Marzo

Maxto chumuloñicla ti jiñi tsijiʼ bʌ pañimil, pero laʼ lac ñaʼtan jiñi an tac bʌ: Jiñi ecʼ tac, jiñi teʼ tac, añimal tac yicʼot jiñi quixtañujob. Anquese maxto añic ti ñaxan, maʼañic majqui miʼ yʌl chaʼan maʼañic ili ora come Jehová tsiʼ mele (Gn. 1:​1, 26, 27). Jiñi lac Dios an i yʌlʌ chaʼan mi caj i mel tsijiʼ bʌ pañimil, i mucʼʌch caj i tsʼʌctesan i tʼan. Mi caj lac chumtʌl tiʼ pejtelel ora i maʼañix mi caj laj cʼamʼan. Cheʼ bʌ miʼ tsʼʌctiyel jiñi, mi caj laj qʼuel jiñi tsijiʼ bʌ pañimil cheʼ bajcheʼ mi laj qʼuel jiñi an tac bʌ ili ora (Is. 65:17; Apoc. 21:​3, 4). Cheʼ bʌ wolito lac pijtan miʼ tilel jiñi tsijiʼ bʌ pañimil, laʼ lac chaʼlen wersa lac pʼʌtʼesan jiñi lac ñopoñel. Laʼ lac wen ñaʼtan jiñi i tojol laj coltʌntel, laʼ lac ñaʼtan i pʼʌtʌlel Jehová yicʼot laʼ lac mel muʼ bʌ i ñumen lʌcʼtesañonla tiʼ tojlel. Mi mucʼʌch lac mel iliyi, mi caj la cochel ti jiñi «muʼ bʌ caj i yʌqʼuentelob jiñi tsaʼ bʌ wʌn ajli tiʼ caj añob i ñopoñel yicʼot i pijt» (Heb. 6:​11, 12). w23.04 31 párr. 18, 19

Jesús miʼ letsan i wut ti panchan i miʼ mel jumpʼejl oración tiʼ tojel i wut jiñi yaʼ bʌ añob. Yom i yʌqʼuen i ñuclel Jehová chaʼan jiñi muʼ bʌ caj i mel. Cheʼ jiñi ti cʼam bʌ tʼan miʼ yʌl: «¡Lázaro, loqʼuen tilel!» (Juan 11:43). I Lázaro miʼ loqʼuel. Jesús tsaʼ ujti i mel jumpʼejl ñuc bʌ milagro. Ili relato miʼ coltañonla lac ñumen ñop ti jiñi chaʼ chʼojyel. Laʼ laj cʼajtesan chaʼan Jesús tiʼ sube Marta: «Jiñi a weran mi caj i chaʼ cuxtʌyel» (Juan 11:23). Cheʼ bajcheʼ Jehová, Jesús yomʌch yicʼot mucʼʌch i mejlel i tsʼʌctesan iliyi. Cheʼ tsiʼ chaʼle uqʼuel miʼ pʌs chaʼan yomʌch i jisan jiñi chʌmel yicʼot jiñi chʼijyemlel. Cheʼ bʌ Jesús tsiʼ cuxtesa Lázaro, tsiʼ chaʼ pʌsʌ chaʼan añʌch i pʼʌtʌlel chaʼan miʼ cuxtesan jiñi chʌmeñoʼ bʌ. Laʼcu lac ñaʼtan tsaʼ bʌ i cʼajtesʌbe Marta cheʼ bajcheʼ miʼ yʌl ti ili texto chaʼan bʌ ili qʼuin. Cabʌl chuqui miʼ pʌsbeñonla chaʼan yomʌch mi lac ñop chaʼan Jehová mi caj i chaʼ cuxtesan jiñi chʌmeñoʼ bʌ. w23.04 11, 12 párr. 15, 16

Cheʼ bʌ tsaʼix lac ñumen chʼʌmbe i sujm chuqui jiñi yom bʌ Jehová tajol yom mi laj qʼuextan chuqui tac tsaʼ laj cʼajtibe. Yom mi laj cʼajtesan chaʼan Jehová mucʼʌch caj i tsʼʌctesan jiñi ñaʼtʌbil bʌ i chaʼan cheʼ tiʼ yorajlel. Mi caj i junyajl jisan pejtelel muʼ bʌ i yʌqʼueñonla lac ñusan wocol, cheʼ bajcheʼ jiñi cʼamʌjel tac, jiñi chʌmel, jiñi icʼ jaʼal yicʼot yan tac bʌ. Jehová mi caj i cʼʌn jiñi i Yumʌntel chaʼan miʼ tsʼʌctesan jiñi albil bʌ i chaʼan (Dn. 2:44; Apoc. 21:​3, 4). Pero cheʼ bʌ maxto cʼoti i yorajlel jiñi, muqʼuixto caj i bej acʼ chaʼan Satanás miʼ yuman ili pañimil (Juan 12:31; Apoc. 12:9). Mi Jehová miʼ laj jisan pejtelel jiñi wocol tac am bʌ ili ora, miʼ mejlel ti ñaʼtʌntel chaʼan Satanás weñʌch woli ti yumʌntel. Jin chaʼan, anquese yomixto mi lac pijtan chaʼan Jehová miʼ tsʼʌctesan jiñi albil tac bʌ i chaʼan, mach yomic i yʌl chaʼan maʼañic miʼ coltañonla. Jehová mi caj i coltañonla. w23.05 8 párr. 4; 9, 10 párr. 7, 8

¿Bajcheʼ miʼ mejlel laj coltan yambʌlob chaʼan miʼ tajob i wenlel jaʼel? Yom mi lac chaʼleñob ti invitar. Mach cojach yom mi lac puc jiñi invitación cheʼ mi lac chaʼlen subtʼan, miʼ mejlel lac mel jumpʼejl lista chaʼan majqui yambʌ mi lac mulan lac pʌyob, tajol lac familia, lac piʼʌlob ti eʼtel, lac piʼʌlob ti escuela o laj cʌñʌyoʼ bʌ. I mi tsaʼ jili lac invitación, miʼ mejlel lac chocbeñob majlel jumpʼejl enlace ti internet. ¡Mach la cujilic jaytiquil mi caj i cʼotelob! (Ec. 11:6). Laʼ laj cʼajtesan chaʼan cheʼ bʌ an majqui mi lac pʌy ti Conmemoración tajol añʌch i cʼajtiya tac, ñumento mi cojaxto woliʼ majlel. Jin chaʼan yom mi lac ñaʼtan chuqui mi caj lac suben. Cheʼ bʌ tsaʼix ñumi jiñi Conmemoración, tajol jiñi tsaʼ bʌ lac pʌyʌ anto i cʼajtiya tac. La com lac chaʼlen wersa laj coltan jiñi yomoʼ bʌ i cʌn i sujmlel chaʼan miʼ tajob i wenlel ti jiñi Conmemoración (Hech. 13:48). w24.01 12 párr. 13, 15; 13 párr. 16

