Agosto

Ili versículo miʼ taj ti tʼan chaʼchajp ñuc bʌ i cʼʌjñibal: 1) Jiñi tojoʼ bʌ miʼ ñusañob wocol tac i 2) Jehová mucʼʌch i coltañob. Junchajp muʼ bʌ i mel Jehová jiñʌch cheʼ miʼ coltañonla chaʼan pʼisbil jach bajcheʼ yilal mi laj qʼuel ili pañimil. I sujmʌch chaʼan Jehová miʼ yʌl chaʼan tijicñayonla cheʼ mi lac melben i yeʼtel, pero jiñi mach yomic i yʌl chaʼan maʼañic mi caj lac taj wocol (Is. 66:14). Yom chaʼan mi la cʌcʼ lac ñaʼtʌbal ti jiñi laj cuxtʌlel ti talto bʌ qʼuin, come jiñʌch yom bʌ i yʌqʼueñonla (2 Cor. 4:​16-18). Pero wʌle, wolʌch i coltañonla jaʼel chaʼan miʼ ñumel majlel lac chaʼan jujumpʼejl qʼuin (Lm. 3:​22-24). ¿Chuqui mi laj cʌn ti jiñi ejemplo tac chaʼan i wiñicob Jehová tsaʼ bʌ chumleyob ti wajali yicʼot añoʼ bʌ ti ili ora? Chaʼan mach yʌlʌyic baqui jach bʌ wocol miʼ tajonla, Jehová mucʼʌch i coltañonla tiʼ pejtelel ora mi mucʼʌch lac ñop tiʼ tojlel (Sal. 55:22). w23.04 15 párr. 3, 4

Cabʌl chuqui miʼ mejlel laj cʌn tiʼ tojlel José yicʼot María. Chajpʌbilob chaʼan miʼ jacʼbeñob i tʼan jiñi añoʼ bʌ i yeʼtel, anquese wocolʌch tsiʼ yubiyob chaʼan miʼ melob. María cheʼʌch tsiʼ pʌsʌ cheʼ bʌ lʌcʼʌlix mi caj i yʌcʼ ti pañimil i yalobil (Luc. 2:​1-6). Jiñi yumʌl César Augusto tsiʼ yʌlʌ chaʼan miʼ mejlel jumpʼejl censo. Pero chaʼan miʼ melob jiñi, José yicʼot María yom miʼ majlelob ti Belén, yom miʼ xʌñob 150 kilómetro. Tajol tiʼ chaʼticlelob tsiʼ ñaʼtayob chuqui miʼ mejlel ti ujtel, María cʌntʌbil bʌ i chaʼan jiñi alʌl muʼ bʌ caj i sujtel ti Mesías, ¿ixcu miʼ tsiʼ yʌcʼʌ ti pañimil cheʼ yaʼañob ti ojlil bij? Jin chaʼan, ¿yom ba i yʌl iliyi chaʼan miʼ mejlel i ñusañob jiñi mandar? José yicʼot María tsaʼʌch i jacʼʌyob jiñi mandar anquese wocolʌch tsiʼ yubiyob chaʼan miʼ melob, jin chaʼan Jehová tsiʼ yʌqʼueyob bendición. María weñʌch tsaʼ cʼoti ti Belén, tsiʼ yʌcʼʌ ti pañimil i yalobil i tiʼ tsʼʌctesayob jumpʼejl profecía (Mi. 5:2). w23.10 8 párr. 9, 11; 9 párr. 12

An hermanojob muʼ bʌ i wen chaʼleñob bʌqʼuen cheʼ bʌ woli jaxto i ñaʼtañob chaʼan mi caj i yʌcʼob i comentario yaʼ ti tempa bʌ. ¿Chuqui miʼ mejlel a mel mi cheʼ maʼ wujtel bajcheʼ jiñi? Junchajp muʼ bʌ i mejlel i coltañet jiñʌch cheʼ maʼ chajpan a bʌ ti wen (Pr. 21:5). Mach wen wocolic mi caj a wubin chaʼan maʼ letsan a cʼʌb mi wen a cʌñʌyʌch jiñi información. Yambʌ mejl bʌ a mel jiñʌch cheʼ mach tamic jiñi a comentario (Pr. 15:23; 17:27). Maʼañic mi caj a wen chaʼlen bʌqʼuen, mi mach cʌlʌxic maʼ chaʼlen tʼan. Mi mach tamic jiñi comentario muʼ bʌ a wʌcʼ, jiñi yambʌlob mi caj i qʼuelob chaʼan tsaʼʌch a chajpa a bʌ ti wen yicʼot chaʼan mucʼʌch a chʼʌmben i sujm jiñi información. ¿Chuqui miʼ mejlel a mel mi jumpʼejl o chaʼpʼejl jach comentario miʼ mejlel a wʌcʼ tiʼ caj a bʌqʼuen anquese tsaʼix a jacʼʌ ili ticʼojel tac? Cʼajtesan chaʼan Jehová miʼ wen qʼuel ti ñuc cheʼ maʼ chaʼlen wersa a wʌcʼ a comentario (Luc. 21:​1-4). Pero Jehová maʼañic miʼ pijtan chaʼan maʼ mel jiñi mach bʌ mejlic a mel (Filip. 4:5). Jin chaʼan, ñaʼtan jaypʼejl comentario miʼ mejlel a wʌcʼ, chaʼlen wersa i cʼajtiben Jehová chaʼan miʼ coltañet. Muʼ bʌ i mejlel a ñaxan mel, jiñʌch cheʼ maʼ chaʼlen wersa a wʌcʼ jumpʼejl comentario mach bʌ wen tamic. w23.04 21 párr. 6-8

Jiñi apóstol Pablo tsiʼ yʌlʌ chaʼan lajalonla bajcheʼ juntiquil soldado wen chajpʌbil bʌ chaʼan jiñi guerra yicʼot wen yʌxʌl bʌ i yo. Joñonla jaʼel yomʌch chajpʌbilonla chaʼan jiñi i qʼuiñilel Jehová, ¿bajcheʼ? Jiñʌch cheʼ mi lac lʌp jiñi i mʌctʌjib lac tajn chaʼan bʌ jiñi ñopoñel yicʼot cʼuxbiya yicʼot jiñi casco chaʼan bʌ lac pijtaya. Jiñi i mʌctʌjib lac tajn jiñʌch jiñi lac ñopoñel yicʼot jiñi cʼuxbiya, i miʼ cʌntan lac pusicʼal. Ili melbal tac miʼ coltañonla chaʼan mi lac bej melben i yeʼtel Jehová yicʼot Jesús, yicʼot miʼ coltañonla lac ñop chaʼan Jehová mucʼʌch caj i yʌqʼueñonla lac majtan cheʼ mi lac bej melben i yeʼtel (Heb. 11:6). Cheʼ jaʼel, miʼ coltañonla chaʼan xucʼulonla tiʼ tojlel Jesús anquese an wocol tac. Chaʼan mi lac pʼʌtʼesan lac ñopoñel i mi laj cuch jiñi wocol tac, laʼ laj cʌn tiʼ tojlel jiñi hermanojob am bʌ i lʌtʼʌyob tsʼaʼlentel o wocol tiʼ caj taqʼuin. I chaʼan maʼañic mi lac tech lac mulan chuqui tac an, laʼ lac lajin jiñi hermanojob ñaxam bʌ miʼ yʌcʼob i Yumʌntel Dios yicʼot mach bʌ cabʌlic chuqui añob i chaʼan. w23.06 10 párr. 8, 9

