¿Muʼ ba i mejlel i coltañet jiñi Biblia chaʼan maʼ cʌy jiñi droga tac?

Ti jujumpʼejl jab, cabʌl lac piʼʌlob miʼ chʌmelob tiʼ caj jiñi droga tac. I ti jiñi pandemia chaʼan COVID-19 tsaʼto ñumen tsʌtsʼa jiñi wocol. Jiñi ticʼojel tac am bʌ ti Biblia an i colta yonlel lac piʼʌlob chaʼan miʼ cʌyob jiñi droga. ¿Woli baʼ chaʼlen wersa a cʌy jiñi droga tac? Ili ticʼojel tac muʼ bʌ caj laj qʼuel miʼ mejlel i coltañet jaʼel.a

Ti ili tema miʼ cajel laj qʼuel iliyi:

¿Chucoch yom maʼ wʌcʼ chaʼan jiñi ticʼojel tac am bʌ ti Biblia miʼ coltañet a cʌy jumpʼejl vicio?

An qʼuejli chaʼan jiñi lac piʼʌlob miʼ tech i cʼʌñob droga tac tiʼ caj i bajñel miʼ yubiñob i bʌ, cʌlʌx pensar yicʼot chʼijyemlel. Jiñi Biblia miʼ mejlel i yʌqʼueñet a ñopoñel chaʼan miʼ mejlel a mʌlben pejtelel jiñi wocol yicʼot mi caj i pʌsbeñet bajcheʼ maʼ mejlel ti sujtel tiʼ yamigo Dios (Salmo 25:14). Jiñi Biblia miʼ mejlel i coltañet a lʌtʼ baqui jach bʌ wocol anquese mach mejletic maʼ wubin (Marcos 11:22-24).

Chʌmpʼejl ticʼojel muʼ bʌ i yʌcʼ jiñi Biblia chaʼan maʼ cʌy jiñi vicio

1. Cʌñʌ Jehováb (Juan 17:3). Jiñʌch tsaʼ bʌ i meleyonla yicʼot maʼañic i pʼisol i pʼʌtʌlel. Pero mach cojach jiñi, jiñʌch a Tat am bʌ ti panchan muʼ bʌ i cʼuxbiñet. Yom sujtel ti a wamigo yicʼot yom i cʼʌn i pʼʌtʌlel chaʼan miʼ coltañet (Isaías 40:29-31; Santiago 4:8). I mi a womʌch jiñi i cʼuxbiya miʼ yʌqʼueñet i tʼan chaʼan wen mi caj a chumtʌl (Jeremías 29:11; Juan 3:16).
2. Cʼajtiben Jehová chaʼan miʼ coltañet. Melben oración chaʼan miʼ coltañet a cʌy jiñi a vicio i cheʼ jiñi sʌc maʼ sujtel tiʼ wut Dios (Romanos 12:1). Mi caj i yʌqʼueñet jiñi chʼujul bʌ i yespíritu chaʼan maʼ taj jiñi pʼʌtʌlel mach bʌ añic miʼ mejlel i taj yambʌ lac piʼʌlob (2 Corintios 4:7; Lucas 11:13). Jiñi pʼʌtʌlel mi caj i coltañet a cʌy jiñi droga tac yicʼot chaʼan xucʼu xucʼul maʼ taj majlel jiñi tsijiʼ bʌ a melbal (Colosenses 3:9, 10).
3. Otsan ti a jol i ñaʼtʌbal Dios (Isaías 55:9). Dios mi caj i coltañet chaʼan maʼ bej tsijibtesan a ñaʼtʌbal, chaʼan maʼ qʼuextan chuqui maʼ ñaʼtan. Jiñʌch muʼ bʌ caj i coltañet chaʼan maʼ cʌy jiñi a vicio (Efesios 4:23). Jiñi i ñaʼtʌbal Dios yaʼʌch an ti Biblia, jin chaʼan ñuc i cʼʌjñibal cheʼ maʼ pejcan ti jujumpʼejl qʼuin (Salmo 1:1-3). Cabʌlob an coltʌntiyob chaʼan miʼ chʼʌmbeñob i sujm chuqui miʼ yʌl jiñi Biblia (Hechos 8:30, 31). Jiñi i testigojonbʌlon Jehová mi lon cʌcʼ estudio. Cheʼ jaʼel, mi lon c pʌyet chaʼan maʼ cʼotel ti lon c tempa bʌ baqui miʼ cʼʌjñel jiñi Biblia i mi lon j cʌn bajcheʼ mi lon j cʼʌn jiñi cʌntesa tac.
4. Ñochtan jiñi lac piʼʌlob muʼ bʌ i coltañetob. Mi an chuqui woli a chaʼlen wersa a cʌy cʼajtesan chaʼan jiñi a wamigojob miʼ mejlel i coltañetob o maʼañic (Proverbios 13:20). Cheʼ bʌ mi lac lʌcʼtesan lac bʌ ti jiñi quixtañujob muʼ bʌ i chʼujutesañob Dios, miʼ mejlel lac taj wem bʌ la camigojob. Dios yom chaʼan mi lac sujtesañob ti la camigojob cheʼoʼ bʌ bajcheʼ jiñi come yujil chaʼan miʼ mejlel i coltañoñobla (Salmo 119:63; Romanos 1:12). Cheʼ jaʼel, yajcan ti wen chuqui tac mi caj a mel come jiñi muʼ bʌ a qʼuel, a pejcan yicʼot a ñʌchʼtan lajal bajcheʼ woli a ñusañob qʼuin a wicʼotob muʼ bʌ i tajtʌlob ti tʼan yaʼi. Jin chaʼan, mach a mel maʼañic bʌ miʼ coltañet a cʌy jiñi a vicio tac (Salmo 101:3; Amós 5:14).

