloʼ bʌ jiñi rey (2 Cr. 22:​10, 11). Jehoiadá yicʼot i yijñam, Jehosabeat, tsiʼ coltayob yicʼot tsiʼ cʌntayob Jehoás, juntiquil i yalobil jiñi rey. Cheʼ bajcheʼ jiñi, maʼañic tsaʼ jili i pʼolbal jiñi rey. Jehoiadá tsiʼ pʌsʌ i xucʼtilel ti Jehová i añʌch chuqui tsiʼ mele. Cheʼ bʌ Jehoás 7 i jabilel, Jehoiadá tsiʼ chaʼ pʌsʌ i xucʼtʌlel ti Jehová. Tsiʼ chajpa chaʼan Jehoás miʼ waʼchocontel ti rey, mi weñʌch miʼ loqʼuel mi caj i yochel ti yumʌl juntiquil tilem bʌ tiʼ pʼolbal David, pero mi maʼañiqui Jehoiadá miʼ mejlel ti tsʌnsʌntel. Tiʼ coltaya Jehová weñʌch tsaʼ loqʼui. w23.06 17 párr. 12, 13

Jiñi rey Nabucodonosor miʼ mejlel i ñaʼtan chaʼan woli i contrajintel, pero Daniel tsaʼʌch i pʌsʌ i chʼejlel i tsiʼ luʼ tsictesʌbe i sujmlel jiñi i ñajal. ¿Chuqui tsiʼ colta Daniel chaʼan miʼ pʌs i chʼejlel? Miʼ mejlel la cʌl chaʼan tsiʼ cʌñʌ tiʼ tojlel i papá i mamá (Dt. 6:​6-9). Daniel mach cojicach i cʌñʌ jiñi Diez Mandar, i cʌñʌyʌch jaʼel baqui tac bʌ jiñi bʌlñʌcʼʌl muʼ bʌ i mejlel i cʼuxob jiñi israelitajob yicʼot jiñi maʼañic bʌ (Lv. 11:​4-8; Dn. 1:​8, 11-13). Cheʼ jaʼel, yujil chuqui miʼ yujtel mi jiñi i tejclum Dios maʼañic miʼ jacʼben i mandar (Dn. 9:​10, 11). Pejtelel tsaʼ bʌ i ñusa tsiʼ colta i ñop chaʼan Jehová yicʼot i yángelob mi caj i coltan (Dn. 2:​19-24; 10:​12, 18, 19). w23.08 3 párr. 5, 6

Rebeca jiñʌch juntiquil xʼixic wen am bʌ i ñaʼtʌbal yicʼot tsiʼ ñaʼta chuqui yom miʼ mel, jala yicʼot bajcheʼ yom miʼ mel (Gn. 24:58; 27:​5-17). Tsiʼ qʼuele ti ñuc yambʌlob yicʼot tsiʼ jacʼʌ tʼan (Gn. 24:​17, 18, 65). Mi mucʼʌch a lajin Rebeca i maʼ pʌs a pecʼlel yicʼot maʼ qʼuel ti ñuc jiñi añoʼ bʌ i yeʼtel, mi caj a pʌs chuqui wem bʌ yaʼ ti a familia yicʼot ti a congregación. Jiñi Biblia miʼ yʌl chaʼan pejtelel jiñi añoʼ bʌ i ñaʼtʌbal yom miʼ pʌsob i pecʼlel. Ester jiñʌch juntiquil xʼixic tsaʼ bʌ i pʌsʌ ili wem bʌ melbalʌl. Cheʼ bʌ tsaʼ ochi ti reina, maʼañic tsiʼ chañʼesa i bʌ, cheʼ jaʼel tsiʼ jacʼbe i ticʼojel jiñi i primo Mardoqueo (Est. 2:​10, 20, 22). Jatet jaʼel miʼ mejlel a lajin Ester cheʼ bʌ maʼ cʼajtin ticʼojel yicʼot maʼ jacʼ (Tito 2:​3-5). Ester mach cojach wen an i ñaʼtʌbal, juntiquilʌch xʼixic wen utsʼatax bʌ jaʼel, pero tsaʼʌch i pʌsʌ i pecʼlel i maʼañic tiʼ sʌcla chaʼan jin jach jiñi ñumen utsʼatax bʌ miʼ qʼuejlel (Est. 2:​7, 15). w23.12 19, 20 párr. 6-8

Cheʼ cʌlʌx chʼijyem mi la cubin lac bʌ chaʼan tsaʼ bʌ lac mele, woli lac chʼʌm jumpʼejl al bʌ laj cuch. I Jehová mach yomic chaʼan cheʼ mi la cujtel bajcheʼ jiñi. Miʼ mejlel lac ñop chaʼan tsaʼix i ñusʌbeyonla mi tsaʼix lac subu jiñi tsaʼ bʌ lac mele, mi lac chaʼ ñaʼtan lac bʌ i woli lac chaʼlen wersa chaʼan maʼañic mi lac chaʼ mel (Hech. 3:19). Jehová yom chaʼan mi laj cʌy laj cʌlʌx ubin lac chʼijyemlel come yujil chaʼan miʼ mejlel i ticʼlañonla. Miʼ mejlel i cʼuñʼesañonla i tajol mi caj laj cʌy lac chaʼlen ajñel chaʼan mi lac taj laj cuxtʌlel (Sal. 31:10; 2 Cor. 2:7). Mi maʼ cʌlʌx ubin a chʼijyemlel chaʼan tsaʼ bʌ a mele, wen ñaʼtan chaʼan Jehová mucʼʌch i ñusʌbeñet a mul tiʼ sujm (Sal. 130:4). Cheʼ bʌ juntiquil miʼ ñaʼtan i bʌ ti jumpʼejl i pusicʼal, Jehová miʼ yʌcʼ i tʼan: «Joñon mi caj c ñusʌbeñob i mul» (Jer. 31:34). Ili yom i yʌl chaʼan cheʼ bʌ Jehová miʼ ñusʌbeñonla lac mul, maʼañic miʼ chʌn cʼajtesʌbeñonla. Mach a wen ubin a chʼijyemlel mi ili ora maʼañic maʼ mejlel a taj jumpʼejl privilegio ti congregación. Mi Jehová tsaʼix i ñusʌbeyet a mul, ¿chucoch maʼañic maʼ ñusʌben a bʌ jatet? w23.08 30, 31 párr. 14, 15

