«Yajcanla wʌle majqui mi caj laʼ chʼujutesan»

1. ¿Chuqui yom mi lac mel chaʼan mi lac taj i sujm bʌ lac tijicñʌyel, i chucoch? (Isaías 48:​17, 18).

JIÑI lac Tat Jehová miʼ wen cʼuxbiñonla i yom chaʼan mi lac ñusan lac bʌ ti laj cuxtʌlel ili ora yicʼot ti talto bʌ qʼuin (Ec. 3:​12, 13). Wen utsʼatax bajcheʼ tsiʼ meleyonla (pʌtʌyonla) come cabʌl chuqui miʼ mejlel lac mel. Pero maʼañic tsiʼ yʌqʼueyonla ti lac wenta chaʼan mi lac bajñel yuman lac bʌ yicʼot mi lac bajñel ñaʼtan chuqui jiñi wem bʌ yicʼot mach bʌ weñic (Ec. 8:9; Jer. 10:23). Yujil chaʼan muʼ bʌ i yʌqʼueñonla i sujm bʌ lac tijicñʌyel jiñʌch cheʼ mi lac melben i yeʼtel (troñel) yicʼot mi lac jacʼben i tʼan (pejcan Isaías 48:​17, 18).

2. ¿Chuqui yom bʌ Satanás chaʼan mi lac ñaʼtan, i chuqui an i mele Jehová chaʼan miʼ pʌs chaʼan mach i sujmic jiñi?

² Satanás yom i yʌqʼueñonla lac ñaʼtan chaʼan tijicña mi lac mejlel ti ajñel anquese maʼañic mi lac melben i yeʼtel Jehová, i chaʼan mucʼʌch i mejlel lac bajñel yuman lac bʌ (Gn. 3:​4, 5). Chaʼan Jehová miʼ pʌs chaʼan mach i sujmic tsaʼ bʌ i yʌlʌ Satanás an i yʌcʼʌ chaʼan jiñi wiñicob xʼixicob (quixtañujob) miʼ bajñel yumañob i bʌ. I jamʌ tsiquil mi laj qʼuel chaʼan maʼañic mejlem i melob (chaʼleñob). Pero ti Biblia an cabʌl ejemplo chaʼan wiñicob yicʼot xʼixicob tijicña bʌ tsiʼ ñusayob cheʼ bʌ tsiʼ melbeyob i yeʼtel Jehová, i jiñi ñumen tijicña bʌ tsiʼ ñusa jiñʌch Jesucristo. Mi caj lac ñaxan qʼuel chucoch tsiʼ yajca i melben i yeʼtel Jehová. Cheʼ jiñi, mi caj laj qʼuel chucoch Jehová jiñʌch yom bʌ mi lac chʼujutesan. I ti wiʼil, mi caj laj cʼajtesan chuqui tsiʼ yʌqʼueyonla lac chʼʌm jiñi decisión chaʼan mi lac melben i yeʼtel.

CHUCOCH JESÚS TSIʼ YAJCA I MELBEN I YEʼTEL JEHOVÁ

3. ¿Chuqui tiʼ sube Satanás jiñi Jesús, i bajcheʼ yʌlʌ tsiʼ jacʼʌ Jesús?

³ Cheʼ bʌ Jesús tsajñi wʌʼ ti pañimil (mulawil) tsaʼʌch i yajca majqui mi caj i melben i yeʼtel. Cheʼ bʌ tsaʼ jaxto i chʼʌmʌ jaʼ, Satanás tiʼ sube chaʼan miʼ chʼujutesan junsujtel i cheʼ jiñi mi caj i yʌqʼuen pejtelel jiñi yumʌntel am bʌ ti pañimil. Pero Jesús tiʼ sube: «¡Cucux Satanás! Come tsʼijbubil: ‹Chʼujutesan jiñi a Dios Jehová i jin jach yom maʼ melben i yeʼtel›» (Mat. 4:​8-10). ¿Chucoch Jesús tsiʼ yajca i melben i yeʼtel Jehová? Laʼ laj qʼuel chucoch.

4, 5. ¿Chucoch Jesús tsiʼ yajca i melben i yeʼtel Jehová?

