¿Am ba jumpʼejl yumʌntel wem bʌ miʼ mel i yeʼtel ila ti pañimil? | ¿Chuqui miʼ yʌl jiñi Biblia?

Jiñi yumʌlob am bʌ ti pañimil añob i wocol anquese lon wen woliʼ melob i yeʼtel yilal. Cabʌl chuqui mach bʌ weñic miʼ yʌjlel tiʼ tojlelob, miʼ tejchel cabʌl jontolil i an tac tʼox bʌ tiʼ caj política.

Jiñi Biblia miʼ yʌl chaʼan añʌch jumpʼejl yumʌntel junyajl wem bʌ mi caj i mel i yeʼtel. Tajol añix a wubi iliyi. Jiñʌch jiñi i yumʌntel Jesucristo muʼ bʌ i yʌjlel ti jiñi oración padrenuestro.

«Cheʼ yom mi laʼ chaʼlen oración bajcheʼ ili: ‹C Tat lojon añet bʌ ti panchan, laʼ sʌqʼuesʌntic a cʼabaʼ. Laʼ tilic a Yumʌntel. Laʼ mejlic chuqui a wom wʌʼ ti lum cheʼ bajcheʼ yaʼ ti panchan» (Mateo 6:9, 10).

¿Chuqui miʼ yʌl jiñi Biblia chaʼan ili Yumʌntel?

Jiñi Yumʌntel wen mi caj i mel i yeʼtel

Jiñi i Yumʌntel Dios an ti panchan.

Jesús tsiʼ taja ti tʼan bajcheʼ «jiñi i Yumʌntel panchan» (Mateo 4:17; 5:3, 10, 19, 20). Jin chaʼan tsiʼ yʌlʌ: «Jiñi c Yumʌntel mach i chaʼañic ili pañimil» (Juan 18:36).

Jiñi i Yumʌntel Dios mi caj i jisan jiñi yumʌlob ti pañimil.

Jiñi Biblia miʼ yʌl chaʼan ili Yumʌntel «mi caj i laj jisan pejtel jini yumʌlob. Mi caj i yajñel tiʼ pejtelel ora» (Daniel 2:44).

Jiñi Yumʌntel am bʌ tiʼ wenta Jesucristo maʼañic mi caj i jisʌntel.

Jiñi Biblia miʼ yʌl: «An i pʼʌtʌlel tiʼ pejtelel ora. Maʼanic miʼ caj ti jilel i yumʌntel» (Daniel 7:13, 14).

Jiñi i Yumʌntel Dios mi caj i chʼʌm tilel ñʌchʼtʌlel ila ti pañimil.

Jiñi Biblia miʼ yʌl: «Jujuntiquil mi caj i yajñel tiʼ yotot tiʼ ñʌchʼtʌlel i pusicʼal. Maʼanic majch mi caj i bʌcʼtesan» (Miqueas 4:4).

Ñumen cʌñʌ chaʼan jiñi i Yumʌntel Dios

Cheʼ bʌ Jesús tsajñi ila pañimil «tiʼ subu ñumel jiñi wen tʼan chaʼan Yumʌntel» (Mateo 9:35). Cheʼ jaʼel tsiʼ wʌn alʌ:

«Jiñi wen tʼan chaʼan bʌ Yumʌntel mi caj i sujbel tiʼ pejtelel pañimil chaʼan miʼ yubiñob jiñi tejclum tac, cheʼ jiñi mi caj i tilel jiñi i jilibal» (Mateo 24:14).

Ili ora woliʼ sujbel jiñi wen tʼan chaʼan i Yumʌntel Dios ñumen ti 240 país yicʼot territorio tac. ¿Chuqui ti bendición tac mi caj i chʼʌm tilel ili Yumʌntel? ¿Bajcheʼ miʼ mejlel i coltañet? Ñumen cʌñʌ chaʼan ili Yumʌntel.

Qʼuele jiñi video ¿Chuqui jiñi i yumʌntel Dios?