ESTUDIO 15
CʼAY 30 Jehová jiñʌch Camigo, c Tat yicʼot c Dios
Cheʼ mi lac lʌcʼtesan lac bʌ ti Dios mi lac taj lac wenlel
«Joñon mic taj c wenlel cheʼ mic ñochtan Dios» (SAL. 73:28).
TEMA
Yom bʌ mi lac mel chaʼan mi lac lʌcʼtesan lac bʌ ti Jehová i chuqui ti wenlel mi lac tajeʼ.
1, 2. a) ¿Chuqui yom mi lac mel chaʼan mi lac taj wem bʌ la camigo? b) ¿Chuqui mi caj laj qʼuel ti ili estudio?
ÑAʼTANCU juntiquil wem bʌ a wamigo. ¿Cʼajal ba a chaʼan chuqui tsaʼ mele chaʼan miʼ sujtel ti wem bʌ a wamigo? Tajol tsaʼ wen ñusa qʼuin a wicʼot, tsaʼ cʌñʌ chuqui tac tsiʼ ñusa, chuqui tac muʼ bʌ i mulan i maʼañic bʌ. Cheʼ jaʼel cabʌl chuqui wem bʌ tsaʼ qʼuele tiʼ tojlel, tsaʼ mulaj a lajin i tsaʼ cʼoti a wen cʼuxbin.
2 Chaʼan mi lac taj wem bʌ la camigo yomʌch mi lac chaʼlen wersa lac sʌclan i mi la cʌqʼuen tiempo, jiñʌch yom bʌ mi lac mel (chaʼlen) jaʼel chaʼan mi lac sujtel tiʼ yamigo Jehová. Ti ili estudio mi cajel laj qʼuel bajcheʼ miʼ mejlel lac ñumen lʌcʼtesan lac bʌ tiʼ tojlel Jehová, jiñi ñumen wem bʌ la camigo. Pero laʼ lac ñaxan qʼuel chucoch weñʌch cheʼ mi lac lʌcʼtesan lac bʌ tiʼ tojlel.
3. ¿Chucoch yom mi lac wen ñaʼtan baqui tac bʌ i wenlel cheʼ mi lac lʌcʼtesan lac bʌ tiʼ tojlel Jehová? Alʌ jumpʼejl ejemplo.
3 Wen ñucʌch i cʼʌjñibal cheʼ mi lac ñaʼtan chucoch weñʌch cheʼ mi lac lʌcʼtesan lac bʌ tiʼ tojlel Jehová (Sal. 63:6-8). ¿Chucoch? Chaʼan mi lac chʼʌmben i sujm laʼ la cʌl jumpʼejl ejemplo. Jiñi lac piʼʌlob yujilob chaʼan yom miʼ cʌntañob chuqui miʼ cʼuxob, miʼ wen japob jaʼ, miʼ melob ejercicio i wen miʼ wʌyelob. Anquese yujilob chaʼan weñʌch cheʼ miʼ melob pejtelel iliyi mach i wentajobic i maʼañic miʼ cʌntañob i bʌ. Pero jiñi muʼ bʌ i ñaʼtañob chuqui ti wenlel miʼ mejlel i tajob, tajol mucʼʌch cajel i cʌntañob i bʌ. Lajalʌch tiʼ tojlel Jehová, la cujil chaʼan cheʼ mi lac lʌcʼtesan lac bʌ tiʼ tojlel weñʌch chaʼañonla. Pero cheʼ mi lac wen ñaʼtan jiñi wenlel muʼ bʌ lac taj miʼ coltañonla lac ñumen lʌcʼtesan lac bʌ tiʼ tojlel (Sal. 119:27-30).
4. ¿Chuqui tsiʼ yʌlʌ jiñi salmista ti Salmo 73:28?
