¿Muʼ ba caj i jilel ti jumpʼejl bʌ qʼuin jiñi corrupción?

Jiñi corrupción jiñʌch jumpʼejl wocol am bʌ tiʼ petol pañimil.a Laʼcu lac ñaʼtan, cheʼ tiʼ yorajlel jiñi pandemia chaʼan COVID-19, cabʌl yumʌlob ti cabʌl país tsiʼ chʼʌmʌyob jiñi taqʼuin i wentʌlel bʌ miʼ cʼʌjñel ti jiñi pandemia. I tiʼ caj jiñi, cabʌl lac piʼʌlob tsiʼ ñusayob wocol i tsaʼ chʌmiyob come maʼañic bajcheʼ tsaʼ mejliyob ti coltʌntel chaʼan miʼ tsʼʌcʌntelob.

Jiñi corrupción miʼ ticʼlan lac piʼʌlob tiʼ petol pañimil. David Cameron, ex primer ministro bʌ ti Reino Unido, tsiʼ yʌlʌ iliyi: «Maʼañic mi jumpʼejlic país baqui maʼañic corrupción».

Pero miʼ mejlel lac ñop chaʼan mi caj i jilel jiñi corrupción. ¿Chucoch cheʼ mi la cʌl bajcheʼ jiñi? Laʼ laj qʼuel yaʼ ti Biblia chuqui mi caj i mel Dios.

¿Chucoch la cujil chaʼan Dios mi caj i jisan jiñi corrupción?

Yaʼ ti Biblia, Dios miʼ yʌl: «Joñon [Jehová] laʼ Yumon. Mij cʼuxbin chuqui tac toj, pero mic tsʼaʼlen xujchʼ yicʼot tsʌnsa»b (Isaías 61:8). Dios miʼ qʼuel cheʼ bʌ an majqui miʼ ñusan wocol tiʼ caj jiñi corrupción (Proverbios 14:31). Cheʼ jaʼel miʼ yʌcʼ ili tʼan: «Woliʼ ticʼlʌntelob jini pʼumpʼuñoʼ bʌ. [...] Jini chaʼan mux caj c tech meloñel» (Salmo 12:5).

¿Chuqui mi caj i mel Dios? Maʼañic mi caj i tojʼesan bajcheʼ miʼ melob i yeʼtel jiñi yumʌlob, mi caj i jisʌbeñob i cʼʌjñibal i caj i waʼchocon i yumʌntel, jumpʼejl yumʌntel am bʌ ti panchan, cʌmbil bajcheʼ «i Yumʌntel Dios» (Marcos 1:14, 15; Mateo 6:10). Jiñi Biblia miʼ yʌl: «Jini Dios am bʌ ti panchan mi caj i waʼchocon yambʌ Yumʌl. [...] Mi caj i laj jisan pejtel jini yumʌlob. Mi caj i yajñel tiʼ pejtelel ora» (Daniel 2:44). I cheʼ bajcheʼ jiñi, Dios mi caj i jisan jiñi corrupción am bʌ ili ora.

Jumpʼejl yumʌntel baqui maʼañic corrupción

¿Bajcheʼ la cujil chaʼan jiñi i Yumʌntel Dios maʼañic baʼ ora mi caj i mel mach bʌ weñic? Ñaʼtancu iliyi:

1. 1. I pʼʌtʌlel. I pʼʌtʌlel ili Yumʌntel tilem ti jiñi Dios mach bʌ añic i pʼisol i pʼʌtʌlel (Apocalipsis 11:15).

   ¿Chucoch ñuc i cʼʌjñibal iliyi? Chaʼan miʼ mejlel i tsʼʌctesañob i yeʼtel jiñi yumʌlob, i cʼʌjñibal i chaʼañob i taqʼuin lac piʼʌlob. Jin chaʼan, mach wocolic miʼ yubiñob chaʼan miʼ chaʼleñob xujchʼ o chaʼan miʼ toʼol locʼsañob i taqʼuin lac piʼʌlob. Pero jiñi i Yumʌntel Dios mi caj i yʌqʼuen chuqui i cʼʌjñibal bʌ i chaʼan jiñi lac piʼʌlob come ili yumʌntel an i coltʌntel ti Dios (Salmo 145:16).

2. 2. Jiñi Rey. Dios tsiʼ yajca Jesucristo chaʼan miʼ chaʼlen yumʌntel (Daniel 7:13, 14).

   ¿Chucoch ñuc i cʼʌjñibal iliyi? Jinto jiñi wem bʌ yumʌlob miʼ jacʼob chuqui miʼ subentelob ti yambʌlob, anquese mach weñic muʼ bʌ i subentelob i mel (Eclesiastés 7:20). Pero Jesús an i pʌsʌ chaʼan maʼañic miʼ jacʼ cheʼ bʌ miʼ subentel i mel mach bʌ weñic (Mateo 4:8-11). Tiʼ pejtelel muʼ bʌ i mel Jesús chaʼañʌch miʼ cʼuxbin jiñi lac piʼʌlob yicʼot yom chaʼan wen miʼ yajñelob (Salmo 72:12-14).

3. 3. Jiñi mandar tac. Tojʌch jiñi i mandar tac i Yumʌntel Dios i jiñi muʼ bʌ i jacʼob miʼ yubiñob i tijicñʌyel (Salmo 19:7, 8).

   ¿Chucoch ñuc i cʼʌjñibal iliyi? Jiñi i ley tac jiñi wiñicob wocolʌch ti jacʼol, i an i tajol jiñi yumʌlob maʼañic chuqui miʼ mejlel i melob chaʼan jiñi lac piʼʌlob miʼ jacʼob jiñi ley tac. I jiñʌch muʼ bʌ i yʌcʼ ti tejchel jiñi corrupción. Pero jiñi i mandar tac Dios mach tsʌtsic ti jacʼol yicʼot chaʼañʌch lac wenlel (Isaías 48:17, 18). Cheʼ jaʼel, ili mandar tac mach cojach miʼ yʌl chaʼan chuqui tac miʼ mel jiñi lac piʼʌlob, miʼ yʌl jaʼel chucoch miʼ melob (Mateo 22:37, 39). Dios miʼ qʼuel chuqui an ti lac pusicʼal i jiñʌch muʼ bʌ i chʼʌm ti ñuc mi tsaʼ ñusʌbenti i mandar, come miʼ pʌs pʼuntaya (Jeremías 17:10).

Mic subeñet lojon chaʼan maʼ cʌn chuqui miʼ yʌl jiñi Biblia chaʼan bajcheʼ yilal mi caj lac chumtʌl cheʼ bʌ maʼañix jiñi corrupción.

• Pejcan jiñi tema «El Reino de Dios, un gobierno sin corrupción» chaʼan maʼ qʼuel uxchajp chucoch miʼ mejlel lac ñop chaʼan jiñi i Yumʌntel Dios maʼañic baʼ ora mi caj i mel mach bʌ weñic.

• Qʼuele jiñi video ¿Chuqui jiñi i Yumʌntel Dios? chaʼan maʼ ñumen cʌn chuqui jiñi i Yumʌntel Dios yicʼot chuqui mi caj i mel ila ti Pañimil.

• Cʌñʌ bajcheʼ mi lon cʌcʼ estudio i qʼuele bajcheʼ miʼ mejlel i coltañet jiñi albil tac bʌ i chaʼan Dios yaʼ ti Biblia.