Photo by Zhai Yujia/China News Service/VCG via Getty Images
¡YOM CHɅN YɅXɅL LA CO!
Tsʌts bʌ butʼjaʼ | ¿Chuqui miʼ yʌl jiñi Biblia?
Tiʼ petol pañimil, yonlel lac piʼʌlob woli i ñusañob wocol tiʼ caj jiñi tsʌts bʌ butʼjaʼ. Qʼuele chuqui an i yʌlʌ jiñi noticia tac:
«Maxto wen jali, yaʼ ti China tsaʼ ñumi tsʌts bʌ butʼjaʼ. Añix 140 jab maʼañic baʼ ñumen bajcheʼ ili [...]. Ti sábado yicʼot ti miércoles cʌlʌxix tsiʼ chaʼle jaʼal (AP News, 2 de agosto chaʼan 2023).
«Yaʼ ti sur chaʼan Japón, woli i ñumel tsʌts bʌ icʼ jaʼal tiʼ caj jiñi tifón Khanun, ili jueves i chaʼpʼejlelix qʼuin woli i ñumel. Chaʼtiquilix lac piʼʌlob tsaʼ chʌmiyob. [...] I miʼ pijtʌntel chaʼan yaʼ ti Taiwan mi caj i bujtʼelob ti jaʼ lʌcʼʌ jumpʼejl metro tiʼ caj jiñi tifón» (Deutsche Welle, 3 de agosto chaʼan 2023).
«Jiñi butʼjaʼ tsaʼ bʌ ñumi ti [Nueva Escocia] am bʌ yaʼ ti Canadá, jiñʌch ñumen tsʌts bʌ tsaʼ ñumi, i añix 50 jab maʼañic ñumen bajcheʼ ili» (BBC News, 24 de julio chaʼan 2023).
¿Chuqui miʼ yʌl jiñi Biblia chaʼan jiñi woli bʌ i yujtel?
Jumpʼejlʌch señal chaʼan añoñixla ti «cojix tac bʌ qʼuin»
Jiñi Biblia miʼ tsictesan chaʼan ili ora chumuloñixla ti jiñi «cojix tac bʌ qʼuin» (2 Timoteo 3:1). Jesús tsiʼ wʌn alʌ chaʼan mi caj laj qʼuel «chuqui tac bʌbʌqʼuen bʌ» (Lucas 21:11). Come mach lajalix jiñi clima bajcheʼ ti wajali ili an i yʌcʼʌ chaʼan miʼ ñumen ujtel huracán, butʼjaʼ yicʼot yan tac bʌ.
Añʌch jumpʼejl lac pijtaya
Jiñi Biblia miʼ yʌl chaʼan pejtelel chuqui woli bʌ i yujtel miʼ yʌqʼueñonla lac ñop chaʼan añʌch jumpʼejl lac pijtaya. ¿Chucoch miʼ mejlel lac ñop? Come Jesús tsiʼ yʌlʌ: «Cheʼ bʌ mi laʼ qʼuel woliʼ yujtel tac iliyi, ñaʼtanla chaʼan lʌcʼʌlix jiñi i Yumʌntel Dios» (Lucas 21:31; Mateo 24:3).
Pejtelel chuqui woli bʌ i yujtel miʼ pʌs chaʼan mach jalix yom chaʼan jiñi i Yumʌntel Dios miʼ chʼʌm tiʼ wenta chaʼan maʼañix miʼ yʌcʼ wocol jiñi icʼ jaʼal (Job 36:27, 28; Salmo 107:29).
Mi a wom a ñumen cʌn chaʼan chuqui mi caj i mel jiñi i Yumʌntel Dios chaʼan miʼ tojʼesan ili pañimil, qʼuele jiñi tema «¿Majqui mi caj i coltan ili Lum?».