Woli i jilel bʌlñʌcʼʌl tiʼ petol pañimil tiʼ caj jiñi guerra yicʼot jiñi cambio climático | ¿Chuqui miʼ yʌl jiñi Biblia?

An baqui maʼañix woli i jastiyel jiñi bʌlñʌcʼʌl tac tiʼ caj jiñi guerra ti Ucrania yicʼot chaʼan jiñi cambio climático. Woli bʌ i ñumen ticʼlan iliyi, jiñʌch jiñi país tac baqui wocol miʼ tajob chuqui tac miʼ cʼuxob.

•  «Maʼañix woli i wen colel chuqui tac miʼ pʌjqʼuel i maʼañix woli i jastiyel jiñi bʌlñʌcʼʌl tac tiʼ caj jiñi guerra tac, jiñi cambio climático yicʼot chaʼan woli i wen letsel i tojol jiñi gasolina yicʼot yan tac bʌ wocol» (António Guterres, secretario general de las Naciones Unidas, 17 de julio chaʼan 2023).

• «Jiñi expertojob miʼ yʌlob chaʼan ñumen wocolix mi caj i tajtʌl chuqui tac miʼ cʼuxtʌl yicʼot mi caj i ñumen letsel i tojol tac come Rusia maʼañix mi caj i chʌn choc majlel jiñi bʌlñʌcʼʌl tac. I muʼ bʌ caj i ñumen ticʼlan iliyi, jiñʌch jiñi país tac bajcheʼ Africa yicʼot Oriente Medio» (Atalayar.com, 23 de julio chaʼan 2023).

Qʼuele chuqui miʼ yʌl jiñi Biblia chaʼan ili wocol yicʼot chuqui mi caj i yujtel ti talto bʌ qʼuin.

Jiñi Biblia tsiʼ wʌn alʌ chaʼan miʼ cajel wiʼñal

•  Jesús tsiʼ wʌn alʌ: «Mi caj i contrajin i bʌ jumpʼejl tejclum yicʼot yambʌ, jumpʼejl yumʌntel yicʼot yambʌ, miʼ cajel wiʼñal» (Mateo 24:7).

•  Ti jiñi libro chaʼan Apocalipsis, miʼ taj ti tʼan chʌntiquil cʼʌchʌloʼ bʌ ti caballo. Juntiquil miʼ lajintel bajcheʼ jiñi guerra i jiñi yambʌ juntiquil miʼ lajintel bajcheʼ jiñi wiʼñal. Jiñi profecía miʼ yʌl chaʼan mi caj i cʼotel i yorajlel chaʼan maʼañix mi caj i jastiyel jiñi bʌlñʌcʼʌl tac yicʼot chaʼan mi caj i wen letsel i tojol tac. «Cheʼ jiñi tsaʼ j qʼuele juncojt iʼicʼ bʌ caballo. Jiñi cʼʌchʌl bʌ yaʼi chucul i chaʼan jumpʼejl balanza. [...] tsaʼ cubi lajal bʌ bajcheʼ tʼan, tsaʼ bʌ i yʌlʌ: ‹Jumpʼejl litro trigo ti jumpʼejl denario yicʼot uxpʼejl litro cebada ti jumpʼejl denario›» (Apocalipsis 6:5, 6, Jiñi Biblia Traducción del Nuevo Mundo Mateo-Apocalipsis).

Ili ora woli i tsʼʌctiyel jiñi profecía muʼ bʌ i taj ti tʼan chaʼan jiñi wiʼñal. I jiñi Biblia miʼ yʌl chaʼan jiñʌch ti «jiñi cojix tac bʌ qʼuin» (2 Timoteo 3:1). Mi a wom a ñumen cʌn chaʼan «jiñi cojix tac bʌ qʼuin» yicʼot chaʼan jiñi cʼʌchʌloʼ bʌ ti caballo, qʼuele jiñi video Cheʼ ti 1914 tsaʼ qʼuextʌyi jiñi pañimil yicʼot pejcan jiñi tema «¿Qué representan los jinetes del Apocalipsis?».

¿Bajcheʼ miʼ coltañonla jiñi Biblia?

•  Jiñi Biblia miʼ yʌqʼueñonla ticʼojel tac muʼ bʌ i coltañonla mi wocol woli lac ñusan tiʼ caj woli i wen letsel i tojol chuqui tac mi laj cʼux o chaʼan woli i jilel jiñi bʌlñʌcʼʌl tac. Ti jiñi tema «¿Bajcheʼ mi lac mejlel ti chumtʌl mi tsʼitaʼ jach lac taqʼuin?» miʼ mejlel a taj ticʼojel tac muʼ bʌ i mejlel i coltañet.

•  Jiñi Biblia miʼ yʌl jaʼel chaʼan mi caj i jilel ili wocol. Miʼ yʌl chaʼan mi caj i cʼotel i yorajlel chaʼan «mi caj i yʌcʼ cabʌl i cuch jini cholel» i maʼañix majqui mi caj i ñusan wiʼñal (Salmo 72:16). Mi a wom a ñumen cʌn chaʼan ili utsʼatax bʌ pijtaya yicʼot chucoch miʼ mejlel lac ñop chaʼan mucʼʌch caj i tsʼʌctiyel, pejcan jiñi tema «Jumpʼejl i sujm bʌ pijtaya chaʼan miʼ tojʼan ili pañimil».