Septiembre

Dios tsiʼ yʌqʼue i pʼʌtʌlel Jesús chaʼan miʼ jisan pejtelel jiñi wocol. An wocol tac maʼañic bʌ mi caj i mejlel lac bajñel jisan. Pero cheʼ bʌ Jesús tsiʼ mele jiñi milagro tac tsiʼ pʌsʌ chaʼan mucʼʌch i mejlel i mel. Jumpʼejl ejemplo, an i pʼʌtʌlel chaʼan miʼ jisan jiñi mulil, tiʼ caj jiñi mulil an wocol tac bajcheʼ jiñi cʼamʌjel yicʼot chʌmel (Mat. 9:​1-6; Rom. 5:​12, 18, 19). Jiñi i milagro tac miʼ pʌs chaʼan miʼ mejlel i lajmesan «baqui jach bʌ cʼamʌjel» yicʼotto miʼ tejchesan jiñi chʌmeñoʼ bʌ (Mat. 4:23; Juan 11:​43, 44). Cheʼ jaʼel, an i pʼʌtʌlel chaʼan miʼ ñʌjchʼesan icʼ jaʼal yicʼot i mʌlben jiñi jontol bʌ espíritujob (Mar. 4:​37-39; Luc. 8:2). Miʼ yʌqʼueñonla lac ñʌchʼtʌlel cheʼ la cujil chaʼan Jehová tsiʼ yʌqʼue i pʼʌtʌlel i Yalobil. Miʼ mejlel lac ñop chaʼan jiñi i Yumʌntel Dios mucʼʌch caj i chʼʌm tilel jiñi bendición tac. Jiñi milagro tac tsaʼ bʌ i mele Jesús tiʼ tsʼitaʼ pʌsʌ bajcheʼ cʼamel mi caj i mel cheʼ bʌ Reyix yaʼ tiʼ Yumʌntel Dios. w23.04 3 párr. 5-7

Mi colem jiñi a congregación, tajol maʼañic maʼ wen aqʼuentel comentario i tajol añix a ñaʼta chaʼan ñumen wen cheʼ maʼañix maʼ letsan a cʼʌb. Pero mach lujbʼaquet. Mach jumpʼejlic jach comentario yom maʼ chajpan. Cheʼ bajcheʼ jiñi, mi maʼañic maʼ wʌqʼuentel comentario ti jiñi ñaxan tac bʌ párrafo, miʼ mejlel a wʌqʼuentel ti yan tac bʌ. Cheʼ bʌ maʼ chajpan a bʌ chaʼan jiñi Estudio chaʼan Lac Tsictesʌbentel, ñaʼtan bajcheʼ miʼ taj i bʌ jujumpʼejl párrafo yicʼot i tema jiñi estudio. Cheʼ bajcheʼ jiñi mi caj i mejlel a wʌcʼ a comentario. Yambʌ mejl bʌ a mel jiñʌch cheʼ maʼ chajpan a bʌ ti jiñi párrafo tac ñumen wocol bʌ ti chʼʌmbentel i sujm. Mach cabʌlobic muʼ bʌ i letsañob i cʼʌb ti jiñi párrafo tac come ñumen wocol chaʼan miʼ tsictesʌntel. Pero ¿ixcu mi bej wocol maʼ wubin chaʼan maʼ wʌcʼ a comentario? Cheʼ bʌ muʼto caj i tejchel jiñi tempa bʌ pejcan jiñi hermano muʼ bʌ i ñusan jiñi estudio i suben chuqui ti párrafo a wom a wʌcʼ a comentario. w23.04 21, 22 párr. 9, 10

José tsaʼ sujti ti wem bʌ ñoxiʼal come tiʼ pejtelel ora tiʼ sʌclʌbe i coltaya Jehová. Uxsujtel Dios tiʼ sube bajcheʼ tac yom miʼ cʌntan i familia, i tsaʼʌch i jacʼʌ, anquese tajol wocolʌch tsiʼ yubi (Mat. 1:20; 2:​13-15, 19-21). José tsaʼ mejli i cʌntan María come tsaʼʌch i jacʼbe i tʼan Jehová i jiñi tsiʼ colta María chaʼan miʼ ñumen cʼuxbin yicʼot miʼ qʼuel ti ñuc. Cheʼ bajcheʼ José, jatetla ñoxiʼaletʌlbʌla, miʼ mejlel laʼ sʌclan ticʼojel tac am bʌ ti Biblia muʼ bʌ i coltañetla laʼ cʌntan laʼ familia. Mi caj laʼ pʌs chaʼan mi laʼ cʼuxbin laʼ wijñam cheʼ bʌ mucʼʌch laʼ jacʼ jiñi ticʼojel tac, anquese tajol an tac chuqui yom mi laʼ qʼuextan. Cheʼ bajcheʼ jiñi mi caj i ñumen pʼʌtʼan laʼ ñujpuñel. Juntiquil hermana ti Vanuatu añix bʌ ñumen ti 20 jab ñujpuñem, miʼ yʌl: «Cheʼ bʌ mij qʼuel chaʼan jiñi c ñoxiʼal miʼ sʌclan i coltaya Jehová i mucʼʌch i jacʼ mic ñumen qʼuel ti ñuc. Maʼañic mic chaʼlen bʌqʼuen i cujil chaʼan mi caj i chʼʌm wen tac bʌ decisión». w23.05 21 párr. 5

Jiñi judíojob muʼ bʌ i chaʼ cʼotelob ti Jerusalén yomʌch miʼ sujtelob ti chʼujul bʌ tejclum tiʼ wut Dios (Dt. 7:6). Anquese weñʌch cheʼ bʌ jiñi judíojob tsaʼ loqʼuiyob, añixto chuqui yom miʼ melob chaʼan utsʼat miʼ qʼuejlelob ti Jehová. Cabʌl judíojob tsaʼ bʌ i yilayob pañimil ti Babilonia tsaʼix i toybeyob i ñaʼtʌbal yicʼot i melbal jiñi babiloniojob. Ti wiʼil, cheʼ bʌ añix ora tsaʼ chaʼ sujtiyob majlel ti Israel jiñi ñaxam bʌ judíojob, Nehemías tsaʼ toj sajti i pusicʼal cheʼ bʌ tsiʼ qʼuele chaʼan jiñi i yalobilob jiñi judíojob mach yujilobix hebreo (Dt. 6:​6, 7; Neh. 13:​23, 24). ¿Bajcheʼqui mi caj i cʼuxbiñob yicʼot i chʼujutesañob Jehová jiñi i yalobilob mi maʼañic miʼ chʼʌmbeñob i sujm jiñi i Tʼan Dios tsʼijbubil bʌ ti hebreo? (Esd. 10:​3, 44). Tsiquil chaʼan jiñi judíojob añʌch cabʌl chuqui tac yom miʼ qʼuextañob i mucʼʌch caj i coltañob cheʼ bʌ yaʼix miʼ chumtʌlob ti Israel, baqui wolix i chaʼ tejchel i chʼujutesʌntel Jehová cheʼ bajcheʼ miʼ mulan (Neh. 8:​8, 9). w23.05 15 párr. 6, 7

