Bajcheʼ mi lac mejlel ti sujtel ti wem bʌ amigo

¿AM BA a ñusa jumpʼejl wocol i tsaʼ qʼuele chaʼan maʼañic majqui tsiʼ coltayet? Chumulonla ti cojix bʌ qʼuin, baqui wen an wocol yicʼot bʌbʌqʼuen, ili miʼ mejlel i yʌqʼueñonla la cubin lac chʼijyemlel yicʼot chaʼan lac bajñel jach. Pero mach lac bajñelic yom mi lac ñusan ili wocol tac (2 Tim. 3:1). Jiñi Biblia miʼ yʌl chaʼan miʼ mejlel lac taj i sujm bʌ la camigojob cheʼ tiʼ yorajlel wocol (Pr. 17:17).

¿BAJCHEʼ MIʼ COLTAÑOB I BɅ JIÑI I SUJM BɅ AMIGOJOB?

Cheʼ bʌ jiñi apóstol Pablo an bajcheʼ misionero, tsiʼ chaʼle xʌmbal yicʼot i yamigojob i tsaʼʌch i wen coltayob (Col. 4:​7-11). Cheʼ bʌ Pablo tsaʼ chujqui majlel ti Roma, jiñi i yamigojob tsaʼʌch i wen coltayob come maʼañic chuqui miʼ mejlel i wen mel. Jumpʼejl ejemplo, Epafrodito tsaʼ majli i yʌqʼuen chuqui i cʼʌjñibal i chaʼan cheʼ bʌ jiñi hermanojob ti Filipos tsiʼ chocoyob majlel (Filip. 4:18). Tíquico tsiʼ pucu ñumel jiñi carta tsaʼ bʌ i tsʼijbu Pablo chaʼan jiñi congregación tac (Col. 4:7).a Jiñi i yamigojob tsaʼʌch i wen coltayob chaʼan miʼ mejlel i bej tsʼʌctesan i yeʼtel cheʼ bʌ tsaʼ cʌjchi i tsaʼ otsʌnti ti cárcel. Ixcu joñonla, ¿bajcheʼ mi lac mejlel ti sujtel ti wem bʌ amigo?

Ili ora cabʌl hermanojob miʼ pʌsob chaʼan wem bʌ amigojob. Laʼ laj qʼuel tsaʼ bʌ ujti tiʼ tojlel Elísabet, juntiquil precursora regular am bʌ ti España. Cheʼ bʌ jiñi i mamá tsaʼ tajbenti cáncer, juntiquil hermana tsiʼ pʌsʌ chaʼan wem bʌ amiga cheʼ tsiʼ chocbe majlel mensaje tac yicʼot texto tac. Elísabet miʼ yʌl: «Cheʼ bʌ tsaʼ j qʼuele jiñi mensaje tijicña tsaʼ cubi i tsaʼ c ñaʼta chaʼan mach c bajñelic. Jiñi tsiʼ yʌqʼueyon c pʼʌtʌlel chaʼan miʼ mejlel c ñusan lojon majlel jiñi wocol» (Pr. 18:24).

Mi lac mejlel ti ajñel ti ñumen lʌcʼʌl yicʼot jiñi hermanojob cheʼ mi laj coltañob chaʼan miʼ melbeñob i yeʼtel Jehová. Jumpʼejl ejemplo, an hermanojob ñoxobix bʌ muʼ bʌ mejlel lac majlel lac tajob chaʼan miʼ majlelob ti tempa bʌ o ti subtʼan. Jiñi miʼ mejlel i yʌqʼueñob i tijicñʌyel (Rom. 1:12). Pero an hermanojob mach bʌ añic miʼ mejlelob ti loqʼuel tiʼ yotot, ¿muʼ ba lac mejlel ti sujtel ti wem bʌ i yamigojob?

LAʼ SUJTICONLA TI WEM BɅ I YAMIGOJOB JIÑI MACH BɅ AÑIC MIʼ MEJLELOB TI LOQʼUEL TIʼ YOTOT

An hermanojob mach bʌ añic miʼ mejlelob ti loqʼuel chaʼan cʼamob o tiʼ caj yan tac bʌ. Jiñʌch tsaʼ bʌ ujti tiʼ tojlel David, tsaʼ bʌ tajbenti cáncer i ñumen ti seis mes tsiʼ chʼʌmʌ quimioterapia. David yicʼot i yijñam tsaʼ jach i chaʼleyob i bʌ ti conectar ti tempa bʌ tac.

¿Bajcheʼ tsiʼ coltayob jiñi hermanojob añoʼ bʌ tiʼ congregación? Cheʼ bʌ miʼ yujtel jiñi tempa bʌ, jiñi hermanojob miʼ chaʼleñob ti saludar anquese añob jach ti videoconferencia. Cheʼ bʌ David yicʼot Lidia miʼ yʌcʼob i comentario, jiñi hermanojob miʼ chocbeñob majlel mensaje tac muʼ bʌ i yʌqʼueñob i tijicñʌyel. ¿Bajcheʼ tsiʼ coltayob iliyi? David yicʼot Lidia tsiʼ yubiyob chaʼan mucʼʌch i cʼuxbintelob tiʼ yamigojob.