Jiñi yujil bʌ ticʼol i bʌ miʼ ticʼ i bʌ chaʼan maʼañic miʼ mel mach bʌ weñic yicʼot chaʼan miʼ mel chuqui wem bʌ. I cʼʌjñibal chaʼan mi lac taj lac meta tac, ñumento cheʼ bʌ wocol mi la cubin o maʼañic chuqui miʼ ñijcañonla lac taj. Laʼ laj cʼajtesan chaʼan cheʼ la cujil ticʼol lac bʌ jumpʼejlʌch melbalʌl muʼ bʌ i yʌcʼ jiñi espíritu. Jin chaʼan, mi mucʼʌch laj cʼajtiben Jehová jiñi chʼujul bʌ i yespíritu, mi caj i mejlel lac taj ili melbalʌl wen ñuc bʌ i cʼʌjñibal (Luc. 11:13; Gál. 5:​22, 23). Mach a pijtan ñumen wem bʌ i yorajlel chaʼan maʼ mel. Ti ili pañimil wen wocol jax chaʼan mi lac taj jiñi. Mi meqʼuel jach laj cʼʌb, tajol maʼañic baʼ ora mi caj lac taj jiñi lac meta. An i tajol mach la comic lac tsʼʌctesan jiñi lac meta come wocol mi la cubin chaʼan mi lac taj. Jin chaʼan, ¿ixcu cheʼ tsʼitaʼ jaxto maʼ tech a tsʼʌctesan majlel jiñi a meta? Jumpʼejl ejemplo, mi a wom a taj jumpʼejl melbalʌl, teche a mel chuqui tac mach bʌ wen wocolic chaʼan maʼ pʌs. Mi a wom a pejcan jiñi Biblia ti tsʼʌcʌl, teche a pejcan ti tsʼitaʼ jaxto. w23.05 29 párr. 11-13

Ti ili cojix tac bʌ qʼuin, Jehová an i cʼʌñʌ i yorganización chaʼan miʼ bej aqʼueñonla jiñi chʼujul bʌ bʌlñʌcʼʌl muʼ bʌ i coltañonla chaʼan mi lac chʌn ajñel ti jiñi «Chʼujul bʌ bij» (Is. 35:8; 48:17; 60:17). Cheʼ bʌ an majqui miʼ tech i chʼʌm estudio, miʼ mejlel la cʌl chaʼan miʼ tech xʌmbal ti jiñi «Chʼujul bʌ bij». An muʼ bʌ jumucʼ chaʼleñob xʌmbal ti jiñi bij, pero miʼ cʌyob. I yambʌlob bej yomobʌch xʌmbal yaʼi come an baqui yom cʼotelob. ¿Baqui? Jiñi woli bʌ i pijtañob chumtʌl yaʼ ti panchan, jiñi «Chʼujul bʌ bij» miʼ pʌyob majlel tiʼ «paraíso Dios» yaʼ ti panchan (Apoc. 2:7). I jiñi woli bʌ i pijtañob chumtʌl ila ti Lum, ili bij miʼ pʌyob majlel tiʼ yujtibal jiñi Mil jab i Yumʌntel Cristo, cheʼ bʌ jiñi lac piʼʌlob tojobix mi caj i sujtelob. Mi jatet woliyetix ti xʌmbal ti jiñi bij, mach sujtic a qʼuel a pat. Chʌn chaʼlen xʌmbal jinto maʼ cʼotel ti jiñi tsijiʼ bʌ pañimil. w23.05 17 párr. 15; 18, 19 párr. 16-18

Junchajp muʼ bʌ caj i ñijcañet chaʼan maʼ wʌcʼ a bʌ ti Jehová jiñʌch cheʼ maʼ ñaʼtan pejtelel am bʌ i mele ti a tojlel i maʼ qʼuel ti ñuc (Sal. 116:​12-14). Jiñi Biblia miʼ yʌl chaʼan «pejtelel wem bʌ yicʼot toj bʌ majtañʌl» tilem ti Jehová (Sant. 1:17). Jiñi ñumen wem bʌ lac majtan jiñʌch cheʼ tsiʼ yʌcʼʌ i Yalobil chaʼan mi laj coltʌntel. Ili miʼ coltañonla chaʼan mi lac mejlel ti sujtel tiʼ yamigo Jehová yicʼot mi lac chumtʌl tiʼ pejtelel ora (1 Juan 4:​9, 10). Jin chaʼan, cheʼ bʌ mi la cʌcʼ lac bʌ tiʼ tojlel jiñʌch jiñi ñumen wem bʌ bajcheʼ mi lac pʌs chaʼan mi laj qʼuel ti ñuc pejtelel am bʌ i mele ti lac tojlel chaʼan i cʼuxbiya (Dt. 16:17; 2 Cor. 5:15). w24.03 5 párr. 8

Ili ora quisintic jax i melbal lac piʼʌlob, i cheʼʌch tsaʼ ujti jaʼel tiʼ yorajlel Lot. Jin chaʼan, tsiʼ wen chaʼle pensar tiʼ caj i melbal jiñi jontoloʼ bʌ come yujil chaʼan Jehová tsʼaʼ miʼ qʼuel muʼ bʌ i melob bajcheʼ jiñi (2 Ped. 2:​7, 8). Lot machʌch weñic tsiʼ qʼuele jaʼel i melbal jiñi lac piʼʌlob come miʼ cʼuxbin Jehová yicʼot miʼ wen qʼuel ti ñuc. Cheʼʌch jaʼel ili ora, anquese jiñi lac piʼʌlob maʼañix miʼ qʼuelob ti ñuc muʼ bʌ i yʌl Dios, joñonla sʌc mi lac mejlel ti ajñel cheʼ mucʼʌch laj cʼuxbin Jehová yicʼot mi lac bʌcʼñan. Chaʼan sʌc mi la cajñel, Jehová miʼ cʼʌn jiñi libro chaʼan Proverbios chaʼan miʼ coltañonla. Ti lac pejtelel, mach yʌlʌyic majquiyonla, miʼ mejlel i coltañonla jiñi wen tac bʌ ticʼojel muʼ bʌ i chʼʌm tilel. Mi mucʼʌch lac bʌcʼñan Jehová maʼañic mi caj lac sʌclan lac tʼan chaʼan mi lac mel mach bʌ weñic. w23.06 20 párr. 1, 2; 21 párr. 5