⁴ Jesús miʼ cʼuxbin Jehová tiʼ pejtelel i pusicʼal i jiñʌch tsaʼ bʌ i ñumen ñijca chaʼan miʼ yajcan i melben i yeʼtel (Juan 14:31). Cheʼ jaʼel, yujil chaʼan i melol i yeʼtel Jehová jiñʌch ñumen wem bʌ (Juan 8:​28, 29; Apoc. 4:11). Yujil chaʼan Jehová jiñʌch tsaʼ bʌ i yʌqʼueyonla laj cuxtʌlel, chaʼan wen uts yicʼot chaʼan miʼ mejlel lac ñop tiʼ tojlel (Sal. 33:4; 36:9; Sant. 1:17). Jehová maʼañic baqui ora tsiʼ loti Jesús i jiñʌch tsiʼ yʌqʼue pejtelel chuqui an i chaʼan (Juan 1:14). Pero Satanás an i yʌcʼʌ ti chʌmel jiñi wiñicob xʼixicob yicʼot juntiquilʌch xlot mach bʌ i wentajic yañoʼ bʌ, i jin jach miʼ ñaʼtan chuqui yom bʌ i taj (Juan 8:44). Jesús wen i cʌñʌ bajcheʼ yilal Jehová yicʼot Satanás, jin chaʼan maʼañic ba ora tsiʼ ñaʼta i chañʼesan i bʌ tiʼ tojlel Jehová cheʼ bajcheʼ tsiʼ mele Satanás (Filip. 2:​5-8).

⁵ Yambʌ tsaʼ bʌ i colta Jesús chaʼan miʼ yajcan i melben i yeʼtel Jehová jiñʌch cheʼ tsiʼ chʌn ñaʼta chuqui tac ti wenlel mi caj i tajtʌl mi xucʼulʌch miʼ yajñel (Heb. 12:2). Yujil chaʼan, mi chʌn xucʼulʌch, mi caj i sʌqʼuesʌben i cʼabaʼ i Tat yicʼot mi caj i mejlel ti jilel jiñi mulil yicʼot jiñi chʌmel am bʌ tiʼ mul Satanás.

JEHOVÁ JIÑɅCH YOM BɅ MI LAC CHʼUJUTESAN

6, 7. ¿Chucoch cabʌl lac piʼʌlob maʼañic miʼ melbeñob i yeʼtel Jehová? ¿Chucoch yomʌch mi lac chʼujutesan Jehová?

⁶ Ili ora cabʌl lac piʼʌlob maʼañic miʼ melbeñob i yeʼtel Jehová come mach i cʌñʌyobic. Mach i cʌñʌyobic bajcheʼ yilal yicʼot pejtelel muʼ bʌ i mel tiʼ tojlelob. Jiñʌch tsaʼ bʌ ujti tiʼ tojlelob jiñi chumuloʼ bʌ ti Atenas cheʼ bʌ Pablo tiʼ subeyob jiñi wen tʼan (Hech. 17:​19, 20, 30, 34).

⁷ Pablo tiʼ tsictesʌbeyob chaʼan jiñi i sujm bʌ Dios «miʼ yʌqʼuen lac piʼʌlob jiñi cuxtʌlel, icʼ yicʼot pejtelel chuqui an». Cheʼ jaʼel, tiʼ subeyob chaʼan wocolix i yʌlʌ Jehová «an laj cuxtʌlel, mi lac ñijcan lac bʌ yicʼot wʌʼañonla». Tiʼ tsictesʌbeyob jaʼel chaʼan «tiʼ tojlel juntiquil wiñic tsiʼ mele jujunmojt lac piʼʌlob». Cheʼ bajcheʼ mi laj qʼuel, jiñʌch tsaʼ bʌ i mele pejtelel chuqui an, jin chaʼan jiñʌch yom bʌ mi lac chʼujutesan (Hech. 17:​25, 26, 28).

8. ¿Chuqui mach bʌ i wis meleyic Jehová?