Texto tac am bʌ ti Biblia muʼ bʌ i mejlel i coltañet a cʌy jumpʼejl vicio

Salmo 27:10: «Anquese cʌybilon tic tat tic ñaʼ, [Jehová] mi caj a wotsañon ti a walobil».

«Maʼañic tsaʼ j cʌñʌ majqui c papá, i c bajñel tsaʼ cubi c bʌ. Pero cheʼ bʌ tsaʼ j cʌñʌ Jehová yicʼot tsaʼ j qʼuele chaʼan cuxulʌch yicʼot chaʼan miʼ cʼuxbiñon, tsaʼ c tajbe i sujmlel j cuxtʌlel. Cheʼ jiñi tsaʼ mejli j cʌy jiñi c vicio» (Wilby, chʼoyol bʌ ti Haití).

Salmo 50:15: «Pejcañon cheʼ tiʼ yorajlel wocol. Mi caj colet».

«Jaysujtelic tsiʼ coltayon ili versículo chaʼan mic chʌn chaʼlen wersa, ñumento cheʼ bʌ tsaʼ chaʼ yajliyon ti jiñi c vicio. Jehová tiʼ tsʼʌctesa i tʼan» (Serhiy, chʼoyol bʌ ti Ucrania).

Proverbios 3:5, 6: «Ñopo lac Yum tiʼ pejtelel a pusicʼal. Mach a bajñel ñaʼtan bajcheʼ jach a wom maʼ mel. Tiʼ pejtelel chuqui maʼ mel ñaʼtan lac Yum. Cheʼ jini mux caj i chajpʌbeñet a bijlel».

«Ili versículo tac tsiʼ coltayon j qʼuel chaʼan i cʼʌjñibalʌch chaʼan Jehová miʼ coltañon. Wocolix i yʌlʌ jiñi i pʼʌtʌlel tsaʼ bʌ i yʌqʼueyon, tsaʼ mejli j qʼuextan c melbal» (Michele, chʼoyol bʌ ti Italia).