Tajol an a taja tsʼaʼlentel ti a familia o añix chuqui tac tsaʼ cʌyʌ chaʼan ñaxan maʼ wʌcʼ i chaʼan bʌ Jehová (Mat. 6:33). Mi cheʼ bajcheʼ jiñi, miʼ mejlel a ñop chaʼan Jehová yujil pejtelel am bʌ a mele tiʼ tojlel (Heb. 6:10). I tajol tsaʼix a qʼuele bajcheʼ miʼ tsʼʌctiyel ti a tojlel tsaʼ bʌ i yʌlʌ Jesús: «Maʼañic majqui tsaʼ bʌ i cʌyʌ i yotot, i yuscuñob, i chichob, i yijtsʼiñob, i ñaʼ, i tat, i yalobilob o i lum tij caj yicʼot tiʼ caj jiñi wen tʼan mach bʌ añic mi caj i taj wʌle, ti ili ora, 100 i ñumelal i yotot, i yuscuñob, i chichob, i yijtsʼiñob, i ñaʼ, i yalobilob yicʼot i lum, anquese an i contrajintel i ti talto bʌ ora i cuxtʌlel mach bʌ yujilic jilel» (Mar. 10:​29, 30). Jiñi bendición tac am bʌ a taja ñumento bajcheʼ pejtelel am bʌ a cʌyʌ (Sal. 37:4). w24.03 9 párr. 5

Laʼ lac ñaʼtan tsaʼ bʌ ujti tiʼ tojlel jiñi xñoptʼañob ti Judea cheʼ bʌ tsaʼ ñumi wiʼñal. Jiñi hermanojob añoʼ bʌ ti Antioquía «tsiʼ ñaʼtayob i chocbeñob majlel coltaya jiñi hermanojob chumuloʼ bʌ ti Judea, cheʼʌch bajcheʼ miʼ mejlelob ti jujuntiquil» (Hech. 11:​27-30). Anquese jiñi hermanojob woli bʌ i ñusañob wocol ñajt añob, jiñi añoʼ bʌ ti Antioquía yomobʌch i coltañob (1 Juan 3:​17, 18). Joñonla jaʼel miʼ mejlel lac pʌs lac pʼuntaya tiʼ tojlel jiñi woli bʌ i ñusañob wocol. Miʼ mejlel lac subeñob jiñi ancianojob chaʼan la com coltaya, miʼ mejlel la cʌcʼ lac donación o mi lac tajob ti oración jiñi woli bʌ i ñusañob jumpʼejl wocol. Tajol an hermanojob wocol bʌ mi caj i yubiñob chaʼan miʼ tajob chuqui i cʼʌjñibalob i chaʼan i yom mi laj coltañob. Cheʼ bʌ Jesús miʼ tilel ti meloñel, ¿mach ba la comic chaʼan woli lac pʌs pʼuntaya miʼ tajonla? Mi cheʼʌch mi lac mel mi caj i subeñonla: «Chʼʌmʌla jiñi Yumʌntel» (Mat. 25:​34-40). w23.07 4 párr. 9, 10; 6 párr. 12

Jesús lajal bajcheʼ i Tat, cheʼ bʌ tsajñi wʌʼ ti lum mach tsʌtsic tsiʼ mele i bʌ. Anquese tsaʼ chojqui tilel chaʼan miʼ coltan jiñi israelitajoʼ bʌ, jumpʼejl bʌ qʼuin tsiʼ colta juntiquil xʼixic mach bʌ israelitajic. Ili xʼixic tsiʼ cʼajtibe Jesús chaʼan miʼ tsʼʌcʌben i yixicʼal am bʌ i xibʌjlel, i Jesús tsaʼʌch i pʼunta yicʼot tsiʼ colta (Mat. 15:​21-28). Laʼ la cʌl yambʌ ejemplo. Cheʼ bʌ Jesús tsaʼix i teche i subtʼan, tsiʼ yʌlʌ: «Mi an muʼ bʌ i jamʌ al tiʼ wut lac piʼʌlob chaʼan mach i cʌñʌyoñic, joñon jaʼel mi caj cʌl [ . . . ] chaʼan mach j cʌñʌyic». Pero ¿chuqui tsiʼ mele cheʼ bʌ Pedro uxyajl tsiʼ yʌlʌ chaʼan mach i cʌñʌyic? ¿Tsaʼ ba i ñusʌbe o maʼañic? Tsaʼʌch. Come Jesús yujil chaʼan Pedro tsaʼʌch i chaʼ ñaʼta i bʌ i chaʼan juntiquilʌch xucʼul bʌ wiñic. Jin chaʼan, cheʼ bʌ tsaʼix chaʼ chʼojyi, tsiʼ chaʼ pʌsbe i bʌ Pedro, i tajol tiʼ sube chaʼan miʼ cʼuxbin yicʼot chaʼan tsaʼix i ñusʌbe i mul (Luc. 24:​33, 34). Jehová yicʼot Jesús mach tsʌtsobic. ¿Ixcu joñonla? Jehová yom chaʼan mi lac lajiñob. w23.07 21 párr. 6, 7

¿Chuqui miʼ mejlel lac suben jiñi lac piʼʌlob chaʼan miʼ ñopob chaʼan Dios mucʼʌch caj i tsʼʌctesan i tʼan chaʼan mi caj i sujtel ti jumpʼejl paraíso ili Pañimil? Ñaxan, miʼ mejlel lac subeñob chaʼan jiñʌch Jehová muʼ bʌ i yʌcʼ i tʼan, come yaʼ ti Apocalipsis miʼ yʌl: «Jiñi yaʼ bʌ buchul ti trono tsiʼ yʌlʌ: ‹¡Qʼuele! Woli c tsijibtesan pejtelel chuqui an›». Jehová yomʌch i tsʼʌctesan i tʼan, i an i pʼʌtʌlel chaʼan miʼ mel. I chaʼpʼejlel, Jehová yujil chaʼan mucʼʌch caj i tsʼʌctesan i tʼan, tiʼ tojlel, lajal bajcheʼ tsʼʌctiyemix. Jin chaʼan tsiʼ yʌlʌ chaʼan jiñi i tʼan «xucʼulʌch yicʼot i sujmʌch», i miʼ bej al: «¡Tsaʼix tsʼʌctiyi!». Jiñi i yuxpʼejlel, cheʼ bʌ Jehová an chuqui miʼ tech i mel, mucʼʌch i yujtesan. Jin chaʼan miʼ yʌl chaʼan jiñʌch «i Tejchibal yicʼot i Yujtibal» (Apoc. 21:6). Jehová mi caj i pʌs chaʼan Satanás juntiquilʌch xlot yicʼot chaʼan mach mejlic i mel chuqui yom. Jin chaʼan mi an majqui miʼ subeñonla chaʼan maʼañic miʼ ñop chaʼan mi caj i tsʼʌctiyel iliyi, miʼ mejlel lac pejcʌben yicʼot lac tsictesʌben muʼ bʌ i yʌl Apocalipsis 21:​5, 6. Laʼ lac suben bajcheʼ Jehová an i pʌsʌ chaʼan mucʼʌch caj i tsʼʌctesan i tʼan, chaʼan lajal bajcheʼ tsaʼix i yʌcʼʌ i firma (Is. 65:16). w23.11 7 párr. 18, 19

