Jehová mi caj i ñuqʼuesʌbeñet a pusicʼal

1. ¿Bajcheʼ yilal tsiʼ ñusayob jiñi judíojob yaʼ ti Babilonia?

TI WAJALI jiñi judíojob cabʌl jab tsiʼ chʌn ñusʌbeyob i tʼan Jehová, jin mecu chaʼan tsiʼ yʌcʼʌ chaʼan jiñi babiloniojob miʼ jisañob Jerusalén i tsiʼ pʌyʌ majlel jiñi judíojob. ¿Bajcheʼ yubil tsiʼ yubiyob maʼ wʌl cheʼ yaʼañob yaʼi? (2 Cr. 36:​15, 16, 20, 21). I sujmʌch chaʼan yaʼ ti Babilonia muqʼuixto i mejlel i melob (chaʼleñob) chuqui yomob (Jer. 29:​4-7). Pero wocolʌch tsiʼ ñusayob, i tajol mach cheʼic ñaʼtʌbil i chaʼañob chumtʌl bajcheʼ jiñi. An juntiquil tsaʼ bʌ i yʌlʌ iliyi: «Yaʼ ti Babilonia tsaʼ buchleyonla yaʼ tiʼ tiʼ colem jaʼ. Tsaʼ lac chaʼle uqʼuel cheʼ bʌ tsaʼ lac ñaʼta Sion» (Sal. 137:1). Tsiquil chaʼan i cʼʌjñibalʌch chaʼan miʼ ñuqʼuesʌbentelob i pusicʼal, pero ¿majqui mi caj i mel?

2, 3. a) ¿Bajcheʼ tsiʼ colta Jehová jiñi judíojob añoʼ bʌ ti Babilonia? b) ¿Chuqui mi caj laj qʼuel ti ili estudio?

² Jehová jiñʌch «jiñi Dios muʼ bʌ i ñuqʼuesʌben i pusicʼal lac piʼʌlob tiʼ pejtelel chuqui miʼ ñusañob» (2 Cor. 1:3). Miʼ cʼuxbin pejtelelob muʼ bʌ i lʌcʼtesañob i bʌ tiʼ tojlel i yom i ñuqʼuesʌbeñob i pusicʼal. Jehová yujil chaʼan an muʼ bʌ caj i chaʼ ñaʼtañob i bʌ i mi caj i chaʼ chʼujutesañob cheʼ bʌ yaʼañob ti Babilonia (Is. 59:20). Jin chaʼan, cheʼ bʌ anto yom 100 jab chaʼan miʼ pʌjyelob majlel ti Babilonia, tsiʼ yʌcʼʌ chaʼan jiñi xʼaltʼan Isaías miʼ tsʼijbun cʌytʌl ili tʼan: «Dios tsiʼ sube jiñi xʼaltʼañob i chaʼan: ‹Ñuqʼuesʌbeñob i pusicʼal, ñuqʼuesʌbeñob i pusicʼal c chaʼañoʼ bʌ›» (Is. 40:1). Jehová tsiʼ cʼʌñʌ jiñi i juñilel Isaías chaʼan miʼ ñuqʼuesʌben i pusicʼal jiñi judíojob cheʼ bʌ i cʼʌjñibal i chaʼañob.

³ Joñonla jaʼel an i tajol la com mi lac ñuqʼuesʌbentel lac pusicʼal. Jin chaʼan ti ili estudio mi caj laj qʼuel uxchajp bajcheʼ Jehová tsiʼ ñuqʼuesʌbe i pusicʼal jiñi judíojob: 1) Tiʼ subeyob chaʼan mi caj i ñusʌbeñob i mul jiñi muʼ bʌ i chaʼ ñaʼtañob i bʌ, 2) tsiʼ yʌqʼueyob jumpʼejl pijtaya jiñi i wiñicob i 3) tsiʼ coltayob chaʼan maʼañic miʼ chaʼleñob bʌqʼuen. Cheʼ bʌ mi laj qʼuel jujunchajp mi caj laj qʼuel bajcheʼ miʼ ñuqʼuesan lac pusicʼal jaʼel ili ora.