Yaʼ ti Biblia mi lac taj 8 relato chaʼan tsaʼ bʌ chaʼ chʼojyesʌntiyob ti wajali. ¿Muʼ ba i mejlel lac chaʼlen ti estudiar jujumpʼejl? Cheʼ bʌ mi lac mel, laʼ lac sʌclan chuqui miʼ mejlel laj cʌn i laʼ lac ñaʼtan bajcheʼ miʼ pʌsbeñonla chaʼan Dios yom i mucʼʌch i mejlel i chaʼ cuxtesan jiñi chʌmeñoʼ bʌ. I laʼ lac ñaʼtan jiñi chaʼ chʼojyel ñumen ñuc bʌ i cʼʌjñibal, jiñi i chaʼan bʌ Jesús. Yonlel lac piʼʌlob tsiʼ qʼueleyob cheʼ bʌ tsaʼix chaʼ chʼojyesʌnti, ili chaʼ chʼojyel yaʼʌch baqui chucul lac ñopoñel (1 Cor. 15:​3-6, 20-22). Mi lac wen qʼuel ti ñuc cheʼ Jehová miʼ subeñonla chaʼan mi caj i chaʼ chʼojyesan jiñi chʌmeñoʼ bʌ. La cujil chaʼan mucʼʌch caj i tsʼʌctesan come yomʌch i mucʼʌch i mejlel i mel. Lajal bajcheʼ miʼ subeñonla ti jujuntiquil: «Mi caj i chaʼ chʼojyelob jiñi muʼ bʌ a cʼuxbiñob». Laʼ lac bej pʼʌtʼesan lac ñopoñel ti jiñi chaʼ chʼojyel. Mi mucʼʌch lac mel, mi caj lac ñumen lʌcʼtesan lac bʌ ti Jehová, jiñi tsaʼ bʌ i yʌqʼueyonla ili utsʼatax bʌ pijtaya (Juan 11:23). w23.04 8 párr. 2; 12 párr. 17; 13 párr. 20

Jiñi am bʌ i pecʼlel mach ñumeñic ti pʼis chuqui miʼ ñaʼtan tiʼ tojlel yicʼot yujil chaʼan añʌch baqui jaxʌl chuqui miʼ mejlel i mel. Cheʼ jaʼel, miʼ qʼuel ti ñuc yambʌlob (Filip. 2:3). Gedeón tsaʼʌch i pʌsʌ i pecʼlel. Cheʼ bʌ juntiquil ángel tiʼ sube chaʼan Jehová tsiʼ yajca chaʼan miʼ coltan jiñi israelitajob woli bʌ i wen ticʼlʌntelob ti jiñi madianitajob, tsiʼ yʌlʌ: «Pʼumpʼuñob c piʼʌlob i pʼolbalob Manasés. Joñon jaʼel cojix bʌ i yalobilon c tat» (Jue. 6:15). Tsiʼ ñaʼta chaʼan maʼañic mi caj i mejlel i mel jiñi eʼtel, pero yicʼot i coltaya Jehová tsaʼʌch mejli i mel. Jiñi ancianojob miʼ chaʼleñob wersa chaʼan tiʼ pejtelel ora miʼ pʌsob i pecʼlel (Hech. 20:​18, 19). Maʼañic miʼ chañʼesañob i bʌ chaʼan an tac chuqui yujilob melol o chuqui tac an i meleyob. Yicʼot maʼañic miʼ ñaʼtañob chaʼan maʼañobic i cʼʌjñibal tiʼ caj an chuqui mach weñic tsiʼ meleyob o an chuqui mach weñic tsaʼ loqʼui. w23.06 3 párr. 4, 5

Chaʼan miʼ junyajl jisʌntel Satanás, yomto miʼ ñumel ñumen ti mil jab (Apoc. 20:​7-10). Pero cheʼ bʌ muʼto caj i tsʼʌctiyel, jiñi Biblia miʼ yʌl muʼ bʌ caj i yujtel. Ñaxan, jiñi yumʌlob mi caj i yʌlob chaʼan añix «ñʌchʼtʌlel yicʼot maʼañix chuqui bʌbʌqʼuen bʌ» (1 Tes. 5:​2, 3). Cheʼ jiñi, jiñi ñuc bʌ wocol mi caj i tejchel cheʼ bʌ jiñi yumʌlob miʼ contrajiñob jiñi mach bʌ i sujmic ñopbalʌl (Apoc. 17:16). Ti wiʼil, Jesús mi caj i chaʼlen meloñel i mi caj i tʼox jiñi lac piʼʌlob cheʼ bʌ yilalob bajcheʼ tiñʌmeʼ yicʼot cheʼ bʌ yilalob bajcheʼ chivo (Mat. 25:​31-33, 46). Pero Satanás mach cheʼic jach mi caj i cʌytʌl, mi caj i ñijcʌben i pusicʼal junmojt tejclum tac chaʼan miʼ contrajibeñob i tejclum Jehová, yaʼ ti Biblia miʼ subentel bajcheʼ Gog (Ez. 38:​1-3, 10, 11). Cheʼ jaʼel, jiñi yajcʌbiloʼ bʌ wʌʼto bʌ añob ti pañimil mi caj i majlelob ti panchan, cheʼ bʌ yaʼix añob yicʼot Jesús yicʼot jiñi ángelob mi caj i chaʼleñob guerra ti Armagedón (Mat. 24:31; Apoc. 16:​14, 16). Ti wiʼil, mi caj i tejchel jiñi mil jab i yumʌntel Jesús wʌʼ ti Pañimil (Apoc. 20:6). w23.10 20, 21 párr. 9, 10

Cabʌl hermanojob ili ora chumulob baqui mach librejobic chaʼan miʼ melbeñob i yeʼtel Jehová. Anquese miʼ qʼuelob ti ñuc jiñi añoʼ bʌ i yeʼtel, pero cheʼ bajcheʼ Abdías cojach miʼ chʼujutesañob Jehová (Mat. 22:21). Miʼ pʌsob chaʼan mucʼʌch i bʌcʼñañob Dios cheʼ bʌ miʼ jacʼbeñob i tʼan i mach jiñic i chaʼan jiñi wiñicob (Hech. 5:29). Jin chaʼan, miʼ chʌn chaʼleñob subtʼan yicʼot miʼ tempañob i bʌ (Mat. 10:​16, 28). Cheʼ jaʼel, miʼ coltañob yambʌ hermanojob chaʼan miʼ tajob jiñi chʼujul bʌ bʌlñʌcʼʌl. Jiñi ejemplo chaʼan Henri, miʼ pʌsbeñonla chaʼan cheʼ mi lac bʌcʼñan Jehová miʼ coltañonla chaʼan mi lac taj lac chʼejlel. Henri chumul ti jumpʼejl país ti África baqui ti ñaxan jiñi hermanojob mach librejobic chaʼan miʼ melbeñob i yeʼtel Jehová. Jin chaʼan, tsiʼ mulaj i coltan jiñi hermanojob i tsiʼ chʼʌmbeyob majlel publicación tac, miʼ yʌl: «Tiʼ sujm, joñon cujil bʌqʼuen. Jehová jiñʌch tsaʼ bʌ i coltayon c pʌs c chʼejlel». w23.06 16 párr. 9, 11