Jehová tiʼ sube Abrahán ili tʼan cheʼ bʌ añix 75 i jabilel i maʼañic mi juntiquilic i yalobil. ¿Tsaʼ ba i qʼuele bajcheʼ tsaʼ tsʼʌctiyi tsaʼ bʌ i sube Jehová? Tsaʼʌch, pero mach tsʼʌcʌlic. Cheʼ bʌ tsaʼix i cʼaxta jiñi jaʼ Éufrates, tsaʼto i pijta 25 jab chaʼan miʼ tilel i yalobil, Isaac. I cheʼ jiñi, tsiʼ pijta yambʌ 60 jab chaʼan miʼ qʼuel i butsob, Esaú yicʼot Jacob (Heb. 6:15). Pero Abrahán maʼañic tsiʼ qʼuele bajcheʼ tsaʼ sujti ti ñuc bʌ tejclum jiñi i pʼolbalob yicʼot bajcheʼ tsaʼ ochiyob ti jiñi Lum tsaʼ bʌ wʌn subentiyob. Anquese cheʼ bajcheʼ jiñi, Abrahán tsaʼ sujti ti wem bʌ i yamigo Jehová (Sant. 2:23). Ñaʼtancu bajcheʼ mi caj i yubin i bʌ Abrahán cheʼ bʌ miʼ chaʼ chʼojyel i miʼ yubin chaʼan cabʌl lac piʼʌlob tsiʼ tajayob cabʌl bendición come tsaʼʌch i wen ñopo Jehová i tsiʼ chʌn pʌsʌ i pijt (Gn. 22:18). ¿Chuqui mi laj cʌn? Anquese ili ora tajol maʼañic mi caj lac luʼ qʼuel bajcheʼ miʼ tsʼʌctiyel jiñi albil bʌ i chaʼan Jehová, pero mi mucʼʌch lac pʌs lac pijt cheʼ bajcheʼ Abrahán, miʼ mejlel lac ñop chaʼan Jehová mi caj i yʌqʼueñonla bendición ili ora i ñumento yaʼ ti tsijiʼ bʌ pañimil (Mar. 10:​29, 30). w23.08 24 párr. 14

Cheʼ bʌ jiñi rey Uzías xcolelto, tsiʼ pʌsʌ i pecʼlel yicʼot «tsiʼ tsajca Dios ti pejtelel i pusicʼal». Tsaʼ chumle 68 jab i Jehová cabʌl jab tsiʼ yʌqʼue i bendición (2 Cr. 26:​1-4). Uzías tsiʼ jisa cabʌl i contrajob yicʼot tsiʼ wen qʼuele chaʼan jiñi tejclum Jerusalén cʌntʌbil miʼ yajñel (2 Cr. 26:​6-15). Tajol tijicña tsiʼ yubi i bʌ cheʼ bʌ tsiʼ qʼuele chaʼan wolʌch i mejlel i mel i yeʼtel tiʼ coltaya Jehová (Ec. 3:​12, 13). Uzías ñʌmʌl i yʌl chuqui miʼ mejlel come jiñʌch jiñi rey. Tajol jin chaʼan tsiʼ ñaʼta chaʼan miʼ mejlel i mel chuqui yom. Jin chaʼan, tsaʼ ochi yaʼ ti templo i tsiʼ pulu jiñi pom yaʼ ti pulʌntib anquese yujil chaʼan mach cheʼic yom miʼ mel (2 Cr. 26:​16-18). Jiñi ñuc bʌ sacerdote Azarías tsiʼ tiqʼui, pero Uzías tsaʼ wen michʼa. Come tsiʼ chaʼle mulil, Jehová tsiʼ yʌqʼue lepra (2 Cr. 26:​19-21). ¡Tsaʼic i chʌn pʌsʌ i pecʼlel mach cheʼic tsaʼ ujti bajcheʼ jiñi! w23.09 10 párr. 9, 10

Anquese jiñi apóstol Pedro yajcʌbilix chaʼan miʼ majlel ti panchan, bej añʌch i cʼunlel. Cheʼ ti jabil 36, Pedro tsiʼ qʼuele cheʼ bʌ tsaʼ aqʼuenti chʼujul bʌ espíritu juntiquil wiñic mach bʌ judíojic, i cʼabaʼ Cornelio. Jiñi tsiʼ pʌsbe chaʼan Dios junlajal miʼ qʼuel lac piʼʌlob i chaʼan majqui jach bʌ lac piʼʌlob miʼ mejlelob ti ochel ti congregación (Hech. 10:​34, 44, 45). Cʼʌlʌl ti jimbʌ ora, Pedro tsaʼix caji i cʼux i waj yicʼot jiñi gentilob. Pero an hermanojob mach bʌ weñic miʼ qʼuelob cheʼ miʼ cʼuxob i waj yicʼot jiñi mach bʌ judíojobic. Jin chaʼan, cheʼ bʌ ili hermanojob tsaʼ cʼotiyob ti Antioquía, Pedro tsiʼ cʌyʌ i cʼux i waj yicʼot jiñi gentilob come tsiʼ bʌcʼña chaʼan mach weñic mi caj i qʼuejlel. Cheʼ bʌ Pablo tsiʼ qʼuele iliyi tsiʼ tiqʼui tiʼ tojlel pejtelel yaʼ bʌ añob (Gál. 2:​13, 14). Anquese Pedro tsiʼ mele mach bʌ weñic, tsaʼʌch i chʌn chaʼle wersa. w23.09 22 párr. 8