JEHOVÁ MIʼ PʼUNTAÑONLA YICʼOT MIʼ ÑUSAN LAC MUL

4. ¿Bajcheʼ tsiʼ pʌsʌ i pʼuntaya Jehová? (Isaías 55:7).

⁴ Jehová «jiñʌch jiñi Tatʌl am bʌ i chaʼan jiñi ñuc bʌ pʼuntaya» (2 Cor. 1:3). I tsiʼ pʌsʌ iliyi cheʼ bʌ tsiʼ yʌlʌ chaʼan mi caj i ñusʌbeñob i mul jiñi mucʼʌch bʌ i chaʼ ñaʼtañob i bʌ (pejcan Isaías 55:7). Jehová tsiʼ yʌlʌ: «Mi caj c pʼuntañet tiʼ pejtelel ora ti cabʌl cʼuxbiya» (Is. 54:8). ¿Bajcheʼ mi caj i pʌs i cʼuxbiya? Anquese tiʼ pejtelelobʌch jiñi judíojob mi caj i tajob jiñi wocol tiʼ caj i ñusatʼañob, Jehová tsiʼ subeyob chaʼan mach tiʼ pejtelelic ora yaʼ mi caj i yajñelob ti Babilonia. Mucʼʌch caj i chaʼ sujtelob majlel tiʼ lumal (Is. 40:2). Iliyi tsaʼʌch i wen ñuqʼuesʌbe i pusicʼal jiñi judíojob tsaʼ bʌ i chaʼ ñaʼtayob i bʌ.

5. ¿Chucoch miʼ mejlel lac ñumen ñop chaʼan Jehová mucʼʌch i pʼuntañonla?

⁵ ¿Chuqui mi laj cʌn? Chaʼan Jehová yomʌch i ñusan lac mul. Jiñi judíojob yujilobʌch jaʼel iliyi, pero joñonla muʼto i mejlel lac ñumen ñop chaʼan i sujmʌch. ¿Chucoch? Come la cujil chuqui tsiʼ mele Jehová ti wiʼil chaʼan miʼ ñusʌbeñonla lac mul. Tsiʼ choco tilel jiñi i Yalobil ila ti lum chaʼan miʼ yʌcʼ i cuxtʌlel tiʼ tojlel jiñi muʼ bʌ i chaʼ ñaʼtañob i bʌ. Jehová miʼ mejlel i junyaj ñusan lac mul come Jesucristo tsaʼix i yʌcʼʌ i cuxtʌlel ti lac tojlel (Hech. 3:19; Is. 1:18; Efes. 1:7). ¡Jehová mucʼʌch i wen pʼuntañonla!

6. ¿Bajcheʼ miʼ coltañonla cheʼ mi lac wen ñaʼtan bajcheʼ miʼ ñusan lac mul Jehová? (Qʼuele jaʼel jiñi foto tac).

⁶ Tsaʼ bʌ i yʌlʌ Jehová ti Isaías 55:7 miʼ mejlel i coltañonla jaʼel mi bej chʼijyemontola mi la cubin tiʼ caj jiñi tsaʼ tac bʌ lac mele ti wajali anquese tsaʼix laj cʌyʌ. An wocol bʌ miʼ yubiñob chaʼan miʼ ñajʌtesañob jiñi tsaʼ bʌ i meleyob, ñumento mi woli (choncol) i ñusañob wocol tiʼ caj jiñi. Pero mi tsaʼix lac subu lac mul i tsaʼix laj cʌyʌ lac mel miʼ mejlel lac ñop chaʼan Jehová tsaʼix i ñusʌbeyonla. I cheʼ bʌ Jehová miʼ ñusan lac mul maʼañic miʼ chʌn cʼajtesan (laja yicʼot Jeremías 31:34). Mi Jehová maʼañic miʼ chʌn cʼajtesan, mach yomic mi lac mel jaʼel. Muʼ bʌ i qʼuel ti ñuc jiñʌch muʼ bʌ lac mel ti ili ora, mach jiñic tsaʼ bʌ lac mele ti wajali (Ez. 33:​14-16). I laʼ laj cʼajtesan chaʼan tsʼitaʼ jax yom chaʼan Jehová miʼ jisan jiñi wocol tac woli bʌ (yʌquel bʌ) lac ñusan tiʼ caj jiñi tsaʼ tac bʌ lac mele ti wajali.

