¿Chuqui miʼ yʌl jiñi Biblia cheʼ bʌ wolix i jilel jiñi jaʼ?
Ti lac pejtelel i cʼʌjñibal lac chaʼan sʌc bʌ jaʼ chaʼan mi lac chumtʌl. Pero yonlel lac piʼʌlob tiʼ petol pañimil maʼañic miʼ tajob sʌc bʌ jaʼ muʼ bʌ i mejlel i japob. Jiñi secretario general de la ONU, António Guterres, tsiʼ yʌlʌ: «Añonla ti jumpʼejl tsʌts bʌ wocol tiʼ ca jiñi jaʼ come ti ora woliʼ jilel tiʼ petol pañimil».
Strdel/AFP via Getty Images
¿Muʼ ba caj i cʼotel i yorajlel cheʼ maʼañix miʼ jilel jiñi jaʼ o cheʼ jach mi caj lac bej chumtʌl bajcheʼ ili? ¿Chuqui miʼ yʌl jiñi Biblia?
Muʼ bʌ i yʌl jiñi Biblia
Jiñi Biblia miʼ yʌl chaʼan mi caj i cʼotel i yorajlel baqui maʼañix mi caj i jilel jiñi jaʼ yicʼot sʌc mi cajel i miʼ mejlel ti jajpel.
«Yaʼ ti tiquin bʌ lum miʼ caj ti wʌjlel loqʼuel jaʼ. Yolocña miʼ caj ti ajñel. Yaʼ baʼ ticʌw jiʼ, on mi caj i tilel tsʌwan jaʼ. Yaʼ baʼ maʼanic jaʼ miʼ caj ti wʌjlel loqʼuel» (Isaías 35:6, 7).
¿Muʼ ba i mejlel lac ñop muʼ bʌ i yʌl jiñi Biblia? Ñaʼtancu muʼ bʌ i yʌl jiñi Biblia chaʼan bajcheʼ tsaʼ mejli ili planeta.
Muʼ bʌ i yʌl jiñi Biblia chaʼan jiñi Lum yicʼot jiñi jaʼ
«Lac Yum, jiñʌch Dios. Tsiʼ mele panchan yicʼot pañimil, [...] mach lolomic tsiʼ mele pañimil. Tsiʼ mele chaʼan i chumlib winicob» (Isaías 45:18).
Dios tsiʼ mele ili Lum chaʼan an cuxtʌlel. Chaʼan cuxul miʼ yajñel pejtelel chuqui an tsiʼ yʌcʼʌ jaʼ muʼ bʌ i mejlel ti jajpel.
«[Dios] miʼ yʌcʼ ti letsel i yowix jaʼ. Miʼ sujtel ti jaʼal ti chʌjcʼ ti chʌjcʼ. I yowix colem ñajb miʼ chaʼ chʼujyel letsel ti tocal. Jini tocal mi yʌcʼ jaʼal ti lum. Miʼ yʌchʼesañonla» (Job 36:27, 28).
Ili versículo tac mach wocolic miʼ tsictesan chaʼan jiñi jaʼ yicʼot chaʼan bajcheʼ miʼ bajñel sʌqʼuesan i bʌ. Jiñi jaʼ am bʌ ila ti Lum yicʼot am bʌ ti mar miʼ ticwan, i jiñi i yowixlel o i butsʼilel miʼ letsel majlel i jiñix muʼ bʌ i yajlel ti jaʼal, jin chaʼan maʼañic miʼ jilel jiñi sʌc bʌ jaʼ chaʼan miʼ cʼʌjñel (Eclesiastés 1:7; Amós 5:8).
«Joñon mi caj cʌqʼueñetla jaʼal cheʼ tiʼ yorajlel. Cheʼ jini mi caj i wen loqʼuel chuqui mi laʼ pʌcʼ yaʼ ti laʼ lum. Jini teʼ mi caj i wen acʼ i wut. Mi caj i wen loqʼuel i wut laʼ tsʼusub» (Levítico 26:3-5).
Ili texto woliʼ taj ti tʼan jiñi israelitajob ti wajali come cuxulob ti chuqui miʼ pʌcʼob. Dios tiʼ subeyob chaʼan mi caj i yʌqʼueñob jaʼal chaʼan miʼ colel chuqui miʼ pʌcʼob come i cʼʌjñibalʌch.
Dios tsaʼʌch i tsʼʌctesa i tʼan, i mach jalix yom chaʼan miʼ tsʼʌctesan jaʼel ili ora (Isaías 30:23). Cheʼ bʌ wolito lac pijtan chaʼan miʼ tsʼʌctiyel iliyi, jiñi wocol chaʼan jaʼ woliʼ ñumen tsʌtsʼan tiʼ petol pañimil, junchajp jiñʌch cheʼ maʼañix miʼ wen yajlel jaʼal. Pero ¿chuqui miʼ yʌl jiñi Biblia?
Bajcheʼ miʼ caj i tojʼan jiñi wocol chaʼan jaʼ
Jiñi Biblia miʼ tsictesan chaʼan cojach Dios miʼ mejlel i tojʼesan pejtelel jiñi wocol am bʌ ti pañimil, yaʼ ochen jiñi wocol chaʼan jaʼ. Waʼchocobil i chaʼan jumpʼejl Yumʌntel yaʼ ti panchan muʼ bʌ caj i mel i yeʼtel ila ti Lum, ili jiñʌch i Yumʌntel Dios (Daniel 2:44; Mateo 6:9, 10; Apocalipsis 11:15). Jiñi mi caj i jisan jiñi wocol chaʼan jaʼ maʼañic bʌ miʼ mejlel i tojʼesan juntiquil yumʌl ti pañimil.