4 (Pejcan Salmo 73:28). Tsaʼ bʌ i tsʼijbu jiñi Salmo 73 loqʼuem ti jiñi tribu chaʼan Leví i juntiquilʌch músico yaʼ ti templo. Tajol cabʌlix jab cajel i melben i yeʼtel (troñel) Jehová, pero tsiʼ qʼuele chaʼan ñucʌch i cʼʌjñibal cheʼ miʼ cʼajtesan chaʼan weñʌch cheʼ miʼ lʌcʼtesan i bʌ ti Jehová. I tsiʼ mulaj jaʼel chaʼan jiñi yambʌlob miʼ qʼuelob chaʼan weñʌch cheʼ miʼ sujtelob tiʼ yamigo Jehová. Laʼ laj qʼuel bajcheʼ tac miʼ coltañonla iliyi.
CHEʼ MI LAC LɅCʼTESAN LAC BɅ TI DIOS MI LAC TAJ LAC TIJICÑɅYEL
5. a) ¿Chucoch tijicñayonla cheʼ mi lac lʌcʼtesan lac bʌ ti Jehová? b) ¿Bajcheʼ tac miʼ coltañet i cʌntesa Jehová? (Proverbios 2:6-16).
5 Cheʼ bʌ ñumen lʌcʼʌl mi la cajñel ti Jehová ñumen tijicña mi la cajñel (Sal. 65:4). ¿Chucoch? Junchajp come wen mi la cajñel cheʼ bʌ mucʼʌch lac jacʼ muʼ bʌ i subeñonla jiñi Biblia. Jiñi i cʌntesa tac Jehová miʼ coltañonla chaʼan maʼan mi lac mel mach bʌ weñic i chaʼan jiñi maʼañic miʼ ticʼlañonla (pejcan Proverbios 2:6-16). Jin chaʼan jiñi Biblia miʼ yʌl: «Tijicña muʼ bʌ i taj wen bʌ i ñaʼtʌbal chaʼan miʼ chʼʌmben isujm» (Pr. 3:13).
6. ¿Chucoch tsiʼ sʌtʌ i tijicñʌyel jiñi salmista?
6 Pero jiñi mach yomic i yʌl chaʼan jiñi i yamigojob Jehová maʼañix baʼ ora chʼijyem mi caj i yubiñob. Jiñi tsaʼ bʌ i tsʼijbu jiñi Salmo 73 tsiʼ sʌtʌ i tijicñʌyel cheʼ tsaʼ caji i wen ñaʼtan jiñi muʼ tac bʌ i taj i qʼuel. Tsaʼ caji i wen ñaʼtan chaʼan jiñi maʼañic bʌ miʼ qʼuelob ti ñuc Dios yicʼot maʼañic bʌ miʼ jacʼbeñob i tʼan ñumen wen añob. Jin chaʼan, tsaʼ wen michʼa i tsaʼ caji i mulʌben chuqui añob i chaʼan. Tsiʼ ñaʼta chaʼan jiñi muʼ bʌ i melob mach tac bʌ weñic, ñumen añob i taqʼuin, ñumen cʼocʼoʼ i maʼañic miʼ ñusañob wocol, pero jiñi mach i sujmic (Sal. 73:3-7, 12). Tiʼ caj wen michʼ, tsaʼto caji i cʼajtiben i bʌ mi añixto i cʼʌjñibal cheʼ miʼ melben i yeʼtel Jehová. Yicʼot i chʼijyemlel tsiʼ yʌlʌ: «Tsaʼ cʌlʌ lolom jach wolij cʌntan c pusicʼal. Lolom jach mij cʌntan c bʌ chaʼan mi cajñel ti sʌc» (Sal. 73:13).
7. ¿Bajcheʼ miʼ mejlel lac chaʼ taj lac tijicñʌyel cheʼ bʌ mi la cubin lac chʼijyemlel? (Qʼuele jaʼel jiñi dibujo).