7. ¿Chuqui mi caj i coltañonla chaʼan mi lac sub lac mul?

⁷ ¿I chuqui yom mi lac mel mi mach tijicñayic mi la cubin tiʼ caj tsaʼ lac chaʼle tsʌts bʌ mulil i maxto lac subu? Jiñi Biblia miʼ yʌl chaʼan yom mi laj cʼajtin laj coltʌntel tiʼ tojlel jiñi ancianojob (Sant. 5:​14, 15). I sujmʌch chaʼan wocol mi la cubin chaʼan mi lac sub chuqui tsaʼ lac mele. Pero yom mi laj cʼajtesan chaʼan Jehová tsiʼ waʼchoco jiñi ancianojob chaʼan miʼ coltañonla yicʼot chaʼan mucʼʌch caj i pʌsbeñoñobla i cʼuxbiya yicʼot i pʼuntaya cheʼ bajcheʼ miʼ mel Jehová. Mi mucʼʌch laj cʼajtesan iliyi yicʼot mi laj cʌy lac mul, mach wocolic mi caj la cubin chaʼan mi laj cʼajtin laj coltʌntel. Laʼ laj qʼuel bajcheʼ Jehová tsiʼ pʌsbe i pʼuntaya yicʼot tsiʼ colta juntiquil hermano i cʼabaʼ Arthur.a Miʼ yʌl: «Lʌcʼʌ jumpʼejl jab tsaʼ j qʼuele pornografía. Pero ti jumpʼejl bʌ qʼuin tsaʼ cubi jumpʼejl discurso muʼ bʌ i taj ti tʼan chaʼan yom sʌc laj conciencia, jin chaʼan tsaʼ c sube c mul jiñi quijñam yicʼot jiñi ancianojob. Jamacña pañimil tsaʼ cubi, pero bej chʼijyemonto tiʼ caj jiñi tsaʼ bʌ c mele. Jiñi ancianojob yicʼotob i cʼuxbiya tsiʼ subeyoñob chaʼan Jehová maʼañic chocbil i chaʼañon yicʼot chaʼan miʼ ticʼ jiñi muʼ bʌ i cʼuxbiñob. Jiñi tsaʼ bʌ i subeyoñob tsaʼ cʼoti tic pusicʼal i tsiʼ coltayon chaʼan maʼan mic ñaʼtan mach tac bʌ weñic tic tojlel». Ili ora Arthur an bajcheʼ precursor regular yicʼot siervo ministerial. ¡Wen tijicña mi la cubin cheʼ la cujil chaʼan Jehová mucʼʌch i ñusan lac mul cheʼ bʌ mi lac chaʼ ñaʼtan lac bʌ!

JEHOVÁ MIʼ YɅQʼUEÑONLA LAC PIJTAYA

8. a) ¿Chuqui tsiʼ sube Jehová jiñi judíojob cheʼ bʌ yaʼañob ti Babilonia? b) Cheʼ bajcheʼ miʼ yʌl Isaías 40:​29-31, ¿bajcheʼ mi caj i coltañob jiñi judíojob jiñi tsaʼ bʌ i yʌlʌ Jehová?