Cheʼ bʌ Adán yicʼot Eva tsiʼ ñusayob tʼan tsaʼ sujtiyob ti xmulil. Pero, ¿muʼ ba caj i mʌctan jiñi chaʼan Jehová maʼañix miʼ mel chuqui yom ila ti Pañimil? Tajol Satanás tsiʼ ñaʼta chaʼan junchajp muʼ bʌ i mejlel i mel Jehová jin cheʼ miʼ jisan Adán yicʼot Eva i miʼ chaʼ mel yambʌ wiñic yicʼot xʼixic tojoʼ bʌ chaʼan miʼ tsʼʌctesañob jiñi ñaʼtʌbil bʌ i chaʼan. Pero cheʼ tsaʼic i mele Jehová jiñi, Satanás tsaʼ mejli i yʌl chaʼan juntiquilʌch xlot. ¿Chucoch? Come cheʼ bajcheʼ miʼ yʌl Génesis 1:​28, Jehová tiʼ sube Adán yicʼot Eva chaʼan jiñʌch jiñi i pʼolbalob muʼ bʌ caj i butʼob ili Pañimil. O Tajol Satanás tsiʼ ñaʼta chaʼan Jehová mi caj i cʌy chaʼan Adán yicʼot Eva miʼ yʌcʼob i yalobil, pero chaʼan maʼañic ba ora mi caj i sujtelob ti toj (Ec. 7:20; Rom. 3:23). Cheʼ bajcheʼ jiñi, Satanás miʼ mejlel i yʌl chaʼan Jehová maʼañic baʼ ora mi caj i mejlel i mel chuqui yom, come jiñi Pañimil maʼañic mi caj i bujtʼel ti toj bʌ lac piʼʌlob. w23.11 6 párr. 15, 16

Jehová jamʌ tsiquil chuqui tac miʼ subeñonla tiʼ Tʼan yicʼot tiʼ tojlel i yorganización. Jin chaʼan, maʼañic mi la cʌl chuqui mi lac bajñel ñaʼtan mach bʌ chuculic ti Biblia (Pr. 3:​5-7). Satanás miʼ cʼʌn jiñi «ñaʼtʌbalʌl tac mach bʌ i sujmic i maʼañic bʌ i cʼʌjñibal» yicʼot jiñi «ñuc bʌ i cʼʌjñibal i chaʼan jiñi pañimil» chaʼan miʼ lotiñonla yicʼot miʼ tʼoxonla (Col. 2:8). Jumpʼejl ejemplo, cheʼ ti ñaxam bʌ siglo Satanás tsiʼ cʼʌñʌ i ñaʼtʌbal jiñi lac piʼʌlob, jiñi i bajñel cʌntesa jiñi judíojob yicʼot cheʼ an muʼ bʌ i ñaʼtañob chaʼan yomto miʼ bej jajqʼuel jiñi mandar tac. Pero pejtelel iliyi mach i sujmic i tsaʼ jach i ñajtʼesayob ti Jehová. Ili ora Satanás miʼ cʼʌn jiñi televisión yicʼot jiñi internet chaʼan miʼ puc jiñi lot tac yicʼot miʼ tech tʼan tiʼ contra jiñi organización. w23.07 16 párr. 11, 12

Toj sajtel i pusicʼal Satanás cheʼ bʌ tsiʼ qʼuele bajcheʼ Jehová tsiʼ tojʼesa jiñi wocol tsaʼ bʌ tejchi tiʼ caj i ñusatʼan Adán yicʼot Eva. Cheʼ bʌ tsiʼ cʌyʌ chaʼan Adán yicʼot Eva miʼ yʌcʼob i yalobil, Jehová tsiʼ pʌsʌ chaʼan mach juntiquilic xlot. Cheʼ jaʼel, tsiʼ pʌsʌ chaʼan mucʼʌch i mejlel i mel chuqui yom come tsiʼ yʌcʼʌ chaʼan miʼ tilel jumpʼejl pʼolbalʌl muʼ bʌ caj i coltan jiñi i yalobilob Adán yicʼot Eva xjacʼtʼañoʼ bʌ. Cheʼ bajcheʼ jiñi, jiñi ñaʼtʌbil bʌ i chaʼan Jehová maʼañic tsaʼ qʼuextʌyi (Gn. 3:15; 22:18). Satanás maʼañic tsaʼ wis ñumi tiʼ jol chaʼan Jehová mi caj i cʼʌn ili pʼolbalʌl chaʼan miʼ tojtʌl lac mul. ¿Chucoch? Come jiñi tsaʼ bʌ i mele Jehová yaʼʌch chucul ti ñuc bʌ i cʼuxbiya, i Satanás maʼañic i chaʼan iliyi (Mat. 20:28; Juan 3:16). Cheʼ jiñi, come tsaʼix tojle lac mul, tiʼ yujtibal jiñi mil jab, jiñi i pʼolbalob Adán yicʼot Eva tsaʼ bʌ i jacʼbeyob i tʼan Jehová yicʼot tojobix bʌ mi caj i chumtʌlob ila ti Pañimil cheʼ bʌ sujtemix ti paraíso, cheʼʌch bajcheʼ tsiʼ wʌn alʌ Jehová. w23.11 6 párr. 17

Chʼujul mi laj qʼuel jiñi chʼichʼ. ¿Chucoch? Come yaʼʌch an laj cuxtʌlel, i jiñi laj cuxtʌlel jumpʼejlʌch wen ñuc bʌ lac majtan tsaʼ bʌ i yʌqʼueñonla Jehová (Lv. 17:14). Cheʼ bʌ Jehová tsiʼ yʌlʌ chaʼan muqʼuix i mejlel ti cʼuxtʌl jiñi añimal tac, tsiʼ yʌlʌ jaʼel chaʼan mach yomic miʼ cʼuxbentel i chʼichʼel (Gn. 9:4). Jiñʌch tsaʼ bʌ subentiyob jaʼel jiñi israelitajob cheʼ bʌ tsaʼ aqʼuentiyob jiñi mandar tac (Lv. 17:10). Cheʼ ti ñaxam bʌ siglo, jiñi junmojt muʼ bʌ i pʌsob bij tsiʼ yʌlʌyob chaʼan miʼ ticʼob i bʌ chaʼan maʼañic miʼ cʼuxob jiñi chʼichʼ (Hech. 15:​28, 29). I joñonla jaʼel yom mi lac chʼʌm ti ñuc ili mandar i mi laj cʌntan lac bʌ chaʼan maʼañic mi la cotsʌbentel chʼichʼ. Cheʼ jaʼel, yom mi lac chaʼlen wersa chaʼan maʼañic mi lac yajlel ti tsʼiʼlel. Jiñi apóstol Pablo tsiʼ yʌcʼʌ ili ticʼojel: «Tsʌnsanla jiñi laʼ bʌcʼtal chaʼan maʼañic mi laʼ yajlel ti tsʼiʼlel». Ili tʼan tac miʼ yʌqʼueñonla laj qʼuel chaʼan ti ora yom mi lac locʼsan ti lac pensar jiñi mach tac bʌ weñic. Jumpʼejl ejemplo, maʼañic mi caj laj qʼuel o lac mel jiñi muʼ bʌ i techbeñonla leco bʌ lac pensar (Col. 3:5; Job 31:1). w23.07 15 párr. 5, 6