Jiñi wocol: Ti caj ñoj qʼuextʌyemix jiñi clima, an i yʌcʼʌ chaʼan miʼ qʼuextʌyel jiñi i yorajlel jaʼal. Ti caj iliyi an i yʌcʼʌ chaʼan wen an jajmeñal o qʼuin tuñil yicʼot butʼjaʼlel, come cʌlʌxix jaʼal i an i tajol jaʼel miʼ cʼʌjquel jiñi mar.
Bajcheʼ mi caj i tojʼan: Jiñi i Yumʌntel Dios mi caj i chaʼ tojʼesan jiñi clima chaʼan weñix miʼ chaʼ ajñel ili Lum. Dios tsiʼ yʌlʌ: «¡Qʼuele! Woli c tsijibtesan pejtelel chuqui an» (Apocalipsis 21:5). Miʼ caj cabʌl jaʼ baqui tiquin lum, cheʼ jaʼel mi ca i mejlel ti chumtʌl majqui jach baqui maʼañic miʼ mejlel ili ora (Isaías 41:17-20). Jiñi i Yumʌntel Dios am bʌ tiʼ wenta Jesucristo, mi caj i mejlel i ticʼ jiñi icʼ jaʼal.
Cheʼ bʌ Jesús tsajñi ila ti pañimil tsaʼ mejli i ticʼ jiñi icʼ jaʼal. Ili tsaʼʌch i tsʼitaʼ pʌsʌ jiñi i pʼʌtʌlel tsaʼ bʌ i yʌqʼue Dios (Marcos 4:39, 41). Cheʼ bʌ miʼ mel i yeʼtel bajcheʼ Rey tiʼ Yumʌntel Dios ila ti pañimil maʼañix miʼ cajel jiñi icʼ jaʼal muʼ bʌ i yʌcʼ ti wocol lac piʼʌlob ili ora, miʼ cajel i sujm bʌ ñʌchʼtʌlel i maʼañix mi caj i bʌcʼñañob chaʼan miʼ tajtʌlob ti wocol tiʼ caj icʼ jaʼal.
Jiñi wocol: Tiʼ caj jiñi fabrica tac yicʼot jiñi lac piʼʌlob mach bʌ weñic chuqui miʼ melob, an i yʌcʼʌ chaʼan jiñi río, lago yicʼot jiñi jaʼ am bʌ tiʼ mal lum wen contaminadojix i maʼañix miʼ mejlel ti cʼʌjñel.
Bajcheʼ mi caj i tojʼan: Dios miʼ caj i sʌqʼuesan jiñi lum, río, lago yicʼot jiñi mar. Mi caj i chaʼ weñʼesan jiñi planeta, i jiñi Lum mi caj i sujtel ti jumpʼejl paraíso. Jiñi Biblia wen utsʼatax chuqui miʼ yʌl: «Ti jim bʌ ora jini tiquin bʌ lum mi caj i yubin i tijicñʌyel. Miʼ caj ti nich yaʼ baʼ jochol jini lum» (Isaías 35:1).
¿Chuqui mi caj i yujtel tiʼ tojlel jiñi maʼañic bʌ miʼ cʌntañob ili Lum yicʼot maʼañic bʌ miʼ chʼʌmob ti ñuc yambʌlob? Dios tsiʼ yʌlʌ chaʼan miʼ caj i «jisañob jiñi woli bʌ i jisañob pañimil» (Apocalipsis 11:18; Proverbios 2:21, 22).
Jiñi wocol: Jiñi quixtañujob cʌlʌxix miʼ cʼʌñob jaʼ i an mucʼ jach bʌ toʼol becʼob i tiʼ caj jiñi, maʼañix miʼ yʌqʼuen tiempo jiñi Lum chaʼan miʼ yocʼan ti jaʼ.
Bajcheʼ mi caj i tojʼan: Jiñi i Yumʌntel Dios miʼ caj i yʌcʼ chaʼan miʼ tsʼʌctiyel chuqui ñaʼtʌbil bʌ i chaʼan Dios ila ti pañimil, i mach jiñi chuqui yom bʌ lac piʼʌlob mucʼ jach bʌ i bajñel ñaʼtañob i bʌ (Mateo 6:9, 10). Jiñi i Yumʌntel Dios mi caj i cʌntesan ti wen jiñi muʼ bʌ caj i chumtʌlob ila ti Pañimil. Yaʼ ti Isaías 11:9 miʼ yʌl: «Mi caj i bujtʼel pañimil ti winicob xʼixicob muʼ bʌ i cʌñob lac Yum». Jiñi cʌntesʌntel yicʼot laj cʼuxbiya ti Dios, mi caj i mejlel laj cʌntan ti wen ili planeta yicʼot chuqui tac am bʌ.
Mi a wom a ñumen ñaʼtan chuqui mi caj i mel jiñi i Yumʌntel Dios, pejcan jiñi tema «¿Chuqui mi caj i mel jiñi i Yumʌntel Dios?»
¿A wom ba a ñaʼtan bajcheʼ yilal miʼ cajel ili Lum cheʼ jumpʼejlix paraíso? Pejcan jiñi Biblia ti capítulo 35 chaʼan Isaías.
Chaʼan maʼ ñumen cʌn chuqui mi caj i mel Dios ila ti Lum yicʼot tiʼ tojlel lac piʼʌlob, qʼuele jiñi video ¿Chucoch tsiʼ mele Dios ili Pañimil?