⁸ Cheʼ yomiqui, Jehová miʼ mejlel i wersa xicʼ jiñi wiñicob xʼixicob chaʼan miʼ melbeñob i yeʼtel come jiñʌch tsaʼ bʌ i mele pejtelel chuqui an. ¡Pero mach i wis meleyic jiñi! Yombʌyi jiñʌch chaʼan jiñi wiñicob xʼixicob miʼ mulañob sujtel tiʼ yamigo tiʼ pejtelel ora (1 Tim. 2:​3, 4). Jin chaʼan, cabʌl chuqui acʼbil i chaʼan muʼ bʌ i pʌsbeñonla chaʼan añʌch tiʼ sujm yicʼot chaʼan miʼ wen cʼuxbiñonla. Jin chaʼan jaʼel, Jehová miʼ chajpañonla chaʼan miʼ mejlel lac pʌsben jiñi wiñicob xʼixicob chuqui mi caj i mel ti lac tojlel yicʼot bajcheʼ mi caj i mel (Mat. 10:​11-13; 28:​19, 20). Cheʼ jaʼel, an i yʌcʼʌ congregación tac baqui miʼ mejlel lac chʼujutesan yicʼot an i yʌqʼueyonla ancianojob muʼ bʌ i wen cʌntañoñobla (Hech. 20:28).

9. ¿Bajcheʼ miʼ pʌs i cʼuxbiya Jehová?

⁹ Jehová miʼ pʌs chaʼan mucʼʌch i cʼuxbin jaʼel jiñi maʼañic bʌ miʼ ñopob chaʼan añʌch Dios. Cʼʌlʌl ti wajali, yonlel lac piʼʌlob an i meleyob chuqui bajñel yomob. Pero, come Jehová wen uts, miʼ yʌqʼueñob chuqui i cʼʌjñibal i chaʼañob chaʼan miʼ ñusañob i bʌ (Mat. 5:​44, 45; Hech. 14:​16, 17). Tiʼ coltaya Jehová añob i familia, miʼ mejlelob ti tilel i yalobil, i tajob i yamigo yicʼot miʼ qʼuelbeñob i wenlel i yeʼtel (Sal. 127:3; Ec. 2:24). Tsiquil chaʼan Jehová mucʼʌch i cʼuxbiñonla ti lac pejtelel (Éx. 34:6). Wʌle mi caj laj qʼuel chuqui tac tsaʼ bʌ i yʌqʼueñonla lac yajcan chaʼan mi lac melben i yeʼtel yicʼot bajcheʼ miʼ yʌqʼueñonla i bendición.

CHUCOCH TSAʼ LAC YAJCA LAC MELBEN I YEʼTEL JEHOVÁ

10. a) ¿Chuqui jiñi muʼ bʌ i ñumen ñijcañonla chaʼan mi lac melben i yeʼtel Jehová? (Mateo 22:37). b) ¿Bajcheʼ an i coltayet cheʼ maʼ qʼuel chaʼan Jehová miʼ ñusʌbeñonla lac mul? (Salmo 103:​13, 14).

¹⁰ Cheʼ bajcheʼ Jesús, muʼ bʌ i ñumen ñijcañonla jaʼel chaʼan mi lac melben i yeʼtel Jehová jiñʌch cheʼ mi laj cʼuxbin tiʼ pejtelel lac pusicʼal (pejcan Mateo 22:37). Cheʼ mi lac ñumen cʌñeʼ, muʼto lac mulan lac ñumen cʌn bajcheʼ yilal. Laʼcu lac ñaʼtan, miʼ chʌn ñusan lac mul. Cheʼ bʌ jiñi israelitajob tsiʼ ñusʌbeyob i tʼan, Jehová tsaʼto i subeyob: «Wolic subeñetla ti wocol tʼan, sutqʼuin laʼ bʌ. Cʌyʌx laʼ mul» (Jer. 18:11). Jehová yujil chaʼan melbilonla ti tsʼubejn (pejcan Salmo 103:​13, 14). Cheʼ bʌ maʼ ñaʼtan bajcheʼ Jehová miʼ chʌcʌ ñusan lac mul i maʼ ñaʼtan jiñi yan tac bʌ utsʼatax bʌ i melbal, ¿mach ba añic miʼ ñijcan a pusicʼal chaʼan maʼ melben i yeʼtel tiʼ pejtelel ora?

11. ¿Chuqui tac yambʌ miʼ ñijcañonla chaʼan mi lac melben i yeʼtel Jehová?