¿Ixcu cheʼ muqʼuic lac chaʼlen subtʼan yicʼotob jiñi mach bʌ añix miʼ mejlelob ti loqʼuel? Cheʼ mi lac mel bajcheʼ ili, mi lac pʌsbeñob chaʼan maʼañic ñajʌyemob lac chaʼan (Pr. 3:27). Mi lac mejlel lac chaʼlen subtʼan yicʼotob ti carta o ti llamada. Cheʼ jaʼel, jiñi ancianojob miʼ mejlel i yʌlob chaʼan miʼ mejlel i chaʼleñob i bʌ ti conectar ti videoconferencia ti jiñi tempa bʌ chaʼan subtʼan jiñi mach bʌ añic miʼ mejlelob ti loqʼuel. David yicʼot Lidia tsaʼʌch i wen qʼueleyob ti ñuc cheʼ bʌ tsiʼ meleyob jiñi i congregación bajcheʼ ili. David miʼ yʌl: «Cheʼ tsaʼ c chaʼle lon c bʌ ti conectar yicʼot jiñi lon j grupo chaʼan subtʼan, cheʼ tsaʼ pejcʌnti jiñi texto yicʼot tsaʼ mejli jiñi oración tsaʼʌch i wen coltayon lojon». Mi an juntiquil lac estudiante, ¿ixcu cheʼ mi lac suben chaʼan miʼ mejlel lac bixel aqʼuen estudio tiʼ yototob jiñi hermanojob mach bʌ añix miʼ mejlelob ti loqʼuel? Pero yomʌch mi lac ñaxan cʼajtibeñob mi mucʼʌch i mejlel lac pʌyob majlel jiñi lac estudiante.

Cheʼ bʌ mi la cajñel yicʼot jiñi hermanojob mach bʌ añix miʼ mejlelob ti loqʼuel, mi caj laj qʼuel jiñi wen tac bʌ i melbalob yicʼot mi caj i sujtelob ti wem bʌ la camigojob. Jumpʼejl ejemplo, cheʼ mi laj qʼuel bajcheʼ miʼ cʼʌñob jiñi Biblia chaʼan miʼ coltañob yambʌlob chaʼan miʼ lʌcʼtesañob i bʌ ti Jehová, mi caj lac ñumen qʼuelob ti ñuc. Cheʼ mi laj coltan ili hermanojob mi lac sujtel tiʼ yamigojob (2 Cor. 6:13).

Pablo tsaʼʌch i wen aqʼue i tijicñʌyel cheʼ bʌ Tito maʼañic tsiʼ bajñel cʌyʌ i tsiʼ pʌsʌ chaʼan wem bʌ amigo (2 Cor. 7:​5-7). Ili miʼ cʼajtesʌbeñonla chaʼan mach cojach ti lac tʼan miʼ mejlel lac tijicñesan jiñi la camigojob, jiñʌch cheʼ yaʼan la quicʼotob o an chuqui mi lac mel tiʼ tojlelob (1 Juan 3:18).

LAʼ LAC PɅS CHAʼAN WEM BɅ AMIGOJONLA CHEʼ AN CONTRAJINTEL

Jiñi hermanojob ti Rusia miʼ pʌsob wem bʌ ejemplo chaʼan bajcheʼ miʼ coltañob i bʌ. Laʼ laj qʼuel tsaʼ bʌ ujti tiʼ tojlel Serguéi yicʼot i yijñam i cʼabaʼ Tatiana. Cheʼ bʌ jiñi policía tsaʼ ochiyob tiʼ yotot i tsiʼ pʌyʌyob majlel yaʼ baʼan jiñi xʼeʼtelob, Tatiana ñaxan tsaʼ locʼsʌnti i tsaʼ chaʼ sujti tiʼ yotot. Serguéi miʼ yʌl chuqui tsaʼ ujti cheʼ bʌ Tatiana tsaʼ cʼoti tiʼ yotot: «Ti ora jach tsaʼ cʼoti juntiquil hermana chaʼan miʼ julaʼtan. Ti wiʼil, tsaʼ cʼoti yambʌ hermanojob chaʼan miʼ coltañob i sʌqʼuesan jiñi yotot».

Serguéi miʼ bej al: «An c mulaj muʼ bʌ i yʌl Proverbios 17:17: ‹Mi isujm miʼ cʼuxbiñonla laj cʌñʌ bʌ maʼanic miʼ cʌy i cʼuxbiñonla ti pejtelel ora›. Ñumento an j qʼuele bajcheʼ miʼ tsʼʌctiyel tic tojlel cheʼ woli c ñusan jiñi wocol. Cheʼ c bajñelic jach, mach mejlic c bajñel lʌtʼ. Jehová an i yʌqʼueyon camigojob mach bʌ añic miʼ bajñel cʌyoñob».b

Ti ili cojix bʌ qʼuin i cʼʌjñibal lac chaʼan la camigojob muʼ bʌ i coltañoñobla. I ñumen i cʼʌjñibalto lac chaʼan miʼ cajel ti jiñi ñuc bʌ wocol. Jin chaʼan, laʼ lac chaʼlen wersa ili ora chaʼan mi lac pʌs chaʼan wem bʌ amigojonla (1 Ped. 4:​7, 8).