¿Bajcheʼ yom mi lac mel oración chaʼan Dios miʼ ñʌchʼtañonla?

LAʼ LAC MELBEN ORACIÓN JEHOVÁ TIʼ CʼABAʼ JESÚS

«Pejtelel chuqui mi laʼ cʼajtiben c Tat tij cʼabaʼ, mi caj i yʌqʼueñetla» (Juan 16:23).

Jiñi tsaʼ bʌ i yʌlʌ Jesús miʼ cʌntesañonla chaʼan Jehová mach yomic cheʼ mi laj cʼʌn imagen tac, santo tac, ángelob o lac familia tsaʼix bʌ chʌmiyob (sajtiyob) cheʼ bʌ mi lac mel oración. Pero chaʼan yomʌch mi lac melben tiʼ cʼabaʼ Jesús. Cheʼ bʌ mi lac mel oración tiʼ cʼabaʼ Jesús, mi lac pʌsben Jehová chaʼan la cujilʌch chaʼan mucʼʌch i ñʌchʼtañonla come Jesús tsiʼ yʌcʼʌ i cuxtʌlel chaʼañonla. Jesús tsiʼ yʌlʌ: «Maʼanic majch miʼ cʼotel baʼan c Tat, jini jach am bʌ tic wenta» (Juan 14:6).

LAʼ LAC MEL ORACIÓN LOQʼUEM BɅ TI LAC PUSICʼAL

Suben «Dios ti wocol tʼan pejtel chuqui wolaʼ ñaʼtan ti a pusicʼal» (Salmo 62:8).

Cheʼ bʌ mi lac melben oración Jehová, yom mi lac mel cheʼ bajcheʼ woli (choncol) lac pejcan juntiquil tatʌl muʼ bʌ i wen cʼuxbiñonla. Cheʼ jaʼel, yom loqʼuem ti lac pusicʼal yicʼot yom mi lac pʌs chaʼan mi laj qʼuel ti ñuc, i mach yomic mi lac pejcan jiñi oración ti jumpʼejl libro o mi la cʌl jiñi wʌn ñaʼtʌbilix bʌ lac chaʼan.

LAʼ LAJ CʼAJTIBEN DIOS JIÑI MUʼ BɅ I MULAN

«La cujil miʼ yubibeñonla chuqui jach mi laj cʼatiben cheʼ bajcheʼ yom i pusicʼal» (1 Juan 5:14).

Jiñi Biblia miʼ subeñonla muʼ bʌ caj i mel Dios ti lac tojlel yicʼot muʼ bʌ i pijtan chaʼan mi lac mel tiʼ tojlel. Chaʼan miʼ ñʌchʼtan Dios jiñi la coración, yom mi laj cʼajtiben «cheʼ bajcheʼ yom i pusicʼal». Jin chaʼan, yom mi lac pejcan jiñi Biblia chaʼan miʼ mejlel lac ñaʼtan chuqui yom Jehová. Cheʼ bajcheʼ iliyi, mucʼʌch caj i wen ñʌchʼtañonla.

¿CHUQUI TAC MIʼ MEJLEL LAJ CʼAJTIN TI ORACIÓN?

Laʼ laj cʼajtin i cʼʌjñibal bʌ lac chaʼan. Miʼ mejlel laj cʼajtiben Jehová chaʼan miʼ yʌqʼueñonla jiñi i bʌl lac ñʌcʼ, jiñi lac pislel o baqui mi lac chumtʌl. Miʼ mejlel laj cʼajtiben jaʼel chaʼan miʼ coltañonla lac ñaʼtan chuqui yom mi lac mel yicʼot chaʼan miʼ yʌqʼueñonla lac pʼʌtʌlel chaʼan mi lac lʌtʼ jiñi wocol tac. Cheʼ jaʼel, laʼ laj cʼajtiben chaʼan miʼ ñusʌbeñonla lac mul, chaʼan miʼ ñumen pʼʌtʼesan lac ñopoñel yicʼot chaʼan miʼ ñumen cʌntañonla (Lucas 11:3, 4, 13; Santiago 1:5, 17).

Laʼ lac mel oración tiʼ tojlel yañoʼ bʌ. Jiñi wem bʌ tatʌlob yomob chaʼan jiñi i yalobilob miʼ cʼuxbiñob i bʌ. Jehová jiñʌch lac Tat, i yom chaʼan mi laj cʌntan lac bʌ ti jujuntiquil. Wen ñuc i cʼʌjñibal cheʼ bʌ mi lac tajob ti oración jiñi lac ñoxiʼal o la quijñam, jiñi la calobilob yicʼot jiñi la camigojob. Jiñi xcʌntʼan Santiago tsiʼ yʌlʌ: «Taja laʼ bʌ ti oración» (Santiago 5:16).

Laʼ la cʌqʼuen wocolix i yʌlʌ Dios. Jiñi Biblia miʼ yʌl chaʼan Dios cabʌl chuqui wem bʌ tsiʼ yʌqʼueyonla: «Tsiʼ yʌqʼueyonla jaʼal tilem bʌ ti panchan yicʼot cʼajbal chaʼan mi lac ñajʼan. Tsiʼ tijicñesʌbeyonla lac pusicʼal» (Hechos 14:17). Cheʼ bʌ mi lac ñaʼtan pejtelel tsaʼ bʌ i yʌqʼueyonla Dios, mi caj i ñijcan lac pusicʼal chaʼan mi la cʌqʼuen wocolix i yʌlʌ. Cheʼ jaʼel, yom mi la cʌqʼuen wocolix i yʌlʌ chaʼan jiñi mandar tac tsaʼ bʌ i yʌqʼueyonla (Colosenses 3:15).