¹¹ Yambʌ muʼ bʌ i ñijcañonla chaʼan mi lac melben i yeʼtel Jehová jiñʌch cheʼ la cujil chaʼan jiñʌch yom bʌ mi lac mel come jiñʌch wem bʌ jiñi (Mat. 4:10). Cheʼ jaʼel, la cujil chaʼan cabʌl chuqui wem bʌ mejl ti ujtel cheʼ bʌ xucʼulonla tiʼ tojlel: Mi laj coltan chaʼan miʼ sʌqʼuesʌntel i cʼabaʼ Jehová, mi lac pʌs chaʼan Satanás juntiquilʌch xlot yicʼot mi la cʌqʼuen i yubin i tijicñʌyel jiñi lac Tat Jehová. I mi mucʼʌch lac yajcan lac melben i yeʼtel ili ora, ti jumpʼejl bʌ qʼuin mi caj i mejlel la cʌqʼuen i tijicñʌyel tiʼ pejtelel ora (Juan 17:3).

12, 13. ¿Chuqui mi laj cʌn tiʼ tojlel Jane yicʼot Pam?

¹² Cʼʌlʌl cheʼ bʌ alʌlontola miʼ mejlel laj cʼuxbin Jehová i mi lac bej pʼʌtʼesan jiñi cʼuxbiya cʼʌlʌl cheʼ bʌ ñucoñixla. Laʼ laj qʼuel tsaʼ bʌ ujti tiʼ tojlel Jane,a am bʌ 11 i jabilel, yicʼot Pam, am bʌ 10 i jabilel, cheʼ bʌ tsiʼ techeyob estudio. Anquese jiñi i papá i mamá maʼañic tsiʼ jacʼʌyob estudio maʼañic tsiʼ mʌctayob chaʼan Jane yicʼot Pam miʼ yajñelob yicʼot jiñi Testigojob, tsaʼ jach i subeyob chaʼan yom miʼ majlelob jaʼel ti templo cheʼ ti fin de semana. Jane miʼ yʌl: «Tsaʼ bʌ i pʌsbeyoñob jiñi Testigojob tsiʼ coltayon chaʼan mic lʌtʼ cheʼ bʌ jiñi c piʼʌlob ti clase tiʼ subeyoñob c mel mach bʌ weñic yicʼot chaʼan maʼañic mij cʌñeʼ j cʼʌn droga yicʼot chaʼan maʼañic mic chaʼlen tsʼiʼlel».

¹³ Cheʼ bʌ ñumeñix chaʼpʼej uxpʼejl jab, Jane yicʼot Pam tsaʼ sujtiyob ti publicadora. Ti wiʼil, tsaʼ sujtiyob ti precursora yicʼot tsiʼ cʌntayob i papá i mamá come ñoxobix. Cheʼ miʼ cʼajtesan chuqui tac tsiʼ ñusa, Jane miʼ yʌl: «Tsaʼ c junyajl qʼuele chaʼan Jehová maʼañic baʼ ora miʼ wis cʌy i cʌntan jiñi i yamigojob, come 2 Timoteo 2:19 miʼ yʌl chaʼan ‹Jehová i cʌñʌ jiñi i chaʼañoʼ bʌ›». Tsiquil chaʼan Jehová mucʼʌch i cʌntan jiñi muʼ bʌ i cʼuxbiñob yicʼot miʼ melbeñob i yeʼtel.

14. ¿Bajcheʼ miʼ mejlel laj coltʌben i cʼabaʼ Jehová? (Qʼuele jaʼel jiñi foto tac).

¹⁴ La com laj coltan chaʼan miʼ sʌqʼuesʌntel jiñi i cʼabaʼ Jehová. Ñaʼtancu chaʼan an juntiquil wem bʌ a wamigo, wen uts bʌ, wen yujil cʼuxbiya yicʼot miʼ chʼʌmben i sujm yañoʼ bʌ. Pero ti jumpʼejl bʌ qʼuin maʼ wubin chaʼan juntiquil lac piʼʌl woli (choncol) i yʌl chaʼan jiñi a wamigo wen jontol (simaron) yicʼot juntiquil xlot. ¿Chuqui mi caj a mel? ¿Mach ba muqʼuic caj a coltan? Tiʼ sujm, mucʼʌch caj a coltan. Cheʼʌch miʼ yujtel jaʼel cheʼ mi la cubin chaʼan an majqui miʼ yʌl lot tac tiʼ tojlel Jehová, ti ora la com laj coltan yicʼot mi la cʌcʼ ti cʌjñel baqui bʌ jiñi i sujmlel (Sal. 34:1; Is. 43:10). Jiñi muʼ bʌ la cʌl yicʼot muʼ bʌ lac mel miʼ pʌs chaʼan la comʌch lac melben i yeʼtel Jehová tiʼ pejtelel lac pusicʼal.