⁸ Tajol jiñi judíojob tsiʼ ñaʼtayob chaʼan maʼañix baqui ora mi caj i chaʼ sujtelob majlel tiʼ lumal come Babilonia cʌmbil bajcheʼ jumpʼejl tejclum maʼañic bʌ miʼ chʌn acʼ ti libre jiñi muʼ bʌ i chucob majlel (Is. 14:17). Pero Jehová tiʼ subeyob jiñi i wiñicob chaʼan mucʼʌch caj i locʼsañob yaʼi. ¡I maʼañic chuqui mi caj i mʌctan chaʼan miʼ tsʼʌctiyel jiñi tsaʼ bʌ i yʌlʌ! (Is. 44:26; 55:12). Tiʼ wut Jehová, Babilonia mach pʼʌtʌlic, lajal jach bajcheʼ tsʼubejn (Is. 40:15). Jasʌl maʼ waʼ wujtan jiñi tsʼubejn i mach tsiquilic baqui miʼ majlel, cheʼʌch jaʼel jiñi Babilonia. Jehová mach junyaj wocolic mi caj i yubin chaʼan miʼ locʼsan i wiñicob yaʼi. Iliyi tsiʼ ñuqʼuesʌbe i pusicʼal jiñi judíojob, pero anto chuqui yambʌ tsiʼ tajayob come Isaías tiʼ tsʼijbu: «Jini muʼ bʌ i chʌn pijtañob lac Yum chaʼan miʼ coltʌntelob mi caj i chaʼ tajob i pʼʌtʌlel» (pejcan Isaías 40:​29-31). Jiñi pijtaya tsaʼ bʌ aqʼuentiyob tsiʼ yʌqʼueyob jaʼel i pʼʌtʌlel chaʼan miʼ letselob cheʼ «bajcheʼ xiyeʼ yujil bʌ wejlel».

9. ¿Chuqui tsiʼ coltayob i ñop jiñi judíojob chaʼan Jehová mucʼʌch caj i tsʼʌctesan i tʼan?

⁹ Anto chuqui tac yambʌ tsiʼ colta jiñi judíojob chaʼan miʼ ñopob chaʼan Jehová mucʼʌch caj i tsʼʌctesan i tʼan. ¿Chuquiyes? Jiñʌch jiñi profecía tac tsaʼix bʌ i qʼueleyob ti tsʼʌctiyel. Junchajp, yujilob chaʼan Asiria tiʼ jisa Israel, jiñi rey del norte, i tsiʼ cʌchʌ majlel jiñi chumuloʼ bʌ yaʼi (Is. 8:4). Yambʌ, tsiʼ qʼueleyob bajcheʼ jiñi babiloniojob tsiʼ jisayob Jerusalén i tsiʼ pʌyʌyob majlel lac piʼʌlob (Is. 39:​5-7). Cheʼ jaʼel, yujilob chaʼan jiñi rey ti Babilonia tsiʼ locʼsʌbe i wut jiñi rey Sedequías i tsiʼ pʌyʌ majlel ti Babilonia (Jer. 39:7; Ez. 12:​12, 13). Cheʼʌch tsaʼ luʼ tsʼʌctiyi bajcheʼ tsiʼ yʌlʌ Jehová (Is. 42:9; 46:10). Pejtelel iliyi tsaʼʌch i coltayob i ñumen ñop chaʼan Jehová mi caj i locʼsañob ti Babilonia cheʼ bajcheʼ tsiʼ wʌn alʌ.

10. ¿Chuqui mi caj i coltañonla chaʼan maʼañic miʼ ñajʌyel lac chaʼan jiñi lac pijtaya ti ili cojix bʌ qʼuin?