Tiʼ yorajlel jiñi pandemia chaʼan COVID-19 jiñi tsaʼ bʌ i ñopoyob lot tac tsiʼ tajayob wocol, pero jiñi maʼañic bʌ tsiʼ ñopoyob tsaʼʌch i cʌntayob i bʌ (Mat. 24:45). Mach yomic miʼ ñajʌyel lac chaʼan «jiñi ñumen ñuc bʌ i cʼʌjñibal» (Filip. 1:​9, 10). Ti jujumpʼejl qʼuin an cabʌl chuqui mi lac mel muʼ bʌ i mejlel i chilbeñonla lac tiempo, bajcheʼ jiñi cʼux waj, ñusaqʼuin yicʼot jiñi eʼtel, i tajol maʼañix mi caj lac mel jiñi ñumen ñuc tac bʌ i cʼʌjñibal (Luc. 21:​34, 35). Cheʼ jaʼel, jiñi lac piʼʌlob miʼ wen ñusañob qʼuin i yʌlob chuqui tac miʼ yujtel ti pañimil o chaʼan tac bʌ política. Joñonla mach yomic mi lac tech la cotsan lac bʌ yaʼi o mi lac tech lac ñaʼtan ti lac pusicʼal. Satanás an tacʌch chuqui miʼ cʼʌn chaʼan mach xucʼulic mi la cajñel. w23.07 16, 17 párr. 12, 13

Jiñi Conmemoración jiñʌch jiñi wen ñuc bʌ qʼuin chaʼan jiñi i testigojob Jehová. Cojach tsaʼ bʌ i yʌlʌ Jesús chaʼan yom miʼ mejlel (Luc. 22:​19, 20). Miʼ cʼajtesʌbeñonla bajcheʼ miʼ mejlel lac pʌs chaʼan mi lac wen qʼuel ti ñuc cheʼ Jesús tsiʼ yʌcʼʌ i cuxtʌlel (2 Cor. 5:​14, 15). Miʼ yʌcʼ chaʼan temel mi la cajñel la quicʼot la quermañujob yicʼot mi lac ñuqʼuesʌben lac bʌ lac pusicʼal (Rom. 1:12). Cheʼ jaʼel, cabʌl lac piʼʌlob muʼ bʌ i cʼotelob ti jiñi qʼuin miʼ wen mulañob jiñi muʼ bʌ i qʼuelob yicʼot muʼ bʌ i yubiñob i miʼ techob estudio. Cheʼ jaʼel, wen la comix chaʼan miʼ cʼotel jiñi qʼuin come yaʼʌch baqui mi laj qʼuel chaʼan jiñi i tejclum Jehová temelʌch an. Jin chaʼan mi lac wen qʼuel ti ñuc jiñi Conmemoración. w24.01 8 párr. 1-3

Cheʼ bʌ mi lac wen ñaʼtan bajcheʼ cʼamel tsiʼ meleyob Jesús yicʼot Jehová ti lac tojlel, mi lac ñumen chʼʌmben i sujm chaʼan mucʼʌch i wen cʼuxbiñonla ti jujuntiquil (Gál. 2:20). Jehová tsiʼ mele iliyi chaʼañʌch miʼ cʼuxbiñonla. Cheʼ bʌ tsiʼ yʌcʼʌ chaʼan jiñi i Yalobil miʼ yubin wocol yicʼot miʼ chʌmel ti laj caj, tsiʼ pʌsʌ chaʼan miʼ cʼuxbiñonla. Jehová mach muqʼuic jach i yʌl chaʼan miʼ cʼuxbiñonla, miʼ pʌsbeñonla jaʼel (Jer. 31:3). Jin chaʼan, tsiʼ lʌcʼtesayonla tiʼ tojlel (laja yicʼot Deuteronomio 7:​7, 8). Maʼañic chuqui o majqui mi caj i mejlel i ñajtʼesañonla tiʼ tojlel Jehová (Rom. 8:​38, 39). Cheʼ a wujil iliyi, ¿bajcheʼ yubil maʼ wubin a bʌ? w24.01 28 párr. 10, 11

Jiñi xñoptʼañob yajcʌbiloʼ bʌ miʼ wen qʼuelob ti ñuc jiñi i pijtaya añoʼ bʌ i chaʼan chaʼan mi caj i majlelob ti panchan. Jumpʼejl ejemplo, ti 1991, jiñi hermano Frederick Franz tsiʼ yʌlʌ iliyi: «Jiñi lac pijtaya i sujmlelʌch i tiʼ pejtelelob jiñi 144 mil mi caj i qʼuelob ti jujuntiquil cheʼ bʌ miʼ tsʼʌctiyel tiʼ tojlelob, i ñumen wento mi caj i yujtel cheʼ bajcheʼ ñaʼtʌbil lon c chaʼan». «Maʼañic sʌtbil lon c chaʼan jiñi lon c pijtaya. Muʼto lon c ñumen qʼuel ti ñuc, [ . . . ] ñumento cheʼ añix ora i cajel lon c pijtan. Iliyi mach toʼolic, jin chaʼan mi caj c chʌn pijtan. Ili ora mic ñumen qʼuel ti ñuc jiñi pijtaya am bʌ c chaʼan, ñumento bajcheʼ ti ñaxan». Ti lac pejtelel an lac chaʼan jumpʼejl utsʼatax bʌ lac pijtaya, an muʼ bʌ caj i majlelob ti panchan i an muʼ bʌ caj i cʌytʌlob ila ti Pañimil. Jiñi pijtaya am bʌ lac chaʼan miʼ mejlel ti ñumen pʼʌtʼan majlel. w23.12 9, 10 párr. 6-8