7 Jiñi salmista mach cheʼ jach tsaʼ cʌyle, añʌch chuqui tsiʼ mele chaʼan miʼ ñusan jiñi i chʼijyemlel. Tsaʼ ochi «ti Chʼujul bʌ Ajñibʌl i chaʼan Dios», i Jehová tsiʼ colta chaʼan miʼ tojʼesan i pensar cheʼ bʌ yaʼan yaʼi (Sal. 73:17-19). Jehová yujil cheʼ bʌ chʼijyemonla come jiñʌch jiñi ñumen wem bʌ la camigo. Mi chʼijyemonla yom mi laj cʼajtiben Jehová ti oración chaʼan miʼ coltañonla lac ñaʼtan chuqui mi lac mel. Muʼ bʌ i yʌl jiñi Biblia yicʼot muʼ bʌ i subeñonla jiñi hermanojob miʼ coltañonla chaʼan mi lac bej melben i yeʼtel. Cheʼto jaʼel, Jehová mi caj i coltañonla yicʼot i ñuqʼuesan lac pusicʼal cheʼ bʌ maʼañix mi lac ñʌjchʼel ti pensar (Sal. 94:19).a
Jiñi levita tsaʼ bʌ i tsʼijbu jiñi Salmo 73, yaʼan ti jiñi «ti Chʼujul bʌ Ajñibʌl i chaʼan Dios». (Qʼuele jiñi párrafo 7).
CHEʼ MI LAC LɅCʼTESAN LAC BɅ TI DIOS WEN MI LA CAJÑEL I MI LAC TAJ LAC PIJTAYA
8. ¿Bajcheʼ tac yambʌ miʼ coltañonla cheʼ mi lac lʌcʼtesan lac bʌ tiʼ tojlel Jehová?
8 Anto yambʌ chaʼchajp bajcheʼ miʼ coltañonla cheʼ mi lac lʌcʼtesan lac bʌ ti Dios. Junchajp, wen mi la cajñel. Yambʌ, mi lac taj i sujm bʌ lac pijtaya (Jer. 29:11). Laʼ laj qʼuel ili chaʼchajp.
9. ¿Chucoch wen mi la cajñel cheʼ bʌ mi lac lʌcʼtesan lac bʌ tiʼ tojlel Jehová?
9 Cheʼ mi lac lʌcʼtesan lac bʌ tiʼ tojlel Jehová wen mi la cajñel. Ili ora, cabʌlob muʼ bʌ i yʌlob chaʼan maʼañic Dios. Jin chaʼan, an maʼañic bʌ miʼ ñaʼtañob chucoch cuxulob i miʼ ñaʼtañob chaʼan ti jumpʼejl bʌ qʼuin mi caj i luʼ jilel jiñi lac piʼʌlob. Pero jiñi cʌmbil bʌ lac chaʼan joñonla yaʼ ti Biblia an i coltayonla lac ñop chaʼan Dios «añʌch yicʼot chaʼan miʼ yʌqʼuen i majtan jiñi muʼ bʌ i wen sʌclañob» (Heb. 11:6). Jehová tsiʼ meleyonla chaʼan mi lac chʼujutesan. Jin chaʼan, mi la cubin lac tijicñʌyel cheʼ bʌ mi lac melben i yeʼtel (Dt. 10:12, 13).
10. Cheʼ bajcheʼ miʼ yʌl Salmo 37:29, ¿chuqui mi caj i tajob jiñi muʼ bʌ i ñopob Jehová?
10 Cabʌl lac piʼʌlob maʼañic chuqui woli (choncol) i pijtañob chaʼan ti talto bʌ qʼuin. Mucʼ jach i chaʼleñob eʼtel, miʼ cosañob i yalobil yicʼot miʼ lotob majlel i taqʼuin chaʼan baʼ ora ñoxobix, i mach yujilobic chuqui albil bʌ i chaʼan Dios chaʼan jiñi talto bʌ qʼuin. Pero joñonla muʼ bʌ lac chʼujutesan Jehová mi la cʌcʼ lac pijtaya tiʼ tojlel (Sal. 25:3-5; 1 Tim. 6:17). Mi lac ñop chaʼan mucʼʌch caj i tsʼʌctesan chuqui albil tac bʌ i chaʼan come jiñʌch lac Dios yicʼot la camigo. Cabʌl chuqui utsʼatax bʌ miʼ cajel ti talto bʌ qʼuin, junchajp jiñʌch cheʼ mi caj i mejlel lac chʼujutesan Jehová tiʼ pejtelel ora ti jumpʼejl Paraíso (pejcan Salmo 37:29).
11. ¿Bajcheʼ miʼ coltañonla cheʼ mi lac lʌcʼtesan lac bʌ tiʼ tojlel Jehová, i bajcheʼ yubil miʼ yubin?