Isaías 41:10: «Mach a chaʼlen bʌqʼuen, come añon quicʼotet. Mach yomic maʼ lij a bʌ come a Dioson. Mi caj c wen pʼʌtʼesañet. Mi caj j coltañet. Mi caj j cʌntañet ti pʼʌtʌl bʌ j cʼʌb jini ñoj bʌ».

«Cheʼ bʌ tsaʼ caji j cʌy jiñi droga wocol tsaʼ cubi come jiñi c bʌcʼtal muqʼuix i cʼajtibeñon. Ili versículo tsiʼ coltayon c ñop chaʼan Dios mucʼʌch i mejlel i coltañon, i cheʼʌch tsiʼ mele» (Andy, chʼoyol bʌ ti Sudáfrica).

1 Corintios 15:33: «Mach laʼ wʌcʼ laʼ bʌ ti lotintel. Mi tsaʼ laʼ ñochta jiñi mach bʌ weñobic lac piʼʌlob mi caj laʼ cʌy laʼ mel chuqui tac wen».

«Jiñi mach bʌ weñic amigojob tsiʼ pʌsbeyoñob j cʼʌn jiñi droga, i tsaʼ sujti tic vicio. Chaʼan mic junyaj cʌy jiñi droga tac, tsaʼ j cʌyʌ c ñochtan jiñi poj camigojoʼ bʌ mi cʌl i tsaʼ c sujtesa ti camigojob jiñi wem bʌ i melbalob» (Isaac, chʼoyol bʌ ti Kenia).

2 Corintios 7:1: «Laʼ lac sʌqʼuesan lac bʌ tiʼ pejtelel muʼ bʌ i bibʼesan lac bʌcʼtal yicʼot lac ñaʼtʌbal».

«Jiñi tʼan tac tsiʼ coltayon chaʼan mic bej chaʼlen wersa chaʼan mij cʌy jiñi droga yicʼot chaʼan mic ñajʌtesan bajcheʼ quilal ti wajali come woli jach i ticʼlañon» (Rosa, chʼoyol bʌ ti Colombia).

Filipenses 4:13: «An c pʼʌtʌlel chaʼan chuqui jach mic mel wocolix i yʌlʌ jiñi muʼ bʌ i yʌqʼueñon c pʼʌtʌlel».

«Cujil chaʼan maʼañic mi caj c bajñel mejlel j cʌy jiñi droga. Jin chaʼan tsaʼ j cʼajtibe Dios chaʼan miʼ coltañon. Jiñʌch tsiʼ yʌqʼueyon jiñi c pʼʌtʌlel i cʼʌjñibal bʌ c chaʼan» (Patrizia, chʼoyol bʌ ti Italia).

Ujtem bʌ tiʼ tojlel yambʌlob: Jiñi Biblia tsiʼ coltayob chaʼan miʼ cʌyob i vicio

Joseph Ehrenbogen cʌlʌxix jontolil baqui tsaʼ coli yicʼot tsaʼ caji i wen jap lembal, i ñucʼ cʼujts, i cʼʌn marihuana yicʼot heroína. Pero jiñi tsaʼ bʌ i pejca ti Biblia tsiʼ colta i qʼuel chaʼan miʼ mejlel i qʼuextan i bʌ. Pejcan jiñi tsaʼ bʌ ujti tiʼ tojlel yaʼ ti tema «Aprendí a respetar a las mujeres y a respetar mi vida».

Dimitri Kórshunov mach junsujtelic jach tsiʼ ñopo i cʌy i jap lembal. Chaʼan maʼ qʼuel chuqui tsiʼ colta chaʼan miʼ cʌy i vicio, qʼuele jiñi video «Tsaʼ cʼoti c tsʼaʼlen jiñi c melbal».

¿Muʼ ba i yʌl jiñi Biblia chaʼan mach yomic miʼ chʼʌmob jumpʼejl tratamiento jiñi añoʼ bʌ i vicio?