Yaʼ tiʼ jumpatlel jiñi tabernáculo an jumpʼejl pulʌntib melbil bʌ ti cobre baqui miʼ yʌqʼuentel tsʌnsʌbil bʌ i majtan Jehová (Éx. 27:​1, 2; 40:29). Pero ili majtañʌl tac maʼañic miʼ junyajl ñusʌben i mul jiñi lac piʼʌlob (Heb. 10:​1-3). Jiñi majtañʌl tac tsiʼ wʌn pʌsʌ jiñi muʼ bʌ caj i yʌjqʼuel chaʼan miʼ junyajl ñusʌben i mul jiñi lac piʼʌlob. Jesús yujil chucoch Jehová tsiʼ choco tilel ila ti Lum: Chaʼan miʼ yʌcʼ i cuxtʌlel i miʼ tojben i mul pejtelel lac piʼʌlob (Mat. 20:28). Jin chaʼan, cheʼ bʌ tsiʼ chʼʌmʌ jaʼ tsiʼ pʌsʌ chaʼan yom i mel chuqui yom bʌ Jehová (Juan 6:38; Gál. 1:4). Cheʼ bʌ Jesús tsiʼ yʌcʼʌ i bʌ ti chʌmel junsujtel jach tsiʼ mele i «chaʼañʌch tiʼ pejtelel ora», cheʼ bajcheʼ jiñi miʼ junyajl ñusʌntel lac mul mi mucʼʌch lac ñop tiʼ tojlel (Heb. 10:​5-7, 10). w23.10 26, 27 párr. 10, 11

Joñonla maʼañic baʼ ora mi caj lac mejlel ti loqʼuel ti mulil yicʼot ti chʌmel ti lac bajñelil (Sal. 49:​7, 8). Jin chaʼan, Jehová tsiʼ ñaʼta chaʼan jiñi cʼuxbibil bʌ i yalobil miʼ yʌcʼ i cuxtʌlel chaʼañonla, i wen lets tsiʼ tojoyob. Cheʼ mi lac ñumen ñaʼtan tsaʼ bʌ i mele Jehová yicʼot Jesús chaʼañonla, ñumento mi caj laj qʼuel ti ñuc jiñi i tojol laj coltʌntel. Cheʼ bʌ Adán tsiʼ chaʼle mulil maʼañix tsaʼ mejli ti chumtʌl tiʼ pejtelel ora i cheʼʌch jaʼel jiñi i yalobilob. Jin chaʼan, Jesús tsiʼ yʌcʼʌ i bʌ ti chʌmel chaʼan i tojol jiñi laj coltʌntel, i cheʼ bajcheʼ jiñi miʼ mejlel lac chaʼ taj tsaʼ bʌ sajti. Cheʼ bʌ Jesús tsajñi wʌʼ ti Pañimil «maʼañic tsiʼ wis chaʼle mulil i mi tsaʼic i chaʼle lot» (1 Ped. 2:22). Cheʼ bʌ tsaʼ chʌmi mach xmulilic, jin chaʼan jiñi i cuxtʌlel lajalʌch bajcheʼ jiñi tsaʼ bʌ i sʌtʌ Adán (1 Cor. 15:45; 1 Tim. 2:6). w24.01 10 párr. 5, 6

Cheʼ bʌ Jesús tsaʼix chaʼ tejchi, tsaʼ ochi yaʼ ti Wen chʼujul bʌ ajñibʌl. Wen tsiquil chaʼan ñumen wento jiñi tsaʼ bʌ i chajpa Jehová chaʼan miʼ chʼujutesʌntel, come yaʼʌch chucul ti jiñi i cuxtʌlel tsaʼ bʌ i yʌcʼʌ Jesucristo yicʼot cheʼ jiñʌch jiñi Ñumen ñuc bʌ lac sacerdote. Yaʼ ti Wen chʼujul bʌ ajñibʌl baqui miʼ yochel jiñi ñumen ñuc bʌ sacerdote ti Israel melbil jach ti wiñicob, i miʼ chʼʌm ochel i chʼichʼel añimal. Pero Jesús tsaʼ junyajl ochi ti panchan, tiʼ tojel i wut Jehová, yaʼi tsiʼ pʌsʌ chaʼan tsaʼix i yʌcʼʌ i cuxtʌlel «chaʼan miʼ jisan jiñi mulil» (Heb. 9: 24-26). Ti lac pejtelel miʼ mejlel lac chʼujutesan Jehová yaʼ tiʼ templo, mach yʌlʌyic baqui bʌ jiñi lac pijtaya, mi ti panchan o ti Lum. w23.10 28 párr. 13, 14