¿Chucoch Sansón maʼañic tsiʼ ñaʼta chaʼan Dalila woli jach i lotin? ¿Chaʼan ba miʼ wen cʼuxbin? Mach la cujilic, pero Dalila tsaʼʌch i wersa cʼajtibe baqui miʼ tilel jiñi i pʼʌtʌlel, i ti wiʼil Sansón tsaʼʌch i sube. Jiñi tsaʼ bʌ i mele tsaʼ jach i yʌcʼʌ chaʼan miʼ ñusan wocol come tiʼ sʌtʌ i pʼʌtʌlel i mach utsʼatix tsaʼ qʼuejli ti Jehová (Jue. 16:​16-20). Sansón tsiʼ wen ñusa wocol, come jin tsiʼ ñopbe i tʼan Dalila i maʼañic tiʼ sʌclʌbe i coltaya Jehová. Jiñi filisteojob tsiʼ chucuyob i tsiʼ locʼsʌbeyob i bʌcʼ i wut. Cheʼ jiñi tsiʼ yotsayob ti cárcel yaʼ ti Gaza, i yaʼi tiʼ sujtesayob ti xyaj xʼeʼtel. Cheʼ jiñi, jiñi filisteojob tsiʼ meleyob jumpʼejl qʼuiñijel i tsaʼ caji i yʌqʼueñob i majtan jiñi dios Dagón, come tsiʼ ñaʼtayob chaʼan jiñʌch tsaʼ bʌ i coltayob chaʼan miʼ mejlel i chucob Sansón. Tsiʼ locʼsayob yaʼ ti cárcel i tsiʼ wen wajleyob (Jue. 16:​21-25). w23.09 5 párr. 13, 14

Tajol juntiquil lac piʼʌl ti eʼtel o ti escuela miʼ cʼajtibeñonla chucoch mi lac jacʼ pejtelel muʼ bʌ i yʌl jiñi Biblia. I sujmʌch, la com laj coltan pejtelel chuqui miʼ yʌl jiñi Biblia, pero yomʌch mi lac chʼʌm ti ñuc muʼ bʌ i ñaʼtan jaʼel jiñi yambʌlob (1 Ped. 3:15). Jin chaʼan, cheʼ bʌ an majqui miʼ melbeñonla jumpʼejl cʼajtiya yom mi lac ñaʼtan chaʼan jiñi miʼ mejlel i coltañonla laj qʼuel chuqui añob tiʼ pusicʼal i mach ti orajic mi lac ñaʼtan chaʼan yomob jach leto. Jin chaʼan, wen jach yom mi lac jacʼbeñob yicʼot mi lac pʌsbeñob la cutslel. Cheʼ mi lac pʌsbeñob la cutslel miʼ mejlel i ñijcañob chaʼan miʼ qʼuextañob i pensar. Tajol juntiquil lac piʼʌl ti eʼtel miʼ cʼajtibeñonla chucoch maʼañic mi lac mel cumpleaño. Cheʼ bʌ muʼto caj lac jacʼben, laʼ laj cʼajtiben lac bʌ: ¿Muʼ ba i ñaʼtan chaʼan mi lac mʌctʌntel chaʼan mi lac ñusan lac bʌ? Miʼ mejlel a suben chaʼan maʼ qʼuel ti ñuc cheʼ miʼ mulan chaʼan luʼ tijicñayob ti eʼtel. Cheʼ bajcheʼ jiñi, tajol muʼto caj i mejlel a suben chuqui miʼ pʌs jiñi Biblia chaʼan jiñi cumpleaño tac. w23.09 17 párr. 10, 11

La com laj cʼʌn ti wen jiñi tiempo cʌylem bʌ chaʼan mi lac suben wen tʼan lac piʼʌlob. Jiñi apóstol Pedro miʼ yʌl chaʼan yom chʌn yʌxʌl la co chaʼan jiñi i qʼuiñilel Jehová (2 Ped. 3:​11, 12). ¿Bajcheʼ mi lac mel? Aqʼuen i yorajlel chaʼan maʼ ñaʼtan bajcheʼ yilal mi caj lac chumtʌl yaʼ ti tsijiʼ bʌ pañimil. Ñaʼtancu cheʼ bʌ yaʼix añet: Maʼañix contaminación i mi caj a cʼux sumuc tac bʌ bʌlñʌcʼʌl. Mi caj a qʼuel cheʼ bʌ miʼ chaʼ chʼojyel jiñi tsaʼ bʌ chʌmiyob a chaʼan, i mi caj a tsictesʌbeñob jiñi tsaʼ bʌ chumleyob wajali bajcheʼ tsaʼ tsʼʌctiyi jiñi profecía tac am bʌ ti Biblia. Mi mucʼʌch a wen ñaʼtan iliyi, mi caj i coltañet chaʼan chʌn yʌxʌl a wo i maʼ cʼajtesan chaʼan añoñixla ti jiñi cojix tac bʌ qʼuin. Come la cujilix chuqui mi caj i yujtel ti talto bʌ qʼuin, maʼañic mi caj i lotiñoñobla ti jiñi mach bʌ i sujmic cʌntesa tac. w23.09 27 párr. 5, 6

¿Chucoch cabʌl xcolelob miʼ ñusañob tʼan? Come cheʼ miʼ qʼuelob chaʼan jiñi i papá i mamá mach cheʼic miʼ melob cheʼ bajcheʼ miʼ yʌlob, maʼañix miʼ yʌcʼob ti ñuc chuqui miʼ subentelob (2 Tim. 3:​1, 2). I an muʼ bʌ i ñaʼtañob chaʼan ñumeñix ti pʼis bajcheʼ miʼ tijqʼuelob o chaʼan jiñi i papá i mamá cheʼto miʼ melob bajcheʼ tsaʼ cʌntesʌntiyob ti wajali, pero chaʼan ili ora mach chʌn lajalix. ¿Am baʼ wubi jaʼel bajcheʼ jiñi? Cabʌlob wocol miʼ yubiñob chaʼan miʼ jacʼob ili i mandar Jehová muʼ bʌ i tilel ti jiñi texto chaʼan ili qʼuin. ¿Chuqui mi caj i coltañet a mel iliyi? Jesús jiñʌch wem bʌ ejemplo chaʼañonla (1 Ped. 2:​21-24). Cheʼ bʌ tsaʼ chumle ila ti pañimil juntiquilʌch toj bʌ wiñic, pero jiñi i papá i mamá xmulilob. Anquese tsiʼ tajayob i sajtemal i an chuqui tac maʼañic tsiʼ chʼʌmbeyob i sujm, Jesús tsaʼʌch i qʼueleyob ti ñuc tiʼ pejtelel ora (Éx. 20:12). w23.10 7 párr. 4, 5