Ancianojob, ¿a wom baʼ ñumen aqʼuen i yorajlel chaʼan maʼ cʌntan jiñi hermanojob? Mi tsaʼ taja a qʼuel chaʼan anto baqui miʼ mejlel a weñʼesan, mach a wubin a chʼijyemlel, cʼajtesan chaʼan Jehová wen an i yutslel i yom i coltañet (1 Ped. 2:3). Jiñi apóstol Pedro miʼ yʌl: «Dios […] mi caj i xucʼchocoñetla». Junsujtel, Pedro tsiʼ ñaʼta chaʼan i wentʌlel mach yaʼic an yicʼot Jesús, jiñi i Yalobil Dios (Luc. 5:8). Pero tiʼ coltaya Jehová yicʼot Jesús, Pedro xucʼul tsiʼ chʌn tsajca. Jin chaʼan tsaʼ ajqʼui ti ochel «yaʼ ti Yumʌntel mach bʌ añic i jilibal i chaʼan bʌ Jesucristo jiñi lac Yum yicʼot la caj Coltaya» (2 Ped. 1:11). ¡Pedro tsiʼ taja wen ñuc bʌ i majtan! Mi jatet jaʼel maʼ chaʼlen wersa i maʼ wʌcʼ a bʌ ti coltʌntel ti Jehová, mi caj a taj a cuxtʌlel mach bʌ añic miʼ jilel. Mi caj a taj a coltʌntel come an a ñopoñel (1 Ped. 1:9). w23.09 30 párr. 14; 31 párr. 16, 17

Tiʼ jumpatlel jiñi tabernáculo jiñi sacerdotejob miʼ melob i yeʼtel, yaʼi an jumpʼejl pulʌntib baqui miʼ yʌjqʼuel majtañʌl tac yicʼot i yajñib jaʼ baqui jiñi sacerdotejob miʼ sʌqʼuesañob i bʌ cheʼ bʌ mi caj i melob i yeʼtel (Éx. 30:​17-20; 40:​6-8). Ili ora, jiñi yajcʌbiloʼ bʌ chaʼan miʼ majlelob ti panchan miʼ melbeñob i yeʼtel Jehová yaʼ ti jumpat chaʼan sacerdotejob am bʌ yaʼ ti chʼujul bʌ i templo. I jiñi i yajñib jaʼ am bʌ yaʼ ti tabernáculo yicʼot yaʼ ti templo ti wajali miʼ cʼajtesʌbeñob jiñi muʼ bʌ caj i majlelob ti panchan yicʼot wʌʼ bʌ mi caj i chumtʌlob ti pañimil chaʼan yom sʌc miʼ yajñelob. ¿I baqui woliʼ chʼujutesañob Dios jiñi yonlel wiñicob xʼixicob? Jiñi apóstol Juan tsiʼ qʼuele chaʼan «yaʼañob tiʼ tojel jiñi i trono Dios i miʼ melbeñob chʼujul bʌ i yeʼtel ti qʼuiñil yicʼot ti acʼʌlel yaʼ tiʼ templo». Jin chaʼan, jiñi yonlel wiñicob xʼixicob woliʼ melbeñob i yeʼtel Dios ila ti pañimil, ti jiñi yambʌ i jumpatlel jiñi templo (Apoc. 7:​9, 13-15). ¡Mi lac wen qʼuel ti ñuc cheʼ ti lac pejtelel añʌch baqui miʼ mejlel lac chʼujutesan Jehová yaʼ ti chʼujul bʌ templo! w23.10 28 párr. 15, 16

Jiñi ancianojob miʼ pʼʌtʼesañoñobla yicʼot miʼ ñuqʼuesañob lac pusicʼal (Is. 32:​1, 2). Jin chaʼan, mi an chuqui maʼ pensarin, pejcañob i jacʼʌ jiñi coltʌntel muʼ bʌ i yʌqʼueñetob. Jehová miʼ cʼʌñob chaʼan miʼ pʼʌtʼesañoñobla. Jiñi pijtaya muʼ bʌ lac taj yaʼ ti Biblia chaʼan mi lac mejlel ti chumtʌl tiʼ pejtelel ora, ti jumpʼejl paraíso o ti panchan miʼ yʌqʼueñonla lac pʼʌtʌlel (Rom. 4:​3, 18, 19). Ili miʼ coltañonla chaʼan mi laj cuch jiñi wocol tac, chaʼan mi lac bej chaʼlen subtʼan yicʼot mi lac tsʼʌctesan jiñi eʼtel am bʌ lac chaʼan ti congregación (1 Tes. 1:3). Laʼ laj qʼuel bajcheʼ tsiʼ colta jiñi apóstol Pablo. Tsaʼ tsʌtsʌ ñejtʼi, an i tajol maʼañic tsiʼ ñaʼta chuqui yom miʼ mel, tsaʼ contrajinti yicʼot tsaʼ ticʼlʌnti. Yomʌch miʼ pʼʌtʼesʌntel chaʼan miʼ cuch pejtelel jiñi (2 Cor. 4:​8-10). ¿Bajcheʼ tsiʼ taja i pʼʌtʌlel jiñi Pablo? Jiñʌch cheʼ tsiʼ chʌn ñaʼta jiñi i pijtaya (2 Cor. 4:​16-18). Pablo tsaʼʌch i wen qʼuele ti ñuc jiñi pijtaya am bʌ i chaʼan, jin chaʼan tsaʼ mejli i cuch jiñi wocol tac. w23.10 15, 16 párr. 14-17

Cheʼ bʌ maʼ chaʼlen oración, ñaʼtan miʼ yorajlelix chaʼan miʼ yʌqʼueñet Jehová jiñi muʼ bʌ a cʼajtiben. Tajol mi lac ñaʼtan chaʼan ti ora yom mi la cʌqʼuentel jiñi tsaʼ bʌ laj cʼajti. Pero tiʼ sujm, Jehová yujil baqui bʌ ñumen wem bʌ i yorajlel chaʼan miʼ coltañonla (Heb. 4:16). Mi Jehová mach ti orajic miʼ yʌqʼueñonla tsaʼ bʌ laj cʼajti, tajol mi lac ñaʼtan chaʼan woliʼ subeñonla chaʼan maʼañic, pero tajol jiñi yom bʌ i yʌl jiñʌch chaʼan yomto mi lac pijtan. Laʼcu lac ñaʼtan tiʼ tojlel juntiquil chʼiton tsaʼ bʌ i cʼajti chaʼan miʼ lajmel i cʼamʌjel. Pero maʼañic tsaʼ lajmi. Cheʼ Jehová tsaʼic i mele jumpʼejl milagro chaʼan miʼ cʼoqʼuesan, Satanás tsaʼ mejli i yʌl chaʼan ili chʼiton woli jach i melben i yeʼtel Jehová come tsaʼ cʼoqʼuesʌnti (Job 1:​9-11; 2:4). Cheʼ jaʼel, Jehová tsaʼix i yʌqʼue i yorajlel chaʼan miʼ jisan jiñi cʼamʌjel tac, jin chaʼan maʼañic mi lac pijtan chaʼan miʼ lajmesan laj cʼamʌjel ili ora (Is. 33:24; Apoc. 21:​3, 4). Cheʼ jiñi, ¿chuqui miʼ mejlel i cʼajtin ili chʼiton? Miʼ mejlel i suben Jehová chaʼan laʼ i yʌqʼuen i pʼʌtʌlel yicʼot i ñʌchʼtʌlel chaʼan miʼ bej melben i yeʼtel anquese an i cʼamʌjel. w23.11 24 párr. 13