Laʼ lac ñaʼtan jiñi woli bʌ i mel Jesús yaʼ ti panchan cheʼ añix bajcheʼ Rey yicʼot bajcheʼ Ñumen ñuc bʌ sacerdote. Tiʼ coltaya miʼ mejlel lac lʌcʼtesan lac bʌ ti Jehová i mi laj cʼajtin laj coltʌntel cheʼ i cʼʌjñibal lac chaʼan (Heb. 4:​14, 15). Laʼ lac wen ñaʼtan ti jujumpʼejl qʼuin jiñi am bʌ i meleyob yicʼot woli bʌ i melob ti lac tojlel, Jehová yicʼot Jesús. Cheʼ bʌ mi laj qʼuel bajcheʼ miʼ pʌsbeñoñobla i cʼuxbiya yomʌch miʼ ñijcan lac pusicʼal chaʼan mi lac bej melben i yeʼtel Jehová yicʼot lac tijicñʌyel (2 Cor. 5:​14, 15). Junchajp bajcheʼ mi lac pʌs chaʼan mi lac wen qʼuel ti ñuc woli bʌ i melob Jehová yicʼot Jesús ti lac tojlel jiñʌch cheʼ mi lac chaʼlen wersa laj coltan jiñi lac piʼʌlob chaʼan miʼ sujtelob tiʼ testigo Jehová yicʼot ti xcʌntʼañob i chaʼan Jesús (Mat. 28:​19, 20). Jiñʌch tsaʼ bʌ i mele jiñi apóstol Pablo, yujil chaʼan jiñi yom bʌ Jehová jiñʌch «chaʼan pejtelel lac piʼʌlob miʼ tajob i coltʌntel i miʼ cʌñob ti tsʼʌcʌl jiñi i sujmlel» (1 Tim. 2:​3, 4). w23.10 22 párr. 13, 14

Ili texto mi lac wen cʼʌn ti subtʼan chaʼan mi lac ñuqʼuesʌben i pusicʼal lac piʼʌlob i mi lac subeñob bajcheʼ yilal mi caj lac chumtʌl yaʼ ti Paraíso. ¿Chuqui miʼ mejlel lac mel chaʼan mi laj coltan yambʌlob chaʼan miʼ ñopob chuqui miʼ yʌl Apocalipsis 21:​3, 4? ¿I chuqui miʼ mejlel lac mel chaʼan mi lac ñumen ñop jiñi albil tac bʌ i chaʼan Jehová? Jehová mach cojach tiʼ subeyonla muʼ bʌ caj i mel ti talto bʌ qʼuin, an tacʌch jaʼel chuqui miʼ pʌsbeñonla chaʼan mucʼʌch caj i tsʼʌctiyel. Jiñi libro chaʼan Apocalipsis miʼ pʌsbeñonla chaʼan miʼ mejlel lac ñop chaʼan mucʼʌch caj i tsʼʌctiyel pejtelel albil bʌ i chaʼan Jehová, yaʼi miʼ yʌl: «Jiñi yaʼ bʌ buchul ti trono tsiʼ yʌlʌ: ‹¡Qʼuele! Woli c tsijibtesan pejtelel chuqui an›. Tsiʼ yʌlʌ jaʼel: ‹Tsʼijbun ili tʼan tac, come xucʼulʌch yicʼot i sujmʌch›. I tiʼ subeyon: ‹¡Tsaʼix tsʼʌctiyi! Joñon jiñi i Tejchibal yicʼot i Yujtibal›» (Apoc. 21:​5, 6a). w23.11 3 párr. 3-5

Juntiquil hermano tsaʼix bʌ i taja i pensar miʼ pʌs chaʼan cheʼʌch miʼ ñaʼtan bajcheʼ Jehová ti bajcheʼ miʼ xoj i pislel yicʼot ti bajcheʼ miʼ xiban i jol. Jiñi muʼ bʌ i melob pislelʌl tac, maʼañic miʼ qʼuelob ti ñuc Jehová i mach weñobic i melbal. Jin chaʼan, miʼ melob pislelʌl tac tsʌts ñʌpʼʌl bʌ miʼ cʌytʌl la quicʼot o jiñi i pislel jiñi wiñicob lajalix miʼ melob bajcheʼ i chaʼan bʌ jiñi xʼixicob. Juntiquil chʼiton woli bʌ i chaʼlen wersa chaʼan miʼ taj i ñaʼtʌbal mi caj i chʼʌm ti ñuc jiñi principio tac am bʌ ti Biblia yicʼot jiñi wen tac bʌ ejemplo am bʌ yaʼ ti congregación. Cheʼ bʌ woliʼ ñaʼtan bajcheʼ mi caj i xoj i pislel yicʼot i chʼʌl i bʌ, miʼ mejlel i cʼajtiben i bʌ: «¿Tsiquil ba ti jiñi muʼ bʌ c yajcan c mel chaʼan añix c ñaʼtʌbal yicʼot chaʼan mic chʼʌm ti ñuc muʼ bʌ i ñaʼtan yambʌlob? ¿Tsiquil ba tic pislel chaʼan mic chʼujutesan Dios?» (1 Cor. 10:​31-33). Jiñi chʼitoñob muʼ bʌ i cʼʌñob ti wen i pensar miʼ qʼuejlelob ti wen tiʼ tojlel jiñi hermanojob, pero cheʼ jaʼel utsʼat miʼ qʼuejlelob ti Jehová. w23.12 26 párr. 7

Jiñi rey ti sur an i contraji i tejclum Dios cʼʌlʌl wajali (Dn. 11:40). Cheʼ ti Primera yicʼot Segunda Guerra Mundial cabʌl hermanojob tsaʼ otsʌntiyob ti cárcel come maʼañic tsiʼ jacʼʌyob majlel ti guerra, i an alobob tsaʼ bʌ chaʼlentiyob ti expulsar ti escuela come maʼañic miʼ chaʼleñob ti saludar jiñi bandera. Pero ¿chuqui miʼ yujtel ili ora? Cheʼ bʌ woliʼ yajcʌntel juntiquil yumʌl tajol juntiquil hermano maʼañic mi caj i majlel ti votación, pero tajol miʼ tech i ñaʼtan majqui miʼ mulan chaʼan miʼ yochel tiʼ yeʼtel. Jin chaʼan, chaʼan xucʼulonla ti Jehová yom mi lac wen cʌntan chuqui mi lac ñaʼtan, mach jiñic jach chuqui mi lac mel (Juan 15:​18, 19). w23.08 12 párr. 17