Pablo tiʼ sube jiñi hermanojob hebreojoʼ bʌ chaʼan jiñi majtañʌl muʼ bʌ i lon acʼob maʼañic miʼ junyajl ñusʌbeñob i mul, jin chaʼan maʼañix i cʼʌjñibal jiñi Mandar. Cheʼ jaʼel, tsiʼ cʼajtesʌbeyob chaʼan jiñi i cuxtʌlel Jesús miʼ yʌqʼueñob jiñi «ñumen wem bʌ pijtaya», i jiñi miʼ mejlel i coltañob chaʼan miʼ lʌcʼtesañob i bʌ ti Dios (Heb. 7:19). Pablo tiʼ sube jiñi hermanojob hebreojoʼ bʌ chaʼan ñumen wen bajcheʼ woliʼ chʼujutesañob Jehová i mach jiñic bajcheʼ woliʼ lon melob tilel ti ñaxan. Jin chaʼan, tsiʼ yʌlʌ chaʼan bajcheʼ woliʼ melob jiñi judíojob «i yʌxñal jach jiñi muʼto bʌ caj i tilel, pero jiñi i sujm bʌ bʌcʼtalʌl jiñʌch Cristo» (Col. 2:17). Laʼcu lac ñaʼtan iliyi, cheʼ bʌ mi laj qʼuelben i yʌxñʌlel juntiquil lac piʼʌl, ¿yom ba i yʌl chaʼan woli lac junyajl taj laj qʼuel? Maʼañic. Cheʼ jaʼel, jiñi chʼujutesaya tsaʼ bʌ i yʌqʼueyob Jehová jiñi judíojob, i yʌxñʌlel jach yambʌ ñumen wem bʌ bajcheʼ mi caj i chʼujutesʌntel Jehová. Jin chaʼan, ñuc i cʼʌjñibal mi lac chʼʌmben i sujm chuquiyes jiñi chʼujul bʌ i templo Jehová, come jiñʌch muʼ bʌ i coltañonla chaʼan miʼ ñusʌntel lac mul yicʼot mi lac chʼujutesan cheʼ bajcheʼ yom. w23.10 25 párr. 4, 5

Yaʼ ti capítulo 11 chaʼan Daniel miʼ taj ti tʼan chaʼtiquil yumʌlob muʼ bʌ i contrajiñob i bʌ. Cheʼ mi lac lajeʼ ili profecía yicʼot yan tac bʌ profecía am bʌ ti Biblia, miʼ cʼotel laj qʼuel chaʼan jiñi rey ti norte jiñʌch Rusia yicʼot muʼ bʌ i coltañob, i jiñi rey ti sur jiñʌch Estados Unidos yicʼot Reino Unido. An hermanojob chumuloʼ bʌ ti tejclum tac am bʌ tiʼ pʼʌtʌlel jiñi rey ti norte i woliʼ wen ticʼlʌntelob yicʼot woliʼ yotsʌntelob ti cárcel. Pero jiñi hermanojob maʼañic miʼ cuñʼañob, woliʼ ñumen pʼʌtʼañob i ñopoñel. ¿Chucoch? Come yujilob chaʼan yaʼ ti libro chaʼan Daniel tsaʼ wʌn ajli chaʼan cheʼʌch mi caj i yujtel (Dn. 11:41). Mi joñonla mi lac ñaʼtan bajcheʼ woliʼ tsʼʌctiyel ili profecía ili ora, mi caj i coltañonla chaʼan mi lac chʌn cʼajtesan jiñi lac pijtaya yicʼot chaʼan chʌn xucʼulonla ti Jehová. w23.08 11 párr. 15, 16

Jehová miʼ yʌl chaʼan lajalonla bajcheʼ i bʌcʼ i wut. ¿Chucoch? Jiñi lac wut wen ñuc i cʼʌjñibal ti lac bʌcʼtal, i chuqui jach miʼ tsʼitaʼ cʼotel miʼ mejlel i low, jin chaʼan mi lac wen cʌntan. Miʼ mejlel la cʌl chaʼan lajal bajcheʼ Jehová woli i subeñonla: «Mi an majqui miʼ lowetla, joñon woliʼ lowon mi cubin». Jehová miʼ cʼuxbiñonla, jin chaʼan cʼux miʼ yubin cheʼ an chuqui mi lac chaʼlen i yom i cʌntañonla. Cheʼ bʌ mi lac ñusan wocol, miʼ mejlel laj cʼajtiben chaʼan miʼ cʌntañonla cheʼ bajcheʼ miʼ cʌntan i wut (Sal. 17:8). Jehová yom chaʼan maʼ ñop chaʼan mucʼʌch i cʼuxbiñet, pero miʼ chʼʌmben i sujm cheʼ an i tajol wocol maʼ wubin tiʼ caj chuqui tsaʼ ñusa wajali o woli bʌ a ñusan ili ora. Pero yomʌch maʼ chaʼlen wersa a ñop chaʼan mucʼʌch i cʼuxbiñet. ¿Chuqui mi caj i coltañet? Jiñʌch cheʼ maʼ qʼuel bajcheʼ an i pʌsʌ chaʼan miʼ cʼuxbin Jesús, jiñi muʼ bʌ caj i majlelob ti panchan yicʼot joñonla. Jiñʌch muʼ bʌ caj laj qʼuel ti ili estudio. w24.01 27 párr. 6, 7

Esdras qʼuelbilix i chaʼan bajcheʼ Jehová tsiʼ colta i tejclum cheʼ bʌ an ti wocol. Cheʼ ti jabil 484, jiñi rey Asuero tsiʼ yʌcʼʌ i tʼan chaʼan miʼ jisʌntel jiñi judíojob chumuloʼ bʌ ti Persia yicʼot ti jiñi tejclum tac am bʌ tiʼ cʼʌb. I ti jimbʌ ora, tajol Esdras yaʼ chumul ti Babilonia (Est. 3:​7, 13-15). Jin chaʼan añʌch ti wocol jaʼel. Cheʼ bʌ jiñi judíojob tsiʼ yubiyob iliyi, wen chʼijyem tsiʼ yubiyob i bʌ i tsaʼto i cʌyʌ i cʼuxob i waj, tsiʼ cʼajtibeyob i coltaya Jehová ti wocol tʼan (Est. 4:3). Pero ti wiʼil, jiñi yom bʌ i jisañob jiñi judíojob jiñʌch tsaʼ bʌ jisʌntiyob. ¡Ñaʼtancu bajcheʼ yubil tsiʼ yubi Esdras yicʼot jiñi yambʌ judíojob cheʼ bʌ tsiʼ yubiyob iliyi! (Est. 9:​1, 2). Jiñi tsaʼ bʌ i ñusa Esdras tsiʼ chajpa chaʼan jiñi yambʌ wocol tac muʼ bʌ caj i ñusan, i tsiʼ colta i ñumen ñop chaʼan Jehová mucʼʌch i mejlel i cʌntan i tejclum. w23.11 17 párr. 12, 13