¹⁰ ¿Chuqui mi laj cʌn? Jiñi lac pijtaya miʼ mejlel i ñuqʼuesan lac pusicʼal yicʼot i pʼʌtʼesañonla mi chʼijyemonla mi la cubin. I sujmʌch chaʼan wocol jax bajcheʼ chumulonla yicʼot cabʌl laj contrajob, pero mach yomic mi la cubin lac chʼijyemlel. Jehová an i yʌlʌ chaʼan mi lac mejlel ti chumtʌl tiʼ pejtelel ora baqui maʼañix chuqui mi lac bʌcʼñan yicʼot baqui añix ñʌchʼtʌlel. Pero yomʌch chʌn cʼajal lac chaʼan jiñi albil bʌ i chaʼan Jehová. ¿Chuqui mi caj i coltañonla chaʼan maʼañic miʼ ñajʌyel lac chaʼan jiñi pijtaya? Yomʌch mi lac chʌcʌ locʼsʌben i yorajlel chaʼan mi lac ñaʼtan chaʼan wen utsʼatax mi caj lac chumtʌl yaʼ ti tsijiʼ bʌ pañimil. Cheʼ jaʼel, laʼ lac pejcan tema tac, laʼ laj qʼuel video tac yicʼot lac ñʌchʼtan cʼay tac muʼ bʌ i taj ti tʼan lac pijtaya. I laʼ lac suben Jehová ti oración chuqui tac jiñi la comix bʌ laj qʼuel ti tsʼʌctiyel.

11. ¿Chuqui miʼ coltan juntiquil hermana am bʌ tsʌts bʌ i cʼamʌjel?

¹¹ Laʼ laj qʼuel i yejemplo jiñi hermana Joy, am bʌ i chaʼan tsʌts bʌ cʼamʌjel. Joy miʼ yʌl bajcheʼ an i pʼʌtʼesa yicʼot i ñuqʼuesʌbe i pusicʼal jiñi albil bʌ i chaʼan Jehová, miʼ yʌl: «Cheʼ bʌ mach mejlix c bej lʌtʼeʼ mi cubin, mic suben Jehová bajcheʼ yubil mi cubin come cujil chaʼan mucʼʌch i chʼʌmbeñon i sujm i añʌch i yʌqʼueyon c pʼʌtʌlel chaʼan mic lʌtʼeʼ» (2 Cor. 4:7). Joy miʼ ñaʼtan jaʼel bajcheʼ yilal cheʼ bʌ yaʼix an yaʼ ti tsijib bʌ pañimil baqui «maʼanix mi juntiquilic muʼ bʌ caj i yʌl: ‹Cʼamon›» (Is. 33:24). Mi joñonla jaʼel mi lac suben Jehová bajcheʼ yubil mi la cubin i mi lac wen ñaʼtan jiñi lac pijtaya, miʼ mejlel i pʼʌtʼesañonla jaʼel.

12. ¿Chucoch mucʼʌch i mejlel lac wen ñop jiñi albil tac bʌ i chaʼan Jehová? (Qʼuele jaʼel jiñi foto tac).

¹² Cheʼ bajcheʼ tsaʼ ujti tiʼ tojlel jiñi judíojob, joñonla jaʼel cabʌl chuqui miʼ coltañonla lac ñop chaʼan Jehová mucʼʌch caj i tsʼʌctesan jiñi albil tac bʌ i chaʼan. Joñonla jaʼel woli laj qʼuel ti tsʼʌctiyel cabʌl profecía. Jumpʼejl ejemplo, la cujil chaʼan an jumpʼejl yumʌntel am bʌ tsʼitaʼ i pʼʌtʌlel pero an i cʼunlel jaʼel (Dn. 2:​41-43). Cheʼ jaʼel, la cujil chaʼan woli i wen ujtel «yujquel lum ti cabʌl tejclum», i woliyonla ti subtʼan tiʼ pejtelel tejclum tac (Mat. 24:​7, 14). Ili profecía tac yicʼot yan tac bʌ woli bʌ i tsʼʌctiyel miʼ ñuqʼuesan lac pusicʼal yicʼot miʼ coltañonla lac ñumen ñop chaʼan Jehová mucʼʌch caj i tsʼʌctesan jiñi albil tac bʌ i chaʼan.