Chaʼan mi lac taj laj cuxtʌlel, yom mi lac jacʼ ili ticʼojel: «Chaʼlenla ajñel chaʼan mi laʼ mʌl» (1 Cor. 9:24). Jesús tsiʼ yʌlʌ chaʼan cabʌl jax chuqui miʼ mejlel ti ochel ti lac pusicʼal, tajol jiñi uchʼel yicʼot chaʼan mi lac jap chuqui mi lac jap o chuqui tac mi laj cʼojoʼtan ti laj cuxtʌlel (Luc. 21:34). Ili texto yicʼot yan tac bʌ miʼ mejlel i coltañonla chaʼan mi laj qʼuel chuqui yom mi lac mel chaʼan mi lac mʌl jiñi ajñel i mi lac taj laj cuxtʌlel. Miʼ mejlel lac ñop chaʼan mucʼʌch caj lac mʌl jiñi ajñel come Jehová mi caj i yʌqʼueñonla lac pʼʌtʌlel chaʼan mi la cujtesan (Is. 40:​29-31). Jin chaʼan, mach yomic mi lac lujbʼan. Cheʼ yomonla bajcheʼ jiñi apóstol Pablo, tsiʼ chaʼle wersa chaʼan miʼ taj jiñi i majtan (Filip. 3:​13, 14). I sujmʌch, maʼañic majqui mi caj i mejlel i ñusan lac wenta, pero Jehová mucʼʌch caj i coltañonla chaʼan mi lac chʼʌm majlel jiñi laj cuch yicʼot chaʼan mi laj cʌy jiñi mach bʌ i cʼʌjñibalic lac chaʼan. Tiʼ coltaya Jehová mucʼʌch caj la cujtesan jiñi ajñel cʼʌlʌl tiʼ yujtibal. w23.08 31 párr. 16, 17

Cheʼ bʌ Jesús 12 i jabilel tsaʼ majli yicʼot i familia ti Jerusalén chaʼan miʼ melob jumpʼejl qʼuiñijel muʼ bʌ i mejlel ti jujumpʼejl jab yaʼ ti Jerusalén (Luc. 2:​46-52). Cheʼ bʌ sujtelix mucʼob tiʼ yotot, José yicʼot María tsiʼ qʼueleyob chaʼan mach yaʼic sujtel yicʼotob Jesús, jin chaʼan tsaʼ caji i wen sʌclañob. Cheʼ bʌ tsaʼ cʼoti i tajob yaʼ ti templo, María tsiʼ cʼajtibe Jesús chucoch tsiʼ wen acʼʌyob ti pensar. ¿I chuqui tsiʼ mele Jesús? Wen jach bajcheʼ tsiʼ jacʼʌ i maʼañic chuqui tsiʼ cʌlʌx alʌ. Anquese José yicʼot María maʼañic tsiʼ wen chʼʌmbeyob i sujm, Jesús tsaʼʌch i bej qʼueleyob ti ñuc. Xcolelob, tajol wocol mi laʼ wubin chaʼan mi laʼ jacʼben i tʼan laʼ papá laʼ mamá cheʼ mi laʼ qʼuel chaʼan miʼ melob mach bʌ weñic o mi laʼ qʼuel chaʼan maʼañic miʼ chʼʌmbeñetla i sujm, pero ¿chuqui miʼ mejlel i coltañetla? Ñaʼtanla bajcheʼ yubil miʼ yubin i bʌ Jehová. Jiñi Biblia miʼ yʌl chaʼan mi jiñi alobob miʼ jacʼbeñob i tʼan i tat i ñaʼ, «jiñi miʼ mulan lac Yum» (Col. 3:20). Jehová yujil mi jiñi a papá a mamá maʼañic miʼ chʼʌmbeñetob i sujm yicʼot mi ñumeñix ti pʼis muʼ bʌ i subeñetob. Pero mi mucʼʌch a jacʼbeñob i tʼan, mi caj a wʌqʼuen i tijicñʌyel Jehová. w23.10 7 párr. 5, 6

Cheʼ bʌ an majqui miʼ subeñonla chaʼan tsʼaʼ mi laj qʼuel jiñi homosexualoʼ bʌ. Miʼ mejlel lac suben chaʼan maʼañic majqui mi lac tsʼaʼlen, chaʼan an ti lac wenta mi lac yajcan chuqui mi caj lac mel (1 Ped. 2:17). Tajol cheʼ bajcheʼ jiñi mi caj i mulan i ñʌchʼtañonla i miʼ mejlel lac suben chucoch weñʌch cheʼ mi lac jacʼ muʼ bʌ i yʌl jiñi Biblia. Cheʼ bʌ juntiquil lac piʼʌl an chuqui miʼ subeñonla, mach ti orajic yom mi lac waʼ jacʼ come mach wen la cujilic chuqui miʼ ñaʼtan. Laʼ la cʌl jumpʼejl ejemplo, ñaʼtancu chaʼan juntiquil a piʼʌl ti clase miʼ subeñet chaʼan maʼañic i sujmlel cheʼ mi lac ñop ti Dios. ¿Muʼ ba caj a waʼ ñaʼtan ti ora chaʼan miʼ ñop jiñi evolución? Tiʼ sujm, tajol mi añicto ñaʼtʌbil i chaʼan jiñi. Tajol miʼ mejlel a chocben majlel jumpʼejl enlace, jumpʼejl tema o jumpʼejl video am bʌ ti jw.org muʼ bʌ i taj ti tʼan jiñi melbil tac bʌ i chaʼan Jehová. Ti wiʼil, tajol muʼto caj i mulan i bej qʼuel a wicʼot jiñi tsaʼ bʌ a chocbe majlel. Mi wen jach bajcheʼ maʼ pejcan, miʼ mejlel i qʼuextan chuqui miʼ ñaʼtan. w23.09 17 párr. 12, 13