15. ¿Chuqui ti bendición tac tsiʼ taja Pablo cheʼ bʌ tsiʼ qʼuexta chuqui tac yom i taj tiʼ cuxtʌlel? (Filipenses 3:​7, 8).

¹⁵ Chaʼan mi lac ñumen melben i yeʼtel Jehová i mi la cʌqʼuen i tijicñʌyel cabʌlʌch chuqui tac mi laj cʌy i ti jumpʼejl lac pusicʼal mi lac mel. Juntiquil cheʼʌch bʌ tsiʼ mele bajcheʼ jiñi jiñʌch jiñi apóstol Pablo, tsiʼ cʌyʌ jiñi i ñuclel am bʌ i chaʼan tiʼ tojlel i piʼʌlob chaʼan miʼ tsajcan Cristo yicʼot miʼ melben i yeʼtel Jehová (Gál. 1:14). Tijicña tsaʼ ajñi yicʼot tsaʼ aqʼuenti jiñi ñuc bʌ majtan chaʼan miʼ chaʼlen yumʌntel yicʼot Cristo ti panchan. Pablo maʼañic baʼ ora tsiʼ chaʼ ñaʼta i bʌ chaʼan jiñi tsaʼ tac bʌ i cʌyʌ chaʼan miʼ melben i yeʼtel Jehová, i cheʼʌch joñonla jaʼel (pejcan Filipenses 3:​7, 8).

16. ¿Chuqui miʼ pʌsbeñonla i experiencia Julia? (Qʼuele jaʼel jiñi foto tac).

¹⁶ Cheʼ mi la cʌcʼ lac bʌ chaʼan mi lac melben i yeʼtel Jehová, miʼ mejlel lac taj cabʌl bendición ili ora yicʼot ti talto bʌ qʼuin. Laʼ laj qʼuel tsaʼ bʌ ujti tiʼ tojlel juntiquil hermana i cʼabaʼ Julia. Cheʼ pecʼto i jabilel miʼ chaʼlen cʼay ti jumpʼejl coro ti iglesia. Juntiquil wen yujil bʌ cʼay tsiʼ qʼuele bajcheʼ mucʼ ti cʼay Julia i tiʼ sube chaʼan yom i cʌntesan. Ti wiʼil, Julia tsaʼ cʼoti ti wen cʌjñel i cabʌl baqui tsiʼ chaʼle cʼay. Cheʼ bʌ woli (yʌquel) ti clase ti jumpʼejl escuela wen cʌmbil bʌ, juntiquil i piʼʌl ti clase tiʼ sube tiʼ tojlel Dios i tiʼ tsictesʌbe chaʼan i cʼabaʼ jiñʌch Jehová. Cheʼ jiñi, Julia tsaʼ caji ti estudio chaʼsujtel ti jujumpʼejl semana. Ti wiʼil tsiʼ cʌyʌ jiñi carrera chaʼan música i tsaʼ caji i cʼʌn i cuxtʌlel chaʼan miʼ melben i yeʼtel Jehová. Wocolʌch tsiʼ yubi chaʼan miʼ mel jiñi. Julia miʼ yʌl: «Cabʌl lac piʼʌlob tiʼ subeyoñob chaʼan woli jach c sʌt qʼuin, pero com j cʼʌn j cuxtʌlel chaʼan mic melben i yeʼtel Jehová». Ñumeñix 30 jab, ¿pero chuqui miʼ ñaʼtan Julia chaʼan jiñi tsaʼ bʌ i mele? Miʼ yʌl: «Tijicña mi cubin c bʌ i cujil chaʼan ti talto bʌ qʼuin Jehová mi caj i yʌqʼueñon pejtelel chuqui com» (Sal. 145:16).

BEJ MELBEN I YEʼTEL JEHOVÁ

17. ¿Chuqui yom i yʌl tiʼ tojlel jiñi i wiñicob Dios cheʼ añoñixla ti jiñi cojix tac bʌ qʼuin? ¿I chuqui yom i yʌl tiʼ tojlel jiñi maxto bʌ añic miʼ melbeñob i yeʼtel Jehová?