JEHOVÁ MIʼ COLTAÑONLA CHAʼAN MAʼAÑIC MI LAC CHAʼLEN BɅQʼUEN

13. a) ¿Chuqui tac ti wocol tsiʼ ñusayob jiñi judíojob cheʼ bʌ lʌcʼʌlix yom chaʼan miʼ loqʼuelob ti Babilonia? b) Cheʼ bajcheʼ miʼ yʌl Isaías 41:​10-13, ¿bajcheʼ tsaʼ ñuqʼuesʌbentiyob i pusicʼal jiñi judíojob ti Jehová?

¹³ Jehová tsiʼ sube jiñi judíojob añoʼ bʌ ti Babilonia chaʼan mucʼʌch caj i loqʼuelob yaʼi. Pero yujil jaʼel chaʼan cheʼ bʌ lʌcʼʌlix chaʼan miʼ loqʼuelob yaʼ ti Babilonia wocol mi caj i ñusañob come wʌn albil chaʼan juntiquil pʼʌtʌl bʌ rey mi caj i jisan Babilonia yicʼot jiñi tejclum tac an bʌ tiʼ joytilel (Is. 41:​2-5). Jin chaʼan, chaʼan jiñi judíojob maʼañic miʼ chaʼleñob bʌqʼuen, Jehová tsiʼ wʌn acʼʌ ti tsʼijbuntel iliyi chaʼan miʼ ñuqʼuesʌbentelob i pusicʼal: «Mach a chaʼlen bʌqʼuen, come añon quicʼotet. Mach yomic maʼ lij a bʌ come a Dioson» (pejcan Isaías 41:​10-13). ¿Chucoch tiʼ subeyob jiñi tʼan «a Dioson»? Mach chaʼañic miʼ cʼajtesʌbeñob chaʼan yom miʼ chʼujutesañob come yujilob chaʼan jiñʌch yom bʌ miʼ melob jiñi, chaʼañʌch maʼañic miʼ ñajʌyel i chaʼañob chaʼan Jehová mi caj i yajñel yicʼotob i mi caj i coltañob (Sal. 118:6).

14. ¿Chuqui yambʌ tsiʼ mele Jehová chaʼan jiñi judíojob maʼañic miʼ chaʼleñob bʌqʼuen?

¹⁴ Jehová anto bajcheʼ yambʌ tsiʼ colta jiñi judíojob chaʼan maʼañic miʼ chaʼleñob bʌqʼuen: Tsiʼ cʼajtesʌbeyob chaʼan maʼañic i pʼisol i ñaʼtʌbal yicʼot i pʼʌtʌlel. Tsiʼ subeyob chaʼan miʼ qʼuelob letsel jiñi panchan i tsiʼ subeyob chaʼan jiñʌch tsiʼ mele (pʌtʌ) jiñi ecʼ tac am bʌ yaʼi, pero mach cojach jiñi, i cʌmbeto i cʼabaʼ jujumpʼejl ecʼ (Is. 40:​25-28). Jin chaʼan miʼ mejlel lac ñop jaʼel chaʼan yujil chuqui i cʼabaʼ jujuntiquil i wiñic. I mi tsiʼ cʼʌñʌ i pʼʌtʌlel chaʼan miʼ mel jiñi ecʼ tac, añʌch i pʼʌtʌlel jaʼel chaʼan miʼ coltan i tejclum. Jiñi judíojob maʼañic chuqui yom miʼ bʌcʼñañob.

15. ¿Chuqui tsiʼ sube Jehová jiñi judíojob chaʼan chajpʌbilob?