Miʼ mejlel lac ñop chaʼan, anquese mi lac taj lac sajtemal o mi lac mel mach bʌ weñic, Jehová mi caj i bej cʼʌñonla yicʼot mi caj i yʌqʼueñonla i bendición mi mucʼʌch lac tojʼesan lac melbal i mi lac chʌn sʌclan i coltaya (Pr. 28:13). Sansón xmulilʌch i tsiʼ mele mach bʌ weñic, tsaʼʌch i chʌn chaʼle wersa i melben i yeʼtel Jehová. I Jehová tsaʼʌch i ñusʌbe i mul i tsiʼ cʼʌñʌ chaʼan miʼ mel ñuc tac bʌ. Jin chaʼan, tsiʼ yʌcʼʌ ti tsʼijbuntel tiʼ tojlel yaʼ ti capítulo 11 chaʼan Hebreos bajcheʼ juntiquil wiñic tsaʼ bʌ i wen pʌsʌ i ñopoñel. Miʼ wen ñuqʼuesan lac pusicʼal cheʼ la cujil chaʼan jiñi lac Tat am bʌ ti panchan miʼ cʼuxbiñonla i yom i yʌqʼueñonla lac pʼʌtʌlel, ñumento cheʼ bʌ woli lac ñusan wocol. Jin chaʼan, cheʼ bajcheʼ Sansón, laʼ laj cʼajtiben Jehová: «C Yum Dios, pʼuntañon ti ili ora. Ti wocol tʼan mij cʼajtibeñet pʼʌtʼesañon» (Jue. 16:28). w23.09 6, 7 párr. 18, 19

La cujil chaʼan lʌcʼʌlix i qʼuiñilel Jehová, jin chaʼan la com lac suben wen tʼan jiñi lac piʼʌlob. Pero an i tajol wocol mi la cubin chaʼan mi lac mel, ¿chucoch? Tajol mi lac bʌcʼñan yambʌlob, jiñʌch tsaʼ bʌ ujti tiʼ tojlel Pedro. Tsiʼ yʌlʌ chaʼan mach i cʌñʌyic Jesús i chaʼan mach xcʌntʼañic i chaʼan (Mat. 26:​69-75). Pero tsaʼʌch mejli i sʌt i bʌqʼuen i tsaʼ mejli i yʌl: «Mach laʼ bʌcʼñan chuqui miʼ bʌcʼñañob i mi yomicto mi laʼ cʼojoʼtan laʼ bʌ» (1 Ped. 3:14). Ili miʼ pʌsbeñonla chaʼan joñonla jaʼel miʼ mejlel lac mʌlben lac bʌqʼuen. ¿Chuqui mi caj i coltañonla chaʼan maʼañic mi lac bʌcʼñan yambʌlob? Pedro tsiʼ yʌlʌ: «Qʼuelela ti ñuc Cristo bajcheʼ laʼ Yum yaʼ ti laʼ pusicʼal» (1 Ped. 3:15). Ili yom i yʌl chaʼan mi laj qʼuel ti ñuc jiñi eʼtel am bʌ i chaʼan Jesús yicʼot mi lac ñaʼtan bajcheʼ cʼamel i pʼʌtʌlel. w23.09 27 párr. 6-8

Yom mi laj cʌntan lac bʌ chaʼan maʼañic mi lac mel «jiñi mach bʌ añic i cʼʌjñibal tac tilem bʌ baqui icʼyochʼan» (Efes. 5:11). Wen la cujil chaʼan mi juntiquil miʼ chʌn qʼuel chuqui tac mach bʌ weñic, chaʼan tac bʌ tsʼiʼlel o muʼ bʌ i taj ti tʼan chaʼan tac bʌ jiñi, ti jumpʼejl bʌ qʼuin mi caj i chaʼlen mulil (Gn. 3:6; Sant. 1:​14, 15). Jumpʼejl yac muʼ bʌ i cʼʌn Satanás jiñʌch cheʼ miʼ lotin lac piʼʌlob chaʼan maʼañix miʼ ñaʼtañob chuqui wen o chuqui mach bʌ weñic (Is. 5:20; 2 Cor. 4:4). Jin chaʼan, ili pañimil miʼ pʌs chaʼan mach lecojic jiñi tsʼiʼlel (2 Ped. 2:19). ¿Bajcheʼ miʼ mel? Miʼ cʼʌn película tac, jiñi televisión yicʼot página tac chaʼan internet. Satanás yom i yʌqʼueñonla lac ñaʼtan chaʼan mach lecojic pejtelel chuqui am bʌ ila ti pañimil, bajcheʼ jiñi tsʼiʼlel (Efes. 5:6). w24.03 22 párr. 8-10