Maʼañic. Jiñi Biblia miʼ yʌl chaʼan «jiñi cʼocʼoʼ bʌ mach i cʼʌjñibalic i chaʼañob doctor, pero jiñi cʼamoʼ bʌ i cʼʌjñibalʌch i chaʼañob» (Mateo 9:12). Cheʼ jaʼel, jiñi Instituto Nacional chaʼan jiñi Abuso de Drogas chaʼan Estados Unidos miʼ yʌl: «I cʼʌñol droga tac jumpʼejlʌch tsʌts bʌ cʼamʌjel, i chaʼan mi laj cʌy laj cʼʌn mach yom jach mi lac ñaʼtan chaʼan la comʌch laj cʌy». I sujmʌch, jiñi ñumen ñuc bʌ pʼʌtʌlel muʼ bʌ i mejlel i coltañonla chaʼan mi laj cʌy jiñʌch muʼ bʌ i yʌcʼ Dios i mach jiñic jach cheʼ bʌ la com laj cʌy jumpʼejl vicio. Pero jiñi tsaʼʌch bʌ i coltayob jiñi ticʼojel tac am bʌ ti Biblia tsaʼʌch cʼʌjñibʌyi i chaʼañob jaʼel jumpʼejl tratamiento.c Jumpʼejl ejemplo, Allen, tsaʼ bʌ i ñusa jiñi wocol, miʼ cʼajtesan: «Tsaʼ caji i wen aqʼueñon cʼux bʌcʼtal cheʼ bʌ tsaʼix caji j cʌy c jap lembal. Anquese wolʌch i coltañon jiñi Biblia, ti jimbʌ ora tsaʼ j qʼuele chaʼan i cʼʌjñibalʌch c chaʼan jaʼel jumpʼejl tratamiento».

¿Muʼ ba i yʌl jiñi Biblia chaʼan mach yomic miʼ cʼʌjñel bajcheʼ tsʼac jiñi droga tac?

Maʼañic. Jiñi Biblia miʼ yʌl chaʼan miʼ mejlel i cʼʌjñel jiñi lembal chaʼan miʼ tsʼʌcʌntel cʼamʌjel o chaʼan miʼ coltʌntel juntiquil lac piʼʌl tsʼitaʼ jax bʌ yom chaʼan miʼ chʌmel chaʼan miʼ cuchben i cʼuxel i cʼamʌjel (Proverbios 31:6; 1 Timoteo 5:23). Pero yom mi lac ñaʼtan chaʼan jiñi tsʼac tac muʼ bʌ i cʼʌjñel chaʼan cheʼ bʌ an chuqui cʼux lac chaʼan miʼ mejlel ti sujtel jaʼel ti jumpʼejl vicio, cheʼ bajcheʼ i japol lembal. Jin chaʼan, ñuc i cʼʌjñibal cheʼ mi lac ñaʼtan baqui bʌ i wocolel cheʼ bʌ mi laj cʼʌn tsʼac tac muʼ bʌ i lajmesan chuqui cʼux lac chaʼan (Proverbios 22:3).

a Anquese ili tema jin miʼ ñumen taj ti tʼan chaʼan bʌ droga tac, jiñi ticʼojel tac muʼ bʌ i tilel ilayi mucʼʌch i mejlel i coltañob jiñi woli bʌ i chaʼleñob wersa i cʌy i cʌlʌx japob lembal, i ñucʼob cʼujts, cʌlʌx uchʼel, alas, i qʼuelol pornografía o i wen cʼʌñol internet.

b Jehová jiñʌch i cʼabaʼ Dios (Salmo 83:18, TNM). Qʼuele jiñi tema «¿Majqui Jehová?».

c Cabʌl hospital, clínica yicʼot programa tac chaʼan rehabilitación miʼ coltan jiñi lac piʼʌlob añoʼ bʌ i vicio. Jujuntiquil yom miʼ ñaʼtan baqui mi caj i majlel yicʼot baqui bʌ tratamiento mi caj i chʼʌm (Proverbios 14:15).