11 Añʌch yan tac bʌ wenlel muʼ bʌ i mejlel lac taj cheʼ bʌ mi lac lʌcʼtesan lac bʌ tiʼ tojlel Jehová. Laʼcu lac ñaʼtan, Jehová miʼ subeñonla chaʼan mi caj i ñusan lac mul mi mucʼʌch lac chaʼ ñaʼtan lac bʌ (Is. 1:18). Cheʼ bajcheʼ jiñi, miʼ mejlel lac chaʼ taj lac ñʌchʼtʌlel i maʼañix mi lac teño ñaʼtan jiñi lac mul tsaʼ bʌ lac mele (Sal. 32:1-5). Cheʼ jaʼel, mi la cʌqʼuen i tijicñʌyel Jehová, i tijicña mi la cubin lac bʌ jaʼel (Pr. 23:15). Miʼ mejlel la cʌl chaʼan añʌch lac taja yan tac bʌ bendición cheʼ i yamigojonla Jehová. Pero ¿bajcheʼ miʼ mejlel lac ñumen lʌcʼtesan lac bʌ tiʼ tojlel?
MUʼ TAC BɅ I MEJLEL LAC MEL CHAʼAN MI LAC ÑUMEN LɅCʼTESAN LAC BɅ TI DIOS
12. ¿Chuqui yom maʼ mel chaʼan maʼ ñumen lʌcʼtesan a bʌ tiʼ tojlel Dios?
12 Mi chʼʌmʌlix a chaʼan jaʼ bajcheʼ Testigo, yom i yʌl chaʼan cabʌlix chuqui cʌmbil a chaʼan tiʼ tojlel Jehová yicʼot tiʼ tojlel Jesucristo, tsaʼ cʌyʌ a mul, tsaʼ ñopo Dios yicʼot tsaʼ chaʼle wersa a jacʼben i tʼan. Ili yom i yʌl chaʼan lʌcʼʌlix añet tiʼ tojlel Jehová. Pero yomʌch mi lac bej mel pejtelel iliyi chaʼan muʼto lac ñumen lʌcʼtesan lac bʌ tiʼ tojlel (Col. 2:6).
13. ¿Chuqui jiñi uxchajp muʼ bʌ caj i coltañonla chaʼan mi lac bej lʌcʼtesan lac bʌ tiʼ tojlel Jehová?
13 ¿Chuqui mi caj i coltañonla chaʼan mi lac ñumen lʌcʼtesan majlel lac bʌ ti Jehová? 1) Yomʌch mi lac bej pejcan jiñi Biblia. I mach jasʌl jach yom mi la cubin cheʼ tsʼitaʼ laj cʌñʌyix tiʼ tojlel Dios. Yom mi lac chaʼlen wersa lac chʼʌmben i sujm chuqui muʼ bʌ i pijtan ti lac tojlel i mi lac mel cheʼ bajcheʼ miʼ yʌl yaʼ tiʼ Tʼan (Efes. 5:15-17). 2) Laʼ lac wen ñaʼtan bajcheʼ tac miʼ pʌsbeñonla i cʼuxbiya Jehová chaʼan mi lac ñumen ñop tiʼ tojlel. 3) Yom mi lac bej tsʼaʼlen chuqui tac muʼ bʌ i tsʼaʼlen i maʼañic mi lac sujtel tiʼ yamigo jiñi muʼ bʌ i melob mach tac bʌ weñic (Sal. 1:1; 101:3).
14. ¿Chuqui miʼ mejlel lac mel ti jujumpʼejl qʼuin chaʼan mi la cʌqʼuen i tijicñʌyel Jehová? (1 Corintios 10:31; qʼuele jaʼel jiñi foto tac).