Jiñi tabernáculo jiñʌch baqui jiñi israelitajob tsiʼ chʼujutesayob Dios yicʼot tsiʼ yʌqʼueyob i majtan (Éx. 29:​43-46). Tsiʼ cuchuyob ñumel yaʼ baqui miʼ majlelob (Éx. 25:​8, 9; Nm. 9:22). Tsiʼ cʼʌñʌyob lʌcʼʌ 500 jab, jinto tsaʼ mejli jiñi templo yaʼ ti Jerusalén. Jiñi tabernáculo tsiʼ pʌsʌ chaʼan anto chuqui ñumen wem bʌ, «jiñʌch junchajp muʼ bʌ i pʌs an tac bʌ ti panchan yicʼot i yʌxñalʌch» jiñi chʼujul bʌ templo. Jiñi apóstol Pablo tsiʼ yʌlʌ: «Ili pisil bʌ otot [o tabernáculo] jumpʼejlʌch lajiya chaʼan ili ora» (Heb. 9:9). Jin chaʼan, cheʼ bʌ Pablo tiʼ tsʼijbubeyob majlel carta jiñi xñoptʼañob hebreojoʼ bʌ, añix jiñi chʼujul bʌ templo. Tsaʼ waʼchoconti cheʼ ti jabil 29, cheʼ bʌ Jesús tsiʼ chʼʌmʌ jaʼ i tsaʼ caji i mel i yeʼtel bajcheʼ «ñumen ñuc bʌ sacerdote» (Heb. 4:14; Hech. 10:​37, 38). w23.10 26 párr. 6, 7

Chaʼan tijicña mi lac bej melben i yeʼtel Jehová, mach tsʌtsic yom mi lac mel lac bʌ. ¿Bajcheʼ miʼ mejlel lac mel iliyi? Cheʼ bʌ an chuqui miʼ qʼuextʌyel ti laj cuxtʌlel yom pʼisbilon jachla, i cheʼ jaʼel, yom mi laj qʼuel ti ñuc muʼ bʌ i ñaʼtan yambʌlob. Pejtelel muʼ bʌ lac melben i yeʼtel Jehová, la com chaʼan mach tsʌtsic mi lac mel lac bʌ yicʼot chaʼan pʼisbilon jachla. Cheʼ jaʼel, la com lac pʌs la cutslel yicʼot lac pecʼlel. Jiñi Biblia miʼ yʌl chaʼan Jehová jiñʌch jiñi xajlel, come xucʼul i maʼañic miʼ qʼuextʌyel (Dt. 32:4). Pero jiñi mach yomic i yʌl chaʼan tsʌts miʼ mel i bʌ, ¿bajcheʼ la cujil? Come an tacʌch chuqui an i qʼuexta chaʼan miʼ mejlel ti tsʼʌctiyel chuqui ñaʼtʌbilix bʌ i chaʼan. Joñonla miʼ mejlel lac lajin jaʼel, come melbilonla tiʼ yejtal. Jehová an i yʌqʼueyonla principio tac muʼ bʌ i coltañonla lac ñusan baqui jach bʌ wocol. Pejtelel am bʌ i mele yicʼot jiñi i principio tac miʼ pʌs chaʼan Jehová juntiquilʌch Dios xucʼul bʌ, pero cheʼ jaʼel, pʼisbil jach. w23.07 20 párr. 1-3

Jiñi Biblia miʼ yʌl chaʼan Jehová lajal bajcheʼ juntiquil ñaʼʌl muʼ bʌ i wen cʼuxbin i yalobil (Is. 66:​12, 13). Ñaʼtancu tiʼ tojlel juntiquil ñaʼʌl muʼ bʌ i wen cʌntan i yalobil yicʼot ti ora miʼ majlel i qʼuel cheʼ bʌ woli ti uqʼuel. Cheʼʌch miʼ mel Jehová jaʼel, mi caj i yajñel yicʼotonla cheʼ bʌ chʼijyemonla. Maʼañic miʼ cʌy i cʼuxbiñonla anquese mi lac mel mach bʌ weñic (Éx. 34:6). Cheʼʌch tsaʼ ujti tiʼ tojlel jiñi israelitajob, anquese mach junsujtelic jach tsiʼ yʌqʼueyob i chʼijyemlel Jehová, tsiʼ bej cʼuxbiyob cheʼ bʌ tsiʼ qʼuele chaʼan tsaʼʌch i chaʼ ñaʼtayob i bʌ. Junsujtel tiʼ sube jiñi tejclum: «Cʼuxbibiletla c chaʼan, [ . . . ] utsʼatax mij qʼuelet. Ñuquet tic wut» (Is. 43:​4, 5). Jehová maʼañic qʼuextʌyem, jinto mi tsaʼ lac mele mach bʌ weñic, mi mucʼʌch lac chaʼ ñaʼtan lac bʌ yicʼot mi lac sʌclan i coltaya, mi caj i bej cʼuxbiñonla. Miʼ yʌcʼ i tʼan chaʼan mi caj i ñusan lac mul tiʼ pejtelel i pusicʼal (Is. 55:7). Cheʼ jaʼel, jiñi Biblia miʼ yʌl chaʼan cheʼ bʌ Jehová miʼ ñusan lac mul, miʼ yʌqʼueñonla lac ñʌchʼtʌlel (Hech. 3:19). w24.01 26, 27 párr. 4, 5