Anquese Sansón tsiʼ mele mach bʌ weñic, tsiʼ chʌn chaʼle wersa come yom i tsʼʌctesan jiñi eʼtel tsaʼ bʌ i yʌqʼue Jehová, jiñʌch cheʼ miʼ jisan jiñi filisteojob (Jue. 16:​28-30). Jin chaʼan tsiʼ cʼajtibe i coltaya Jehová chaʼan miʼ yʌqʼueñob i toj i mul jiñi filisteojob. Jehová tsaʼʌch i ñʌchʼta i tsiʼ chaʼ aqʼue i pʼʌtʌlel. Ti jimbʌ ora, Sansón tsaʼ mejli i tsʌnsan cabʌl filisteojob. Sansón tsaʼʌch i ñusa wocol chaʼan jiñi tsaʼ bʌ i mele, pero tsiʼ chʌn chaʼle wersa i melben i yeʼtel Jehová. Joñonla jaʼel yom mi lac chʌn chaʼlen wersa anquese mi lac mel mach bʌ weñic i tajol mi lac tojʼesʌntel o mi lac sʌt la queʼtel yaʼ ti congregación. Laʼ laj cʼajtesan chaʼan Jehová miʼ ñusan lac mul (Sal. 103:​8, 9). Anquese mi lac taj lac sajtemal, Jehová miʼ mejlel i bej cʼʌñonla, cheʼ bajcheʼ tsiʼ mele tiʼ tojlel Sansón. w23.09 6 párr. 15, 16

Jiñi i cuchol wocol miʼ yʌcʼ chaʼan utsʼat mi laj qʼuejlel ti Dios, jiñi mach yomic i yʌl chaʼan Jehová tijicña miʼ yubin cheʼ bʌ mi lac ñusan wocol tac. Muʼ bʌ i yʌqʼuen i tijicñʌyel jiñʌch cheʼ bʌ mi laj cuch yicʼot xucʼul mi laj cajñel tiʼ tojlel. ¿Mach ba muqʼuic i ñuqʼuesan lac pusicʼal iliyi? (Sal. 5:12). Laʼcu lac ñaʼtan tiʼ tojlel Abrahán, utsʼat tsaʼ qʼuejli ti Dios come tsiʼ cuchu jiñi wocol tac. Jehová tsiʼ qʼuele bajcheʼ i yamigo yicʼot bajcheʼ juntiquil toj bʌ wiñic (Gn. 15:6; Rom. 4:​13, 22). I cheʼʌch miʼ mejlel ti ujtel ti lac tojlel jaʼel. Chaʼan utsʼat mi laj qʼuejlel ti Dios yom xucʼul mi la cajñel yicʼot mi laj cuch jiñi wocol tac, mach yaʼic cʌyʌl ti lac privilegio tac o chaʼan bajcheʼ cʼamel woli lac mel. I ti lac pejtelel miʼ mejlel lac mel jiñi, mach yʌlʌyic jaypʼejl lac jabilel, chuqui woli lac ñusan o chuqui la cujil bʌ melol. ¿Woli baʼ ñusan wocol ili ora? Cʼajtesan chaʼan mi xucʼul maʼ wajñel utsʼat mi caj a qʼuejlel ti Dios. Cheʼ la cujil iliyi miʼ pʼʌtʼesan jiñi lac pijtaya. w23.12 11 párr. 13, 14

Juntiquil hermano yomʌch miʼ cʌn i ñʌchʼtan yambʌlob i miʼ chaʼlen tʼan yicʼot i yutslel. Ili yom i yʌl chaʼan mi caj i wen ñʌchʼtan yicʼot mi caj i chʼʌmben i sujm chuqui miʼ ñaʼtan yicʼot bajcheʼ miʼ yubin i bʌ yambʌlob (Pr. 20:5). Juntiquil chʼiton, mi mejlel i cʌn i mel cheʼ bʌ miʼ wen ñʌchʼtan chuqui woli i subentel, bajcheʼ yilal woli i subentel yicʼot bajcheʼ yilal miʼ ñijcan i bʌ jiñi woli bʌ i pejcan. Pero iliyi cojach mi caj i mejlel a mel mi yaʼʌch ñoj añet a wicʼot jiñi woli bʌ a pejcan. Pero mi cojach maʼ choc majlel mensaje o correo, wocol mi caj a wubin chaʼan maʼ mel. Jin chaʼan, chaʼlen wersa chaʼan cheʼ bʌ maʼ pejcan yambʌlob yaʼʌch añet a wicʼotob (2 Juan 12). Jiñi hermano añix bʌ i ñaʼtʌbal yom miʼ cʌn eʼtel chaʼan miʼ taj chuqui i cʼʌjñibal i chaʼan yicʼot i chaʼan i familia (1 Tim. 5:8). Mach yʌlʌyic baqui bʌ maʼ yajcan a mel, pero añʌch chuqui yom maʼ cʌn a mel chaʼan maʼ taj chuqui a wom (Hech. 18:​2, 3; 20:34; Efes. 4:28). Yom wen a wujil eʼtel yicʼot maʼ tsʼʌctesan chuqui jach maʼ subentel a mel. Cheʼ bajcheʼ jiñi wen mi caj a cʌjñel, mi caj a taj a weʼtel i maʼañic mi caj a sʌt. w23.12 27 párr. 12, 13

Jiñi Biblia miʼ cʼʌn jiñi tʼan «i qʼuiñilel Jehová» chaʼan miʼ tajeʼ ti tʼan cheʼ baʼ ora mi cajel i jisan i contrajob yicʼot chaʼan bajcheʼ mi caj i coltan i tejclum. Jehová añix i mele ti wajali cheʼ bʌ tsiʼ jisa tejclum tac (Is. 13:​1, 9; Jl. 2:1; Sof. 1:8). Jiñi «i qʼuiñilel Jehová» wen lʌcʼʌlix an, mi caj i tejchel cheʼ bʌ miʼ contrajintel jiñi Ñuc bʌ Babilonia i mi caj i yujtel ti Armagedón. Chaʼan cuxul mi laj cʌytʌl yomʌch mi lac chajpan lac bʌ ili ora. Jesús tsiʼ pʌsʌ chaʼan yom chajpʌbilonla tiʼ pejtelel ora cheʼ bʌ miʼ tilel «i yorajlel cabʌl wocol» (Luc. 12:40; Mat. 24:21). Yaʼ ti ñaxam bʌ carta chaʼan Tesalonicenses, Pablo tsiʼ cʼʌñʌ lajiya tac chaʼan miʼ coltan jiñi xñoptʼañob chaʼan chajpʌbilob cheʼ bʌ miʼ tilel i qʼuiñilel Jehová. Cheʼ bʌ Pablo tiʼ tsʼijbu ili carta yujil chaʼan jalto yom chaʼan miʼ tilel i qʼuiñilel Jehová, pero tiʼ sube jiñi xñoptʼañob chaʼan yom wen chajpʌbilob, lajal bajcheʼ wolix i cʼotel jiñi qʼuin (2 Tes. 2:​1-3). Joñonla jaʼel yom mi lac jacʼ ili ticʼojel. w23.06 8 párr. 1, 2

