Cʌntesʌntel 3

I tejchibal winicob xʼixicob

¿CHUQUI qʼuexel ila ti dibujo? Jiñʌch, jini winic yicʼot xʼixic. Jiñobʌch ñaxam bʌ tsaʼ mejliyob. ¿Majqui tsiʼ meleyob? Dios. ¿Awujil ba chuqui i cʼabaʼ? Jiñʌch Jioba. Jini winic yicʼot xʼixic tsaʼ otsʌbentiyob i cʼabaʼ Adán yicʼot Eva.

Jioba Dios cheʼ tsiʼ mele Adán bajcheʼ ili: tsiʼ chʼʌmʌ tsʼubejn chaʼan miʼ melben i cuctal mach bʌ xmulilic jini winic. Cheʼ jini tsiʼ wujtʌbe i ñiʼ jini winic, Adán tsaʼ cuxtʌyi.

Dios tsiʼ yʌqʼue jumpʼejl eʼtel jini Adán. Tsiʼ sube chaʼan mi yotsʌben i cʼabaʼ ti chajp ti chajp bʌ jini añimal tac. Adán tajol jal tsiʼ ñaxan cʌñʌ jini añimal tac chaʼan mi yotsʌben i cʼabaʼ ti pejtelel. Cheʼ woli to i mel Adán iliyi, an chuqui tsaʼ caji i cʌn. ¿Awujil ba chuqui jini?

Jini añimal tac ti chaʼchaʼcojt añob. Jini tsimin an i tat yicʼot i ñaʼal, yicʼot jini bajlum an i tat yicʼot i ñaʼal. Pero Adán maʼanic i piʼʌl. Jini chaʼan, Jioba tsiʼ yotsʌbe tam bʌ i wʌyel jini Adán, tsiʼ locʼsʌbe ti junwejl juntsʼijt bʌquel i chʼilʼat. Yicʼot ili chʼilʼat, Jioba tsiʼ melbe Adán juntiquil xʼixic chaʼan ti yijñam.

¡Wʌle wen tijicña tsaʼ yubi jini Adán! ¡Yicʼot jaʼel melelʌch wen tijicña tsiʼ yubi jini Eva cheʼ yaʼan ti wen i tʼojol jax bʌ pʌcʼʌbʌl chaʼan miʼ chumtʌl! Wʌle miʼ mejlelob ti pʼojlel yicʼot chaʼan temel miʼ chumtʌlob tiʼ tijicñʌyel.

Jioba yom tsiʼ yʌlʌ chaʼan jini Adán yicʼot Eva miʼ chumtʌlob ti pejtelel ora. Yom tsiʼ yʌlʌ chaʼan tiʼ pejtelel jini Pañimil miʼ sujtesañob ti wen i tʼojol jax bʌ ajñibʌl cheʼ bajcheʼ yaʼ ti pʌcʼʌbʌl i cʼabaʼ Edén. ¡Tajol wen tijicña tsiʼ yubi jini Adán yicʼot Eva cheʼ tsiʼ ñaʼtayob chaʼan miʼ melob jini! ¿Tsaʼ ba a mula tsaʼic aqʼuentiyet chaʼan maʼ mel jini Pañimil ti tʼojol jax bʌ pʌcʼʌbʌl? Pero i tijicñʌyel jini Adán yicʼot Eva maʼanic tsaʼ jalʼa. Laʼ laj qʼuel chucoch.

Salmo 83:18, TNM; Génesis 1:26-31; 2:7-25.