Ñumen weñʼesan a subtʼan: Teche a pejcan jiñi quixtañujob chaʼan maʼ suben jiñi wen tʼan

Jesús tsaʼ mejli i suben wen tʼan jiñi samaritana come tiʼ teche i pejcan. ¿Bajcheʼ miʼ mejlel lac tech lac pejcan jiñi mach bʌ laj cʌñʌyic?

• Yom wen jach maʼ pejcañob. Anquese Jesús lujbeñix, tsaʼ caji i pejcan tsaʼ bʌ i taja. ¿Bajcheʼ tsiʼ mele? Tsaʼ jach i cʼajti jaʼ chaʼan miʼ jap. Jatet miʼ mejlel a tech a cʼajtiben bajcheʼ yilal, o maʼ wʌl chaʼan wen qʼuexelix ili ora, an qʼuiñil jaʼal o ticwal, o maʼ wʌl chuqui tsaʼ bʌ ujti maxto bʌ jali. Jiñi la com bʌ jiñʌch mi lac chaʼlen tʼan la quicʼot jiñi quixtañujob, jin chaʼan laʼ la cʌl temaj tac muʼ bʌ i mulan. Mi mach cheʼic tsiʼ jacʼʌ bajcheʼ a wom, mach a pensalin. Chaʼ ñopo a pejcan yambʌ. Cʼajtiben a chʼejlel Jehová (Neh. 2:4; Hch. 4:29).

• Mi tsaʼ cʼoti i yorajlel chaʼan maʼ sub chaʼan bʌ Yumʌntel, yom chajpʌbilet pero mach ti orajic maʼ mel. Mele cheʼ bajcheʼ jach ñʌmʌlet ti tʼan. Cheʼ mi caj lac wersa pejcan jiñi quixtañujob, tajol maʼix mi caj i mulan i miʼ tucʼob lac tʼan. Mach a pensalin mi maʼañix tsaʼ mejli a suben jiñi quixtañu i chaʼan bʌ Jehová. Mi wocol maʼ tech subtʼan, ñaxan teche a pejcan jiñi quixtañujob i maxto chaʼan maʼ chaʼlen subtʼan. [Pʌsʌ jiñi video 1 i tsajin a wicʼot yaʼ bʌ tempʌbilob].

• Teche a wʌl jiñi a ñopoñel chaʼan maʼ sʌclan bajcheʼ yom maʼ tech subtʼan, tajol jiñi quixtañu miʼ ñijcʌyel i pusicʼal i mi caj i tech i melbeñet cʼajtiya. Cheʼʌch tsiʼ mele Jesús, i jiñi xʼixic tsaʼ caji i mel cʼajtiya come an chuqui tsaʼ caji i mulan i ñaʼtan. Cheʼ bʌ Jesús tiʼ sube chaʼan bʌ Yumʌntel, woli jach i jacʼben tsaʼ bʌ i cʼajti jiñi xʼixic. [Pʌsʌ jiñi video 2 i tsajin a wicʼot yaʼ bʌ tempʌbilob, cheʼ yom maʼ mel jaʼel yicʼot jiñi video 3].