Anquese la comʌch lac tsʼʌctesan jumpʼejl lac meta, an tac chuqui miʼ mejlel i mʌctañonla. Jumpʼejl ejemplo, miʼ mejlel lac bʌcʼ taj wocol muʼ bʌ i mejlel i chilbeñonla lac tiempo chaʼan mi lac tsʼʌctesan jiñi lac meta (Ec. 9:​11, 12). Miʼ mejlel lac taj jaʼel jumpʼejl wocol muʼ bʌ i yʌqʼueñonla lac chʼijyemlel yicʼot miʼ chilbeñonla lac pʼʌtʌlel (Pr. 24:10). Cheʼ jaʼel, come xmulilonla mi lac mel mach tac bʌ weñic maʼañic bʌ miʼ coltañonla chaʼan mi lac tsʼʌctesan lac meta (Rom. 7:23). O tajol lujb mi la cubin lac bʌ (Mat. 26:43). ¿Chuqui miʼ mejlel i coltañonla chaʼan mi lac chʌn chaʼlen wersa o chaʼan maʼañic mi la cʌcʼ chaʼan miʼ mʌctañonla jumpʼejl wocol? Anquese maʼañic woli a mejlel a tsʼʌctesan jumpʼejl meta, mach yomic maʼ ñaʼtan chaʼan maʼañic baʼ ora mi caj a tsʼʌctesan. Cheʼ bajcheʼ miʼ yʌl jiñi Biblia, tajol mi caj lac ñusan cabʌl wocol. Pero cheʼ jaʼel miʼ yʌl chaʼan yicʼot i coltaya Jehová, miʼ mejlel lac bej chaʼlen wersa yicʼot lac tsʼʌctesan jiñi lac meta. Ñaʼtancu bajcheʼ cʼamel miʼ yubin i tijicñʌyel Jehová cheʼ bʌ miʼ qʼuel chaʼan maʼ chaʼlen wersa a tsʼʌctesan jumpʼejl a meta anquese maʼ taj wocol. w23.05 30 párr. 14, 15

Chʼiton, mi jatet maʼ wochel bajcheʼ precursor mi caj a cʌn a chaʼlen eʼtel yicʼot yambʌlob yicʼot pʼisbil jach mi caj a cʼʌn jiñi taqʼuin (Filip. 4:​11-13). ¿Ixcu cheʼ muqʼuic a wochel bajcheʼ precursor auxiliar? Jiñi miʼ mejlel i coltañet chaʼan ti wiʼil maʼ sujtel ti precursor regular. Cheʼ bajcheʼ jiñi, mi caj a ñumen melben i yeʼtel Jehová, tajol ti construcción o Betel. Pejtelel jiñi hermanojob yom miʼ chaʼleñob wersa chaʼan miʼ tsʼʌctesañob jiñi requisito chaʼan miʼ yochelob ti anciano. Jiñi Biblia miʼ yʌl chaʼan jiñi hermano am bʌ i meta bajcheʼ ili «weñʌch jiñi eʼtel yom bʌ i taj» (1 Tim. 3:1). Chaʼan miʼ taj, yom miʼ ñaxan ochel ti siervo ministerial. Jiñi ancianojob yicʼot siervo ministerialob miʼ coltañob jiñi hermanojob i miʼ chaʼleñob subtʼan yicʼotob i tijicñʌyel. w23.12 28 párr. 14-16

Jiñi rey Josías an jaxto 16 i jabilel cheʼ bʌ tsaʼ caji i sʌclan Jehová, come yom i ñumen cʌn yicʼot i melben i yeʼtel. Pero wocolʌch tsiʼ yubi come ti jimbʌ ora jiñi lac piʼʌlob miʼ chʼujutesañob jiñi dios tac mach bʌ i sujmic. Jin chaʼan tsaʼʌch i wen pʌsʌ i chʼejlel chaʼan miʼ mel chuqui wen. ¡I tsaʼʌch mejli i mel! Maxto añic 20 i jabilel cheʼ bʌ tsiʼ jisa i chʼujutesʌntel jiñi dios tac mach bʌ i sujmic yaʼ ti tejclum (2 Cr. 34:​1, 2). ¿Bajcheʼ miʼ mejlel a lajin Josías anquese xcoleletto? Sʌclan Jehová i chaʼlen wersa chaʼan maʼ ñumen cʌn jiñi utsʼatax bʌ i melbal tac. Ili mi caj i ñijcan a pusicʼal chaʼan maʼ wʌcʼ a bʌ tiʼ tojlel. ¿I bajcheʼ mi caj i coltañet cheʼ maʼ wʌcʼ a cuxtʌlel ti Jehová? Qʼuele muʼ bʌ i yʌl Luke, tsaʼ bʌ i chʼʌmʌ jaʼ cheʼ 14 i jabilel: «Cʼʌlʌl ili ora ñaxan mi cʌcʼ tij cuxtʌlel jiñi i chaʼan bʌ Jehová i mic chaʼlen wersa chaʼan mi cʌqʼuen i tijicñʌyel» (Mar. 12:30). Mi cheʼʌch maʼ mel jaʼel mi caj a taj cabʌl bendición. w23.09 11 párr. 12, 13