Ti 1978 tsaʼ mejli wen chan bʌ edificio yaʼ ti Tokio (Japón). Jiñi lac piʼʌlob tsiʼ cʼajtibeyob i bʌ mi maʼañic mi caj i yajlel cheʼ bʌ miʼ ñumel yujquel lum, i machʌch añic tsaʼ yajli cheʼ bʌ tsaʼ ñumi jumpʼejl. ¿Chucoch? Come wen bajcheʼ tsiʼ melbeyob i yebal, i miʼ mejlel la cʌl jaʼel chaʼan lajalonla bajcheʼ jiñi edificio. ¿Chucoch cheʼ mi la cʌl bajcheʼ jiñi? Jiñi muʼ bʌ i melben i yeʼtel Jehová yom xucʼul, pero mach tsʌtsic miʼ mel i bʌ. Miʼ pʌs i xucʼtʌlel cheʼ bʌ miʼ jacʼben i mandar tac Jehová, pero pʼisbil jach come mach tsʌtsic miʼ mel i bʌ i mach ñumeñic ti pʼis chuqui miʼ ñaʼtan (Filip. 4:5). w23.07 14 párr. 1, 2

Satanás tsiʼ ñopo i lotin Jesús, chaʼan miʼ yʌqʼuen i chʼijyemlel Jehová (Mat. 4:​1-11). Yom bʌ Satanás jiñʌch chaʼan Jesús miʼ chaʼlen mulil i cheʼ bajcheʼ jiñi maʼañix miʼ tsʼʌctesan jiñi tsaʼ bʌ tili i mel. Jesús tsaʼʌch i ñusa yan tac bʌ wocol. Jumpʼejl ejemplo, tsiʼ taja i contrajob i tsiʼ ñopoyob i tsʌnsan (Luc. 4:​28, 29; 13:31). Cheʼ jaʼel, jiñi xcʌntʼañob i chaʼan cabʌl jax i sajtemalob (Mar. 9:​33, 34). I cheʼ bʌ tsiʼ chucuyob Jesús, tsiʼ wen jatsʼʌyob yicʼot tsiʼ wajleyob. Ti wiʼil, cheʼ bʌ tiʼ tsʌnsayob lajal bajcheʼ juntiquil xujchʼ tsiʼ meleyob i tsiʼ wen ubi wocol (Heb. 12:​1-3). Cheʼ bʌ muqʼuix caj i chʌmel, i bajñel jach tsiʼ cuchu jiñi wocol come Jehová tsiʼ cʌyʌ i coltan (Mat. 27:46). Tsiquil chaʼan Jesús wen lets tsiʼ tojo chaʼan miʼ coltañonla. Cheʼ mi lac ñaʼtan pejtelel tsaʼ bʌ i mele chaʼañonla, muʼto i ñijcan lac pusicʼal i mi lac wen cʼuxbin. w24.01 10, 11 párr. 7-9

Cheʼ la cujil pijt miʼ coltañonla chaʼan wen mi la cajñel la quicʼot yambʌlob. Jumpʼejl ejemplo, cheʼ bʌ an majqui woli ti tʼan yicʼotonla mi lac wen ñʌchʼtan chuqui miʼ yʌl (Sant. 1:19). Cheʼ jaʼel, mi caj lac chaʼlen coltaya chaʼan chʌn an ñʌchʼtʌlel. Cheʼ bʌ lujbonla o an bajcheʼ yubil woli la cubin, mach bajcheʼic jach mi caj lac chaʼlen tʼan chaʼan maʼañic mi lac low yambʌlob. I mi an majqui tsiʼ melbeyonla mach bʌ weñic mach ti orajic mi caj lac michʼan o mi lac chaʼ sutqʼuin tsaʼ bʌ i melbeyonla. Cheʼ bajcheʼ miʼ yʌl jiñi Biblia, mi caj lac chʌn cuchben lac bʌ lac sajtemal yicʼot mi caj lac ñusʌben lac bʌ lac mul tiʼ pejtelel lac pusicʼal (Col. 3:​12, 13). Cheʼ la cujil pijt miʼ coltañonla chaʼan wen chuqui mi lac yajcan lac mel. Maʼañic mi caj lac waʼ jacʼ lac mel chuqui jach mi lac subentel. Mi caj lac ñaxan aqʼuen i yorajlel chaʼan mi lac wen ñaʼtan chuqui jiñi ñumen wem bʌ chaʼañonla. Jumpʼejl ejemplo, mi woli lac sʌclan jumpʼejl eʼtel, tajol orajach la com lac chʼʌm jiñi ñaxam bʌ muʼ bʌ lac taj. Pero mi la cujil pijt mi caj lac ñaxan wen qʼuel mi maʼañic miʼ mʌctañonla chaʼan mi la cajñel la quicʼot lac familia yicʼot mi lac melben i yeʼtel Jehová. w23.08 22 párr. 8, 9

Mi chʼijyem maʼ wubin a bʌ come a wujil chaʼan yom maʼ chaʼlen wersa chaʼan maʼañic maʼ mel mach bʌ weñic, ñaʼtan jiñi tʼan tsaʼ bʌ a wʌqʼue Jehová cheʼ bʌ muʼto caj a chʼʌmjaʼ jin mi caj i yʌqʼueñet a pʼʌtʌlel chaʼan maʼañic maʼ chaʼlen mulil. ¿Chucoch? Come cheʼ mi la cʌcʼ lac bʌ ti Jehová woli la cʌl chaʼan maʼañix mi caj lac mel o mi caj lac sʌclan chuqui bajñel la com, ñumento mi jin maʼañic bʌ miʼ mulan Jehová (Mat. 16:24). Jin chaʼan cheʼ bʌ mi lac taj jumpʼejl wocol mejl bʌ i yʌcʼonla ti mulil, maʼañic mi caj lac wen ñaʼtan chuqui yom mi lac mel. La cujilix chaʼan junchajp jach yom bʌ mi lac mel: Yom xucʼulonla ti Jehová i mi lac mel chuqui miʼ mulan. Cheʼ bʌ tsaʼ la cʌcʼʌ lac bʌ ti Jehová tsaʼ la cʌlʌ chaʼan mi caj laj cʌy pejtelel jiñi yan tac bʌ. Cheʼ bajcheʼ ili mi caj lac lajin Job, anquese tsiʼ ñusa tsʌts tac bʌ wocol, tsiʼ yʌlʌ: «Cʼʌlʌlto mic chʌmel mux c sub maʼanic c mul», yom bʌ i yʌl, jiñʌch chaʼan chʌn xucʼul tsaʼ ajñi (Job 27:5). w24.03 9 párr. 6, 7