Jiñi apóstol Pablo woliʼ taj ti tʼan jiñi mandar tsaʼ bʌ aqʼuentiyob jiñi israelitajob tiʼ tojlel Moisés (Rom. 3:​21, 28). Ti jimbʌ ora an xñoptʼañob judíojoʼ bʌ yomobto bʌ i wersa jacʼ jiñi Mandar. Jin chaʼan, Pablo tsiʼ taja ti tʼan Abrahán chaʼan miʼ pʌs chaʼan mach cʼʌñʌlic miʼ jajqʼuel jiñi Mandar chaʼan utsʼat miʼ qʼuejlelob ti Dios, cojach yom añob i ñopoñel. Jiñi tsaʼ bʌ i yʌlʌ miʼ wen ñuqʼuesan lac pusicʼal come miʼ pʌsbeñonla chaʼan utsʼat mi caj laj qʼuejlel ti Dios mi mucʼʌch lac ñop tiʼ tojlel yicʼot tiʼ tojlel Jesucristo. Jiñi melbal tac tsaʼ bʌ i yʌlʌ Santiago yaʼ ti capítulo 2 mach lajalic yicʼot jiñi tsaʼ bʌ i yʌlʌ Pablo. Santiago tsiʼ taja ti tʼan jiñi muʼ bʌ lac mel ti jujumpʼejl qʼuin, muʼ bʌ i yʌcʼ ti cʌjñel mi tiʼ sujm mi lac ñop Dios o maʼañic (Sant. 2:24). w23.12 3 párr. 8; 4, 5 párr. 10, 11

Mi juntiquilet hermana i woli a ñaʼtan ñujpuñel, yom maʼ wen qʼuel majqui mi caj i ñujpuñel a wicʼot. Ili jiñʌch junchajp wen ñuc bʌ ti a cuxtʌlel. Cʼajtesan chaʼan jiñi muʼ bʌ caj i ñujpuñel a wicʼot mi caj i sujtel ti a jol (Rom. 7:2; Efes. 5:33). Jin chaʼan, cʼajtiben a bʌ: «¿Juntiquilʌch ba wiñic añix bʌ i ñaʼtʌbal? ¿Tsiquil ba chaʼan jiñi ñumen ñuc bʌ i cʼʌjñibal tiʼ cuxtʌlel jiñʌch Jehová? ¿Wem ba chuqui tac miʼ yajcan i mel? ¿Muʼ ba i pʌs i pecʼlel cheʼ bʌ miʼ taj i sajtemal? ¿Miʼ qʼuel ti ñuc jiñi xʼixicob? ¿Muʼ ba caj i mejlel i cʌntañon chaʼan chʌn lʌcʼʌl mi cajñel ti Jehová, chaʼan mic taj chuqui i cʼʌjñibal c chaʼan yicʼot chaʼan chʌn tijicñayon?». Mi a wom a taj wem bʌ a ñoxiʼal, yom maʼ chaʼlen wersa a chajpan a bʌ chaʼan wem bʌ ijñamʌlet jaʼel. Jiñi wem bʌ ijñamʌl «i yaj coltaya» jiñi i ñoxiʼal (Gn. 2:18). Cheʼ jaʼel, come miʼ wen cʼuxbin Jehová, miʼ chaʼlen wersa chaʼan wen chuqui miʼ ñaʼtʌntel tiʼ tojlel i ñoxiʼal (Pr. 31:​11, 12; 1 Tim. 3:11). Mi woli a ñaʼtan ñujpuñel, teche a chajpan a bʌ, pʼʌtʼesan a cʼuxbiya ti Jehová i chaʼlen wersa chaʼan wem bʌ xcoltayajet ti a wotot yicʼot ti a congregación. w23.12 22, 23 párr. 18, 19

Jehová miʼ yʌcʼ i tʼan chaʼan mi caj i yʌqʼueñonla lac ñaʼtʌbal chaʼan mi lac chʼʌm wen tac bʌ decisión. Ñumento i cʼʌjñibal lac chaʼan i ñaʼtʌbal cheʼ bʌ an chuqui mi caj lac yajcan lac mel muʼ bʌ caj i qʼuextan laj cuxtʌlel. Cheʼ jaʼel miʼ yʌqʼueñonla lac pʼʌtʌlel chaʼan mi lac lʌtʼ. Cheʼ bajcheʼ tsiʼ mele tiʼ tojlel jiñi apóstol Pablo, Jehová mi caj i yʌqʼueñonla lac pʼʌtʌlel chaʼan mi lac lʌtʼ jiñi wocol tac (Filip. 4:13). Junchajp muʼ bʌ i cʼʌn jiñʌch jiñi la quermañujob. Cheʼ bʌ jumpʼejl jachix acʼʌlel yom chaʼan miʼ chʌmel, Jesús tsiʼ wen chaʼle oración. Tsiʼ cʼajtibe Jehová chaʼan maʼañic miʼ yʌjlel chaʼan woliʼ pʼaj. Pero Jehová tsiʼ chocbe cʼotel juntiquil ángel, lajal bʌ bajcheʼ i yermañu, chaʼan miʼ pʼʌtʼesan (Luc. 22:​42, 43). Cheʼ jaʼel, Jehová miʼ mejlel i coltañonla cheʼ bʌ juntiquil hermano miʼ pejcañonla o miʼ julaʼtañonla. Ti lac pejtelel yom mi lac chaʼlen wersa chaʼan mi lac suben wem bʌ tʼan jiñi la quermañujob (Pr. 12:25). w23.05 10, 11 párr. 9-11