Cheʼ bʌ jiñi apóstol Pablo tsiʼ chocbe majlel jiñi ñaxam bʌ i carta jiñi congregación ti Tesalónica an jaxto cheʼ bʌ jumpʼejl jab i waʼchocontel jiñi congregación, i tajol jiñi ancianojob maxto wen añobic i experiencia yicʼot tsiʼ tajayob i sajtemal, pero yomʌch miʼ qʼuejlelob ti ñuc. Jiñi ñuc bʌ wocol woliʼ ñumen lʌcʼtiyel majlel, tajol jiñi central mundial yicʼot jiñi sucursal tac maʼañix mi caj i mejlel i pejcañob jiñi congregación, i jiñi ancianojob tajol jiñobʌch muʼ bʌ caj i coltañoñobla. Jin chaʼan, yom mi laj cʼuxbiñob yicʼot mi laj qʼuelob ti ñuc ili ora. Mach yʌlʌyic chuqui miʼ yujtel, laʼ lac bej cʼʌn lac ñaʼtʌbal i mach jin jach mi laj qʼuel chuqui mach bʌ weñic miʼ mel jiñi ancianojob, laʼ laj cʼajtesan chaʼan Jehová, tiʼ tojlel Jesucristo, jin woliʼ tojʼesañob majlel ili xucʼul bʌ wiñicob. Cheʼ jaʼel, jiñi lac pijtaya miʼ coltañonla chaʼan maʼañic mi laj cʌlʌx mel lac pusicʼal. Lajal bajcheʼ jiñi casco miʼ cʌntʌben i jol jiñi soldado, cheʼʌch jaʼel jiñi lac pijtaya, miʼ cʌntan lac ñaʼtʌbal. Miʼ coltañonla laj qʼuel chaʼan pejtelel am bʌ ila ti pañimil maʼañic i cʼʌjñibal (Filip. 3:8). w23.06 11, 12 párr. 11, 12

Ti lac pejtelel yom mi lac ñaʼtan mi yom mi lac jacʼben i tʼan jiñi tonto bʌ xʼixic o maʼañic. Jiñi Biblia miʼ subeñonla chucoch mach yomic mi lac yajlel ti jiñi tsʼiʼlel. Yaʼ ti libro chaʼan Proverbios miʼ yʌl chaʼan jiñi «tonto bʌ xʼixic» miʼ yʌl chaʼan sumuc ti japol jiñi «xujchʼibil bʌ jaʼ» (Pr. 9:17). Pero ¿chuqui yom i yʌl jiñi jaʼ? Yaʼ ti Biblia miʼ lajintel jiñi piʼleya bajcheʼ jiñi jaʼ (Pr. 5:​15-18). Cheʼ bʌ juntiquil wiñic yicʼot xʼixic ñujpuñemoʼ bʌ miʼ piʼleñob i bʌ, lajal bajcheʼ woliʼ japob sumuc bʌ jaʼ tsʌwan tsʌwan bʌ. Jin chaʼan, jiñi «xujchʼibil bʌ jaʼ» tajol jiñʌch cheʼ bʌ juntiquil wiñic yicʼot xʼixic mach bʌ ñujpuñemobic miʼ piʼleñob. Jiñi muʼ bʌ i melob tsʼiʼlel mucul jach miʼ melob, lajal bajcheʼ juntiquil xujchʼ muʼ bʌ i yochel ti acʼʌlel chaʼan maʼañic miʼ qʼuejlel. Anquese mucʼʌch i tajob i tijicñʌyel cheʼ miʼ melob ti mucul iliyi, maʼañic chuqui mucul tiʼ wut Jehová come miʼ luʼ taj i qʼuel, maʼañic i sumuclel jiñi jaʼ come miʼ mejlel i ñajtʼesañob ti Jehová (1 Cor. 6:​9, 10). w23.06 22 párr. 7-9

¿Ixcu mi jiñi a woración mach loqʼuemix ti a pusicʼal maʼ wubin i maʼañix maʼ wubin a tijicñʌyel ti subtʼan? Mach a ñaʼtan chaʼan maʼañix a wicʼot i yespíritu Jehová. Come xmulilonla, i tilelʌch cheʼ an i tajol maʼañic chuqui la com mi la cubin. Mi tsaʼ wubi chaʼan wolix a sʌt a tijicñʌyel, jiñi ejemplo chaʼan jiñi apóstol Pablo miʼ mejlel i coltañet. Tsaʼʌch i chaʼle wersa chaʼan miʼ tsajcan Jesús, pero yujil chaʼan an i tajol mi caj i cʼuñʼan jaʼel. Pablo yomʌch i tsʼʌctesan i yeʼtel, mach yʌlʌyic bajcheʼ woliʼ yubin i bʌ. Cheʼ bajcheʼ Pablo, mach a wʌcʼ chaʼan jiñi bajcheʼ maʼ wubin a bʌ miʼ mʌctañet chaʼan maʼ mel chuqui yom bʌ maʼ mel. Mele chuqui wem bʌ anquese an i tajol mach a womic a mel. Ti wiʼil, jiñi muʼ bʌ a mel mi caj i coltañet chaʼan miʼ qʼuextʌyel bajcheʼ maʼ wubin a bʌ (1 Cor. 9:16). w24.03 11, 12 párr. 12, 13

Mi mucʼʌch lac chʼʌm ti wen jiñi la quermañujob yicʼot mi lac sujtesañob ti la camigo mach wocolic mi caj la cubin chaʼan mi lac pʌsbeñob laj cʼuxbiya (2 Cor. 6:​11-13). Yaʼ ti congregación mach junlajalic bajcheʼ yilalonla, chuqui tac ñusʌbil lac chaʼan o bajcheʼ tsaʼ coliyonla. Jin chaʼan, ¿chuqui mi caj i coltañonla chaʼan mi laj cʼuxbin pejtelel la quermañujob? Jiñʌch cheʼ mi laj qʼuel jiñi wen tac bʌ i melbalob. La cujil chaʼan Jehová mi caj i cʌntañonla cheʼ bʌ añoñixla ti jiñi ñuc bʌ wocol. Pero ñuc i cʼʌjñibal cheʼ mi laj cʼuxbin jiñi la quermañujob, ¿chucoch? Laʼcu lac ñaʼtan chuqui tiʼ sube jiñi i tejclum wajali cheʼ bʌ jiñi babiloniojob mi caj i contrajiñob. Tiʼ subeyob: «Ñupʼbenla i tiʼ tac laʼ wotot. Yom mi laʼ poj mujcun laʼ bʌ jinto miʼ lajmel i michʼajel lac Yum» (Is. 26:20). Tajol jiñʌch yom bʌ mi caj lac mel jaʼel. w23.07 6, 7 párr. 14-16