MACH LAJ CɅY LAC MEL ORACIÓN

An i tajol mi la cubin lac chʼijyemlel cheʼ mach orajic mi lac jacʼbentel la coración. ¿Yom ba i yʌl ili chaʼan Dios maʼañic miʼ qʼuelonla ti ñuc? ¡Maʼañic! Laʼ laj qʼuel ejemplo tac muʼ bʌ i pʌsbeñonla chaʼan mach yomic mi lac lujbʼan lac mel oración.

Ti jiñi ñaxam bʌ artículo tsaʼ lac taja ti tʼan Steve. Miʼ bej subeñonla tsaʼ bʌ i ñusa: «Cheʼ machic tsaʼ c mele oración, añix ora tsaʼ c sʌtʌ jiñi pijtaya chaʼan mic chaʼ taj c tijicñʌyel». ¿Chuqui tsiʼ colta Steve? Tsaʼ caji i chʼʌm estudio i tsaʼ cʼoti i cʌn chaʼan mach yomic miʼ cʌy i mel oración. Steve miʼ chaʼ al: «Mi cʌqʼuen wocolix i yʌlʌ Dios chaʼan jiñi coltaya yicʼot cʼuxbiya muʼ bʌ i pʌsbeñoñob jiñi camigojob. Ili ora ñumen tijicñayon».

¿I chuqui tsaʼ ujti tiʼ tojlel Jenny tsaʼ bʌ i yʌlʌ chaʼan mach i wentʌlelic miʼ ñʌchʼtʌbentel i yoración ti Dios? Jenny miʼ yʌl: «Cheʼ bʌ maʼañix j cʼʌjñibal mi cubin c bʌ, mij cʼajtibe Dios ti wocol tʼan chaʼan miʼ coltañon c chʼʌmben i sujm chucoch cheʼ mi cubin c bʌ bajcheʼ ili». ¿Bajcheʼ tsiʼ colta jiñi oración? Miʼ yʌl: «Cheʼ bʌ mic pejca Dios ti oración miʼ coltayon j qʼuel bʌ cheʼ bajcheʼ miʼ qʼuelon. Tsaʼ j qʼuele jaʼel, chaʼan cheʼ bʌ jiñi c pusicʼal miʼ yʌl chaʼan mach weñic chuqui woli (yʌquel) c mel, Dios mach cheʼic miʼ mel. Cheʼ jaʼel, tsiʼ coltayon chaʼan maʼañic mij cʼunʼan». ¿Chuqui ti wenlel tsiʼ taja Jenny? Miʼ yʌl: «Jiñi oración tsiʼ coltayon j qʼuel chaʼan Jehová jiñʌch wem bʌ camigo, jiñʌch juntiquil wem bʌ Tatʌl yicʼot jiñʌch jiñi i sujm bʌ Dios. Tiʼ pejtelel ora mi caj i yajñel quicʼot, yicʼot mi caj i coltañon miʼ mucʼʌch c mel muʼ bʌ i mulan».

Wʌle laʼ laj qʼuel chuqui tsaʼ ujti tiʼ tojlel Isabel. Cheʼ bʌ cʌntʌbil i chaʼan i yalobil, jiñi doctorob tsiʼ subeyob chaʼan an i cʼamʌjel mi caj i yilan pañimil (chʼocʼan) jiñi i yalobil. Ili tsaʼʌch i wen aqʼue i chʼijyemlel. An tsaʼ bʌ i subeyob chaʼan miʼ chaʼlen ti abortar. Isabel miʼ yʌl: «Ti jimbʌ ora tsaʼ cubi chaʼan mi caj i tsʌnsañon jiñi chʼijyemlel». Pero ¿chuqui tsiʼ mele Isabel? Miʼ yʌl: «Maʼañic tsaʼ j cʌyʌ j cʼajtiben Dios chaʼan miʼ coltañon». Ti wiʼil, tsiʼ yila pañimil jiñi i yalobil, Gerard. I cheʼ bajcheʼ tsiʼ subeyob jiñi doctorob, cʼamʌch tsiʼ yila pañimil. ¿Tsaʼ ba i yubi Isabel chaʼan Dios tsaʼʌch i jacʼbe i yoración? ¡Tsaʼʌch! ¿I bajcheʼ tsaʼ jacʼbenti? Isabel miʼ yʌl: «Añix ñumen 14 jab, i jiñi calobil Gerard jiñʌch ñuc bʌ bendición am bʌ c chaʼan. Cheʼ bʌ mij qʼuel jiñi calobil chaʼan wen tijicña anquese cʼam, mij qʼuel chaʼan jiñʌch i jacʼbal coración».

Jiñi tsaʼ bʌ i yʌlʌ Isabel miʼ cʼajtesʌbeñonla tsaʼ bʌ i yʌlʌ jiñi salmista: «Tsaʼix a wubi chuqui yom jini uts bʌ. Wolaʼ xucʼchocoben i pusicʼal. Wolaʼ wen ubiben i tʼan» (Salmo 10:17). ¿Mach ba muqʼuic i yʌqʼueñonla lac ñaʼtan iliyi chaʼan mach yomic mi laj cʌy lac mel oración?

Ti jiñi Biblia mi lac taj cabʌl oración tsaʼ bʌ i mele Jesús. Jiñi ñumen cʌmbil bʌ jiñʌch jiñi padrenuestro tsaʼ bʌ i cʌntesa jiñi xcʌntʼañob i chaʼan. ¿Chuqui mi laj cʌn ti jiñi oración?