¹⁵ Jehová tsiʼ subeyob jaʼel chuqui yom miʼ melob i wiñicob chaʼan chajpʌbilob. Tiʼ sube jiñi i tejclum: «Ñupʼbenla i tiʼ tac laʼ wotot. Yom mi laʼ poj mujcun laʼ bʌ jinto miʼ lajmel i michʼajel lac Yum» (Is. 26:20). Tajol ili versículo tsaʼ ñaxan tsʼʌctiyi cheʼ bʌ Ciro tsiʼ jisa Babilonia. Juntiquil wiñic i cʼabaʼ Jenofonte tsiʼ yʌlʌ chaʼan Ciro tiʼ sube i soldadojob cheʼ tsaʼ ochiyob ti Babilonia chaʼan miʼ tsʌnsañob majqui jach miʼ tajob ti bij. ¡Tajol wen bʌbʌqʼueñʌch tsiʼ ñusayob jiñi chumuloʼ bʌ ti Babilonia! Pero jiñi judíojob maʼañic chuqui tsiʼ chaʼleyob come tsiʼ jacʼbeyob i tʼan Jehová.

16. ¿Chucoch mach yomic mi lac bʌcʼñan jiñi ñuc bʌ wocol muʼ bʌ caj i tilel? (Qʼuele jaʼel jiñi foto).

¹⁶ ¿Chuqui mi laj cʌn? Tsʼitaʼ jax yom chaʼan miʼ tejchel jumpʼejl ñuc bʌ wocol maʼañic bʌ baʼ ujtem. Jiñi lac piʼʌlob miʼ cajelob ti wen bʌqʼuen i maʼañic mi caj i ñaʼtañob chuqui yom miʼ melob cheʼ bʌ miʼ tejchel jiñi wocol. Pero joñonla mach cheʼic mi caj la cujtel bajcheʼ jiñi come la cujil chaʼan Jehová jiñʌch lac Dios. Maʼañic mi laj cajel ti bʌqʼuen come la cujil chaʼan wolix i lʌcʼtiyel i yorajlel chaʼan mi laj cojlel (Luc. 21:28). I mi caj lac bej ñop chaʼan Jehová mi caj i coltañonla cheʼ bʌ miʼ contrajiñonla jiñi junmojt tejclum tac. Jehová mi caj i cʼʌn i yángelob i mi caj i subeñonla chuqui yom mi lac mel chaʼan maʼañic chuqui mi lac chaʼlen. Maxto wen la cujilic bajcheʼ mi caj i mel, tajol yaʼʌch yaʼ ti congregación. Tajol jiñi congregación tac lajal miʼ cajel bajcheʼ jiñi la cotot baqui mach yomic mi lac loqʼuel chaʼan maʼañic chuqui mi lac chaʼlen. Jin chaʼan, mi la com chaʼan chajpʌbilonla yom lʌcʼʌl mi la cajñel tiʼ tojlel jiñi hermanojob, ti jumpʼejl lac pusicʼal mi lac jacʼ chuqui miʼ yʌl jiñi organización i mi lac ñop chaʼan Jehová jiñʌch woli bʌ i qʼuel jiñi organización (Heb. 10:​24, 25; 13:17).

17. ¿Chuqui miʼ mejlel a mel chaʼan maʼ wʌcʼ chaʼan Jehová miʼ ñuqʼuesan a pusicʼal?

¹⁷ I sujmʌch chaʼan jiñi judíojob wocolʌch tsiʼ ñusayob yaʼ ti Babilonia, pero Jehová tsaʼʌch i chʌn ñuqʼuesʌbeyob i pusicʼal. I cheʼʌch mi caj i mel ti lac tojlel jaʼel. Jin chaʼan chʌn acʼʌ chaʼan Jehová miʼ ñuqʼuesan a pusicʼal, mach yʌlʌyic chuqui miʼ yujtel ti talto bʌ qʼuin. ¿Chuqui miʼ mejlel a mel? Cʼajtesan chaʼan Jehová miʼ pʼuntañonla, mach wis ñajʌyic a chaʼan jiñi albil tac bʌ i chaʼan i cʼajtesan chaʼan Jehová jiñʌch a Dios, jin chaʼan maʼañic chuqui yom maʼ bʌcʼñan.