14 (Pejcan 1 Corintios 10:31). Wen ñucʌch i cʼʌjñibal cheʼ mi lac chaʼlen wersa lac mel muʼ tac bʌ i yʌqʼuen i tijicñʌyel Jehová. Mach jasʌl jach mi lac loqʼuel ti subtʼan o mi lac majlel ti tempa bʌ. Pejtelel chuqui mi lac mel ti jujumpʼejl qʼuin yom miʼ yʌqʼuen i tijicñʌyel Jehová. Laʼcu lac ñaʼtan, Jehová miʼ mulan cheʼ mi lac mel chuqui tac wem bʌ yicʼot chaʼan mi lac tʼox chuqui tac an lac chaʼan ti jumpʼejl lac pusicʼal (2 Cor. 8:21; 9:7). Yom jaʼel chaʼan mi lac pʌs chaʼan mucʼʌch laj qʼuel ti ñuc jiñi laj cuxtʌlel tsaʼ bʌ i yʌqʼueyonla. Jin chaʼan, cheʼ bʌ i pʼisol jach bajcheʼ cʼamel mi laj cʼux lac waj yicʼot chuqui tac mi lac jap i mi laj qʼuel bajcheʼ tac yambʌ mi laj cʌntan lac bʌ, mi lac ñumen lʌcʼtesan lac bʌ tiʼ tojlel. Pejtelel chuqui mi lac mel chaʼan mi la cʌqʼuen i tijicñʌyel Jehová miʼ yʌcʼ chaʼan miʼ ñumen cʼuxbiñonla (Luc. 16:10).
Cheʼ tsajal mi lac ñijcan laj carro, mi lac mel ejercicio, mi laj cʌntan chuqui mi laj cʼux yicʼot mi lac tʼox chuqui tac an lac chaʼan jiñʌch muʼ tac bʌ i mejlel i yʌqʼuen i tijicñʌyel Jehová. (Qʼuele jiñi párrafo 14).
15. ¿Chuqui yom Jehová chaʼan mi lac mel tiʼ tojlel yañoʼ bʌ?
15 Jehová miʼ pʌsben i yutslel jiñi tojoʼ bʌ yicʼot mach bʌ tojobic (Mat. 5:45). I yom chaʼan joñonla jaʼel utsonla tiʼ tojlel pejtelel lac piʼʌlob. Jehová yom chaʼan jiñi i wiñicob maʼañic miʼ yʌlob yambʌlob, maʼañic miʼ techob wocol yicʼot chaʼan utsob tiʼ pejtelel ora (Tito 3:2). Jin chaʼan, mach ñumen ñuquic mi la cubin lac bʌ tiʼ tojlel jiñi maʼañic bʌ miʼ ñopob Jehová (2 Tim. 2:23-25). Mi mucʼʌch lac pʌsben la cutslel yañoʼ bʌ, mi caj lac ñumen lʌcʼtesan lac bʌ ti Jehová.
MIʼ MEJLEL LAC LɅCʼTESAN LAC BɅ TIʼ TOJLEL DIOS JAʼEL CHEʼ BɅ CʼUÑONLA
16. ¿Bajcheʼ yubil tsiʼ yubi i bʌ tsaʼ bʌ i tsʼijbu jiñi Salmo 73?
16 ¿I chuqui miʼ mejlel lac mel mi tsaʼ cʼoti lac ñaʼtan chaʼan Jehová mach lʌcʼʌlix an ti lac tojlel tiʼ caj jiñi tsaʼ tac bʌ lac mele ti wajali? Laʼ lac ñaʼtan tsaʼ bʌ ujti tiʼ tojlel tsaʼ bʌ i tsʼijbu jiñi Salmo 73. Tsiʼ yʌlʌ: «Tsaʼ cʌlʌ cʌyeʼ c ñopet. Colel tsa cʌlʌ yajlel. Mach xucʼulic coc, colel i tʌjtsʼel» (Sal. 73:2). Tsiʼ yʌlʌ chaʼan tsiʼ «chaʼle tsic pusicʼal», chaʼan lajal «bajcheʼ tonto bʌ mach bʌ anic i pusicʼal» yicʼot «bajcheʼ bʌteʼel mach bʌ anic i ñaʼtʌbal» (Sal. 73:21, 22). ¿Pero tsaʼ ba caji i ñaʼtan chaʼan Jehová maʼañic miʼ cʼuxbin yicʼot chaʼan maʼañix mi caj i ñusʌben i mul tiʼ caj jiñi i sajtemal tac yicʼot i cʼunlel?