Jehová jiñʌch «jiñi Dios chaʼan bʌ cʼuxbiya» (2 Cor. 13:11). Miʼ chʼʌmonla ti ñuc ti jujuntiquilonla i mi lac ñop chaʼan «jini muʼ bʌ i ñop lac Yum joyolʌch tiʼ yutslel» (Sal. 32:10). Cheʼ mi lac ñumen ñaʼtan bajcheʼ tac an i pʌsbeyonla i cʼuxbiya ñumento mi caj lac ñop yicʼot ñumento mi caj lac lʌcʼtesan lac bʌ tiʼ tojlel. Jin chaʼan, miʼ mejlel lac pejcan yicʼot lac laj suben chuqui an ti lac pusicʼal, i mi laj cʼajtiben chaʼan laʼ i cʼuxbiñonla. Miʼ mejlel lac suben pejtelel chuqui mi lac pensarin i la cujil chaʼan mi caj i chʼʌmbeñonla i sujm yicʼot chaʼan mi caj i coltañonla (Sal. 145: 19). Jiñi i cʼuxbiya Jehová lajal bajcheʼ cʼajc cheʼ bʌ an tsʌñal, miʼ qʼuixñesañonla, jin chaʼan chʌn lʌcʼʌl la com ajñel tiʼ tojlel. Jiñi i cʼuxbiya wen pʼʌtʌl i miʼ coltañonla cheʼ bʌ woli lac ñusan wocol ti laj cuxtʌlel. Wen tijicñayonla cheʼ bʌ Jehová miʼ wen cʼuxbiñonla, jin chaʼan la com la cʌl: «Mij cʼuxbin c Yum» (Sal. 116:1). w24.01 31 párr. 19, 20

Jesús mach cojach tsiʼ yʌlʌ chuqui i cʼabaʼ Dios. Jiñi judíojob yujilobix jiñi, jin chaʼan tsaʼʌch i tsictesa bajcheʼ yilal bʌ Dios (Juan 1:​17, 18). Jumpʼejl ejemplo, yaʼ ti Tsʼijbujel Hebreo miʼ yʌjlel chaʼan Jehová wen yujil pʼuntaya (Éx. 34:​5-7). Pero Jesús tsiʼ jamʌ pʌsʌ bajcheʼ yilal jiñi i pʼuntaya Jehová cheʼ bʌ tsiʼ yʌlʌ jiñi lajiya chaʼan juntiquil chʼiton tsaʼ bʌ loqʼui majlel tiʼ yotot. Pero cheʼ bʌ tsiʼ chaʼ ñaʼta i bʌ i tsaʼ chaʼ sujti majlel tiʼ yotot, jiñi i papá ñajtto tsiʼ taja i qʼuel i ajñel tsaʼ majli i tajeʼ, tsiʼ wol meqʼue i tsiʼ ñusʌbe i mul. Ili wen tsiquil miʼ pʌs bajcheʼ yilal i pʼuntaya Jehová (Luc. 15:​11-32). Tiʼ sujm, Jesús tsiʼ colta lac piʼʌlob chaʼan miʼ chʼʌmbeñob i sujm bajcheʼ mero yilal Jehová. w24.02 10 párr. 8, 9

Jehová miʼ tijicñesʌben i pusicʼal jiñi woli bʌ i ñusan wocol. ¿Chuqui mi caj i coltañonla chaʼan mi lac pʌs pʼuntaya yicʼot chaʼan mi lac ñuqʼuesʌben i pusicʼal yambʌlob? ¿Chuqui mi caj i coltañonla chaʼan mi lac bej pʌsben cʼuxbiya jiñi hermanojob yicʼot chaʼan mi lac ñuqʼuesʌbeñob i pusicʼal? (1 Tes. 4:18). Yom mi lac ñop la cubin bajcheʼ yubil miʼ yubiñob i bʌ, mi lac pʌs la cutslel yicʼot mi lac pʌs jiñi cʼuxbiya bajcheʼ am bʌ ti jumpʼejl familia (Col. 3:12; 1 Ped. 3:8). Cheʼ mi lac pʌs lac pʼuntaya yicʼot mi lac wen ñaʼtañob jiñi la quermañujob mi caj lac mulan lac ñuqʼuesʌbeñob i pusicʼal cheʼ bʌ miʼ ñusañob wocol. Jesús tsiʼ yʌlʌ: «Ti la quej miʼ loqʼuel chuqui tac an ti lac pusicʼal. Jiñi wem bʌ wiñic miʼ yʌl chuqui tac wen come wen chuqui an tiʼ pusicʼal» (Mat. 12:​34, 35). Jin chaʼan, cheʼ bʌ mi lac ñuqʼuesʌbeñob i pusicʼal jiñi la quermañujob jiñʌch junchajp bajcheʼ mi lac pʌs chaʼan mucʼʌch laj cʼuxbiñob. w23.11 10 párr. 10, 11

Chaʼan mi lac chʼʌmben i sujm jiñi profecía tac yom mi laj cʼajtin laj coltʌntel. Jumpʼejl ejemplo, laʼcu lac ñaʼtan chaʼan mi lac majlel ti xʌmbal ti jumpʼejl tejclum mach bʌ laj cʌñʌyic, pero yaʼ majlel la quicʼot juntiquil la camigo wen i cʌñʌ bʌ, yujil baqui añonla yicʼot baqui yom mi lac ñumel majlel. ¡Ñaʼtancu cheʼ lac bajñelic jach! Wen cheʼ yaʼʌch majlel la quicʼot jiñi la camigo. Cheʼʌch miʼ yujtel tiʼ tojlel Jehová jaʼel, wen yujil baqui ora chumulonla yicʼot chuqui mi caj i yujtel. Jin chaʼan, yom mi lac pʌs lac pecʼlel yicʼot mi laj cʼajtiben i coltaya chaʼan mi lac chʼʌmben i sujm jiñi profecía tac (Dn. 2:28; 2 Ped. 1:​19, 20). Jehová yom chaʼan wen mi la cajñel, lajal bajcheʼ juntiquil tatʌl yom chaʼan wen miʼ yajñel i yalobilob (Jer. 29:11). Pero Jehová wen yujil chuqui tac mi caj i yujtel ti talto bʌ qʼuin, jin chaʼan tsiʼ mulaj chaʼan jiñi profecía tac miʼ tsʼijbuntel cʌytʌl tiʼ Tʼan chaʼan miʼ mejlel lac ñaʼtan chuqui mi caj i yujtel (Is. 46:10). w23.08 8, 9 párr. 3, 4