Wen cheʼ mi laj cʼajtiben lac bʌ bajcheʼ yilal miʼ qʼueloñobla yañoʼ bʌ: ¿Muʼ ba c tsʌtsʼesan c bʌ tic tʼan? ¿O cʌmbilon chaʼan mic ñʌchʼtan yambʌlob yicʼot mic chʼʌm ti ñuc muʼ bʌ i yʌlob? Mi mucʼʌch lac lajiñob Jehová yicʼot Jesús mi caj lac chaʼlen wersa chaʼan mach tsʌtsoñicla. Cabʌl chuqui miʼ mejlel ti qʼuextʌyel ti laj cuxtʌlel, tajol mi laj cʼamʼan, miʼ tejchel wocol yaʼ baqui chumulonla o wocol chaʼan mi lac taj taqʼuin, ti jimbʌ ora yom pʼisbilonla, mach yomic tsʌtsonla (Ec. 9:11). Tajol miʼ qʼuextʌyel jiñi asignación am bʌ lac chaʼan ti jiñi organización. ¿Chuqui miʼ mejlel i coltañonla? Yom mi lac ñaʼtan chaʼan mach chʌn lajalix añonla bajcheʼ ti ñaxan. Cheʼ jaʼel, yom mi lac ñaʼtan chuqui miʼ mejlel lac mel, mi lac ñop lac ñaʼtan chuqui wem bʌ yicʼot mi laj qʼuel chuqui miʼ mejlel lac mel tiʼ tojlel yañoʼ bʌ. w23.07 21, 22 párr. 7, 8

Cheʼ bʌ Daniel xcolelto, tsaʼ pʌjyi majlel ti Babilonia, ñajt bʌ cʌylem ti Jerusalén. Anquese xcolelto, jiñi babiloniojob wen tsiʼ qʼueleyob come wen cʼocʼ, utsʼatʌch ti qʼuelol yicʼot an i familia reyoʼ bʌ (1 S. 16:7). Jin chaʼan, tsaʼ yajcʌnti chaʼan miʼ cʌntesʌntel chaʼan ti wiʼil miʼ yotsʌntel ti xʼeʼtel i chaʼan jiñi rey (Dn. 1:​3, 4, 6). Jehová tsaʼʌch i wen cʼuxbi Daniel come yomʌch i melben i yeʼtel. Cheʼ bʌ an jaxto 20 i jabilel o maxto i taja, Jehová tsiʼ taja ti tʼan yicʼot jiñi yambʌ xucʼul bʌ i wiñicob bajcheʼ Noé yicʼot Job, tsaʼ bʌ i wen melbeyob i yeʼtel (Gn. 5:32; 6:​9, 10; Job 42:​16, 17; Ez. 14:14). Jehová maʼañic tsiʼ cʌyʌ i cʼuxbin Daniel, come chʌn xucʼul tsaʼ ajñi (Dn. 10:​11, 19). w23.08 2 párr. 1, 2

Mi a wom a mʌn jumpʼejl a moto yom maʼ ñaxan wen qʼuel mi weñʌch i maʼañic chuqui asiyem i chaʼan. Jiñʌch yom bʌ mi lac mel jaʼel cheʼ bʌ mi lac pejcan jiñi Biblia. ¿Bajcheʼ miʼ mejlel lac mel? Mi orajach mi lac pejcan, cojach mi caj laj cʌn «jiñi ñaxan tac bʌ cʌntesa am bʌ yaʼ ti chʼujul bʌ i tʼan Dios» (Heb. 5:12). Jin chaʼan, yomʌch mi lac wen tsajin muʼ bʌ i yʌl jiñi Biblia. Yom mi lac wen qʼuel bajcheʼ miʼ taj i bʌ jujumpʼejl parte yic’ot yambʌ. Mach cojach yom mi lac ñop chuqui miʼ yʌl jiñi Biblia, yomʌch mi lac chʼʌmben i sujm chucoch mi lac ñop. Chaʼan mi lac chʼʌmben i sujm ti tsʼʌcʌl jiñi i Tʼan Dios yom mi lac tsajin jaʼel jiñi ñumen wocol tac bʌ ti ñaʼtʌntel. Jiñi apóstol Pablo tiʼ sube jiñi xñoptʼañob ti jimbʌ ora chaʼan miʼ tsajiñob jiñi «i pochtʌlel, i ñajtlel, i chanlel yicʼot i tamlel» jiñi i Tʼan Dios chaʼan miʼ ñumen chʼʌmbeñob i sujm, cheʼ bajcheʼ jiñi xucʼul mi caj i bej ajñelob yicʼot tsʌts chuculob tiʼ ñopoñel (Efes. 3:​14-19). Jiñʌch yom bʌ mi lac mel jaʼel. w23.10 18 párr. 1-3

Yaʼ ti Biblia miʼ yʌjlel tiʼ tojlel cabʌl lac piʼʌlob tsaʼ bʌ i pʌsʌyob pijt. ¿Ixcu cheʼ muqʼuic a tsajin ili relato tac? Jumpʼejl ejemplo, David xcolelto cheʼ bʌ tsaʼ yajcʌnti chaʼan miʼ yochel bajcheʼ rey ti Israel, pero tsaʼto i pijta cabʌl jab chaʼan miʼ chʼʌm i yeʼtel. Simeón yicʼot Ana xucʼul tsiʼ melbeyob i yeʼtel Jehová anquese jalto tsiʼ pijtayob chaʼan miʼ qʼuelob jiñi Mesías (Luc. 2:​25, 36-38). Cheʼ bʌ maʼ pejcan ili relato tac cʼajtiben a bʌ: «¿Chuqui tsiʼ colta chaʼan miʼ chʌn pijtan? ¿Baqui tac bʌ i wenlel tsiʼ taja cheʼ bʌ tsiʼ pʌsʌ ili melbalʌl? ¿Bajcheʼ miʼ mejlel c lajin?». Cheʼ jaʼel, cabʌl chuqui miʼ mejlel laj cʌn tiʼ tojlel jiñi maʼañic bʌ tsiʼ pʌsʌyob pijt (1 S. 13:​8-14). Miʼ mejlel a cʼajtiben a bʌ: «¿Chucoch maʼañic tsiʼ pʌsʌyob pijt? ¿Baqui bʌ wocol tsiʼ tajayob?». w23.08 25 párr. 15