Jiñi inactivojob muʼ bʌ i cʼotelob ti Conmemoración tajol miʼ pensariñob bajcheʼ yilal mi caj i qʼuejlelob ti jiñi hermanojob cheʼ yaʼix añob. Jin chaʼan, yom mi laj cʌntan lac bʌ chaʼan maʼañic mi laj cʼajtibeñob muʼ bʌ i mejlel i yʌqʼueñob i chʼijyemlel. La quermañujobʌch jaʼel i tijicña mi la cubin cheʼ mi lac chaʼ tem chʼujutesan Jehová yicʼotob (Sal. 119:176; Hech. 20:35). Weñʌch cheʼ Jesús tiʼ subeyonla chaʼan ti jujumpʼejl jab mi laj cʼajtesan cheʼ bʌ tsaʼ chʌmi, i mi lac chʼʌmben i sujm chucoch wen ñuc i cʼʌjñibal cheʼ mi lac mel. Cheʼ bʌ mi lac majlel ti Conmemoración cabʌl bajcheʼ miʼ coltañonla, i cheʼ jaʼel miʼ coltan yambʌ lac piʼʌlob (Is. 48:​17, 18). Miʼ coltañonla chaʼan mi lac ñumen cʼuxbin Jehová yicʼot Jesús, mi lac pʌs chaʼan mi lac wen qʼuel ti ñuc tsaʼ bʌ i meleyob yicʼot miʼ ñumen temonla. I miʼ mejlel laj coltan yambʌ lac piʼʌlob chaʼan miʼ ñaʼtañob chuqui yom miʼ melob chaʼan miʼ tajob jiñi bendición tac muʼ bʌ lac taj cheʼ tsaʼ tojle lac mul. Jin chaʼan, laʼ lac chaʼlen wersa lac chajpan lac bʌ chaʼan jiñi Conmemoración, jiñi wen ñuc bʌ qʼuin ti ili jabil. w24.01 13, 14 párr. 18, 19

Jehová miʼ cʼʌn jiñi i Tʼan chaʼan miʼ tojʼesañonla majlel. Pero mach cojach jiñi, miʼ cʼʌn jaʼel wiñicob waʼchocobiloʼ bʌ i chaʼan bajcheʼ «jiñi xucʼul bʌ xyaj eʼtel» chaʼan miʼ yʌqʼueñonla chuqui i cʼʌjñibal bʌ lac chaʼan chaʼan pʼʌtʌlonla tiʼ tojlel Jehová i wen chuqui mi lac mel (Mat. 24:45). Cheʼ jaʼel miʼ cʼʌn jiñi superintendentejob chaʼan circuito yicʼot jiñi ancianojob chaʼan miʼ coltañoñobla yicʼot miʼ ticʼoñobla chaʼan mi lac ñusan majlel jiñi wocol tac. Mi la cʌqʼuen wocolix i yʌlʌ Jehová chaʼan bajcheʼ woli i tojʼesañonla majlel ti ili cojix tac bʌ qʼuin wen wocol jax bʌ. Cheʼ bajcheʼ jiñi, chʌn lʌcʼʌl mi la cajñel tiʼ tojlel i mi lac bej chaʼlen xʌmbal ti jiñi bij chaʼan bʌ cuxtʌlel. An i tajol wocol mi la cubin chaʼan mi lac jacʼ muʼ bʌ i subeñonla Jehová, ñumento cheʼ jin miʼ cʼʌn wiñicob chaʼan miʼ subeñonla chuqui yom mi lac mel. Ti jimbʌ ora yom mi lac ñumen ñop chaʼan jiñʌch Jehová woli bʌ i tojʼesañonla majlel i chaʼan jiñi ñumen wem bʌ jiñʌch cheʼ mi lac jacʼben i tʼan. w24.02 20 párr. 2, 3

Chaʼan mi lac ñumen cʼuxbin Jehová, yom mi lac wen pejcan jiñi Biblia. I cheʼ bʌ mi lac mel laʼ laj qʼuel chuqui miʼ pʌsbeñonla tiʼ tojlel Jehová. Laʼ laj cʼajtiben lac bʌ: «¿Bajcheʼ miʼ pʌsbeñon ili versículo tac chaʼan Jehová mucʼʌch i cʼuxbiñon? ¿Bajcheʼ miʼ coltañon chaʼan mij cʼuxbin jaʼel?». Yambʌ muʼ bʌ i coltañonla chaʼan mi lac ñumen cʼuxbin Jehová jiñʌch cheʼ mi lac pejcan ti oración ti jujumpʼejl qʼuin i mi lac suben bajcheʼ yubil mi la cubin (Sal. 25:​4, 5). Jehová mucʼʌch caj i jacʼbeñonla (1 Juan 3:​21, 22). Ti jiñi i chaʼyajlel i xʌmbal Pablo bajcheʼ misionero tsiʼ cʌñʌ Timoteo. Juntiquil xcolel muʼ bʌ i cʼuxbin Jehová yicʼot jiñi yambʌ lac piʼʌlob. Cheʼ ñumeñix chaʼpʼej uxpʼejl jab Pablo tiʼ sube jiñi añoʼ bʌ ti Filipos: «Maʼañic yambʌ cheʼ bʌ yilal bajcheʼ Timoteo, ti jumpʼejl bʌ i pusicʼal miʼ ñaʼtañetla» (Filip. 2:20). Pablo tsiʼ wen mulaj cheʼ Timoteo miʼ wen cʼuxbin jiñi hermanojob. I miʼ mejlel lac ñaʼtan chaʼan jiñi congregación tac wen yomobix i qʼuelob Timoteo cheʼ bʌ miʼ yubiñob chaʼan mi caj i cʼotel i julaʼtañob (1 Cor. 4:17). w23.07 9 párr. 7-10

Moisés tsaʼ chʌmi cheʼ bʌ jiñi israelitajob maxto ochemobic ti jiñi Lum tsaʼ bʌ wʌn subentiyob. Pero, ¿i bajñel jach ba tsaʼ cʌyle jiñi i tejclum Dios? Maʼañic, come Jehová tsaʼ ajñi yicʼotob cheʼ xucʼulobʌch jaʼel. Jumpʼejl ejemplo, Jehová tiʼ sube Moisés chaʼan Josué mi caj i chʼʌm tiʼ wenta jiñi tejclum, i wolix i cʌntesan ti jimbʌ ora (Éx. 33:11; Dt. 34:9). Cheʼ jaʼel, an cabʌl wiñicob añobix bʌ i ñaʼtʌbal tsaʼ bʌ aqʼuentiyob tiʼ wenta ti mojt ti mojt israelitajob: Ti mil, ti cien, ti cincuenta yicʼot ti diez (Dt. 1:15). Ili miʼ pʌs chaʼan jiñi i tejclum Dios ti jimbʌ ora wen cʌntʌbil. Yambʌ ejemplo jiñʌch chaʼan bʌ Elías. Cabʌl jab tsiʼ colta jiñi israelitajob chaʼan miʼ chʼujutesañob Jehová. Pero, ti jumpʼejl bʌ qʼuin, Jehová tsiʼ choco majlel ti Judá (2 R. 2:1; 2 Cr. 21:12). ¿I bajñel ba tsaʼ cʌleyob jiñi 10 tribu ti Israel? Maʼañic, come Elías chajpʌbilix i chaʼan Eliseo. Jehová tsaʼʌch i tsʼʌctesa i tʼan i tsiʼ bej cʌnta i wiñicob. w24.02 5 párr. 12