¹⁷ Tsʼitaʼ jax yom chaʼan miʼ tilel i jilibal ili pañimil. Jiñi apóstol Pablo tsiʼ yʌlʌ: «Come ‹tsʼitaʼ jax yom›, ‹jiñi tal bʌ mi caj i julel, i mach jalix yom›» (Heb. 10:37). ¿Chuqui yom i yʌl iliyi? Chaʼan mach cabʌlix tiempo cʌylem chaʼan jiñi lac piʼʌlob miʼ yajcañob i melben i yeʼtel Jehová (1 Cor. 7:29). I mi wolix lac melben i yeʼtel la cujil chaʼan anquese mi caj lac ñusan wocol tac, maʼañic mi caj i jalʼan.

18. ¿Chuqui yom Jehová yicʼot Jesús chaʼan mi lac mel?

¹⁸ Jesús tiʼ sube jiñi lac piʼʌlob chaʼan miʼ sujtelob ti xcʌntʼan i chaʼan yicʼot chaʼan miʼ chʌn tsajcañob (Mat. 16:24). Jin chaʼan, mi wajalix cajel lac melben i yeʼtel Jehová, mach laj cʌy lac bʌ. I sujmʌch chaʼan yom mi lac chaʼlen wersa chaʼan mi lac bej melben i yeʼtel come an i tajol wocolʌch. Pero ili ora mucʼʌch lac taj cabʌl lac tijicñʌyel yicʼot cabʌl bendición cheʼ mi lac melben i yeʼtel Jehová (Sal. 35:27).

19. ¿Chuqui mi laj cʌn tiʼ tojlel Gene?

¹⁹ An muʼ bʌ i ñaʼtañob chaʼan cabʌl chuqui mi caj i sʌtob i maʼañix mi caj i ñusañob i bʌ tiʼ cuxtʌlel mi tsiʼ melbeyob i yeʼtel Jehová. Mi jatet colelto muqʼuet, ¿cheʼ ba maʼ ñaʼtan jaʼel bajcheʼ jiñi? Juntiquil chʼiton i cʼabaʼ Gene miʼ yʌl: «Ti ñaxan, mic ñaʼtan chaʼan maʼañic chuqui miʼ mejlel c junyaj mel tiʼ caj Testigojon. Mij qʼuel chaʼan jiñi c piʼʌlob ti colel miʼ majlelob ti qʼuiñijel, miʼ loqʼuelob yicʼot xchʼocob yicʼot miʼ wen chaʼleñob alas videojuego, pero joñon mucʼ jach c majlel ti tempa bʌ yicʼot mic loqʼuel ti subtʼan». ¿Bajcheʼ tsiʼ ticʼla Gene jiñi? Miʼ yʌl: «Tsaʼ caji c mel jaʼel jiñi mach tac bʌ weñic, i tsaʼʌch c poj jumucʼ ñusa c bʌ. Pero tiʼ sujm, mach tijicñayoñic. Jin chaʼan tsaʼ caji j cʼajtesan muʼ bʌ i yʌl jiñi Biblia chaʼan jiñi mach tac bʌ weñic woli bʌ c mel yicʼot tsaʼ caji c ñaʼtan chuqui tac ti wenlel miʼ mejlel c taj cheʼ bʌ mucʼʌch c jacʼ jiñi. Cheʼ jiñi, tsaʼix caji c melben i yeʼtel Jehová tiʼ pejtelel c pusicʼal. Cʼʌlʌl ti jimbʌ ora an cubi chaʼan Jehová mucʼʌch i jacʼ jiñi coración».

20. ¿Chuqui la com lac mel?

²⁰ Juntiquil tsaʼ bʌ i tsʼijbu jiñi Salmo tsiʼ yʌlʌ: «Tijicña muʼ bʌ a yajcan. Maʼ pʌy chaʼan miʼ chumtʌl ti awotot» (Sal. 65:4). Cheʼ bajcheʼ Josué, laʼ la cʌleʼ jaʼel: «Joñon yicʼot jini añoʼ bʌ ti cotot mi caj [lon c] chʼujutesan lac Yum» (Jos. 24:15).