Jiñi apóstol Pedro tsaʼʌch i pʌsʌ i xucʼtʌlel. Maʼañic tsiʼ cʌyʌ i tsajcan Jesús anquese an chuqui tac tsaʼ ujti. Jumpʼejl ejemplo, cheʼ bʌ Jesús an chuqui tsiʼ yʌlʌ i jiñi xcʌntʼañob maʼañic tsiʼ chʼʌmbeyob i sujm, cabʌl tsiʼ cʌyʌyob, mi tsaʼicto i pijtayob chaʼan miʼ tsictesʌbentelob i sujmlel. Pero Pedro mach cheʼic tsiʼ mele. Tsiʼ yʌlʌ: «Jiñi a tʼan miʼ yʌcʼ cuxtʌlel mach bʌ añic miʼ jilel» (Juan 6:68). Jesús yujil chaʼan Pedro yicʼot jiñi yambʌ apóstolob mi caj i bajñel cʌyob. Pero wen chuqui tsiʼ yʌlʌ tiʼ tojlel Pedro i tsiʼ yʌlʌ chaʼan xucʼul mi caj i yajñel (Luc. 22:​31, 32). Jesús yujil chaʼan wen chuqui la com lac mel «pero cʼun jiñi lac bʌcʼtal» (Mar. 14:38). Jin chaʼan, Jesús maʼañic tsiʼ bajñel cʌyʌ Pedro anquese uxyajl tsiʼ yʌlʌ chaʼan mach i cʌñʌyic. Cheʼ bʌ tsaʼix chaʼ chʼojyi, Jesús tsiʼ pʌsbe i bʌ (Mar. 16:7; Luc. 24:34; 1 Cor. 15:5). Miʼ mejlel la cʌl chaʼan iliyi tsaʼʌch i chaʼ pʼʌtʼesa jiñi apóstol. w23.09 22 párr. 9, 10

Jehová miʼ junyajl ñusʌben i mul jiñi lac piʼʌlob muʼ bʌ i ñopob tiʼ tojlel, maʼañix miʼ chʌn cʼajtesan (Sal. 32:​1, 2). Miʼ qʼuelob ti toj i maʼañobix i mul miʼ qʼuelob come añob i ñopoñel. Anquese Abrahán, David yicʼot yambʌ xucʼul bʌ i wiñicob Dios tsaʼ qʼuejliyob tiʼ toj, bej xmulilobʌch. Pero come añob i ñopoñel, Dios tsiʼ qʼuele chaʼan maʼañobic i mul, mach cheʼic bajcheʼ jiñi lac piʼʌlob maʼañic bʌ miʼ chʼujutesañob (Efes. 2:12). Ti jiñi carta chaʼan Romanos, jiñi apóstol Pablo jamʌ tsiquil miʼ pʌs chaʼan mi la com sujtel tiʼ yamigo Jehová, yomʌch an lac ñopoñel. Jiñʌch tsaʼ bʌ ujti tiʼ tojlel Abrahán yicʼot David, i joñonla mucʼʌch lac mejlel jaʼel. w23.12 3 párr. 6, 7

Ti lac pejtelel miʼ mejlel la cʌqʼuen i majtan Jehová. ¿Bajcheʼ? Jiñʌch cheʼ mi laj cʼʌn lac tiempo, lac pʼʌtʌlel yicʼot lac taqʼuin chaʼan mi laj coltʌben jiñi i Yumʌntel. Mi mucʼʌch lac chaʼlen wersa bajcheʼ cʼamel chaʼan mi lac melben i yeʼtel Jehová mi caj lac pʌs chaʼan mucʼʌch laj qʼuel ti ñuc cheʼ miʼ mejlel lac chʼujutesan. Jiñi apóstol Pablo tsiʼ taja ti tʼan chuqui tac jiñi mach bʌ yomic mi laj cʌy lac mel (Heb. 10:​22-25). Tsiʼ yʌlʌ chaʼan ñuc i cʼʌjñibal cheʼ mi lac melben oración Jehová, mi lac suben yambʌlob chaʼan bʌ lac pijtaya yicʼot mi lac tempan lac bʌ yicʼot jiñi hermanojob chaʼan mi lac ñuqʼuesʌben lac bʌ lac pusicʼal, «ñumento cheʼ woli laj qʼuel chaʼan woliʼ lʌcʼtiyel jiñi qʼuin». Ti jiñi cojix bʌ capítulo tac chaʼan Apocalipsis, jiñi i yángel Jehová miʼ yʌl: «¡Chʼujutesan Dios!». Chaʼyajlto tsiʼ yʌlʌ, i jiñi miʼ pʌs chaʼan wen ñucʌch i cʼʌjñibal (Apoc. 19:10; 22:9). Mach lac ñajʌtesan jiñi tsaʼ tac bʌ laj cʌñʌ chaʼan jiñi chʼujul bʌ i templo Jehová yicʼot chaʼan jumpʼejlʌch ñuc bʌ lac majtan cheʼ mi lac chʼujutesan. w23.10 29 párr. 17, 18

Ti lac pejtelel la com lac jacʼ ili mandar: «Laʼ lac chʌn cʼuxbin lac bʌ». Pero mach yomic miʼ ñajʌyel lac chaʼan tsaʼ bʌ i yʌlʌ Jesús: «Mi caj i tsʌñan i cʼuxbiya lʌcʼʌ tiʼ pejtelel quixtañujob» (Mat. 24:12). Jesús maʼañic tsiʼ yʌlʌ chaʼan jiñi xcʌntʼañob i chaʼan mi caj i cʌy i cʼuxbiñob i bʌ. Pero yom mi laj cʌntan lac bʌ chaʼan mach cheʼic mi lac mel bajcheʼ jiñi lac piʼʌlob maʼañix bʌ miʼ pʌsbeñob i bʌ cʼuxbiya. Jin chaʼan, laʼ la cʌqʼuen i jacʼbal ili cʼajtiya: ¿Bajcheʼ miʼ mejlel lac ñaʼtan mi pʼʌtʌlʌch jiñi laj cʼuxbiya tiʼ tojlel jiñi hermanojob? Junchajp muʼ bʌ i coltañonla laj qʼuel mi pʼʌtʌlʌch jiñi laj cʼuxbiya tiʼ tojlel jiñi hermanojob, jiñʌch cheʼ mi lac ñaʼtan chuqui mi lac mel cheʼ bʌ miʼ tajob i sajtemal o miʼ melob mach bʌ weñic ti lac tojlel (2 Cor. 8:8). Jiñi apóstol Pedro tsiʼ yʌlʌ: «Pero ñumen ñuc bʌ i cʼʌjñibal jin cheʼ mi laʼ wen cʼuxbin laʼ bʌ, come jiñi cʼuxbiya miʼ ñusan cabʌl mulil» (1 Ped. 4:8). w23.11 10, 11 párr. 12, 13

