Cʌntʌbil miʼ mejlel i yubiñob i bʌ jiñi xʼixicob | ¿Chuqui miʼ yʌl jiñi Biblia?

«Cheʼ bʌ xchʼoconto jiñi queran jujumpʼejl qʼuin tsiʼ jatsʼʌyon i tiʼ subeyon tsʌts tac bʌ tʼan. I cheʼ bʌ tsaʼ ñujpuñiyon jiñi c suegra tsiʼ wen ticʼlayon jaʼel. Jiñi c suegro yicʼot c suegra tsiʼ ticʼlayoñob bajcheʼ juntiquil xyaj eʼtel. Tsaʼ c ñaʼta c tsʌnsan c bʌ» (Madhu,a India).

Jiñi Organización Mundial de la Salud miʼ yʌl chaʼan «tiʼ petol pañimil miʼ ticʼlʌntel jiñi xʼixicob». Cheʼ jaʼel, miʼ yʌl chaʼan ti uxtiquil xʼixicob an juntiquil jajtsʼem bʌ, tsaʼ bʌ subenti tsʌts bʌ tʼan o tsaʼ bʌ ticʼlʌnti.

Mi an a ñusa bajcheʼ iliyi, tajol maʼ bʌcʼñan chaʼan baqui jach maʼ majlel miʼ mejlel i jatsʼetob, i subeñetob tsʌts bʌ tʼan o i ticʼlañetob. Tajol maʼ ñaʼtan chaʼan maʼañix miʼ wen qʼuejlel ti ñuc jiñi xʼixicob come cabʌl jax chuqui miʼ tumbentelob yicʼot miʼ wen ticʼlʌntelob. Pero ¿muʼ ba i qʼuel ti ñuc Dios jiñi xʼixicob?

¿Bajcheʼ yilal miʼ qʼuel Dios jiñi xʼixicob?

Texto: «Tsiʼ mele winic yicʼot xʼixic» (Génesis 1:27).

I tsictesʌntel: Dios tsiʼ mele jiñi wiñic yicʼot jiñi xʼixic, i yom chaʼan junlajal miʼ qʼuejlelob ti ñuc. Cheʼ jaʼel, yom chaʼan jiñi wiñic miʼ cʼuxbin i yijñam cheʼ bajcheʼ miʼ bajñel cʼuxbin i bʌ, pero mach yomic miʼ junyajl wentajin, mi yomicto miʼ jatsʼ o miʼ suben tsʌts bʌ tʼan chaʼan miʼ ñop i mʌctan (Efesios 5:33; Colosenses 3:19). Tsiquil chaʼan Dios yom chaʼan jiñi xʼixicob cʌntʌbil miʼ yubiñob i bʌ.

«Cheʼ bʌ alʌ xchʼoconto, chaʼtiqui uxtiquil tic familia tsiʼ wersa piʼleyoñob. Cheʼ bʌ 17 c jabilel jiñi c patrón tiʼ subeyon chaʼan mi maʼañic mic wʌyel quicʼot mi caj i chocon loqʼuel ti queʼtel. I cheʼ bʌ añix c jabilel, jiñi c ñoxiʼal, jiñi c papá, jiñi c mamá yicʼot jiñi c vecinojob maʼañic j cʼʌjñibal tsiʼ qʼueleyoñob. Pero ti wiʼil tsaʼ j cʌñʌ Jehová,b jiñi tsaʼ bʌ i meleyonla. Tsaʼ j cʌñʌ chaʼan mucʼʌch i qʼuel ti ñuc jiñi xʼixicob, i jiñi tsiʼ yʌqʼueyon c ñop chaʼan miʼ cʼuxbiñon yicʼot chaʼan mucʼʌch i qʼuelon ti ñuc» (María, Argentina).

¿Chuqui miʼ mejlel i coltañet a cuch jiñi tsaʼ bʌ a ñusa?

Texto: «An muʼ bʌ i cʼuxbiñonla ti isujm ñumen bajcheʼ lac piʼʌlob» (Proverbios 18:24).

I tsictesʌntel: Juntiquil i sujm bʌ amigo o amiga mi caj i wen coltañet. Mi mucʼʌch i coltañet maʼ wubin cheʼ maʼ wʌl chuqui woli a ñusan, suben juntiquil muʼ bʌ a ñop tiʼ tojlel.

«20 jab maʼañic majqui tsaʼ c sube chaʼan tsaʼ ticʼlʌntiyon ti wajali. Mach tijicñayoñic, i tsiʼ tajayon ansiedad yicʼot depresión. Pero cheʼ bʌ an majqui tsaʼ c sube i tsiʼ wen ñʌchʼtayon, lajal bajcheʼ maʼañix j cuch tsaʼ cubi» (Elif, Turquía).

Texto: Yom mi «laʼ wʌcʼ pejtelel chuqui mi laʼ cʼojoʼtan tiʼ tojlel, come Dios mucʼʌch i ñaʼtañetla» (1 Pedro 5:7).

I tsictesʌntel: Cheʼ bʌ maʼ pejcan Dios, mucʼʌch i ñʌchʼtañet (Salmo 55:22; 65:2). Dios miʼ wen cʼuxbiñet, jin chaʼan yom i coltañet a qʼuel chaʼan ñucʌch a cʼʌjñibal.

«Cheʼ tsaʼ j cʌñʌ Jehová tsiʼ coltayon chaʼan miʼ ñumel majlel jiñi c chʼijyemlel tiʼ caj tsaʼ bʌ c ñusa. Waʼli miʼ mejlel c pejcan Dios chaʼan mic suben pejtelel chuqui an tic pusicʼal. Lajalʌch bajcheʼ juntiquil camigo muʼ bʌ i wen chʼʌmben i sujm bajcheʼ yubil mi cubin» (Ana, Belice).

¿Muʼ ba caj i jisan Dios ti jumpʼejl bʌ qʼuin i ticʼlʌntel xʼixicob?

Texto: «Toj mi caj a mel jini mebaʼ alʌlob yicʼot jini ticʼlʌbiloʼ bʌ chaʼan maʼanix majch miʼ chʌn mejlel i bʌcʼtesañob ti pañimil» (Salmo 10:18).

I tsictesʌntel: Tsʼitaʼ jax yom chaʼan Jehová miʼ jisan jiñi mach tac bʌ weñic, cheʼ bajcheʼ jiñi jontolil yicʼot i ticʼlʌntel jiñi xʼixicob.

«Miʼ wen coltañon cheʼ cujil chaʼan tsʼitaʼ jachix yom chaʼan Jehová miʼ jisan jiñi i ticʼlʌntel xʼixicob. An i yʌqʼueyon c ñʌchʼtʌlel» (Roberta, México).

Mi a wom a ñumen cʌn jiñi pijtaya muʼ bʌ i yʌcʼ jiñi Biblia, chucoch miʼ mejlel a ñop muʼ bʌ i yʌl yicʼot bajcheʼ jiñi i testigojonbʌlon Jehová mi lon j cʼʌn jiñi Biblia chaʼan mi lon j coltan yambʌlob, cʼajtin chaʼan maʼ julaʼtʌntel.

Chaʼlen ti descargar chaʼan maʼ chaʼlen ti imprimir.