Cheʼ bʌ jiñi xñoptʼañob ti Éfeso tsaʼ caji i jacʼbeñob i tʼan Jehová lajal bajcheʼ sʌcjamañix baqui tsaʼ cajiyob ti xʌmbal (Sal. 119:105). Tsiʼ cʌyʌyob jiñi mach bʌ i sujmic ñopbalʌl yicʼot jiñi tsʼiʼlel. Tsaʼ caji i lajiñob Dios i tsiʼ chaʼleyob wersa chaʼan miʼ chʼujutesañob yicʼot miʼ melob chuqui miʼ mulan (Efes. 5:1). Miʼ mejlel la cʌl chaʼan cheʼʌch añonla jaʼel ti ñaxan. Cheʼ bʌ maxto laj cʌñʌyic i sujmlel tajol tsaʼ la cotsa lac bʌ tiʼ melol i chaʼan tac bʌ jiñi ñopbalʌl mach bʌ i sujmic, i tajol an tsaʼto bʌ lac mele tsʼiʼlel. Pero cheʼ bʌ tsaʼ laj cʌñʌ Jehová tsaʼ laj cʌyʌ lac mel pejtelel jiñi i tsaʼ caji lac mel chuqui miʼ mulan. I jiñi añʌch i wen coltayonla (Is. 48:17). Pero an i tajol wocolʌch mi la cubin chaʼan maʼañic mi lac chaʼ ochel yaʼ baqui icʼyochʼan i mi lac chʌn ajñel bajcheʼ «i yalobilob sʌcjamañiyel». w24.03 21, 22 párr. 6, 7

Tajol maʼ ñaʼtan chaʼan maxto chajpʌbiletic chaʼan maʼ wʌcʼ a bʌ ti Jehová i maʼ chʼʌmjaʼ. Tajol come anto chuqui yom maʼ qʼuextan ti a cuxtʌlel o yomto maʼ ñumen pʼʌtʼesan a ñopoñel (Col. 2:​6, 7). Pero cʼajtesan chaʼan mach junlajalic miʼ cʼotel laj cʼuxbin Jehová. An maxto bʌ jalic i cajelob ti estudio i miʼ ñaʼtañob chaʼan muqʼuix caj i yʌcʼob i bʌ ti Jehová. Cheʼ jaʼel, an xcolelob ñumen sejelto bʌ i jabilelob miʼ yʌcʼob i bʌ ti Jehová i an mach bʌ cheʼiqui. Jin chaʼan mach a laj a bʌ a wicʼot yambʌlob i ñaʼtan jach chuqui yom bʌ maʼ weñʼesan o yom bʌ maʼ qʼuextan (Gál. 6:​4, 5). Mi tsaʼ qʼuele chaʼan maxto chʌjpʌbiletic, bej chaʼlen wersa. Cʼajtiben Jehová chaʼan miʼ coltañet a weñʼesan yomto bʌ maʼ qʼuel (Filip. 2:13). Miʼ mejlel a ñop chaʼan mi caj i ñʌchʼtañet yicʼot mi caj i coltañet (1 Juan 5:14). w24.03 5 párr. 9, 10

Junsujtel Sara an chuqui woliʼ wen pensarin, tsaʼ michʼa yicʼot Abrahán i tsaʼto i sube chaʼan i mul. Abrahán yujil chaʼan Sara mucʼʌch i qʼuel ti ñuc yicʼot miʼ coltan i decisión tac. Tsiʼ chaʼle wersa i ñʌchʼtan yicʼot tsiʼ ñopo i tojʼesan jiñi wocol (Gn. 16:​5, 6). ¿Chuqui mi laj cʌn? Jiñi wiñic jiñʌch am bʌ tiʼ wenta chaʼan miʼ chʼʌm jiñi decisión tac tiʼ familia (1 Cor. 11:3). Pero come miʼ cʼuxbin i yijñam miʼ ñʌchʼtan yicʼot miʼ chʼʌm ti ñuc chuqui miʼ yʌl, ñumento mi yaʼ ochem jaʼel ti jiñi decisión (1 Cor. 13:​4, 5). Ti jumpʼejl bʌ qʼuin, Abrahán tsaʼ cʼoti i julaʼ mach bʌ pijtʌbilic i chaʼan. Jin chaʼan, tiʼ sube Sara chaʼan miʼ chajpan cabʌl pan anquese an tac yambʌ chuqui woliʼ mel (Gn. 18:6). Sara ti ora tsiʼ jacʼʌ i tsiʼ colta Abrahán. Ijñametbʌla, miʼ mejlel laʼ coltan i decisión laʼ ñoxiʼal cheʼ bajcheʼ Sara. Mi cheʼʌch mi laʼ mel mi caj i ñumen pʼʌtʼan laʼ ñujpuñel (1 Ped. 3:​5, 6). w23.05 24 párr. 16, 17

Cheʼ bʌ Jehová tiʼ sujtesa ti juez Gedeón, wocolʌch tsiʼ yubi chaʼan miʼ jacʼ tʼan yicʼot miʼ pʌs i chʼejlel. Tsaʼ aqʼuenti jumpʼejl eʼtel wen bʌbʌqʼuen bʌ, jiñʌch chaʼan yom miʼ jisan i pulʌntib Baal am bʌ i chaʼan i papá (Jue. 6:​25, 26). Ti wiʼil, Gedeón tsiʼ tempa cabʌl soldadojob, i Jehová chaʼ sujtel tiʼ sube chaʼan yom miʼ tʼox locʼ i soldadojob (Jue. 7:​2-7). Cheʼ jiñi, Jehová tiʼ sube chaʼan yom miʼ majlel i jisan jiñi i contrajob ti ojlil acʼʌlel (Jue. 7:​9-11). Jiñi ancianojob yomʌch miʼ jacʼob tʼan. Cheʼ bʌ juntiquil anciano mucʼʌch i jacʼ tʼan miʼ mel chuqui miʼ yʌl jiñi Biblia yicʼot i yorganización Dios i cheʼ bajcheʼ jiñi miʼ yʌqʼuen wem bʌ ejemplo yañoʼ bʌ. Pero an i tajol wocolʌch miʼ yubiñob chaʼan miʼ jacʼob tʼan. Come cabʌl chuqui miʼ subentelob i mel ti jiñi organización, tajol wocol miʼ yubiñob chaʼan miʼ luʼ taj i qʼuelob. Cheʼ jaʼel, tajol miʼ cʼajtibeñob i bʌ mi jiñʌch ñumen wem bʌ jiñi woli bʌ i subentelob i mel. O tajol miʼ cʼajtibentelob i mel muʼ bʌ i mejlel i yʌcʼ chaʼan miʼ yotsʌntelob ti cárcel. Jin chaʼan, ¿bajcheʼ miʼ mejlel i lajiñob Gedeón jiñi ancianojob? Wen qʼuelela chuqui miʼ yʌjlel chaʼan yom miʼ mejlel i melela. w23.06 4, 5 párr. 9-11