Mi cojach mi lac pʌsben laj cʼuxbiya chaʼtiqui uxtiquil hermanojob ti congregación, maʼañic woli lac jacʼ jiñi mandar tsaʼ bʌ i yʌcʼʌ Jesús. I sujmʌch, tajol ñumen lʌcʼʌl mi la cubin lac bʌ tiʼ tojlel chaʼtiqui uxtiquil hermanojob, maʼañic i wocolel jiñi, cheʼʌch tsiʼ yubi i bʌ Jesús jaʼel (Juan 13:23; 20:2). Pero jiñi apóstol Pedro miʼ cʼajtesʌbeñonla chaʼan yom mi laj cʼuxbin tiʼ pejtelel hermanojob, cheʼʌch bajcheʼ miʼ pʌsbeñob i bʌ cʼuxbiya ti jumpʼejl familia (1 Ped. 2:17). Pedro tsiʼ yʌcʼʌ ili ticʼojel: «Pʌsben laʼ bʌ cʼuxbiya loqʼuem bʌ ti laʼ pusicʼal». ¿Chuqui yom i yʌl ili? Chaʼan yomto mi laj cʼuxbin jiñi muʼ bʌ lac ñaʼtan chaʼan mach yomic mi laj cʼuxbin. Jumpʼejl ejemplo, mi juntiquil hermano miʼ subeñonla o miʼ melbeñonla mach bʌ weñic, tajol ñaxam bʌ miʼ tilel ti lac jol jiñʌch chaʼan mi lac chaʼ sutqʼuiben, i maʼañic mi lac pʌs laj cʼuxbiya. Pero jiñi maʼañic mi caj i mulan Jehová (Juan 18:​10, 11). Pedro tsiʼ yʌlʌ: «Mach laʼ chaʼ sutqʼuin chuqui mach bʌ weñic mi laʼ melbentel mi yomicto mi laʼ chaʼ sutqʼuin jiñi pʼajoñel cheʼ an majqui miʼ pʼajetla. Acʼʌla jumpʼejl bendición» (1 Ped. 3:9). Mi tiʼ sujm a wujil cʼuxbiya, mi caj a pʌs a wutslel. w23.09 28, 29 párr. 9-11

Tajol cheʼ mi laj qʼuel juntiquil alob ñuquix bʌ tsaʼ bʌ laj cʌñʌ cheʼ chutto, miʼ toj sajtel lac pusicʼal i mi la cʌl: «Machʌch jalix tsaʼ coliyet». Pero chaʼan mi lac taj majlel jiñi laj colel o lac ñaʼtʌbal bajcheʼ xñoptʼan mach orajic miʼ yujtel, yom mi lac chaʼlen wersa (1 Cor. 13:11; Heb. 6:1). Yom mi lac ñumen lʌcʼtesan lac bʌ ti Jehová, mi laj cʼajtiben i coltaya chaʼan mi lac taj wen tac bʌ lac melbal, mi laj cʌn chuqui tac yom melol yicʼot mi lac chajpan lac bʌ chaʼan jiñi talto bʌ qʼuin (Pr. 1:5). Jehová tsiʼ meleyonla ti lac pejtelel (Gn. 1:27). Pero mach lajalic tsiʼ mele jiñi wiñic yicʼot xʼixic. Ti jujuntiquil tsaʼ aqʼuentiyob jumpʼejl i yeʼtel, i chaʼan miʼ mejlel i tsʼʌctesañob añʌch chuqui yom miʼ cʌñob i mel yicʼot yom miʼ tajob wen tac bʌ i melbalob (Gn. 2:18). w23.12 18 párr. 1, 2

¿Yom ba Jesús chaʼan jiñi yambʌ lac piʼʌlob miʼ cʼʌñob i cʼabaʼ i Tat? Cheʼʌchi. Tajol ti jimbʌ ora an wiñicob wen chʼujul bʌ miʼ qʼuelbeñob i cʼabaʼ Dios i jin chaʼan mach weñic miʼ qʼuelob cheʼ miʼ yʌjlel. Pero Jesús tsaʼʌch i yʌcʼʌ ti ñuc jiñi i cʼabaʼ i Tat i maʼañic tsiʼ chʼʌmʌ ti ñuc chuqui miʼ ñaʼtan jiñi wiñicob. Ti jumpʼejl bʌ qʼuin tiʼ tsʼʌca juntiquil wiñic am bʌ i xibʌjlel. Jiñi lac piʼʌlob tsiʼ chaʼleyob bʌqʼuen i tiʼ subeyob Jesús chaʼan miʼ loqʼuel majlel yaʼi (Mar. 5:​16, 17). Pero Jesús yom chaʼan miʼ cʌmbeñob i cʼabaʼ Jehová. Jin chaʼan tiʼ sube jiñi wiñic tsaʼ bʌ i tsʼʌca chaʼan yom miʼ tsictesʌben yambʌyob chuqui tsiʼ mele Jehová, mach jiñic tsaʼ bʌ i mele Jesús (Mar. 5:19). Jesús, jiñi lac Rey, yom chaʼan mi la cʌcʼ ti cʌjñel jiñi i cʼabaʼ Jehová i cheʼ bʌ mi lac mel bajcheʼ jiñi mi lac tijicñesan (Mat. 24:14; 28: 20). w24.02 10 párr. 10

Wen tijicñayonla cheʼ añonla tiʼ yorganización Jehová. Anquese ti ili pañimil cabʌl jax wocol, joñonla añonla ti jumpʼejl familia wen temel bʌ an (Sal. 133:1). Cheʼ jaʼel, Jehová miʼ yʌqʼueñonla ticʼojel muʼ bʌ i coltañonla chaʼan tijicñayonla ti lac familia (Efes. 5:​33–6:1). I miʼ yʌqʼueñonla lac ñaʼtʌbal chaʼan mi lac mʌlben jiñi muʼ tac bʌ mejlel i chilbeñonla lac tijicñʌyel. Pero tiʼ sujm, chaʼan mi lac chʌn melben i yeʼtel Jehová an i tajol yom mi lac wen chaʼlen wersa. ¿Chucoch? Come jiñi muʼ bʌ i melob o muʼ bʌ i yʌlob yambʌlob miʼ mejlel i lowonla. Cheʼ jaʼel, miʼ mejlel la cubin lac chʼijyemlel tiʼ caj lac sajtemal, ñumento mi mach junsujtelic jach mi lac mel. Jin chaʼan, yom mi lac bej cuch chaʼan mi lac chʌn melben i yeʼtel Jehová cheʼ bʌ juntiquil hermano miʼ lowonla, cheʼ bʌ an wocol ti lac ñujpuñel yicʼot cheʼ chʼijyemonla tiʼ caj lac sajtemal. w24.03 14 párr. 1, 2