Jehová miʼ mejlel i coltañonla cheʼ mi lac ñusan wocol tac. Jumpʼejl ejemplo, tajol yom mi laj cʼajtiben permiso jiñi lac yum ti eʼtel chaʼan mi lac majlel ti colem tempa bʌ. O chaʼan mi laj qʼuextan i yorajlel bajcheʼ mi caj lac chaʼlen eʼtel chaʼan maʼañic mi lac sʌt lac tempa bʌ. Cheʼ bʌ miʼ yujtel iliyi, miʼ mejlel laj qʼuel bajcheʼ miʼ coltañonla Jehová. Tajol toj sajtel lac pusicʼal cheʼ bʌ mi laj qʼuel chuqui miʼ yujtel, i cheʼ bajcheʼ jiñi mi lac ñumen ñop ti Jehová. Esdras tsiʼ pʌsʌ i pecʼlel i tsiʼ cʼajtibe i coltaya Jehová. Cheʼ bʌ Esdras mach mejlix i tsʼʌctesan i yeʼtel miʼ yubin, miʼ pejcan Jehová chaʼan miʼ cʼajtiben i coltaya (Esd. 8:​21-23; 9:​3-5). I cheʼ bʌ jiñi yañoʼ bʌ tsiʼ qʼueleyob chaʼan mucʼʌch i wen ñop ti Jehová, tsiʼ yʌqʼueyob i coltaya i tsiʼ pʌsʌyob i ñopoñel jaʼel (Esd. 10:​1-4). Mi woli lac wen chaʼlen pensar tiʼ caj maʼañic mi lac wen taj taqʼuin o chaʼan bajcheʼ mi caj laj cʌntan lac familia, laʼ lac pejcan Jehová ti oración i laʼ lac ñop chaʼan mucʼʌch caj i coltañonla. w23.11 17, 18 párr. 15-17

Cheʼ bʌ Jehová miʼ subeñonla chaʼan yom mi lac tsajcʌben i bijlel Abrahán chaʼan miʼ qʼuelonla ti toj, mach yomic i yʌl chaʼan junyajl cheʼ yom mi lac mel cheʼ bajcheʼ tsiʼ mele Abrahán. An tacʌch yambʌ muʼ bʌ i mejlel lac mel chaʼan mi lac pʌs lac ñopoñel. Miʼ mejlel lac pejcañob ti wen jiñi woli bʌ i tsijib cʼotelob ti congregación, mi laj coltan jiñi hermanojob woli bʌ i ñusañob wocol yicʼot mi lac sʌclan chuqui mi lac mel tiʼ tojlel lac familia, jin tacʌch muʼ bʌ i mulan Jehová (Rom. 15:7; 1 Tim. 5:​4, 8; 1 Juan 3:18). I junchajp wen ñuc bʌ i cʼʌjñibal bajcheʼ mi lac pʌs lac ñopoñel jiñʌch cheʼ mi lac chaʼlen subtʼan (1 Tim. 4:16). Ti lac pejtelel miʼ mejlel lac pʌs chaʼan mucʼʌch lac ñop chaʼan mi caj i tsictiyel jiñi albil tac bʌ i chaʼan Jehová, i chaʼan pejtelel muʼ bʌ i mel jiñʌch ñumen wem bʌ. Mi cheʼʌch mi lac mel miʼ mejlel lac ñop chaʼan Jehová mi caj i qʼuelonla ti toj yicʼot mi caj lac sujtel tiʼ yamigo. w23.12 3 párr. 3; 6 párr. 15

Jiñi apóstol Pablo tiʼ sube jiñi xñoptʼañob añoʼ bʌ ti Éfeso jiñi tʼan tac am bʌ ti jiñi texto chaʼan ili qʼuin. Ili ora jaʼel, pejtelel jiñi hermanojob yomʌch miʼ jacʼob ili ticʼojel. Chaʼan wen miʼ loqʼuel pejtelel chuqui miʼ melob yom miʼ jacʼbeñob i mandar tac Jehová yicʼot miʼ chʼʌmob ti ñuc jiñi principio tac am bʌ ti Biblia (Luc. 2:52). ¿Chucoch ñuc i cʼʌjñibal chaʼan jiñi chʼitoñob miʼ tajob majlel i ñaʼtʌbal? Jiñi hermanojob añob cabʌl i yeʼtel tiʼ familia yicʼot yaʼ ti congregación. Mi xcoleletto tajol añix a ñaʼta muʼ bʌ caj a mel ti talto bʌ qʼuin. Tajol a wom sujtel ti precursor, siervo ministerial, i ti wiʼil bajcheʼ anciano. Tajol an a ñaʼta ñujpuñel jaʼel yicʼot chaʼan a wom a walobilob (Efes. 6:4; 1 Tim. 3:1). Chaʼan miʼ mejlel a taj pejtelel iliyi, yom an a ñaʼtʌbal. w23.12 24 párr. 1, 2

Jehová tsiʼ waʼchoco jiñi ancianojob chaʼan miʼ cʌntʌbeñob i tiñʌmeʼ. Jiñi ancianojob mi wen qʼuelob ti ñuc cheʼ miʼ coltañob i yermañujob i miʼ chaʼleñob wersa chaʼan miʼ melob ti wen i yeʼtel (Jer. 23:4; 1 Ped. 5:2). ¡Wen tijicña mi la cubin cheʼ yaʼ ti congregación tac an hermanojob bajcheʼ ili! Jiñi ancianojob cabʌl chuqui miʼ mejlel i cʌñob tiʼ tojlel Gedeón come tsiʼ chaʼle wersa chaʼan miʼ cʌntan yicʼot miʼ coltan i tejclum Dios (Jue. 2:16; 1 Cr. 17:6; Heb. 6:12). Jiñi ancianojob añob tiʼ wenta chaʼan miʼ cʌntañob i tejclum Dios ti ili ora wen wocol jax bʌ (Hech. 20:28; 2 Tim. 3:1). Cabʌl chuqui miʼ mejlel laʼ cʌn tiʼ tojlel Gedeón come tsiʼ pʌsʌ i pecʼlel, tsiʼ jacʼbe i tʼan Dios yicʼot tsiʼ chʌn mele chuqui yom Jehová anquese wocolʌch tsiʼ yubi. Cheʼ jaʼel, ti lac pejtelel mi caj i coltañonla lac ñumen qʼuel ti ñuc i yeʼtel jiñi ancianojob i chaʼan yom mi laj coltañob (Heb. 13:17). w23.06 2 párr. 1; 3 párr. 3