17. a) ¿Chuqui tsiʼ mele jiñi salmista cheʼ bʌ maʼañix baqui jaxʌl tsiʼ yubi i bʌ? b) ¿Chuqui mi laj cʌn ti jiñi tsaʼ bʌ ujti? (Qʼuele jaʼel jiñi foto tac).
17 Tajol jiñi salmista tsiʼ ñaʼta chaʼan Jehová tsaʼix i choco, pero jumucʼ jach cheʼ tsiʼ yubi i bʌ bajcheʼ jiñi. Tajol cheʼ bʌ maʼañix baqui jaxʌl tsiʼ yubi i bʌ tsiʼ qʼuele chaʼan yom miʼ lʌcʼtesan i bʌ tiʼ tojlel Jehová. La cujil iliyi come tsiʼ yʌlʌ: «Pero mach cheʼic maʼ qʼuelon. Chʌn añon quicʼotet tiʼ pejtelel ora. Chucul a chaʼan jini ñoj bʌ j cʼʌb. Mi caj a chʌn tojʼesañon majlel ti a tʼan cheʼ wʌʼto añon ti pañimil. Ti wiʼil mi caj a pʌyon majlel ti panchan baʼan a ñuclel» (Sal. 73:23, 24). Cheʼ bʌ cʼuñonla o chʼijyemonla mi la cubin, yom tsʌts mi lac chuc lac bʌ tiʼ tojlel Jehová chaʼan mi lac chaʼ taj lac tijicñʌyel come Jehová lajal bajcheʼ jiñi lac xajlel (Sal. 73:26; 94:18). I mi tsaʼqui lac chaʼle tsʌts bʌ mulil, mi lac mejlel ti chaʼ sujtel tiʼ tojlel Jehová come yom i ñusan lac mul (Sal. 86:5). Yomto mi lac ñumen lʌcʼtesan lac bʌ tiʼ tojlel cheʼ bʌ maʼañix chuqui yambʌ miʼ mejlel lac mel mi la cubin (Sal. 103:13, 14).
Cheʼ bʌ cʼuñonla mi la cubin, yom mi lac ñumen aqʼuen i yorajlel jiñi lac chʼujutesaya chaʼan mi lac ñumen lʌcʼtesan lac bʌ tiʼ tojlel Jehová. (Qʼuele jiñi párrafo 17).
LAʼ LAC LɅCʼTESAN LAC BɅ TI DIOS TIʼ PEJTELEL ORA
18. ¿Chucoch mi la cʌl chaʼan tiʼ pejtelel ora miʼ mejlel lac bej lʌcʼtesan lac bʌ ti Jehová?
18 Tiʼ pejtelel ora miʼ mejlel lac bej lʌcʼtesan lac bʌ tiʼ tojlel Jehová come maʼañic baqui ora mi caj i yujtel laj cʌn. Jiñi Biblia miʼ yʌl chaʼan «maʼañic miʼ mejlel lac laj cʌmben» jiñi i ñaʼtʌbal yicʼot i bijlel Jehová (Rom. 11:33).
19. ¿Chuqui miʼ pʌsbeñonla ili Salmo tac?
19 Salmo 79:13 miʼ yʌl: «A winicon lojon, tiñʌmeʼon lojon ti potrero a chaʼan. Mi caj c subeñet lojon wocolix a wʌlʌ tiʼ pejtelel ora. Mi caj c subeñob a ñuclel calobil lojon chaʼan miʼ subeñob i yalobilob jaʼel ti lajm ti lajm». Miʼ mejlel a ñop chaʼan, mi mucʼʌch a bej lʌcʼtesan a bʌ tiʼ tojlel Jehová, mi caj a taj bendición tac tiʼ pejtelel ora, i mi caj i mejlel a wʌl: «Dios i pʼʌtʌlelʌch c pusicʼal. C chaʼañʌch tiʼ pejtelel ora» (Sal. 73:26).
CʼAY 32 Yom xucʼulonla ti Jehová
a Jiñi añix bʌ ora i cajelob ti pensar o i yubiñob i chʼijyemlel tajol yomix miʼ majlelob ti doctor. Mi caj a ñumen taj información ti jiñi Lac Tsictesʌbentel número 1, 2023.