Tajol la cujil tiʼ tojlel hermanojob am bʌ i ñumen melbeyob i yeʼtel Jehová. Tajol tsaʼ majliyob ti Escuela chaʼan evangelizadores o ti jumpʼejl congregación o ti jumpʼejl territorio baqui ñumen yomto xsubtʼañob. ¿Muʼ baʼ mejlel a mel jaʼel jiñi? Mi cheʼʌchi, aqʼuen a bʌ jiñi meta. Jiñi i wiñicob Jehová tiʼ pejtelel ora miʼ sʌclañob bajcheʼ miʼ mejlel i ñumen melbeñob i yeʼtel Dios (Hech. 16:9). Pero ¿ixcu mi maʼañic maʼ mejlel? Mach a ñaʼtan chaʼan maʼañix a cʼʌjñibal. Ñuc bʌ i cʼʌjñibal jiñʌch cheʼ maʼ lʌtʼ tiʼ melol i yeʼtel Dios (Mat. 10:22). Cʼajtesan, Jehová tijicña miʼ yubin cheʼ maʼ wʌqʼuen jiñi ñumen wem bʌ jiñʌch bajcheʼ cʼamel miʼ mejlel a mel. Cheʼ bajcheʼ jiñi, mi caj i mejlel a bej tsajcan Jesús cheʼ bʌ tsaʼix a chʼʌmʌ jaʼ (Sal. 26:1). w24.03 11 párr. 11

Jiñi lac Tat am bʌ ti panchan miʼ yʌcʼ i tʼan chaʼan mi caj i ñusʌbeñonla lac mul (Sal. 86:5). Jin chaʼan, mi mucʼʌch lac chaʼ ñaʼtan lac bʌ chaʼan tsaʼ bʌ lac mele, miʼ mejlel lac ñop chaʼan mi caj i tsʼʌctesan i tʼan i mi caj i ñusʌbeñonla. ¿Chuqui mi caj i coltañonla chaʼan maʼañic mi lac ñaʼtan chaʼan pejtelel muʼ bʌ lac mel mach jasʌlic? Jiñʌch cheʼ mi laj cʼajtesan chaʼan Jehová miʼ chʼʌmbeñonla i sujm i maʼañic miʼ cʼajtibeñonla chuqui ñumeñix bʌ ti pʼis. Miʼ wen qʼuel ti ñuc cheʼ mi lac chaʼlen wersa lac mel cheʼ bajcheʼ cʼamel mi lac mejlel. Miʼ mejlel i coltañonla jaʼel jiñi ejemplo tac am bʌ ti Biblia chaʼan tsaʼ bʌ i chaʼleyob wersa i melbeñob i yeʼtel Jehová, bajcheʼ tiʼ tojlel jiñi apóstol Pablo. Tsiʼ wen chaʼle ñajt bʌ xʌmbal chaʼan miʼ chaʼlen subtʼan yicʼot miʼ waʼchocon congregación tac. Pero ti jumpʼejl bʌ qʼuin tsaʼ qʼuextʌyi bajcheʼ an i maʼañix tsaʼ mejli ti subtʼan. ¿Chuqui tsaʼ ujti? ¿Mach ba tijicñayix tsiʼ bej qʼuele Jehová? Mach cheʼiqui, come tsaʼʌch i chaʼle wersa i bej mel bajcheʼ cʼamel miʼ mejlel, i Jehová tsiʼ bej aqʼue i bendición (Hech. 28:​30, 31). Joñonla jaʼel maʼañic mi caj i mejlel lac mel bajcheʼ cʼamel la com tiʼ pejtelel ora, pero ñuc bʌ i cʼʌjñibal tiʼ tojlel Jehová jiñʌch chucoch mi lac mel. w24.03 27 párr. 7, 9

Jesús tsiʼ yʌqʼue wem bʌ ejemplo jiñi xcʌntʼañob i chaʼan. Anquese tsaʼʌch i chaʼle subtʼan i tiʼ pejtelel ora joyol ti cabʌl lac piʼʌlob yicʼot mach wen jocholic, tsaʼʌch i locʼsʌbe i yorajlel chaʼan miʼ chaʼlen oración (Mar. 6:​31, 45, 46). Sʌcʼan jach miʼ tejchel chaʼan miʼ bajñel ajñel i miʼ pejcan i Tat. Junsujtel tsiʼ chaʼle oración ti jumpʼejl acʼʌlel come mi caj i chʼʌm jumpʼejl ñuc bʌ decisión (Luc. 6:​12, 13). I cheʼ bʌ an jachix jumpʼejl acʼʌlel chaʼan miʼ chʌmel, Jesús maʼañic tsiʼ cʌyʌ i pejcan Jehová ti oración come yujil chaʼan mi caj i ñusan jumpʼejl ñuc bʌ wocol (Mat. 26:​39, 42, 44). Jiñi i yejemplo Jesús miʼ pʌsbeñonla chaʼan mach yʌlʌyic mi mach wen jocholoñicla, yomʌch mi la cʌqʼuen i yorajlel chaʼan mi lac pejcan Jehová ti oración. Cheʼ bajcheʼ Jesús, tajol yom mi laj qʼuel bajcheʼ ora mi caj lac mel: Tajol sʌcʼan jach o ti acʼʌlel miʼ mejlel lac chaʼlen oración. Cheʼ bajcheʼ jiñi mi lac pʌsben Jehová chaʼan mi laj qʼuel ti ñuc ili utsʼatax bʌ majtañʌl. w23.05 3 párr. 4, 5

Jehová miʼ pʌsben i cʼuxbiya jaʼel jiñi yajcʌbiloʼ bʌ chaʼan miʼ majlelob ti panchan, cheʼ bajcheʼ mi yʌl jiñi texto tsaʼ bʌ laj qʼuele. Ti griego, ili versículo miʼ pʌs chaʼan Jehová miʼ wen cʼuxbin jiñi yajcʌbiloʼ bʌ come miʼ lajeʼ i cʼuxbiya Jehová bajcheʼ pʼʌtʌl bʌ jaʼ woli bʌ ti ajñel. Jin chaʼan, jiñi muʼ bʌ caj i majlelob ti panchan yujilob chaʼan cʼuxbibilob ti Dios (Jud. 1). Lajal miʼ yubiñob i bʌ bajcheʼ tsiʼ yʌlʌ jiñi apóstol Juan: «¡Qʼuelela bajcheʼ cʼamel miʼ cʼuxbiñonla jiñi Tatʌl, jin chaʼan muʼto lac subentel tiʼ yalobilob Dios!» (1 Juan 3:1). ¿Pero cojach ba miʼ cʼuxbin Jehová jiñi muʼ bʌ caj i majlelob ti panchan? Maʼañic, mi caj laj qʼuel chaʼan miʼ cʼuxbiñonla ti lac pejtelel. Jiñi ñumen ñuc bʌ bajcheʼ miʼ pʌsbeñonla i cʼuxbiya Jehová jiñʌch cheʼ tsiʼ yʌcʼʌ i yalobil. Ili miʼ pʌs chaʼan maʼañic yambʌ muʼ bʌ i mejlel i cʼuxbiñonla cheʼ bajcheʼ Jehová (Juan 3:16; Rom. 5:8). w24.01 28 párr. 9, 10

Jiñi texto chaʼan ili qʼuin miʼ pʌsbeñonla chuqui yambʌ tsiʼ mele David chaʼan miʼ mʌlben i bʌqʼuen: Tsiʼ wen ñaʼta muʼ bʌ caj i mel Jehová ti talto bʌ qʼuin. Yujil chaʼan Jehová jiñʌch muʼ bʌ caj i coltan cheʼ tiʼ yorajlel. Jehová jiñʌch tsaʼ bʌ i sube David chaʼan mi caj i yochel bajcheʼ rey ti Israel (1 S. 16:​1, 13). Cheʼ jaʼel, David yujil chaʼan mi Jehová miʼ yʌcʼ i tʼan, mucʼʌch caj i tsʼʌctesan. Ixcu joñonla, ¿chuqui an i subeyonla Jehová? Maʼañic baʼ i subeyonla chaʼan maʼañix mi caj lac ñusan wocol. Pero añʌch i yʌcʼʌ i tʼan chaʼan ti talto bʌ qʼuin Jehová mi caj i jisan pejtelel jiñi wocol muʼ bʌ lac ñusan (Is. 25:​7-9). La cujil chaʼan añʌch i pʼʌtʌlel chaʼan miʼ tejchesan jiñi chʌmeñoʼ bʌ, chaʼan mi caj i jisan jiñi laj cʼamʌjel tac yicʼot jiñi laj contrajob (1 Juan 4:4). w24.01 6 párr. 12, 13

Laʼ lac ñaʼtan chucoch tsaʼ la cʌcʼʌ lac bʌ ti Jehová yicʼot tsaʼ lac chʼʌmʌ jaʼ. Tsaʼ mele iliyi chaʼañʌch a wom a chʼujutesan Jehová. Cʼajtesan chuqui tsiʼ coltayet a ñop chaʼan jiñi woli bʌ a cʌn jiñʌch i sujmlel. Tsaʼ cʼoti a cʌn Jehová, tsaʼ caji a qʼuel ti ñuc i tsaʼ cʼoti a cʼuxbin. Cheʼ jaʼel, tsaʼ pʼʌtʼa jiñi a ñopoñel i jiñʌch tsaʼ bʌ i coltayet a chaʼ ñaʼtan a bʌ. Tsaʼ cʌyʌ a mel muʼ bʌ i tsʼaʼlen Jehová i tsaʼ caji a mel chuqui miʼ mulan, i wen tijicña tsaʼ wubi a bʌ come a wujil chaʼan tsaʼix i ñusʌbeyet a mul (Sal. 32:2). Cheʼ jaʼel, tsaʼ cajiyet ti majlel ti tempa bʌ yicʼot ti subtʼan. Ili ora, chʼʌmbilix a chaʼan jaʼ i woli a chaʼlen xʌmbal ti jiñi bij chaʼan bʌ cuxtʌlel (Mat. 7:​13, 14). Chʌn cʼuxbin Jehová yicʼot jacʼben i tʼan. w23.07 17 párr. 14; 19 párr. 19

Cheʼ mi lac wen ñaʼtan chaʼan tsaʼ la cʌcʼʌ lac tʼan chaʼan mi caj lac mel chuqui yom Jehová, mi caj i yʌqʼueñonla lac pʼʌtʌlel chaʼan maʼañic mi lac mel muʼ bʌ i mejlel i pʌyonla ti mulil. Jumpʼejl ejemplo, maʼañic mi lac ñiqʼui mulan o mi lac pʌs chaʼan mi lac mulan juntiquil ñujpuñemix bʌ, come cheʼ tsaʼ la cʌcʼʌ lac bʌ ti Jehová lajal bajcheʼ tsaʼ la cʌlʌ chaʼan maʼañic mi caj lac mel jiñi. Jin chaʼan, ti wiʼil maʼañic mi caj la cubin wocol come maʼañic mi caj lac ñiqʼui acʼ ti colel ti lac pusicʼal chuqui mach bʌ weñic. Ti wiʼil, maʼañic mi caj la cubin wocol tiʼ caj jiñi. Cheʼ bajcheʼ jiñi, maʼañic mi caj lac chaʼlen xʌmbal tiʼ bijlel jontoloʼ bʌ (Pr. 4:​14, 15). Jiñi ejemplo chaʼan Jesús miʼ mejlel i coltañonla. Cheʼ bajcheʼ Jesús, joñonla jaʼel maʼañic mi caj lac mel maʼañic bʌ miʼ mulan Jehová come tsaʼix la cʌcʼʌ lac bʌ tiʼ tojlel (Mat. 4:10; Juan 8:29). Cheʼ mi lac ñusan wocol tac yicʼot mi laj qʼuelbentel lac pusicʼal, miʼ mejlel lac pʌs mi la comʌch lac chʌn tsajcan Jesús. Mi cheʼʌch mi lac mel, miʼ mejlel lac ñop chaʼan Jehová mi caj i coltañonla. w24.03 9, 10 párr. 8-10